［今日寫呢啲］今日嗰三個圖同三篇文夠晒正。

＝＝＝＝＝＝＝＝＝＝＝＝＝＝
一週年！月頭訂最抵！比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費100，已經1900人訂！ 畀年費仲有85折，20/40年費VIP 送本人著作一本。
＝＝＝＝＝＝＝＝＝＝＝＝＝＝

港股嘅，好似好差，但又唔係。你恒指都不過跌200點，1%都唔夠，只係啲個別科技股重災區。咁你渣到一手都係就自己問題啦，2/3月嗰時都已經係咁講，但當時見啲嘢日日升你咪又如痴如醉。我都有玩，但我控制自己注碼。況且有啲係剛出嚟做嘢嘅，咁即係，我買10皮嘢就唔同你買10皮嘢啦。

實情我個港股倉，跑贏港股三大指數。亦都冇乜特別，上次講座都講咗買乜，咪各樣都有啲，唔會太側埋一邊。Patreon都會講少少。

你見昨日科技股大跌，但本地股（太古19友邦1299），化工（理文746東岳189），奢侈品（Prada 1913，歐舒丹973）甚至體育用品（李寧2331安踏2020）都仲有得升，有乜啟示？文入面講

美股嘅，中概股固然散晒，但我core list 上呢四隻東西一樣新高。全部都呢度貼過添啦，微軟，蘋果，Black Rock，SPGI．Black Rock同 SPGI都係舊經濟悶嘢，微軟蘋果亦全不sexy，但表現全不失禮。根本你跟住買已經好人一生平安，但之前講Google都有人話升得慢，黑人問號

特別要講蘋果新高，嚟緊出新iPhone，被寄予厚望。點解？文入面講。但重點當然係佢啲相整到好靚—即係好食位。明冇？

每日一圖嘅，三個。第一個講美股標普500指數入面，超過一半嘅股息率都仲高過十年美債。你諗下似乎好抵買，買股票我可以賺增長，理應個股息低過買債，但而家唔係喎。仲要呢個比率係近N年中都偏高，而你留意近年啲科企根本唔派息。不過，我就話你拎個股息率同美債比，其實有問題，不能咁判斷美股平定貴。點解？文入面講

第二個圖，之前都講過下。講起Amazon，普通人諗起網購，科技人諗起AWS—事實網購收入極大但利錢好低，AWS先和味，貢獻一半盈利。但極少人會講廣告，甚至心諗，Amazon有廣告咩？咁Amazon嘅廣告收入有幾大？近年又升得有幾快？入面講

第三圖，點解恒生科指係咁跌？你可話大陸打壓，但呢個只係觸發點。實情啲嘢貴就少少風吹草動都大跌。恒生科指，實情仲貴過納指！一直都係。點解？爭幾多？又係Patreon講

Good Read嘅，第一篇真係正到無倫，我都唔識寫撮寫。但，留意好多人去投資，就係top down—呢個國家經濟會好，所以股市會好，咁所以呢啲行業會好。錯得很！top down都唔係最大嘅問題，最大問題係呢種直線推論。但偏偏，個個都八奇上腦，以為世界一切如你發展，真係睇火鳳睇到你慒撚咗。智者（唔係我，係作者）就話你知，根本好多嘢係我地唔知嘅，你做乜可以咁肯定會咁咁咁？偏偏我地個社會就係獎勵呢啲人，胸有成竹就係有料到，要諗嘅就係冇信心。但點解我地會咁？背後反映咗人嘅咩心理？文入面講。同場加映，Howard Marks話你知，啲經濟預測戇鳩之極，一係就根本全世界都知，一係就係風水佬語不警人誓不休，今年唔爆下年爆。睇嚟浪費時間

第二篇講嘅嘢，應該我年紀嘅人都大約知，不過而家啲小朋友覺得「份糧包埋」難聽過粗口。但我都講過好多次，都係供求，你返工開心嘅，就即係公司係迪士尼樂園，咁應該你畀錢公司，唔係公司畀錢你。唔想咁可以點？文入面有講

第三篇，講美股估值。係喎，升咗成倍，但估值反而冇貴到。點解？又係Patreon入面講。但真係唔好以為升咗好多就一定係貴咗，更加唔好白痴到覺得幾千蚊一股就一定係好貴。

＝＝＝＝＝＝＝＝＝＝＝＝＝＝
一週年！月頭訂最抵！比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費100，已經1900人訂！ 畀年費仲有85折，20/40年費VIP 送本人著作一本。
＝＝＝＝＝＝＝＝＝＝＝＝＝＝

【龔成問答信箱】（Q21241-Q21260）

Q21241：

致龔Sir，我是股票班舊生，感謝你的教導，開課前買了不少跟風炒作的新股，因為有試過贏，所以後來輸更多，完成課堂後，我就沽出沒有盈利及風險較大的B仔股止蝕，亦沽出了多年前跟風炒作，直至現在沒有盈利還大玩財技的股票，又沽出自己不懂分析的股票。

新股都是我長久以來輸得很多的類別，上課後才知這有如新樓盤一樣，能令有錢人決定售出的資產，一定貴，難怪輸多贏少。

順豐房託是我在未買就分析的新股，沒有抽新股，到現在還未持有的，我的分析如下，請賜教：

預計1.3億可分派利潤
發售基金單位：5.3億
股息率5.3％-5.9％
定價$4.98

計一計數
每股可分派約$0.25
除以股息率
估算合理價在4.23-4.72之間

雖然定價較高，但因應市況不境，還算克制，新上市即大跌一成半，證明老師所說的沒錯，股價終歸會回到合理價值

基金組合包括香港、佛山及蕪湖物業
可租面積30.8萬平方米，估值60億，出租率95.3％

2019年全年溢利1.74億
2020年全年溢利下降84.6％至267萬

集團解釋下跌主要受投資物業充值下跌及融資成本大增影響，但若撇除投資公允值變動後的運營溢利，則按年增4.5%；而同期，集團物業收入淨額，即租金收入扣除物業運營開支，則有2.16億元，按年升4.29%，增長平穩。

如果物業充值下跌只不過是會計上的估值，就應該不用擔心

展望集團在未來能透過收購併購壯大資產，或通過母公司順豐注入物業項目。

母公司順豐控股於中國50個城市擁有物業項目，規劃總建築面積440萬平方米，已竣工建築面積170萬平方米，大部分為物流綜合設施。單以後者計算，便相當於目前順豐房託可出租建築面積的5.4倍。

總結分析，派息不差，物業質素好，出租率高，幢憬未來併購及母公司注入資產，增添了普通房託缺乏的增長動力，由於未來發展只是估計，以現時資產，股價在約4元以較有投資價值。

謝謝老師看完我的分析，如分析有任何偏差及計算錯誤，請告知，定當虛心學習，進階班見！

龔成老師：

順豐房託基金（2191）質素都有，但又不是好強。

順豐房託的投資組合初步包括位於香港、佛山及蕪湖的以下三處物業，所有該等物業均為現代物流地產，包含配備有自動分揀及供應鏈支持設施的分撥中心。

1. 香港物業：位於青衣，為一個15層高的「坡道式」現代物流地產，具備可通向各倉庫樓層的車輛坡道。

2. 佛山物業：為配備有智能技術及量身訂造的設施，如自動分揀及供應鏈支持設施。

3. 蕪湖物業：於2019年竣工的位於鳩江經濟開發區的現代物流地產。

比起其他房託，佢會更受經濟及物流業發展影響，因此會更加波動。以過往的數據來說，不差的。

投資價值都有，相信長遠物流業發展對佢都有利，投資值博率算是中上，但都不能太大期望在股價發展，暫時可以集中收息為主加基本增長力。

我睇翻你的估值方法，合理，反映你已有一定的知識及明白課堂所講，我地估值時，最重要明白背後建基於甚麼因素推算，你估值的數，能反映企業價值。

而你表示展望集團在未來能透過收購併購壯大資產，或通過母公司順豐注入物業項目。這個因素將會長期帶動這房託的增長，但我地作為投資者，都要理性分析，這個情況將會怎樣發生，當中的可能性，收購的程度，到時2191幫母公司買物業，作價是否有著數還是只是正常價因素去發展，就這點，我自己不會過份樂觀，只會視這股為有質素，合理價的房託，而暫時增長力不會定義為好強。

其實你的分析不差，招股書有好多有用資料可以分析的，你可以再深入睇多D。進階班見！

------------------------------------------------

Q21242：

呀Sir, 請問你點睇00270 粵海投資呀？最近跌多唔少。投資專家睇淡。

香港人移民固然影響東江水少咗人用。但佢投資大灣區既projects 我又覺得可能一年內會升番

因為宜家我一手都冇，想趁低吸納，之後佛系式咁等升同收息。亞sir 你見解係？...

龔成老師：

粵海投資（0270）正面的，最近業績較一般，但從長遠來說，仍是有質素。佢主要因為水務以外的業務，影響左佢業績。

至於東江水，其實長遠仍是穩定的，不會大跌，當然，增長力不是強的類別，是平穩增長型。

這企業有多個業務，同時都處於賺錢的狀態，整體不錯。加上最大的水務部分，更是香港東江水，即是不斷賺香港人錢。

佢係供港東江水部份，賺錢能力已經比以往弱左。係疫情下，內地工商用水需求會下跌，影響收入。而且，集團收入除了水資源外，還有其他好似物業投資、酒店、百貨等，在疫情下難免會受影響。

至於增加資本開支投入建設，如果能提升現有效能，就會對佢盈利有正面影響。整體而言，集團業務依然係算穩定，預期維持平穏發展，故有長遠投資價值。

此股現時在合理區，投資時要分注進行。

------------------------------------------------

Q21243：

老師 本人係單親媽媽

過住二十年獨力帶大女兒根本無儲蓄 現女兒已出身每月可儲蓄大約2.5萬 本人一點投資知識都沒有希望十年後退休後有一千萬作生活費

現有現金十萬及每月可儲蓄2.5萬 想請教老師怎樣才可達成目標 本人今年47歲

龔成老師：

你現時47歲，在累積財富方面，可以以「平穩增長股」作為核心，到你10年後，目標是有一筆財富，再轉為現金流類別。

你可以考慮平穩增長股：考慮盈富（2800）。

另外再加：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

每月月供$15000，餘下$10000儲現金，等機會投資。

每月$25000，一年$30萬，投資10年，如果假設回報為10%，你將會滾存到$480萬。

或者你可以增加投資年期，例如去到15年，就會滾存到$950萬，較接近你的目標。

又或者，你可以選擇加大金額，都是一個方法。

又或，你可以提高你的回報率，例如投資較多潛力股，當然，這會令你風險度提高，以及要求你有更多的投資知識，你都要明白這點。

------------------------------------------------

Q21244：

1810最近因投入大量資金造車，而造車像Tesla要10年以上才有回報，稍一不慎有機會虧本，趁高位而沽。用沽出的資金再買入其他較有潛力的優質股

本來也睇好，打算長線持有的小米，造手機及其他家电市場是有潛力的。但因把賺了的錢大量投入造車市場才引到担心影響業績，所以才打算沽出後換馬

龔成老師：

的確有你所講的風險，佢發展新業務，這一定會有不確定性，最後成功與否，無人知。

不過，如果成功，就會有倍計回報，如果你太著重這刻的回報，只集中睇眼前的分析，就會錯過了一些倍升股。

而小米（1810）佢過往的研發能力，產品定位，市場化的能力都很強，所以我對佢其實都有信心（當然，不確定性一定有）。

而我地投資者，如果要有倍計回報，就要有長遠眼光，在可承受風險的情況下，取得回報。

------------------------------------------------

Q21245：

老師你好，請問一下2269小數股東損益有$300萬這麼大負數。這個代表什麼？

是否這個負數影響2019年的每股盈利？

龔成老師：

我睇翻藥明生物（2269）2019年的年報，你所指的部分是「小數股東權益」，或叫「非控股權益」，2019年出現了$346萬的數字要扣除。

其實這個數並不是一個正式影響藥明股東的盈虧，你可以理解這是一些會計上，之前計多左，要扣除的數目。

------------------------------------------------

Q21246：

2238 的廣汽集團
2333 的長城汽車

都注重發展電動車
你認為哪一個企業會比較值得投資？

龔成老師：

廣汽集團（2238）本身都有質素的。

佢係中國汽車製造商之一，主要業務包括製造及銷售乘用車、商用車、發動機及汽車零部件，亦從事一系列汽車相關服務及其他業務。

佢透過共同控制實體廣汽豐田及廣汽本田生產多個系列的乘用車。

業務發展不過不失，但增長力就不算強。

長遠仍有發展，但不是高增長型。現價合理。

長城汽車（2333）有質素的，業務都不差，不過，過往的增長力不算好強，長遠業務發展雖然正面，但未必是潛力型。這股都有長線投資價值。

現價合理區頂，小注都得，如果想正式入貨，最好回少少先考慮。

其實兩隻都不差，而長遠發展，長城汽車會略好。

------------------------------------------------

Q21247：

你好老師,平時沒投資股票,有儲蓄$習慣.通常儲到一定金額去行銀買人壽一放就10年.

我返飲食行業留意近埋同事有投資,想了解股票慢慢令財富增加.睇左老師留言我月供盈富基金，

作為我返工10小時新手,好似老師當年睇好比亞迪一樣，

目標平穩增長又吾想單一月供盈富，我認同老師講法買股票是企業增長同業務，因為我新手想問去邊找到資料來做功課,從而分析企業選優質股

龔成老師︰

有定期儲蓄架習慣係好事，但儲蓄保險係財富增值角度，唔係一個理想架選項。

因為"保險"只係理財中防守部份，其實你買足夠保障就可以，增值可以留比優質資產來做。

而我地可以去決定一間企業是否優質，會從企業質素、行業前景、財務狀況等因素，多方面去作出一個全方位的分析。

相關資料，你可以睇翻公司年報、公司網站、財經新聞等地方找到。

盈富(2800)係包括55間質素不錯上市公司股票的組合，對於無選股能力的初學者，會係一個唔錯架選擇。

當然，如果你有一定經驗，可以慢慢創建一個適合自已的增值組合。但在現時經驗尚淺的時候，未懂選股前，先用盈富(2800)作為增值目標，會係較穏當架做法。

另外，你要記住，投資最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

長遠，你要懂分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

------------------------------------------------

Q21248：

老師好！我而家應該賣左結婚時D金器作股票投資用嗎？

龔成老師︰

我地先從黃金本質來分析，黃金是貴金屬，有「終極貨幣」之稱，是人類自古以來的貨幣，因此，有持有價值，而現時我地的現金，一定長期貶值，所以黃金長期會向上。

不過，黃金沒有現金流，持有無法創造出經濟價值，其主要作用是對沖黑天鵝事件。

所以，不用佔財富比例太多(<3%)，而且持有的應該為實金。

如果佢佔組合太多，反而會減弱左你財富增值架效果。但由於"結婚金器"有點特別，它除左係黃金外，也存在金錢以外的意義。

所以，你係決定是否賣出用作投資前，除了從投資角度計算外，也要從金錢以外角度去作出考量。

------------------------------------------------

Q21249：

龔sir, 你好，本人三十多歲，月入$3萬，丈夫月入$7萬，收入穩定，由於過去十年投資比較保守，主要買入一些收息股票為主。如下：

港交所 2000股
領展 1000股
友邦 4000股
煤氣 1000股

讀了你文章後開始月供股票盈富基金、港鐵、恒生科技各$1萬。這些組合可以嗎？

但本人需要增長股的幫助，希望目標在五年內能買入多一層現時價$1200萬的物業作為自住，而將現住物業出租（貸款還餘$300萬）。

因為本人不知全數賣出現有股票去買$1200萬好，還是繼續買股票增值好，希望老師有時間回覆，謝謝！

龔成老師︰

若果你係打算3-5年後，才買入一個新物業。中間都尚有一段時間，可以利用用優質股作增值。到你要實行置業計劃，才慢慢分段沽出股票。

你現時持股，其實都係有一定增長力，而且都係有質素的。但有個較大問題，組合上太偏重左係港交所(0388)。

任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於3成，而單一企業不要高過15%。

港交所(0388)明顯係佔比重偏高，但而一刻唔需要沽出，因為佢始終係高質素。我地用將來投入架新資金，去將個組合慢慢咁平衡翻，咁就可以了。

你所講架月供組合，盈富基金(2800)、港鐵(0066)、恒生科技(3067)每月各$1萬，適合你現時情況。

其實這幾隻適合你的，有平穩增長股及潛力股（3067），如果你投資目標，希望增長方面加強翻，其實可以3067比例多翻D，不過，要留意恒生科技(3067)雖然優質，但同時都會有一定波動性，你要明白有這個風險。

另外，現時大市只在合理區，每月可儲蓄的資金唔好盡用。最好留有部份，等大跌市出現時，可以用來掃貨。

我假設投資回報有10%（連股息再投資），你每月投資$10000 + 現有持股(約值135萬)，5年後大約會增值至400萬。相信這筆資金，對你置業有一定幫助。

但緊記，在買入新物業時，股票最好唔好盡沽，必需留有部份，用作增值之用。

------------------------------------------------

Q21250：

老師，我而家30歲，頭幾年返工一直係月光族。而且，三四年前股票高位入d股票，點知買完一直跌，其後我又急住買樓蝕住賣套現，結果輸左好多錢。

我一直耿耿於懷，因為當時低位賣既優質股（700, 2318, 175等）而家已經升左好多好多，同時我買左層樓又樓價開始一直跌，我覺得自己好黑好灰心，近兩年我拒絕睇任何財經既資訊。

直至朋友介紹下認識你，買左好多本你既書，之後我決定要改變自己理財既心態，希望你俾d意見我。

1. 我想好好建立自己既財富組合，想係3年內有120萬，你覺得有可能嗎？

以下係我既財政狀況：
月入45k，供樓10k，家用及個人開支20k，每月最多可儲10-15k。

而家手頭有現金20萬，同大概9萬既股票
1177 x 4000
3319 x 500
823 x 3我200
1313 x 2000
7500 x 3000)

2.有無d現價合理又有潛力既股票？

3.我想報7月既基礎班，但會考慮有每星期一堂？

謝謝你既耐心解答，同時感激你既書令我有得益，我仲學習做一個有耐心既人

龔成老師︰

投資最重要是理性，你太過執著於過往，其實無意思，最重要是分析，這一刻怎樣建立一個優質、適合你、平衡的組合。

1) 以你現時情況，每月儲$15000 + 現有持股和現金(約29萬)。我假設回報率為10%(連股息再投資)，你3年後大致上會增值至100萬。

若你想達成這個120萬架目標，你就要加大儲蓄力度，大約提升至每月供$20000，才可以做到。

同時，你要明白3年唔算係一個長時間，中短期股價係會出現波動，影響你最終回報，你要明白有這個風險。

另外，你現時持股中，ＦＩ二南方恒指（7500）係反向追蹤恆生指數每日表現。當恆指跌1%，你就會獲利2%(另扣管理費)。但若然恆指向上，你就會虧損。

我對這類產品有保留，恆指在過去數10年反覆向上，所以長遠計持有這股對你"不利"，一定多於"有利"。

建議你長遠就算不全數沽出，也最好沽出大部份，換碼至其他優質股較好。

增值策略上，你可以投資「平穏增長股」和「潛力股」。但「潛力股」由於波動性較大，所以你可較集中在平穩增長類股，至於潛力股，只宜小小注。

你每月5成儲蓄，即是用$7500做月供。其餘先儲起，用一邊月供一邊儲蓄的策略。

選股上，你可以投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、粵海(0270)、領展(0823)。

增長力較強的，可選安碩恒生科技(3067)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）。但佢地波動性和風險會較高，你要自己平衡。

餘下20萬資金，可再投入多5,6萬，分注入貨。餘下資金和每月儲蓄，我地就等機會，當大市出現較大回調，就加大力度掃貨。

2) 部份潛力股已有輕微過熱情況，只有安碩恒生科技(3067)、ＧＸ中國電車基金（2845）、 阿里（9988）、中生製藥（1177）、福壽園(1448)勉強算在合理區頂部，可分注入貨，其餘要等等。

但若然係做月供，這些潛力股都係可以。

3) 你預7,8會有機會有，你可以留意我FB公佈。

其實你過往投資架股票，都係有質素。但你在成個理財計劃上，出現左問題，令到成件事架效果事倍功半。

我建議你除了學好選股外，也要學好成個理財觀念，咁成個財富增值計劃的效果，才會更明顯。

------------------------------------------------

Q21251：

同埋好想請教老師你，納米盤如果四百幾萬係新樓但係得180尺開放式單位，或者可能最多得一房 200尺，呢啲盤好似上車容易好吸引

（因為只係比500,000左右首期，仲可以做九成按揭，又容易過到壓力測試）其實我哋應唔應該買入呢啲單位？

定抑或喺二手市場搵一個700幾萬嘅單位但係有兩房 五百幾呎，兩者比較邊一個更適合或者反而更化算？

龔成老師：

記住，唔好比「易上車」，吸引，這只是其中一樣我地的分析點，最重要都是睇翻該物業的質素，呎價，預期租金回報率，特別是利用「呎價，預期租金回報率」去比較同區同類單位，以確定該物業的平貴水平。

因為總物業金額、首期，並不是衡量物業平貴的核心。

因此，你要小心做功課，然後先決定是否投資。

另外，250呎以上的物業，一般投資價值較高，因為是一個基本家庭所需的面積。

如果以你上述的比較，二手市場搵一個700幾萬嘅單位但係有兩房，五百幾呎，會比該新樓較好（當然，你仍要作出比較）。

------------------------------------------------

Q21252：

老師想請教你剛剛見到你寫嘅文章，如果你話「真正的股災是在你想不到的情況出現，大家想到的股災就絕對不是股災」

如果照呢種講法嘅話咁係唔係你平時話價值投資嗰啲優質股都要放咗佢？

如果我哋等到自己預料唔到嘅情況突然之間出現股災咁連呢啲優質股都會瞬間貶值，咁係唔係我哋應該要早啲賣晒啲股票？連休即古都要賣晒佢？

但又好似有啲矛盾因為我哋成日話長線投資，唔應該短線獲利，

但股災又會突如其來出現？咁會唔會好矛盾？究竟應唔應該長線投資？定係短線獲利就要走啦？

需唔需要成日擔心會出現股災？
謝謝老師

龔成老師：

第一，股災無人能預測的，所以你根本做不到「預日賣出」這動作，因為無人知幾時真正大跌。

第二，股災其實是股價大幅下跌，這是指「股價」不是是「質素」。

如果一間企業有質素，股價下跌，根本不會影響到佢業務營運及企業發展，因此只是一個表面因素，對我地的核心財富，往往只是中短期的情況。

因此你唔需要太過擔心股災，只要持有的是優質股，企業運作正常，在長期角度，股災對佢無乜影響的。

------------------------------------------------

Q21253：

想問吓老師心態嘅問題
例如美團3690

剛開始睇嘅時候4XX最高位
跌下來365元入第一注
之後跌倒2XX

其實應該在跌時候溝貨（有預留資金）還是應該升返320多的時候止蝕離場。

我選擇咗後者，重新檢視返個組合同埋比例，因為如果再繼續加注會去到成個組合嘅30%

龔成老師：

首先，一定要睇企業質素，如果無質素，就不會加注，同時不值得佔組合比例太多。

第二，我地會分析平貴，如果美團（3690）在$280仍是貴，當你在$365買入，而佢現時跌到$280，你都未必值得加注，因為你本身已有一定的貨，再買入時就應該以較平或合理翻D的價位先會考慮。

至於上翻去是否離場，其實要睇翻這股佔你組合的比例，如果佔比較多，而佢上翻去時又已經貴，其實應該減持部分。

其實，一隻股票佔你組合15%以下會較好，去到30%已經是較多的水平。

------------------------------------------------

Q21254：

你好，我有意換樓，近來都有人睇樓，但本人願意出售的價錢比估價高3～4%，原因本單位有景有裝修，放售約1個月，請問以現時市況，我應該堅持，或減價加快放售呢？請俾俾意見，謝謝

出售樓：估價502萬，九龍灣區
換樓目標：750萬，何文田區

HKG:9988 阿里巴巴－ＳＷ 100 @$190
HKG:9618 京東集團－Ｓ 50 @$330
HKG:1833 平安好醫生 100 @$96.5
HKG:6618 京東健康 50 @$72
HKG:9992 泡泡瑪特 200 @$39

HKG:0522 ASM PACIFIC 200 @$111
HKG:3067 安碩恒生科技ETF 700 @$18.6
HKG:0823 領展房產基金 400 @$67.55
HKG:1299 友邦保險 200 @$66
HKG:0636 嘉里物流 500 @$23

另外, 上面係我在2020年4月開始建倉, 本人可以相對高風險, 請問是否有野要執呢?

龔成老師：

如果九龍灣區，應該有一定的質素，加上現時香港樓市其實唔算差，你唔需要太急去減價賣。建議你找多幾間地產代理代，幫你放盤，等多D客去睇樓，我相信當你貼近市價時，要賣出不難的。

如果你目標價想比市價高，就以這價開多1、2個月，睇下市場反應，之後再慢慢減價。

另外，何文田區都是有質素的地區。

你上述持有的，都是有質素的股票，基本上都可以長線持有。雖然潛力股部分有少少多，但不是過多，同時有質素問題不大。

嘉里物流（0636）你原有貨持有就得，但就不要太心急加注，因為近一年升左好多，股價較波動。這股不差的，順豐入股後長遠發展更正面。

佢本身由嘉里建設（0683）分拆上市，係亞洲的物流服務供應商，主要從事綜合物流及國際貨運業務，亞洲、澳洲、歐洲及南北美洲的35個國家及地區設有逾400個業務點。

業務以第三方物流服務供應商身份為世界各地的製造商、零售商及其他客戶提供綜合物流服務，包括主要在亞洲提供廣泛的物流服務，如倉儲及增值服務、陸運及配送、退貨管理及各種配套服務。

另外，亦有從事國際貨運：提供的國際貨運服務絕大部份位於亞洲區內以及亞歐大陸之間，涉及空運、海運及跨境陸運服務。

現時的經濟及疫情，對佢都有一定的影響，而市場對佢的估值都會因而減少。

另外，Pop Mart泡泡瑪特（9992）暫時不宜加注，佢是一家覆蓋潮流玩具全產業鏈的一體化平台，當中包括藝術家發掘、IP運營、消費者觸達及潮流玩具文化的推廣。

根據弗若斯特沙利文報告，分別以2019年的零售價值（市場份額為8.5%）及2017年至2019年的收益增長計，集團是中國最大且增長最快的潮流玩具公司。

合作伙伴中不乏知名品牌，好似迪士尼、HELLO KITTY等等。而產品中，最為人所認識就是"盲盒"，此銷售模式為集團貢獻不少。

整體而言，這企業都有質素和發展前景。睇佢數據，過往幾年增長唔錯。

但始終是新股，參考數據唔多，未來能否一直維持咁高增長，要有待觀察。所以投資時，我地要保守D，唔好太進取。

現價貴，但有潛力，你持有就得。

------------------------------------------------

Q21255：

老師我見到你上左去富途果度做節目，我自己用過幾日就del app因為果個完全係一個為短炒既人而設計既apps真係會害死人。

但我絕對理解同埋明白你叫人月供盈富基金既目的，係對於完全冇投資知識唔識選股既人而言真係一個幾好既選擇。

我都明白價值投資法係香港推廣係好難做，特別而家市場上既股評人都係技術分析為主導。但都希望你可以堅持落去

都好多謝你出現左係我人生入邊，你同埋另一個價值投資法既股評人(洪龍荃)都真係幫左我好多

特別學習估值/分析企業方面，你地兩位有好多投資理念都90%接近(當然佢可能因為基金經理真係進取好多)
另外larry其實佢係佢一個收費既理財教學節目都有建議初學者月供股票

佢都有建議月供盈富/煤氣或者買一D有質素既ETF，佢話當年屋企人都係因為月供股票，然後慢慢幾年後發現D錢竟然夠買層樓既首期。(如果有需要可以share條收費片比你)

而未來港交所亦會更加進取，會放更多有高增長既成份股入恆指，令盈富基金更有升幅。

我最近呢一兩年都不斷用價值投資法去影響我屋企人同埋身邊既朋友

希望佢地謝絕短炒同埋技術分析。
我都希望你可以繼續努力將巴菲特既投資理念推廣出去
如果有人質疑你既，你叫佢show個持倉成績出黎比較下就OK~

龔成老師：

其實，價值投資法一向是最賺錢的方法，你見全球全賺錢的人巴菲特，以及一些出名基金經理，都是用價值投資法。

不過，就算這方法已經是最賺錢，但香港散戶，仍是集中在短炒，因為佢覺得短炒會好快賺到錢，但事實就不是。

有錢人始終是少數，就是一般人的知識有限，明知有一個賺錢方法/但都唔會用。

其實，我一向都好明香港人心態，一般散戶唔中意價值投資，中意快，所以，價值投資一向在香港都唔受歡迎。其實我無乜所謂，做左要做的現財教育就得，至於散戶是否聽，就是佢自己的決定。

大家加油！繼續做好自己就得！

------------------------------------------------

Q21256：

1.運用老師上堂教的，自己嘗試計美圖（1357）的估值，大概合理範圍$2.37-4.29,這樣的估值合理嗎？老師認為合理價又是多少？

2.美圖（1357）主要收入是否廣告牌和高級訂閱？佢好似已經過左最壞時期，這股潛力好嗎？值博率高嗎？

3.見佢2018開始投資活動現金流都係正數，係咪姐係佢冇再投資發展？咁佢算唔算係水桶1？

另外睇到佢2016損益表有項（其他項目公平值變動及減值）係5606109（k¥), 令佢果年既股東應佔虧損6260880（k¥）,e項究竟點解？

龔成老師：

1）+2）美圖公司（1357）正面，佢過左最差時期，現時正向好。

佢主要從事提供在線廣告及其他互聯網增值服務；以及開發、製造及銷售智能硬件產品。

見佢財務數據改善，這企業仍有發展力，有長線投資價值。不過業務變化始終大，不建議大注投資。

至於估值，坦白講，我未深入研究，同時這企業業務變化大，過往持續虧損，但見佢開好有正現金流，因此預期向好，但估值難，如果業績向好，估值可以好高，但如果差，估值都可以大跌，因為這刻的財務數據基礎不足，無盈利令到估值有好大不確定性。

3）至於投資活動報表，我睇翻只是一些定期轉換問題，其實與之前無太大變化，因此仍是有投資的。

至於損益表，我睇翻佢當年的資料，該項目為「可轉換可續回優先股」而出現虧損，而這你可以理解是一些會計上的項目，不用太過擔心，我地分析時會集中在營運上的盈利。

------------------------------------------------

Q21257：

Sir，我係你舊生，我以590計算,2015至2018中間四年市盈率為6.99-18.26, 以平均盈利在過往近四年（2016-2019）是1.97

咁我是用行業市盈率11至14定還是調高少少？

我仲係唔係好掌握到，點樣推算隻股票合理市盈率
望指教

龔成老師：

由於佢的市盈率範圍好闊，這反映市場對佢估值分歧較大，所以當運用6.99-18.26市盈率時，會較為小心。

因為太闊即是參考價值會低左，我地未必能視為好有代表性的數據

因此，會同時運用行業的市盈率，配合佢自身市盈率去運用。

你預六福（0590），如果去翻正常經營環境，大約有代表性的盈利$1.8-$2.0，可以作為參考。

至於市盈範圍，大約9-13倍都可以作為參考。

因此，你預$20是這股的合理區中間左右。

------------------------------------------------

Q21258：

龔sir,想請教一下，本人今年45歲，剛剛由於私人理由辭職，現況：

物業：第一幢剛賣出，取回現金約600萬
第2幢自住，7年前買入價1400萬，現約值1600萬 （按揭尚欠650萬）
第3個為澳洲物業，買價約為350萬，出租中，沒有按揭，每月租金約為8500）

股票約值：220萬
現金：650萬 （包括第一幢賣樓所得）
MPF: 現值110萬

現考慮移民，希望利用以往獲得的資產，在外國用低成本享高質生活，龔sir 有什麼建議？賣樓的600多萬可以如何善用（若移民可取回MPF 的110萬）

第二幢亦在放盤中，但比較難賣，若出租可能收月租大約30000左右。在外國亦在考慮應該租還是買樓？

龔sir 有何建議？可以如何善做配置？我是否應該留香港多幾年賺多些錢才可以去外國過半退休生活呢？

龔成老師：

你到外國初期，不用太心急買樓，可以租住外國樓先，等過幾年，睇到時情況及需要先決定在當地買樓。

至於現時的自住物業，不用改變狀態，可以先放租，令你得到租金方面的現金流。

至於$600萬，建議你投資物業以外的資產，並建立一個更平衡的投資組合。你可以將這$600萬，分成5部分。這些都是較低風險，著重現金流類別，相信較適合你過半退休生活。

第一部分投資收息股，你可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

（你可睇下《50穩健收息股》當中仲有好多）。

你平衡的投資這些股，除了可以得到穩健的收息收，同時可有效的分散風險。

第二，投資債券，你可以選擇A評級的債券，年期較長都可以，但利息卻不高。你可以到銀行問問。

第三，投資年金，你可以睇睇，這是適合你的產品，零風險，可以有穩定回報。

第四，你亦可投資銀行低風險類的產品，你可自行到銀行了解下，總之是「低風險，持續現金流」的。

第五，持有現金，除了可做定期外，現金亦可以為你的後盾，以備不時之選。同時，若投資市場大跌，你可以在這時買到更多的收息股，股息率會進一步上升。

你可以將$600萬資金，平衡地分配在上述的項目上，對你來說是最好平衡風險，同時有穩定的現金流。

------------------------------------------------

Q21259：

即係0016繼續keep住，定係咩位放咗佢好？
因為我都屬於新手，多多指教

同03380呢隻點睇？

龔成老師：

新地（0016）仍是有質素，當然，增長力減少左，預期佢中短期都是弱，不過，這股是睇長線及超長線的。

佢較多業務在傳統經濟，增長力一定不強，但不是無質素。是平穩增長類。投資收息及少少增長，可以。但就唔好對股價有太大期望。

如果你追求平穩增長，這股可持有。

龍光集團（3380）都有質素的。

佢係中國一家於粵港澳大灣區住宅市場的一體化物業發展商，並發展長三角核心都市圈及西南、中部城市等區域。

主要於中國從事物業開發、物業投資、建築及裝飾以及一級土地開發：物業發展分部開發、物業租賃分部、建築及裝飾等。

過往業務發展不差，生意與盈利都有增長，不過負債就少少高，略有風險。這股都有長線投資價值，你可考慮，不過，由於佢同新地都是地產類，你不宜過份集中。

------------------------------------------------

Q21260：

龔sir你好,我有個問題想請教一下你,澳門供緊樓貸款餘130萬左右,每月供9千,

現金80萬左右,每月可存1萬,這狀態下,好唔好係大陸珠海香洲供個單位好?

龔成老師：

唔建議太急去集中物業。

我地建立財富組合，最重要是「平衡配置」，例如建立一個股樓平衡的組合。

你現時有物業，之後的配置，可以先考慮股票，等股票有一定的數量比例後，之後再投資物業。

至於珠海地區，有質素的，是大陸其中一個有長遠發展力的地方，如果找到一些交通配套等都不差的物業，日後都可以考慮。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

［今日寫啲乜］其實係兩篇文，呢個圖只係下集。上集冇出「今日寫啲乜」。點解？因為月尾多數冇人join，Anyway，兩篇都係周末專題，我會寫啲大課題心法嘢case study．同平時一至五嘅唔同。今次上下集，夾埋8000字。有圖有Excel畀你玩

＝＝＝＝＝＝＝＝＝＝＝＝＝＝
月頭訂最抵！2021比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費80，半年已1600人訂！ 畀年費仲有85折
＝＝＝＝＝＝＝＝＝＝＝＝＝＝

2004年夏天，兩隻家傳戶曉嘅新股上市，一隻係Domino’s Pizza（DPZ），一隻係Google（GOOGL），你今日坐時光機返去，會買邊隻？

咁我個題已經話你知，雖然GOOGL係科企，甚至有人覺得係最geek最nerd嘅科企，今日FAAMG之一，地球上第三大企業，1.6萬億市值。但，居然上市至今回報，要跑輸呢間low tech Pizza公司

上集我差不多只講一樣嘢：return vs total return．股價升幅同總回報。你心諗唔係一樣？哦，仲有派息，但派得幾多？一年半年唔多，但積埋17年就好係嘢。如果你將啲股息再reinvest 落去隻股票，碌雪球利叠利，分別仲大。

DPZ，只計股價升幅同派息（冇再投資），1蚊變34蚊。但dividend reinvestment呢？1蚊變65蚊！爭好遠！亦係因為咁先跑贏GOOGL

咁你話，咁啱因為DPZ升得多，息又派得好。唔好咁屈機。咁簡單啲，標普指數。由2006年4月計起（點解？因為我開始做分析員），計到今日，有幾大分別？ 冇reinvest嘅，1蚊變4.3。幾好啦。但有嘅，1蚊變5.1。都真係爭一截的

上集就都係老生常談嘢，stay in market，日子有功，time is your friend。收到股息唔好使咗佢，或者唔好使晒佢，至少點都碌返少少入股市。

但除咗呢啲仲有乜啟示？梗有啦，就係下集講。

下集我整埋個Excel，比較返兩間公司。咁首先，你見到長線地，股價都真係大約跟盈利行。未必跟足晒，但天道酬勤，利潤不停升嘅，股價總係會跟上去。正如不停輸錢嘅，點都會跌。

然後睇下，GOOGL梗係高科技啦。Big Tech護城河極深，只有佢搶其他人（包括Pizza舖）生意，冇掉轉。唔通DPZ可以搶Big Tech 生意？頂多啲工程師叫幾個Pizza

睇數睇到的，GOOGL 純利率，盈利增長，甚至規模都大過DPZ好多。GOOGL年賺400億，DPZ賣Pizza一年5億已經係神級。

咁但，最Tricky嘅位，點解DPZ回報都係跑贏？頭先講咗Dividend reinvestment ，但仲有其他嘢。其中一樣就係估值。好粗略計，GOOGL 2015年已經100倍市盈率，高科技嘛，但而家得25倍咋！Multiple contraction，估值收縮。相反，DPZ畀人覺得冇增長，當年13倍市盈率，但而家去到30倍，Multiple Expansion．呢度一來一回，加埋股息再投資，就爭一大截了

根本本身就好高市盈率嘅，好難長期維持，亦好難再expand．可惜過去好多年都係增長股跑贏，啲友鍾意聽故事講顛覆，就好少有人理估值。今年就價值股全部回歸，迪士尼跑贏NetFlix，福士跑贏Tesla

但再講落去，根本DPZ同GOOGL都係神股，why not both？兩隻都幾十個開。咁亦話你知，你買中呢啲公司，你根本唔怕其他啲嘢total loss，我贏一隻可以輸十隻。一定係think big，好公司可以升到你唔信，但壞公司亦只能跌100%。

而你亂咁止蝕止賺嘅，注定成唔到大事。根本你DPZ而家睇天下無敵，但2006年盈利已經倒退，難免畀人覺得係谷到最靚上市後就收皮。2007 2008生意更加重災區。搞到2012，搞利先返返2005水平。幾多年呀？7年。你有冇咁嘅耐性？把口而家事後梗係羨慕人買到10倍股，但個Q個隻嘢一個月唔升已經問乜事啦。一季盈利唔得就話公司唔掂要沽貨啦。更唔好講，一個金融海嘯打埋嚟，兩隻都一年跌六成啦。

然後講好老土嘅嘢，複利的威利，保險L成日同你講。你見呢啲咩股王，都係講緊一年 廿幾%回報，已經係17年升幾十倍。一來你見到Time is your friend，日子有功。但一年20%易唔易？梗係難啦！極難呀！所以唔該你調整返你啲期望，唔好講埋啲「我唔貪心希望年年穩定20%回報就得」。呢個世界年年穩定嘅回報，係美債，1.5%．或者iBond可以有兩三厘（但買唔得多）。同樣地，出面嗰啲友同你講「目標一年三四成回報」，你信我嘅我就祝君好運。不過人就係鍾意聽大話，自欺欺人。

仲有17年嚟，GOOGL CAGR25%，1蚊變44蚊。DPZ CAGR 22％，1蚊變30蚊。見唔見到爭幾咁遠？呢啲亦係複利的威力，你個回報一年爭少少，拉長咗就爭好遠。

CAGR爭幾個%，十幾年就拉開好多。做人都係。以前都寫過，順境時我跑贏你少少，逆境時我冇你咁大鑊，幾個周期就拉開晒了。

最後留意，GOOGL「頭尾」純利升咗27.5倍，但每股盈利只係升23倍。點解？因為股數多咗。留意唔係上市時，係後來再發的新股。因乜？獎勵啲工程師啦，老細啦，仲有收購。所以你見股數都多咗30%，雖然近年已經係縮緊，因為做回購。相反，DPZ呢？股數差不多年年縮，而家係當年嘅六成左右。所以你見到，純利4.5倍，但每股盈利差不多8倍—而影響股價嘅，係後者。

＝＝＝＝＝＝＝＝＝＝＝＝＝＝
月頭訂最抵！2021比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費80，半年已1600人訂！ 畀年費仲有85折
＝＝＝＝＝＝＝＝＝＝＝＝＝＝