玩具展曲終人散, 好少登一輯以人為本的帖。
(以下又是千字文, 可能同Tiny車仔少D關係, 如無時間, 可以Skip此Post)

昨天Thomas問了我一個問題, 為什麼擺這個90%海外買家既展, Tiny D産品無什麼海外市場, 是的, 對上一次參加此展已是2014年1月, 一別四年。如果説Tiny, 展品比Toysoul少7成, 但此展見左Logon, SUP, Ocean Park一些重要的客人, 向他們介紹Tiny新產品同發展方向, 預計今天將會有50%以上增長。

更重要的係為我們公司代理的品牌Vstank, FOV, TSM, Mini GT, Calibre Wings, Schuco開托新的客源, 也從中尋找新商機。

Vstank同FOV軍事模型品牌, 因為多年無參展, 好多入口商以為"執左", 今次"翻生"的確帶來不少驚喜, 田宮模型既香港, 意大利, 瑞士總代理雲集攤位, 我們身為香港代理也向不少香港商戶介紹。

MINI GT犀利鳥, 第一二天因為TSM老闆Glen注攤位, 廿多間來自中國, 印尼, 泰國, 馬來西亞, 菲律賓, 新加坡飛來為MINI GT代理權排隊洽談, 無他, 三個字, 就係平靚正。香港? 由我們攪, 一定仲精彩, 會有一系列為MINI GT而整既配套, 負責MINI GT既Pinky真係忙到呢...總之出到貨大家就知, 過兩三星期就派頭兩款。

Tiny也在展會期間見左多間車廠及其授權Agent代表, BMW, IVECO, VW, MTR, KMB....好多人覺得做車仔好易, 都有唔少公司做開香港車仔, 好多人覺得參展好易好輕鬆, 不過四天展會我每天7:50am到, 但就每晩回家2:00am-3:00am才睡, 每天只睡四五小時, 因為回家要覆whatsapp, 及跟進office同事的工作, 最辛苦係同事, 尤其是住北區的同事。

今次Franco, Gary, Joanna第一次參加Trade Show, 相信經此一役大家會有經驗同有體驗。最開心有2件事, 一係見到所有visitors, 無論什麼國藉都十分欣賞TINY City香港大場景, 有很多外國Buyer一看就話"This is Hong Kong! Amazing" 其實真係好感動, 另一件開心事係見返好多好耐無見既内地外國朋友, 以前做坦克車, 就係他們雪中送炭才捱過不少日子。而好多TINY代工廠也會來打打氣, 好多時我覺得8家代工廠俾好多支持同十卜, 包括容忍我們有時遲找數, 原因他們真係好欣賞TOYEAST的同事好努力, 公司又好拼博, 所以生產的問題, 煩事都十分幫手及包容。

不過, 今天也收到一個壞消息, 美國繼玩具反斗城申請破產保護令後, 被譽為地球上最大遥控模型公司Hobbico今天也倒下, 申請破產保護令, 我同大家講, 這消息係五年來全球遥控界最震撼的消息, 我2003年創立iwaver 1/28高端RC車, 第一間海外代理就係Hobbico, 之後代理埋Vstank, 一做就十多年, 其間生產上經歷不少災難, 他們都風雨同路用心一齊面對渡過, 去美國RCX Show, 去德國紐倫堡, 去他們美國Campaign總部開會...一切一切令我聽到這位十多年的老拍檔這消息, 真的十分難過同可惜, 希望他們能迎難而上, 找到新投資者渡過難關。

明天開始要收拾心情預備年宵了。

又一間老友離模型界而去, 可能講好耐, 全部以個人經歷話當年, 我都同店一樣40載, 所以如記錯講錯, 見諒見諒!

小學三年級前住香港仔, 但好興去油麻地探嫲嫲, 所以全家睇戲多數去'舊普慶'戲院睇, 側邊街係康田模型, 店既櫉窗有好多Tamiya砌好既軍事模型, 所以去親油麻地都好開心, 因為永安有Tomica Matchbox媽媽總會買一架俾我, 去康田又睇模型, 看完去戲院門口小販食鹽焗雞肶鴨腎, 再同爸媽妹妹入戲院睇許冠傑<最佳拍檔>, 真係好開心既回憶。

小學3年級屋企由香港仔搬去黄埔, 家人帶我同妹妹去環球上面的雅閣餐廳据扒時發現環球模型, 但那時零用錢每日一蚊, 所以甚少捨得買軍事模型, 直到升左去何文田華英中學才多左去。

但同環球真正結緣係來自大學二年級創業在eBay買賣日系模型車, 環球無Tomica, 但我記得他係頭一兩間店有Ebbro賣, 雖然賣不久後代理權落入Great eagle而停賣, 但之後環球做左Mtech (made in Japan)代理, 那時就常常去環球掃貨, Mtech在香港真係賣得麻麻, 所以成日減價, 價到港幣七八十蚊都有, 一放上eBay就賣到四五十蚊美金, 所以基本上環球MTECH D MX-5, Supra都係俾我掃晒, 那時環球有位叫Anita的女店員同我十分熟落。

1999年畢業失業, 唯有繼續做eBay, 自己仲走去學Dreamwaver寫網站, 在Toyeast.com之前, 其實我第一個eShop係自己寫, http://xn--hobbyjapan2000-4k4wm13b.com/, 好長的網名唔易記, 但好好生意, 之後十年繼續同鴻興萬信入Tomica, 環球入MTECH, Great Eagle入Ebbro, 名車博覽入Kyosho, 仲有新華行入Takara Choro-Q(那時Tomy同Takara都未合併), 依個就係我做eBay既Golden Age.

仲有段小插曲, 就係好多朋友以為我無打個工就係無揾過工, 但其實我一畢業想學爸爸去皇冠車行應徵賣真車, 人生唯一一次見過工, 面試後無回音, 而第二次揾工係email去環球模型自薦幫佢地做online, 賣eBay, 但他們email我話無空缺, 而第三次, 也是最後一次就係叫名車博覽Cherry用$13000請我, 但Cherry都係拒絕左我, 但係如果當年皇冠車行, 環球模型, 名車博覧其中一間請左我, 今天TINY微影都應該不存在。

見證住環球出過軍事Figure, 之後Hottoys以極Detail既頭彫跑出, 環球有賣過Herpa, 但之後自立門戶開創1:400 Gragon Wings金屬飛機模型(將傳統1:500 herpa在香港打跨) 雖然十幾年後今天已不敵大陸無License品牌"鳳凰" 而停産, 但那時風頭真的一時無倆, 至今時今日, 環球首創1:400仍然係香港主流飛機比例, 環球又有推出Dragon軍事模型, 比傳統日系更精細, 更多電蝕片, 但近年大陸軍事模型品牌如小號手, 馬仔等十幾個品牌實在太勁, 出模型快過出週刊, 真係.....無話可說, 到今天更加追不到, 而環球孖妹嘜將7仔, 酒樓, 大排檔, 小販檔...一一做成模型, 仲有近年既公屋模型都在香港本土模型歷史寫下光輝一頁。

天下無不散之延席, 但再見也有分兩種, 一係不敵貴租無奈執笠, 一係光榮結束, 嘩, 兩層自己鋪Wor, 賣就兩三億, 租俾中銀每月收十幾廿萬, 人生勝利組啦, 所以想好嗰面, 他們更有銀彈開發更多好模型, 所以有捨必有得既。

如果你有同我一樣這廿年對環球模型的回憶, 讓我借金獎導演李安的經典作品之一，少年Pi的奇幻漂流 (Life of Pi) 的一句經典對白

人生就是不斷的放下；但總讓人遺憾的是，沒能好好地道別。
"Life is an act of letting go, but what always hurts the most is not taking a moment to say goodbye."

再見了, 多謝這四十年來陪伴我們這班電車男成長!

有四十多年歷史的何文田模型老店「環球Hobby 館窩打老道總店」下月中結束營業。該店今天在facebook發出帖文，指該自置物業鋪位將營業到下月15日，「將深化改革和轉型，（旺角）廣華街店和線上商店則繼續營業，他們呼籲網民把握最後機會，到場與經典地標打卡。

<>