【龔成問答信箱】（Q19781-Q19800）

Q19781：

老師，當你買入某股後，見其他網友都話該股唔得，有些專家都話這股弱，我應該點面對？

你當年你入小米、比亞迪，係咪都受過類似批評？
我應該點樣，我見其他人對我隻股都係彈多過讚。

龔成老師：

小米（1810）2020年我買入時，中國印度有最多衝突，我在網上分析小米，話自己都有買，唔少網友即刻話小米將會玩完，會無左印度，之後會蝕錢。

佢地同好多人一樣犯了一個錯，就是將「表面因素放大」，而作為投資者，一定要分析將來情況，這企業的長遠發展怎樣。

比亞迪（1211）我買入了12年，你可以上網找翻，我多年來久不久有分析文，在比亞迪最差時，亦是佢最平時，我是比人罵得最多，話佢D車會爆炸。

到比亞迪上左$200，出面又個個都話佢好。

可見，一般人是好表面的，如果你用一般散戶的思維，保證你無法買到倍升股。要買中倍升股，就要有獨立思維，分析企業基本面，你應該多睇企業年報，少D睇坊間所謂的評論，浪費時間。

------------------------------------------------

Q19782：

龔成老師，您好！我現在39歲,有小朋友，300萬現金，
一層樓市價大概1000萬（負債400萬，月收入10萬，沒有投資經驗。

現在想用50萬投資股票。想分佈在收息股，穩健增長股，和一小部分潛力股。

請問我的這個計畫是否合理。如果現在入手，您會推薦哪些股票？多謝！

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你年紀計，應以增值為主，而非收息。你可以用"平穏增長股"作主力，再輔以一些"潛力股"作組合。現在你每月5成儲蓄，去做月供，其餘先儲起，用一邊月供一邊儲蓄的策略。

月供方面，你可以選擇投資在平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、領展（0823）、希慎（0014）、太古地產（1972）或

潛力股︰中生（1177）、福壽園（1448）、安碩恒生科技（3067）、港交所（0388）、阿里（9988）、騰訊（0700）。

由於你現時無乜選股經驗，你可以先用盈富基金（2800）作為你投資目標，佢係包括52間質素不錯上市公司股票的組合，有助你平衡組合中的風險。

現時大市在合理水平，現金和股票最好各一半，但由於你經驗尚淺，建議你先用50萬資金，用"分注"形式，慢慢買貨。餘下250萬和每月所儲倒的資金，等到你有一定能力，才買其他我建議的股票。

------------------------------------------------

Q19783：

本人41歲，月入20k，持有一半現金及以下股票組合:
1） 0005匯控 56.5 兩手

2） 0941中移動 平均價57 三手
3） 1177中生製藥 8.16 三手
4） 1478丘鈦 11.5 兩手
5） 3319雅生活 平均價37.5 五手
6） 3331維達 30.4 一手
7） 3662奧園健康 平均價7.02 四手
8） 9999網易 144.8 兩手

股票組合OK嗎？有冇邊一隻現價值得加注？
順便問埋9988阿里巴巴最好係唔係反壟斷問題解決咗先投資會較好？Thx

龔成老師︰

以你年紀計，應以增值為主，但組合上要開始保守少少。

你持股中，都是有質素股票，大致上都可以。丘鈦科技（1478）和網易（9999-S）這類股好波動，不宜持有太多，故唔好再加注了。

現時這些股票，都在合理區中至上部。由於你已有一定貨係手，建議等有明顯回調（約10-15%），才入貨會較好。

而阿里巴巴（9988）近期面對內地監管可能收緊，風險度增加左。

早前螞蟻金服因貸款業務問題，被叫停上市。中央就是擔心這些小型信貸增長過快，但監管又未及銀行嚴緊，會危害實體經濟。

但內地唔係想佢唔賺錢，只係想規管佢。由於佢本身己建立一個完善的業務，因此本身是無得輸，只是賺多賺少架問題。

此股質素依然存在，但你預佢增在力會弱左。現價算是合理區頂部，可分注入貨，並長線持有。

------------------------------------------------

Q19784：

你好，龔成老師！ 本人40 歲，自顧工作2年，月薪$30000-50000，目標是財務自由，每月不用工作可支取$30000！

股票：$500000（ 阿里，領展，新地，恒生，銀娛，中鐵塔，盈富），高位買，大部分未返家鄉！

外幣、港元：$2500000

一直想買樓，怕工作不穩定的供樓壓力，加上這2年收入浮動，不敢入市！

想問老師，要達到財務自由，現在應怎樣部署？

龔成老師︰

你現時持股都有質素，買入價只係心理因素，唔好太在意，這些股你一直持有就可以。

如果你希望每月有3萬蚊現金流，令自已財務自由，以股息率5%計，你需要本金720萬。

你可以用"平穏增長股" + "潛力股"作組合，當中以"平穏增長股"為主。

現在你每月5成儲蓄，去做月供，其餘先儲起，用一邊月供一邊儲蓄的策略。（由於你收入較波動，你可以用一年去拉個平均儲蓄金額去計算。）

月供方面，你可以選擇投資在平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、領展（0823）、希慎（0014）、太古地產（1972）或

潛力股︰小米（1810），中生（1177）、福壽園（1448）、安碩恒生科技（3067）、港交所（0388）、阿里（9988）、騰訊（0700）。

現時大市只是合理區，你現有250萬資金（連外幣）可以先投入100萬，用"分注"形式，慢慢買貨。餘下150萬和每月所儲倒的資金，就等大市出現一定程度的下跌，才大力度掃貨，然後長線投資。

以恆指過去年平均回報10%計（連股息再投資），假設你每月月供$10000 + 現有持股和現金300萬計，10年內應該可以增值到你所需金額。到時再慢慢換成收息資產，去支援自己生活開支，就可以。

------------------------------------------------

Q19785：

老師你好!我是你的新讀者! 經朋友介紹睇左 《財務自由行》,

但有樣野想請教一下老師, 書中P.384提到 “…買樓後, 餘下的$20萬便會投資盈富基金, 每月儲蓄$7,740, 同樣會不斷投入盈富, 繼續以12%複利息滾存。”

因本人財務知識不太豐富, 想請教老師怎樣可把利息滾存? 意思是收了股息後再購買盈富嗎??

本人32歲, 5年前開始購買一些儲蓄及投資產品, 而且剛剛買了樓花, 開始供樓, 現只餘現金10多萬, 扣除家用生活開支

每月大約可儲3000元, 因在2022年收樓後, 應有額外支出投放在樓宇中, 不知現在把每月的3000元投放在盈富增值是否可行?

雖然買了一些投資產品數年, 但對股票的認知不多, 不知之後可看老師的那幾本書比較合適? 希望現在才學投資不會太遲.謝謝老師

龔成老師：

書中的意思，就是將$20萬資金，買入一些投資工具，例如盈富（2800），佢會長期增長，股價長遠向上，加上有股息，當你收到股息後，就可以將股息再投資，買翻盈富，這就是複利息效果。

當然，如果你想有較高增長，其實可以考慮另一ETF，如安碩恒生科技ETF（3067），風險會高少少，回報都會較高。

由於你現時現金唔多，加上2022年可能有物業方面的支出，我會建議你點都要有一定的現金在手，唔好投資用得太盡，因此，你應該加強儲現金先，到有較多現金剩先投資股票。

另外，多增加知識先，例如睇《股票勝經》，唔好太心急買股，等你有一定的知識先

------------------------------------------------

Q19786：

龔sir你好，請問2809、2845、3110有質素嗎？哪個較好？現價可入嗎？謝謝

龔成老師︰

GX中國潔能（2809），其目標為追蹤SOLACTIVE中國清潔能源指數NTR之表現。

當中佔最多為"半導體產品與設備"股份，約組合4成，其次是逾2成的"獨立電力及可再生電力"。

此股平貴不易分析，而且頭10大股份中，除了信義光能（0968）外，其餘都在內地上市。

潛力度是有的，但會比較波動，如投資宜慢慢分注，可長線。

GX中國電車（2845）目標是扣除費用及開支前，與Solactive中國電動車指數NTR「相關指數」表現緊密相關的投資回報。

持股中最重就係比亞迪A股（002594），中國因為能源問題，長遠一定要發展電動車，這是大方向，故此股有一定投資價值。

由於近期不少車股被炒起，此股現價略貴。無貨可以現時入少少，到有明顯回調才再慢慢加注。

未來恒生高股息率（3110），其實這基金我在上堂都有介紹，是不錯的，你可以視為收息股的組合中其中一員。這基金可投資的，現價合理，可分注。

這3隻股票都有質素，前2者較有增長潛力，適合年青至中年人士。而後者係主要收下息，較適合將近或己退休人士。你可以因應自已情況，去決定。

------------------------------------------------

Q19787：

龔成老師多謝你的post,讓現年30的我開始意識累積財富，不能每月只儲蓄，買定年基金。我嘗試慢慢進行供股。

現時我每月可儲蓄$5000。如將儲蓄中的$2000，月供（2800），$1000，月供（1810）可以嗎？

另外想為媽媽籌劃穩定而低風險的投資。媽媽65尚有工作。如50萬現金可以購入邊隻讓現金減低眨值？

謝謝你無私貢獻。

龔成老師︰

你尚年輕，投資應以增值為主。你現時組合合適，每月儲下$2000就等大跌市，才去入貨。

但緊記月供係一個長線計劃，月供最少維持3年，並持有這些股票5年以上，才會有較理想效果。

至於你媽媽，投資上要相對保守，以賺取穏定現金流為目標。以下收息股都適合佢，現大市只在合理水平，你可先動用25萬，分注買入以下股票（係慢慢入，唔係一次過入晒。）。餘下一半，等大市有明顯回調，才再加注。

目標是現價計有5-6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，這些股票股價會略為波動，故不能太過大注）。

------------------------------------------------

Q19788：

你好啊 我有睇到你啲專欄而認識你 我岩岩畢業出黎做野 想請問下

1）如果而家入手月供2800供唔供得過呢

2）每月大概供9000 係咪固定供會好啲定因應當時升跌調整好呢

3）同埋作為新手 邊幾隻相對進取月供基金股票你比較推薦呢 希望你可以比啲意見我喇thank you

龔成老師︰

1） 可以，現時大市只在合理水平，做月供係無問題。

2） 當個市好貴或平，我地係可以調整個供款額。但如果你係初學者，我建議一直用同一個金額去月供，唔好理個價格水平，因為月供長線會拉平均左個價。

若你唔識估值之下，胡亂去調整，反而會危害到你長線回報，到時得不償失。

3） 你很年輕，係增值黃金時期，但都唔好全部買晒潛力股。因為佢地增長力高，同樣波動性都大。你可以用"平穏增值股"和"潛力股"各一半，去做一個月供組合，咁會更理想。

平穏增值股︰盈富（2800）、港鐵（0066）、金沙（1928）、煤氣（0003）、恆基（0012）、中銀香港（2388）、長建（1038）、粵海（0270）、領展（0823）、希慎（0014）、太古地產（1972）

潛力股︰中生（1177）、福壽園（1448）、安碩恒生科技（3067）、港交所（0388）、阿里（9988）、騰訊（0700）、舜宇光學（2382）、小米（1810）

現時大市只在合理區，每月資金唔好盡用。必需要留有部份，等大跌市，才用來掃貨。

------------------------------------------------

Q19789：

龔成老師你好，我想問下我中移動係$46.45買左1000股，其實呢隻係味值得長線投資，唔使理會佢現時不利好既消息？

另外見到您而家介紹人月供股票都冇提及煤氣（00003），係咪唔建議再月供佢,因為本身月供佢5000

供左好幾年，近呢3個月改左3000盈富2000煤氣，我而家應否再將煤氣轉供其他？謝謝

龔成老師︰

中國移動（0941）不是無質素，5G雖然對佢有正面影響，不過中國政府希望相關費用不會太貴，令資訊流通更便利。

所以，對佢賺錢能力方面，未必有突破性增長。若你目標係收息，長線持有這股係可以。

至於煤氣（0003）雖然增長力比以往弱左，但依然值得做月供

而現時$3000盈富（2800）和$2000煤氣（0003）架組合會更好，可令你風險更分散。

------------------------------------------------

Q19790：

老師你好，最近我同我老公分別開左股票户口，佢全權交比我去買股票，我想問下兩公婆嘅股票組合要互相配合，定話可以係一模一樣？

例如我睇中地產股，新鴻基同恒基都係優質股，但恒基有最多農地

所以恒基睇高一線。我打算每人都月供一隻地產股，咁我應該分別每人月供恒基

定話一個供恒基一個供新鴻基（分散風險）？
唔該老師！！

龔成老師︰

若你們以一個家庭作單位，去計劃未來財務發展，應該一齊考慮會較好。

長線計，其實我較建議集中一個戶口去處理會好d，成本會較低。管理時候，相信也會較方便。你最好睇下邊個戶口成本較低，同較方便你地操作，長線就用個個。

新鴻基（0016）同恒基（0012）都有質素，後者潛力會略略高。但我地投資唔好太偏重個別行業，否則會有過度集中風險，單一行業佔組合最多3成好了。

------------------------------------------------

Q19791：

龔成老師您好！我有12000股中廣核電力1816，平均價2.78是換其他股還是繼續守？
如果換哪一個好，請賜教

龔成老師︰

中廣核電力（1816）質素算係中等，過往2015年大時代熱炒，盲目認為這股是高增長的股票，但電力股一向只是平穩增長。加上近年的盈利有下跌情況，都影響左估值。

現時處於合理水平，你預這股能保持平穩增值，但就難以爆升，所以較難上得翻去，你可以當收下息咁。

如果持貨太多，最好減持部份，分翻D資金去其他股票，會較好。

------------------------------------------------

Q19792：

老師，上完你堂我覺得1918吾值得長揸，但以前我係$33大量入貨，約30萬，我應吾應該等佢升返先走？換其他潛力股？

其實我睇好中國移動日後的發展，現價想入，但上堂時無聽到你推薦，我都吾知值吾值得入。謝謝老師

龔成老師︰

融創中國（1918）此股有一定風險。首先，中國樓市如果逆轉會有很大打擊，另外，這股的負債超高，無事就無事，有事大件事。

因此，投資這股不是不可，因為不是完全無質素，但你要明白背後的風險，同時明白這一定會令股價較波動，自己最好控制注碼。

由於你持貨不少，我建議你沽出部份，慢慢換至其他股票，去平衡翻個風險。

中國移動（0941）是有質素的，但增長力唔高，你預佢用來收息。現價算合理區，可分注。

------------------------------------------------

Q19793：

龔sir，想問我73.15買入中電控股，現階段仲應唔應該持有？

有無買錯呢？
我係新手

龔成老師︰

中電（0002）是不差的收息股。中電業務就是收電費，就算經濟差都有錢賺，最多只是賺少D，佢過往的業務與派息穩定。

如果你係接近/已退休人士，又話者作為新手，想保守D，投資中電都係可以。

但你預中電這類收息股，增長力唔會高。若你較年青，就不宜持有太多。

------------------------------------------------

Q19794：

老師，可否分析下2269 & 1801? 同埋幾錢算係合理價? thanks!

龔成老師︰

藥明生物（2269），主要提供有關生物製劑藥物發現、開發與生產服務。

佢涵蓋生物製劑發展過程的所有五個階段，即藥物發現、臨床前開發、早期臨床開發、後期臨床開發及商業化生產。

潛力是有的，因為過往的財務數據的確理想，但現時的估值唔平，這刻投資值博率一般。

不過，這類股好難話現價一定貴，因為佢有好高的增長，只可以話現價唔平，但如果之後有高增長，那就未算太貴。只可以話，如果你真的想投資，小注好了，你要明白業務有不確定性，同時股價會好波動。

信達生物（1801）係一家中國生物製藥公司，開發了集研究、發現、開發、製造及商業化於一體的生物醫藥平台，並在腫瘤、眼科、自身免疫和代謝疾病領域建立了一個包括單克隆抗體和其他生物藥物的產品管線。

由於仍處於燒銀紙的狀態，所以有危有機，潛力度是有的，但估值好難，現時市值都唔細，只能完全「估」佢將來的價值，不確定性好大。只可以話，這刻投資值博率中等，投資可以，但唔建議大注。

------------------------------------------------

Q19795：

本人32歲，月入5萬，投資三年，每月能儲4萬以上，現時投資組合中

花30萬分別買入建行，中銀及匯豐，現時蝕約7萬，花45萬買入9988，27，2382

175，2822，2588，386，200帳面賺35%，另有100萬流動資金

請問我該如何投資以達至十年後能賺到600萬以上置業？謝謝龔成老師給我的建議，
看了你的帖文後，想於投資方面再努力一下看看能不能

補充一下股票的買入價
5 1500股 @63.5
939 20000股 @6.20
3988 30000股 @3.58
需要減持部分內銀股嗎？若要的話減持哪一隻比較好？

謝謝！

龔成老師︰

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

你現時的年齡，增值上可以較進取。建行（0939）和匯豐（0005）只係收息股，增長力唔會明顯，不宜持有太多。同時，你太集中同一行業，基本上單一行業佔3成以下較好。

而中銀航空租賃（2588）、新濠國際發展（0200）和中石化（0386）整體質素唔算好高，同樣只宜佔組合小部份。

未來時間，你可以用"平穏增長股" 和 "潛力股"組合，透過月供股票去增值。每月用5成儲蓄去做月供，其餘先儲起，用一邊月供一邊儲蓄的策略。

選股上，你可以投資在平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、粵海（0270）、領展（0823）。

增長力較強的，可選安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園（1448）。但佢地波動性和風險會較高，你要自己平衡。

現時大市只是合理區，未係盡用資金架時候。你現有100萬和每月所儲倒的資金，就等大市出現一定程度的下跌，才大力度掃貨。以你現時月儲4萬和現有資產（股票+現金），10年內達至600萬，應該問題不大。

------------------------------------------------

Q19796：

成哥 如果我個依家倉有
1810 40%
1711 20%
1211 20%
788 20%

我想問下 688 值唔值得長線投資 現在是否平？

本人可以承受風險 因為我喜歡留一半的現金 同埋每月可以儲倒錢

還有 非常感激 我套現左少少小米 我還清左之前係大陸買樓的債

龔成老師：

你上述持有的股票，都是有質素的，可長線。不過，長遠最好建立更平衡的組合，同一行業最好在30%以下，單一股要則在15%以下。

小米（1810）你賣部分是可以的，但最重要是點都要有D貨在手。

中國海外發展（0688）不是無質素，在發展商來講，不算最強，長遠有平穩增長的能力，前景都可以。

睇翻佢的財務數據，基本上都是正面的，但生意增長力不是好強，見佢過往的生意都只是平穩，而整體都有投資價值的。

可以視這股為平穩型的企業，現價合理。當然中短期可能因樓市一般而股價一般，但長遠，仍是可以的。

現時大市合理，你部分現金，部分投資，可以。

------------------------------------------------

Q19797：

你好，本人上年年尾已賣樓，隨時準備換樓。

而家手上有250萬資金，打算預100萬作投資，餘下就留來做首期。

希望投資之後可以盡快每年都有10-15%增長。用作供樓。

我近期都仲有睇老師你專頁，通常你都建議不太熟悉股票市場都先買2800盈富。我用50萬先入手，你覺得如何？

龔成老師：

我會建議你完成買樓過程後，之後再投資，這樣會比較好。

除非你已經計好數，對買入物業的金額及按揭有信心，就可將部分資金投資。否則，買完樓先買股票，會較好。

如果之後有$100萬資金剩，你可以用其中的$50萬投資股票，分注投資就得，如果不懂選股，盈富（2800）是最好的選擇。

另外可考慮：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：安碩恆生科技ETF（3067），要分注慢慢入，因為現價唔算平。

------------------------------------------------

Q19798：

請問你點睇 網易/清科創業/京東健康/比亞迪電子?
今年有冇潛力股推薦?唔該!

龔成老師：

網易（9999）有質素的。

先講講佢基本業務，佢創立於1997年，為用戶提供優質的內容和服務。以中文門戶網站起家，並推出了至今仍在發展的媒體及電子郵件服務。

不過，現時唔算平，同時市況波動，因此唔建議太進取，而小注投資是可以的。

清科創業（1945）係是股權投資行業的綜合服務平台，向股權投資行業的參與者提供數據、營銷、諮詢及培訓服務。集團主要為私募股權╱風險投資公司及增長型企業提供服務。

這股都可長線，但又唔建議大注投資。

京東健康（6618）有潛力，但股價上落太大，要注意風險，$120以下較合理。

至於比亞迪電子（0285），有質素的，潛力股，但現價都貴，回翻D先小注較好。

如果想考慮潛力股，安碩恒生科技（3067）可長線。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂，因此，這刻不能大注投資。最好的策略，就是月供，或自行分注小注慢慢收貨，原理如同不斷儲貨，這樣就能平均買入價，減少風險。然後就長線持有。

------------------------------------------------

Q19799：

龔sir你好：因為疫情關係，令到原本既生活及計畫全部打亂晒，而家收入突然減少好多，雖然渣住一筆現金，但對未來仍然是好徬徨，我想問下老師意見。

我有大約340萬現金，但銀行貸款大約有640萬，現時一個月供款要3萬5。因疫情關係家庭月收入只有2萬以下。

我而家應該如何運用340萬？是否將300萬攞去還貸款，還左之後每個月供款只需要1萬3，剩餘既40萬買股票投資？

因為不敢將所有現金用來買股票，始終有風險，但還左貸款後要再儲錢投資已經好難。請問我應該點安排較好？

龔成老師：

唔需要心急還款，除非是一些利息較高的貸款。如果是一般較低息的按揭類，其實無問題。你可以考慮存於按揭的高息戶中。

反而還款令你無現金，現時會更加不利。

現時你的情況，宜留一半現金在手，等疫情過後先正式進行理財投資。

你可以考慮將部分資金，投資收息股，建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

但要留意，現時股價只是合理，未到平宜，因此買入時宜分注，同時不能用盡現金。

------------------------------------------------

Q19800：

你好 老師 最近有一份保險理財計劃 每年存10萬美金 存10年 到2048年會有3000萬港幣

我挑選這個比較好 還是每年買100萬盈富基金比較好 感謝

龔成老師：

要睇你風險承受能力，上述的計劃，回報會較確定，但就，其實單計本金，你都投資約$2000萬，所以最終滾存至$3000萬，其實回報率不高，當然，這類保險理財計劃，風險會較低。

至於盈富（2800），預期有平穩增長回報，假設你每年投資$100萬，27年，回報保守少少8%（假設你將股息再投資）。2048年會滾存到$8000萬。

從回報角度，盈富會較好，不過風險就會高少少。

其實你建立平衡組合都得，按自己的風險承受度，投資適當比例在上述計劃及盈富。

----------------------------------------------

若你有問題想向本人發問，可在龔成的fb專頁中（龔成）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q19241-Q19260）

Q19241：

在平穩增值的觀點上來說，老師你會比較建議買入盈富，還是平穩增值的個股？例如港鐵。

龔成老師︰

若講增長潛力，個別股票會較好。

如果講平衡性，由於盈富（2800）係一籃子優質股票，所以會較高。其實我通常建議網友買盈富，目的是「平衡組合風險」，如果講增長，盈富當然不是最強。

若你資金不多，只可投資好少量股票，咁會較難做到分散風險，這時候投資盈富會係一個好選擇。

------------------------------------------------

Q19242：

老師你好，之前報讀了你股票班, 老師話小米會上到30蚊, 估不到咁快已到價, 請問長線小米會不會過百蚊？

小米暫時已賺了6位數字，從來未試過一隻股票可以賺咁多錢，感恩可以遇到老師，記得老師話賺到100萬之後，好快就有第二個100萬，另外想問進階班會唔會好難？搵倍升股會唔會容易啲？

希望可以搵多啲錢請工人照顧媽媽，媽媽年紀大，自己份人工又少，唔做去照顧媽媽又唔夠，請問老師現在有冇潛力股可以買入？

希望可以入多啲貨，祝老師身體健康，心想事成！

龔成老師：

小米（1810）有質素的，只要我地仔細分析企業，從長遠的角度分析就知這企業有質素，所以我自己都有貨，我都會長線持有的。

我相信佢現時的股價，已足份反映了佢這刻的企業價值，因此，要再大升不易。

反而應該耐心持有，等企業有更大的成長。

對，有左第一個$100萬後，第2個、第3個，會更快！

至於進階班，是基礎班再接上去的，如果你基礎班跟到大約7成，都可以跟到的。

現時不少潛力股都上左，你見《50優質潛力股》，10隻潛力股中，過半都倍升，所以現時要找已較難。

反而你可考慮安碩恒生科技（3067），這基金可長線。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂，因此，這刻不能大注投資。最好的策略，就是月供，或自行分注小注慢慢收貨，原理如同不斷儲貨，這樣就能平均買入價，減少風險。然後就長線持有。

------------------------------------------------

Q19243：

Hello 龔sir,
你說的恒生科技ETF是3088 還是3032？

龔成老師：

其實有4隻3032/3033/3067/3088

暫時睇，3067管理費較少。

4隻基金都是追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂，因此，這刻不能大注投資。最好的策略，就是月供，或自行分注小注慢慢收貨，原理如同不斷儲貨，這樣就能平均買入價，減少風險。然後就長線持有。

------------------------------------------------

Q19244：

龔sir,可唔可以介紹一下除左上你既股票班可以學到比較全面既企業估值法，你撰寫嘅其中一本書有教到企業估值法？或者有冇介紹？感謝

龔成老師

企業估值，由於要考慮到最新的大環境去進行分析，如果以一本書去表述，會好快變得作用減左，因此，我在企業估值的教學，都集中在股票班。

你都可以睇《股票勝經》又或巴菲特相關的書。

------------------------------------------------

Q19245：

Hi Sir,3913 合景 [email protected] 是新股, 點知坐艇, 一直知阿Sir不贊成投資新股, 所以現停止新股; 想問 阿Sir會有咩策略? 照沽出還是長揸先?

增長力高少少, 睇中1177 自製供股, 已入 7.82@1000, 現價算不算便宜, 值得繼續入手嗎?

Thanks.

龔成老師：

合景悠活（3913）由合景泰富集團（1813）分拆上市，主要在中國從事為住宅物業及商業物業提供綜合物業管理服務，服務包括：

（１）預售管理服務：預售展銷單位和銷售辦事處的清潔、保安及維護等。

（２）物業管理服務：清潔、保安、園藝、維修及維護等。

（３）商業營運服務：服務包括前期規劃與諮詢服務、租戶招攬服務、租戶管理服務及營銷推廣服務等。

（４）增值服務：物業代理服務、家居服務（管家服務、裝潢、拎包入住服務、團購服務。

財務數據顯示這企業的生意增長理想，盈利都不差，不過，上市年期短，財務數據可信程度會減。

長遠發展正面的，不過估值方面就唔平，就價仍在合理區頂水平。如果你貨不多就守住先。

中生（1177）出左業績，比預期差，所以股價都有所回落，都是正常市場情況。

不過，又唔需要太過著重短期業務，一間企業中短期業務總有變化，都好正常，最重要是睇長期。這刻長期分析，又未算差，整體質素無變，長遠仍是有發展的。當然，仍要多觀察之後的業績，先有更立體的情況，但暫時見唔到核心改變。

佢由之前的貴，去翻現價合理區中上部，現價又未到大手時機，相信中短期仍波動，要有心理準備，但長遠無問題的。你有貨可持有，如果加注，要慢慢加，唔好急。

------------------------------------------------

Q19246：

老師，我想問如果而家我儲1萬等跌市，另外用一萬月供，咁月供應該供幾多隻股票同埋比例應該點呢？

我見你d post 多數都係每隻月供約$2000

如果供2隻平平穩增長（盈富/領展/金沙/平安），一隻潛力股（阿里/騰訊）？

龔成老師：

你儲1萬等跌市，另外用一萬月供，方向正確。

至於月供那些股，第一，一定是優質股，第二，要睇你風險承受能力，盈富（2800）是最為平衡的，再加上領展（0823）可以。

至於加一隻潛力股，可以，你可選阿里（9988），如果想建立潛力股組合，考慮安碩恒生科技（3067）都得，月供。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂，因此，這刻不能大注投資。最好的策略，就是月供，或自行分注小注慢慢收貨，原理如同不斷儲貨，這樣就能平均買入價，減少風險。然後就長線持有。

------------------------------------------------

Q19247：

我依家21歲 目標係5年可以有100萬

不過澳門既月供股票唔抵，手續費同倉費都高，我草錢等啱價位小注可以嗎？還是都係月供好啲

龔成老師：

澳門月供的確有點煩，如果真的月供，你應該集中一隻去做月供，只月供盈富（2800）。

又或者，以自己儲錢模式，久不久就以一手手模式買入，由於一手手模式，買入價風險比月供模式為高，因此，你唔好心急入。

你年輕，是財富增長黃金期，好好增加你的知識，同時不斷儲蓄、投資，我相信你一定可以完成目標的。

------------------------------------------------

Q19248：

龔sir 好多謝你甘用心回我的問題，我問其他投資專家一d問題佢地多數唔答或好hea甘答，你真係一位好老師！

講返先，既然投資股票係長線，睇公司既企業質素，唔受短期影響。那麼阿里巴巴9988呢？

佢企業質素唔差，業績有賺有增長，但只係受外圍因素影響，螞蟻，美國果邊打擊，佢既股價由300去到25x -26x，似乎唔知幾耐先上返280 290 300⋯這樣如果在高位持貨是否止蝕再換d近期炒起既股？

如果之前250以下入呢？是否長渣？因為外圍因素往往好影響股價多於企業發展對股價有利好，所以Lee d情況(其實都幾經常發生)影響如何決左持貨中既去留？

龔成老師：

阿里（9988）有質素，有增長力。

佢係業務層面，擁有相當的優勢，不少業務處於壟斷狀態，同時增長理想。加上正不斷發展延伸業務，這都會成為企業增長的潛力，預期增長會持續，這是阿里最大的賣點。

以企業的長期發展計，這股的確優質，但在現價唔算平的情況下，投資值博率只屬中等。

當然，這股增長力強，只要業務與盈利大增，之後就算股價不變，都會慢慢調整到合理的估值區域，所以，這刻不是全無值博率，只是值博率不算好高。

佢最近面對內地監管可能收緊，因此風險度增加左，最大的影響在於螞蟻的貸款業務，這亦是中國叫停上市的其中一個原因。

因為這部分是一些網上的小型貸款業務，增長快，但監管並不如銀行般緊，因此，中央會有更多的監管針對這部分，影響了賺錢能力。

整體上，阿里，長遠仍是有發展，賺錢能力雖然有少少減，但長遠會同政府同議一些監管方法，以及找到合理的賺錢模式，你預阿里$250以下是合理區的頂位，這股可長線。不過，中短期會波動。

如果有貨，可持有，但就唔需要太急加注，如果未有貨，現金足，可以這刻小注，之後跌1成以上再加注。

------------------------------------------------

Q19249：

龔成老師您好！小妺現時35歲！沒父母陰！沒學識！只靠自己！月入2萬！

沒有流動現金！有供樓（每月還款＄10000）！每月使費剛剛好⋯⋯最多只可以有一二千蚊剩下！

股票：
001:3000股（平均價$57）
005:800股（平均價＄58）
388:300股（平均價$250）
700:200股（平均價$280）
868:2000股（平均價$7）
883:10000股（平均價$8.6）
1800:2000股（平均價$16）
2318:1000股（平均價$55）
2338:1000股（平均價$11.5）
2388:2500股（平均價$34）
2858:3000股（平均價$6.5）

叧外有2隻合股到、跌到無眼睇：
340:3000股
1387:200股

因為沒有現金流！所以近來有心儀的都無錢買！我想問我應該怎樣整合部署？

另外！我有一份月供$1800的保險，但沒有儲蓄成份！
要改為有儲蓄成份的會比較好嗎？（我另外有買一份保險基金月供$1500）

懇請龔成老師比意見小妹！
感謝萬分！

龔成老師︰

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你年紀計，應著重增值方面。匯控（0005）只係收息股，唔適合，故不要再加注。

中國交通建設（1800）、中海油（0883）、易鑫集團（2858）和濰柴動力（2338）增長力唔強，又未能去到最高質類別，建議唔好持有太多。

潼關黃金（0340）和中國地利（1387）質素欠佳，應盡快沽出。

保險方面，買足夠保障就可以，唔需要儲蓄成份。

而基金方面，你都要了解翻佢質素和升值能力。你可以用盈富（2800）作比較，佢年平均增長約10%（連股息再投資），去決定維持這基金，還是轉投至其他優質股。

現時你儲蓄唔多，但可以先用佢來月供盈富（2800），令你財富可以維持升值能力。長線計，你要想辦法令自己可用資金增加（如做兼職、減開支等），去提升財富增值效果。

------------------------------------------------

Q19250：

老師，我覺得自己做錯決定

我新股抽左中通快遞@218 一手
但第二日見佢直插多10幾%
就已經放左，後來好後悔太衝動！點知可以保持心態！

阿里巴巴又係196 時買！210 又放左！宜家見佢就直上$300

成日覺得自己做錯決定⋯
謝謝老師

龔成老師：

其實，中通快遞（2057）都有質素。又唔需要太過擔心。

睇翻佢的資料，佢係中國較領先的快遞公司，於2002年成立，按總包裹量計是中國領先的快遞服務供應商，市佔率約2成，佢通過全國性網絡提供送件服務，以及其他增值物流服務。

佢的網絡基礎設施，由90個分揀中心與282條自動化分揀線，由約9,050輛自營幹線車輛服務超過3,400條幹線線路組成，網絡覆蓋全中國。

至於財務數據方面，生意與盈利都不差，不過，始終新上市數據未必好準，要慢慢先見真章。現價平就唔平貴，不過有發展的，如果小注無問題的，這股值得長線。

你有幾樣野要學習：

1）明白買股是企業，要經過仔細分析，試下每次買股票前，都逼自己寫下份簡單報告，寫低買入的理由，這公司的質素，投資策略等。

2）你要用長期的角度分析，我見你只集中在短期股價，你要改正翻。

3）唔好升少少就賣，這是散戶經常犯的錯，要長線投資。

------------------------------------------------

Q19251：

老師：你好！想請教你我月供2800、66打算加新經濟股9988和268好嗎？麻煩你

龔成老師︰

這個要視乎你年紀，如果你偏年青，加入一些潛力股係可以。但你若較中年，這些股票就不宜持有太多。

月供方面，阿里巴巴（9988）係可以。但金碟（0268）就太貴，暫時不宜做月供。另外，以下都係一些有質素的潛力股，給你參考。

安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園（1448）。

------------------------------------------------

Q19252：

你好 老師，想請教應該幾時止賺/止蝕？ 現持有（1585）賺，（285）賺及（2013）蝕，我個人認為每隻都係長線，有發展，但如果一直keep著唔放，可能短期內突然急挫

咁就錯過當中既賺取，我應該先賺取一部份等下降少少先再入手還是一直持有？謝謝

一直持有是否係因為滾利息？

龔成老師︰

我地是否持有一隻股票，唔應該睇佢個股價，而係要用個企業質素去做決定。就算中短期下跌，只要質素無變，照持有都無問題。

至於你講出現下挫，會令自己失去賺錢機會，這個想法不正確。因為我地唔應該去"估走勢"，無人知你沽左貨之後，會唔會一如你預期咁再跌，佢可能會反而大升，到時你就會進退失據。

只要企業有質素，長線持有才會對你最有利。

一直持有和複利無關，複利息模式一定要有「再投資」的動作，即收到股息後，進行再投資，可以投資原有股票，又或其他優質股，從而得到再增值效果。

你3隻持股都有質素，但雅迪控股（1585）負債唔輕，而微盟集團（2013）盈利和股價上佢都幾波動。此2隻股可投資，但只宜小注。

------------------------------------------------

Q19253：

新手一問，請問7299係未好似港股咁玩？同埋係未要轉倉？

如果想玩金做中長線咁投資可以嗎？

龔成老師︰

ＦＬ二南方黃金（7299），當中有槓杆成份，要留意風險。升的時候你會賺多左，但跌時候你損失同樣會係雙倍。

另外，你要明白黃金是沒有現金流的，持有無法創造出經濟價值。我地買佢主要作用，是對沖黑天鵝事件。

所以，投資黃金係可以，但不用佔財富比例太多（<3%），而且持有的應該為實金。

你買賣如同買賣股票般進行就得。

------------------------------------------------

Q19254：

老師你好，我想問下呢～ 因為2013（12.8有貨），1313（12.12有貨），1478（8.9有貨）

呢啲全部都高位入左，其實而家佢哋跌到咁低，係咪可以溝貨會好啲？

另外想請問2800，合理價係幾錢？謝謝

龔成老師︰

首先，你現明白溝貨與分注是不同的。溝貨是愈跌愈入，同時不理企業質素，不理自己的設定金額，盲目去入。分注則是「一早定好買入策略，一早定好本金總數，並以有策略的模式進行」。

如果你係"分注"的話，你可因應平貴和質素，去進行。若是"溝貨"，就不是再入貨，因為再平，都只會令你增加風險。

微盟集團（2013）雖然跌左唔少，但估值依然係貴，唔好加注住。

華潤水泥控股（1313）有質素的，不過業務就較有波動，佢過往的盈利數據上落都大，因此股價的變大亦會較大。

此股長遠是正面，但就要留意股價上落會較大。現價加注都可以，但要控制注碼，唔好佔組合太多。

丘鈦科技（1478）本身唔算差，前景不過不失，但市場估值的變化就相當大，當企業有不同的消息，都會對股價有一定的影響。

整體來說，不過不失，波動是這股最大的風險。而價算係合理區，可分注，但只宜小注。

盈富（2800）己在合理區，可分注儲貨。

------------------------------------------------

Q19255：

1）恒地（0012）同長和（001）、長實（006）息率差不多，但見老師通常推介月供恒地

好似未見過提長和系，兩者業務發展有好大分別？

2）最近在天星銀行提左一筆20萬私人貸款，60日內還完全免息

請問有冇最低風險、最高回報方法運用呢20萬？例如做定期？

謝謝

龔成老師︰

1） 恆基（0012）是有質素的股票，佢是全港持有最多農地的發展商，長遠的價值一定會慢慢釋放。相比長和系2隻股票，佢潛力會較高。

而長建（1038）主要做基建，長和（0001）則是大型綜合企業，包括基建、碼頭、電訊等。2者同樣有質素，但潛力不及恆基。

2） 60日係一個極短時間，就算投資最保守的優質股，都會有出現波動機會。

因此，你只可以做最保守架事，就係做定期。

------------------------------------------------

Q19256：

老師你好，我報左你黎緊的堂
但係有D問題想係上堂之前問左你先

A. 我現時持有
1. 復星國際656 入市價$9 4000股
2. 中國鐵塔788 入市價$1.41 20000股
我應該繼續持有嗎？

B. 現時政府提供的百分百擔保特惠貸款
我大概可以借50萬
我應該借回來之後作一些低風險投資賺取差價嗎

因為看你的書說說不要借貸投資
但這個息口真的不高，所以想再聽聽你的意見

C. 有什麼財經節目可以介紹以增進投資知識？
我有多年看十點無綫財經

但看過你的書之後就覺得所謂的專家都是今天講升明天睇跌

所以想找更實際的方式增值自己

謝謝，股票班見！

龔成老師︰

A） 你要明白一個概念，我地持有一隻股票與否，關鍵位是企業質素、前景，不要被買入價影響。

復星國際（0656）不算差，質素都算有，但不算好強。但業務如醫藥、健康產品，會有較大的業務波動，同時在中國經濟轉弱下，中短期會有影響，因此業務因素令股價受壓。

此股都有質素係度，如果佢佔你組合唔算太多，可以守，但預佢中短期內都會較弱。

中國鐵塔（0788）有質素的，這股本身有質素、有前景，中國的3大電訊巨頭，都是佢的主要客戶，以及大股東，當5G發展，佢一定會受惠，因此前景仍然正面。

股本回報率不高，是這股較弱的地方。行業上，佢係有壟斷優勢，而且中國5G和未來發展成數字大國架策略，都會對佢有利。此股係有發展潛力，你買入價合理，長線持有就可以。

B） "借貨"係投資中最後皇牌，去到係好明顯機會才會用。雖然透過借貸投資，從中賺取息差，是可以。

但現時大市只在合理區，未算好平，會有較大機會出現「賺息蝕價」的情況，令你計劃得不償失，你要明白有這個風險。

C）我地最重要是得到「資訊」，不是「意見」，財經新聞、每日新聞，你要睇，但你要懂得分析佢所講的野有無用。

我花最多時間，就是睇企業年報，一定有用過你不斷聽無聊意見。當然，基本的新聞與財經都要睇。

股票班見！

------------------------------------------------

Q19257：

老師你好，点睇1302.先健科技，522.AsM太平洋，两只的合理区与平价是多少，

現价觉得有点貴，特别是1302.現在看股票勝经。。如果有不明白再问你。

哪些网站选股比较好？
感激

龔成老師︰

先健科技（1302）為心血管及周邊血管疾病及紊亂所用先進微創介入醫療器械的研發、製造及營銷商，主要提供先天性心臟缺損封堵器（包括ＨｅａｒｔＲ、Ｃｅｒａ及ＣｅｒａＦｌｅｘ等三代系列）。

雖然近年生意都有增長，都有潛力，但始終規模細，不確定性較高，業務可能有潛力，但現時的市盈率處高水平，值博率較一般。

要回到合理區，最少要回較多先算。而且此股盈利都好波動，只宜小注投資。

ASM PACIFIC（0522）有質素的。佢業務為設計、製造及銷售半導體工業所用之器材、工具及物料，以及表面貼裝技術配置機。於湯森路透的報告中，ASM被選為全球百大科技領導企業之一。

這企業有一定的實力，而且增長力不錯，財務數據正面，行業前景正面，因此有投資價值。

不過，從過往的數據可見，業務都有略為波動的情況，始終這類科技行業的變化較大，存有不確定性，你要留意這點。

估值方面，現價算是合理區頂部。由於這企業規模已經龐大，你預佢比較難有高速增長。而且業務都有波動，不宜大注。

如果你想睇基本股票資料，一般投資網站都好足夠。但如果係選股，我地係要從佢多方面去分析，好似企業質素、行業前景、財務狀況等。至於選股網站，我在課堂中會具體教。

------------------------------------------------

Q19258：

老師你好，以下股票我持有多年，因之前不懂得管理，已蝕接近5成

請問那些我應該繼續持有，那些需換馬？ 可以給我一些換馬的建議嗎？。

跟你的方向投資了半年，已有小成，十分感謝！

6820 友誼時光 4000股
1538 中奧到家 6000
656 復星國際 1000
1476 恒投証券 2000
2139 甘肅銀行 4000
2858 易鑫 500

龔成老師︰

首先你要明白一個概念，我地持有一隻股票與否，關鍵位是企業質素、前景，不要被買入價影響。我地先睇翻企業本身質素，如果係優質，咁這些中短期波動，我地係唔需要理會。

FRIENDTIMES（6820）係是中國的手機遊戲開發商、發行商及營運商，專注於女性玩家的手機遊戲。

除發行自主開發的遊戲外，佢亦通過第三方分銷平台發行及營運第三方開發的遊戲，以及授權第三方發行商於海外市場發行及營運集團的遊戲。

見佢增長快速，佢這類公司的風險高，加上上市不久，根本不知佢的真實情況。因此，這股業務有發展，但同樣有風險，只宜小注。

中奧到家（1538）都可以考慮的，這股的業務都穩定，只是規模較細，加上背景方面不算強，令增長力不及其他大型物管企業。

現價合理，不過要留意股價較波動，未必適合投資太大注。

復星國際（0656）不算差，質素都算有，但你預佢中短期會較弱。

恒投証券（1476）主要從事證券承銷及保薦、證券及金融產品、證券及期貨經紀代銷等業務。

睇佢過往盈利都好波動，而且賺錢能力唔算強，整體質素一般。佢唔係完全無質素，但長線計，你慢慢換碼至其他優質股會較理想。

甘肅銀行（2139）同樣係質素一般，近年賺錢能力有變壞情況。長線計，換碼至其他優質股較好。

易鑫集團（2858）企業基本上仍處於燒銀紙的狀態，這類股風險較高，不過，我唔敢話佢完全無潛力。

這類股估值難，不確定性較高，只可以話，如果佢佔你組合不多，持有係可以，但暫時我未能確定佢業務真的向好。

換碼方面，如果你係年青至中年，以下股票都可以。如果你唔係咁認識以下股票，你可以換至盈富（2800），佢係包括52間質素不錯上市公司股票的組合，值得你投資。

平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、粵海（0270）、領展（0823）。

增長力較強的，可選安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園（1448）。但佢地波動性和風險會較高，你要自己平衡。

------------------------------------------------

Q19259：

想問下中芯國際（981）依家適唔適合買
見到有師兄講摩根都有買入

同埋9988 255買入，應該繼續留嗎
感謝

龔成老師：

中芯國際（0981）業務有增長力，但未必能稱為好優質的股。

睇翻佢過往的業務情況，雖然仍每年的生意都有增長，但盈利就有波動，反映雖然大環境的市場在增長中，但佢的成本與售價，就未必在佢掌握的範圍，最後造成盈利波動的結果。

雖然這股都有前景，但以佢面對的情況，但好難將佢定義為最優質的股票。

加上此股近年升了不少，就算有所回落都唔算貴，加上之前熱炒過，股價大上大落，投資要注意風險。這股唔建議大注。

阿里（9988）面對內地監管可能收緊，因此風險度增加左，最大的影響在於螞蟻的貸款業務，這亦是中國叫停上市的其中一個原因。

因為這部分是一些網上的小型貸款業務，增長快，但監管並不如銀行般緊，因此，中央會有更多的監管針對這部分，影響了賺錢能力。

整體上，阿里，長遠仍是有發展，賺錢能力雖然有少少減，但長遠會同政府同議一些監管方法，以及找到合理的賺錢模式，你預阿里$250以下是合理區的頂位，這股可長線。不過，中短期會波動。

如果有貨，可持有，但就唔需要太急加注，如果未有貨，現金足，可以這刻小注，之後跌1成以上再加注。

你有貨可守，但未必要太急加注。

------------------------------------------------

Q19260：

請問你認為1066 威高屬於優質股嗎？
現在合理區？

龔成老師：

威高股份（1066）都有質素的，不過業務有少少波動。

佢主要從事研發、生產及銷售醫療器械產品、骨科產品、介入產品、藥品包裝產品及血液管理產品，以及於中國經營融資租賃及保理業務。

長遠有一定的發展，不過毛利變化較大，盈利有不確定性。雖然有長線投資價值，但股價較波動，以及經常都貴。

你預現價合理區頂，小注好了。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q13561-Q13580）

Q13561：

老師，您好。我之前抽到一手新股阿里巴巴，請問值得長期持有及加注嗎？你認為這股的合理的價位是幾多？

你之前說新股沒有過往數據可以作為參考, 但是這股在美國已經上了市，所以可以參考美國的數據嗎？

龔成老師：

阿里（9988）由於已經在美國上市，因此，我地可以分析佢果邊公布的數據作分析，因此，比起一般在香港全新上市的企業，佢的數據會比較可信，這點令佢的投資價值增加左。

這股有質素，有增長力，不過現價仍有少少貴，你持有無問題，回少少可加，但仍只能小注去入。要落到$180以下先合理。另外，你可以睇多次我之前的分析文章。

【阿里巴巴的投資價值】

簡單來講，阿里巴巴可以話有4大業務部分：

1）商業業務
2）雲計算
3）數字媒體及娛樂
4）創新業務

阿里巴巴不少業務都處於有優勢的地位，同時擁有一個超大龐大的客戶群，可說擁有很大的業務優勢。可說在不少範疇，處於一個壟斷的地位，這點令企業處於很大的優勢局面。

另外，業務仍處於一個增長階段，加上本身擁—個龐大的客戶基礎，這對於延伸業務的發展十分有利。

當手持龐大賬戶，就是擁有了巨大的客戶基礎，擁有了大數據，無論發展增值服務或其他服務，也有很強的優勢，而這些延伸的業務，正是價值所在。

-\-\4大業務理想-\-\

就阿里的4大業務來講，仍然處於一個增長階段，商業業務為企業的最大貢獻部分，而這部分擁有的客戶基礎及數據，則會為餘下的3大業務，產生持續的增長。

只要最核心業務保持優勢，其餘業務發展就理想。就過往的財務數據來分析，商業業務仍處於增長狀態，同時有一定的現金流，同時已建立一定的優勢，地位不會動搖。阿里的確有一定的優勢，同時仍有增長能力。

不少延伸部分仍有很大的潛力，而核心業務部分，相信會保持增長一段時間。因此，這企業是有潛力的企業，同時本身有質素。

-\-\財務數據理想-\-\

整體來說，阿里的財務數據不差，業務仍處高增長狀態，加上有實際的盈利，有理想的現金流。

整體來說，阿里都處於理想的增長狀態，收入、經營利潤、盈利，都保持理想增長，這點雖然利好，但投資者不能盲目認為企業會超高增長，同時要理性分析財務數據。

大家要留意，在招股書公布的第二季業績顯示，盈利十分強勁，比去年同期倍升，不過，當中包括左來自螞蟻金服33%股權的特殊收益近700億元人民幣。如果扣除了這些一次性後，盈利約為329億元人民幣，按年上升4成。

-\-\投資策略-\-\

整體來說，阿里的業務層面，擁有相當的優勢，不少業務處於壟斷狀態，同時增長理想。加上正不斷發展延伸業務，這都會成為企業增長的潛力，預期增長會持續，這是阿里最大的賣點。

以企業的長期發展計，這股的確優質，但在現價略貴的情況下，投資值博率只屬中等。

當然，這股增長力強，只要業務與盈利大增，之後就算股價不變，都會慢慢調整到合理的估值區域，所以，這刻不是全無值博率，只是值博率不算好高。

對於這類優質、有發展，但現價略貴的股票，小注投資是較好的方法，算是平衡了風險與增長的考慮。這股可以長線投資的。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13562：

老師。 睇返光大國際257。佢這幾年一路增長。股息又平穩。有又現金流。 是否算是優質股。

現價相比2017一樣。但佢賺錢就賺多左。 是否現價太平宜。謝謝

龔成老師：

中國光大國際（0257）本質不錯的，但股價都幾波動，加上佢之前進行供股，以及佢負債愈來愈多，這都令佢股價受壓。

佢係一家以綠色環保和新能源為主業，包括項目投資、工程建設、運營管理等。業務主要可分三類：環保能源、環保水務、新能源。

項目主要包括垃圾發電、沼氣發電、生物質能發電、太陽能光伏發電、工業固體廢物及危險廢物處置、水環境治理、以及中水回用等。

例如污水處理廠、垃圾焚燒發電廠、工業固體廢物填埋場、沼氣發電廠、環保科技及工程管理等。

雖然此企業所賺得的項目回報率不會太高，但在可見的將來，行業的擴展仍會保持。雖然佢比2017年賺多左，但現價只算合理區，未算平宜。以長期來講，佢都是正面的，小注投資無問題。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13563：

你好 龔成老師..
我今年28歲 零售行業
月入大概3.5萬

每月最多可儲蓄2萬
可動用的現金儲蓄 大概7萬

我現在持有:
2800 500股@27.6
3988 10000股@4.06
5 400股@68
11 200股 @181.75
1211 186股 （月供2000）

好多貨都係之前壓落嚟
6月起社會衝突之後 溝過1次恒生

想請問龔成老師

我適唔適合月供股票？
如果我月供股票每個月最理想應該係供幾多錢？你會比較推薦點樣嘅組合呢..

（我有諗過每個月1萬，5000 港鐵+5000 港交所/盈富 或 恒生 港鐵 領展各3000）

另外，
六月社會衝突開始後
有好多好優質嘅股票都值得持有
我一直都好想 放左3988,
將啲錢重新買入其他更優質嘅股票 心水：港鐵/領展/恒生
請問老師你有咩意見
我應該繼續持有3988 嗎？
還是盡快止蝕 投資投資更好優質股？

感謝！

龔成老師：

我地會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

中行（3988）和匯豐（0005）同樣增長力有限，只是收息類，唔係咁合適你而個年紀。但你2隻股票持股唔算多，可以持有，但不宜再加注。

以你年紀，應以增長力為主，現在你每月可以1萬去做月供，其餘先儲起，用一邊月供一邊儲蓄的策略。

月供方面，你可以投資在平穏增長股︰盈富（2800）、金沙（1928）、恆基（0012）、中銀（2388）、港鐵（0066）、煤氣（0003）、港交所（388）、長建（1038）、粵海（0270）、領展（823）或潛力股︰比亞迪（1211），中生（1177）或福壽園（1448）等。

你可以$4000供盈富，其餘$3000各供一隻平穏增長股和潛力股。至於另1萬先儲起，等待機會，當大市出現一定程度的下跌，就可以動用現金去投資，在平宜價加大力度掃貨。然後長線投資。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13564：

龔成老師，想請問下你，有咩股票係樓市向下調整時，係特別具有防守性？以2016年為例，暫時搵到6823/66 跌幅為小

龔成老師：

其實樓市下行有好多原因，所以很難一概而論那些股票在樓市向下調整時，係特別具有防守性。

如果是加息令樓市下跌，你可以找一些會受惠於加息週期的股票，如銀行股。或者，最簡單就是買一些跟樓市無太大關聯的平穏增長或收息股。

例如港燈（2638）主要供應港島電力，由於市場成熟，電力需求變動唔會大。樓市如何轉變，基本上對你電力消耗唔會有太大影響。所以，這股票可以作為守樓市下行風險之用。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13565：

龔成老師你好
我想月供美股納斯達克指數
請問有沒有建議？

龔成老師：

你可以考慮安碩納指一百（2834），這是追踪納斯達克100指數之表現，當中都是有代表性的股票，你可以進行月供。

這基金在港交所上市，你只要有香港的股票戶口，就可以投資這基金，不過，銀行唔知有無提供這基金的月供。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13566：

667 中國東方教育
是否值得買入+中期持有，目標20元

龔成老師

中國東方教育（0667），集團業務集中在為學生提供創新性職業技能教育。其職業技能教育主要涵蓋三個行業領域，烹飪技術、信息技術及互聯網技術以及汽車維修。
集團以六個學校品牌經營（即新東方烹飪教育、歐米奇西點西餐教育、美味學院、新華電腦教育、華信智原DT人才培訓基地及萬通汽車教育）旗下服務於該三個行業領域。

截至2019年6月30日，運營168所學校及中心，學校網絡遍佈中國內地31個省份中的29個省份及香港。

業務上，表面上看有吸引力的。但我一向都新股半新股都無興趣，因為真實面要慢慢先見到，預期佢股價會比較波動，加上估值困難，只建議小注，同時你要明白當中的風險。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13567：

龔sir你好，我今年25歲，開始工作一年多，月入16500,由年頭開始月供股票。

扣除固定支出，每月只能月儲約$3500, 月供$3000, 一直供緊0005,2800同66, 全部都未夠一手。
另外持有3319同2331 各一手。

1. 依加每月還學費大約$1300（還15年），利息約1.25厘，我應該繼續用15年還同時儲本金，定係盡快將學債還清呢？

2. 想五年內可以將本金滾存更大，可以點樣計劃呢？

3. 想問下3319 同2331點睇？

唔該曬

龔成老師

1） 以恆指年均回報約10%計，你學費貸款利息1.25厘唔算高。你應該將資金運用在優質股票上，對你財富增值效果較佳。

2） 我地會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。匯豐（0005）增長力有限，只算是收息股，所以不太適合你。

月供方面，你可以將匯豐轉為更有增長力的潛力股︰比亞迪（1211），中生（1177）或福壽園（1448）等。

至於儲蓄的資金，就等機會，當大市出現一定程度的下跌，就可以動用現金去投資，在平宜價大力買入有增長力的優質股票，然後長線投資。

3） 雅生活服務（3319）不錯的，佢無論在業務本質、規模、品牌、財務數據、前景，都是理想的，反映這企業有一定的質素。加上這企業的背景因素，以及行業的發展，相信這企業的前景不差，有長線投資的價值。

李寧（2331）本質不差，本身有品牌，生意與盈利都有理想增長，賺錢能力不錯，相信前景正面。但現時已經唔算平，你現貨可一直持有，但不要心急增持，若出現回落先加注。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13568：

龔成老師你好，本人28歲，想平穩增值資金。

早前購入左8000股越秀交通基建，今年都開始左月供$2000盈富，近排想加多一隻恆基月供$2000

如果，我想將部分越秀交通基建沽出，再慢慢投資入恆基，呢個方法好五好？

龔成老師：

我地投資會運用「先增值，後現金流」作方法，初期應投資較多增值類資產，較後期則應投資較多保守類項目，以你年紀應以增長力為主。

越秀交通基建（1052），主要的資產項目，都集中在廣東省珠三角地區，特別是廣州市周邊地區。業務有平穩增長能力，長遠仍正面，但就不是高增長類別，只是平穩增長，以你年紀唔太合適。

所以長遠計，你部分越秀交通基建沽出，再慢慢投資入恆基（0012）這個方法是合理的。但為免你組合過於偏地產股，你可以將部份沽出越秀交通基建收回的資金，分配在盈富上，會令你整個投資組合更平衡。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13569：

你好龔成，我於2017年買了一下股票，差不多全部現價都掉了，請問我應該賣掉止蝕嗎？

中電控股，莎莎國際，光大國際，招商銀行，港交所，光大綠色
00002 中電控股
00178 莎莎國際
00257 光大國際
00388 港交所
01257 光大綠色
03968 招商銀行

龔成老師：

首先你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

近期由於全球經濟不景，香港社會不穏定等負面因素，都影響到整個市場大環境，股票價值難免會出現下滑。但你以上股票都有質素，未見近期事件對佢地有核心性影響，故上述股票可以保持持有。

但要留意番以下2隻股票︰

中國光大國際（0257）本質不錯的，但股價都幾波動，加上佢之前進行供股，以及佢負債愈來愈多，這都令佢風險增加。

光大綠色（1257）本質不差的，是潛力股。但由於這行業較新，有一定的風險，這企業適合長線或超長線投資。加上這兩股是同系，你若集中持有，會有風險。

因此，以上2股可持有，但不宜太大注。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13570：

你好成哥，睇左你的書我都都好多得著，半年前開始進行月供。我有少少問題想請教下你。

現時25歲，股票月供10000。
月供分佈：
2800 ＠4000
823 ＠2000
66 ＠2000
1211 ＠1000
1177 ＠1000
另外有一手中銀＠29.9 和大快活@25.8。

想問下以上分布如何？

另外，我將mpf整合後100％都投資2800（有3萬幾）﹐手續費0.7％，算貴嗎？同埋我洗唔洗將月供2800減少或者供第二隻，因為mpf已經投資緊。

如果月供第二隻，我自己心水恆基／金沙／港交所，呢三隻你又會推薦邊隻？ 自己最想供恆基，但我又諗緊我供緊823都係地產股，又會唔會太集中係地產股到令整個投資組合不太平衡？又或者你會點建議？

望解答！謝謝你

龔成老師︰

我地係財富增值時，會運用「先增值，後現金流」作方法，初期應投資較多增值類資產，較後期則應投資較多保守類項目，因為初期的財富系統未成形，可承受的風險度較高，所以會著重增值為先。

你很年青，應該以增值為主。除非你真的很想供領展（0823），因為此股現時價格偏貴，加上此股增長力唔算十分強，建議你將其$2,000分配到較強增長力的比亞迪（1211）和中生（1177），即每隻月供$2,000。

手續費0.7％去供指數MPF，算是合理。雖然你月供都有做盈富（2800），但唔需要因為MPF供緊而減供款，保持而在比重反而令你整個投資組合更平衡。

恆基（0012） - 讀者都知我鐘意恆基是因為佢係全港發展商中，擁有最多農地的一間。相信政府慢慢都會想方法發展這些農地，佢長遠一定受惠，故此股長線有潛力。
金沙（1928） - 其多年的博彩業營運經驗，高穩定性，加上領先同業的資產規模及行業領導，都令金沙保持優勢。加上派息都唔錯，你可以視在平穏增值+派息之選。

港交所（0388） - 是壟斷業務，典型優質股。佢係香港唯一獲認可的證券市場及期貨市場，提供現貨、期貨、衍生工具的平台買賣，以及股票上市業務。業務盈利有點週期性，市旺時候會好好，但股災時會好差。金融業作為香港的命脈，此股長遠發展仍不會差。

這3隻都可以加在月供股票組合中，如果你想組合中包含地產股的話，將領展（0823）轉為恆基（0012）就可以了。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13571：

龔成老師，我岩岩睇完老師的《50值博倍升股》

1.老師對於1297 [中國擎天軟件] 有冇咩新睇法呢？

2.老師書中都有講關於帳目的問題，我番查裝上資料，大多數提出的問題是該股的壞帳計提比例有問題，近半年不斷跌係米呢個因素呢？

3.該股宜家仲有冇投資潛力呢？

4.宜家入手又係合理時機呢？

龔成老師：

中國擎天軟件（1297）在業務上，不差的，如果睇翻佢的業績，過往都不錯，生意與盈利都保持向上，股本回報率高，負債不高。

但這股股價受壓，其中一個原因是我書所講的賬目，這亦是我書只給「1分」優質度的原因，因為之前佢被一些公司質疑佢賬目有問題，認為當中有誇大的成份。

由於有很多數目，我地投資者，好難找到真正的答案，因此，我地只能考慮這股的風險度，無法得出絕對的答案。

而當年由「德勤會計師事務所」核數師辭任。同樣反映這風險。

這股可以理解為有危有機，如果佢賬目無問題，現價的確是平，但我地又不能100%話佢一定無事，所以，你可以考慮小小注投資這股。這股有潛力的。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13572：

老師，但我系app見到呢個有5年既每股盈利增長的數據，我想問其實系咪將呢幾個數值相加再除5，就搵到5年既每股盈利增長率？

龔成老師：

你將佢相加，除5，是一個不準確的方法，但有時貪快用都無所謂。

因為真正的方法，要用數學的複息原理去計，你要找出這幾年頭尾的數，然後自己計出每年的平均複息，這是數學問題。這方法會最準，若你唔知點計，用翻上述你所講的相加除5，都可以勉強當為答案。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13573：

龔老師你好,之前錯過了你推介的藥業股1177中生製藥的升幅．想問如果現價才開始以月供模式儲貨,是否正確及此股你預測往後的勢頭會有甚麼意見分析？謝謝

龔成老師：

中生製藥（1177）仍有相當的優質度，以及增長力，但這是形容其業務層面。

因為在股價上，現時略略貴，投資的回報率會因此而減少。不過，只要你用月供的模式，金額不要多，但時間要拉長，起碼供3年，最好5年以上，這樣的買入價就能有效平均，風險得以減少。隨著企業價值向上，你都會有一定的回報。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13574：

龔sir, 您好
我38歲，如果我依家將手上兩手匯豐賣出，然後將得到的資金買入兩手港交所，這做法可行嗎？

龔成老師：

以你的年齡，仍是財富有增長力的時期。匯豐（0005）只是收息股，增長力有限，的確未必適合你投資。而港交所（0388）仍有平穩增長的能力，你轉去可以的。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13575：

自政府放寬九成現樓按之後真的想買樓！
請問你提及的短期樓市會下跌，短期是指半年定三兩年時間？

心態很亂，有個新盤已經入左票是樓花，覺得抵買，但丈夫反對，因兩年樓花期，他應該樓價會下跌，應再等一下！
想向請教

龔成老師：

我相信政府放寬按揭，會對樓市有短期（2、3個月）支持作用，但中期（1年）來說，仍要睇香港的社會運動，只是運動持續，經濟一定會弱，樓價一定會跌。

不過，社會運動不會永遠持續，長期都會完結，完結後又會回到長期基本面，即是供需，而香港樓供應不足，這會令樓價長期向上。

所以，你可以把握中期的下跌。

我相信你地是擔心負資產，不如我講下過往香港的情況，當年2003年好多負資產，銀行大部分的處理方法，都是「比客戶保持供樓，不會call loan」，所以，你最重要是考「供得起」，只要你工作收入穩定，買樓後仍有少少現金剩，其實已經可以考慮。

最重要是「供得起」，買入後樓價的升跌不是最核心，你是否能持續「供得起」，才是關鍵。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13576：

你好 想問下賭業股
銀娛 唔夠錢買 澳博同金沙應該揀邊隻？

龔成老師：

我地唔會因為「資金不足」，而強行買一些次一級的投資項目。

因此，所有野都是以「質素」行先，如果這刻的入場費不足，就只要等下先，儲更多錢先投資，這是最好的方法。

你上述所講的3股，都有一定的優質，當中以銀娛（0027）、金沙（1928）質素較高。

銀娛增長力較強，金沙就較為穩健，收息較強，所以，好睇你本身的投資目標。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13577：

龔成大哥，我計過，如果每月投資$20000，15%回報，30年，會滾存到過億。想問下呢個回報率其實有冇機會做到？定我計錯

龔成老師：

假設你每月投資$2萬，30年，如果保持15%回報率，預期30年後，會滾存到$1億以上。

在現實中，要持續有15%以上回報，其實不易，我地一般會追求10%-15%回報。

因此，15%不易，但不代表做不到，以月供股票的計劃來講，你可以保持月供優質股，但就算連股息計，都未必去到15%。如果想做到，就要在組合內加上潛力股。

同時，不能所有資金都月供，我建議部分資金月供，部分則留現金，作「等投資機會之用」。因為月供，並無做到「把握時機」的動作，所以你要同時有餘下現金，把握較好的時機投資，先有機會增加回報，去到15%。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13578：

你好，有關大快活最近的盈警，我想問因"香港會計準則"而受影響的"租賃"，其實是否不會對實際情況有大影響?

因為看似係數計算方法的改變而令盈利數字下降，而不是因實際收入/支出有大改變。

另外，盈警中提及的"因租金及工資成本上升"問題，其實這不是突然出現的問題。近五年年報中的該項目都年年上升，所以大快活應能預計/應付。

另外，對比大家樂的盈警：大家樂的盈警表示1.市場氣氛疲弱而影響銷情/利潤及2.租金開支和人工而影響業績。第2點同大快活一樣，反而想請教的是:為何大家樂沒有大快活第一點的問題?("香港會計準則"的改變)。同類型的公司的會計準則理應一様，為何只有大快活遇上?

另外，我覺得社會運動對這類快餐店的影響其實比較有限。

示威區的分店:因示威集中在周未，周未當然有影響，但周中的多做打工仔生意，早/午/晚餐一樣在大快活/大家樂進食。

其他分店:分店遍佈全港，包括大部分住宅區。港鐵提早收車反而令大家先回自己的地方才進食；同時市民消費意慾下降，平時放工以及周未沒有心情到中/高檔餐廳進食，這類快餐店理應受益。以觀察所得:屋企樓下的大快活的確在這段時間多了人排隊，等食物的時間仍明顯增加。

所以上星期入左少少大快活的貨，希望推斷正確。

另外，搭單問多條：我見發盈警係冇標準指明要跌幾多先發，咁通常會唔會有慣例，盈利起碼減少多少才會發呢?多謝回答。

龔成老師：

其實每個行業、每間企業，在進行會計上都會有一定的彈性，就算折舊的方法、年期，都可以不同。而上述所講的情況，是由於大快活（0052）佢自己有些改變，但這些會計上的因素，對數字影響較大，實際影響不大。

反而佢有提及過，成本上升這問題，而及近期的香港情況，會出現更具體的影響。

我相信，香港的社會運動，對消費總會有一定的影響，有些地方會有部分旅客去快餐店，都會會有影響，但我相信影響未算好巨大，同時是中短期因素較多。

反而成本上升這問題，會有較大的影響，因為這反映其成本轉嫁的能力弱左，無法100%轉到消費者，這情況如果長期持續，會對賺錢能力有影響。

整體來說，大快活質素仍在，中短期問題較大，優質度最多減少少，長遠發展仍正面，但就不會預期是高增長類別。

至於盈利警告，無絕對的標準，跌2、3成已可以，跌5成就一般都會發盈警。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13579：

龔sir你好，最近接觸你出版的作品，十分認同你的理念。

由於工作關係，早前曾與置富某商場合作，觀察旗下商場人流不俗，地點相對多鄰近大型住宅，對方的職員服務也理想。故想投資00778（置富產業信託），未知你有可睇法？

另現價是屬於合理/便宜/昂貴？長期持有是否屬優質股？謝謝解答

龔成老師：

置富（0778）這是不錯的房託，你分析佢人流，都是其中一個分析房託的要點。

我地會睇佢的租金、呎租走勢、租客結構、人流、管理等，整體來說，佢都不差的。佢持有多個屋苑商場，其中一個優勢是「居民生活所需」，這會令佢處於較穩定的狀態，受經濟影響的情況，相對較少。

這股是不錯的收息股，有一定的優質度，可投資。現價合理。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13580：

本人29歲，將會結婚固流動資金有限。但仍想盡量累積資產。

現手持一手盈富($27.7)及一手國際家居零售($2.02)入，不打算短期炒買，會長揸，2800一定持有，但想了解1373是否值得持有甚至增持？？謝謝你

龔成老師：

如果你打算中短期內結婚，就一定要留一筆資金，而這筆資金「不會投資的」，因為投資，一定要長期先有效果，同時中短期股價有不確定性。

因此，你要預有一筆資金作結婚等洗費之用。

至於盈富（2800）可持有，國際家居零售（1373）都是有質素的股，如果有閒錢，其實可以分注增持的，單計收息都不差。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

多謝各位提問，若然你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網的，當然，會將發問者的身份，以及有關個人的部分刪去。

另外，由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。