【龔成問答信箱】（Q22421-Q22440）

Q22421：

龔成老師:澳門現時情況一般般，疫情遙遙無期，很難重拾過往輝煌，加上賭牌及中國監管，請問金沙$31蚊買入)還值得持有嗎?還是優質股嗎？

身邊朋友依靠程式買幣，炒細價股，都有十分不錯的回報，只有我每月出糧以部份資金儲貨，分別是:

823 $74 20%
1038 $45 15%
66 $44 15%
1398 $4.55 15%
1928 $31 20%
3067 $17 15%

看似投資有質素的股票, 結果還是蝕了不少，長遠真的是可以財富增值嗎?

龔成老師︰

好多事情，唔好只睇表面，你要了解事情本身存在風險，和其長線發展的情況。正如2003年香港樓，大部分人都認為無得玩，死得。買左樓的大部分人都後悔，但中短期過後，人人都話「如果我當年在沙士價買到就好了」，這就是散戶思維，我希望你不是這樣。

以往我做證券行，只過唔少人短炒有時會賺到錢，但最終絕大部都係倒輸，只有長線投資一群才嬴。

其實你想變有錢人，你就應該睇下真正有錢人的做法。你見巴菲特靠投資致富，但佢從來都唔短炒，只會長線持有一些優質股，就令財富累積起來。

所以，長線持有優質股，永遠都係最好做法。

你要記住，投資係一個長線計劃，所以不用太理會短期的股價，以及企業的短期問題。你所選的都是有長期投資價值的股票，照持有就可以。

但要留意一點，任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

部分股略超左標，但由於超標不多，你可以用未來資金，慢慢去修正翻佢個比例就可以。

------------------------------------------------

Q22422：

龔sir 你好，我上年財務自由辭了職。雖衣食無憂但感到十分迷惘和失去方向，覺得自己已經停滯不前，每天只是家務運動看書看新聞沒有什麼突破；

另一方面感到非常不安，我的投資真的穩健嗎？股災來臨我能應付嗎？萬一血本無歸後我還能工作嗎？

早前更因為處理壓力不當沉迷打機煲劇，雖然暫時控制了惡習，但我覺得我需要尋求協助了。想請教龔sir，財務自由後應該如何生活，可以分享一下你的經驗嗎？

你是如何維持拼勁和熱情的？你的一天又是如何過呢？懇請指教

龔成老師︰

我講下自己。

雖然我可以財務自由，但我依然熱愛現時工作，所以我生活還很充實，除了工作教班、寫書、覆INBOX、出FB文章等。有時間，我會睇書增進知識，或者睇年報，去分析企業，同埋會做下運動。

我開心，同時認為對社會有貢獻。加上我仍有不同的目標。

其實你從全職變成退休狀態，係要時間適應。過去可能你係為工作而活，現在可以為自己而活，你可以諗下一些未實現的事情。

例如，一些係你以往想學想做，現在就可以實行。另外，你有更多時間做運動，可以為自己定下鍛鍊計劃，提升身體水平。

再有時間，你可以找一些義務工作，去回饋社會。

其實財務自由後，有好多事情都可以做，最重要係找到你所想做的事情，拼勁和熱情就自然會來。

------------------------------------------------

Q22423：

你好呀sir，本人近30歲，未婚，無物業，有計劃黎緊一兩年結婚/置業。

現月入$29000（已扣MPF），可供衡常投資金額約$11000，還有其它投資標的，如月供美股，以及每月保留現金（$5000）用於聯名戶口作緊急基金或將來結婚/置業支出。

有關港股月供股票想請教下，唔該呀sir

以下是我本人的月供股票組合

整個股票投資組合金額：$11000

快速增長 - 潛力股（$2000）

醫藥股 藥明生物（2269）$1000
汽車股 比亞迪（1211）$1000

平穩發展 - 增長股（$4000）

科網股 阿里（9988）$1000/小米（1810）$1000/騰訊（700）$1000
內險股 中國平安（2318）$1000

收息資產 - 收息股（$5000）

地產股 新鴻基地產（016）$500/長實集團（1113）$500/領展（823）$500
金融股 港交所（388）$1000/友邦保險（1299）$500
指數基金 盈富基金（2800）$500
內銀股 建設銀行（939）$500
澳門博彩股 銀河娛樂（027）$500
公用股 中華煤氣（003）$500

1. 有感以上月供組合過於分散，可否建議刪減邊隻股票，或更改那些月供港股？

2. 有感港股的市況不明朗，會否現時選擇暫停月供港股，保留現金作月供ETF/備用？

3. 如以7:3（潛力增長股：收息股）分配月供股票，請問有沒有好建議？

謝謝呀sir無私的解答

龔成老師︰

1) 你選股數量太多，最多5-10隻左右好了。一來會較易定期管理，二來你可以減低左個股月供費用成本比例。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你30歲，應以增值為主，建議你用「平穏增長股」(2318,0016,1113,0823,1299,0027,0003) + 「潛力股」(2269,1211,9988,1810,0700,0388)作組合，去創造一個增值平台。

「收息股」(0939)你就暫時唔好供住，因為佢地增長力好弱，只係用來收下息，唔適合你年紀。

我建議你，最好每個行業，選擇一間。另外，我幫你調整左個月供金額，你可以作為參考，每月餘下儲蓄就等大跌市，才動用。

「潛力股」
醫藥股 藥明生物（2269）- 這股不確定性高，不宜月供。可以考慮用中生(1177)代替 - $1000
汽車股 比亞迪（1211)，現時價格偏貴，要回到$180左右，才可以月共。你可以用ＧＸ中國電車ETF（2845）去作替代 - $1000
科網股 阿里（9988）$1000/小米（1810）$1000/騰訊（700），選其中一隻或用安碩恒生科技(3067)/代替 - $1000
金融股 港交所（388）- $1000

「平穏增長股」
保險股 中國平安（2318）/友邦保險（1299）選其中一隻 - $1000
地產股 新鴻基地產（016）$500/長實集團（1113）$500/領展（823）選其中一隻- $1000
指數基金 盈富基金（2800）$3000
澳門博彩股 銀河娛樂（027）$1000
公用股 中華煤氣（003）$1000

2) 我地投資係唔會"估"走勢，我地只會用平貴，去定入市策略。現時大市在合理水平，我地係無需要去停止月供。

因為月供係一個長線計劃，透過平均格價買入法，去拉平衡你個成本。如果你隨意去變動，好易破壞左個效果，影響長線回報。

如果你係初學者，未識定平貴，我建議你一直不理價格照供。除非你自問有充足投資經驗，你才可以考慮在大市明顯貴時，調整供款，甚至停供。

以現時市況，你每月保留$5000作備用，如果出現大跌市，你可以考慮用這部份資金入市掃平貨。

3) 以你年紀，大約「平穏增長股」和「潛力股」各一半，但若你投資經驗較弱，「潛力股」比重可以下調少少。

------------------------------------------------

Q22424：

老師，您好。我系由朋友極力推介之下開始睇你著作及fb專業的。

我做咗全職主婦10多年，育有一對仔女，全家收入盡在爸爸一人負責，眼見當下經濟負擔非常吃力，很渴望能有機會脱貧，望老師指點！衷心感謝。

爸爸月入2萬多，一家四口已啱啱夠糊口，儲蓄已經不用多說。

請教一下，我結婚時有些金器，如果賣哂套現投資股票(估計有3幾萬而已)，不知這想法可行嗎？望能指點，謝謝感激！！

龔成老師︰

首先，你要明白我地做財富增值，就係透過持有一些優質資產(如物業、優質股等)，讓其自然成長，去達至財富增值目的，所以成件事一定係長線。

你唔好預投資，可以為你短期財務造成任何改變。但只要持之以恆，長線一定會累積到一筆唔錯回報。

黃金是貴金屬，有「終極貨幣」之稱，是人類自古以來的貨幣，因此，有持有價值，而現時我地的現金，一定長期貶值，所以黃金長期會向上。

不過，黃金沒有現金流，持有無法創造出經濟價值，其主要作用是對沖黑天鵝事件。

所以，你可以持有黃金，但不用佔財富比例太多(<3%)，而且持有的應該為實金。但由於你那些是結婚金器，有紀念價值，所以不必跟我3%標準，可以自行衡量是否保留。

其實3幾萬，對你長線投資幫助係有，但唔算好大。反而你要想辦法，在生活上盡量開源節流。如果開支無法減少，你就要睇下點增加收入。

例如開網店、做兼職等，目的係希望每月都可以儲到一定資金，去定停進行財富增值。

當你能做到每月空出一定資金，就可以用月供模式，去累積優質股。

月供目標以增值為主，建議你用「平穏增長股」 + 「潛力股」作組合，去創造一個增值平台。若你偏年青，2者佔比大約一半。若你較近中年，就要進一步下調潛力股比例，因為佢風險較大。

你每月先用5成儲蓄做月供。其餘先儲起，用一邊月供一邊儲蓄的策略。

若你每月可用資金不多，可以先集中係指數基金，以免個股月供費用成本，佔比太重。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

------------------------------------------------

Q22425：

龔成 你好呀 我搭入30歲，近期先留意到你既分享 對你既投資心得，好有興趣 想問下你既意見

我做緊一份有4XXXX人工既工作，不過大約有1XXXX會俾屋企人

平時都會自己記錄洗左幾多錢，己經紀錄左好幾年，設定左每月最少會儲$10000，計算下平均每個月都可以$12000-15000既儲蓄

依加我有大約60萬港幣現金，另外仲大約2XXXX既澳幣現金。澳幣係做左好多年定期 慢慢累積番黎。因為以前黎講做定期 息口仲好D 一直都keep住做

依加息口好低 暫時放左係銀行 未有計劃有咩投資。

我既計劃 其實想係香港置業 自己同屋企人一齊住港島，最理想係可以係番港島置業 希望可以買到大約400尺既單位。

依加平均尺價都要10000-20000 即係大約400-800萬。不過我既資金增長 應該唔能夠追得上樓價 有咩方法。可以係5年之內 做到我既目標？

有咩書/野 可以建議我睇 增長下基本知識

龔成老師︰

以你情況，可以投資一些有增長力優質股，去累積置業資金。

定期這類定息產品，無增長力，只係純收息，不太適合。而外幣，除非你有實際用途，否則你換回港元去投資，咁會較好。

投資增值方面，你可以選擇一些「平穩增值股」+「潛力股」，比例大約各一半。如果你投資經驗較淺，潛力股要再調低少少。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄(大約$7500)，另一半就先儲起架策略。

現時大市只是合理區，你現有60萬資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

我假設投資回報有10%（連股息再投資），你每月投資$15000 + 現金60萬，5年後大約會增值至200萬，相信對你置業有一定幫助。

但想提多你一點，係我地配置財富組合時，除了質素外，平衡性都好重要。

所以，你係置業同時，最好都留有一定優質股係手，以免成個組合偏重左係物業類，而造成過度集中性風險。

------------------------------------------------

Q22426：

hello老師。我係您既學生。請問下點解之前股市跌成咁。您如何睇是否係入市時機？謝謝

龔成老師︰

由於中央出了不少新政策，當中包括大型企業、科技、教育、醫藥等範疇，令不少企業營運風險高左。

而且，中國擬對在美上市中國企業加強監管，都令市場氣氛進一步轉差。

但我地做財富增值，只會用企業長線質素作考慮，只要這些政策對企業長線本質，無造成明顯負面影響。你要小心分析，政策對該企業，3年後是否仍影響，還是只是一些表面因素？

這種跌市，反而造就我會入市機會。

------------------------------------------------

Q22427：

Hello 龔成，over over，第一次pm 你，因為有啲驚驚

應該點部署？尤其是2100 loss咗一半

百奧家庭互動2100 $2.3入 78000股 on 16Apr2021 Now 1.07

大唐發電991 $1.22入 76000股 on 16Mar2021 Now. 1.13

另外：中銀3988 5.2入 42000股 on Sep2015 $2.89出32000股 on 17 Mar 2021，之後轉左［2100:百奧家庭互動］，Now 仲有10000股中銀.

龔成老師︰

首先你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

百奧家庭互動（2100）是中國兒童網頁遊戲開發商，透過旗下門戶網站１００ｂｔ﹒ｃｏｍ開發與運作的虛擬世界為用戶提供在線互動娛樂和學習。

佢收入主要來自出售遊戲相關的虛擬物品及服務、為用戶提供高級功能的會員訂購費、廣告收入，及授權使用集團的專屬卡通形象所得的收入。

騰訊入股會提高發展力，長遠正面的。但你買入價有點高。你預佢有機會上落較大，若你佔你組很大比重，最好將部份換碼至其他優質股，去平衡風險。

大唐發電(0991)質素較一般，盈利都幾波動，而且賺錢能力唔強，同樣只宜小注。若持有較多，最好將部份換碼。

中行（3988）有投資價值，由於內地經濟無過往年代咁強，股價無過往咁好，由中美貿易戰開始，中國的經濟動力已有所減少，加上最近的疫情，都是影響經濟的因素。不過，初步已好轉，但不是高增長型。

這股主要係收息，但就唔好對股價有太大期望。若你係中年至退休人士，這股可以。但如果你係偏年青，就應該投資一些增長力較好股票，中行這類收息股，未必太適合。

------------------------------------------------

Q22428：

你好，龔sir

1.想問下手揸3690，但已蝕左三分一價錢。應唔應該止蝕？但我見佢其實係優質股，係咪應該等佢沉澱左大陸既政策先，再等佢慢慢上？主要係睇佢中長線

2.想問下1024快手算唔算係優質股？有2手係$193買左，想知應唔應該止蝕？因為1024既對手係抖音，相對之下會唔會輸蝕？定我應該等到佢2022年業務穩定先？

本身係短炒，點知係高位買入！

3.已經將儲蓄既3分2投放左係股票市場，所以比較擔心以上既股票

感謝回答

龔成老師︰

1) 當你已持有一隻股票，買入價已經唔係一個重點考慮因素。你應該分析佢企業本質，係唔係值得長線持有。

美團點評（3690）有潛力的，過往一直虧損，到近一年，開始有正現金流，這是一個實質的利好因素，因為之前一直在燒銀紙，現時初步見到成效，不過，估值的方法好虛無，因為現時的市盈率仍過百倍。

如果有利好消息，佢可以上好多，但如果估值修正，股價可大跌。

只可以話，此股潛力是有，但不確定性都大，故一定不能大注。若佢佔你組合比例不高，可以守。

2) 你先要明白一點，我地投資股票，其實等同投資一間企業。希望透過其自然增長，以達至財富增值的目的。

所以，我地投資一定係長線，而唔係短期炒賣，去賺差價。

快手（1024）係全球數一數二大的直播平台，絕對是一隻優質股，有獨特性，有客戶群，有潛力，長遠的發展力正面。這股有長線投資價值。

快手與業務夥伴合作提供了一系列產品和服務，於滿足平台上自然產生的多種需求。快手提供的產品和服務包括娛樂、線上營銷服務、電商、網絡遊戲、在線知識共享等。

快手科技已建立了穩定的用戶，在全球已佔據了重要的位置，企業有一定的優勢，以及獨特地位。加上用戶仍在快速增長，以及增長趨勢仍持續，預期有一定的發展。

雖然這刻盈利不多，甚至因加強發展業務而出現虧損，但這類股的分析特點是將來，等之後的收成期。

由於已擁有一定的優勢，以及仍增長中，企業要將用戶化成現金並不困難，只是時間問題，以及多少問題，預期2022年盈利模式已穩定，同時有一定的盈利。

雖然市場有不少競爭者，如抖音等。但此企業有質素，相信長線發展都係正面。除非2手佔你組合好大比重，否則長線持有，就可以。

3) 現時大市在合理區，你股票和現金比例，係可以。你只要確定持股，係有長線投資價值，中短期波動可以唔洗理。

持股當中，有無一些股票，係佔組合比重過高(特別係一些不確定性高的股票)，就要調整。個別企業和行業，不要佔組合15%和30%以上，銀行業更加不要高於組合20%，否則會有過度集中性風險。

之後，一直長線持有就可以。

------------------------------------------------

Q22429：

老師，阿里健康$18.5和平安好醫生$110各兩手，可以長持三年以上嗎？還是止蝕離場會較好

因為看這兩隻股票最近一個月跌幅比較大，唔知道應該繼續持有定係點好，謝謝

龔成老師：

其實這兩股，長遠業務有發展。但要注意幾個風險，第一，難估值，這令到佢由高位回落不少，就是之前貴。第二，業務變化大，投資這類股，要預左大上大落，因此，不宜持有太多，如果你太集中在這行業，會在一定的風險。第三，政策相關風險。

如果你持貨，要減。但如果不多，可守，但要預佢會較波動，要耐心先守得到。

阿里健康（0241）這是潛力股，佢營運醫藥電商、互聯網醫療等業務。

「醫藥電商業務」，這業務主要有兩種業務模式，由自營電商和天貓代運營，涉及非處方藥品、醫療器械、計生用品等。

另外，就是「互聯網醫療業務」，阿里健康與國內多家二三級醫院建立合作關係，患者可以通過阿裡健康、支付寶等平台，做到線上掛號、問診、諮詢用藥等等的服務。

阿里健康利用醫療AI系統「DoctorYou」去進行營運，該系統包括臨床醫學科研診斷平臺、醫療輔助檢測引擎、醫師能力培訓系統等，輔助醫生睇病。

業務上，有好大的潛力，不過，本質波動，股價上落大，消息多，市場炒作多，這類股風險都不少。最大問題是無人能正確估值，市場現時只是估估下，推將唔到佢將來的價值。

這類股只建議小注持有，但你預佢股價上落大。

平安好醫生（1833）長遠有發展力。

佢係中國領先的一站式醫療健康系統平台，透過「移動醫療+AI」，為每個家庭提供一位家庭醫生，為每個人提供一份電子健康檔案、一個健康管理計畫。

平安好醫生係中國互聯網醫療健康市場的先行者，以平均月活躍客戶，以及在線諮詢量計，是中國最大規模的互聯網醫療健康平台。

企業的業務有潛力，本身有優勢，大環境的配合，都成了這企業的機遇，前景正面，不過財務數據未算好理想。

雖然長遠的企業價值向上，但股價在中短期，可以十分波動，因為市場以「前景」作估值，故此變化必然很大。好難得出平貴的準確數，只能估估下，作參考。

因此，低風險者未必適合投資，若投資者考慮這股，亦不能大注投資，買入後就耐心長線持有，等待這企業改變整個行業的情況，現價算合理區中間至上部。

------------------------------------------------

Q22430：

龔Sir早晨，銀行向我sell一種產品，係向銀行借9成，例如270萬，利息係P-3，即現在係2厘，而自己攞30萬出嚟，合共300萬，每年保證有3.3厘收益，五年期滿，即是賺息差，係向太平保險買的。請問這類產品買得過嗎？謝謝老師

龔成老師：

風險度為中等，都可考慮，但要記住，不是無風險的，第一，如果外圍加息，P增加，你有可能息差變負數，你會得不償失。第二，如果你中途要賣出，可能要有損失。

------------------------------------------------

Q22431：

老師，我想問2878晶門半導體前景，是否為潛力股？上升空間如何？

2878是否比中芯國際更有值博率？

龔成老師：

中芯國際（0981）以平貴度來說，比晶門半導體（2878）貴，不過，中芯國際始終質素較好，應該先考慮這間。

先講晶門半導體，係一間無晶圓廠半導體公司，主要從事設計、開發及銷售專有集成電路晶片產品及系統解決方案業務。

佢的產品及方案可供應用於智能手機、平板電腦、電視╱顯示器、筆記本電腦以及其他智能產品。

雖然都有一定的生意，但多年來都出現虧損，到近年才算好轉。行業需求對佢是利好的。

這企業質素未算好高，因為技術未算好強，加上近期股價上升了不少，值博率只是一般。但如果可承受風險，這類股不是不能小注，但如果是穩健型，就不應投資這股。

中芯國際（0981）業務有增長力，但未必能稱為好優質的股。

睇翻佢過往的業務情況，雖然仍每年的生意都有增長，但盈利就有波動，反映雖然大環境的市場在增長中，但佢的成本與售價，就未必在佢掌握的範圍，最後造成盈利波動的結果。

雖然這股都有前景，但以佢面對的情況，但好難將佢定義為最優質的股票。

加上此股近年升了不少，就算有所回落都唔算平，加上之前熱炒過，股價大上大落，投資要注意風險。這股唔建議大注，回翻D較合理。

------------------------------------------------

Q22432：

老師。1）中通快遞暫時唔好再加注我知道呀，上次問你時你都有提醒，咁需唔需要賣出呢？選其他股票更好？

2）明白，之後現金充裕或大跌市出現，平均買入水桶1和2的股票

3）明白3718現價可以加小小注，另外3067值博率算較高

另外，老師請問一下，我有渣打銀行股票戶口，之前問過職員不可做月供股票，但其實我係咪可以自己手動月供？

因為在買股票時，可選購入股數/金額，我自己入金額果欄，$2000/$3000就可以，就會自動買入碎股，然後我每月固定日子，自己買一次，就做到月供？

龔成老師︰

1) 中通快遞(2057)現貨照長線持有，不用沽出。

2) 無錯，緊記成個組合，唔好只理增長，我都都要照顧埋個平衡性。

3) 正確

至於月供，簡單來說，月供股票就是你每月將現金，買入某一隻或多隻股票，慢慢咁樣儲貨。

月供股票每月投入的金額相同，因此當股價上升時，買入的股數自然減少，而當股價下跌時，就自然會買入較多股數，如同自行調節一樣，去減低價格波動的風險。

其實一手手買都可以做到以上效果，你現金只要平均地慢慢投入股市(如保持住每月定額買一手)就可以。2個方法都可以，一手手買更節省了銀行月供收費，但你必需確保自已可以有自律性地進行。

但如果跟你計劃，自行儲碎股有2個問題。首先，好多時係銀行買賣碎股，都會跟買賣1手正股，收一樣收費。計翻埋，其實你這個方法的費用成本佔投資金額比例+好重。

第二，部份銀行買賣碎股，唔係可以好似平時1手手咁係網上買賣，可能要找專人處理，比較麻煩。

其實你可以唔每個月做買賣，拉長少少，每3個先入完整1手，咁都可以做到平均價格風險的效果。

------------------------------------------------

Q22433：

龔sir你好啊 想請問01255同01919是否應該繼續持有

01255 12.78買入
01919 14.7買入

最近都跌了不少，合理價錢應該是多少 感謝你～

龔成老師︰

任何股票，都會出現中短期波動。只要佢當中核心質素無變，依然係有質素，我地就可以照持有。

ＴＡＴＡ健康(1255)從事銷售鞋類產品；提供金融服務，包括證券的顧問服務，投資管理服務和企業融資的顧問服務；銷售保健品及奶粉；以及線上醫療服務。

現時收入，絕大部份來自銷售鞋類分部。集團所銷售的鞋類產品品牌包括Ｃｌａｒｋｓ、Ｊｏｓｅｆ　Ｓｅｉｂｅｌ、Ｔｈｅ　Ｆｌｅｘｘ和Ｐｅｔｉｔｅ　Ｊｏｌｉｅ。

此股多年出現虧損，睇唔到明顯的投資價值，沽出較好。

中遠海控（1919）主要從事提供集裝箱航運、集裝箱碼頭管理與經營服務。

整體的質素算是不過不失，雖然在行業有一定的規模與優勢，但行業整體的賺錢能力無過往咁強。

經濟好轉會對佢有利，因為始終是對經濟較敏感的行業，現時的股價已反映相關利好因素。股價大升後，其後之後較難有高增長，因為已反映了利好因素，反而預佢之後轉為平穩增長。

現價略貴，回1成左右，會合理翻d。持股都有投資價值，可持巿。

------------------------------------------------

Q22434：

多謝之前回覆。持貨比例我古應該都是幾個%左右。。。本身我都只有500股恆汽。我倉比較重既都係 1810，9988，3067，5，11這些穩重既股票941，916 ，823就大概十零個％左右

恆汽，還有些聽人講無潛力既股（後悔當時未接觸龔老師）都只是倉比例2至5%。恆大系當中，恆汽好似比較易反彈

老師，你簡直係我恩人，响危急關頭你咁快覆我，好感動

龔成老師︰

唔好客氣!

如果恆大汽車(0708)只係佔你組合2-5%，勉強可以守。但你要記住，佢而家係一架車都未生產過，所有市值都係建基於"前景"2個字。

所以，你預佢一定會好波動。佢升架時候，可以升好多。但大市氣氛較弱，或者有壞消息，都可以跌得好勁，你要明白這股很高風險。

至於其他恆大系，好似恒大物業（6666）其實都有質素，有長線投資價值。

但受母企3333影響，風險高左，現價合理，但要控制注碼。

而母企恆大(3333)本身，負債很重，加上近期很多大利因素。無貨的話，就唔建議投資住。

另外，以你年紀匯控(0005)和恆生(0011)、中移動(0941)這類收息股，唔需要有太多，應較集中在增長股上。

但由於你已經有不少潛力股(1810, 9988, 3067)，未來方向，可以加大平穏增長股數量，去令組合更平衡。

平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)

------------------------------------------------

Q22435：

呀sir 我之前同你講過有呢隻股(0698通達集團)

我平均$1有兩手，但而家咁樣我唔知點算好，一直想等返家鄉就走。但而家供股我唔識唔明，係未要再比錢？定係我d錢到扣？我係未止蝕走左好啲？

唔該呀sir幫幫我

龔成老師︰

正如之前所講，通達集團（0698）唔係劣質股，但整體質素只算是不過不失。

佢主要從事電器產品（包括手機、手提電腦及其他電器產品）零部件生產；為電子產品及電器提供金屬外殼及其他五金部件；及提供塑膠機頂盒及生產體育產品。

現價回落不少，已經算係偏平水平。但由於質素唔係咁高，只宜小注。

佢現時宣布2供1，意思係每持有2股的股東，就有權用作價$0.232，去供1股。如果你供的話，以你2手計，就要比$4640，之後你就會由20000股，變左有30000股。

當然，你有權唔去供，咁就唔需要額外出錢，照維持現有20000股。但由於市場在供股後，總發行股數多左，令每股可佔盈利下跌。

對不供股的股東，係不利。所以，你成日會聽到人講，供股供又死，唔供又死，就係這個意思。

此股畢竟質素較弱，我比較唔建議你再供，將供股權賣出，雖然會比人攤薄左將來利潤，但都無法子。現貨方面，你照持有就可以。

------------------------------------------------

Q22436：

你好，我都想報你的課程，但因為我住澳門，現在不能過香港。

希望你能過嚟澳門，我的兒子在香港，他報了你的課程，我每天都看你的Facebook

是的，你說得對，我的問題真是很大，心理質素好差。10幾年前投資港股輸了很多錢(幾百萬），從此不敢沾手，幾個月前開始看你Facebook，才敢買返。

No.1177$7.65是合理價嗎
多謝龔sir

龔成老師︰

其實我之前都有開過澳門班的，不過現時疫情，所以暫時停左，之後會再開翻的。

你或者可以預早留位，只要whatsapp 852-55457212我同事講，打「留位澳門班」就得。我地有具體資料就會 whatsapp你。

因為現時已有好多澳門人留左位。

在你全力重新投資前，你要先了解清楚，過往失敗的原因。

雖然而家你上唔到我堂，但你可以買《80後百萬富翁》、《財務自由行》和《股票勝經》睇住先。

這幾本書，我通常用來推介比初學者。希望我這幾本書內容，可以幫你找到過往投資失利的答案。

中生(1177)現價算合理區上部，近期受大市氣氛和中央政策影響，令佢有較大回調。但長線質素依然存在，現貨可持有，但你預佢中短期都會較波動。

我強烈建議你，在找到過往投資失利原因和學好正確投資方法前，唔好投資住。就算好想入貨，都係好小小注好了，這對你會較好。

------------------------------------------------

Q22437：

其實快手真的那麼差，我186有貨，是否已到入貨時機。

老師，如果李寧96入左，係唔係好大鑊，有無機會返家鄉其實我在李寧賺了好少，

只係果日見中國玻璃賺了三干，便以為轉去李寧穩陣，結果一直跌下去

龔成老師︰

快手(1024)不是劣質，但最大問題是貴，所以向下，加上近期大市氣氛和中央政策風險，令股價較為波動。若你持貨不多，係可以守。

現價只算係合理區頂，加上此股都有一定風險度，若你持貨已佔組合一定比例(大約可佔組合5-10%)，就算再平，都暫時不要加注。

李寧（2331）有質素，佢係中國領先的體育品牌企業之一，擁有品牌行銷、研發、設計、製造、經銷及零售能力。

產品主要包括運動及休閒鞋類、服裝、配件和器材系列。主要採用外包生產和特許分銷商模式，已於中國建立龐大的供應鏈管理體系以及分銷和零售網絡

亦自行經營李寧牌零售店，李寧牌產品的主要銷售渠道為特許經銷，亦通過直接經營之零售店舖進行銷售。

增長力不差，這股可長線。不過現價好貴，如果本身持有無問題，但要回到你買入價，你預當成個大環境和經濟，明顯轉好，或者佢賺錢能力大升，才有機會。

中國玻璃（3300）未到好高質，盈利有點不穩。從質素上分析，你換至李寧係正確做法。

記住，我地投資重點係"優質股"、"長線持有"、"定平貴，在合理價時，分注入貨"。只要你做到這幾點，長線回報唔會太差。

------------------------------------------------

Q22438：

老師你好，我好想做有錢人，所以我今天一直忍，一直管好理財，一直慳，我想將來過得比人舒服。好想聽你意見，你的意見一定是最平實穩重，聽你的點評會令我更有動力。

27歲，每月草20000。

1）現在的股票和現金比例好不好：
285@38
823@70
1177@7
1211$45
1810@23
2013@11
2800@26
2823@13

2）從未賣出過股票，但我想知這些股票的買入價好不好，在將來的值博率高不高。

3）在財務上，我有沒有地方可以做得更好，分配得更好，想累積更大財富，想聽你意見。

追蹤你4年，你幫左我好多，多謝你

龔成老師︰

多謝你一直支持!

1) 現時大市在合理區，你現金和股票比例，好理想。

2) 你這些持股，都係有質素，同時都適合你年紀。買入價都在合理區，都有一定值博率，你照長線持有，就可以。

比例上，你潛力股(0285, 1211, 2823, 1810, 1177, 2013)稍稍多於平穏增長股(0823, 2800)，由於你年青，所以無問題。

但將來再有新投資，就要留意，唔好再出潛力股比重上升，否則風險度就會偏高。

3) 除了以上持股，你可以用每月儲的2萬蚊，進行月供股票，去提升你財富增值能力。

策略上，你可以投資「平穏增長股」和「潛力股」。你每月5成儲蓄，即是用$10000做月供。其餘先儲起，用一邊月供一邊儲蓄的策略。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

餘下的另一半現金，就連同現有現金去等機會。當大市出現較大回調，就加大力度掃貨，然後作長線投資。

------------------------------------------------

Q22439：

老師，阿里巴巴點睇丫？我2百蚊入左，應唔應該再加柱大手買入呢？我覺得佢應該唔止呢個價。佢估價值幾多錢呢？

龔成老師︰

我唔會定個將來目標價，只要佢優質度不變，我就會一直持有。

阿里巴巴(9988)近期回落不少，算係合理區中，未算好平，不宜大手入貨。

但若果你係無貨，或者持貨不多，現價加注或入首注，係可以。

佢有質素，中短期一般，但長遠仍有增長力，之前貴，現價去翻合理區。

係業務層面，擁有相當的優勢，不少業務處於壟斷狀態，同時增長理想。加上正不斷發展延伸業務，這都會成為企業增長的潛力，預期增長會持續，這是阿里最大的賣點。

以企業的長期發展計，這股的確優質，但股價都有一定的波動，現價算是合理翻D，但都不是大手時候。

始終將面對內地監管可能收緊，因此風險度增加左，不過，我相信佢的整體優質度仍在，內地不是不想佢賺錢，只是想規管佢。佢已建立好完善的業務，因此本身是無得輸，只是賺多賺少問題，現時監管多左，點都會影響賺錢能力。

對於這類優質、有發展，但現價未算特別平的股票，是較好的方法，算是平衡了風險與增長的考慮。這股可以長線投資的。預佢現價約合理區中間。

------------------------------------------------

Q22440：

龔成老師， 請問3918用呢五年嘅數據黎計 合理區大概5.6到11.2左右正確嗎？

老師請問本益比算唔算係計平貴嘅其中一個方法@.@

老師用市帳率計更正是5.6-8.0 求證

龔成老師︰

金界控股(3918)你個估值闊左少少，你現價合理區中下部至底。

至於本益比(即市盈率)和市帳率，都係其中一些較常用的估值方法。

但唔係每種企業，都適用。你要睇翻企業和行業本身特性，才決定用邊種，或者邊幾種估值方法，去進行估值。

如果有上過我堂的同學，都會掌握到這些技巧。如果你唔係太理解，我唔建議你亂用，因為用錯方法估算出來價值，可以會有很大落差。

在未掌握好估值前，若想投資，可以用分注或月供模式，去平衡買貴風險，咁會較安全。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q21601-Q21620）

Q21601：

Hi 你好，睇咗你個page好耐，本人一路想做中低風險投資，只係未開始落手做，因為我知道好大部份財經資訊同新聞都唔係真係教人投資令讀者得到回報同被動收入，

而係好似龐氏騙局咁，呢個觀察令我大學揀商科都選擇咗marketing and pr，冇揀banking and finance，到而家我都係做嘢然後儲錢，冇投資過。

我想由頭開始學正確嘅投資方法，唔係投機或者賭博，我唔想做個啲無基礎知識扮識個類人，請問我可以點做？

如果係咁，我minimum應該預幾多本金慢慢累積呢？

多謝你睇我個msg！期待回覆。

龔成老師︰

你要分清甚麼是「龐氏騙局」，原理就是一個無任何經濟價值的項目，只利用新加入的投資者資金，令初期投資者得益，以這模式一支滾存。

但如果一間企業，本身有實體價值，對社會有長期正面影響，就不是騙局，你要分清「價值」的概念。

其實，坊間你會接受到好多投資資訊，但並不是全部有用。你要學識分辨那些"有用的客觀資訊"和"主觀的個人意見"。

前者係一些你值得參考的資訊，後者對你係無任何意義。

投資絕對唔應該係賭博，因此你需要有相關知識和經驗，去助你判斷每個投資機會。所以，你係投資前，一定要增進投資知識。

我自己會看好多有關投資、理財、股票、成功、激勵、心靈、致富等各方面的書。

我一開始，對投資一無所知，當開始睇，就發現自己過住的投資方法都是錯，更發現坊間的所謂「專家」、散戶，投資方法都是錯！

之後，我開始明白點解香港有9成散戶，投資股票都是輸多贏少，因為佢地無知識！

當我愈睇書，就愈明白真正的投資道理，同時自己的投資實力大升。由多年前輸多贏少，到現時贏多輸少。唔少散戶，可能憑短期市況好而獲利，但如果要做長勝將軍，就只有靠知識。

巴菲特的閱讀就更多，他多年來，絕對不是「睇住個市」，而是不斷睇書增加知識，睇年報了解企業。

我最初睇得好廣泛，到後來會睇較多「分析企業」、「價值投資法」、「巴菲特」類的書。

以下是我認為適合初學者睇的書，部分要到圖書館找的：

《我十一歲，就很有錢》
《經濟蕭條中，七年賺$1500萬》
《富爸爸，窮爸爸》
《思考致富聖經》
《秘密》
《財富金鑰匙》
《有錢人想的和你不一樣》
《世界上最偉大的成功寶典》
《洛克菲勒寫給兒子的38封信》
《解讀巴菲特》
《巴菲特傳-永恆的價值》
《勝券在握》
《智慧型股票投資人》
《非常潛力股》
《彼得林區的選股戰略》
《誰搬走了我的乳酪？》
《人性的弱點》

同時間，你都可以睇我架《80後百萬富翁》、《財務自由行》和《股票勝經》，都適合初學者。

至於開始投資，你唔需要預好多本金。其實只要每月有一定閒錢，就可以用月供股票，去做財富增值。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

若你係偏年青，應以增值為主，建議你用「平穏增長股」 + 「潛力股」作組合，去創造一個增值平台。

現在你每月先用5成儲蓄做月供。其餘先儲起，用一邊月供一邊儲蓄的策略。

由於你投資知識不高，因此可較集中ETF。到你有一定知識，對這些股票又有一定了解，才考慮加入其他股票，咁會較好。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

------------------------------------------------

Q21602：

龔sir你好，3年前接觸你的fb及書籍，見你一直推介1211， 思量後跟你買了少少，現在還持有著，真的萬分感激你！

講一講我背景，42歲，月入4萬，單身，與1位退休家人同住居屋（已供完），屋企所有開支我全負責，每月儲1.3萬。手上現金1百萬，但當中30萬要撥備以防不時之需。

因投資知識不足，股票分得太散，成19隻，當中不乏高位買入。曾經看過阿sir說8-9隻股票組合就夠了，所以想向阿sir請教一下我該如何整合出一個平衡及適合我歲數的組合

以下是手上股票數目及買入價-

銀娛，1手，$52.2
金沙，3手，$35
港鐵，1手，$41.2
粵海，2手，$12.28
比亞迪，3手，$40.6

福壽園，2手，$7.5
小米，2手，$22.9
阿里巴巴，2手，$215.8
騰訊，2手，$610
中生，1手，$7.72
平安好醫生，2手， $84.8

京東健康，1手，$112
金界，2手，$7.7
郵儲銀行，1手，$5.82
中行，1手，$2.95
中銀香港，3手，$29.81

中國人壽，1手，十幾年前買忘了價位
長和 及 長地， 各1手多，當年和黃重組換成的，和黃$68買入

今年4月剛開始月供 恆地$2000 及 中生$1000

想請教阿sir-

1）19隻股票內哪些該集中保留？

2）中銀香港，金沙，郵儲，一來高位買入，二來好似增長不大。是不是等到升回買入價後該優先舍棄呢？

3）手上股票市值8x萬，可動用的現金70萬，比例約一半一半。是不是全部現金都留待大市在平宜區時才入貨較好呢？

如果現在想慢慢入10萬貨，該加注哪隻較好？

謝謝你的時間及解答！Thank you very much!

龔成老師︰

1) 你現時有股票，都係有質素和適合你年紀，不需沽出任何一隻，照長線持有就可以。

中國人壽(2628)賺錢能力弱左，質素只算中等，現貨可持有，但不要加注。

但長線計，你要集中翻係10隻以內，否則你好難定期去審視佢地質素。

2) 首先你要明白一個概念，我地持有一隻股票與否，關鍵位是企業質素、前景，不要被買入價影響。因為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心，照持有就可以。

如果企業無質素，但你現時蝕錢中，繼續持有只會令你財富繼續貶值，因此要賣出。

如果企業質素轉差，就有可能要減持，因為這股佔你組合的比例，未必值得太多。

這3隻股票都有質素，佢地增長力無潛力股咁高。中銀香港(2388)和金沙(1928)有平穏增長力，加一定股息。而郵儲銀行(1658)主要係派息。

雖然佢地增長力唔高，但有助於你平衡成個組合，建議保留。

3) 現時大市只係合理水平，現金佔比重大約3-5成。餘下資金，就等大跌市出現，才加大力度掃貨。

你想再動用10萬，去分注入市，都係可以。

由於你現時組合，潛力股較多，再加上不少潛力股都在略貴水平。我建議你這10萬，集中係一些平穏增長股身上。現價都算合理水平，可分注儲貨。

另外，你月供組合都可以。但我建議加大月供供款，最好用每月一半儲蓄去做($6500)，餘下一半儲起，等大跌市機會。

------------------------------------------------

Q21603：

龔成老師，本人一直有追蹤你的FACEBOOK和YOUTUBE頻道，雖然你我不曾認識，但對於你想提升大眾的財務知識水平的大任，我實在深感佩服。

而當中的一些觀點，我卻出奇地認同，所以我想寫信給你。感謝你寫了80後千萬富翁這書，也希望藉此告之你有知音，認同其致富之道。

其實我和龔成老師的背景有點相似，自小在公共屋村長大，家境非常一般，讀書也不是特別擅長，會考只有十五分，大學也是剛剛好的進去，畢業成績也是非常一般。還有一點相似的是，我們畢業後都從事銀行業。

龔成老師在很早便明白為富者，有很多道理並非一般中小大學課程所傳授，反而更多是躲在日常生活中的潛則規。我贊同推廣財務教育，畢竟金錢是我們所有人一生中用得最多的工具，但現今竟缺乏學科教授。

然而現在的教育制度也僅僅是培養年輕人成為一個出色的僱員或專業人士，而絕非是一個創業家或投資者。

我和龔成老師也有一點很似，就是很早已經讀了很多金融及理財書藉，可能在潛移默化下走上一個銀行家之路。

可是現今的銀行家大多變成跑數的代表，亦只是公司的其中一個齒輪，即是離不開僱員的命運，你所有的付出和努力說穿了也只是為公司的盈利貢獻。

你所分得的其實很少，但付出了最寶貴的時間，這點我非常明白，但我之前 沒有老師當初的勇氣逃脫這命運之輪。反而沉醉在大公司所給予的看似亮麗的職位和不高不低的收入。

當然後來我真的離開了創立了一隊銷售團隊，單純為了持續而穩定的被動收入和可持續的事業發展。

所以我看到龔成老師所提及成為富翁的五大範疇時（全職股票/商業投資者，全職物業投資者，知名專家，企業家，擁有強大銷售團隊）突然發覺自己一路走來方向是對的。

雖然我和所有一般大眾一樣不是天才，也不是特別聰明。但我天生對所有學問的追求和強大行動力，令我創造了很多人認為的不可能。

在我29歲時買下第一層物業。在35歲，在銀行事業正處高峰時離開選擇一條不一樣的路。在於39歲時重返中文大學修讀全職MBA，主修創業家精神。

在40歲時選擇創立銷售團隊不再為大公司拼命，而是為自己而作選擇。回顧到此，再看看你寫的書，便明白有知音，所以非常感激你可以將你的想法匯集成書，以簡潔的方式表達出來，激勵大眾。除了堅定了我的信念外，你的點子也給我和同事們訓練的重要材料之一，我實在感激。

你在書本中提及銷售能力的重要性，年少時的我曾對銷售員有種不屑之感。

我不知道是大眾的刻版印象影響了我，還是成長中有植入錯誤觀念。到我認真反思為富者應具備的能力時，我真的認為銷售技巧和投資知識非常重要，

其實每一個人也需要作銷售，包括是向股東或潛在投資者解說的CEO，以及是提出論點和協議的大律師，本質上也是銷售。所以愈快掌握和深入研究當中技巧對將來致富之路會更為輕鬆。

最後，我花了二天時間讀完80後千萬富翁，在此我鼓勵其他人。龔成老師所說的並不是提供股票號碼，而是確實地，有系統地說明致富的潛則規和在正常書本中學不到的論財知識，所以我非常推薦這書。也希望在不久之將來可以和老師好好交流一下。謝謝你。

你的追隨者

龔成老師︰

多謝你的支持！其實我希望將正確投資理念，和一些過往經驗和方法，跟大眾分享。

希望為一班有理想，但未找到方法的人，提供一條可參考的道路。

同時，也為一班對投資理財有誤解，因而到處碰壁的朋友，引領佢地重回正軌。

成個財富增值之路，要透過不斷學習，令自己保持進步，才可以令我們走得更高，更遠。

其實當我寫書、教班時，我除左想賺錢外，同錯會一定想「怎樣貢獻到社會」，這是一個好大的核心，我相信只要這個大方I向正確，所做的事就正確，而錢就會進來。保持努力，加油~

------------------------------------------------

Q21604：

老師，你好呀。最近岩岩睇完你講樓市既書，

有一章講到地區性。我想問最近有好多新樓盤既位置都係新開發。

我想問問老師點睇屯門掃管芴一帶既新樓盤。

呢一區會唔會受惠到屯赤公路，駁去港珠澳大橋。
發展潛力大唔大呀？好唔好係果區上車

龔成老師︰

屯門是大型的住宅區，商業活動少。而且地理位置上，較遠離市區，因此樓價與市區有距離。

但隨屯門港鐵通車，屯門區交通會較以前便利。屯赤公路，可能都會係一個利好因素。

但始終屯門跟市區有一定隔離，而掃管笏雖在屯門﹐但隔離港鐵站較遠，未能明顯受惠。

因此，掃管笏升值潛力係有，但唔會話好高。因為所有利好因素都反映左，預期掃管笏配套，未來都唔會有好大提升。

------------------------------------------------

Q21605：

想請教，我五十歲，看了你的幾本著作！先想學買股票！

（我份工六十歲要退休，我只剩十年時間有收入去投資！）我應該用月供買邊D股票？

（我每月得4000可運用）手中儲蓄有18萬（但唔係太咁動用)？謝！

龔成老師︰

以你50歲的年齡計，其實已開始為退休做準備。你離退休尚有10年，只要好好把握，都可以做到一個合理增值效果。

但財富增長同時，我地不能過於進取。因此，你可以投資「平穩增值股」+「收息股」。

現時的$18萬，暫時只能動用$7-10萬，因為大市唔算平，你要分注投資，同時留下大約一半資金，等大跌市時入平貨，作長線投資。

當然你覺得自己風險承受力唔高，你保留多一點現金，都係可以。但就會令你財富增值效率，會慢左少少。

月供股票方面，你可以先用$1500供盈富（2800）和供2隻收息股(各$750)。餘下$1000就儲起，同樣等大跌市機會。

但就隨著年齡增加，你要慢慢增加收息股比例。到退休時，收息股佔組合100%。因為你到時，需要透過收息股的現金流(即係股息)，去支持你退休後日常開支。

以下是一些適合你的選擇，你可以從中參考下。

收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

------------------------------------------------

Q21606：

你好，想請教你一些意見。我今年47歲單身，同家人同住公屋，自己有銀行儲蓄大約39萬，股票大約11萬，MPF大約55萬。

想自己搬出來住有私人空間，買樓但又唔想全部銀行儲蓄用晒，唔知好唔好租樓 。

又諗過海外買樓會平啲，再放租出去，再在香港租樓。
你有什麼意見？我頗煩惱。

謝謝！

龔成老師︰

如果置業後，會令到你資金儲備盡用，再無閒錢去買優質股，去保持投資增值，係唔理想。

至於租樓，會令你可投資資金減少，減低左財富增值能力。如非必要，我都唔建議咁做。

當然你可以用買海外樓收租，再租香港樓的方法，去平衡個支出。

但你必需對海外樓投資，有全面的認知，才好實行。我地投資的其中一個關鍵，是你有多認識這項目，「不認識就不投資」，如果你真的已了解當地的物業市場、租務市場、法例、經濟發展，那可說是過了第一關。

土地是有限資源，所以長期一定上升，但你都要分析這地方的長期土地供應。另外就是匯價如何，就算物業有穩定租金，以及樓價上升，但若然匯價不穩，都會對你的投資造成打擊，這方面不能忽視，你應該了解當地貨幣過去的變化，以及將來的強弱分析。

若你不懂，就不要去投資了。

以你47歲，要開始慢慢為退休做準備。在財富增值上，你可以集中係優質股身上。投資目標，可以用「平穩增值股」為主。

現時的$39萬，建議動用多$5-10萬，因為大市唔算平，你要分注投資，同時留下約一半資金。長線投資。

如果你每月有閒錢可以儲，你可以做埋月供股票，供「平穩增值股」。比例上都係用一半，餘下儲起，等大跌市機會。

------------------------------------------------

Q21607：

龔sir, 我是一位50歲嘅未婚女士，有男友但未有結婚打算，現獨居在與父親合資的自住物業。

2008年以198萬買入，市值約750萬，按揭尚餘107萬還清，每月用$6,600供樓。

我現時喺政府做合約職員（今年內可能轉制成為公務員），月入5萬，每年約滿後有一筆約滿酬金，佔全年收入15%，收入算穩定。

做呢份工之前一直不懂投資，亦沒有太多儲蓄。入職5年後到現在儲到約55萬現金，另有30萬股票，同埋下年就供完嘅基金投資保險（現值約24萬）。

股票資產分佈如下：
388 (100股）@$362.7
823（571股）@$78.9
1211 (517股）@$168
1810 (1200股）@$27.3

2800（1774股）@$26.8
6618（100股）@$165
9988（107股）@$250.5

每月扣除按揭供款，所有開支和供養父母的費用後，每月大約儲到$15,000現金。

早前follow你嘅post得到啟發，亦都很認同價值投資法，所以用其中$5,000月供2800和823至上述數量，供咗3年左右直到去年因某些原因停咗月供。

現有數個問題希望你指點一下：

1. 根據現時嘅工作狀況，我預算65歲退休，希望用餘下嘅工作年期可以盡快儲到更多錢做退休儲備。如恢復月供股票應該怎樣分佈較適合我？

2. 你對我現時嘅股票組合有什麼評價？由於有啲股票於較高位買入,現時股價回落，是否應繼續持有抑或應趁低吸納更多？

3. 現時嘅資產應怎樣配置才有機會達到每月$30000現金收入嘅退休目標？

4. 明年供完嘅基金投資保險，到時應全數提取作其他投資，抑或繼續存放滾存比較適合？

感謝你嘅耐性及期待你嘅回覆。謝謝。

龔成老師︰

1) 以你的年齡，其實要開始為退休做準備，但同時，財富仍有增長力（但不是進取），因此，你可以投資「平穩增值股」+「收息股」。

現時的$110萬(連同將贖回24萬基金)，可動用多20-30萬，因為大市唔算平，你要分注投資。同時留下一半資金，等大跌市出現，用來買平貨，作長線投資。

月供方面，你可以供「平穩增值股」+「收息股」。每月先用$8000供款，餘下$7000就儲起，同樣用來等大跌市機會。

如果你風險承受力較高，又想進取D，可以較集中係「平穩增值股」。相反，你較保守，可以較集中係「收息股」。

但你要留意，隨著年齡增加，要慢慢增加收息股的比例。到退休時，收息股應佔100%。

平穩增值股，例如盈富（2800）、金沙（1928）、長建（1038）、中銀（2388）、港鐵（0066）、恆基（0012）、平安(2318)。

收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。收息基金(3110)，都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

緊記，月供係一個長線計劃，唔好供下停下。咁樣會影響到平均價格風險的效果，會對你造成不利。

2) 你組合的股票，都係有質素。除左京東健康（6618）真係買入價偏貴外，其他都唔係太貴，算係貴左少少。

部份投資，雖然帳面上有虧損，但由於企業係有質素。長線佢地價值，都會慢慢提升，所以你長線持有就可以。

盈富(2800)和領展(0823)，未來再有明顯回調，你可以考慮加注。

但其他持股，因為風險較高，以你年紀不應持有太多。故只建議你持有現貨，不要再加注了。

3) 由於你自住問題已解決，也算持有一物業。故未來增值上，都係集中係優質股，令成個財富組合更平衡。

如果你希望退休後，每月有3萬蚊現金流，以股息率6%計，你需要本金600萬。

我假設投資回報有8%（連股息再投資），你每月投資$15000 + 現有110萬資產，15年後大約會增值至830萬，故這樣安排相信很大機會達至你的財務目標。

4) 你要睇佢扣除費用後，回報係多少。如果佢整體係優於大市，而風險又唔算過高，你可以考慮繼續存放滾存。

否則，你就按以上計劃。將贖回資金，分注咁慢慢投入「平穩增值股」和「收息股」中。

------------------------------------------------

Q21608：

龔sir，感謝感謝，你之前的回覆得好詳細好用心，老公說很有參考價值，我一直都想供盈富。但考量澳門銀行手續費問題所以未實行，聽您說完更安心了。

我真的要盡快決定投入同開始草貨了。

我老公說：

1.上堂時您提出的‘佐丹奴、粵海投資、大快活、六福‘，當時係優質股，依家隔左咁多年還值得投資嗎？想您俾點點意見，因他說這幾隻文中冇提到。

2.佢見組合內沒有內銀股，如滙豐，這些股票適合繼續持有嗎？

3.科技ETF市面上還有幾隻，是否因為呢隻手續費平D所以選呢隻？

4. 另外是關於我自己的，當時藍月亮發行抽新股時，我抽中左一手，那時睇中它是獨市生意及大陸龍頭，所以冇放，在$13蚊多時更入多了一手，現在這情況你認為適唔適合溝貨或繼續持有？

5. 之前我幾心儀想入手必瘦站，5蚊既時候吾敢入貨吾識睇位，最終沒有持有，必瘦站您認為之後喺邊個位我可以入手？

感謝感謝。
————
我近日開始去看股票勝經，但現在我既level睇會卡住唔太明白，老公說睇左再上您既堂效果會更好。如果老公再上多一次堂，有沒有優惠?

我們2個都會一起上，因有他在我應該會更好學習。

龔成老師︰

1)以上4隻依然係有質素，你投資係無問題。佐丹奴(0709)主要係收息，增長力不高，唔係咁適合你年紀。

粵海投資(0270)和大快活(0052)則平穏增長+股息。而增長力，會係六福(0590)較高，這3隻你們都可以投資。

現時都在合理區，可分注。

2) 大型內銀股和匯控(0005)都有投資價值，但由於已經好大隻，未來增長力唔會高，主要係收息。

以你年紀，應以增長為主，這類收息股就唔係咁適合你。

3) 安碩恒生科技(3067)每年收費和追蹤誤差，都係幾隻當中較低，暫時睇會係較好選擇。

但你要留意，由於幾隻恒生科技ETF都係初上市，追蹤誤差只能作參考，實際誤差未必一樣。

4) 藍月亮（6993）有質素的。

佢有「中國P&G」之稱，成立於1992年，擁有衣物清潔護理、個人清潔護理和家居清潔護理三大系列共73個品種的產品。

佢係中國洗衣液有龍頭地位，加上毛利率高，賺錢能力強。睇翻佢之前的資料，以零售額計算，藍月亮在洗衣液市場、濃縮洗衣液市場及洗手液市場的市佔率均為第一，分別為24%、28%、17%。

整體有質素與發展力，若持貨佔你組合不高，長線持有就可以。

近期雖然回左唔少，但都只算係合理區頂，唔建議現時加注。最好回多1,2成，才考慮。

5) 必瘦站（1830）長遠有發展，本身有一定的質素。

睇翻之前的疫情，佢身處的行業受影響，但佢的現金流及財務數據都唔算差，這點可以想象到，當正常的經營環境，佢的生意一定唔錯。

加上佢的野心愈來愈大，本身有一定的技術，同時不斷將香港的業務模式複製到其他海外地區，我見佢加強了發展其他地方，因此發展不差。

這股有長線投資價值。

業績前計佢$4是合理區頂，業績後股價升左好多，雖然我之前好大機會會調高佢合理價值，不過，現價都有少少貴。

所以，如果無貨，又真係好想入。你可考慮回少少，先小注，然後等跌多d先正式分注投資。

6. 上堂前，你先睇左股票勝經，的確係有助吸收課堂知識。但唔明都唔緊要，到時課堂都會再仔細解釋，當中的概念。

如果你基礎不足，可以上多一次基礎班，同時當你地2人一同上，可以有互動作用，增加了學習的進度，打好基礎後，再上進階。

你重讀初班，可以比個優惠價你，你whatsapp 55457212我同事講翻。

------------------------------------------------

Q21609：

阿sir 我25歲，係疫情低下 3月頭我決定祼辭左一份我覺得毫無進升和學到野既工作！

我自知呢份工如同書入面星期一捱 想等星期五，毫無激情，繼續向呢個公司只係浪費時間（我覺得時間好寶貴）我已經考慮半年，

但身邊朋友同事都勸我騎牛搵馬，都唔太認同我辭職，話呢個時勢有咁既工已經算好，但最尾諗左半年決定辭 因為我唔知前面會點 但我知總會接觸新環境新事物

而且想趁冇負擔年齡試多啲 至少收入冇呢份工高 但我辭左好肯定都有兼職收入 經過兩個月一直好積極揾全職 一邊睇書 一邊兼職 奈何疫情下難揾全職

開始質疑自己夠竟係未岩同焦慮呢兩日睇左書阿sir 本書 覺得完全觀念同我想法一樣！令我更加相信自己冇揀錯，得到肯定！

因為我覺得我花更多時間黎睇理財知識 運動 學野是值得的！多謝阿sir !

龔成老師︰

其實，我地做決定，一定係睇長線。

好多人一直安於現狀，唔肯試下離開舒適圈，就永遠只能停留係現時階段。

恭喜你，能突破自己舒適圈。你才25歲，還很年輕，應該把握這個負擔較少的年紀，去作出不同的嘗試。

現時你就要好好計劃將來，到底自已未來10年、20年目標係點樣，想自己變成一個點樣架人。點做，才會一步步接近你想的人生。

你現時把握未有全職工作的時間，去學習、做運動，努力投資在自己身上，這個態度係非常正確。

相信你將來，一定可以找到理想的人生。

------------------------------------------------

Q21610：

龔SIR 你好~本人是投資倍升股課程學生，剛上了第一課，感謝你在課堂上釐清了一些錯誤的投資觀念。本人今年35歲，通常會每儲蓄到一筆錢就會買股票投資, 增值財富。

這個投資組合有沒有問題? 還是需要再執一執?

00388 $478.6 @200-
0003 $14 @3707-
0005 $33.617 @ 1200-
02202 $27.3 @200-
03988 $2.4 @3000-
09988 234.8 @100

另外，知道澳門政府在珠海哪邊建立一個新街坊項目，在橫琴哪邊建立一個屬於澳門的新區。（橫琴「澳門新街坊」項目）

位置鄰近澳門關口, 在此發展中的新區對面亦有新樓盤開賣, 你認為值不值得投資?樓價大約為33平方, 值港幣110 萬左右, 租大約每月可收4000-5000元。

龔成老師：

你上述持有的，基本上都有質素，不算差，但可以優化組合。

你年齡35歲，其實可以著重增值多少少，所以，你持有的煤氣（0003）、匯豐（0005）、中行（3988）只是收息類別，不應佔你組合比例太多。

至於港交所（0388）及阿里（9988）無問題。而萬科企業（2202）負債較高，不宜持有太多。

你在之後的財富配置，可以投資平穩增長股+潛力股。

至於澳門新街坊，我無仔細研究在，但我自己對橫琴是正面的，這地方是中央其中一個重點發展地區，加上澳門地方細，一定要想方法延伸經濟圈。

同時，中央會對澳門的信任度會大過香港，所以會加強澳門周邊地區發展。

當然，你最好實地考察下先，上述只是簡單意見。

------------------------------------------------

Q21611：

老師，我亦很仰慕股神巴菲特，所以我亦有投資brk.b，持有1個半月已有7.5%回報，再加上佢財報穩健，令我更有信心持有。

不過，畢竟他年時已高，有佢隨時退休令股價下跌的隱憂，亦不清楚接任的人會不會處理伯克希爾如股神一樣穩妥。

你又對此有什麼看法？

龔成老師︰

其實巴郡已經係一間大型企業，雖然股神巴菲特真的退下來，很難找一個有咁高能力的人取代。

但由於企業已係好成熟，就算係其他人掌舵，相信大方向唔會差好遠。

此股依然係具有投資價值，值得你長線持有，

不過，回報率點都會比過往略減，但仍然是不差的。

------------------------------------------------

Q21612：

想問老師，一年只買1/2隻股票，是否次次都是賺錢。

如果我這樣做，我心理上會害怕。如果睇錯，整年的儲蓄，會就此蝕了。

暫時都想分散投資，如果不夠資本，可能3067/2833/QQQ/VOO/ARKK便算

請問我的想法是否可行？

此外，你為何會有信心，果1/2隻會是眾多公司中，成長最快的一兩間？

龔成老師︰

唔係，就算股神巴菲特投資，都唔會隻隻都係賺錢，佢都試過不少失敗投資。

但由於佢成個組合做得好，整體成績都有唔錯表現，這就是我成日強調，組合要優質和平衡的原因。

其實只要你有一定經驗，細心分析，加上係合理價或以下，才買入優質股，長線虧損的機會，唔會好高。

至於點解有信心，個1,2隻係眾多公司中，成長最快的一兩間。除左累積不少分析經驗外，我都分析左好多企業，從中作比較，才會知道個別企業，優質度如何。

你5隻股票都有質素，3067/VOO/ARKK係潛力型股票，波動性較大。如果你係偏年長、投資經驗較少、或者風險承受力唔高，就不要持有太多。

現時大市在合理區，記得資金唔好用盡，要留部份等大跌市，才出手。

------------------------------------------------

Q21613：

老師，有評論話如果完美醫療（1830）無左過期套票，必瘦站會蝕錢，可信嗎？

龔成老師︰

完美醫療（1830），這個所謂過期套票，其實是指一些客人已付費，但顧客於合約服務期內並無使用服務確認的收益。

預繳收入其實在不少行業都存在，是一種對企業甚為有利的營運模式，利用折扣價向客戶出售預繳套票，藉此推廣纖體美容服務，多年來令集團收入提升不少。

而這些過期套票，大致維持佔每年入帳之套票2-3成。至於出現原因，可以係客人計錯數買多左，或者好多其他因素，無人知。

但這部份一直多年恆常地存在，佔收入比重每年都大致相同。基本上，佢已經算係恆常收入一部份。

這部份收益，無話好定唔好。但我地計算企業盈利時，考慮這部份收益，才算正常。因為佢真係成個生意模式中，其中一個收入部份。

其實，你試從顧客的角度去想想，當你買產品時，你不會假設自己不會用，而最終總會有一部分客無用，有部分客只用到部分。

正如你食一個飯，都會食剩，如果將食剩的%要退錢，要按比例從收入扣除，相信好多食店都會虧損。

這些「用不到」「食剩」，其實是產品收入的一部分，所以，做生意不可能強行將「過期套票」數目折去的。

------------------------------------------------

Q21614：

龔sir你好，今年33歲。早兩年賣左樓，賣咗樓之後大概有5,000,000現金，現在跟屋企人租緊樓，全家五人，爸爸媽媽啱啱退休，我同老公同細佬做嘢

大家都係搵萬幾蚊，每個月租金$29500，屋企人覺得都係買返樓好啲，自己都有買下股票，手上持有3690，3993，6969，6618，291，都係短炒為主

因為都想幫補租金，每年要供三份合共大約120,000保險，3年前供的，包括一份基金（$50000每年），基金已經供咗3年可以隨時停供

一份儲蓄（$50000每年）另外一份危疾（$26000每年），想你俾啲意見我，啲錢點樣可以運用同埋投資得好啲,可以40歲達致財務自由

龔成老師：

你地首先要決定，是否買翻買，如果買樓，就要預留部分資金，然後餘下投資增值。

如果唔買樓，就可全部用作增值。

如果現時完全無物業，我會傾向買基本的自住樓，但就作高成數按，餘下資金投資增值。

如果想40歲財務自由，你可以投資
平穩增長股：潛力股
7：3
（如果你投資實力較強，可增加潛力股比例）

好好利用7年時間，去進行財富增值，利用股票投資。現時現金，計好多少會買樓，餘下的「可長線投資金」，現時已可分注買入（當然要有一定的現金留低）。

另外，唔好再短炒。至於現時持有的其他理財產品，都可以繼續進行。

------------------------------------------------

Q21615：

老師你好....自己依家嘅方向好迷惘，自己有工作，但債項實在太多，呢個時候我真係唔知點做好.....

我好想去重新好好開始，已經31歲嘅我仲係一事無成，我依家應該要點做好....

龔成老師︰

我明白你此刻，可能有太多不如意事情，同時間圍繞在你身邊，令你好氣餒和無奈。

但其實所有問題，都總會有解決方法。在好多問題圍繞自己時，我地要努力去保持一個正面心態。有系統地，將問題逐一拆解。

首先，我相信你最大問題，係債務方面。你先集中去清理這部份，優先處理利息較高債項。或者可以將較高息債務，先轉到較低貸款利息的地方。

我地先減少你長線還債負擔，再慢慢被這些負債消滅。

至於，人生目標，每個人都不同。唔一定要做到家財萬貫，才算係事業有成。

你要清楚知道，5年、10年、甚至20年後，希望自己變成點。之後，再想下，點樣先可以一步步咁達成。

記住，這個世界無問題係解決唔到。只要你定好計劃，按部就班咁實行，問題總會解決。而你人生目標，都總會達到。

------------------------------------------------

Q21616：

Hi 龔sir! 我年紀2X, 每月都儲到幾千蚊加上本身有少少閒錢，所以想由月供股票開始投資。

我有3個問題希望龔sir可以指點一下。

第一：就係月供股票嘅回報。我傾向長期投資，但係唔知道長期係幾長。簡單啲講月供股應該供幾耐(5年10年?)，或者供到有幾多手先夠? 雖然成本平均咗，但回報係咪同時會平均(拉低)咗?

如果股價合適係咪直接(或儲夠錢)買一手長渣好啲?

第二：我諗緊月個股票包括0027 0293 0823 3690

前三隻我覺得喺疫情之下已經係低谷，未來幾年都會升。3690就潛力而言，現時股價係咪屬於合理/便宜區域，或者bottom line (市場消化完美團負面消息)?

第三：揀月供股嚟講成交量應唔應該係重要考量? 抑或其他因素比容易賣碎股更重要?

謝謝

龔成老師︰

1) 如果你定平貴能力不足，一手手買，會有買貴貨風險。月供可以平衡價格波動風險，所以較適合你這類初學者。

月供係一個長線計劃，月供最少維持3年，並持有這些股票5年以上，才會有較理想效果。當然，更理想係一直做，一直維持累積優質股(優質資產)的習慣，對你會最有利。

用月供方法，成本會拉平均左，但同時間，平均回報都會有機會被拖低左。

所以，若你用估值方法，直接1手手係合理區，甚至平宜水平才入貨，的確回報一般會比用月供儲貨為高。

但問題係，用估值方法去入貨，對投資知識要求較高。初學者我唔建議咁做，反而會增大你買貴貨的風險。

記住，我地投資唔係想賺到盡。而係在合理風險下，賺取最大回報。

2) 國泰（0293）的質素只是一般。其中一個風險，是油價，睇翻佢過往多年，油價對佢成本影響好大，令佢盈利十分波動，就算佢利用對沖，都唔係好成功，反而試過因對沖而蝕大錢。

另外，航空業對經濟週期較敏感，收入不穩，同時唔算係一個好賺錢的行業，因此這股的質素只是一般，此股不宜作為月供目標。

其餘3隻，用來月供都可以，美團點評（3690）有潛力的，但不確定性都高，只可小注月供。

3) 成交量，參考價值好低。有無碎股，其實都唔重要。

你要記住，我地係長線持有一些優質股，而唔係短炒。我地著眼點，應該係企業質素、行業發展、財務狀況等。

我建議你，可以睇我寫架"80後百萬富翁"、"財務自由行"和"股票勝經"，都適合初學者，可以令你更深入了解成個財富增值的理念。

------------------------------------------------

Q21617：

龔成老師你好！本人（31歲）與丈夫（34歲）共月入7萬，育有1子，現金大約有50萬，持有股票價值約12萬，依家持有友邦、盈富、小米、安碩恆生科技，買左一層公屋自住。

仲有3年供完，市值大約300萬。依家每月大概有3萬蚊流動資金可以用黎投資。

想問下老師，如果想係10年內做到每月被動收入有3萬，可唔可行？應該點先可以做到？

龔成老師︰

由於你已有自住物業，因此在你之後的財富配置上，不用太急增持物業部分，可以利用股票去進行增值，而現時自住公屋，基本上狀態不用有特別變動。過3年供樓完成後，你可以再加大力度投資股票，令財富進一步增值。

要做到每月有3萬蚊現金流這個目標，以股息率6%計，你需要本金600萬。

以你31歲，可以選擇一些「平穩增值股」+「潛力股」作投資目標。現有持股，都係有質素，適合用來增值，可長線持有。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄，即先用$15000月供，另一半就先儲起架策略。

如果你投資經驗唔算高，可以先集中係平穏增長股，潛力股只小注(少於3成)。若你有一定投資經驗﹐可以加大潛力股比重，最多佔組合3-5成，視乎你投資經驗多寡和了解這些股票程度而定。

現時大市只是合理區，你現有50萬資金可以先投入多10-20萬，用"分注"形式，慢慢買貨。餘下資金和每月所儲倒的資金，就等大市出現一定程度的下跌，才大力度掃貨，然後長線投資。

我假設投資回報有10%（連股息再投資），你每月投資$30000 + 現有資產62萬(現+股票)，10年後大約會增值至720萬，故這樣安排相信很大機會達至你的財務目標。

------------------------------------------------

Q21618：

老師你好，小弟現年31歲手上有20萬資金想入市投資股票。

最近有留意0002, 0003, 0012, 2800, 6823想從中開始投資，不過有部分股黎緊都會除淨，理解到一般情況下股價係除淨日後會回調，

如果我目標係長線持有以上股票的話，請問我係唔係應該等除淨日後先開始入市？多謝老師指教。

龔成老師︰

你對除淨派息的運作，似乎有少少誤解。

如果你要收到股息，必需在「除淨日」前一天，依然持有股票。「除淨日」，其實就是用來確認那些股東收到這權益的日子。等到「除淨日」當天才買，派息就唔會有你份。

「除淨日」那天，股價就會扣除派息部份，例如原來股價$10，派息$1。那麼「除淨日」就會將股價，從$10下調至$9，以反映派息動作。

所以，假設不受其他市場因素影響，單係除淨這個因素，除淨日股價下跌，係正常。

而「派息日」，就係這班合資格股東，正式收到股息的日子。

由於「除淨日」股價會下跌。而下跌比重同收到息係一樣，所以只係左手交右手動作。因此，你唔會在此期間前後做買/沽貨，而出現任何著數。

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時31歲去計，應先集中做好增值部份。你所講的股票都有質素﹐但中電(0002)、香港電訊(6823)增長力較弱，主要係收下息，不建議你持有太多。

策略上，你可以較集中投資在「平穏增長股」和「潛力股」上。如果你覺得自己經驗尚淺，想先保守少少，用中電(0002)、香港電訊(6823)都係可以。

現時大市只在合理水平，你20萬可以先用一半，以分注形式，慢慢入貨。餘下的另一半現金，我地就等機會，當大市出現較大回調，就加大力度掃貨，然後作長線投資。

由於「潛力股」係需要一定經驗，你投資經驗較淺，建議你先小注，大約佔組合3成左右。此期間，你要努力提高投資知識，到有一定水平時，你可以慢慢將佢調升至5成比重。

------------------------------------------------

Q21619：

你好，我由2020年中開始到今年5月在不同的日子持有的股票比例：

00941 10,000股
02628 10,000股
00003 10,000股
03988 5000股
700 100股

另有現金200,000

以上比例會唔會太不平均，比例太重放在0941？

呢幾隻都係股息很不錯的股票我才選上的，但其實這個想法是否錯誤？求解答！謝謝！

龔成老師︰

你現時持有的股票，大體上都有質素，可以長線持有。

但中國人壽(2628)增長力，近年明顯係弱左，你可以考慮沽少少，換去其他優質股。

另外，任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

你現時中國移動(0941)，佔成個組合一半，明顯係嚴重偏高。你必需慢慢減持部份，換至其他優質股，去平衡風險。

至於以上股票是否適合你，要睇你年紀、經驗和風險承受能力。

好以騰訊(0700)這類潛力股，增長潛力大，但同時間波動性都較高。比較適合年青、有經驗的投資者。否則，不宜持有太多。

至於中國移動(0941)、中行(3988)這類收息股，增長力好弱，但勝在有穏定的派息，風險較細。適合較年長、或者投資取態好保守架人士。

而中國人壽(2628)和煤氣(0003)算係2者只間，有一定增長力之餘，都有一定派息，風險度相對係中等。

你現時組合，算係一個偏向保守的平穏增長 + 收息組合。

若係較接近退休之年的人士，或者投資好保守，想以收息為主。941和3988係合適，但其餘幾隻，就未必太適合。

以下是一些優質收息股，給你參考。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

------------------------------------------------

Q21620：

小妹我已經35歲，工作13年，穩定，但無特破，對炒樓有興趣，想做地產經紀，但家庭有負擔，兩難，但我這年齡又是出去衝的最後機會，點算？

我想做有錢人，但呢刻又好多限制！
同埋我唔夠勇氣呀！

龔成老師︰

要成為有錢人，就不能安於現狀，要有勇氣去突破，你已經存在了第一個條件，因為你已懂得對不理想的現象不滿。

地產代理是成為有錢人的5大方法之一，建立銷售團隊之路。

但從事這條路，不確定性一定比你現時工作高。而且開頭時，收入有機會比你現有工作少。如你選擇好這條路，就要有一定決心，一直走行去。

否則，好大機會會令你成個事業發展，變得進退失據，你要明白這一點。

較好的方法，就是你一邊做現時的工作，一邊尋找一些可以「不辭工但又能創富」的模式（因為我從你的文字，已見到你勇氣不足，如果這刻不足，只能暫時留在原工作先）。

例如你利用投資，好好滾大資金。

然後，到了資金有一定的水平時，你在負擔上較安心，而你又有足夠的勇氣，到時才跳出去。

同時，你可以在這段時間，結識一下地產代理，多了解佢地的工作。（甚至做兼職，當然，你要了解現時正職是否容許，或當中風險，所以你自己衡量，如果真的做兼職，當見到自己這方面真的有發展時，先全力去做。加油啦！

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q21521-Q21540）

Q21521：

老師,我受持1826（已停牌）。請問以下是甚麼意思? 我應答應嗎? 我$2.2買的

『中國銀河國際證券（香港）有限公司代表要約人提出有關收購旭通控股有限公司（股份代號：1826）全部已發行股份

（要約人及其一致行動人士已擁有或同意將予收購者除外）的強制性無條件現金要約，每股 0.158港元』

謝謝老師

龔成老師︰

這個要約，代表有機構想收購你手上旭通控股(1826)股票，作價為每股HKD0.158。

至於答應與否，我地要從資產角度考慮。如果企業係有質素，長線有升值潛力。你接受要約，就等同放棄優質資產，換回只會貶值的現金，係不值。

所以，你要先了解企業本質，去再決定。

旭通控股(1826)主要在香港從事提供金融相關信息及技術服務；新發展工程之承包服務等。

集團在2021年3月31日表示，因核數師對其2020年度的綜合財務報表發出不發表意見，故暫時停止買賣。

在為投資者，而一刻係無野可以做。而一刻未知背後原因，所以好難話會唔會可以復牌，只能說機會係有。

但睇翻本身質素，唔算係好高，而且公司規模好細。過往股票都十分波動，這類股票最多只宜好小注。

此股唔係完全無價值，但不算高，加上有一定風險。暫時睇，接受要約會係較好選擇。

------------------------------------------------

Q21522：

另外想問老師，新年前科技股大升好勢時，十年投資回本了，也有少少賺，但現在科技股回調，又倒蝕番，所以之前有少少唔開心，後來再聽老師FB，再想想自己組合內的股都不是有問題的公司，所以會繼續持有

但想進行一些調倉，之前買了京東健康及微盟，近排跌了不少，想溝少少（占倉不大）所以想放1手美團（共有3手），唔知咁樣操作如何？

龔成老師：

第一，平常心對股價，股價上上落落好正常，你唔好太著重，最重要是企業長遠的發展與價值。提高你的心理質素。

第二，我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

你要睇翻自己的持倉比例，是否，以及應該加多少新經濟股類別。

京東健康（6618）及微盟（2013）都有潛力的，但現價只是合理區頂至略貴，如果你這類股比例唔多，可買入，但不要買入得太急，要慢慢分注。

至於美團（3690）如果你持貨較多，可減。

記住，整個方向不是睇你的買入價、賺蝕。而是「優質度」「比例」。

------------------------------------------------

Q21523：

你好，我係最近先開始睇你fb，睇完想重新審視自己既股票，下面係我現在持有既股票：

- 港鐵500股@$43.15
- 匯豐400股@$75
- 電能1000股@$40.3

- 建行15000股@$6.6
- 煤氣4100股@$12.89
- 西部水泥40000股@$1.3

現在29歲，想請教下呢個組合會唔會太保守？有幾隻仲放咗幾年都仲蝕緊錢，覺得總會升番上去/蝕就收住息先，呢個心態係咪唔岩？

另外，見你話同隻股唔好佔太重比例，應該點計個比例（用錢/用股）？Thanks

龔成老師︰

首先，你見蝕，就收住息先，等佢上升翻。這個想法，是不正確的。

我地是否持有一隻股票，應該睇佢長線質素。所以，佢股價有明顯下調時，你就要睇翻佢山現調整的原因，唔好主觀咁「估」佢會升翻上去。

如果唔關佢本身質素事，純粹係中短期價格波動，我地就唔洗理。相反，我地發現係因為佢長線質素轉差，係而個時候，就算蝕多少，我地都要減持，甚至完全沽出所有持貨。

投資增值時，我地係會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你現時只係29歲，應先以增值為主。但你現時組合中，以收息股居多(0005、0006、0939、2233)。這些股票不是無質素，只係佢地增長力好弱，主要係收下息。

現時你持有太多，會拖低左成個組合的增長力。建議你慢慢分段沽出部份，換碼至以下有增長力的股票。

你將來可以用「平穏增長股」 + 「潛力股」作目標，去創建你的組合。

由於你投資知識不高，因此可較集中在平穩增長類股，至於潛力股，只宜小小注(約3成)。最好是你先提高投資知識，等你有一定知識，先慢慢增加翻潛力股比例(約5成)。

至於，我所講個別股票唔好佔過多。其實是指任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你長線要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於3成，而單一企業不要高過15%。

我地計算時，係用佢價值，即係你"股價 x 持有股數"。

但盈富(2800)就不受此限，因為它是一個包含55間優質企業的基金，這些企業來自不同行業。因此，盈富(2800)就算在組合中佔較大比重，都唔會造成過度集中性風險。

------------------------------------------------

Q21524：

龔SIR, 你好, follow你facebook有兩年了, 我好認同你的投資方法。

所以平時除左睇你facebook外, 亦買左《選股勝經》、《50值博倍升股》、《5年買樓4步曲》增加自己投資知識。

我和老公打算置業，過去幾個月先後到香港仔/田灣、大圍、荃灣睇過樓，睇左超過20個介乎400-450萬的單位，發現如下：

1. 如想買300呎左右的單位，樓齡通常較高，介乎38-42年左右；
2. 如想買20-30年樓齡，單位通常較細，得230-260呎；
3. 如想買300多呎+20幾年樓齡，地點就偏遠，在屯門。

我們感到矛盾，不知如何選擇，究竟買樓時要看樓齡定呎數，我已經睇左《5年買樓4步曲》，但都決定不了，所以想請教下老師，謝謝！

龔成老師︰

你現時發現這個現象，係正常。

在同一價錢下，想大點，樓齡自然會較高，否則只能找較細單位。要尺寸和樓齡都較理想，地理位置多數係較偏遠。

至於選擇邊間，先要睇翻你置業原因。若果係為投資，(2)的尺寸太細，不達至基本家庭生活所需，所以投資價值會較弱。而(1)和(3)都可以考慮。

若你目的係為自住，就真係要睇翻你自己本身生活需要。例如你長線會生小朋友，(2)就未必太適合。如果2位都係香港島返工，(3)就唔係咁理想。

所以，作為自住屋，那一個會較合適，只有你們才會最清楚。但記住，唔好單係考慮現在，要諗長少少，未來5-10年對你們是否都係適合。

最後，我地是否購入這間自住屋，除了睇佢適唔適合你需要外。緊記堅守「供得起」這個大原則，咁就可以。

------------------------------------------------

Q21525：

龔老師，我無投資經驗。

有3.5m cash / 有層8.5m 既樓

兩公婆月入 10萬，每月洗費一共6萬左右，其餘都係草起。

兩人大約30歲，想愈早退休愈好。只係草，無投資，驚輸晒。

你有冇小小建議點出發 開始錢搵錢？

龔成老師︰

其實你只儲錢，不做投資增值，本身已經係輸左。因為現金只會一直貶值，令你這筆現金的購買力一直減少緊。

所以，你長線一定要建立一個財富增值組合，令財富保值之餘，都有一定提升。

我地進行財富增值，其實就係將一直貶值架"現金"，轉換成"優質資產"的一個過程，佢可以係股票、物業、一盤生意等等。

由於你已經有一間物業，為免令組合過份集中係物業類，造成風險。你350萬現金，我地應用優質股，去創造一個增值平台。

以你大約30歲，可以選擇一些「平穩增值股」+「潛力股」作投資目標。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄，另一半就先儲起架策略。

你現時投資知識不高，可先集中在平穩增長類股，至於潛力股，只宜小小注(不多於3成)。此期間，你最好是努力提高投資知識，才慢慢增加翻潛力股比例(約5成)。

但你要留意，潛力股有增長潛力，但股價波動性都唔細。如果你想再保守D，可以先全數投資「平穩增值股」都可以。你自己因應個人風險承受能力，去修正係無問題。

現時你的350萬就先動用30-50萬，餘下的現就等你累積一定經驗，才動用入市。如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q21526：

阿sir我59歲,以下是本人的投資，請给意見。
700,100股，已收回成本。

388, 200股$196.6
9988, 200股224
1810, 1800股$19.6
3067, 500股$20.25
2382, 100股$196.8
2800, 1000股$27.03

5, 800股$58.9
939, 4000股$6.165
3988, 9000股$3.225
884, 2000股$6.1
1313 ,2000股$8.72

有部分16年持貨至今，現想將5号和3988沽出，換入中银香港，請給意見

是否太多，太散，發覺散户十大犯錯之一，神聖價位，自己就犯咗啦！時常睇住當年7OO，388，$19幾入，就當這是神聖價，要見番才入，於是將資金入其他，越買越多，其實心想入5至6隻，又不知如何選擇，好股可奇多，怎買得哂，請阿sir指点

龔成老師：

你59歲，以這年齡來說，潛力股不應太多，除非你本身是較能承受風險的人。否則，你可能要調整翻，起碼都唔好再加注在潛力股。

只一方面，銀行股比例太多，你這年齡，的確可以有一定比例的收息股，但就不能只集中在銀行股。建議你慢慢減持翻銀行股，同時，可以加入其他收息股，例如港燈（2638）、深高速（0548）、香港電訊（6823）、置富（0778）、陽光（0435）、高息基金（3110）都可以。

其實你持有的股票，基本上都是有質素的，因此，本身選股的問題不大，只是配置上的問題。

------------------------------------------------

Q21527：

阿sir,現有問題想你幫助。兒子現年26歲，有一份穩定工作’在員工合作社，每月供15000元，利息三厘。以前跟同事買牛熊証，有小小收穫。

但沒時間跟，我勸他不要投機，他也聽我說話。
然後他於$295，買了一手9988。＄52買滙豐二手。点知又不派息。

最近入了小米5手＠27.5,中移動1手@55，亞厘爸爸1手@225,全部下跌。

最近他很灰心,懷疑自己不適合買股票,問我怎辦？
他可以每月剩1萬元,員工合作社剩5仟元，有甚麽投資組合建議？多謝解答！

龔成老師：

第一，唔建議佢再投資衍生工具，發行商食水好深，唔好再做水魚。

第二，不要用短期股價去衡量投資成績，要用長期的企業價值分析。

第三，佢要懂得建立一個平衡的財富組合。要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

佢持有的股票，並不是無質素的，不過以佢的年齡，收息股就不用太多。另外，佢部分股的買入價略貴，令佢買入後股價下跌，其實本質無問題。

建議佢從「設計長遠的投資組合」著手，而不是著重這刻的股價。

------------------------------------------------

Q21528：

老師，2018，3319，590，3918呢幾隻股票，值博率同合理區邊隻會最好？

龔成老師︰

現時4隻股票，都算在合理區。但當中六福集團（0590）算係合理區中間。

另外，要留意瑞聲科技（2018）本身已有一定的規模與技術，長遠發展正面。不過，佢增長力不是好強，你預佢只係平穩增長類別。

金界控股（3918）畢竟是在新興市場，不確定性較大，在注碼上不能投資得過多。

雅生活服務（3319）不錯的，佢無論在業務本質、規模、品牌、財務數據、前景，都是理想的，反映這企業有一定的質素。

加上這企業的背景因素，以及行業的發展，相信這企業的前景不差，有長線投資的價值。

整體是有長線投資價值的。現價合理區中上部，不過股價都會有時出現波動，投資宜分注進行。

如果你能承受風險及控制注碼，金界值博率會較高，另外，雅生活服務都有投資值博率。

------------------------------------------------

Q21529：

我有點問題想問︰

1. 如果想去評估一啲未有盈利，但有前境嘅新經濟股， 係咪要進階課程先有?

2. 如果想評估一啲企業上市未夠5年 ， 但係有盈利 ，例如小米，( 我睇你書講話要睇五年)，

咁如果呢啲公司未有五年報表， 基礎課程幫唔幫助到去評估?

龔成老師︰

【基礎班】對象是初中階的投資者，5個選股方法、捕捉時機、投資策略、計平貴，會教3種企業估值方法、年報分析、3大財務報表，都有一定的內容，同時會派一份6頁紙的「企業評估表」給學員

【進階班】18種企業價值計算方法，年報全面分析，10倍股選股，研究企業，研究名財務報表，財務比率應用與分析。

進階班可以話係基礎班的延伸。

1) 你讀完基礎班，會有一定企業分析能力。但要分析不同行業、不同性質的股票，進階班會有較全面的教授。

其實一些未有盈利的企業，用一般估值方法，都會較難得出一個穏當的答案。

因為，佢主要投資價值，都係來自「未來」，是一個未知之數。

但唔代表我地無野可以做，我地可以透過深入了解，佢現時財務結構、行業狀況等，去估算佢將來成事機會。

或者係成事前，集團有無能力，一直維持正常營運。例如有無足夠資金支持研發、市場推廣等工作。這些因素，我地都可以在分析財報中找到答案。

令我地係「估」算將來發展的同時，有較「踏實」的理據，在背後支持這個答案。

這些財報相關知識，進階班會有較詳細教授。對分析這類股票，較有幫助。

2) 這類上市不足5年、但有盈利的企業。你都可以用基礎課程的方法，去做個估值。但由於數據較少，我地就要相對保守。

投資時，都不能大注，以平衡不確定性的風險。

------------------------------------------------

Q21530：

A) 成哥，想請教下啟德住宅投資價值

1.近九龍東商業區核心區
2.沙中綫過海後可以係紅磡轉車
3.附近土地供應唔多
4.配套暫時未完善
5.夜晚行過都屬於靜中帶旺

B) 另外想問下沙田一城仲有無投資價值
1. 自成一國大型屋苑，生活配套設施齊全
2. 附近土地供應唔多
3.出九龍東核心商業區近
4.靜中帶旺

C) 如果我買樓用作投資，大約600-700萬左右。
灣仔
黃竹坑
大圍
沙田一城
啟德

D) 唔好意思，仲有一個問題。因為無人名既關係，所以我要比多15% stamp duty .咁仲值唔值得？

龔成老師︰

A) 你都講到大部份重點，其實政府未來會將九龍東發展成第二個核心的商業區，當中包括了啟德及周邊地區。

當未來更多政府或私營機構搬入東九，交通和生活配套日漸完善，都會對附近住宅需求，產生正面影響。

啟德絕對有一定投資潛力，係可以考慮。

B) 其實九龍東發展，除了啟德外，只相隔數個港鐵站的沙田區，都會有正面影響。

而且佢作為地理位置有優勢，沙田區是新界東與市區的連接位，在整個香港的地圖上，可以算是一個中心。

第一城作為大型屋苑，整體配套算完善。附近又有港鐵第一城站，交通便利度算唔錯。

故第一城都有投資價值，但潛力度，無啟德咁高。

C) 從地區上計，啟德升值潛力會較高。其次會係黃竹坑、大圍。

D) 現時香港樓市算係合理區頂，值博率本身已經唔好高。再加上有15%印花稅，令到回報再打折扣。

所以，而一刻我地唔需要急住去投資物業。你有資金，可考慮先用優質股增值，值博率會較高。

------------------------------------------------

Q21531：

老師你好！我今年將踏入27，我打算重組我個組合，然後長期持有。目標想年回報有15%up！可唔可以比少少意見。

3 （未持有）
66（未持有）
270（未持有）
788（～74.5%）
968（未持有）

1177（～4%）
1810（～4.5%）
1448（～4%）
3918（～5.5%）
9988（～7%）

1.之前入得太多788！打算賣出大部份轉至其他股票。如果這10隻股各佔10%成為我的組合，潛力是否足夠？

我想做到潛力股：平穩增長（7:3 到6:4間）

2. 我想賣出部份788後先入少量未持有既股票，然後留住2-3成現金加每月存錢等股價有機會下調再分段入，請問題這計劃可行嗎？

龔成老師︰

1) 個別股票，就算再優質都好，不要超過組合15%，否則會出現過度集中的風險。

所以，你要將中國鐵塔(0788)部份沽出，慢慢換碼至其他優質股。

你上述股票都有質素，每隻10%都無問題。

如果你想做到年增長15%，可以用這些股票，再配以你7:3或6:4比例。但你要明白，潛力股增長力雖高，但波動性同樣都大，你要明白這風險。

若你投資經驗較淺，我就唔建議你潛力股佔咁高比重。你可以先佔約3成，到你慢慢累積到一定投資經驗，才慢慢加大潛力股部份，會較為穏當。

2) 現時大市在合理區，現金和股票比例，最好係各一半。

你用賣出部份中國鐵塔(0788)的資金，為未持有的股票先入首注，係無問題。將來到股價有明顯回調，才慢慢加大入貨力度，就可以。

------------------------------------------------

Q21532：

龔成老師，

1. 想問下阿里爸爸既質素如何？尼排佢好多壞消息，但我認為佢基本面不差，我打算每月都儲d阿里爸爸，請問現價算貴嗎？

2. 另外，我想問多個問題，之前睇左你個金錢騙post，唸起最近aia的每月派息計劃，息率有8厘。我睇過資料，係買以下基金：

安聯動力亞洲高收益債券基金

https://hk.allianzgi.com/documents/hk-allianz-dynamic-asian-high-yield-bond-amg-factsheet-tc

入面既成份主要係買BB級或以上的債券，尼類投資既風險大嗎？因為基金吸引之處是每月派息，可以做到現金流，

但佢能派到8厘另我覺得可能有些風險冇留意到，所以想請教一下

感謝老師一直以來的回覆，不趕的，你安排好時間就回覆，而且是可以公開的。

龔成老師︰

1) 阿里巴巴（9988）有質素，有增長力，之前貴，現價去翻合理區。

係業務層面，擁有相當的優勢，不少業務處於壟斷狀態，同時增長理想。加上正不斷發展延伸業務，這都會成為企業增長的潛力，預期增長會持續，這是阿里最大的賣點。

以企業的長期發展計，這股的確優質，但股價都有一定的波動，現價算是合理翻D，但都不是大手時候。

始終將面對內地監管可能收緊，因此風險度增加左，不過，我相信佢的整體優質度仍在，內地不是不想佢賺錢，只是想規管佢。佢已建立好完善的業務，因此本身是無得輸，只是賺多賺少問題，現時監管多左，點都會影響賺錢能力。

對於這類優質、有發展，但現價未算特別平的股票，小注分注投資，或月供，是較好的方法，算是平衡了風險與增長的考慮。

這股可以長線投資的。預佢現價約合理區中上部。你月供的話，現價開始係可以。

2) 債券基金，坊間分好多種，你要小心睇，因為有d風險低，無乜問題，有d則有潛在的風險，絕對不是保本的產品，有機會出現了「賺息蝕價」的情況。

第一，有些基券基金，會投資「高收益債券」，即是「垃圾債券」，你一定要睇睇佢所佔的比率。

第二，債券基金往往不是單純地持有債券，而是可以作買賣，以及利用衍生工具作對沖等策略，即是可能有價格上的波動。

第三，不少銀行都會提供借貸，以槓杆去放大回報，以平息借貸去賺取息差。低息環境時間題不大，但進入加息週期，不止借貸成本增加，同時債券價格往往在加息期下跌，雙從打擊下，投資價值成疑。當然，若然加息步伐不快，息差利潤就可觀。

初步睇你隻基金，主要投資在內地房地產類的B至BB級債券。不論行業和評級而言，都係有一定風險。

佢派息雖然有8%，好似係唔錯，但你要明白一定風險存在。而且，你要了解翻，到底8%是否保證。

我不是說這債券基金有問題，只是說明當中的風險。而投資與否，就要你自己因應個人風險承受能力，去作出衡量。

------------------------------------------------

Q21533：

你好老師，我想問永利澳門(1128)和澳博控股(0880)，是不是長線持有，沒有問題？

因為已買了一段時間，可能當年都升高位買的，所以一直都升不回去，而且無股息。

但我看Facebook 老師有說過這兩隻都是有潛力的股，所以不知該不該賣出。

另外，找了幾間書店，才找到這本50優質潛力股。

龔成老師︰

永利澳門（1128）和澳博控股（0880）品牌及資產質素都不差，雖然中短期未必好強，但長遠仍是正面。

但你預佢地，唔會係高增長類，只會較平穏發展。

你現貨照長線持有，沒有問題的。

50優質潛力股在三聯、商務、誠品都有得賣，但有時會斷貨。所以，下次你見唔到想買我架書，可以問下職員（又或向職員訂都可以）。

------------------------------------------------

Q21534：

龔sir你好呀，有野想請教你。我朋友今年26歲， 佢做網上生意的 月入唔太穩定，但平均約有3萬多。由於佢份人好慳的，一個月佢大約可儲27-8k左右。

佢手頭大約有110萬cash，佢想請教你應該點配置好，佢想有最好既財富增長效果，應該買樓好(佢想買500萬樓下的樓)，定還是用來買股票比較好?

佢同我講 呢幾年買樓既人好好賺，一層樓平均持貨3-5年轉手賣出可賺百萬，但又驚黎緊幾年樓價會跌，因為受政治局勢等因素影響。

想問你點睇 如果佢將手上的錢用哂黎買樓，但咁樣做的話，之後每個月佢既錢都會所剩冇幾，因為拎左大部分錢黎供樓，未必有錢再投資股票。

唔該哂呀sir呀~!!

龔成老師︰

我地投資股票好、樓市好，都唔好用「估走勢」來做策略。我地應該用翻個資產本身的平貴度，去作為入市指標。

現時香港樓市，大致在合理區頂位。相比優質股的值博率，相對較低。從投資角度，我地應用優質股去增值較好。

除非你找到一個價廉物美的旬盤，否則先投資優質股，會對你較有利。

以26歲這個年齡，是財富增值的黃金時期，要好好把握，盡你一切的力量去儲蓄、投資、學投資知識。

由於你朋友收入不穏定，最好先預留一筆生意上營運資金，加半年生活開支，才開始投資計劃會較好。

你朋友可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。

平穩增長股：潛力股
7：3
（如果你朋友投資實力較強，可增加潛力股比例）

你朋友可先用每月5成儲蓄做月供，其餘先儲起，用一邊月供一邊儲蓄的策略。

平穩增長股：考慮盈富（2800）。

另外再加：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

潛力股：安碩恆生科技ETF（3067）

另外再加：阿里（9988）、騰訊（0700）、港交所（0388）、舜宇光學（2382）、小米（1810）、ＧＸ中國電車基金（2845）、中生製藥（1177），但就要明白波動性比上述會高左，同時風險大左，你要自己平衡。部分要等回少少先入。

現時大市只是合理區，現有資金可以先投入約一半，用"分注"形式，慢慢買貨。餘下資金和每月所儲倒的資金，就等大市出現一定程度的下跌，才大力度掃貨，然後長線投資。

若此期間，樓市有較大回調，或者有入市好機會，佢都可以動用這筆儲下來的資金。

另外，如果佢長遠有自住需要，就可以考慮投資物業，否則如果純投資角度，你朋友照我上述所講的方向進行就得。

緊記，我地做財富增值，係講緊成個配置。長遠你唔可以只有股票，到你用股票累積到一定金額。

你都要去找機會投資樓市，令成個組合唔會偏重左係個別資產類。

------------------------------------------------

Q21535：

龔成老師，請問你預計以下20年的月供計劃可滾存到甚麼金額？謝謝！

12,66,388,700,823,1177,1211,1810,3690,9988每隻各$2000，共$20000

龔成老師︰

我假設投資回報有10%（連股息再投資），你每月投資$20000，20年後大約會增值至1350萬。

但當然這只是個預算，到時實際多少，要睇到時市況而定。

你現時組合，有7成都係潛力股。若你係好年輕，本身都有一定投資經驗，而且都能承受較高風險，這組合係可以。

但如果你想風險無咁高，可以換入一些平穏增長股部份，令組合波動性減少。

平穏增長股：金沙（1928）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）、長建(1038)

另外，比亞迪(1211)現價偏貴，月供等佢回到$150才開始，會較好。

或者可考慮GX中國電車（2845），這基金的目標是追蹤Solactive中國電動車指數NTR「相關指數」表現緊密相關的投資回報。

持股中最重就係比亞迪A股（002594），以及與中國電動車產業有關的股票，中國因為能源問題，長遠一定要發展電動車，這是大方向，故此股有一定投資價值。

現時大市只在合理區，每月資金唔好盡用。最好留有部份，等大跌市出現時，可以用來掃貨。

最後，你要留意這個組合，唔可以長時間都維持7成係潛力股。因為佢始終有一定波動性風險，當你越年長，比例就要相應減少。

若你現在好年青，可以用你7成，並慢慢減少。到40歲要減至4成、到50歲應該只餘下2成、將近退休應該為0%。

------------------------------------------------

Q21536：

Hi老師。我有努力，同時都有無力感，唔知係咪方向錯，所以努力既回報好低效。

同埋我都幾介意，我屋企人成日係度比較，點解大學生出黎都搵甘少錢。

我個科要考professional qualification 先會人工高，我有放工就去自修室溫書，但一返到屋企聽到啊邊個子女搵5 6 萬，幾勁。

唔明，我既人工點解低過中學生，唔明讀書有咩用。

我係fresh grad後做左2年幾，因為公司上年凍薪，所以我人工唔高。我有少少衝動，有幾秒搵過一份更高既人工。

但唔會咁做，同埋佢地係重視錢。所以連我既男朋友都唔滿意，有俾說話我聽。

錢唔代表一切，我深知人工高，我屋企人先會俾番應有既respect。

龔成老師︰

我明白你點解會有這樣感受，因為你在正為默默付出，為將來打併，但身邊的人郤看不到。

其實，我地係股票、物業、以至投資在工作，我都睇的視野，一定係長線。

你現時人工可能較少，但如果這工作經驗，再加上你將來的professional qualification，會令你收入大幅提高的話，這個投資係絕對值得。

你現時所選修的行業，點去發展才最好，相信只有你才會最清楚。

我見你其實已有想法，而且已經進行中。只要你相信這條路，長線發展係會唔錯，你就唔應該太在意今天人工較少過個問題。

至於家人和男朋友，我覺得可以再理性溝通，或許他對你職業生涯規劃，未太了解，才會出現這個情況。

記住，我地係唔需要同別人做比較。每個人性格、目標、能力、背景都大不同。只要找到自己最想行的路，咁就可以。

------------------------------------------------

Q21537：

龔sir ,另外現時我想買樓，之前睇你著作（5年買樓4部曲）,有一點唔係好sure

因為我現時持有資金，夠2成首期，但我諗緊到底借按揭8成定9成，始終如果用曬2成做首期，手頭資金就會好緊拙。

諗緊好唔好按9成，但將餘下資金做投資or擺mortgage link...

我份工係穩定的，供樓沒問題

龔成老師：

如果你手上資金太緊，我建議用8成半或9成，因為你手上完全無現金，是危險，以及在理財上不是好事，反而有少少現金作防守，是必要的。

不過，高成數按，如9成，的按保費會較高，所以你可在8成半，或9成，之間選擇，如果想留多少少資金，就9成，寧願比多少少保費，留一定的防守力比自己。

餘下資金就mortgage link，唔好比自己無晒現金。至於投資，就要利用之後的儲蓄進行。

------------------------------------------------

Q21538：

龔成老師，我決定下月開始月供股票。想你給我以下組合意見。

安碩3067: ＄2000
盈富2628: ＄1000
小米1810: ＄1000
阿里9988: ＄1000
舜宇2382: ＄1000
港交所388: ＄1000
比亞迪1211: ＄1000

原本想包括騰訊，但好像＄1000只買得1.5股，好少。

另外有一問題，有沒有書籍或途徑可以令我了解市場資訊，而知道對往後股市或個別股票有什麼影響？

例如：美元或債息升／跌？加大QE？美國加息？加減中國存款準備金？

央行放水？油價？公司回購？配售等等
會影響市場什麼？什麼類型股票受影響？

你不用逐一解釋，我想知有什麼途徑自學了解，因為我不了解市場動向，亂入市好危險，麻煩你解答，謝謝！

龔成老師：

上述的組合，可以，這些都是有質素的股票，長期月供適合的。

不過要留意，當中不是都是潛力股類別，你要注意翻相關風險（並不是不可，只要明白在這情況就得）。

至於市場資訊，其實你每天保持睇電視的財經新聞已得，我已睇了20年，因為較為重點，比你自己睇網站更好。這個學習過程是長期的。

當然，個別名詞的意義，你就自己行上網尋找。

另外，建議你要有知識的基礎，《股票勝經》這書適合你的。

------------------------------------------------

Q21539：

你好阿sir, 留意左你個page好耐，亦有跟你平時嘅教導投資，月供股票同埋低位吸納一啲優質股（阿里巴巴$190買入）長遠投資。

最近見到 比亞迪 同美團 跌到巴巴聲，本身有月供比亞迪，唔知而家係咪好時機直接購入一啲貨，兩隻股票點解會跌成咁嘅？

我睇左好多新聞都唔係好明，求指教，另外阿里巴巴我覺得$240樓下都叫合理價位可以增持，你點睇？

謝謝！

龔成老師︰

其實佢地下跌的原因，第一，市場之前預期得太好，現時出來的業績與業務合理翻，股價就會回歸理性，第二，之前貴，因為之前新經濟股熱炒，而市場情緒正常翻，股價就會回落。第三，一些監管問題，近期中央對科網企業的監管增加，影響了這些企業，所以股價自然下跌。

簡單來說，企業長遠質素無變，只是之前市場預期得太好，現時理性翻。

上述都是有質素的股，你可以持有，只要不過多就得，但就要留意股價會較為波動。

比亞迪（1211）2021年首季收入，相較2020年首季增長逾1倍，接近410億元人民幣。

收入增長幅度雖然強勁，但要留意2020年首季，全球經濟活動，正受肺炎疫情嚴重影響，令集團收入大幅下滑。

因此，今季收入出現較大幅度增長，很大程度是由於2020年首季收入的基數較少所致。

其實整個2021年首季業績，大致上算合理。

緊記，我地分析時，最重要是長遠的企業發展。

集團在新能車發展上，賺錢能力依然維持強勢，未來當技術、市場規模、成本控制等有利因素慢慢出現下，賺錢能力會進一步提高。

我估值上，暫時維持不變，月供最好$150才開始。現價月供風險有少少高，如果你有一定貨，最好停一停。如果真係好想供，必需控制注碼，只能好小注。

至於直接入貨，建議等回到去翻$120這個較合理水平，才作考慮。

而美團點評（3690）有潛力的，過往一直虧損，到近一年，開始有正現金流，這是一個實質的利好因素，因為之前一直在燒銀紙，現時初步見到成效，不過，估值的方法好虛無，因為現時的市盈率仍過百倍。

美團這類股票，如果有利好消息，佢可以上好多，但如果估值修正，股價可太跌。

近期中央政府有不少新監管政策出台，令不少大型企業，包括美團的風險都高左。所以，近期股票回調，相信部份是這個原因所致。

只可以話，潛力是有的，現價唔算平，之前明顯貴，之後回翻好少少，大約合理區頂至略貴。若你想投資，一定不能大注。先小小注或者月供，會是較好的做法。

而阿里巴巴(9988)，現價算係合理區中上部。你已經有貨係手，如果你資金好充裕，現價都可以加1小注，並長線持有。

------------------------------------------------

Q21540：

龔sir你好啊！真心覺得你講嘅野好inspiring！每日上Facebook第一樣就係睇番你嘅post! 夜晚就咪你嘅書！我有幾個問題想請教你 唔好意思有啲長。

1）請問你會唔會開weekend班？平日夜晚要照顧小朋友無辦法出嚟 唔知有無機會有啲上幾日嘅星期六班呢

2）我今年38歲 我諗住用以下比率砌個portfolio 一半資金用月供形式買入其餘等跌市 你覺得呢啲股票適合嗎 會否太散亂？

平穩增值
2800 (20%)
66 (10%)
1928 (10%)
VOO (10%)

潛力
3067 (10%)
QQQ (10%)
ARKK (5%)
1801 (5%)

9698 (5%)
916 (5%)
1448 (5%)
1177 (5%)

3）因為我想分散風險 所以想將部分資金投資美股 我應該如上咁買VOO QQQ ETF 定買美股嘅基金 佢哋主要分別係咩？我睇過ETF回報好啲同手續費應該平啲

4）因為計劃3年後回流澳洲 之前滙價低時買咗啲澳紙 佔資產大約15% 我應唔應用部分澳紙，去供澳紙結算嘅基金？

龔成老師︰

1) 我間中都會開星期六班的，通常一年開1、2次，星期六下午時間。

下次可能在今年年尾。

你或者可以預早留位，只要whatsapp 55457212我同事，打「留位星期六班」就得。我地有具體資料就會 whatsapp。

2) 以你38歲計，這個組合選股都可以。數量有少少多，你要留意翻你供咁多隻，會唔會每隻分配倒的月供資金，其實唔多。

因為你每隻供款越少，變相月供費用佔比重就越大，會影響到你長線回報。

如果每隻供款額係好少(例如少於HKD1000)，最好你就供少幾隻，將佢地集中D，去調低月供成本比重。

3) 你照月供VOO和QQQ就可以。

Vanguard標普500指數ETF〈VOO〉，是追蹤標普500指數的ETF。QQQ則是追蹤納斯達克100指數，同時不錯的月供選擇。

至於美股基金，你要睇翻佢當中的投資項目，因為每隻基金都可以好唔同。

你可以衡量基金的投資策略，所投資的資產類別、投資策略、風險程度、市場、以及過往的表現(可以睇佢過往5-10年，如果回報係比主要投資市場高，有機會值得繼續投資)。

4) 我地重點都係睇翻隻基金的質素和回報，如果有投資價值，都可以考慮動用這筆澳元作投資，但就不要為投資而投資。

另外，由於你尚有3年才會用這筆資金。如果佢金額比較大，我建議你都先將部份，換成港元去投資增值，咁會較有利。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。