【龔成問答信箱】（Q22101-22120）

Q22101：

龔sir 我今日做左進階班功課 有d問題想下，我用左莎莎既年報去計財務比率

1）我計到既ROE 分別係-26.4同-31.1, 但係你比的價值網同bochk 係-23.5 同-24.9，點解會有d分別呢？

2）EBITDA 利潤率 其實我唔係好識搵個EBITDA出黎 自己跟住年報計除息除稅除折舊後 都計唔到價值網 顯示既-3.85同-3.67億(價值網顯示2020年係正數

我諗應該係負數先岩？）個EBITDA利潤率 價值網 係-12.7同6.41，而bochk係 4. 06同5.47, 想請教下可唔可示範一下點計？

3）存貨週轉日數 我計到160，呢個數字同價值網差唔多，但bochk係106, 又係想請教下邊個數字先岩？

4) 關於杜邦分析法

2020年: 1.97 x 1.75 x - 9.02% ＝-31.1
2021年: 1.89 x 1.21 x - 11.5% ＝-26.3

ROE 2年都負數 不過2021負得冇得多 2021年純利率差左 不過財務槓桿 同總資產週轉率個數細左 所以負少左

我就唔係好明 總資產週轉率 應該愈大愈好 但係假設2021年都係1.75 (instead of 1.21) 咁計出黎個ROE負得仲勁 咁咪調返轉應該係愈細會愈好？請指教一下

龔成老師︰

1) 我相信係你和其他網站，係計個"發行股數"和"股東權益"出現分別。

因為每個網站的公式都不同的，就算發行股數都不同，計年頭？年尾？平均？加權平均？通常我睇財經網站，都唔會太著重d細數字，你了解大方向就得，同埋，不同財經網站的數據，一定會有d誤差，正常的。

2) 至於EBITDA利潤率，你可以參考BOC個數字。你可以用佢年報中"經營虧損"，再加翻"按性質分類之開支"中的折舊部份(2021年年報P.177)。但會有少少差別，可能係提取數據或匯價問題，影響不大。

價值網部份，都係用類似計法。但2021年數據，可能系公式不同，其實，一般網站在計算EBITDA時，都計左「使用權資產折舊」，但這並不是真正的折舊，所以數據的參考價值會低左。

其實較精準方法，我建議係用EBIT - 折舊，但這個折舊，應該排除左"使用權資產折舊"的數字，咁會更準確。2020和2021年EBITDA，應該為-7.6%和-10%。

2020年︰(-5.53 + 1.17) / 57.17 = 7.6%
2021年︰(-3.91 + 0.87) / 30.43 = 10%

3) 如果用我教法，拿年初和年末平均數計，答案係160。至於點解BOC會有分別，因為佢係計算存貨時，唔係用年初和年末平均數去計，所以有落差。

你照用160，咁就可以。

4) 你這個杜邦分析計算，係正確。你睇翻個3組數字﹐你會發現中間組數(營業額/總資產)，係變動最大。

你就會發現，企業這2年面對問題，係銷售數字出左最大問題，有明顯轉差情況。

之後，我地再睇翻客觀環境。由於這2年有社運和疫情影響，令到營業額受損，係正常。這些都係中短期因素，因此我地係分析企業質素時，唔洗過度在意。

至於你話總資產週轉率愈大，個ROE就會負得愈多，係正常。因為現時佢生意少左好多，但好多固定成本，好似舖租、人工等，唔係話停就停到。

佢現時基本上，每件貨品都係蝕住做。但當這些不利因素過去，營業額回復正常，有更多銷售單位去攤分這些固定成本時，就會令佢轉虧為盈。

這時候，每賣一件貨都係賺錢，自然會係總資產週轉率愈大愈好。

------------------------------------------------

Q22102：

你好 龔sir本人持倉如下：

778 @$10.3 x 5000
823 @$71 x 1500
941 @$83 x 500
968 @$13 x 8000

1177 @$4.5 x 12000
1928 @$41 x 2400
6823 @$10.5 x 10000

另月供5隻各$1000, 現值16萬多

3,285,823,1177,1299

本人50歲 月入33K 還有十年退休，想法是退休時將所有股票轉成有5厘息以上的收息股 作生活補貼

1) 這個組合有沒有問題？

2) 因為未來還有10年穩定收入 這組合是否過於保守？

謝謝 祝生活安康

龔成老師︰

1) 你持有和月供股票，都係有質素。但由於你50歲，係一個要為退休開始準備的年紀。

因此，你要將組合中的股票，慢慢轉成較保守組合。按年紀增長，慢慢加大收息股比重。目標係10年後退休時，組合100%係收息。

現有持股，暫時可以不用改變。但月供組合中，中生(1177)和比亞迪電子(0285)都係潛力股，風險對你而言，用點高，唔建議用佢地作為月供組合。

你可以將這2隻股票，換成為收息股，會較適合你現時的年齡配置。

收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。收息基金(3110)，都可以。

還有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

另外，你要留意一下，你組合持股的佔組合比例。個別企業和行業，不要佔組合15%和30%以上，否則會有過度集中性風險。

你現時部份股票，係超過這個標準。但由於都係有質素股票，故不用沽出。用未來新資金，去慢慢拉平衡翻個比例，咁就可以。

現時大市只在合理區，每月月供之餘﹐緊記都要留少少現金，用來等大跌市出現時，可以去掃平貨。

2) 你大致上跟我所講的方法，去進行配置，增長力度就會配合到你年紀所需。

我假設投資回報有10%（連股息再投資），你每月投資$5000 + 55萬持股，10年後大約會增值至250萬。

你再將佢換成6%收息股，大約每月就會有1.25萬的現金流。你可以以此作為參考，調整自己投資計劃。

------------------------------------------------

Q22103：

我正在研究電動車和自動駕駛，有什麼介紹

對這個行業未來的看法

龔成老師︰

電動車方面，我自己一直較看好比亞迪（1211），係佢的電動車。

首先，電動車有環保的概念，這點令政府會加以幫助，而市民亦會支持，但其實，電動車真正的價值並非在環保，而是慳錢，用電比起用油平得多，因此只要各種配套都完善，車主沒有理由不選擇電動車。

只要有金錢利益推動，人們的習慣將輕易改變，在70年代的石油問題，完全改變了美國人使用汽車的習慣，由一向追求大汽車的習慣，轉變到鐘情於小排量慳油的日本車，令日本車大舉入侵市場，當其他車廠發覺時已經太遲，最終成就日本車霸主的地位。

雖然將來的油價難以估計，但到經濟好景，各國都大量用油的情況下，石油需求大增，電動車的優勢亦愈來愈明顯。

另外，比亞迪在中國發展電動車，可說是佔盡地利因素，因發展電動車必需要有完善的配套，政府的支持十分重要，另外，若政府肯帶頭使用對推廣很有幫助，現時比亞迪的電動巴士已經行走在中國多地的公路上，由公共交通開始發展，可見政府對電動車是正面及支持的，然而，中國政府在支持電動車背後亦有個重要因素，就是石油。

中國並非產油大國，未來的石油供應難以滿足中國的汽車需求，而發展電動車就成為辦法，同時中國在西藏擁有不少能生產電池的鋰資源，若能用電動車取代傳統燃油車，中國對石油的依賴可減少，對別國的依賴能減少，從整個國家發展的戰略角度分析，中國發展電動車的誘因並不少。

同時，中國是政府主導的國家，要建立配套及支持業界，比資本主義國家更容易（在西方國家，石油業的既得利益者並不希望見到電動車的出現）。

投資中國的企業有一個要點，就是順從中央的方向，這不是指個別一兩個政策，而是一個大方向，因這會對企業的長遠發展有重大的影響。

比亞迪在新能源汽車方面，經過幾年的發展開始有起色，混能車銷情理想，而電動大巴在政府支持下銷量亦理想，而部分歐洲國家亦開始試行比亞迪的電動大巴（這是有利的指標，因歐洲的標準甚高的），雖然只屬起步，但情況不錯。

現時比亞迪的新能源汽車遍佈全球6大洲、多個國家和地區，其中包括美國、德國、 英國、日本等主流汽車強國市場。

所以，我睇好這企業的電動車，但並不是一兩年就見到收成。

至於自駕技術，見集團都一直有同科技企業合作，相信發展上都係正面。

但這股經常都處略貴水平，大約去翻$135先算合理，如果真的好想買入，現價小注月供好了。始終現價投資風險高，回翻先考慮正式買入。

或者，你可留意下中國電車（2845），這基金的目標是追蹤Solactive中國電動車指數NTR「相關指數」表現緊密相關的投資回報。

持股中最重就係比亞迪A股（002594），以及與中國電動車產業有關的股票，中國因為能源問題，長遠一定要發展電動車，這是大方向，故此股有一定投資價值。

此股現價合理區頂至略貴。無貨可以現時入少少，到有明顯回調才再慢慢加注。

潛力度是有的，但會比較波動，如投資宜慢慢分注，可長線。

------------------------------------------------

Q22104：

老師你好！岩岩開始睇你既書，好似展開左我人生新既一頁，原來一直以來既理財觀念（淨係識得放錢係銀行儲）係好old school同好無效率。依家將你一本本書慢慢睇，希望可以快啲財務自由啦

小妹25歲，月入4萬，家用一萬，用一萬（下個月開始想用少啲儲多啲)，儲兩萬。

黎緊應該會同男友買樓，想買約7-800萬既樓，有首期，希望可以快啲供完，唔想負咁耐債，其實睇完書真係好唔想供樓，覺得要借錢再負咁耐債呢件事好矛盾，更無奈樓價愈黎愈唔合理，但又想有個安樂窩

1。儲蓄約15萬；需要再拎錢出黎投資嗎？

2。美股：少量voo

3。睇完老師你講既野，想試下月供股票
你覺得我每月供
$5000 （2800）平穩增長股
$5000 （3067）潛力股
如何？

4。如果二人都用呢個組合投資，可以加快供完層樓嗎（男友都係月入4萬）
希望你可以比啲意見我，謝謝呀！

龔成老師：

你現時25歲，係累積財富的黃金時期，你要好好把握，盡你一切的力量去儲蓄、投資、學投資知識。

你盡快加儲蓄到每月$2萬，是正確的。

1）你表示「有首期」，是否已另外預左一筆足夠的資金，去準備買樓，我假設你已準備好，餘下的$15萬就可以投資/等投資，不過，我會較建議你等完成買樓過程，先開始投資。

另外，現時低息環境，其實唔需要太急去還錢，你照正常速度去還錢就得，資金可以用作增值。

2）VOO可長線持有。

3）可以，這兩隻都是不差的選擇，但現時好睇你會幾時買樓，而決定投資多少，留現金多少。

4）你概念上不用想著「想盡快供完層樓」，你只要照正常速度去供樓就得。每月保持進行財富增值，照上述月供模式進行，就得。

------------------------------------------------

Q22105：

你好龔成老師, 首先感謝你的無私分享，令我有希望可以有天財務自由。

先跟你分享我的現況

工作方面：我今天25歲，月收入13K，上年原本收入18K，但因為轉行由低做起，希望將來可以收入更穩定，所以即使收入下降仍堅持轉行。

我亦有PT工作，大概月入3K。而今年9月我打算花約80K讀PT PGDE，預計2年後畢業後起薪點可以升至30K。

儲存方面：我答應自己每月要儲14K，預期3年後有500K。

資產方面：我現有資產350K，當中股票佔6成，3成是銀行定期，其餘是流通現金。股票比例:

1) 316, 買入價119, 股數419
2) 823, 買入價62.76, 股數131
3) 1177, 買入價7.73, 股數1414
4) 2388, 買入價24.4, 股數1447
5) 2800, 買入價26.37, 股數2301
6) 3067, 買入價17.6, 股數692
7) 3988, 買入價3.07, 股數3252

目標：我期望3年後可以儲到一百萬，與男朋友夾份置業再結婚。

1) 請問老師認為我的方法適當嗎? 有更快達到目標的方法嗎?

2) 請問老師認為我的股票比例恰當嗎? 有需要更集中投資/賣走哪隻股票嗎? 我暫時只有穩定地月供1177及3067各約$2000。謝謝你

龔成老師：

1）現時的股票與現金比例，適合的，持有的股票都是有質素的股，但你25歲，其實未必適合持有收息股，因此，中行（3988）這類收息股，就未必是最好的選擇。

至於大方向，基本上無問題的，但由於你轉左工，收入減少，你要睇下自己能否做到每月儲$14000的目標，如果可以做到，相信3年資產達至$100萬，可以的。

2）比例基本無問題，由於你3年後要資金，因此不能太過進取，你預潛力股與平穩增長，各佔一半就可以，潛力股不能太多，反而當你買完樓後，資金可以更長線投資，到時可以再增加翻潛力股的比例。

------------------------------------------------

Q22106：

Hi老師，最接近神的男人
因2年前無意中係fb識到你

另外，知道你聽過好多 多謝你的人留言，
我都一樣
我都好想多謝老師！同埋多謝我自己！

我有間居屋 供緊， 在職媽媽
小朋友x2 有一個工人姐姐
以前就算好慳好慳，
都儲得好小錢！

人工唔高 只是普通文職 ，
但我2年內竟然都儲到多達十萬以上！
都係你帶來的正能量影響

除左正職外，亦多層面地搵到額外收入（如投資，網上填問卷，任務/網店/etc....）
真係好多 原來增加收入來源係好重要
，
而我也揾到真正搵錢方法 好開心）
為了令自己收入更大，我偷時間去投資自己身上！去學習不同知識！
賺取更多額外收入！
多謝你無私奉獻

龔成老師：

哈哈，太誇張了，其實我做的事不是好誇張，我原本都是好普通的人，只是我比一般人更加努力，希望你都要明白，好多事情你都能做到的。

見到你有正面的影響就太好了，你最重要是保持進步，無論知識，以及財富。

你現時的方向正確，同時，你應該思考一些長遠增加收入的方法，例如自己在現時職位上的發揮，有無進步的空間，長遠的事業發展怎樣。在自己的能力上，以子職業上，都要從長遠角度出發，加油！

------------------------------------------------

Q22107：

你好，有些投資問題想求你指教

我月入3萬，太太月入7萬，有兩個3歲小朋友。我有層自住樓，貸款金額仲有500萬，每月供$18000左右。因為我人工唔夠借，所以太太是我擔保人。

另外，我太太和她的家人有層已供完聯名物業市值720萬，但她家人住緊。

現在，我哋想喺太太和家人的聯名物業按揭貸款，之後買入的士（的士牌連新車約$550萬）收租作投資，但我們現金儲蓄得50萬其餘就按揭借回來，你認為可行嘛？

以我的背景會唔會好大風險？還是作其他投資好呢？

謝謝你的賜教

龔成老師︰

我相信你年紀都唔係太大，應該係年青至中年人士的階段。

在這個年紀，其實借貸比例高少少，都係可以。你預總負債，最多可以去到總資產7成。從負債風險角度，只要你做到7成以內，風險水平都係可以接受。

所以，你要計一計數，所有負債，比起所有資產的市值計算。如果超過7成，就是開始高風險。

但你要留意，的士牌過往是增值類別，而家已偏向收息類別(增值都仍有，但不算多)。

本質上，的是牌可以不斷有租金收入，而這個租金都會按貨幣系統的向上，而不斷向上的，但行業近年出現了叫車程式等新的競爭模式，對佢點都有影響。

所以，在長遠計，佢的增長能力只是中等，視為收息類的資產會比較好。

以你們年青至中年年紀，我比較建議集中係一些較有增長力資產，例如一些有增長力的優質股。

投資的士牌唔係唔得，但佢增長力唔會好強，財富增值效果，現時未必有優質股咁好。

------------------------------------------------

Q22108：

龔成，你好啊！好緊張，希望你會答我呢個投資初哥問題

我目前有HKD80,000資金專門預留作為投資用途，宜家30歲，希望係2022年2月前投資而賺到HKD160,000;請問有咩嘢建議？

我之前有月供股票買盈富同CLP,都有小量投資美股，只限tesla, ARK及台積電。

Thanks!!!!

龔成老師︰

我地做財富增值，一般希望做到架合理回報，係每年增長10-15%。你現時這個目標(1年升倍)，用股票投資去做，風險會好大，較難達到。

而且，1年係一個好短架時間，就算再優質股票，都要時間升值。1年太短，好易會有股價波動風險，令最終回報不確定性好高。

如果你無其他增值方法，建議你按部就班，透過月供去買入優質股，去為自已資產作增值。

你過往投資股票，都係有質素，用來增值係可以。但以你30歲年紀，應以增值為主。中電(0002)增長力不高，未必太適合你。

建議你用「平穏增長股」 + 「潛力股」作組合，去創造一個增值平台。

現在你每月先用5成儲蓄做月供。其餘先儲起，用一邊月供一邊儲蓄的策略。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

另外，我建議你加強每月儲蓄，這是重要的。

------------------------------------------------

Q22109：

你好呀, 老師, 我今年29, 有以下兩件事情想各你請教:

1. 想與姐姐置業 兩人月入共7萬 流動資金約有100 萬, 本住青衣區, 想買樓齡不超過20 年的, 正考慮藍澄灣, 同埋想問2人自住, 建議入手呎價為多少

（實用面積為500呎會過大負擔嗎？ 想做9成按揭，另想問下老師你覺得此區樓宇有升值潛力嗎？ 由於是第一次置業，想先請教老師有何建議?

2. 另外，因父母抽到居屋，費用為200多萬， 父母正考慮做多少成按揭，如一次過付款，流動資金便所剩無幾，但做按揭又要俾利息，所以想請教老師

建議按幾成才合適呢？

謝謝你的解答!

龔成老師︰

1) 青衣區內大型屋苑唔算好多，成個區潛力度只算中等。但東大嶼計劃落實的話，有機會刺激到這區樓價上升。

藍澄灣質素算中等，佢距離港鐵站較遠，係一個扣分地方，但整體算係可以。

但你這個作為自住樓，我建議較從你自身需要作出發點，去作出考量。你要諗這間屋，係唔係適合你長遠需要，講緊係未來5-20年。

呎吋方面，只要唔好太細(少於300呎)，符合到你生活要求，咁就可以。另外，我地自住樓一定要堅守一個大原則，就係長線要"供得起"。如果可以的話，置業係無問題。

2) 現時貸款息口在低位，無論係你和你父母，我都建議盡量做高成數貸款，去空出更多資金，做財富增值。

如果你父母本身好怕風險，就將按揭成數調低，但其實在財富運用上，高成數會較好的。但要留意，你自己買物業時，高成數按要比按保，你要平衡翻。

雖然高成數按揭表面上，係要比多左利息，但我地要從機會成本做考慮。你利用低息貸款，空出來資金進行投資增值(投資優質股)，去爭取更大回報，相信長線財富增值效果會更理想。

同時，你父母都可以因此留下更多資金，以備不時之需。

------------------------------------------------

Q22110：

Hi 呀Sir你同唔同意1211黎緊要加強品牌宣傳，佢銷量好似唔夠多，我明白佢有技術，但始終作為買家都想要多人識既牌子咁。

比如比亞迪做公交車，人地買左會唔會覺得自己個檔次低左

龔成老師︰

其實比亞迪(1211)品牌，的確有改善空間，特別係在國際市場。

但由於佢有技術，這方面係佢主要勢所在，品牌雖然唔算好強，但無損其投資價值。

而且，集團將來未必只係集中係出售新能車，可以會慢慢加大電池和新能車相關技術銷售。故零售品牌的強弱，未必對佢影響十分大。

其實，比亞迪其中一個往後的發展，就是「賣電池」，即是同不同的車企合作，而這方面的發展，自己的品牌，未必是核心。

------------------------------------------------

Q22111：

龔成老師，你好！距離上次請教問題，原來已經有1年7個月，最估唔到既係呢段時間自己既資產價值升左有65%(105->175)。主要係將過去持有既現金部分轉左去股票+每月部分剩餘資金作月供

所以出現左較大既升值。

一、打算準備置業，而因為我目前有接近6成既資產都係股票，因此若要置業就需要放左一D股票，目前股票（買入價，未扣除過往收息）如下：

完美醫療[email protected]，24000股
騰訊700@408，400股
銀河[email protected]，1000股
盈富基金[email protected]，6910（月供緊10000）
中生製藥[email protected]，10000股
小米[email protected]，3000股
建設銀行[email protected]，10000股
阿里巴巴9988@176，100股
港鐵[email protected]，1449股(月供緊3000）
閱文[email protected]，406股

我有考慮既係因完美醫療同騰訊升幅較大，再接觸到較平宜價較難，所以計劃：

1.先放左升值潛力無咁大：如建設銀行、閱文集團；

2.現時買入價與成本價相距較近：港鐵、阿里巴巴、小米

3.再考慮剩餘（優先考慮銀娛，及部分盈富基金）的股票。

你覺得呢個安排會唔會較好？

二、由2019年11月開始月供到而家，見盈富基金佔現時比例較大，想降到3000/月，因為澳門月供股票成本較貴，50hkd/隻/月，

唔想月供分得太散，想10000就分別5000福壽園，5000港鐵。會唔會都可以？但若果成功置業，到時候可能只月供到3000-5000。

三、最近睇完你本《80後千萬富翁》，好有感觸，特別係我對現時份工完全感受唔到滿足感，甚至厭倦，現時一有時間就會睇報表，樓宇相關資訊，

目標向住有基本財務自由後辭職。感謝你本書再俾我動力去向股票，樓宇，老闆方向發展。

龔成老師︰

一) 你的策略，有部份需要修正。

我地考慮持有邊D股票，要從佢是否適合你、組合平衡性和現價平貴(而唔係睇買入價與成本價的差距)，去作出考量。

你還未到30歲，建行(0939)這類收息股，唔適合你。閱文集團（0772）確定性較高，可以減持少少。

完美醫療(1830)現價偏貴，加上佢佔你組合比重較高，我都建議你沽出部份。

至於餘下股票，持有價值差不多。若你有需要進一步套現，你可以按比例去每隻沽少少。

二) 你這個調整，都可以。暫時你就用你新的調整，去繼續進行月供。到你置業後，才按需要減少月供供款，就可以。

三) 本書能幫到你就好，記住要做好財富增值，唔係短時間可以做到的事。要保持學習、維持現有投資習慣，你自然會一步步走向財務自由。

------------------------------------------------

Q22112：

你好！ 家父將於4年後退休，佢想我幫佢用1百萬做投資，希望長期收息亦可有小許本金增長。

80% 穩定收息
303 vtech 15%
778 置富 15%
1310 香港寬頻 12%
941 中國移動 12%
2638 港燈 15%
2800 盈富 11%

20% 增長股票
1810 小米 7%
981 中芯 3%
823 領展 5%
066 港鐵 5%

請問以上可以嗎？定比例或股票有些轉換會更好？
Thanks！

龔成老師︰

由於你父親，尚有4年就退休，投資上應要較保守。

你現時持股和配置，大致上都可以。但盈富(2800)唔係收息股，佢派息平均只有2-3%，但有穏定增長力，可持有。

另外，中芯(0981)和小米(1810)雖有質素，但波動性較大，不宜持有太多，故不要再加注。

現時大市只在合理區，資金唔好盡用。最好留有部份，一方面，可以等大跌市出現時，用來掃貨。另一方面，你父親都應該留有一定現金，以備不時之需。

------------------------------------------------

Q22113：

龔成老師你好，我想請教下你，我已經賣左我既單位，宜家手頭上現金有130萬，我和先生的入息加埋有6萬，我地想買返樓

但係樓齡新少少已經去到700萬，供唔起，我地打算租住先但係又驚上唔返車，請問我地點做會好d？

龔成老師︰

若現時財政，不足以直接承擔心目中的理想單位，你有2個方法。

你可以先購買一個較細單位，之後放租去「以租養樓」或自住。另一邊，就用優質股繼續增大個資金，之後才用較高成數去買大屋，令自己可以供得起。

這樣做，可以有平倉樓市的效果。你們資產，相對受樓價波動的影響，就會較細。當你地將來再換物業，會較有預算。

另一個方法，就係直接用優質股去增值。現時以租金回報率計，股市值博率會較高，潛在回報都會較大。

但由於佢同樓市，唔係有直接關聯。若長線樓市升幅跑嬴股市，變相反而令你置業成本上升左，得不償失。

你要自己衡量下，邊個方法會較適合你。

------------------------------------------------

Q22114：

本人49歲，丈夫51歲，一子將升中學。夫婦兩月入約15萬。在何文田擁有一物業，以丈夫名下持有，仍欠銀行180萬。

我與丈夫現共有公積金約700萬。現金260萬，定期200萬，基金保險200萬。我自己有9手滙豐股票、1手工商，1手港交所。

丈夫常想多買一層樓，因現單位不夠住，想多買一間三房單位，何文田單位出租。但我想以我們的年紀，再重新供一間樓是儍事嗎？

最近見大埔一大屋苑800呎單位，售950萬，26年樓齡，可考慮嗎？

龔成老師︰

其實，每個人都有自住需要，一個適合家庭長線生活的物業，係需要的。你用現時方法，買入一間3房，再將現有物業放租，係可行。

你現時有一定的現金，只要利用作首期，餘下部分現金，你每月供款，我相信可以應付，但的確，每月支出會增加左，你要計好數。

而你現有物業按揭$180萬，將其放租，我相信每月都有基本的正現金流，可以幫少少你每月供樓部分。

另外，如果日後能善用公積金，無論作為部分還款，又或投資一些能產生現金流的工具，都能有助你供樓的。

但當你再買入一個物業時候，你成個財富組合，就會偏晒係物業類，出現過度集中性風險。故你在買入新物業後，長遠來說，加大翻優質股的投入﹐去令財富組合回復平衡。

另外，你現時持有股票，都係有質素。但你要留意，任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

你現時明顯，係偏重左係銀行股，未來要加大其他行業股票佔比，去平衡翻個組合。

以下是一些適合你的股票，現價都在合理區，可分注入貨。

平穏增長股︰金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)

現時大市只在合理區，資金唔好盡用。要留有部份，等大跌市出現時，可以用來掃貨。

------------------------------------------------

Q22115：

龔sir，我是你的學生，想就爸媽的情況請問你意見：

爸媽是退休公務員，60歲，有長俸(每人每月約$15,000)。他們持有一個單位，市值約$1,000萬。下年中他們將搬來跟我一起住，請問他們應該：

(1) 將樓放租，租金大概$20,000/月，每月$2,000管理費；或

(2) 將樓放賣，將部份所得資金(大概$700萬)換入保守投資股票組合，希望有4-5%年回報，換取現金流。

請問那個方案較適合他們的情況？如是(2)，請問除了港燈般的公用股，還有那些是最穩健的收息股？因為就算領展置富這些近年都比較波動，謝謝

龔成老師︰

你父母由於會跟你同住，所以無自住樓需要，其實用分法1和2去處理，都係可以。

若你父母透過長俸和租金收入，已經足以應付基本生活支出，我會建議一動不如一靜，用方法1就可以。

相反，若現時長俸金額和他們生活開支，係有一段距離，你就可以考慮用方法2。

另外，你可以考慮將層樓加按，套現部份資金，去買收息股(最好係方法1，不足夠支付生活才用)。

但由於借貸始終有一定風險，唔好按太多，大約2成左右好了。同時你要明白，這樣會令你父母負債增加，風險會增加。

另外，如果你投資的股票不幸股價下跌，你就會出現「賺息蝕價」，對你不利。

同時間，如果日後加息，又或你收息股的派息減少，都會令你得到的息差回報收窄，你的回報會減少。

你要從實際情況和風險中，取一個平衡的方法。

以下是一些有質素的收息股，給你作參考。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）或收息基金(3110)都可以。

如果你能承受到風險，有些更有超過8%、10%的高息股，但股價就略有風險，要自己衡量，佐丹奴國際（0709）、中石化（0386）、互太紡織（1382）等（記住，股價略波動，只能小注）。

領展(0823)都可以考慮，但因為佢都有一定增長力，所以股息率未必太高，你要留意這點。

我較建議方法（1）。

------------------------------------------------

Q22116：

我想請教，以收息股為例

我既3號仔，早前收左利息，我係咪應該將息做investment ，Otherwise 就achieve 唔到個compound effect ?謝謝你

龔成老師︰

其實複息效應，係分2部份。第一部份，係企業賺到錢，攞去再投資在業務上，創造更多盈利。

另一部份，就係你所講的派息。這部份，就要投資者，將這筆資金去再投資，去創造更多財富。

但如果你持有股數不多，收到股息可能較少，不足以買1手股票。你可以將這些股息先儲起，到有一定數量，目標股票價值又合理，就可以出手。

------------------------------------------------

Q22117：

龔成老師: 現時持股組合中，有1928金沙 $33.9買入，但擔憂政治風險影響續牌，以至可能帶來毀滅性打擊，

眼見880 澳博股價下跌不少，值博率上升，請問是否換馬較好?

龔成老師︰

金沙(1928)無論在賺錢能力、規模、物業質素和協同性等等，都係優於澳博(0880)。

現價計，雖然澳博值博率係較高。但長線計，金沙(1928)增長相信會較好，我比較建議用金沙，作為長線投資目標。

至於澳門賭牌問題，我係課堂上，都有課程的同學們分享過。簡單而言，佢成功續牌機會，會係較大。

------------------------------------------------

Q22118：

龔sir, 有事想請教你意見。我將會離職，公積金約有40萬可選擇取回或者繼續存放於景順，目前都係放高風險的100%環球股票基金。

僱主供款30萬幾（我唔洗供），而家收益9萬幾。

請問我應該選擇取回所有現金再作其他投資？（扣取放回MPF的錢之後應該還有28萬左右可以取回）還是應該先繼續放，等個市好啲再取出？（佢五年內再隨時取回）, 先謝

龔成老師︰

首先，你按翻人生財富配置就得，睇翻自己年齡情況，是否適合說基金的風險度。

另外，你可以睇翻隻基金表現和目標，去做決定。

例如投資的資產類別、投資策略、風險程度、市場、費用成本、以及過往的表現。

你可以睇佢過往5-10年，如果回報係比主要投資市場高，有機會值得繼續放在公積金戶口投資。

------------------------------------------------

Q22119：

老師，請問你有沒有覺得最近市況有點過熱，大市市值有點偏高？

我留意到HSI的市值已高達17倍，比以前一般10-12高出不少，另外一流的公司市值升很多不在話下，但連不少質素很好的2線公司都有2-3倍的升幅，

例如中國軟件，中遠海控，這情況令我擔心市場正在開始形成泡沫。

針對這種情況，我繼續保留質素很好的公司，但我應該把手上投資組合中質素一般的股票賣出，換成現金還是換成較好質素的股票比較好？

現在我有1百萬股票，1百萬現金，我希望5年後能夠增值成1千萬，跟隨老師你的步伐，請問我怎樣做才可以達成目標。感謝你的時間和思考，如果上面寫得不夠清楚，請見諒。

另外一提，在我只有十萬時看百萬富豪，給予我希望及目標，最終我得到百萬，果然意念成就事實。

現在，我正在看千萬富豪這本書，給予我新的目標，而且我已經不會再覺得是希望，而是信念，必定能做到的信念。

感謝你，這些都是因為老師影響到我。

我現在是創業，會計師樓老闆之一，算是正在做創富類的工作吧。

我想變得更好。

龔成老師︰

先恭喜你，達成首個理財目標，成為百萬富翁。

由於近期恆指加入不少新成份股，令到PE合理區，都作出相應調整。你預13倍左右，算係合理區底部。

中國軟件國際(0354)和中遠海控（1919）係貴，但整體大市依然算係合理區，暫時唔見有好明顯泡沫。

你持有優質的股票，應長線持有。但較一般的股票，若持有比重較多，可以考慮換碼至其他優質股

其實，我地投資股票，就等同投資一間企業。係要時間，比佢慢慢成長。一般希望做到架合理回報，係每年增長10-15%。

你現時這個目標，用5年將財富由200萬，增值至1000萬，用股票投資去做，風險會好大，較難達到。

其實，正如《80後千萬富翁》書中所講，要致富其實有5條路，投資只係其中之一。

而生意，都係其中一個出路。一盤生意打理得好，回報係可以遠超投資優質股，所以你想達至你的1000萬目標，可以先從自己盤生意著手。

若再用空閒資金，才用來投資優質股和物業，令財富組合更平衡，咁就可以。

如果你這筆100萬資金，係已經諗住預留去投資優質股。你可以先儲起，因為現時大市只在合理區，你可以等有明顯回調時，才用來慢慢分注入貨。

------------------------------------------------

Q22120：

老師，不知不覺就過左2年多没有message你, 其間我有睇你書及留意你facebook

亦成為我這幾年的鼓勵，現在有些問題想請教你意見, 我同男友想在明年初結婚, 我們都打算未來幾年內移民, 我們打算未來1-2年生BB,

我男友想買樓, 他會用大部份積蓄, 但我反而叫他租樓住, 因為咁様，cash flow會較多, 而且怕幾年後樓價會跌, 放樓也不容易, 一買一賣涉及很多費用, 又要用錢装修

我們這個情況, 你會有甚麼建議? 贊成我男友買樓嗎？還是盡量租樓, 留多d cash係手?

因政局常變, 而買樓有3年禁售期, 因為我才建議男友租樓, 但他不喜歡租, 只想買, 你意見如何? 這刻可怎樣為將來同移民打算?

龔成老師︰

過幾年樓市升跌，無人知。從自住角度，若你係有實際生活需要，而有"供得起"，置業都係可以。因為除了優質股，物業都係一種資產，都係可以幫到你累積財富。

較理想的情況，就係在置業同時，可以留有一定優質股係手，保持增值。令成個財富組合，唔會過於遍重物業，因而造成過度集中性風險。

但其實，你距離移民只有幾年時間,如果移民時，你可能不會保留任何香港資產，我就建議你地租屋會較好。

加上一買一賣的成本高，同時無人知樓市到時是高是低。

因為本身樓市有一定波動性，加上装修和買賣成本都高，還有額外印花稅等問題。為幾年生活，而去置業，未必真係值得。

你反而用移民前的幾年時間，將資金投資一些優質股，去幫你移民前做些增值，相信會較好。

而你男友想買樓，我估有機會係從投資角度出發。但其實現時樓市算略貴，整體租金回報率不高。投資值博率計，會係股市會較高。若他真的有從投資角度考慮，你可以提一提他這一點。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q20701-Q20720）

Q20701：

老師你好，我係你學生，正研究福來特玻璃 6865 有看佢年報 其他內地大行報告及分柝
光伏行業分拆

基於十四五規劃及全球都在推行潔淨能源 所以睇好佢嘅主力光伏玻璃生產 及公司管理層亦投放開發及增加生產線
提高產能從而站穩龙頭地位

EPS 2015/16/17/15/19/20
0.31/0.34/0.24/0.23/0.37/0.99

基於2020 有53%增長
所以覺得2015-19eps數據太低 所以用2020 epa 0.99
按20% 增長 去推算2021/22 eps
2021e /22e eps
1.19 / 1.43

按2021e eps 1.19
PE 15 / 20 / 25 / 30
估值 17.85/23.8/29.75/35.70

所以响22.80 小注兩手

請老師 比些評估 最紧要喺方向正確

若正確
合理估值 17.85 會否太保守

龔成老師：

首先，福萊特玻璃（6865）這股有質素。佢的確會受惠十四五規劃，以及全球正對整個行業的發展大方向，因此長遠正面。

佢主要在中國生產及銷售光伏玻璃，此外，亦生產及銷售浮法玻璃、家居玻璃及工程玻璃，並向中國大陸、日本、新加坡、韓國、台灣、德國及美國等地客戶，銷售產品。

睇翻佢的資料，佢的光伏玻璃產品主要用於生產晶體硅光伏電池，以及用作薄膜光伏電池的蓋板，而佢的生產設施位於浙江省嘉興市。

無論生意與盈利都增長理想，財務數據正面，這股值得長線投資。

唯一擔心的就是估值問題，始終現價唔算平，近期股價有時在合理區頂，有時略貴。如果投資，可以小注慢慢分注，不建議這刻大注。

你都見佢過往股價都幾波動，主要是市場對這個行業之前都有炒作，即是說，這股及行業，有質素，但市場有時都會過度樂觀，因此我地在投資上，唔會太過進取，而買入後當然有長線投資價值。

至於你上述的估值，方向基本正確，但要留意，唔需要太著重一年的盈利增長，而要分析長期情況，同時，不要將財務數據公式化，你要考慮佢過往的經營環境，為甚麼會產生這個生意與盈利數字，而將來的經營環境又會怎樣，從而推算會產生怎樣的盈利數字，然後作出估值。

以這企業來說，推算有代表性的每股盈利為$1-$1.2，會較為合理，當然要睇佢業務發展而睇下要唔要調整。至於市盈率，你預15-20倍都可以。

因此，你在$22.80小注，可以的，這都算是合理區的中上至頂位。

而你計出的合理估值 17.85，其實又唔算太過保守，我都會視為合理區的範圍內。而你先在上面價位小注，之後等跌先正式買，投資策略正確。

------------------------------------------------

Q20702：

Hello! 龔sir, 你好！我只係近期先認真了解你個FB. 見到入面嘅同學仔，個個都好崇拜你。

所以，好奇問我親友（投資開），問佢識唔識你呀？佢話識呀！教人儲錢投資，幾好架，值得睇。

因為自己理財不善，而且要債務重組（3年後才新），所以，一直都唔敢諗去投資哩樣嘢。

小朋友初小，投資親友提著我記得教好小朋友理財，心諗真失禮，自己其身不正，一直都冇面對。皆因覺得自己現在都好吃力，所以對有剩多餘錢去投資都好遙遠。但我見倒唔少同學都有損手爛腳，重新出發。

我都期待哩日，所以，哩家入嚟做吓功課先。我想問吓新手入門係咪可以睇吓本勝經先？

我要想吸吓你d 正能量，謝謝你。

龔成老師：

理財要一步步，不要急。

先做好儲蓄，收入與支出平衡，了解自己的財政情況。

有了儲蓄後，就可以投資。

我地最重要是建立一個長期的「財富組合」，要優質，要平衡，要適合你的年齡與風險承受程度。

投資不是炒賣，是一個配置的過程。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

至於教小朋友，要教佢地量入為出，錢從何來，錢不是銀行出來就有，而是要工作去換取的，要教佢地善用資源，有儲蓄的習慣。

你可首先睇：

《80後百萬富翁》
《股票勝經》
《財務自由行》

之後再睇其他。

------------------------------------------------

Q20703：

我仲係初級.究竟咩係小注?
3067
大概$15入700
$19 入300
入得正確嗎？

市跌.再入?幾多為小注?價位?
2845
2826
兩隻可否入嗎?
希望再有你教導

龔成老師：

小注無絕對的數目，簡單來說，就是佔你組合比例不多，例如5%，3%或更少，又或者，就算這筆資金蝕了，也不影響你的核心組合。

3067，你可以每隔一段時間買入少少，又或者，你每跌10%加一注。價位低可買入多D。

2845
2826

兩隻都有質素的，但現價都貴，你都可以用分注策略進行。

這些ETF，最好的方法就是每月供。例如每2、3個月買入一手，都是一個策略。

------------------------------------------------

Q20704：

阿ＳＩＲ你好，聽你話我日日都睇財經新聞，學股票，睇公司發展，現在月供盈富，手持兩手阿里爸爸(223 & 261入)，另外兩手小米(28.5入)，會繼續長揸，當儲錢，好過洗左。

因為有用bibi呢個網站，近來見佢新聞說來緊會來香港上市，會唔會變左0700 or 螞蟻2.0 ???? 我想少注入試下，你覺得呢？謝謝你

龔成老師：

記住，你除左睇新聞，最重要是「睇企業」，你要睇企業年報，這是最重要的。

你現時持有的，都有質素，可長線，方向正確。

至於bibi，未有正式上市資料，但相信有價值的，不過平貴與值博率，就要到時先知。

------------------------------------------------

Q20705：

想請教，如果算高位入左 但又係潛力股 跌左20％都唔唔理止蝕位？

龔成老師：

要睇企業質素有無改變，如果核心因素無變可以持有。最重要是分析點解跌2成，是之前升得多高位回翻，還是企業有核心問題出現左？

------------------------------------------------

Q20706：

老師你好！我買咗五年股票但直至今日整體都係洩緊錢，我用咗一半儲蓄買股票，剩下一半唔想再買股票了，想分散投資做下加盟店，你覺得點？

龔成老師：

第一，股票建議你多學習，我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

如果不懂選股，就投資盈富（2800）。

另外就是加盟店，建議你多了解該加盟店，例如品牌、營運模式、發展、條款等。

加盟店有好有壞的，我地無得統一分析話好定唔好，你之前一定要多了解，最好找一些大型，過往有穩定經營歷史的，不過就要留意加盟條款，有那些對你不利的地方。

------------------------------------------------

Q20707：

龔老師您好，就黎40歲，月入22000，工作都算穩定，無經濟負擔，現時月供緊有兩份退休plan，每月total 4400，仲有8年完。

月供緊盈富 3000，領展3000。
現時持有:
阿里巴巴 200股
吉利汽車 1000 股
中國中鐵 2000股 (4.43入)
領展 244股
盈富 312股

暫時流動資金有大概5萬，自己有諗過應唔應該將 中鐵 放晒佢，轉呢筆錢分段去投放落 3067，之後keep住每兩個月就入一次 慢慢一路長儲貨。

如果咁行，係咪再應該儲多少少現金先唔好急，到時9988 或175 現價回多一至兩成，就一手一手入呢？定應該都係 二選一 去繼續月供，儲錢備戰呢？呢度kick住左諗唔通～

希望老師你俾下意見我。

開始睇緊你既書日日睇你post再睇留言，獲益良多，尤其係心態方面。我叫自己千其唔好貪眼光要望遠啲亦唔駛驚，總之持續進行，誓死唔短炒！

個市跌番我反而興奮因為都想趁底吸納下 哈哈哈。好想上你堂但我份工暫時好難就到時間，所以就買書睇住先。另外龔sir你可以俾多一次網上課堂條link俾我嗎？

總之超級無敵多謝老師，感恩無意中遇到你呢位良師！

龔成老師：

現時你持有的，基本上都有質素的，可以持有。

中國中鐵（0390），本質算是不過不失，但近年略有轉弱。

預佢的增長力在之後，都唔算好強。睇翻佢的業務同財務數據，生意同盈利都處於穩定狀態，但增長力唔算強。

所以長線睇，算有有投資價值，但增長只是平穩。佢過往股價曾在2015年大升大跌，這只是炒一帶一路，但之後回復原狀，因為這因素只能為佢帶來平穩增長，而不是高速增長。之後同樣只是上上落落，近年股價再次轉弱。

這類股又唔值得佔組合比例太多。

如果你想提高組合增長力，的確可以將這股轉其他。

你每2個月入一次3067，可以。

至於阿里（9988）、吉利（0175），你都可以分注慢慢買入，見每次跌1成就加少少，如現金不足就唔好加住。總之，你要控制現金的比例唔能夠太少。建立一個平衡組合就得。

我最近同天窗出版社，合作開辦左一個網上課程，題目是關於「資產配置」的，即是講述各種資產與投資工具的特性、投資價值、在財富組合中的角色，至於股票內容就唔算多。你有興趣可睇睇：

http://bit.ly/3pP252j

課程按「人生階段」、「財富累積」、「資產特徵」設計，更有給年輕人、已婚人士、退休人士的精明理財建議。

完成課程後，你會學到：

✓財富系統概念，不再被炒差價的框框束縛；
✓股票、基金、債券、的士牌等資產的運用和買賣技巧；
✓懂得分辨資產質素和平貴，在最合適的時機買賣；
✓如何以最低的價錢，買到最具升值潛力的物業
✓致富3部曲，如何從當下這刻開始啟動！

至於股票班，由於內容太重要，只有實體班，唔會開網上課程。

因為之前實體股票班試過比人偷拍，之後放左上網賣，最後要搞到報海關先處理到，好煩。所以，網上類的教學，都好擔心有偷拍問題，風險太高，因為好多課堂內容，都唔想太公開，只想自己學生知，所以暫時都唔會搞。

------------------------------------------------

Q20708：

老師，最近大市板塊輪動，我想入一些銀行或保險股長線增長及收息用，請問2338，1336和2328你有咩睇法？2328最近仍在低位，係咩原因？

還有1382息口亦非常吸引，作為上游物料股吸引嗎？謝謝！

龔成老師：

濰柴動力（2338）主要從事生產及銷售柴油機、相關零部件、汽車及其他主要汽車零部件、非主要汽車零部件、進出口和叉車及倉庫技術服務。

其實業務不差，有自己的獨特性，以及過往的增長力不差，生意與盈利都有所增長。你預現價合理區中上部至頂位，未算貴，如果控制注碼，都有長線投資價值。

新華保險（1336），不過不失。

佢於中國從事人壽保險及資產管理業務。集團之個人壽險產品包括傳統型壽險、分紅型壽險、萬能壽險、投資連結型保險、健康險及意外險。團體保險包括人壽保險、健康險和意外險。

規模唔算好大，發展力都有，但未算強，要主要是見唔到佢好有獨特性，無太大自身的優勢，但整體又唔算差。生意都有穩定的增長。

整體的質素算是中等，投資價值都有，但這股又未算好吸引，現價合理，要留意股價較為波動。

中國財險（2328）主要於國內為各界客戶提供多種財險產品，包括機動車輛保險、企業財產保險和家庭財產保險。

過往的生意與盈利都不差，不過就無乜增長動力，質素算是中等。這股都可長線，不過就重收息，唔好對股價有太大期望。

互太紡織（1382）這股不差的。佢主要從事紡織產品之製造及貿易。

佢與主要品牌擁有人如Ｃａｌｖｉｎ　Ｋｌｅｉｎ、Ｌｉｚ　Ｃｌａｉｂｏｒｎｅ、Ｍａｉｄｅｎｆｏｒｍ
、馬莎、黛安芬、ＵＮＩＱＬＯ、ＶＦ　Ｉｎｔｉｍａｔｅｓ及Ｖｉｃｔｏｒｉａ’ｓ　Ｓｅｃｒｅｔ。

以及中國著名品牌如安踏體育與愛慕已建立了緊密而長期的關係，令集團能夠獲得穩定之購買訂單。

佢成品包括超過５０００款設計及規格，並暢銷世界各地，出品布料廣泛應用於各類紡織品，而成衣包括男裝、女裝、童裝、運動服、泳衣及內衣。

業務穩定，但增長力不高。這股可以作為收息股，但就唔好對股價有太大期望。現價合理。

------------------------------------------------

Q20709：

龔成老師，本人42歲，月入3萬幾蚊，自己對股票投資唔夠快，所以成日都後知後覺，有時仲輸錢。早前都有向你請教過，亦都聽你意見開始做月供股票2800，每月供5000蚊。希望可以有財富增值，退休無優。

現手持股票：

3067，平均價19. 1，有400股。
1398，平均價5.6，28000股，是想收息的，但價位就蝕緊錢。

2822，平均價16.1，有1400股
1810，平均價22.2，有2400股
9988，平均價258，有200股

1. 想問以上股票可以長線持有嗎？

2. 另外再想股多一隻股票，請問邊隻好呢？

3. 之前見你有講過3110，這個可以月供嗎？

謝謝龔成老師指教

龔成老師：

月供股票對不少人來說，都是一個好的投資策略，長期進行就得。

1）可以，這些都是有質素的，工行（1398）這類收息股，你不用持有太多，因為你42歲，財富仍有增長力。原有貨，持有。但之後不用加太多收息股。

基本上，長線持有就得。

2）你可以加入平穩增長的股，如港鐵（0066），如果港交所（0388）回更多都可考慮。

3）這是收息組合，對你未必最適合（除非你本身是較保守的一類人），否則，你將資金加大供盈富（2800）更好。

------------------------------------------------

Q20710：

想請問老師如果月供了2800之後
收成期應設為何時？

龔成老師：

其實可以長線去進行月供，你不用太急收成。除非你自己有資金需要，或者就退休要轉為更低風險的類別。

其實原理是不斷儲錢，只是並非儲現金，而是儲股票，只要盈富（2800）有增長力，就可以長期進行。

------------------------------------------------

Q20711：

龔SIR，我想幫小朋友買一些可收息既股票 , 請問好嗎?如果買的話買邊一隻會好一點....
謝謝你

龔成老師：

你可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

另外，你都可以加入有基本增長的股票，例如盈富（2800），長遠就有基本增長力。

------------------------------------------------

Q20712：

老師你好，請問為何信義光能與信義玻璃的差距越來越大？

現在入信義玻璃是合理價嗎？
感激！

有冇潛力成為下一隻陪升股？
我見老師在書中介紹過

龔成老師：

你不能單睇股價數字，如果以市盈率來說，信義光能（0968）比信義玻璃（0868）高的。

只是之前968升得好多，所以近期回落時，968回落較多。968潛力較大，但炒作多，所以上落較大，而868較穩健，業務較實在。

其實868在幾年前出的《50股》書已有推介，現時已上升左幾倍，相信之後仍能增長，但倍升的時間未必太快。

其實兩隻都有質素的，968潛力度較高但風險較大，而868則較穩健。

------------------------------------------------

Q20713：

龔成老師，我有個問題思考咗好耐都諗唔通，所以想冒昧請教一下你。

如果我大部分資產都轉換成股票，將來樓價下跌時，而股票市場價格亦有可能下跌

如果想要手上股票套現來買樓咪會變成虧蝕？還是我有地方未有考慮周到呢？

龔成老師：

兩個資產不一定同步的，所以「將來樓價下跌時，而股票市場價格亦有可能下跌」，這不一定出現。

你要思考，那一項資產能有較大的長期增值，同時，你本身的配置如果。

如果你的目的是買樓，你可以先利用股票來增值，然後，到你想買樓前的一年，就要開始賣出股票，因為無人知買樓的一刻股市升還是跌。

另外，你唔好以「預期樓價一定跌」的心態買樓，樓價升跌無人知的，只要你資金足夠，同時樓價合理，已可以買入，永遠等跌先入未必一定出現的。

------------------------------------------------

Q20714：

請問阿里，美團定港交所有較強增長力。還是有其他推介。謝謝耐心解答

龔成老師：

美團點評（3690）最有潛力，但都是3隻裡最高風險的。

佢之前出左業績，見到開始有正現金流，這是一個實質的利好因素，因為之前一直在燒銀紙，現時初步見到成效，市場對佢重新估值。

當然，現時仍有不確定性，估值唔易。

只可以話，潛力是有的，現價唔算平，但不是完全無投資價值，不過，一定不能大注。等回少少先開始小注，是較好的做法。

如果要有潛力又想穩陣D，可考慮安碩恒生科技（3067），有長線投資價值。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂至略貴，因此，這刻不能大注投資。最好的策略，就是月供，或自行分注小注慢慢收貨（例如每月買一次、或2個月買一次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

------------------------------------------------

Q20715：

龔sir 您好，我係你的讀者，經常閱讀你FB的資訊以及書籍。

先介紹我自己，我今年29歲，從事工程，屬兼職，平均每月15K，手上可動用資金不多，大概2萬左右。

現時手上持有幾隻股票，我想問下來緊我可以如何安排或者改善會更好，感謝龔sir。

00175(吉利)16.5×1000&30.7x1000
700(騰訊) 465×100
823(領展) 100×69
1177(中生) 1000×7.5

1448(福壽園) 1000×7.2
2899(紫金) 4000×4.5
9633(農夫) 200×34.8

龔成老師：

現時你持有的股票，基本上都有質素的，你可以持有，唔需要太理會中短期股價波動。

保持長線就得。

現時你現金有$2萬，建議全部持有現金，暫時不要動用。

反而現時的重點，是你要提高收入，以及每月儲蓄金額。你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你29歲，事業可以更進一步，要想一些長遠增加收入的方法。同時，要每月有資金剩，等你可以在年輕時把握投資增值。

起碼要做到每月剩$5000，然後投資或月供股票，你上述的選股方向正確，你可以考慮這些，但如果想更平衡就加入2800、3067。

------------------------------------------------

Q20716：

龔成老師你好，我今年29歲，在澳門，月供股票不划算，經朋友介紹下接觸你的專頁並於今年1月開始學習投資。現持貨一手手入如下

潛力股
1177 @ 10000 $7.2
178 @ 20000 $1.86
3067 @ 4000 $19.8

平穩增長股
823 @ 500 $69
2318 @ 500 $ 91
27 @ 1000 $69.7

想知道現時配置合適？應繼續集中買入舊經濟股？餘下流動資金30餘萬。謝謝

龔成老師：

我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

現時的持股，可以。

你29歲這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。

$30萬，暫時可動用$10萬-$15萬。

平穩增長股：潛力股
7：3
（如果你投資實力較強，可增加潛力股比例）

------------------------------------------------

Q20717：

龔成老師你好，我一直有拜讀你在經濟一週的文章，有問題想請老師幫忙解答，謝謝

我今年33歲，已結婚，先生與我同齡，有一名3歲女兒，收入大概是$17000，先生收入都係一樣。

早兩年買左樓，40年樓齡的細兩房單位自住，儲蓄和先生一共有$70萬元左右，唔識投資股票，都係現金係晒銀行的高息戶口，每月約有$700利息收入。

另外有一份儲蓄保險已供滿可拎22萬，唔拎都可以繼續滾存利息。另外仲有一份供緊既儲蓄保險，餘10年期，到期可拎20萬左右。

負債方面，仲有$268萬樓按，自住樓大約值$380-400萬。支出方面，供樓是H按，暫時每月是$10000，家中有請工人姐姐，每月大約是$4700，先生一般支出是$3000，自己大約是$2000，家庭開支是$4000，另外保險各樣加起大來大約$3500，每月大約有$6-7000可儲蓄。

本人與先生都有同一想法，多買一層樓收租，已致退休後可每月有糧出，達到財務更自由。

問題1:
請問老師我們應否先將現有70萬還比銀行減低負債，再慢慢儲返一筆錢再置業？

問題2:
請問老師，如果我唔將錢放係銀行，有什麼低風險的投資是適合本人呢類完全唔識投資的人？因為就算放在銀行高息戶口大約都是年利率1.2-1.4%左右，會不會有更好的投資方式以獲取更佳的回報？

龔成老師：

1）以現時的收入及現金情況，暫時唔建議太急買第2層樓。

你可以視這個為方向，但就唔好太急去行這一步，因為比較進取。等日後有足夠的資金先進行。

至於銀行的$70萬，其實唔需要太急還錢，因為現時利息低，至於還錢，不如將錢投資，只要能爭取到比按揭更高的回報，策略就成功。

2）以你地的年齡，其實可投資平穩增長股，不過如果你地擔心有收息，就投資收息股，風險會低D（當然，投資，就點都會有風險）。

你可以用$30萬，建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。投資時要分注。

同時，增加股票知識，之後先再動用餘下的資金。

你這刻要盡力儲蓄、投資，到滾存至一定資金，到時先考慮投資第2層物業。

------------------------------------------------

Q20718：

老師我買左選股聖經同50隻優質股嘅書嚟睇，啱啱開始買股票！

但有個位唔明白，例如我買咗1772 $116平均價有2600股，如果我等佢上升到$125，賣出2400股，收返成本，餘下200股嘅成本價，計算方法係咪

總成本價301600-總賣出價300000=1600除剩下股數200股⋯平均價=8？

定係325000-300000=25000/200

平均價=125？

因為我女朋友話係第二個方法先啱⋯⋯但佢又好似有道理。求教

龔成老師：

其實，我地應該分開計。

你在$116買入2600股，賣出2400股，即是這2400已經是賺左錢。

餘下的200股，買入成本價都是$116。

當然，有些人會學你地咁，計總數，但這其實只是一個心理上的調整。

投資總成本=$301600，取回$300000，即是你用了的投資淨金額為$1600，而你擁有的淨股數為200股，所以，每月成本$8（這是由於賺左部分大幅低了成本價）。

------------------------------------------------

Q20719：

Hello Kung Sir,

在下年50，近日拜讀亞Sir你多本著作，又和你一位學生交流後，她建議我直接向你提問有關本人的投資問題：

1. 月供股票組合，現在正月供$20,000 （$2,000的有 2，11，16，66，2318，2823 及 6823；$1,000 的有 1299 和 2388；$3,000 的有 823）。

我原本是想散投資不同種類的股票，但加下加下，好似有點混亂！現在計劃月供加到30,000一個月，請給予一點意見，應該如何調整？

2. 我現在手上有點股票（約1M)，其中有兩隻嚴重蟹貨（2888，900股，平均$160入；87001，26000股，平均人仔$4.15 入），請問有咩好辦法鬆綁/止蝕？

希望早日得到你嘅回覆，唔該晒！

龔成老師：

1）你現時月供的，都是有質素的，唔算亂，如果想平衡組合，建議之後加入盈富（2800）。

你可以供盈富（2800）$14000，港鐵（0066）、領展（0823）、中銀（2388）、友邦（1299）各$4000。長期進行就得。

2）渣打（2888）你預佢增長力唔會太強，你最好等過多2年，經濟好翻D，銀行經營環境好翻D，賣出一半轉其他，就算轉收息基金（3310）都得。

至於匯賢產業信託（87001）雖然是房託，但這房託比其他房託有點特別。

匯賢現時主要資產：包括於2011年收購的北京東方廣場之零售、寫字樓及服務式公寓業務；以及兩家酒店（北京東方君悅大酒店及瀋陽麗都索菲特酒店）。

加外有新增投資，於2015年才收購的重慶大都會東方廣場。

但要留意，根據北京市人民政府於2006年6月26日發出的國有土地使用證（京市東港澳臺國用（2006出）第10128號），該發展項目總土地面積為7萬7千平方米的土地使用權已授予北京東方廣場公司作綜合用途，到期日為2049年4月21日。

從整體及本質上，這房託是不錯的，適合長線投資。雖然有上述所講的潛在風險，但高股息率，可說能抵償當中風險，同時反映部分物業有「到期」因素。

簡單來說，就是佢的股價，會慢慢長期向下，因為有些資產會到期。不過，如果佢餘下的資產在這段時間增值，咁股價就不會向下。

這股你可以守多2、3年，睇下發展係點，到時都要減翻D貨。

------------------------------------------------

Q20720：

老師你好，請問2021年值得入手的有哪一些板塊？等我研究下邊個板塊的龍頭。

另外，可否入手銀行股？近期升左好多了，中銀香港，恒生銀行，渣打銀行邊隻好？現價是否合理？要等回落嗎？感謝

龔成老師：

傳統經濟、地產、零售都可以留意翻。

當然，有些新經濟、醫藥仍是有潛力，但就要等股價再跌一定數先。

銀行股相信已過了最差時期，中銀香港（2388）會較好，你可以考慮。現價合理，平穩增長類。渣打（2888）唔建議。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q13261-Q13280）

Q13261：

成哥你教得好好，我明白好多之前唔明的野，我而家想請教下：

1. 你中提到如果幾年來毛利率下降，只有兩個原因，其中原因是減價促銷，可否用以下數學公式的分子和分母增減去解釋毛利率為何下降？

毛利率＝(收入—直接成本)÷收入

2. 這直接成本是否只包括已賣出貨品的成本？

3. 你怎樣分辨毛利率下降是因減價促銷或貨品成本上升所致？

龔成老師：

1）你這條公式，正正是毛利率的公式，當直接成本增加時，毛利率就會下跌。又或當直接成本增加時，而銷售價格無法作出相應的增加，都會令到毛利率下跌，反映企業的賺錢能力正在減少。

2）每個行業的直接成本，定義都有所不同，但都是指最直接的成本部分。最簡單的理解就是零售業，貨物的來貨成本就是直接成本。

3）要分析當時的大環境，有無加價的情況，當時經營環境如何，對手是否處於減價的情況。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13262：

老師，我在10年前買了XX的月供基金，每月供2千，之前因agent建議，轉過兩三次投資組合，所以10年後，無升到。

依家仲蝕緊幾千蚊，依家最新的投資組合是7成供中國基金，3成系Healthcare基金。

由於供左10年，就算surrender都唔洗罰錢，戶口現時有197K左右。想請問我是否應該繼續供落去。我其實還有一份儲蓄保險，每月供$2000, 但要到56歳先可以攞番D錢。

我會參考老師的的建議，下個月開始月供股票，打算$3000 (2800) 及 $2000 (1211)。其實已經41歲，應唔應該供1211定系選港鐵或其他股呢？
謝謝老師﹗

龔成老師︰

保險公司的基金，有好有壞，我好難評論，但當中的潛在費用，往往不少，反而簡單的投資在指數基金，例如盈富基金(2800)，長期回報往往更多，而且管理費好少(0.1%左右)。

你再了解下，你所投資的基金，當中的投資策略，以及投資在甚麼類別的項目中，分析是否有長線投資價值，然後才決定是否停供。

至於儲蓄保險不要動了，每人都有基本保障需要，只要唔係過多就無問題。

以你年紀，尚有增長力，所以你月供安排無問題。但如果你將來想加大供款，建議集中番係平穏增長股，如盈富（2800）、金沙（1928）、港鐵（0066）、中銀（2388）、恆基（0012）會較好。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13263：

百威亞大應該增有 我現時有60手 27.7 買
還是走？

這股是否優質？及有前景？
因我看他是啤酒界的一哥

龔成老師︰

百威亞大（1876）主要於亞太地區從事啤酒釀造及經銷，集團擁有知名啤酒品牌包括百威、時代、福佳等等，未來會主力在亞洲市場發展。此股有品牌和規模，有長遠投資價值。

但你有留意我fb，都會見我經常講唔會太推薦人買IPO。因為業務上，集團就算有吸引力，但新股半新股真實面要慢慢先見到，加上佢估值困難。

簡單來說，這股質素是有的，但估值方面較難，股價因此會波動，因此佔比方面要注意。

所以，此刻只建議持有小注，同時你要明白當中的風險。如果60手佔你總資金比例不輕，你最好賣出部份。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13264：

你好龔成老師，我有廿十萬股票分別是
1398，5000股，買入價6.64
0005，400股，買入價68
0388，200股，買入價296
0788，8000股，買入價2.14
0700，100股，買入價460
0966，1000股，買入價21.1
1368，5000股，買入價4.69

現多突然多了一筆資金大約三十萬，以及有大約三十五両實體黃金在保險箱，我應該怎樣去增加自己既財富？請指教
謝謝

龔成老師︰

你現時持有股票都有質素，但問題是各類別的股票都有。平穏增值股︰388、700、788、966、1368 / 收息類︰5、1398。

我地投資增值係會運用「先增值，後現金流」作方法，初期應投資較多增值類資產，較後期則應投資較多保守類項目。所以係放配投資項目時，會因應番你的人生階段。如果你年青，可以"平穏增長股"+"潛力股"，但你已近退休之年，就應集中在"收息股"去創造平穏現金流。

你新增的30萬可以因應你現時年紀，投資以下股票，同時對你現有組合作出調整︰

平穏增值股︰盈富（2800）、港鐵（0066）、金沙（1928）、恆基（0012）、中銀香港（2388）、長建（1038）、粵海（0270）
潛力股︰比亞迪（1211）、中生（1177）或福壽園（1448）
收息股︰港燈（2638）、深高速（0548）、香港電訊（6823）、工行（1398）、匯豐（0005）、置富（0778）、陽光（0435）

至於黃金是貴金屬，有「終極貨幣」之稱，是人類自古以來的貨幣，因此，有持有價值，而現時我地的現金，一定長期貶值，所以黃金長期會向上。

不過，黃金沒有現金流，持有無法創造出經濟價值，因此，黃金不會成為我地財富組合中，佔比太多的部分（約3%）。所以，你可以將部份黃金變現，再去投資股票，長遠效果會更好。

由於現時大市只在合理區，你資金可以先投入一半。餘下一半待大市出現一定程度的下跌，才大力度掃貨，然後長線持有。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13265：

成哥你好！我2017年尾開始投資股票，由於冇系統性學習過股票知識，亦冇睇過任何股票書，而且當時股巿又處於熱炒時期，我自己抱住人買我唔買會虧嘅心態去踏入股巿。

經過呢兩年嘅學習，尤其買咗你大部分嘅作品後，令我覺得投資嘅收成要用時間、耐心去見證。

我有個問題，當時我用均價23蚊買咗6800股美高梅，以現價嚟講我已經輸咗一半有多，如果當初買美高梅之前睇咗你嘅作品，起碼我選擇咗金沙、銀河，就算跌咗都冇現在咁慌張，因為仲有息收、重要嘅係企業仲有成長。

我現在想將6800股以現價來計嘅美高梅轉成另一隻股，最想轉嘅係《50隻優質潛力股》介紹嘅 楓葉教育 或者 轉成 特步國際 ，你認為合適嗎？

另外，我仲持有 正榮地產，均價5.7買嘅，呢隻可守等佢升定換馬好呢？

感謝你！

龔成老師︰

美高梅中國（2282）有質素的，只不過你在2017年大升市時買入，個價比較貴。但唔洗太擔心，我地唔應該因為股價下跌而止蝕，只會因為企業優質度改變而止蝕。賭業中短期不利，但長期仍處於賺錢的狀態，因此唔需要擔心，有得守的。

只是你買入價貴左，可能要長少少時間。相信行業中短期會弱，股價會較為不利，但不要理會，長遠會慢慢好轉的。

正榮地產（6158）主要在中國從事房地產開發、物業租賃及物業管理業務。此股質素算中等，經營現金流長期負數，加上負債比較嚴重。如果佔組合唔多可以持有，但長遠轉至優質股較好。

楓葉教育（1317）本質不錯的，長遠仍是正面的。這股有長線投資的價值，但由於股價較為波動，最好分注投資。

因為佢過往增長快，但在政策風險下，最影響的不是現時的業績，而是之後的發展，令增長力減慢。但如果以一間平穩增長的企業來計，現價已是合理價，因此現時可以理解為合理區中下部。

特步國際（1368）主要從事鞋履、服裝及配飾等體育用品的設計、開發、製造、銷售、市場推廣及品牌管理。

集團獨家總代理商經營的全國超過6,200家零售店組成的龐大分銷網絡，其覆蓋全國31個省份、自治區及直轄市，集團在海外亦設有一些銷售點。

此股有質素，作為內地知名體育品牌，無論在品牌和規模都有一定優勢。但由於環球政局不穏、內地經濟放緩等負面因素，預期零售相關行業收入會進一步轉差，特步也不會例外。此股有長遠投資價值，只要佔組合比重不太高就無問題。

如果你覺得美高梅佔比太重，想轉到其他類別股份，楓葉教育或特步國際都是可行的選擇。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13266：

老師，請問醫藥股值得月供嗎？如果中生和石藥邊隻長線較好？

龔成老師：

唔少優質的醫藥股，都值得月供，長期不斷儲貨的。

人口老化令佢長遠有唔錯的增長，無論是政府投入的行業資源，又或是人民生活質素令可控制資金上升，都令人們更在醫療方面投入更多多。

例如中生製藥（1177），長遠仍有一定的發展，佢已建立一套完整的商業系統，有多個已賺錢的藥品類別，同時毛利高，可以不斷將錢投資在新藥裡，這模式運作很好。

但這類藥物企業，難免有一點風險，因此要久不久檢視，中短問題不用理會，但如果有一些核心性的問題，就要再全面分析。

佢商業模式理想，高回報，不斷再投資令股東利益快速增長。加上睇翻佢的業績，保持增長，這令企業價值有實際的上升，令股價得以支持。

雖然現價就有少少貴，月供是很好的投資方法。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13267：

老師你好，想問1211，在38元有貨，可以中線持有嗎？

龔成老師︰

我地持有一隻股票與否，關鍵位是企業質素、前景，不要被買入價影響，買入價只是一個心理因素。

比亞迪（1211）因為早期出左業績，雖然有增長，但較近期的數據及預期業務較弱，相信中短期仍會弱。

要留意，我地分析時，唔需要太著重中短期的數據。佢出來的數據的確有點失望，但中國車市都預左有影響。

中國車市放緩、外來競爭、行業競爭加劇，都成為不利的因素，相信中短期仍會對佢不利，這會影響整個行業。

股價由高位回落不少，現在回落至合理水平，同時反映市場預期中國車市的不利情況。相信這股中短期股價仍會不利，但長遠前景仍在的，有貨可守。但要留意，這股有風險，因此不能太大注。

車市要慢慢才好轉為這股要好長線先有野睇，所以要著重分析長遠的因素，唔好太理會中短期的情況。預期佢中短期有可能進一步弱，但所有野，都是有危有機，如果想買入後1年就有利潤，咁就買錯股了，這股從來都是長期的，預期2、3年後先有真正的爆發情況。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13268：

1. 如果想將一部分資金長線投放美股市場，應該買s&p500 定係數隻大型龍頭科技or零售的成長股較好。因為覺得s&p500 過度分散。

2. 可唔可以排序下2020，2313，669既優質度同潛力。

3. 呢3隻既未來十年前景如何。

4. 669同業多唔多競爭者，市場接唔接近飽和。

5. 2313作為代工廠護城河如何，盈利壓力同波動性有威脅嗎，代工廠係咪應該估值比低d。

6. 三隻都值得買？ 謝謝你🙏

龔成老師︰

1） 選擇數隻大型龍頭科技or零售的成長股都可以，但重點是這些係優質企業就可以。記住，我地投資其中一項好重要的，就是投資自己熟識的企業，若果對中港企業較為認識，就應較多在這裡選取適當的股票。

唔好因為近年美股的升幅不錯，多左人投資美股，就認為美股較好。

2 & 3）

創科（0669）主要從事製造與經銷電器及電子產品，有一定的優質度、有增長力，但又未到潛力股，只能視為平穩增長類，因為佢最高速發展的時期相信已過，現時已有相當的規模，相信往後只能平穩增長。

安踏體育（2020）製造及買賣安踏品牌體育用品，以及分銷國際品牌產品。集團全球化的戰略，令佢本身的生意及規模發展都不錯。

不斷增加資金去拓展業務，這必然有危有機，這點會令佢短期的派息能力較差，但如果你目標是長線就無問題。佢其中一個優點，就是在增長的同時，負債並無特別增長，這令企業的風險不算高。

申洲國際（2313）本質不錯的，近年的生意與盈利都有不錯的增長，加上佢股本回報率（ROE）處於高水平，反映佢雖然做代工方式為客戶製造針織品，但由於利用全縱向模式營運，令佢都有一定的優勢，有一定的賺錢能力。

三者都各有優勢，優質度相若，但以潛力計，則安踏和申洲會較高。

4） 雖然有競爭對手，但集團領先電池工具技術、改良市場原有工具技巧和成本跟生產效率控制得宜等因素，都令佢保持優勢。你留意番佢毛利率和純利率一直保持平穏上升。

5） 申洲國際（2313）以代工模式經營，主要客人如NIKE、ADDIDAS等都是大型品牌，理論上會降低了集團議價能力。但你睇番佢毛利率和純利率一直保持平穏上升，可見佢其盈利能力未受代工形式所影響。

6） 3隻都是優質股，可以長線持有，但現價偏貴，最多只可做月供或分注形式去小注買入。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13269：

本人27，月入21000，投資知識仲在學習中，今年1月先開始緊月供股票（月供$5.5k左右），而10月開始打算調整月供既金額

1211 $1500 （現有250股）
2800 $5000（現有845股）
0066 $2500（現有258股）

想問下以上金額分配合理嗎？

另會每月儲起$4k,現時大約有$80k, 存款，都明自己遲左好多起步，都希望35歲時可儲到150萬（年期都想愈早愈好），如果想達成目標，應點再安排？

另外呢幾個月都有不同既社會活動進行中，睇到的股價下跌緊，但我都明白買股票係買緊個間公司而唔應該只著重於股價，但點都會有的擔心

多謝你咁忙都用心解答問題，辛苦老師啦！

龔成老師︰

有心唔怕遲，現在起步也不算太慢。由27去到35歲尚有8年時間，以恆指年回報10%（連股息再投資）約有10%，以你月儲$13000計（月供9K+儲蓄4K），大約可以增值至178萬，當然要睇番到時情況，相信你達標機會很大。

你月供組合無問題，可以跟你安排。至於每月儲到的$4000，現時大市大致在合理區，你可以等大市出現一定程度的下跌，就投資在平穏增長股。

例如：盈富（2800）、金沙（1928）、恆基（0012）、中銀（2388）、港鐵（0066）、粵海（0270）、領展（823）或潛力股︰比亞迪（1211），中生（1177）或福壽園（1448）等，這樣會增長得較好。

近數月，香港社會出現不少不穏定因素，都令很多股票股價下跌。

但我地一定要了解股價下跌的原因，基本上，現時社會狀況造成股價中短期向下係好正常。只要了解翻當中的事情，無影響到企業核心就唔需要擔心太多。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13270：

龔成老師，想請教下你關於資產轉資嘅疑問。手頭上有幾百萬資產，正打算轉換貨幣做美金，但又唔肯定呢個做法是否明智之舉？ 換成美金 還是 開一個外國戶口 轉資 比較好？

另外，不知道老師有無留意近年新加坡嘅經濟發展潛力？轉資開戶的話，坡紙 同 美金 邊款較好？

我二十七歲 有一份穩定全職 最近見好多富商都逐漸有轉資風向 令我有呢方面嘅考慮 但有好多疑問出現 希望老師可以提點一下 想了解下老師的意見，謝謝

龔成老師：

如果你現時持有的是港幣，是否轉做美元，其實無所謂，因為有聯匯，你唔需要擔心港幣會出事，所以，除非你想投資一些美元類的資產，否則，唔需要刻意轉做美元。

至於坡紙同美金，最重要的，是「不要單單持有貨幣」，如果你持有的目的是單純外幣，意義不算大。因為「紙幣」只是「政府借據」，你單持有是無意義的，只會貶值，你一定要投資「外國資產」，先有作用。

因此，如果唔睇好香港經濟，應選定長遠睇好的地區，投資該地的資產，到時先轉相應的貨幣。

不過，我相信香港只是中短期問題，我仍對香港長遠發展有信心的。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13271：

老師，見大快活跌左唔少
現價可否買入？
謝謝

龔成老師︰

大快活（0052）是有質素的，我都很喜歡這股。比起其他一些潮流飲食，我會偏向選大快活。因為香港人變得好快，潮流飲食的不確定性高，業務可以很好，又可以好差。

反而最基本，民生的必需品，好似大快活咁會更有投資價值。近期由於社會不穏定和經濟不景氣影響，股價出現倒退是正常的事。

但相信這些因素只會造成中短期影響，集團長遠質素不變。加上大快活定位偏向民生，較有抗跌力。現時股價合理，有長線投資價值，但中短期依然會波動，最好分注入市。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13272：

成哥，有人將2800 同安頓A50 比較，你點睇？

如長線持有，月供股票
2800, 南方a50, 安碩a50 邊樣較好，有咩分別

龔成老師︰

盈富（2800）是追蹤在香港交易所上市50間優質上市公司的股票組合

南方A50（2822）和安碩A50（2823）追蹤在深交所和上交所上市的50隻最大市值A股，由於2隻股票追蹤目標一樣，表現雖然都會有分別，但唔會太大。

盈富（2800）所屬香港市場比較成熟，價格波動無咁大。而大陸股比較波動，但長遠增長力會較強。雖然中國比過往年代增長較慢，不過長遠仍是不差的經濟體。

如果你想要較平穏增長，可選盈富。假若你想以有較大增長，以潛力為先可以南方A50（2822）和安碩A50（2823）。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13273：

龔成老師你好，有問題想請教一下。本人看完你的著作，現在買了一手滙豐及一手恒生，因希望收息，見到中銀香港又不錯，想買一手，這組合可以嗎？

但你說過銀行股佔的比例不可超過30%，該買什麼代替中銀香港好呢？請賜教，謝謝

龔成老師︰

任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

其實你可以用番「先增值，後現金流」作方法去審視番你的組合，初期應投資較多增值類資產，較後期則應投資較多保守類項目。

所以係放配投資項目時，會因應番你的人生階段。如果你年青，可以"平穏增長股"+"潛力股"，但你已近退休之年，就應集中在"收息股"去創造平穏現金流。

你可以因應番你架年齡，去審視番你現有組合是否適合 ，同時可以在當中找中銀香港的替代股。

平穏增值股︰盈富（2800）、港鐵（0066）、金沙（1928）、恆基（0012）、中銀香港（2388）、恆生（0011-增長力稍遜於中銀香港）、長建（1038）、粵海（0270）

潛力股︰比亞迪（1211）、中生（1177）或福壽園（1448）

收息股︰港燈（2638）、深高速（0548）、香港電訊（6823）、工行（1398）、匯豐（0005）、置富（0778）、陽光（0435）

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13274：

成哥，想問下同仁堂國藥3614同 1666科技，而家兩隻邊隻值得買D？同埋我成日搞唔清香港同仁堂D鋪係屬於 1666定 3613？

龔成老師︰

同仁堂科技（1666）主要從事醫藥技術開發、技術諮詢、技術服務；製造、銷售中成藥、生物制劑。

同仁堂國藥（3613）則是同仁堂（1666）旗下企業，主要集中在生產、零售及批發中藥產品和保健品；並提供中醫診療。

故你所講的同仁堂香港店，其實都屬於這2間企業，只不過同仁堂國藥（3613）係直接管理。

由於同仁堂集團收入主要來自銷售中藥產品，故同仁堂國藥（3613）較有增長力。但要留意，這類股的行業變化較大，同時研發上，無可避免有風險。雖然同仁堂算是藥業保健股中，較穩健的一隻，但都無可避免受行業不確定性影響，因此，只要投資不太大注。

整體而言，2隻股票都有投資價值。現時同仁堂科技（1666）估值合理，而同仁堂國藥（3613）有點貴，如果買都要分注進行。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13275：

龔成老師，本人買了你的投資教學書籍, 獲益良多，在此感謝!

本人40歲單身, 剛剛5月買了一層560萬300呎40年樓齡的單橦樓係天后區自住. 因為社會不懚時勢所以樓價已下跌。不過如老師所說, 如果自住又供得起就不用太擔心. 我想用餘下的錢作以下部署作60歲退休（1300萬）, 想
老師結予一些見議:

1.投資成份保險月供$3000, 已滾存50萬 - 不變

2. 公司ORSO 月供11000, 已滾存50萬 - 不變

3. 存款 10萬 - 計劃買入盈富，恆地, 港鐵

4. 每月收入扣除開支剩1萬, 計劃每季買入以上股票 （因為工作關係所以不能月供）

龔成老師︰

你想法正確，由於你物業是自住性質，故樓價波動唔需要理，最重要係供得起。

當我地進行人生財富累積，會運用「先增值，後現金流」作方法，年青時應投資較多增值類資產，以增值為先，而較年長時則應投資較多保守類項目。

以你年紀，尚有增值能力。所以你選擇的平穏增值股：盈富（2800）、恆基（0012）、港鐵（0066）都是可以的。建議你比重放較多在盈富，可以令你組合更平衡。

而你用每季固定金額代替月供股票，這個策略都可以做到平均格價效果，所以無問題。但你每季只會儲到3萬元，不足以3隻股票各買1手，所以你可以全數買晒盈富（2800）就可以了。

現在離你60歲尚有20年，以恆指年平均回報10%計，季供$30000到時大約會有680萬，以完成你目標一半以上。

只要你ORSO和投資保險回報唔係太差，相信到時你60歲累積到的總資產和你目標唔會差太遠。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13276：

龔成老師你好，小弟今年27歲，月入7萬5左右。現在手持大約120萬現金，有份十年儲蓄（每年供1萬美元，已供兩年），扣除保險及各項開支，每個月儲到6萬~6萬5。

中短期目標想買樓自住，長期就當然係財富增值。老師，想問你點睇而家個樓市？我而家係咪應該做住財富增值（例如月供股票），再睇睇個樓市變化再決定，抑還是繼續儲多d彈藥（現金），作好短期內上車既準備？ 謝謝！

龔成老師︰

相信中短期有可能出現調整，但當中仍有未知數，而我一向不太預期中短期的，不過，我好有可能在一年內增持香港物業。至於長期，因為需求大，供應仍然不足。因此長遠仍會向上的。

香港樓現價略貴，投資價值的確較少，但自住價值仍在。現時香港樓市比合理價，貴左少少，唔算太多。如果你短期內有迫切需要買入一間屋自住，你要留意番供款，只要得起樓價變動唔需要太理會。

否則，現時以回報計股市會較吸引，對你財富增值較有效。現時大市在合理區，你可以將每月一半儲蓄（作月供）和一半現有資金（要分注入市），投資平穏增長股︰盈富（2800）、金沙（1928）、恆基（0012）、中銀（2388）、港鐵（0066）、煤氣（0003）、港交所（388）、長建（1038）。和小注潛力股︰比亞迪（1211），中生（1177）或福壽園（1448）。

餘下的資金，等大市大跌再入市，會對你財富增值效果提升。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13277：

龔成老師:想問現在香港甘乱,經濟ㄧ定會很差 ,手上的股票由盈轉虧,港鐵是否还可以長期持有?

1177現在還有盈利,是不是先賣出先?要不要止蝕?還是跌低買入?謝

龔成老師︰

首先，你要明白投資股票，就等同投資企業，我地要考慮的是企業質素和前景。基本上，就算是優質股，股價中短期上落好正常。但如果上落太大，就要了解翻當中的事情，有無一些影響企業核心的因素。

我相信香港現時的社會狀況，中短期會對股市方面會有負面影響，但受影響程度，就要睇外國真正的走資金情況，當中還有都好多變數。

不過我相信，長遠資金唔會大走，始終香港都是有優勢，有錢賺的地方就有資金來。因此，我相信中短期有影響，但又唔需要過份地擔心。

港鐵（0066）中短期的確不利，但長遠而言，香港的長遠發展必然是向著新市鎮，鐵路系統必不可少，將來社會對鐵路這個大型運輸系統的依賴必愈來愈多。

加上政府亦表示這會是發展的重點，故無論是鐵路以及相關的物業，都會保持增長，長遠計必然向好，持有無問題。

中生（1177）因中央出左d藥品降價的政策，「以藥品規格採購試點進行，據透露本次帶量採購的具體操作方法，是按藥品通用名進行遴選，企業必須要保證有足夠的生產能力，價低者得」。所以，預左對行業有影響。

不過，中生製這類咁大的企業，財力較強，就算市場出現中短期的亂局，只會淘汰左一d無質素無實力的企業，長遠對佢影響有限。但賺錢能力減少，企業無可避免去扣少少分，但依然有質素，可持有。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13278：

呀sir，宜家個個都覺得零售業受最大影響
同埋佢地股價都跌左唔小，咁係咪適合掃貨？

利福/莎莎/周大福/六福呢d股係咪要把握機會掃多d

龔成老師

你的方向正確。

我地投資，永遠是睇企業的長期業務面，中短期的事情與股價波動，不用理會。

上述的股票，長遠仍是有質素的，但中短期一定會弱，而我地投資者正是把握「中短期不利事情令股價受壓，從但長期因素無變」的機會入市。

不過，現在的股價仍未算好平，同時股價會波動，因此，未到訓身的時候，但已是合理區中下部，可以分注投資長線持有。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13279：

龔成你好! 我想請教現市的投資方向，我和先生每月9萬收入，有一BB &工人，之前3月在自住樓套了200萬出來。

現自住樓每月供款增加$6,000（負現金流$6,000）

在4月（高位，約100萬首期，8成按）買了一細價單位收租，每供$15,000，收租$12,000（負現金流$3,000，未計$800管理費）

現持股票$40萬（港鐡、煤氣、金沙、比亞廸，知識有限，只懂呢幾隻）
現金$120萬HKD

現香港情況差，又撤資又乜乜
1) 我是否需要轉持美金？
是否要開海外戶口？（保住自己既錢）

2) 我如何運用現款投資？
(例如：買REIT收息幫補負現金流，會否賺息蝕價？High yield bond fund收息如下圖有無得諗？環球吹淡風，風險高嗎？)

謝謝你的時間！

龔成老師：

1）不用轉。

香港只是面對中短期問題，長遠仍是有前景的，同時，港幣有聯匯，不用擔心。

當然，你可以在長遠建立一個環球的組合，這是任何時候都可以的。

2）你這刻物業的比例較多，宜增持翻股票的比例，以你的情況，我相信平穩增值股如盈富（2800），以及收息股都是你的選擇。

收息股不要再投資太多地產類的股票，可以考慮翻港燈（2638）、香港電訊（6823）、深高速（0548）等這類股會更加好。

至於債券基金，則有好多的，這一定要仔細睇先得，有d則有潛在的風險，絕對不是保本的產品。

第一，有些基券基金，會投資「高收益債券」，即是「垃圾債券」，你一定要睇睇佢所佔的比率。

第二，債券基金往往不是單純地持有債券，而是可以作買賣，以及利用衍生工具作對沖等策略，即是可能有價格上的波動。你要睇下該基金的策略，是否高風險。

第三，不少銀行都會提供借貸，以槓杆去放大回報，以平息借貸去賺取息差。這一定會提高了風險。

我不是說債券基金有問題，只是說明當中的風險，最重要的，這不是保本產品。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13280：

想問下金界合理價位係幾多？
現價應唔應該入？

龔成老師：

金界控股（3918）有質素的。現價合理中上部。

佢是柬埔寨最大的酒店、博彩及娛樂運營商，旗艦NagaWorld是金邊市唯一的綜合式酒店及賭場娛樂城，持有為期達70年至2065年的賭場牌照，NagaWorld僱員人數超過5500人。

賭業本身是高毛利行業，而金界壟斷了金邊的業務，加上業務平穩，財務穩健，沒有未償還借貸及債務，企業有一定的質素。

但要留意，金界所發展的是較新興的市場，若然比較澳門的賭業股，金界的增長及潛力較大，但當中的風險同樣略高，因為業務難免存有不確定性，這點你要明白，亦因為這原因，若投資此股，在注碼上不能去得太盡。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

多謝各位提問，若然你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網的，當然，會將發問者的身份，以及有關個人的部分刪去。

另外，由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。