【Nissan Qashqai Turbo試駕】👇🏻
https://www.opencar.hk/article/detail?kind=car-review-feature&id=1486
—————————————————

忽然有驚喜！Nissan Qashqai Turbo

講明先，作為一個專業又有少少承擔嘅汽車傳媒人，理應以公正持平、不帶半點個人喜惡嚟評論新車。不過人非草木，愈係接觸得多車嘅汽車傳媒人，其實心底裡更主觀、更有個人堅持。就以本人為例，我對SUV車種係帶有點啲偏見，但個人喜愛極對唔可以影響專業性，所以我都會深切了解SUV嘅好處同優點。
香港汽車市場對SUV有幾認受，相信都唔使多介紹，好多人都喜歡SUV高頭大馬、外表粗豪有型，總之就夠晒台型。不過事實係香港地小路窄，太大部嘅SUV其實唔係好適合香港用，所以香港市場最好賣係引擎容積2公升以下嘅中小型SUV。Nissan可以話好早已踏足SUV市場，現役嘅第二代Qashqai喺2014年初推出時只有2.0公升NA引擎版本，馬力150匹，其實已收到相當唔錯嘅銷售成績，但科技會進步嘛，5-6年車款都係時候Upgrade一下喇。

引擎喜出望外
今次Qashqai嘅改動，幾乎同外觀冇關係，只轉用一個更大型嘅電鍍V-motion鬼面罩、修飾頭泵把及用咗19吋雙色合金軨。見到咁樣嘅Facelift就想行出Showroom？明白嘅，如果你係嗰種著重外表嘅車迷，Qashqai係會令你失望。但尚未試車就離開咗Showroom嘅你，連試車嘅機會都唔俾自己，實在係一大錯誤！全因為Facelift後嘅Qashqai要試過車先知有驚喜。點解會咁講？全因Qashqai改在骨子裡！先以1.3公升直四Turbo引擎取代原有2.0公升直四自然吸氣引擎，向錢看嘅朋友會第一時間話：「正！牌費又慳一筆！」無錯，每年牌費真係慳咗，而且馬力輸出比以往高出11.1%，達到160匹！扭力方面亦有270Nm，低至1,800rpm就全數釋出，單睇數字就知Facelift後嘅Qashqai帶有少少辣味。此外，呢副引擎之所以可以用咁細容積就爆到咁大馬力，全因用咗GT-R R35引擎嘅「缸體鏡面噴塗技術」(Mirror Bore Spray Coating)，喺汽缸表面噴咗一層0.2mm嘅金屬鏡面薄膜，比傳統內壁薄得多，令活塞同內壁磨擦大大減少，好處就係熱力傳遞更快，令引擎運轉反應更敏捷，達到低廢排、低油耗，馬力同扭力都提升晒。

首配雙離合器波箱
引擎有大躍進外，波箱都有突破性改良，完全放棄傳統式扭力轉換器自動波箱，改為7速雙離合器自動波箱，轉波速度更快、更利落，更重要係動力流失更少。雖然唔少歐洲SUV都有用呢一種波箱，不過日本SUV用上雙離合器波箱實在罕有，Nissan之所以掌握到成熟技術，其實都同GT-R R35有啲關係，因為07年底推出嘅R35，當年都係首款日本車用雙離合器波箱，屈指一算Nissan量產雙離合器波箱已有13年！當然比其他日本車廠行先幾步。
喺大埔道及下城門水塘啲山路實試Facelift Qashqai，有一點令我好有驚喜，就係引擎扭力輸出相當充沛，當波檔處於1、2波，行至高低落差比較大嘅低速彎角時，只要稍為深踩油門就可以令輪胎尖叫，而車頭係會有猛力扯出彎，好勇猛啊！不過來港嘅Qashqai只有前輪驅動款式，所以最好留意一下出彎時嘅油門深度，避免出現推頭現象。

設備一應俱全
SUV之所以成為香港車迷寵兒，除咗外表討好外，另一原因係設備普遍都比同價位房車多，而呢部Qashqai嘅設備喺同級更可以話同級最齊全！乜嘢車道偏離警告系統、前方碰撞輔助制動系統、主動式乘坐穩定系統、主動式軌跡控制系統及環視顯像系統都有齊，配合埋已取得EURO NCAP撞擊測試五星評級，安全性有晒保障。而車廂方面，最正當然係超巨天幕車頂，有極強採光效果，令車內空間感更強烈。此外，原廠Nappa真皮座椅都有非常好嘅承托表現，唔會比傳統房車遜色。
綜合Facelift Qashqai嘅表現，絕對屬於「低調地認真升級」類別，如果未擁有過Qashqai嘅朋友如果單睇外表未必吸引到你，如果係上代車主或Facelift前嘅車主試車，就會深深感受到佢有幾大改良。都係嗰句啦，未試車就out咗佢，你會後悔囉。

Nissan Qashqai Turbo Spec.
引擎：1,332c.c.直四Turbo
馬力：160ps/5,500rpm
扭力：270Nm/1,800rpm
傳動：7前速自動，附+/-模式
車身：4,394 X 1,806 X 1,624mm
軸距：2,646mm
車重：1,315kg
售價：$286,800
查詢：合誠汽車 (2803 5333)

#Nissan #Qashqai #Turbo #Facelift #DSG #SUV

因應香港的氣溫、路面狀況及用車習慣，本地騎士常用10W-30或10W-40機油，原因是這數字的機油在機件保護、油門爽快感及耐用度（換油頻密度）有較佳平衡。要是叫大家使用20W50的機油，相信大部份騎士的反應都會覺得油門「好立」、增加耗油量(因為油膜太黏，增加阻力)、進入工作溫度需時等等的想法，好以只有極少騎士使用。不過如果讀者是HARLEY-DAVIDSON的騎士，肯定對20W50的機油另有看法，甚至是忠實用家，原因是HARLEY-DAVIDSON的用家手冊都推薦使用20W50機油，為風冷的V2引擎提供最合適的保護。

同好多車廠一樣，HARLEY-DAVIDSON都有推出自家牌子的機油，主要都是20W50。但其實部份機油生產商都會針對HARLEY-DAVIDSON的風冷V2引擎特點—高溫、巨大扭力、強烈震盪及精密度不高（對油膜要求更高），生產自家配方的20W50機油，而駕駛1997 HARLEY-DAVIDSON FAT BOY的Harry，正使用MOTUL推出的7100 20W50機油，該機油除了有API及JASO MA2（適合濕式離合器使用）等等的規格之外，也是一款針對HARLEY-DAVIDSON的V2引擎開發的機油。

另一方面，現時大部份棍波車都是採用一體式的引擎結構，即是引擎及波箱安裝在同一個機器殼內，好處是可以減輕重量及體積，對於講求靈活轉向的電單車來說極其重要，而這種結構只要換一次機油就可以潤滑兩個地方。然而HARLEY-DAVIDSON並非追求緊緻的車身結構，所以大部份HARLEY-DAVIDSON都是沿用傳統結構，引擎與波箱分開，換句話騎士除了更換機油外，並且要更換波箱油及鏈條傳動油，即是三個地方都需要換油，工序較一般電單車多。

HARLEY-DAVIDSON除了推出自家機油外，還會推出波箱及傳動專用的機油，其他機油製造商都有推出相同產品。雖然如此，部份車主都會使用同一款機油，應用於三個地方上，而Harry就是其中一位。

Harry的HARLEY-DAVIDSON是1997年推出的FAT BOY，更換了S&S引擎，排氣量高達1,750cc(原裝引擎1,340cc)，並額外加裝油冷散熱，以免長時間駕駛腳軟，Harry也曾經將他的FAT BOY運到國內自駕遊。

Harry說HARLEY-DAVIDSON的引擎超熱，引擎好震，排氣聲好勁，扭力好強，車身好重，並需要花好多時間保養電鍍件，不過這些在好多騎士眼中的缺點，其實是HARLEY-DAVIDSON的特色。但Harry說還未駕駛FAT BAY前，以為好難駕駛，但實際操控起來卻遠比想像中輕鬆，或許是因為HARLEY-DAVIDSON的重心好低，就算慢速轉彎都好容易，高速公路的舒適感更不用多說，就像駕駛一部大馬力Forza (Harry曾經有部HONDA FROZA 250)。

HARLEY-DAVIDSON屬於週末車，好多騎士甚至「擺多過揸」，Harry雖然在疫症期間多了時間駕駛，但每個月的行車里數仍然不高（半年行駛約1,800km），要是根據用家手冊的行車里數換油，恐怕一年都無需換油，因此Harry每半年就換機油。原因是Harry知道新機油加熱後便開始變質，即使車輛長時間擺放在停車場，機油的潤滑效能及黏度都會隨著時間逐漸下降。Harry說HARLEY-DAVIDSON的引擎真係好熱，兩個巨大活塞製造的震盪，與及機件磨擦較一般電單車強勁，所以機油的品質更加重要。

Harry說理論上機油放久了都可以繼續使用，身邊部份車友都是這樣，用起來也沒有大問題，但由於香港的天氣愈來愈熱，冬天愈來愈短，Harry為免炎熱氣溫對引擎造成肉眼看不見的損害或加速機件損耗速度，再者車子已經出廠23年，機件已有一定程度損耗，所以不會按照車主手冊換油，以確保引擎得到最好潤滑，因為Harry打算長Keep呢部HARLEY-DAVIDSON，即使將來賣車，都希望下手車主可以享受車子最好狀態。

由於Harry其餘電單車都是使用MOTUL機油，所以幾年前開始玩HARLEY-DAVIDSON都是使用MOTUL 7100 20W50機油。在此之前，Harry從未用過20W50機油，再者當時對HARLEY-DAVIDSON的V2引擎認識不深，總覺得50機油太「杰」，認為轉用40機油也許會好力一些，但又沒膽量使用，所以只好試用其它牌子的20W50機油，看看有何分別。

Harry試過三款機油，有全合成及半合成，每款機油最少用過兩次，Harry說除了那一次在國內自駕駛遊能夠行足里數換機油之外，之後在香港都是每半年換一次油，因此機油的持久力就不得而知。而試過的三款機油中，都試過1個月或2個月未出過車，亦都試過連續三或四星期每逢週末出車，Harry就話他的FAT BOY是一部扭力巨獸，任何時候或轉數加速都好凌厲，而三隻機油的油門反應沒有好明顯分別，但最後仍然Keep住用MOTUL的原因，是因為引擎在加速期間的雜音較少，引擎震盪亦稍稍下降，空轉狀態下的熱力也較低，反映該機油在保護引擎方面較好。