#三五成群圍爐廢噏 #Zip噏劇場 #6月號 《Green Tea 那 Day》最終回 係未有網絡世界之前，啲人話可以透過對方嘅衣著、家中嘅擺設，例如書架、碟櫃去初步了解一個人。依家有social media ，當然可以睇佢出咩post同story 去初步認識佢，例如佢share咩gag、meme、新聞，鍾意邊一隊band 或者歌手，又或者分享邊一套戲嘅對白，quote邊一位作者嘅金句，全部都係打開話題嘅素材。 自從同Daisy 係交友app 過咗24小時unmatch 咗之後，我大海撈針咁搵到佢IG，又咁啱佢無set private，我真係好傻咁睇晒佢嘅post：由幾時開始鍾意沖咖啡同畫畫，去過邊度旅行，幾時生日，係咩星座，最近成日去演唱會同展覽，outgoing 程度係我呢種宅男n倍。而今朝早，係坐緊屯馬線返緊工，但坐到中後段先知黑雨，然後直覺話我知應該黑一兩個鐘就會停雨，點都要返工不如早啲返去hea嘅情況下，我見到Daisy share咗一段叫做《屯馬開通真的很興奮》張學丘 INK remix 嘅片。 其實香港人真係創意無限，無論生活點艱苦，都可以苦中作樂。我好想回覆佢嘅post，但實情係...我無follow佢...係啊，我係睇曬佢嘅post但無follow 佢。點解？都係唔夠膽囉...唔知點解我覺得可以暗暗睇下佢嘅post，得閒買咖啡見到佢就好滿足，十足十石山街首《暗戀家》咁。 果然，黑雨無幾耐變紅雨，一早返到公司嘅我就決定落去食個早晏。呢間餐廳係之前停刊嘅飲食雜誌介紹過，呢度嘅燒味飯除咗好味之外仲好有性格，因為客人只可以嗌單味唔比雙拼。原因好似係老闆好討厭咩五寶飯，覺得人應該要專一啲。香港就係有好多怪得嚟有性格嘅人。而好多情侶會自己私底下兩溝，但我呢啲單身人士每次都只可以食單味...諗咗好耐，好啦！食叉燒啦！ 當我享受緊我嘅單味叉燒飯嘅時候，餐廳越嚟越多人，透明隔離板嘅對面坐咗一個我好似好熟，但好少講野嘅人，就係Daisy。 佢坐低，見到我，點頭笑一笑，但因為塊隔離板太大塊，又搬唔走...所以就形成呢種這麼近那麼遠嘅距離...但可以近距離見住佢，我嗰心就開始跳得越嚟越快...當佢碗燒鵝瀨粉嚟到之後...唔知哪來嘅勇氣，我做咗一件好年輕又好傻嘅事，拎咗枝筆係隔離板上面寫： 「你想唔想食叉燒？不如我用啲叉燒同你換啲燒鵝？」 然後佢無答我...當我為自己嘅衝動而後悔嘅時候，佢拎住碗燒鵝瀨坐我隔離，笑住講咗句： 「好啊。」 Song : #張學丘 x INK Remix 《#屯馬開通真的很興奮》 @zpecial_hk 《#年少輕狂》 #greentea那day #6月號最終回已出 #4集短短地 #愛情獨白劇 #同時亦將生活時事 #加入劇中 #密碼明就明 #下個月開新嘅 #廣播劇 #7月號已經諗到寫乜 #港台7天工作鄒 #rthk #dj Thx 呢班癲佬： @inkni @beatfriday @culturebeathaha