賣女孩的小火柴（下）
　　
上集：https://bit.ly/3pZWnKo
　　
梅姐帶我離開呢度，搭車返去我屋企嗰個鎮，住咗入一間旅館，叫我去搵幾個好姐妹過嚟。

我一出到旅館，發現梅姐冇跟住我，終於鬆一口氣。

我想去報警，但仔細一諗，如果梅姐死口唔認，話佢只係好心幫我，我邊有證據指證佢？

但要我就咁返屋企，放過呢個人販子，我又唔甘心。
　　

我行咗幾步，就撞到一個獨眼嘅中年男人。

佢喺鎮上好出名，人稱「獨眼龍」，佢又懶又窮又咸濕，成日想佔女人嘅便宜，所以四十歲都娶唔到老婆。

家長都有提醒過，叫我哋認住佢，唔好俾佢抽水。
　　

我心生一計，小心翼翼咁行埋去：「喂，獨眼龍。」

「喲，妹妹仔，點解有妹妹仔嚟搵我嘅？」獨眼龍笑得猥瑣。

我單刀直入咁問：「你想唔想娶老婆？」

獨眼龍猥瑣嘅笑容，瞬間變得有啲落寞：「我咁嘅樣，邊有女人肯嫁畀我。」
　　

我意味深長咁講：「娶唔到，可以買啊……」

「哦，你有介紹？」獨眼龍雙眼發光。

我笑一笑：「我識一個三十幾歲嘅姐姐，生得幾靚，介紹畀你識？大家同鄉，我收番幾百蚊車馬費就算啦。」

獨眼龍點頭如搗蒜，畀咗個地址我。
　　

我返去旅館，同梅姐講，我嘅好姐妹都好想同我一齊去打工，但佢哋嘅父母唔太同意，不如梅姐幫手說服吓。

梅姐利慾薰心，可能佢覺得，就算說服唔到都冇咩損失，就好爽快咁跟我走。

我哋去到獨眼龍屋企，獨眼龍塞咗五百蚊畀我，我就借尿遁走咗。
　　

我返到屋企，見到憂心忡忡嘅父母。

我攬住佢哋係咁哭，我應承佢哋，唔會再離家出走。

父母聽到我嘅經歷，又慶幸又揪心。
佢哋話，梅姐嗰班人販子可能會報復，所以我應該報警。
　　

我哋去咗報警，講晒事情嘅始末。

點知警察將我拘捕，警方話，多謝我嚟報案，但我都「販賣」咗梅姐，都屬於刑事罪行。

警察要我帶佢哋去獨眼龍屋企，去到先發現梅姐唔喺度。

原來，獨眼龍強姦梅姐後，又將佢轉售咗畀另一個男人。

換句話講，獨眼龍都係一個人販子……
　　

唉，世途險惡。

之後，警察拉埋獨眼龍、梅姐、舅父同舅母，四個人販子都判得好重。

我唯一唔明嘅係，我都被判監三年。

法官話，販賣人口，最少都要判五年，我判三年已經係從輕發落。
　　

我覺得唔公平囉，我又唔係想賺錢，只係一時意氣先咁做，唔算係販賣人口囉。

好彩，父母幫我上訴，加埋我「犯案」嗰陣未夠十八歲，結果我嘅刑罰改咗，冇被判監，只係被警誡。
　　

人不販我，我不販人。

我若販人，我販番人……都係犯法㗎！
　　
—完—
　　
真人真事改編自「未滿18歲的女高中生販賣要拐賣她的人販子案」，

女高中生劉慧被劉梅拐帶，施計逃脫後，不甘心就此罷休，以五百元的價格「賣出」劉梅。

劉慧初審被判監三年，二審判免於處罰。

律師提出，她犯案時未滿十八歲，不是為了謀利而販賣人口，並且幫忙捉住了四個人販子，有重大立功表現。
　　

將專頁設定為「搶先看」/ "See first"，最新故仔馬上睇！
　　
新書《筍工重生高科技》已經出版了，現正發售中，
詳情可點擊這裡：https://bit.ly/32hgoSN
你的支持是我最大的動力！
　　
#短故 #短篇 #小說 #陳美濤 #廣東話 #粵語 #tomatochan #賣女孩的小火柴