【龔成問答信箱】（Q22101-22120）

Q22101：

龔sir 我今日做左進階班功課 有d問題想下，我用左莎莎既年報去計財務比率

1）我計到既ROE 分別係-26.4同-31.1, 但係你比的價值網同bochk 係-23.5 同-24.9，點解會有d分別呢？

2）EBITDA 利潤率 其實我唔係好識搵個EBITDA出黎 自己跟住年報計除息除稅除折舊後 都計唔到價值網 顯示既-3.85同-3.67億(價值網顯示2020年係正數

我諗應該係負數先岩？）個EBITDA利潤率 價值網 係-12.7同6.41，而bochk係 4. 06同5.47, 想請教下可唔可示範一下點計？

3）存貨週轉日數 我計到160，呢個數字同價值網差唔多，但bochk係106, 又係想請教下邊個數字先岩？

4) 關於杜邦分析法

2020年: 1.97 x 1.75 x - 9.02% ＝-31.1
2021年: 1.89 x 1.21 x - 11.5% ＝-26.3

ROE 2年都負數 不過2021負得冇得多 2021年純利率差左 不過財務槓桿 同總資產週轉率個數細左 所以負少左

我就唔係好明 總資產週轉率 應該愈大愈好 但係假設2021年都係1.75 (instead of 1.21) 咁計出黎個ROE負得仲勁 咁咪調返轉應該係愈細會愈好？請指教一下

龔成老師︰

1) 我相信係你和其他網站，係計個"發行股數"和"股東權益"出現分別。

因為每個網站的公式都不同的，就算發行股數都不同，計年頭？年尾？平均？加權平均？通常我睇財經網站，都唔會太著重d細數字，你了解大方向就得，同埋，不同財經網站的數據，一定會有d誤差，正常的。

2) 至於EBITDA利潤率，你可以參考BOC個數字。你可以用佢年報中"經營虧損"，再加翻"按性質分類之開支"中的折舊部份(2021年年報P.177)。但會有少少差別，可能係提取數據或匯價問題，影響不大。

價值網部份，都係用類似計法。但2021年數據，可能系公式不同，其實，一般網站在計算EBITDA時，都計左「使用權資產折舊」，但這並不是真正的折舊，所以數據的參考價值會低左。

其實較精準方法，我建議係用EBIT - 折舊，但這個折舊，應該排除左"使用權資產折舊"的數字，咁會更準確。2020和2021年EBITDA，應該為-7.6%和-10%。

2020年︰(-5.53 + 1.17) / 57.17 = 7.6%
2021年︰(-3.91 + 0.87) / 30.43 = 10%

3) 如果用我教法，拿年初和年末平均數計，答案係160。至於點解BOC會有分別，因為佢係計算存貨時，唔係用年初和年末平均數去計，所以有落差。

你照用160，咁就可以。

4) 你這個杜邦分析計算，係正確。你睇翻個3組數字﹐你會發現中間組數(營業額/總資產)，係變動最大。

你就會發現，企業這2年面對問題，係銷售數字出左最大問題，有明顯轉差情況。

之後，我地再睇翻客觀環境。由於這2年有社運和疫情影響，令到營業額受損，係正常。這些都係中短期因素，因此我地係分析企業質素時，唔洗過度在意。

至於你話總資產週轉率愈大，個ROE就會負得愈多，係正常。因為現時佢生意少左好多，但好多固定成本，好似舖租、人工等，唔係話停就停到。

佢現時基本上，每件貨品都係蝕住做。但當這些不利因素過去，營業額回復正常，有更多銷售單位去攤分這些固定成本時，就會令佢轉虧為盈。

這時候，每賣一件貨都係賺錢，自然會係總資產週轉率愈大愈好。

------------------------------------------------

Q22102：

你好 龔sir本人持倉如下：

778 @$10.3 x 5000
823 @$71 x 1500
941 @$83 x 500
968 @$13 x 8000

1177 @$4.5 x 12000
1928 @$41 x 2400
6823 @$10.5 x 10000

另月供5隻各$1000, 現值16萬多

3,285,823,1177,1299

本人50歲 月入33K 還有十年退休，想法是退休時將所有股票轉成有5厘息以上的收息股 作生活補貼

1) 這個組合有沒有問題？

2) 因為未來還有10年穩定收入 這組合是否過於保守？

謝謝 祝生活安康

龔成老師︰

1) 你持有和月供股票，都係有質素。但由於你50歲，係一個要為退休開始準備的年紀。

因此，你要將組合中的股票，慢慢轉成較保守組合。按年紀增長，慢慢加大收息股比重。目標係10年後退休時，組合100%係收息。

現有持股，暫時可以不用改變。但月供組合中，中生(1177)和比亞迪電子(0285)都係潛力股，風險對你而言，用點高，唔建議用佢地作為月供組合。

你可以將這2隻股票，換成為收息股，會較適合你現時的年齡配置。

收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。收息基金(3110)，都可以。

還有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

另外，你要留意一下，你組合持股的佔組合比例。個別企業和行業，不要佔組合15%和30%以上，否則會有過度集中性風險。

你現時部份股票，係超過這個標準。但由於都係有質素股票，故不用沽出。用未來新資金，去慢慢拉平衡翻個比例，咁就可以。

現時大市只在合理區，每月月供之餘﹐緊記都要留少少現金，用來等大跌市出現時，可以去掃平貨。

2) 你大致上跟我所講的方法，去進行配置，增長力度就會配合到你年紀所需。

我假設投資回報有10%（連股息再投資），你每月投資$5000 + 55萬持股，10年後大約會增值至250萬。

你再將佢換成6%收息股，大約每月就會有1.25萬的現金流。你可以以此作為參考，調整自己投資計劃。

------------------------------------------------

Q22103：

我正在研究電動車和自動駕駛，有什麼介紹

對這個行業未來的看法

龔成老師︰

電動車方面，我自己一直較看好比亞迪（1211），係佢的電動車。

首先，電動車有環保的概念，這點令政府會加以幫助，而市民亦會支持，但其實，電動車真正的價值並非在環保，而是慳錢，用電比起用油平得多，因此只要各種配套都完善，車主沒有理由不選擇電動車。

只要有金錢利益推動，人們的習慣將輕易改變，在70年代的石油問題，完全改變了美國人使用汽車的習慣，由一向追求大汽車的習慣，轉變到鐘情於小排量慳油的日本車，令日本車大舉入侵市場，當其他車廠發覺時已經太遲，最終成就日本車霸主的地位。

雖然將來的油價難以估計，但到經濟好景，各國都大量用油的情況下，石油需求大增，電動車的優勢亦愈來愈明顯。

另外，比亞迪在中國發展電動車，可說是佔盡地利因素，因發展電動車必需要有完善的配套，政府的支持十分重要，另外，若政府肯帶頭使用對推廣很有幫助，現時比亞迪的電動巴士已經行走在中國多地的公路上，由公共交通開始發展，可見政府對電動車是正面及支持的，然而，中國政府在支持電動車背後亦有個重要因素，就是石油。

中國並非產油大國，未來的石油供應難以滿足中國的汽車需求，而發展電動車就成為辦法，同時中國在西藏擁有不少能生產電池的鋰資源，若能用電動車取代傳統燃油車，中國對石油的依賴可減少，對別國的依賴能減少，從整個國家發展的戰略角度分析，中國發展電動車的誘因並不少。

同時，中國是政府主導的國家，要建立配套及支持業界，比資本主義國家更容易（在西方國家，石油業的既得利益者並不希望見到電動車的出現）。

投資中國的企業有一個要點，就是順從中央的方向，這不是指個別一兩個政策，而是一個大方向，因這會對企業的長遠發展有重大的影響。

比亞迪在新能源汽車方面，經過幾年的發展開始有起色，混能車銷情理想，而電動大巴在政府支持下銷量亦理想，而部分歐洲國家亦開始試行比亞迪的電動大巴（這是有利的指標，因歐洲的標準甚高的），雖然只屬起步，但情況不錯。

現時比亞迪的新能源汽車遍佈全球6大洲、多個國家和地區，其中包括美國、德國、 英國、日本等主流汽車強國市場。

所以，我睇好這企業的電動車，但並不是一兩年就見到收成。

至於自駕技術，見集團都一直有同科技企業合作，相信發展上都係正面。

但這股經常都處略貴水平，大約去翻$135先算合理，如果真的好想買入，現價小注月供好了。始終現價投資風險高，回翻先考慮正式買入。

或者，你可留意下中國電車（2845），這基金的目標是追蹤Solactive中國電動車指數NTR「相關指數」表現緊密相關的投資回報。

持股中最重就係比亞迪A股（002594），以及與中國電動車產業有關的股票，中國因為能源問題，長遠一定要發展電動車，這是大方向，故此股有一定投資價值。

此股現價合理區頂至略貴。無貨可以現時入少少，到有明顯回調才再慢慢加注。

潛力度是有的，但會比較波動，如投資宜慢慢分注，可長線。

------------------------------------------------

Q22104：

老師你好！岩岩開始睇你既書，好似展開左我人生新既一頁，原來一直以來既理財觀念（淨係識得放錢係銀行儲）係好old school同好無效率。依家將你一本本書慢慢睇，希望可以快啲財務自由啦

小妹25歲，月入4萬，家用一萬，用一萬（下個月開始想用少啲儲多啲)，儲兩萬。

黎緊應該會同男友買樓，想買約7-800萬既樓，有首期，希望可以快啲供完，唔想負咁耐債，其實睇完書真係好唔想供樓，覺得要借錢再負咁耐債呢件事好矛盾，更無奈樓價愈黎愈唔合理，但又想有個安樂窩

1。儲蓄約15萬；需要再拎錢出黎投資嗎？

2。美股：少量voo

3。睇完老師你講既野，想試下月供股票
你覺得我每月供
$5000 （2800）平穩增長股
$5000 （3067）潛力股
如何？

4。如果二人都用呢個組合投資，可以加快供完層樓嗎（男友都係月入4萬）
希望你可以比啲意見我，謝謝呀！

龔成老師：

你現時25歲，係累積財富的黃金時期，你要好好把握，盡你一切的力量去儲蓄、投資、學投資知識。

你盡快加儲蓄到每月$2萬，是正確的。

1）你表示「有首期」，是否已另外預左一筆足夠的資金，去準備買樓，我假設你已準備好，餘下的$15萬就可以投資/等投資，不過，我會較建議你等完成買樓過程，先開始投資。

另外，現時低息環境，其實唔需要太急去還錢，你照正常速度去還錢就得，資金可以用作增值。

2）VOO可長線持有。

3）可以，這兩隻都是不差的選擇，但現時好睇你會幾時買樓，而決定投資多少，留現金多少。

4）你概念上不用想著「想盡快供完層樓」，你只要照正常速度去供樓就得。每月保持進行財富增值，照上述月供模式進行，就得。

------------------------------------------------

Q22105：

你好龔成老師, 首先感謝你的無私分享，令我有希望可以有天財務自由。

先跟你分享我的現況

工作方面：我今天25歲，月收入13K，上年原本收入18K，但因為轉行由低做起，希望將來可以收入更穩定，所以即使收入下降仍堅持轉行。

我亦有PT工作，大概月入3K。而今年9月我打算花約80K讀PT PGDE，預計2年後畢業後起薪點可以升至30K。

儲存方面：我答應自己每月要儲14K，預期3年後有500K。

資產方面：我現有資產350K，當中股票佔6成，3成是銀行定期，其餘是流通現金。股票比例:

1) 316, 買入價119, 股數419
2) 823, 買入價62.76, 股數131
3) 1177, 買入價7.73, 股數1414
4) 2388, 買入價24.4, 股數1447
5) 2800, 買入價26.37, 股數2301
6) 3067, 買入價17.6, 股數692
7) 3988, 買入價3.07, 股數3252

目標：我期望3年後可以儲到一百萬，與男朋友夾份置業再結婚。

1) 請問老師認為我的方法適當嗎? 有更快達到目標的方法嗎?

2) 請問老師認為我的股票比例恰當嗎? 有需要更集中投資/賣走哪隻股票嗎? 我暫時只有穩定地月供1177及3067各約$2000。謝謝你

龔成老師：

1）現時的股票與現金比例，適合的，持有的股票都是有質素的股，但你25歲，其實未必適合持有收息股，因此，中行（3988）這類收息股，就未必是最好的選擇。

至於大方向，基本上無問題的，但由於你轉左工，收入減少，你要睇下自己能否做到每月儲$14000的目標，如果可以做到，相信3年資產達至$100萬，可以的。

2）比例基本無問題，由於你3年後要資金，因此不能太過進取，你預潛力股與平穩增長，各佔一半就可以，潛力股不能太多，反而當你買完樓後，資金可以更長線投資，到時可以再增加翻潛力股的比例。

------------------------------------------------

Q22106：

Hi老師，最接近神的男人
因2年前無意中係fb識到你

另外，知道你聽過好多 多謝你的人留言，
我都一樣
我都好想多謝老師！同埋多謝我自己！

我有間居屋 供緊， 在職媽媽
小朋友x2 有一個工人姐姐
以前就算好慳好慳，
都儲得好小錢！

人工唔高 只是普通文職 ，
但我2年內竟然都儲到多達十萬以上！
都係你帶來的正能量影響

除左正職外，亦多層面地搵到額外收入（如投資，網上填問卷，任務/網店/etc....）
真係好多 原來增加收入來源係好重要
，
而我也揾到真正搵錢方法 好開心）
為了令自己收入更大，我偷時間去投資自己身上！去學習不同知識！
賺取更多額外收入！
多謝你無私奉獻

龔成老師：

哈哈，太誇張了，其實我做的事不是好誇張，我原本都是好普通的人，只是我比一般人更加努力，希望你都要明白，好多事情你都能做到的。

見到你有正面的影響就太好了，你最重要是保持進步，無論知識，以及財富。

你現時的方向正確，同時，你應該思考一些長遠增加收入的方法，例如自己在現時職位上的發揮，有無進步的空間，長遠的事業發展怎樣。在自己的能力上，以子職業上，都要從長遠角度出發，加油！

------------------------------------------------

Q22107：

你好，有些投資問題想求你指教

我月入3萬，太太月入7萬，有兩個3歲小朋友。我有層自住樓，貸款金額仲有500萬，每月供$18000左右。因為我人工唔夠借，所以太太是我擔保人。

另外，我太太和她的家人有層已供完聯名物業市值720萬，但她家人住緊。

現在，我哋想喺太太和家人的聯名物業按揭貸款，之後買入的士（的士牌連新車約$550萬）收租作投資，但我們現金儲蓄得50萬其餘就按揭借回來，你認為可行嘛？

以我的背景會唔會好大風險？還是作其他投資好呢？

謝謝你的賜教

龔成老師︰

我相信你年紀都唔係太大，應該係年青至中年人士的階段。

在這個年紀，其實借貸比例高少少，都係可以。你預總負債，最多可以去到總資產7成。從負債風險角度，只要你做到7成以內，風險水平都係可以接受。

所以，你要計一計數，所有負債，比起所有資產的市值計算。如果超過7成，就是開始高風險。

但你要留意，的士牌過往是增值類別，而家已偏向收息類別(增值都仍有，但不算多)。

本質上，的是牌可以不斷有租金收入，而這個租金都會按貨幣系統的向上，而不斷向上的，但行業近年出現了叫車程式等新的競爭模式，對佢點都有影響。

所以，在長遠計，佢的增長能力只是中等，視為收息類的資產會比較好。

以你們年青至中年年紀，我比較建議集中係一些較有增長力資產，例如一些有增長力的優質股。

投資的士牌唔係唔得，但佢增長力唔會好強，財富增值效果，現時未必有優質股咁好。

------------------------------------------------

Q22108：

龔成，你好啊！好緊張，希望你會答我呢個投資初哥問題

我目前有HKD80,000資金專門預留作為投資用途，宜家30歲，希望係2022年2月前投資而賺到HKD160,000;請問有咩嘢建議？

我之前有月供股票買盈富同CLP,都有小量投資美股，只限tesla, ARK及台積電。

Thanks!!!!

龔成老師︰

我地做財富增值，一般希望做到架合理回報，係每年增長10-15%。你現時這個目標(1年升倍)，用股票投資去做，風險會好大，較難達到。

而且，1年係一個好短架時間，就算再優質股票，都要時間升值。1年太短，好易會有股價波動風險，令最終回報不確定性好高。

如果你無其他增值方法，建議你按部就班，透過月供去買入優質股，去為自已資產作增值。

你過往投資股票，都係有質素，用來增值係可以。但以你30歲年紀，應以增值為主。中電(0002)增長力不高，未必太適合你。

建議你用「平穏增長股」 + 「潛力股」作組合，去創造一個增值平台。

現在你每月先用5成儲蓄做月供。其餘先儲起，用一邊月供一邊儲蓄的策略。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

另外，我建議你加強每月儲蓄，這是重要的。

------------------------------------------------

Q22109：

你好呀, 老師, 我今年29, 有以下兩件事情想各你請教:

1. 想與姐姐置業 兩人月入共7萬 流動資金約有100 萬, 本住青衣區, 想買樓齡不超過20 年的, 正考慮藍澄灣, 同埋想問2人自住, 建議入手呎價為多少

（實用面積為500呎會過大負擔嗎？ 想做9成按揭，另想問下老師你覺得此區樓宇有升值潛力嗎？ 由於是第一次置業，想先請教老師有何建議?

2. 另外，因父母抽到居屋，費用為200多萬， 父母正考慮做多少成按揭，如一次過付款，流動資金便所剩無幾，但做按揭又要俾利息，所以想請教老師

建議按幾成才合適呢？

謝謝你的解答!

龔成老師︰

1) 青衣區內大型屋苑唔算好多，成個區潛力度只算中等。但東大嶼計劃落實的話，有機會刺激到這區樓價上升。

藍澄灣質素算中等，佢距離港鐵站較遠，係一個扣分地方，但整體算係可以。

但你這個作為自住樓，我建議較從你自身需要作出發點，去作出考量。你要諗這間屋，係唔係適合你長遠需要，講緊係未來5-20年。

呎吋方面，只要唔好太細(少於300呎)，符合到你生活要求，咁就可以。另外，我地自住樓一定要堅守一個大原則，就係長線要"供得起"。如果可以的話，置業係無問題。

2) 現時貸款息口在低位，無論係你和你父母，我都建議盡量做高成數貸款，去空出更多資金，做財富增值。

如果你父母本身好怕風險，就將按揭成數調低，但其實在財富運用上，高成數會較好的。但要留意，你自己買物業時，高成數按要比按保，你要平衡翻。

雖然高成數按揭表面上，係要比多左利息，但我地要從機會成本做考慮。你利用低息貸款，空出來資金進行投資增值(投資優質股)，去爭取更大回報，相信長線財富增值效果會更理想。

同時，你父母都可以因此留下更多資金，以備不時之需。

------------------------------------------------

Q22110：

Hi 呀Sir你同唔同意1211黎緊要加強品牌宣傳，佢銷量好似唔夠多，我明白佢有技術，但始終作為買家都想要多人識既牌子咁。

比如比亞迪做公交車，人地買左會唔會覺得自己個檔次低左

龔成老師︰

其實比亞迪(1211)品牌，的確有改善空間，特別係在國際市場。

但由於佢有技術，這方面係佢主要勢所在，品牌雖然唔算好強，但無損其投資價值。

而且，集團將來未必只係集中係出售新能車，可以會慢慢加大電池和新能車相關技術銷售。故零售品牌的強弱，未必對佢影響十分大。

其實，比亞迪其中一個往後的發展，就是「賣電池」，即是同不同的車企合作，而這方面的發展，自己的品牌，未必是核心。

------------------------------------------------

Q22111：

龔成老師，你好！距離上次請教問題，原來已經有1年7個月，最估唔到既係呢段時間自己既資產價值升左有65%(105->175)。主要係將過去持有既現金部分轉左去股票+每月部分剩餘資金作月供

所以出現左較大既升值。

一、打算準備置業，而因為我目前有接近6成既資產都係股票，因此若要置業就需要放左一D股票，目前股票（買入價，未扣除過往收息）如下：

完美醫療[email protected]，24000股
騰訊700@408，400股
銀河[email protected]，1000股
盈富基金[email protected]，6910（月供緊10000）
中生製藥[email protected]，10000股
小米[email protected]，3000股
建設銀行[email protected]，10000股
阿里巴巴9988@176，100股
港鐵[email protected]，1449股(月供緊3000）
閱文[email protected]，406股

我有考慮既係因完美醫療同騰訊升幅較大，再接觸到較平宜價較難，所以計劃：

1.先放左升值潛力無咁大：如建設銀行、閱文集團；

2.現時買入價與成本價相距較近：港鐵、阿里巴巴、小米

3.再考慮剩餘（優先考慮銀娛，及部分盈富基金）的股票。

你覺得呢個安排會唔會較好？

二、由2019年11月開始月供到而家，見盈富基金佔現時比例較大，想降到3000/月，因為澳門月供股票成本較貴，50hkd/隻/月，

唔想月供分得太散，想10000就分別5000福壽園，5000港鐵。會唔會都可以？但若果成功置業，到時候可能只月供到3000-5000。

三、最近睇完你本《80後千萬富翁》，好有感觸，特別係我對現時份工完全感受唔到滿足感，甚至厭倦，現時一有時間就會睇報表，樓宇相關資訊，

目標向住有基本財務自由後辭職。感謝你本書再俾我動力去向股票，樓宇，老闆方向發展。

龔成老師︰

一) 你的策略，有部份需要修正。

我地考慮持有邊D股票，要從佢是否適合你、組合平衡性和現價平貴(而唔係睇買入價與成本價的差距)，去作出考量。

你還未到30歲，建行(0939)這類收息股，唔適合你。閱文集團（0772）確定性較高，可以減持少少。

完美醫療(1830)現價偏貴，加上佢佔你組合比重較高，我都建議你沽出部份。

至於餘下股票，持有價值差不多。若你有需要進一步套現，你可以按比例去每隻沽少少。

二) 你這個調整，都可以。暫時你就用你新的調整，去繼續進行月供。到你置業後，才按需要減少月供供款，就可以。

三) 本書能幫到你就好，記住要做好財富增值，唔係短時間可以做到的事。要保持學習、維持現有投資習慣，你自然會一步步走向財務自由。

------------------------------------------------

Q22112：

你好！ 家父將於4年後退休，佢想我幫佢用1百萬做投資，希望長期收息亦可有小許本金增長。

80% 穩定收息
303 vtech 15%
778 置富 15%
1310 香港寬頻 12%
941 中國移動 12%
2638 港燈 15%
2800 盈富 11%

20% 增長股票
1810 小米 7%
981 中芯 3%
823 領展 5%
066 港鐵 5%

請問以上可以嗎？定比例或股票有些轉換會更好？
Thanks！

龔成老師︰

由於你父親，尚有4年就退休，投資上應要較保守。

你現時持股和配置，大致上都可以。但盈富(2800)唔係收息股，佢派息平均只有2-3%，但有穏定增長力，可持有。

另外，中芯(0981)和小米(1810)雖有質素，但波動性較大，不宜持有太多，故不要再加注。

現時大市只在合理區，資金唔好盡用。最好留有部份，一方面，可以等大跌市出現時，用來掃貨。另一方面，你父親都應該留有一定現金，以備不時之需。

------------------------------------------------

Q22113：

龔成老師你好，我想請教下你，我已經賣左我既單位，宜家手頭上現金有130萬，我和先生的入息加埋有6萬，我地想買返樓

但係樓齡新少少已經去到700萬，供唔起，我地打算租住先但係又驚上唔返車，請問我地點做會好d？

龔成老師︰

若現時財政，不足以直接承擔心目中的理想單位，你有2個方法。

你可以先購買一個較細單位，之後放租去「以租養樓」或自住。另一邊，就用優質股繼續增大個資金，之後才用較高成數去買大屋，令自己可以供得起。

這樣做，可以有平倉樓市的效果。你們資產，相對受樓價波動的影響，就會較細。當你地將來再換物業，會較有預算。

另一個方法，就係直接用優質股去增值。現時以租金回報率計，股市值博率會較高，潛在回報都會較大。

但由於佢同樓市，唔係有直接關聯。若長線樓市升幅跑嬴股市，變相反而令你置業成本上升左，得不償失。

你要自己衡量下，邊個方法會較適合你。

------------------------------------------------

Q22114：

本人49歲，丈夫51歲，一子將升中學。夫婦兩月入約15萬。在何文田擁有一物業，以丈夫名下持有，仍欠銀行180萬。

我與丈夫現共有公積金約700萬。現金260萬，定期200萬，基金保險200萬。我自己有9手滙豐股票、1手工商，1手港交所。

丈夫常想多買一層樓，因現單位不夠住，想多買一間三房單位，何文田單位出租。但我想以我們的年紀，再重新供一間樓是儍事嗎？

最近見大埔一大屋苑800呎單位，售950萬，26年樓齡，可考慮嗎？

龔成老師︰

其實，每個人都有自住需要，一個適合家庭長線生活的物業，係需要的。你用現時方法，買入一間3房，再將現有物業放租，係可行。

你現時有一定的現金，只要利用作首期，餘下部分現金，你每月供款，我相信可以應付，但的確，每月支出會增加左，你要計好數。

而你現有物業按揭$180萬，將其放租，我相信每月都有基本的正現金流，可以幫少少你每月供樓部分。

另外，如果日後能善用公積金，無論作為部分還款，又或投資一些能產生現金流的工具，都能有助你供樓的。

但當你再買入一個物業時候，你成個財富組合，就會偏晒係物業類，出現過度集中性風險。故你在買入新物業後，長遠來說，加大翻優質股的投入﹐去令財富組合回復平衡。

另外，你現時持有股票，都係有質素。但你要留意，任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

你現時明顯，係偏重左係銀行股，未來要加大其他行業股票佔比，去平衡翻個組合。

以下是一些適合你的股票，現價都在合理區，可分注入貨。

平穏增長股︰金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)

現時大市只在合理區，資金唔好盡用。要留有部份，等大跌市出現時，可以用來掃貨。

------------------------------------------------

Q22115：

龔sir，我是你的學生，想就爸媽的情況請問你意見：

爸媽是退休公務員，60歲，有長俸(每人每月約$15,000)。他們持有一個單位，市值約$1,000萬。下年中他們將搬來跟我一起住，請問他們應該：

(1) 將樓放租，租金大概$20,000/月，每月$2,000管理費；或

(2) 將樓放賣，將部份所得資金(大概$700萬)換入保守投資股票組合，希望有4-5%年回報，換取現金流。

請問那個方案較適合他們的情況？如是(2)，請問除了港燈般的公用股，還有那些是最穩健的收息股？因為就算領展置富這些近年都比較波動，謝謝

龔成老師︰

你父母由於會跟你同住，所以無自住樓需要，其實用分法1和2去處理，都係可以。

若你父母透過長俸和租金收入，已經足以應付基本生活支出，我會建議一動不如一靜，用方法1就可以。

相反，若現時長俸金額和他們生活開支，係有一段距離，你就可以考慮用方法2。

另外，你可以考慮將層樓加按，套現部份資金，去買收息股(最好係方法1，不足夠支付生活才用)。

但由於借貸始終有一定風險，唔好按太多，大約2成左右好了。同時你要明白，這樣會令你父母負債增加，風險會增加。

另外，如果你投資的股票不幸股價下跌，你就會出現「賺息蝕價」，對你不利。

同時間，如果日後加息，又或你收息股的派息減少，都會令你得到的息差回報收窄，你的回報會減少。

你要從實際情況和風險中，取一個平衡的方法。

以下是一些有質素的收息股，給你作參考。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）或收息基金(3110)都可以。

如果你能承受到風險，有些更有超過8%、10%的高息股，但股價就略有風險，要自己衡量，佐丹奴國際（0709）、中石化（0386）、互太紡織（1382）等（記住，股價略波動，只能小注）。

領展(0823)都可以考慮，但因為佢都有一定增長力，所以股息率未必太高，你要留意這點。

我較建議方法（1）。

------------------------------------------------

Q22116：

我想請教，以收息股為例

我既3號仔，早前收左利息，我係咪應該將息做investment ，Otherwise 就achieve 唔到個compound effect ?謝謝你

龔成老師︰

其實複息效應，係分2部份。第一部份，係企業賺到錢，攞去再投資在業務上，創造更多盈利。

另一部份，就係你所講的派息。這部份，就要投資者，將這筆資金去再投資，去創造更多財富。

但如果你持有股數不多，收到股息可能較少，不足以買1手股票。你可以將這些股息先儲起，到有一定數量，目標股票價值又合理，就可以出手。

------------------------------------------------

Q22117：

龔成老師: 現時持股組合中，有1928金沙 $33.9買入，但擔憂政治風險影響續牌，以至可能帶來毀滅性打擊，

眼見880 澳博股價下跌不少，值博率上升，請問是否換馬較好?

龔成老師︰

金沙(1928)無論在賺錢能力、規模、物業質素和協同性等等，都係優於澳博(0880)。

現價計，雖然澳博值博率係較高。但長線計，金沙(1928)增長相信會較好，我比較建議用金沙，作為長線投資目標。

至於澳門賭牌問題，我係課堂上，都有課程的同學們分享過。簡單而言，佢成功續牌機會，會係較大。

------------------------------------------------

Q22118：

龔sir, 有事想請教你意見。我將會離職，公積金約有40萬可選擇取回或者繼續存放於景順，目前都係放高風險的100%環球股票基金。

僱主供款30萬幾（我唔洗供），而家收益9萬幾。

請問我應該選擇取回所有現金再作其他投資？（扣取放回MPF的錢之後應該還有28萬左右可以取回）還是應該先繼續放，等個市好啲再取出？（佢五年內再隨時取回）, 先謝

龔成老師︰

首先，你按翻人生財富配置就得，睇翻自己年齡情況，是否適合說基金的風險度。

另外，你可以睇翻隻基金表現和目標，去做決定。

例如投資的資產類別、投資策略、風險程度、市場、費用成本、以及過往的表現。

你可以睇佢過往5-10年，如果回報係比主要投資市場高，有機會值得繼續放在公積金戶口投資。

------------------------------------------------

Q22119：

老師，請問你有沒有覺得最近市況有點過熱，大市市值有點偏高？

我留意到HSI的市值已高達17倍，比以前一般10-12高出不少，另外一流的公司市值升很多不在話下，但連不少質素很好的2線公司都有2-3倍的升幅，

例如中國軟件，中遠海控，這情況令我擔心市場正在開始形成泡沫。

針對這種情況，我繼續保留質素很好的公司，但我應該把手上投資組合中質素一般的股票賣出，換成現金還是換成較好質素的股票比較好？

現在我有1百萬股票，1百萬現金，我希望5年後能夠增值成1千萬，跟隨老師你的步伐，請問我怎樣做才可以達成目標。感謝你的時間和思考，如果上面寫得不夠清楚，請見諒。

另外一提，在我只有十萬時看百萬富豪，給予我希望及目標，最終我得到百萬，果然意念成就事實。

現在，我正在看千萬富豪這本書，給予我新的目標，而且我已經不會再覺得是希望，而是信念，必定能做到的信念。

感謝你，這些都是因為老師影響到我。

我現在是創業，會計師樓老闆之一，算是正在做創富類的工作吧。

我想變得更好。

龔成老師︰

先恭喜你，達成首個理財目標，成為百萬富翁。

由於近期恆指加入不少新成份股，令到PE合理區，都作出相應調整。你預13倍左右，算係合理區底部。

中國軟件國際(0354)和中遠海控（1919）係貴，但整體大市依然算係合理區，暫時唔見有好明顯泡沫。

你持有優質的股票，應長線持有。但較一般的股票，若持有比重較多，可以考慮換碼至其他優質股

其實，我地投資股票，就等同投資一間企業。係要時間，比佢慢慢成長。一般希望做到架合理回報，係每年增長10-15%。

你現時這個目標，用5年將財富由200萬，增值至1000萬，用股票投資去做，風險會好大，較難達到。

其實，正如《80後千萬富翁》書中所講，要致富其實有5條路，投資只係其中之一。

而生意，都係其中一個出路。一盤生意打理得好，回報係可以遠超投資優質股，所以你想達至你的1000萬目標，可以先從自己盤生意著手。

若再用空閒資金，才用來投資優質股和物業，令財富組合更平衡，咁就可以。

如果你這筆100萬資金，係已經諗住預留去投資優質股。你可以先儲起，因為現時大市只在合理區，你可以等有明顯回調時，才用來慢慢分注入貨。

------------------------------------------------

Q22120：

老師，不知不覺就過左2年多没有message你, 其間我有睇你書及留意你facebook

亦成為我這幾年的鼓勵，現在有些問題想請教你意見, 我同男友想在明年初結婚, 我們都打算未來幾年內移民, 我們打算未來1-2年生BB,

我男友想買樓, 他會用大部份積蓄, 但我反而叫他租樓住, 因為咁様，cash flow會較多, 而且怕幾年後樓價會跌, 放樓也不容易, 一買一賣涉及很多費用, 又要用錢装修

我們這個情況, 你會有甚麼建議? 贊成我男友買樓嗎？還是盡量租樓, 留多d cash係手?

因政局常變, 而買樓有3年禁售期, 因為我才建議男友租樓, 但他不喜歡租, 只想買, 你意見如何? 這刻可怎樣為將來同移民打算?

龔成老師︰

過幾年樓市升跌，無人知。從自住角度，若你係有實際生活需要，而有"供得起"，置業都係可以。因為除了優質股，物業都係一種資產，都係可以幫到你累積財富。

較理想的情況，就係在置業同時，可以留有一定優質股係手，保持增值。令成個財富組合，唔會過於遍重物業，因而造成過度集中性風險。

但其實，你距離移民只有幾年時間,如果移民時，你可能不會保留任何香港資產，我就建議你地租屋會較好。

加上一買一賣的成本高，同時無人知樓市到時是高是低。

因為本身樓市有一定波動性，加上装修和買賣成本都高，還有額外印花稅等問題。為幾年生活，而去置業，未必真係值得。

你反而用移民前的幾年時間，將資金投資一些優質股，去幫你移民前做些增值，相信會較好。

而你男友想買樓，我估有機會係從投資角度出發。但其實現時樓市算略貴，整體租金回報率不高。投資值博率計，會係股市會較高。若他真的有從投資角度考慮，你可以提一提他這一點。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q21021-Q21040）

Q21021：

龔sir，我睇左你大富翁致富藍圖，其中第八章物業創富術並唔係好明白。

你話關鍵係租金回報率要高過息率，雖然你個例子係正確，但我自己再計返，發現又唔一定啱。

假設我要買一個400萬既物業，借90%，貸款金額就是$360萬，還款期30年，息率3%，得岀結果係每月還$15,177，

另外仲有一筆買樓洗費包括按揭保險費、印花稅、律師費及代理佣金，一共係$228,080。

我當個單位租到$15,177，回報率就係4.55%。

結論，雖然回報率高過息率，但並唔會無多餘現金流岀現。

請問我個例子岀現左咩問題？係咪按揭比率太高？但你書入面話低息時，應以最高借貸比率及最長還款期借錢，以達致倍增效果。

龔成老師︰

無錯，我地係低息的時候，應用最高借貨額和最長還款期。

我地要盡量利用貶值的現金，去換取價值不斷上升的物業資產，這是創造財富的理想做法。

但當按揭成數較高，開頭賺取息差的情況，會相對不明顯。

其實當中的關鍵位，就是你還按揭的金額中，包了兩大因素，第一是「償還本金」，第二是「還利息」，如果你單位出租收$15000，而每月還款中，假設本金$8000利息$7000。

雖然每月無正現金流，但由於你有部分是償還本金，所以其實你有實質的得著的，只是「現金流」未出現。

當長遠慢慢加租，正現金流就會開始出現。

長遠而言，你持有的是優質資產，租金和物業價值會慢慢提升。中間息差優勢，會漸漸變得明顯。

至於那些一次性開支，的確會拖低左回報。但作為投資一個優質資產的成本，相較未來資本增值和現金流收入的回報，這部份成本，係絕對值得付出的。

------------------------------------------------

Q21022：

龔老師你好，我是一名澳門的單親媽媽。我現在要獨自養一個3個月的寶寶，才發現自己
一直沒有投資沒有儲蓄，只有受薪收入，每月4萬3千元，花費供樓1萬6，給父母工人以
及家庭開支，每月都沒有儲蓄。
有三個問題想請教老師:

1,今年公司有花紅4萬，以及囡囡利是1萬多，想買股票當幫囡囡儲錢。考慮中銀，工商，
同盈富，請問邊個會適合一點？

2,10年前傻傻的買了1157，這幾天突然想起，找出來，已虧損20%, 應該沽出嗎？14. 508買入
780股。

3, 想看你的書增加投資知識，請問新手應該睇哪一本？
萬分感謝你抽空解答我的疑問，謝謝☺️

龔成老師︰

1） 盈富（2800）和中銀香港（2388）都可以，但前者係一籃子優質股票，分散風險能力會較好。

現時大市算係合理水平，可先用一半資金，餘下一半等有明顯回調，才再出手。

2） 中聯重科（1157）都有少少質素的。佢主要從事研究、開發、生產與銷售工程機械及農業機械，以及融資租賃服務。

業務都不差，生意與盈利都有增長力，發展都正面，但未必是高增長類。佢優質度不是最高，因此又唔太值得持有好多。

3） 我寫架"80後百萬富翁"、"財務自由行"和"股票勝經"，都適合初學者。

現時你要做架事，就係睇翻自已每月開支，睇下有無地方可以改善。令自已每月有一定儲蓄，去做財富增值。

------------------------------------------------

Q21023：

老師 想問下 澳優業績後爆跌 係咪基本面都唔值得渣？13.2 買入。謝謝

龔成老師︰

澳優（1717）不差的。佢主要從事生產、營銷及分銷嬰幼兒配方奶粉產品；及在荷蘭從事乳製品業，業務包括研究及開發、牛奶收集、加工、生產、包裝、營銷及銷售乳製品。

睇翻佢產品，都有一定的品牌與市場，同時過往的增長力理想，長遠有前景。

其實佢質素唔算有大變，只係比較大的問題是估值。現在回調，只係令佢回到較合理水平。此股長線投資可以，但就要控制注碼。以分注模式進行較好。

------------------------------------------------

Q21024：

你好！我收入唔穩定，而且身體唔好，而家每月要幾千醫葯費。是否應逐步把一半或
1/3的股票轉移到高收息股？

我現在持有部份939＆6823, 如再增持收息股中國龍工是否首選？如果是，什麼價可入？

還需增持其他收息股嗎？還有什麼股可推薦？謝謝你🙏

假設收息股6％年利率，我要把2/3股票值轉移到收息股才cover到我每月的所有费用，那是否這樣做適當？餘下的可投資一些值博率或增值潛力大些的股票？

龔成老師︰

這個好視乎你健康問題，係短期定長期。只係短期，你可以照因應自己年紀，去配置。好似年青至中年人，就用增長類股票。

若果你會較長時間（以年計），都會維持現時醫療支出，而收入依然都係會唔穏定。

咁我建議你將2/3股票，慢慢換成收息股，去減輕你醫療支出和心理上架壓力，好讓你可以先集中調養好身子。

餘下股票，就維持係一些"平穏增長股"上。因為佢增長力唔係最高，但勝在平穏，萬一你真係要重用這些股票資產，個價都唔會話變動得好利害，同時可以做到平穏增值效果。

中國龍工（3339）以企業的質素來計只屬中等，現時不貴，股息率都算吸引，但業務波動是風險，因此投資不能大注。

以下都是一些較優質架股票，你可以從中選擇，之後再慢慢調整自己組合比重。

平穩增值股：盈富（2800）、金沙（1928）、恆基（0012）、港鐵（0066）、平安（2318）、粵海（0270）、領展（0823）

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）或收息基金（3110）都可以。

有些更有超過8%、10%的高息股，但股價就略有風險，要自己衡量，佐丹奴國際（0709）、中石化（0386）、互太紡織（1382）等（記住，股價略波動，只能小注）。

另外，你再有新資金，建議先儲起一筆應急錢，以應對醫療費用或工作上，可能出現的變化，咁會較穏妥。

------------------------------------------------

Q21025：

龔sir, 你好，我0.75 買了1手勛龍（1930）, 同3蚊買了1手恆發光學（1134）, 現在兩隻都跌了很多，
應該繼續持有還是止蝕，謝謝

龔成老師︰

勛龍（1930）主要在中國從事設計、開發及製造定制模具。

公司規模唔大，上市時間唔算太長，好多數據都未必能作準。此股唔係無質素，若持貨不多，可以守。

恒發光學（1134）係內地和香港的眼鏡製造商。

業務係有的，佢上市不久，好多時要較長時間才見真章。

睇翻佢2019年盈利1000萬都無，但現時市值近10億，好明顯係貴。若你只係小注，可以守。但持貨較多，建議沽出部份﹐去平衡風險。

------------------------------------------------

Q21026：

老師，我年齡:29。有18隻個股(2隻小注,2隻藍籌短炒)+7隻月供

終於報了老師既初級班,希望到時可以多多指教.另外睇左幾本老師既書,我個人反而覺致富藍圖仲重要過股票勝經.

1) 我另外有D問題唸左好耐,想老師幫手俾D意見.
由於之前收息股佔過多比例,想慢慢轉番做穩增值型,其中內銀佔了36%,除了中銀香港會strong hold外,想將內銀減持至2~3隻,尤其民生蝕緊下,應該點處理呢?

2388 15%
0939 7%
3328 4.5%
3988 4.5%
1988 4% (蝕23%)

2) 有5隻股在2,3年前買入後無理,現在應如何處理(hold or sell)?
2 500 @85.05
659 3000 @8.4
788 40000 @1.69
1988 4800 @6.32
2009 2000 @4

3) 睇到新聞見到大陸要求BABA剝離媒體資產,公司股價/股值會是否下跌?仲有咩情況會預見到?

4) 現在留意緊 ,請問下合理區頂 & 便宜區
27
66
2318
3067
2845
2158 (新股是否難以估值?)
1833
9618

5) 正在月供以下股,想問下哪隻現價太貴?
700
1177
2318
2382
9988

龔成老師：

18隻股票太多，你無法每一隻都清楚了解。另外，不建議短炒。

《大富翁致富藍圖》是整個規劃，因此的確較重要。但對於想集中提升股票知識的人來說，《股票勝經》就好有用。

1）內銀要先減持3-5成。餘下的，可以持有，等機會。這些內銀不是無質素，但的確會影響了你的長期組合增長力，因此，要取一個平衡調整的方法。

2）我地最重要睇質素、是否適合你，去決定去與留，而買入價因素不是重要。

這幾股增長力基本都唔強，未必最適合你，因此，要找機會賣出，但有於都有質素，所以不用立刻賣，你找機會就得。

3）阿里（9988）將面對內地監管可能收緊，因此風險度增加左，不過，我相信佢的整體優質度仍在，內地不是不想佢賺錢，只是想規管佢。佢已建立好完善的業務，因此本身是無得輸，只是賺多賺少問題，現時監管多左，點都會影響賺錢能力。

又以佢的螞蟻貸款業務來講，這部分是一些網上的小型貸款業務，增長快，但監管並不如銀行般緊，因此，中央會有更多的監管針對這部分，影響了賺錢能力。

整體上，阿里，長遠仍是有發展，賺錢能力雖然有少少減，但長遠會同政府同意一些監管方法，以及找到合理的賺錢模式，你預阿里現價約在合理區頂部，這股可長線。不過，中短期會波動。

如果有貨，可持有，但就唔需要太急加注。

4）這些都有質素的，而醫渡科技（2158）有潛力的。可長線。

提供基於大數據和人工智能（AI）技術的醫療解決方案。集團主要向醫療行業的主要參與者（如醫院、製藥、生物技術及醫療設備公司、研究機構、保險公司、醫生和患者以及監管機構及政策制定者）提供服務和合作。

根據大行報告，於2019年，集團收入在中國所有醫療大數據解決方案提供商中排名第一，在中國醫療大數據解決方案市場中的市場份額為5.0%。

睇翻大行對佢2020-23年預測，收入和毛利增長分別為73%和83%，增長力唔錯。

佢平台有一定擴張性，長遠受惠更多醫療保健客戶使用平台。不過公司客戶過度集中，以及依賴公共部門。

但佢依然係在燒銀紙狀態，係一個扣分架地方。整體算係有質素，但要注意風險，投資時唔建議大注。

之前貴，現價算是略貴，最好回翻多D先考慮。

另外，提翻你，你應該在投資前，更深入了解該股先好投資，不用太急出手的。

5）基本上都在合理區頂至略貴，都有質素，由於你是月供，本身已有平均買入價的作用，所以，不用停。

------------------------------------------------

Q21027：

如果我
每月要還錢$19000
平均月入只有$7500
每月開支約$3000

請問我可以如何做
但我不想就此破產

借了幾間財務
又經常遲還款
TU極差
不可能問金融機構再借錢了

龔成老師：

要睇翻你現時有無資產項，以及有多少現金，如果有資產，可能要賣部分套現。

另外，就是想方法增加收入，你最大的問題是收入不足，想一切的方法去增加收入。

你再同借錢的方法解決問題，根本是行錯路，不要再想如何借錢了。

另外，可以找翻你現時欠債的機構傾傾，有無得拉長還款期以減少你每月支出金額。又或找一些機構，一次過進行債務重組。

------------------------------------------------

Q21028：

老師你好，一年後再留言請教係因為情況有變，我地決定移民。賣居屋股票套現之後會有近八百萬左右起手。
現打算：

1. 用250萬 做首期，香港買一細單位放租？

2. 如 60 歲每月想有約 2萬被動收入，以下股票正確嗎？

盈富 (2800）
煤氣 (3）
工行（1398)
置富（0778）
深高速（0548）
粵海(270）
中石化（0386）
比亞迪（1211）

每月應供多少及如何分報？

龔成老師：

1）如果你地打算移民，資金投資香港的物業，未必是最好的選擇，因為彈性會較低（香港樓買入要持有3年），同時只是投資，而現時香港樓的投資角度，這刻又不是特別吸引，因此，不用太刻意行這一步

如果你想有物業類資產，可考慮房託，會更加靈活。

2）除了比亞迪（1211）外，其他都可以。

因為你這年齡及投資目標，應該投資風險較低，股息較好的股票。因此，1211不適合，至於其他，你可投資，平均分配就得。

另外，你可加入GX恒生高股息率（3110），是一個投資收息股的基金，追蹤恆生高股息率指數之表現。

可以視為收息股的組合中其中一員。這基金可投資的，現價合理，可分注。佢是投資香港大型，較穩陣，派息較高的上市公司。

這是不差的收息組合，但增長力不強。

------------------------------------------------

Q21029：

龔sir,想問下你一開始係點樣選擇分析邊d公司？

我就快閱讀完你編寫的年報勝經，想選擇一間公司作練習，但眾多公司，唔知應該選擇邊間好，可否比小小意見我

龔sir,我正在了解中海物業（2669）的年報，見佢既毛利率近兩年都有下跌既跡象

但我見你回覆的文章話2669都係有增長力，我想問毛利率對了解公司發展，有多小影響？

龔成老師：

你選股時，可以選較有優質、大型、獨特性的企業。

簡單來說，我地買股票就是買企業，你要以做生意，你要考慮企業的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。

例如，我地會考慮佢有多少生意，有多少盈利、現金流，有多少資產，從而計算該業務值多少錢，同時會推算將來的盈利情況，去推算這企業的質素，以及長遠的價值。

如果要深入計算，基本上要好仔細的研究企業，要分析好多財務數據用比率，先至有較完整的答案。

中海物業（2669）不差的，佢係2015年由中國海外發展（0688）分拆上市。

佢主要於中國內地、香港及澳門從事物業管理業務（如保安、維修及保養、清潔及綠化、為物業發展商提供交付前服務等。

至於毛利下跌，我見情況未算嚴重，而佢的生意仍增長中，因此，仍有質素。

現金流不差，增長力都有，但就不是好高增長，是平穩增長類。現時在合理區中上部，分注投資都可，這股都可以長線。

------------------------------------------------

Q21030：

我近排$21.x買入小米，早幾日咁啱睇左你條影片講比亞迪，個個話「$270高位沽，$180幾再買返，你話無人知幾時高位，幾時低位，優質股買企業理論」，再加上下週小米公佈業績，小米升下跌下，$26.x真係好想沽，其實這個心理關口好難過。

我都不斷提自己比亞迪幾廿蚊時沽左無回頭，買唔返。
但確實錢賺到係代落袋。

係！現金會貶值，而且炒來炒去風險高。
你可不可以教多幾招，扭轉思路。

龔成老師：

你要克服「贏錢」的心態，唔好著重現金，要睇「長遠企業」

如果你同一般散戶一樣，要「賺現金」，「錢要落袋」，你就永遠賺唔到388、700這些100倍回報的股。

我相信你的水平，無理由同一般散戶一樣。

------------------------------------------------

Q21031：

龔sir，愚昧問一下，你回答我的問題:

1) 見老師話$30萬，加每月投資$1萬，"5年後大約會增值至120萬" , 請問如何計算出來?

2) 以恆指過去年平均回報10%計（連股息再投資），請問股息係咪一定可以以股代息? 可以係度先查到某隻個股可唔可以做到以股代息？ 同埋係要另外向銀行申請的嗎?感謝

龔成老師：

1）每月投資$1萬，假設10%回報，5年後會滾存到$72萬（這是複利息公式計出來）。

另外，$30萬如果以10%回報計算，大約會滾存出$50萬。

所以，合共約$120萬。

2）當我假設回報時，要有「再投資」的動作，即是假設收到的股息，再買翻該股。你可以在一般的財經網站，網入該股編號，就能找一公司活動，當中有股息資料。

不過在香港，提供以股代息的股票不多，我認為你唔需要刻意投資這類股。就算該股無以股代息，當佢每次派息時，你先儲先現金，之後先再等機會用現金買翻該股就得。

------------------------------------------------

Q21032：

龔sir，想請教一下你，目前我一家三口住緊公屋，見最近有得抽綠置居，諗緊如果抽中，自己供唔供得起。

家庭只有我有收入每月三萬三，而一家三口支出大約二萬，資產大約有一百八十萬，打算百二萬做首期，三十萬裝修，三十萬做後備資金。

諗住如果抽中買三百萬樓，月供一萬左右。但而家經濟唔好，我擔心我會失業，難搵工。同埋以我目前情況係咪買樓好勉強？希望有人可以客觀幫忙分析，謝謝

龔成老師：

首期方面，我相信無問題的，當然，這最好盡力儲多少少現金，這段時間唔好投資。

至於月供$1萬，你就要想清楚家庭的負擔情況，如果你用翻過去5年去作參考，如果以這情況去供樓無問題的話，我相信都可考慮。

其實，你可以考慮比少D首期（當然要睇翻按揭等情況），雖然令負債增加，每月供樓金額增加，但好處是令你地手上更多現金，就算出現失業等不利情況，防守力會較高。

------------------------------------------------

Q21033：

Sir 如果啲優質股高位買 跟住跌左我又加了注 前後加了2注 但宜家越跌越多 係咪等到佢升返平手走3/4？

分別是175 27.4@ 4000股
285 48.3@ 1500股
1810 27.4@ 2000股

我都知入得太快 太多潛力股 宜家好驚有排返唔到個位 套唔到現 買其他嘢
謝謝你

龔成老師：

只要是優質股，你其實長線投資就得，唔需要上左又賣，你唔應該比「買入價」限制左你的投資思維，我地最重要睇翻「這優質股應該佔你組合比例多少」。

現時你持有的，都是有質素的類別，不過買入價都貴，你在貴的價位，其實唔應該買入得太急。另外，你組合集中在近期較熱炒的類別，已經出現了集中風險，反而你缺少一些平衡組合的其他經濟版塊。

你現時儲下現金先，唔好心急加注。

------------------------------------------------

Q21034：

你好成哥，我現在42歲，擁有以下虧損證券。 我是否應該全部出售, 然後購買其他具有潛在增長和有利息收入的證券？

（夫妻月薪HK$100,000, 家庭支出HK$60,000）, 擁有自住樓宇一個（供滿），剛剛購買了600萬港元的舊樓用於出租[借成六按揭30年]）

1. 0001 長和, 1000股, 買入價$80.55
2. 0006 電能, 1500股, 買入價 $66.5
3. 0011 恒生, 300 股, 買入價 $176
4. 0778 置富, 5000 股, 買入價 $10.64
5. 1038 長建, 2000 股, 買入價$58.1
6. 1310 香港寬頻, 3000 股, 買入價$14.56
7. 6823 香港電訊, 10000 股, 買入價$11.22
謝謝你的無私分享

龔成老師︰

就算再優質企業，中短期股價都會有機會波動。原因不一定是本質出問題，可以係一些與其本質無關的因素。只要長線質素無變，中短期波動我地唔需要理會，長線持有就可以。

你現時持有架股票，係有質素，算係一個收息+平穏增長架組合。以你年紀計，有少少保守。

你42歲，財富仍有基本增長，你可以加入盈富（2800）去平衡組合，以及加入少少潛力股，令個組合增長力高翻少少，咁會較理想。

潛力股︰安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園（1448）。

但你要留意翻，部份潛力股已有輕微過熱情況。只有安碩恒生科技（3067）、阿里（9988）、中生製藥（1177）、福壽園（1448）勉強算在合理區頂部，可分注入貨，其餘要等等。

另外，你現時財富組合都好偏重左係物業上。未來要加大股票比重（避免買入地產相關類股），令成個財富組合更平衡。

------------------------------------------------

Q21035：

請問龔Sir會不會幫忙指教強積金問題？如果可以，以下是本人問題；

本人55歲，已退休2年，未來下半年可能會再投入工作。
最近檢討MPF（宏利），整個基金已有50%增長，基本上是全部放在股票基金上，基金配置如下：

1）中華威力 26%
2）康健護理 24%
3）北美股票15%
4）富逹增長25%
5）亞太股票10%

想知道，這十年期間應如何安排基金配置？以保存現有價值及合理增長至我65歲。
若果再工作供的強積金，如何配置？

另外以下是我現在持有的股票，這個組合適合我嗎？虧蝕的應該換碼嗎？尚想投入多$15-20萬
資金入股票，應該再入那些？何時可再入？

#2800 -3360 股 $招股價
#1398 -1000 股 $招股價
#939 - 5000股 $7.3
#1099 - 800 股 $27.7
#1093 - 3840 股 $8.03
#1044 - 500 股 $62.8
#9988 - 200 股 $197
#1810 - 1000股 $27

謝謝！

龔成老師︰

強積金是長線投資，你要跟自已年齡，去作出調整就可以。

年輕人宜將較多資金投資有增長潛力的組合，例如股票佔70%，到40歲開始慢慢減少，例如45歲減至50%，隨著年紀漸長，股票類別適宜逐步減少，例如60歲就20%以下。

所以，你現時不宜持有咁多增長類MPF，大約佔30%左右好了，否則會太高風險。

是否換碼與帳面虧蝕無關，我地考慮架應該係佢本身質素。如果係有，中短期股價波動，我地唔洗太在意。

現在你持股都有質素和適合你，但阿里（9988）和小米（1810）始終有一定波動性，以你年紀，不宜持有太多，故不要再加注。

其餘股票現時都在合理區，可分注。但由於你已有一定持貨係手，而大市又只係合理水平，未到平宜。建議你現有$15-20萬應等有明顯回調出現，才慢慢去加注，咁會較好。

------------------------------------------------

Q21036：

老師，想問下2388 和0011 ，那個會好一點，另外0778 和0823 ，又那一個較優勝？

龔成老師︰

4隻股票都係有質素，可長線持有。

當中最大分別，係中銀（2388）和領展（0823）除了有若干股息外，也會有一定平穏增長力。

而恆生（0011）和置富（0778）則係純收息股，你預佢增長力唔高，但股息穏定性會比中銀和領展好。

若你係年青至中年，中銀（2388）和領展（0823）會較適合你。而你已經近退休之齡，或者你投資取態係好保守，恆生（0011）和置富（0778）就會比較好。

------------------------------------------------

Q21037：

你好龔sir，想問問龔sir對3988 中國銀行看法，本人持有此股2萬股，高位3.6入，已持有3年，近期此股有點起色，想問問應該繼續守收息？

還是轉股會較好？如果轉請問龔sir有什麼推介，
應如何步處？謝謝

龔成老師︰

中行（3988）由於內地經濟無過往年代咁強，股價無過往咁好，由中美貿易戰開始，中國的經濟動力已有所減少，加上最近的疫情，都是影響經濟的因素。

現價合理，但此股主要係用來收息，但就唔好對股價有太大期望。

你可以睇翻自已人生階段和投資取態，去決定是否換碼至其他股票。若你係較接近退休，或者好保守，這類收息股就適合你。

------------------------------------------------

Q21038：

龔sir，請問如果不計現時值搏率，潛力度的話是否2382比9988更高？

雖然2382未平，但似乎9988已有完善系統，而2382仍有進一步發展的可行性？如果我2382等到市盈率接近25

搏值率會否比現時9988更高？因9988賺錢能力可能比以前弱了。謝謝

龔成老師︰

舜宇光學科技（2382）和阿里（9988）質素都接近，而舜宇潛力度會較高。而近期政府對阿里架整改，有機會對佢長線發展有影響，要再觀察。

但預期唔會係太大改動，主要都係想調整規管。

至於，舜宇光學未來在手機和車載鏡頭，相信都會有唔錯發展，前景正面。

以現價計，阿里（9988）在合理區，可以分注。而舜宇光學科技（2382）最好等佢回多1成較合理，才開始入貨。或現時月供。

------------------------------------------------

Q21039：

你好，龔Sir，一直有睇你d書同fb，更加有上你堂，多謝你幫左我好多。以下有d關於月供問題想問問。
我而家既月供組合如下:

12 $3000
823 $3000
66 $2000
27 $1000

有鑑於我想為組合增加返較高增長力，所以想加返d潛力股，而當中睇中小米1810同安碩3067，想加入去。如果同樣月供$9000，你建議點樣分佈以上組合呢？
謝謝你。

龔成老師︰

先講你現時組合，有一個較嚴重架問題，就係太集中係地產股（港鐵0066都算半隻）。

任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你長遠要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於3成，而單一企業不要高過15%。

所以，你想加入小米（1810）同安碩（3067）的話，可以透過減少地產股供款去調節。

至於比例佔多少，要睇你年紀。若你係年青人，小米（1810）同安碩（3067）這類潛力股加起，佔一半都可以。年紀越大，潛力股比重就要相對減少。

另外，現時大市只在合理區，記得每月留翻一定資金，儲起等大跌市機會。

------------------------------------------------

Q21040：

新經濟股裡面，投資平安好醫生算係安全嗎？因為佢未必受國際政治問題所影響？

龔成老師︰

你都可以咁講，佢相對係不受國際關係影響的股票。平安好醫生（1833）長遠有發展力。

佢係中國領先的一站式醫療健康系統平台，透過「移動醫療+AI」，為每個家庭提供一位家庭醫生，為每個人提供一份電子健康檔案、一個健康管理計畫。

平安好醫生係中國互聯網醫療健康市場的先行者，以平均月活躍客戶，以及在線諮詢量計，是中國最大規模的互聯網醫療健康平台。

企業的業務有潛力，本身有優勢，大環境的配合，都成了這企業的機遇，前景正面，不過財務數據未算好理想。

雖然長遠的企業價值向上，但股價在中短期，可以十分波動，因為市場以「前景」作估值，故此變化必然很大。好難得出平貴的準確數，只能估估下，作參考。

因此，低風險者未必適合投資，若投資者考慮這股，亦不能大注投資，買入後就耐心長線持有，等待這企業改變整個行業的情況，現價算合理區頂，但好波動，月供就得，如直接買入只能小小注。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q19281-Q19300）

Q19281：

你好，見你書都有講到當價格高於股票價值或者市場過熱既時候可以賣出, 但亦有講如果隻股係有潛力可能真係可以一路升落去....

如果好似吉利或者比亞迪咁既情況, 唔知佢地會升到邊但佢宜家又其實係處於貴既水平..咁樣個心理掙扎應該點處理好?

龔成老師：

無絕對答案，我地只有分析佢的增長力。例如一間企業，佢企業價值$300億，現時市值$500億，這已經是貴，其實可以賣出。

但如果企業有增長力，企業價值過2年後預期會上到$600億，這刻雖然貴，但慢慢變回平，因此，這刻賣出有可能買唔翻。

所以我地會考慮佢的增長力，當愈質素愈高增長力的企業，就應該相對更貴先會考慮賣出，這是一個值博率的問題。

同時，會假設在賣出後買唔翻，你就要想想，去到幾貴去吸引你賣，去承受「賣出後買唔翻」這風險。

------------------------------------------------

Q19282：

阿sir, 我上完堂之後，發覺有好多後生仔女上你堂的⋯⋯

感覺到好多後生仔都好識諗，眼見後生嗰批有50-60%，好利害，阿sir你好有吸到力

龔成老師：

哈哈哈，可能我在書同網上，大力叫年輕人會緊張多D財富，因為我地用「先投資，後享受」的方法，我希望多D年輕人可以把握呢段時期，好好累積財富。

或者我講得多，有D效果。

------------------------------------------------

Q19283：

老師我想問問供股係咩
供股又點唔供又會點

龔成老師：

用做生意去講就明，原本各生意伙伴一起做生意，而公司因種種原因，希望股東們再夾多一些錢，投入到公司裏。

若果選擇夾錢的，那就需要投入更多的現金，以認購新股；若選擇不夾，所持股份的比例將被攤薄，所佔公司權益的比例將減少。

公司得到資金可作發展、還債或其他用途。而供股和配股的分別，在於供股的集資對象是所有股東。

所以，供股就是每名股東按持股比例，獲發相應的供股權股數，而持有供股權者，可按定好的供股價，認購新發行股份。為了吸引股東認購，供股價通常會較現時股價有一定的折讓。

供股，就要投入資金，如果你唔想供股，只要不理佢就得。

------------------------------------------------

Q19284：

你好，我21歲我手頭大概有3萬可動用資金,我見你俾左唔少選擇。

但係我見你其他影片都有更多唔同既建議,禁你覺得我應該買邊隻,同埋點分配資金。(唔係好想月供,因為自己本身有月供基金)

仲有想問中海油883,
俾美國制裁長遠會唔會升翻上去9蚊

龔成老師：

我地投資，就是建立一個「財富組合」，當中有幾個好重要的條件，第一，優質股，第二，價格唔好貴，第三，適合你。

我盡量會講一些較有質素的股票，不過，你都要自行選股，你都要有學懂分析的能力，選擇一些你認為值博率較高，自己較認識，以及適合你的風險年齡的。

如果不懂選擇，就盈富（2800），又或較高增長力的安碩恒生科技（3067）可長線。後者的回報較高，當然風險都會較高。

中國海洋石油（0883）雖然質素都算有，但不是最高質類別，佢對油價較為敏感。

雖然佢都有一定的規模，但卻不是最高質素的企業，這是由於佢的產品自主力較弱。

石油是商品，當中沒有差異性，佢地要將石油賣出，只能跟國際油價，這令佢地處於被動狀態。沒有價格自主的能力，這令佢地的獨特性有限。這類商品企業，都可投資，但就要明白不是最高質的企業。

由於質素中等，唔建議大注投資，但相信油價上翻佢會上升的。

------------------------------------------------

Q19285：

呀sir，我就睇完你本2百萬富翁！好想多謝你分享你既故事俾我地知，想問你d書有無電子版咖？

同埋睇到最後話可以去shing kung fb page睇你當年既旅程相片，點解唔見有既？係咪公開咖，想睇

另外，我兩至三年前上你既堂有月供1211，升左好多，如果遲下跌番都會繼續供，多謝

龔成老師：

我部分書有，部分就無。電子書：

https://www.enrichculture.com/products/9789888599448

當年既旅程相片，該FB應該有的，你細心在「相片」「相簿」裡找找。

你跟翻《80後2百萬富翁》當中的FB網址，要加該戶口做朋友先得。

比亞迪（1211）我自己都會長線持有，如加注，真的等跌先。

------------------------------------------------

Q19286：

龔成老師你好，想問下如果一間上市公司宣佈將其下業務分拆，對於其股價係咪利多於弊？為了釋放價值推高股價？謝謝！

龔成老師：

無絕對答案，每一次都會獨立分析。

所謂的分拆上市，就是將佢某些業務，從這間上市公司分柝出來，然後以一個獨立地位上市，佢會將該業務的部分股權賣出，令公眾可以持有。

佢就會因此而得到資金。

如果企業能好好運用這資金，再投入落翻間公司發展，就對企業有利。

另外，當業務獨立上市，就會出現了具體的市場價值，如果該業務好值錢，只是市場一向忽視，到獨立上市後就見到真實價值，由於原上市公司仍持有該業務一定的股權，所以當柝出來上市的公司股價上升，原公司股價都會上升。

------------------------------------------------

Q19287：

老師你好，我最近幾個月開始睇你fb及書，開始知多左儲資產的概念。

我都好中意你書入面會有好多formula教我計數，因我本身數學真係差，想問下我點計複息回報？

比如我每月$10000投資，一年10%，5年會得到價值幾多既資產？有方程式嗎

另外，想問下1299友邦，1448福壽園的合理價範圍係點？

1448我見你書有介紹，感覺佢業務獨特，但1299少見你評論，想聽下你意見

龔成老師：

複息計算，你要用複利息表，成一些公式都計到，《80後百萬富翁》都有公式表。另外，你上網可以找到一些程式，輸入就有答案。

如果你上面的問題，會滾存到$73萬。

友邦保險（1299）不差的，企業有一定的質素，有品牌、有規模，生意雖然做到較大，但仍有增長力，不過就不是高增長，只是平穩增長。

不過盈利就有少少波動，但這都正常，因為保險公司有投資相關收益，所以這亦會令股價略為波動。

前景方面，正面的，佢保持不同市場的發展，利用本身的品牌去加強新市場業務，而長遠的市場仍有增長潛力。

這股有長線投資價值，現價就處合理區頂，長線持有無問題。

至於福壽園（1448）有質素有發展力。管理層的野心很大，投資後不要升少少就快，要耐心持有，等長期更大的收成。

------------------------------------------------

Q19288：

龔成老師，想問一問你意見。如果想移民前賣D有升左好多的基金(多年前買入，升左50-100%), 依家基金價係record high。

請問依家係唔係好時候賣，還是可以再等等因美股及亞洲仲升緊。。。。(計劃大概出年年中走) 謝謝你。

龔成老師：

如果你有資金需要，或移民等因素。可以賣一半或全部。

現時的投資市場，部分新經濟類的版塊，的確有少少過熱，雖然未到好誇張，但你部分賣出是可以的。

當然，無人知賣出後升與跌，得上述算是較平衡的做法。

------------------------------------------------

Q19289：

Hello龔sir，無意中係facebook發現左你個page, 我係新手，想買你既書增加財務知識，點樣了解一間公司既價值/合理價，但人在澳洲，下年三月才返香港。

請問你有電子書版本嗎（我可以用IOS同kindle, kobo) ，我上網睇過你好似得Android 版本，或者有冇其他書你可以推介比我呢幾個月睇？

我最近先睇左poordad richdad認識投資既理念。

另外你覺得美股係唔係都可以用同一套理論？我見你成日建議人買/供盈富，美股ETF如SPY VOO等係咪都可以？
謝謝你

龔成老師：

我部分書有電子書的，你可以上網睇睇。《股票勝經》適合你。

https://www.enrichculture.com/products/9789888395767

至於美股，原理都是一樣。

我平時所講的，是價值投資法，即是巴菲特所用的方法，原理是買股票就是收購一間公司。對於全球所有的成熟投資市場，如美國、日本、歐洲、香港，都適合。

你可以月供美股的ETF，如VOO、QQQ，都適合你的。

------------------------------------------------

Q19290：

Hello 龔sir, 有些問題想請教。

現在月供$4000 盈富基金，如果想在大約3到5年後，可以有兩百到三百萬，請問:

1. 我應該要再月供邊幾隻股票？
2. 同埋供款要再多幾多？（我大約可以再供多$5000到7000，唔計盈富的$4000）

謝謝！

龔成老師：

1）如果要5年達到$200萬以上，你每月要投資$20000以上，先能較合理地做到。

除非你非常進取地投資高風險高回報的股票，否則較難做到（但唔建議）。

建議你投資平穩增長股+潛力股。

你可以考慮盈富（2800）。

另外再加：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：安碩恆生科技ETF（3067）、阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。部分要等回少少先入。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

2）最好每月月供+可投資的金額，合共有$20000以上。

如果金額不足又好想做到，可以有一個方法，就是花大量時間去尋找潛力股，只要比市場早一步找到就有機，同時要明白風險。

你一定要研究得好仔細，每隻股票要小心研究企業發展及企業價值等。

------------------------------------------------

Q19291：

龔sir, 前男友用我ac買咗00430，96000股@0.079 。但宜家得0.066，我唔知應該坐定放好ar

我唔係好識，唔該曬你

龔成老師：

東方興業控股（0430）經常出現虧損，從業務質素上，見唔到有投資優值。

這股股價上落大，你賣出較好。

------------------------------------------------

Q19292：

Hi 龔成老師 我黎緊明年會儲到20萬 想問如何利用20萬再賺更多既錢？

我剛才聽完你講夢想既片 我個夢想係買樓 所以我好希望靠自己置業。唔該晒

龔成老師：

你可以利用《5年買樓4部曲》這書所教的方法，一步步去買樓，這書很適合你現時的情況。

持有$20萬，你可以用來適當增值，但如果你投資經驗唔多，就建議你投資優質、平穩增值類的股票。

你可以考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q19293：

成哥，請問你會唔會買8隻股務求自製1至12月都有股息收架？

我感覺有股息收係好，但好似好分散咁

龔成老師：

唔會，因為這只是一個左右手數的問題，無必要這樣做。

你建立一個分散風險的收息股組合，可以，但就不應因為想每月有息收而這樣設計。你或者可以將一年的股票，每存入一個戶口，然後除12，下年再每月取回12分1，這已經是一個自製的方法。

------------------------------------------------

Q19294：

老師,之前聽你講過收到股息之後要再將股息投入返先可以做到複息效果,

我想問,若果我將A股收返黎既息去買B股,B股收返黎既股息買美股ETF的話,甘樣可唔可以做到複息效果呢，thanks

龔成老師：

其實都可以，只要有「再投資」的動作就得。

最重要是你之後投資的，要「有質素」，同時唔好貴，要合理或平。

------------------------------------------------

Q19295：

Sir，我有一個迷思: 如果賺少少就放，咁我再投資嘅本金應該會大左，即係好似滾雪球咁樣。

只要我再投資喺一啲有價值嘅股票，有賺先放。咁樣總共所賺嘅唔係應該會更多嗎？真的會比長渣唔放的效果差嗎？

龔成老師：

當一隻股股票升左，例如$100升到$120，你賣出，將資金投資另一股，如果另一股的回報高於原股，你會有著數。

但如果原有股的增長更強呢？例如你持有388，佢由$4升到$400，你升少少放，有信心找到另一隻高增長股嗎？

------------------------------------------------

Q19296：

老師，有時見優質股由高位跌左，雖然想入，但很容易害怕， 如果它甚至下降20%，點算？

無法猜測趨勢

還是等待它以上升趨勢購買？

龔成老師：

害怕是一種心理因素，如果你要成為有實力的投資者，就要理性，不要被這些因素影響，我地只要集中「質素」「平貴」「值博率」，就得。

同時，你唔會估到佢之後的股價走勢，無人能估到。

所以，我地見到優質股合理時，會分注買入，同時留現金，買入後有可能下跌，但我地有現金就不用擔心。

------------------------------------------------

Q19297：

龔sir你好,唔好意思因為自己有個問題唔知可以問邊個所以希望可以問下你的意見,因為我近期有啲事比人呃曬啲錢,因此導致我銀行戶口接近無曬錢

信用卡戶口已經接近full limit,同時亦欠好多間財務公司的貸款(而呢啲貸款會由下個月開始就要供款)

因為我計過自己咁多間財務公司的每月還款額後係多過自己每個月的人工,呢個情況我應該先致電呢啲財務公司問問可以延長貸款年期嗎?(因有好多間我都選擇了分12個月)定還是需要做債務重組?

本人今年23歲,如果最壞情況是否真係要申請破產?

我至少已經無咗30幾萬,基本上來源都係信用卡同貸款,自己銀行戶口現時得番3000幾蚊,每月人工得15000左右

依家疫情問題萬一停工我真係唔知點算,希望龔sir你可以比啲意見我,謝謝

龔成老師：

你用信用卡及財務機構去解決問題，只會將問題變大，你要停止進行這動作。不要再增加負債。

如果你23歲就申請破產，基本上會影響你之後的一生，破左產你之後好多野都唔做得，影響好大，絕對唔好行這一步。

你可以用財務機構搞債務重組，延長還款期，令每月要還的資金少D。

另外，你要想方法開發收入，當一個人在絕路時，往往是佢的突破機會，做兼職、小生意、銷售等等，做一些你平時唔敢做的事。

你現時仍在得翻身，但就要你盡100%努力去開發收入，一星期有7日，我相信你總有空閒時間，你現時要好好利用這些時間，雖然會比較辛苦，但你都要面對問題。

當你突破左後，你會發現現時的數目不是大數目。加油！

------------------------------------------------

Q19298：

你好呀老師，如果我資金只能夠買樓新210呎單位，你建議我先上車嗎？

龔成老師：

最好當然有250呎，但如果佢呎價吸引，都都可考慮，我建議你睇睇《5年買樓4部曲》，睇完你會有更好的概念及策略。

你可以先買細價樓，再在日後轉大價樓。

當然，你要小心分析平貴，唔好比「入場費」「上車易」，這些因素影響，最重要睇物業質素、平貴、呎價、預期租金回報率。

------------------------------------------------

Q19299：

老師，終於睇完第一本！80後百萬富翁！睇完真係忍唔住要寫個msg多謝你無私的分享。我都係80後，睇完我真係相講我同你係相同思維模式嘅人，不過當然你叻我好多。

以前我有好幾次都有諗過學下投資買股票，最記得中銀上市想抽行出第一步但俾長輩阻止咗。問朋友個個都話好危險，睇新聞又成日講到好複雜咁令我卻步...睇完你本書我完全明白以前有幾錯，我早啲睇到你個page 便好。

睇完我set個短期目標係你課程學費的10倍，到了我便同你報名獎勵自己，你等我，龔sir

龔成老師：

有心唔怕遲，比起投資，我希望你日後要變得更有執行力，唔好理別人阻止，唔好因少少事就放棄！

定目標，大膽做！

期待你盡快得到學費10倍的財富，盡快上堂，然後再用知識將你的財富再增大10倍！遲D見！

------------------------------------------------

Q19300：

你好龔sir，小弟有幸幾年前機緣巧合在書局看到你的著作大富翁致富藍圖及財務自由行後深受啟發，自此開始不斷增進自己的財務知識，亦看了很多你及你所介紹的書，一直視龔sir你為師父

小弟今年38歲，幾年前在大灣區買了一個國內物業供父母退休及作長線投資用途。

明白現金長期只會不斷貶值，當時收入亦不俗，於是用了國內最大的槓桿7成按揭。因當其時憧憬國內物業升值，而無視了國內銀行的高利率5.88厘。

到了今年年初看到股市大跌，本準備開始供一些優質股，但同時發覺香港樓市也有所調整，兩者選擇下，我選了買香港樓作收租用途，幸運地現時銀行估價比買入時升了一成多。

由於現在要同時供兩層樓加上我生活上的基本開支，每月收入跟支出剛好打和，儲不了錢。我也明白我現時資產偏重了在物業版塊，但我手頭上的資金只剩20多萬，如果宜家再供股或槓桿買債是否太進取？

其實我真的有點後悔太早買內地樓，因現在也不能回去，忽視了高利率產生了高的負現金流變成負債

龔sir,小弟十分喜歡你平時發的post,非常正能量，但我很好奇你跟富爸爸作者羅拔清崎都不怕講出富人的秘密，因為如你所說富人係利用「系統」的運作剝削其他人，而令到自己財務自由，如越來越多人明白系統會變質嗎?

小弟文筆不好，可能表達得有點累贅
最後祝龔sir身體健康，資產大升值

龔成老師：

我地不會怕講出有錢人的秘密，你見我在《財務自由行》中，講出了真正的致富方法，只要你跟著做，基本上就能財務自由。

但對於絕大部分來說，佢地由於有固有思維，所以根本唔會接收這些新思維（就算這是正確），佢地會認為打打工、買六合彩是最好的方法，無想過一些能一步步致富的方法。

所以，有錢人的賺錢方法，已經是公開的秘密，但一般人仍不會去學，正是固有思維影響。

至於你的物業，始終是資產，又不用太擔心，但按揭利率去到近6%的確有點高，如果租金回報率不高的話，就無法產生正現金流。除非你認為無質素，否則，你持有就得。

你38歲，仍是財富增值的時期，因此，你唔應該投資槓桿買債這類現金流類的項目，應該著重「增值」。你可以投資「平穩增長股」+「潛力股」，這方向會較適合你。

你首增加股票知識先，之後再將資金投資股票。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。