【龔成問答信箱】（Q22041-Q22060）

Q22041：

Hello 龔sir 我係你股票班初班既舊生 最近睇緊12號恒基既年報 有d問題想問下

請問本年度盈利後面點解仲有一個本年度收益總額？唔係好睇得明 除稅及重新分類後之本年度其他全面收益淨額 即係點？

仲有佢既基礎盈利14899係點計出黎呢？我嘗試將公佈盈利10192 加 "投資物業及發展中投資物業之公允價值（減少） / 增加" 2413 都計唔到 14899

聯營同合營公司既盈利需要剔除嗎？

最後就係buffolio顯示既恒基 PE係用基礎盈利定公佈盈利計算呢？我需唔需要加減其他數字去計算正確既PE?

唔好意思 有好多問題

龔成老師︰

這頁"綜合損益及其他全面收益表"，係分析估值時，我都唔會特別去參考。因為佢主要係一些非營運性變動，無太大參考價值。

至於基礎盈利，主要係扣除左"物業公平值變動"，所造成之影響。

你可以參考翻2020年年報P.226，你用"本公司股東應佔盈利"，再加翻所以公平值數字(因為當年公平值，都是負數。若當年公平值係正數，你就要倒轉，扣除翻佢。)，就會計到14899個答案。

水牛網顯示，會係用用"本公司股東應佔盈利"作計算(即包含公平值之影響)。

------------------------------------------------

Q22042：

龔成老師你好！好想同你分享個好消息！我同丈夫成功買到第2層樓啦！難得睇中啱心水地區尺數既低水單位，所以決定賣哂所有股票同埋加按少少層樓俾首期

首先 我好想多謝老師你強調儲資產呢個概念，雖然我啲股票唔係大賺，不過起碼不經不覺已經儲到一筆可以靈活套現既資產，全靠呢筆錢 今次先有機會入市。

不過宜家手上已經冇哂股票 現金亦唔多，要供2層樓亦都令少左現金流去儲股票

再加上黎緊首要目標係可以儲到筆錢裝修新屋，想請問老師我應該如何分配長線同短線既投資方向？

現階段應該全部保留現金用黎裝修？還是繼續以月供方式儲貨？

謝謝老師建議

龔成老師︰

先恭喜你，又成為業主。

我地財富組合除左要有增長力和質素外，平衡性都好重要。你現時資產明顯係偏重於物業類，長線你應集中加回一些優質股，以免過於集中個別資產類別，而產生風險。

因此，你新資金建議優先投入股市，去令成個組合更平衡。

至於先裝修，定投資，你要從生活所需和財富增值，2者之間去取個平衡。

但我建議，點都要每月做番少少月供，唔好完全係零。因為你現時係零股票，而大市又只係合理水平，這個狀態唔理想。

另外，由於你要供2層樓，令每月可投資金額減少。你最好盡快將另一層樓放租，去提升自已可投資現金流，咁會較好。

當然，你現時現金太少，都要留一定的現金先。

------------------------------------------------

Q22043：

老師你好，我又有問題想問。看完"80後千萬富翁"後，有一個疑惑

假設我辭職後，以全職股票投資者創富，之後希望分散投資，買入一間物業，問題就來了：

1.沒有工作，全職股票投資者，可申請按揭嗎？

2.同時，過到壓力測試？

3.成立空殼公司，買入物業是否更好？

龔成老師︰

1) + 2)你可以利用「資產方式」申請按揭，而非一般有收入人士，所用的「壓力測試方式」。

或者你可以加入擔保人，都有機會可以提升你成功申請按揭機會。

但坦白講，無收入要做按揭，一般都會較難。

所以最好在你有穩定收入時，處理好物業這部分，之後先辭工。

3) 成立空殼公司買入物業，係可以節省不少稅項。但空殼公司本身，都有不少營運和買賣成本，例如要會計師每年核數、買賣時需要律師評估資產等。

加上公司買物業要支付「買家印花稅」15%，因此否則未必值得咁做。

------------------------------------------------

Q22044：

1:假設，本金10萬，每月再投入1萬。如果比自己目標係每年升15%,咁應該點計，因為以年計

1月資金可用12個月，但12月資金只用1個月。咁我應該用22萬乘15%,定應該點計好?

2：老師，想請問下，假設如果雙方同意，我冇任何牌照既情況下，可以幫人做投資嗎

3:老師想請問下，假設現在有1百萬資金，用了5年時間儲錢加投資得來，有買樓需求，可選擇用來買樓首期或繼續用股票滾下去，

但如果買左首期後就變左股票果邊滾落去既速度慢左，面對咁既情況應該點做好

4：老師，想問如果抽到居屋，又比左首期買左之後，可唔可以出租？

龔成老師︰

1) 唔好諗到太複雜，我地唔係要一個好精準架數字，因為投資中間會有好多變數，未必一切如你估算一樣。

但係你要知一個大概數字，係有意思，可以作參考架數字。

以你情況，可以簡單點，當你當年每月資金，係年尾一次過投入。咁樣計算，簡單之餘，出來結果都會相對保守。

第1年回報︰22萬 x (1 + 15%)
第2年回報︰(第一年回報 + 12萬) x (1 + 15%)....如此類推

2) 如果是《證券及期貨條例》規管範圍，基本上就要有牌照。如果你只係幫下屋企人手，當然另計。其實，當中好講有無「利益」在其中。

3) 如果你係有實際需要，去置業的話，你係可以動用這筆資金。其實物業都係一個資產，都算係一種投資。

但最好，係你置業之餘，都有一定資金，用投資優質股，令成個組合唔好偏左係物業個邊，咁就最理想。

4) 根據正常程序，係要補左地價，先至可以成間居屋放租。

而且，投資物業放租，在香港現時法例下，是不能以高成數按揭進行的，金管局定明，如果要投資物業收租，最高的按數不能高於5成，高於5成者，只能自住。

當然，這是政府的規定，但坊間的做法，往往是另一回事。但你要明白佢地的做法是犯法的，因此一定有風險，做與唔做，自行決定。

坊間不少投資者，就算高成數揭揭都會照放租，其實你照去地產經紀同你講你想這樣，佢地就明，會照同你做，當然，細節位不便在這裡講太多，有機會你上堂見到面，我分享坊間的做法。

記住，所有事情都會有風險的，這是一個值博率的問題，我只可以話，坊間不少人都會照做。

------------------------------------------------

Q22045：

龔sir，你好!多謝你一直耐心回覆讀者的提問。我都其中一個支持你的讀者，你的著作特別是年報勝經，寫得很好。我亦因此開始學習睇年報。

最近我投資左百度(9888)，現價大約210蚊左右。投資原因主要是看好雲業務同智能駕駛的前景。我相信這兩個範疇能配合中國未來的大方向。

配合本身網上廣告業務收益穩定，有利百度發展新增長點。

百度最大的擔心是競爭者多，在今日「全民製車」的時期，百度的賣點只是研發時間比同業長，比同業更早開始投入研究。講到這裡，就引伸出另一個憂慮，就是巨大的無人駕駛投資能否變現。

我明白股價反映公司價值，同時亦反映了市場的對於公司的期望值。但在這裡，我唔識判斷「市場期望值」這件事。

不知我的看法是否正確，百度目前的市盈率大約9倍左右，應該是屬於健康水平。 未知老師的看法如何? 現價應否再加注?謝謝!

龔成老師︰

多謝你的支持!

百度(9888)為全球最大的中文搜索引擎，是內地用家搜尋資訊主要對口，2019年百度用户規模突破10億，而百度App日活潑用户2億，信息流位居中國第一。

當你坐擁不少資訊和客戶群，就可以利用佢地去發展很多不同業務。

雲和無人駕駛，都會係有業務當中較有潛力部份。百度的無人駕駛技術，其實唔錯。雖然越早研發，唔代表一定可以越早市場化。

但百度在無人駕駛技術，無論研發和運作，都累積左一定經驗，有助提升佢成功市場化機率。若無人駕駛技術成功市場化，相信會成為集團盈利的新增長點。

由於無人駕駛市場未算成熟，就算有較多競爭者進場，都未必會造成較大影響。加上集團有一定技術，係競爭上相信會有優勢。

這些部份發展雖有潛力，但都存在很多不確定性，我地好難完全掌握將來發展狀況。因此，係估值時，對這些不確定性較高的分部，要保守少少。

百度現時收入，主要來自在線營銷服務。這部份，集團有一定優勢，預期長線發展正面。

百度在規模和質素上係有，但你預佢中短期會較波動，不宜持有太多。若你資金好充裕，要價加小注係可以，否則等較大回調才加注，會比較好。

------------------------------------------------

Q22046：

龔sir你好，我對於股票買賣只是初哥，之前都是有少少人云亦云既心態作買賣。而我丈夫曾經上過你既堂，從他口中得知你的FB page，最近經常睇你既page增加投資概念。想問下你嘅意見。

本人37歲，已婚未有仔女。月入$58K，丈夫月入$20K多少少，收入算穩定，已購入一層自住物業，仲有17年需要供樓。

之前一路只保守地作儲蓄，大約有流動資金$100萬，扣除供樓，生活費同雜費，每月可儲蓄$24K，想可以好好分配同計劃點樣做好投資理財，為將來有小朋友及退休生活作計劃。

之前買入一些收息股票為主。如下：

0005 匯豐 70.5x1200股+46.2x2000股
1398 工商銀行 6.41x 15000股
2800 盈富基金 28.72 x2000股

1. 睇了你的FB page 後想嚐試月供股票，考慮緊每月用一萬蚊月供0002，2318，6823。這些組合適合嗎？

2. 現在持有既股票組合適合繼續長期持有？定放售？

3. 如果買潛力股，你會建議買邊隻？

期待老師的回覆，非常謝謝！

龔成老師︰

1) 我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你37歲，應以增值為主。平安(2318)係可以，但其餘2隻只係收息股，增長力較弱，唔係太適合。我建議你用「平穏增長股」 + 「潛力股」作組合，去創造一個增值平台。

現在你每月先用5成儲蓄，即$12000做月供。其餘先儲起，用一邊月供一邊儲蓄的策略。

月供方面，你可以選擇投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)

或潛力股︰中生(1177)、福壽園(1448)、小米(1810)、安碩恒生科技(3067)、港交所(0388)、阿里（9988）、騰訊（0700）、ＧＸ中國電車基金（2845）、三星FANG ETF（2814）。

由於你投資知識不高，因此可較集中在平穩增長類股，至於潛力股，只宜小小注(不多於3成)。最好是你先提高投資知識，等到你有一定知識和經驗，才慢慢增加潛力股比例(大約5成)。

現時大市只是合理區，你現有100萬資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

但我建議，在你實行以上計劃前，先儲起半年開支(若你預將會有小朋友，都要預留埋這部份開支)，作為應急之用，咁會較穏當。

2) 你持股雖然都有質素，但匯控(0005)和工行(1398)都係收息股，你年紀不宜持有太多。建議沽出部份，慢慢換至上述股票，會較好。

3) 我上述潛力股，都適合你，但你投資經驗較淺，要控制個比重，唔好佔多過組合3成。

另外，大部份潛力股現價都略貴。現時只有安碩恒生科技(3067)、ＧＸ中國電車基金（2845）、比亞迪(1211)、阿里（9988）、中生製藥（1177）、福壽園(1448)勉強算在合理區頂部，可分注入貨，其餘想買就要等一等。

------------------------------------------------

Q22047：

龔成老師，你好，最近睇左幾本理財書，當中都有一個對沖概念，但睇返sir的書，或fb的對答，好似都好少呢方面既資訊，是否同你理念唔一樣？

另外我本人都買左d科技股，例如阿里巴巴和小米，都諗住有排都唔放，但又唔想繼續供落去，想供d其他行業的（你話同一產業不是多過30%)，

睇左眼科藥物公司兆科眼科，或者是德視佳，一個造藥一個行醫，你會點睇？

龔成老師︰

我主要係建議透過創建一個合適、平衡、有質素的財富組合，去做到在合理風險下，爭取最大回報。

跟一般對沖，去平衡風險有所不同。而且對沖唔易玩，唔適合一般投資者去操作。

兆科眼科（6622）係一間眼科製藥公司，致力於療法的研究、開發及商業化。通過自主開發或許可引進已建立起包含25種候選藥物的全面眼科藥物管線，涵蓋影響眼前節及眼後節的多數主要眼科適應症。

集團初步將策略重心放在中國五大眼科適應症上，包括乾眼症(DED)、濕性老年黃斑部病變(wAMD)、糖尿病黃斑水腫 (DME)、近視及青光眼。

佢已建立起由13種創新藥及12種仿製藥（按國家藥監局的《藥品註冊管理辦法》分類）組成的眼科藥物管線。創新藥管線包括8種候選藥物，若獲批准則有潛力成為中國市場領先產品。

仿製藥管線包括6種潛在中國首仿藥。集團擁有8項已頒發的中國專利及一項已頒發的歐盟專利，並提交6份中國專利申請。

佢已於廣州市南沙新區建造的生產設施，根據中國、美國 及歐盟cGMP標準設計及興建以用於生產眼科藥物，其生產能力完備並可用於商業化規模生產。

由於未有盈利，風險度會較高，加上企業規模不大，因此投資值博率未算高。

當然，由於規模不算好大，若果企業之後成功，可以好勁，但失敗對股價都有很大影響，因此是有潛力，有風險類。

只可以話，這類股，唔建議大注，當小注投資下好了，同時要明白當中的風險。但用作月供，就不建議了。

德視佳（1846）主要於德國、丹麥及中國以「德視佳」品牌提供視力矯正服務。

佢的服務可大致分為屈光性激光手術（包括全飛秒激光手術及飛秒激光聯合準分子激光角膜原位磨鑲術）、後房型人工晶體（ＩＣＬ）植入術；晶體置換手術（包括單焦點及三焦點晶體置換手術）及其他（包括用作矯正眼晴屈光不正的ＰＲＫ／ＬＡＳＥＫ及角膜基質環段ＩＣＲＳ植入手術）。

見佢的財務數據都不差，生意與盈利都有穩定增長，現價算是合理，但不是高增長類，同時由於規模未算好大，可小注直接買入，但不宜月供。

另外，我地月供係一個長線計劃，最少供3年，並持有5年，才會有較佳效果。因為月供可以拉平均個買入價，減少買貴貨風險。

若你經常供一陣就轉，會影響到平均價格效果，令最終回報不確定性增加。

------------------------------------------------

Q22048：

我想請教一下，你覺得應該怎樣教育兒童理財？因為看過你的文章/書本，你都提及學校缺乏理財教育！謝謝！

（期待可以在澳門上課的澳門讀者）

我兒子8歲，有時會問我供樓借貸，公司借錢，點解麥當勞可以咁成功等等，我自己本身不是商科，所以都係google咁簡單講俾佢知

龔成老師︰

我建議你同佢玩「大富翁」、「現金流」這些遊戲。

如果佢8歲已經有這些問題，我相信佢對這方面好有興趣，好有潛質，日後可以好有成就，你可以找一些成功的名人、商人傳記之類的兒童書比佢睇。

書本和遊戲，都係教授小朋友理財的理想方法。好似大富翁遊戲，小朋友可以從享受遊戲同時，也會學到不少經濟理論和操作模式。

另外，書本可以令佢從前人身上，學到一些經驗。當然，佢年紀比較細，較難理解我們成年人睇架書籍。

最好先選擇佢年紀水平，和他有興趣的書籍入手。之後才慢慢加入一些，未必是他有興趣，但又對他理財知識有幫助的書籍。

家長在遊戲和閱讀時，要多加讚賞，對佢學習會有激勵作用。

如果你本身無太多理財知識，就係教授小朋友同時，自已都要增進一下，甚至一齊學習。可以作親子活動之餘，都可以提升雙方學習的樂趣。

------------------------------------------------

Q22049：

老師：我在重整現時持有的股票組合，由於未到8月上課時候，唯有再麻煩老師，唔好意思。想請教以下幾隻股票是否優質和他們的合理價範圍。謝謝！

405
939
2822

此外，以上三隻股票是否都屬於平穩增長股呢？謝謝！

龔成老師︰

這3隻股票，都係優質，同時現價都在合理區，可以分注入貨。

越秀房產（0405）和建行(0939)係收息股，增長力較弱，主要係收下息。以你年紀，收息不用佔太多，大約2成左右好了。

南方A50（2822）算係平穩增長股至潛力股之間，有一定波動性。此股適合你年紀，可以考慮。

------------------------------------------------

Q22050：

老師你好！我居住在澳門，今年45歲，自住房屋市值約900萬還欠貸款400萬，每月供17000。

另有一間市值約600萬已供滿收租約9000（澳門租金較低）

因疫情上年失業，現新工作每月薪金只有18000再加上9000租金，每月收入共27000，每月供樓保險加上生活開支剛好月月清，另有60萬積蓄想投資股票市場。

現時手頭沒有揸股票，想問應唔應該賣咗收租樓，還清400萬貸款，剩餘200萬用來買平穩收息股？還是只用60萬積極蓄投放股市？

另外想買老師你的書，我是股票初學者，適合先看那一本？

龔成老師︰

其實物業都係一種資產，除非你收租物業升值潛力真係好弱，或者質素好差，否則持有用作收租，咁會較好。

至於增值，你可以先用這60萬去做。由於你已經有2個物業，故你新資金應先集中係優質股類，以免出現過度集中風險。

以你45歲，可以選擇一些「平穩增值股」+「潛力股」作投資目標。

由於你現時無太多投資經驗，潛力股這類風險較高的股票，你就不要持有過多，最多維持1-2成好了，甚至先集中係平穏增長股類。

到你有一定投資經驗﹐潛力股比重可以相應調高，佔組合約3-4成，到時要視乎你投資經驗多寡，和了解這些股票程度而定。

大市現處於合理水平，那60萬資金，你可以先用20-30萬，以"分注"形式慢慢入貨。餘下資金，就等大跌市機會出現，才大力度掃貨，並長線投資。

你可以先睇我架《80後百萬富翁》、《財務自由行》和《股票勝經》，都適合初學者。

------------------------------------------------

Q22051：

龔成老師你好，剛開始月供股票3個月，其中一隻月供2382 平均價179，佢今個月升左好多

我係想長線持有，但遇著咁大升幅，平均價就會拉高 變貴左。心態上係繼續月供 還是停供一個月先？

龔成老師︰

舜宇光學（2382）係有質素和潛力的潛力股，若你係年青至中年人士，月供這隻股票係可以。

現時此股已經偏貴，但由於未到好貴，我地係唔需要停左個月供。短期成本價，係會有被拉高情況，但係月供係一個長線計劃，長遠個價都會拉平衡。

除非佢再升到一個好貴水平，我地可能要減少股款，甚至停供。但大前題係，你有無定平貴的能力。若果無，我建議你不理價值升跌，一直去供。

因為你自行調整供款，如果時機不對，反而大大影響左你平均價格的效果。所以，若你投資經驗較一般，我建議你選好優質股後，唔好理個價，一直供，反而對你最有利。

------------------------------------------------

Q22052：

龔老師你好，我今年31歲，月入二萬五，月存二萬，手持8份儲蓄保險，有啲五年期，有啲十年期，有啲三十年期（大約150萬左右），

有七十萬流動資金，另外有三十萬買咗股票，但坐緊艇包括:

9988（200)$280買入
175 (2000)$31.5買入
1810 （1200）$29.5買入
0066（2000）$38.9買入
1801 （1000）$90.6買入

龔老師我二年後想買樓，想用呢70萬用二年時間滾到100萬，請問有咩建議。麻煩指點迷津

龔成老師︰

首先你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

你持有股票，都係有質素，長線持有係無問題。但信達生物（1801）仍處於燒銀紙的狀態，不確定性好大，暫時唔建議加注。

我地投資股票，其實等同投資一間企業。希望透過其自然增長，以達至財富增值的目的。所以，我地投資一定要較長時間。而2年只算係一個短時期，股價好易出現波動，增加回報的不確定性。

因此，你這70萬不宜作太高風險投資。我建議用盈富(2800)，再加收息股作為組合。

收息股︰港燈（2638）、香港電訊（6823）、工行（1398）、恆生（0011）、置富（0778）、陽光（0435）、深高速（0548)。收息基金(3110)，都可以。

大市現處於合理水平，那70萬資金，你可以先用一半，以"分注"形式慢慢入貨。餘下一半就等大跌市機會出現，才大力度掃貨，並長線投資。

但這個組合增長力，未必足以2年內由70萬滾到100萬。但佢勝在穏定性較高，在只能投資2年的情況下，這個配置會較為穏當。

另外，"保險"主要係用來防守，買足夠保障就可以。儲蓄成份架保險，唔係唔可以買。如果你個人風險承受能力好低，或者完全無投資能力，這類保險都有持有價值。

但始終係財富增值角度，佢幫助好有限，一般我都就唔建議太多。做財富增值，應集中投資在優質資產(如優質股、物業等)，效果才會理想。

你現時持有儲蓄保險，實在係太多。如果佢了一定時間的，你可以保留。但你還很年青，我建議你長線計，應該取消部份，將資金轉至優質股去做增值，會較好。

------------------------------------------------

Q22053：

龔sir，你好！有幾個投資問題想問。

1. 投資黎講，係咪唔應該買保險，或者唔應該買有儲蓄成份保險？

2. 按回報計算，應該買50年樓齡二手樓，還是一手樓？

3. 未來咩房型或者尺數更適合投資？

龔成老師︰

1) 答案係不一定。

我地理財，要做到「攻守兼備」，保險、備用現金等是防守，但防守部分不用太多，餘下資金就應進攻。保險最大的作用是「保險部分」，反而投資作用一般不大，即是買保險，最大作用是醫療、人壽、財產等的風險轉移，將你不想承受的醫療費用等不可預測支出，轉嫁比保險公司。

儲蓄成份架保險，唔係唔可以買。如果你個人風險承受能力好低，或者完全無投資能力，這類保險都有持有價值。

但始終係財富增值角度，佢幫助好有限，一般我都就唔建議太多。做財富增值，應集中投資在優質資產(如優質股、物業等)，效果才會理想。

2) 一手樓，好多時都會有一定溢價，變相令你買貴貨，影響長線回報，所以我一直都唔係好建議買一手樓。

至於50年樓齡二手樓，由於已有一定樓齡，除了本身保養成本會較高外。向銀行貨款也較困難，因此投資價值都較一般。

2個選擇，其實都唔係咁理想。除非50年樓係好平，租金回報率又高，而且係一些大型屋苑，才值得考慮。

3) 房型其實無特定，尺寸最好至少有300呎，可以附合到一個家庭的最低限度需要，投資價值會較好。

其實我地投資一間物業，最重要都是睇翻該物業的質素，呎價，預期租金回報率，特別是利用「呎價，預期租金回報率」去比較同區同類單位，以確定該物業的平貴水平。

另外，你再要審視其升值潛力，未來地區上、交通上、生活等等的配套發展，才去下一個結論，咁會較好。

------------------------------------------------

Q22054：

你好 龔sir，Follow左你嘅post都有一段時間 我亦都睇左你嘅著作「財務自由行」「80後2百萬富翁」「股票聖經」「50隻潛力股」最近4月中更參加左你加「投資陪升股課程」剛剛都畢左業

其實我一直都想理財 覺得你講嘅理論好實用及貼地，好有循序漸進嘅思維。

老師你所教嘅方法都係由你經驗所堆積出黎嘅結論 炒股散戶10個有9個都輸 你教嘅長期持有優質股其實先係最快嘅捷徑！

我雖然開始理財或接觸真正理財只有半年多啲 但思維上我確實改變左 而我起碼已每日記帳已維持左大半年 而每月月尾也會檢討 (先發現原來自己成日駛好多無謂錢 !) 多謝阿SIR!

老師 就我個人情況 我有幾大重點想請教 先講我背境

今年34歲 未婚沒有仔女 每年有年終雙糧及花紅 年薪為一百萬多啲

換左樓 樓價700萬多啲 做按揭9成 月供約24k 每月可儲到16k 左右 當中10K放左係月供股票

1. 現金約有450k 放左係買樓是「高息戶口 」約 1.4% PA – 都係聽阿SIR教導 留番D現金當做BACKUP 及緊急用錢 – 見戶口又有少少息 所以暫時放係度

2. 股票約有 450k 全部都係2-3月入
788 - 10000股
823 - 400股
1177 - 4000股
1448 - 2000股
1833 - 400股
1928 – 2800股
1972 - 5600股
3067 - 6000股
3918 – 2000股

3. 月供股票 每月10k – 由本年3月先開始供
00175 – 2k
00700 – 2k
01211 – 2k
02800 – 2k
09988 – 2k

4. 沒有其他兼職及副業

問題：

1. 目標 40歲前有1000萬 以上咁樣執完條數好似都未有咩FEEL 想請教阿SIR有咩建議可達到我目標?

2. 計過月複利息回報 上堂提到10-15% 已叫做好理想 但依個都係參考% 點可以令自己既增長穩定D？見住自己D投資上上落落 我連唔蝕都無信心 應該點好

3. 調整緊股票係6:4 水桶1 vs 水桶2 - 一直都賣咁D 1972 而放入D水桶1度 但見住D水桶1好似都無咩升 無咩信心做到阿SIR講既每年10-15%增長 想請問應該點調整好?

4. 因為我工作時間都叫自由 亦都放星期六, 日 但我問題係真係無咩特別興趣及嗜好 點樣先可以令自己多D興趣 從已令自己多個機會有個副業或兼職 我依家只有打工一份收入 好似好危險咁

5. 自己打算2022年結婚 係緊急用錢度預算300k黎用做結婚 都打算結完就生小朋友 如結左婚及生小朋友 應該點調整以上所有策略?

6. 年年交稅都10幾20萬 好肉赤 有咩方式可以減少 或更好處理方法

最後想問阿sir你係咪真係有開到糖水鋪？哈哈 我要去幫襯一下 ! 謝謝

龔成老師：

我不會公開你的名，不過問題會放上網，等更多人能學習。

1）你現時的理財不差，配置平衡，同時配合你的年齡情況。但如果要去到$1000萬，就要再加努力，因為你現時每月儲到$16000，一年約20萬，就算計及投資回報，以及你現時持有的資產去增值，要滾存到$1000萬都不易。

除非你之後用一些較進取的方法，例如集中投資潛力股，以及自己發掘潛力股，早市場一步找到，投資並得到數倍計的回報，就有機，但這要你付出較多，你要每星期花大量時間去尋找潛力股。

2）我地最重要睇長期回報，目標一年有10%-15%，但不用每年睇，而是睇長期的平均，你已經方向正確，保持進行就得。

只要你多做功課，全面了解企業，以及其增長力，就會好有信心。

3）你要睇長期，你的思維仍停在短期股價。其實你要睇「企業成長及價值」先得。

4）你要多了解自己。如果唔知自己想發展D乜，就「試」，有時試試下，你就會更了解，例如試下做小生意，找一些你平時不會想過做的兼職，唔好浪費左你的時間。

如果無野做，就花多D時間去研究企業，睇年報。

5）最重要是你預留$30萬以上的現金，餘下先投資，由於2022年與現時已接近，因此這$30萬不宜投資。

只要預算要結婚的資金，準備好。餘下資金就算進取少少，都無問題。

6）如果有需要，就開公司，當然你最好問翻會計師佢地的意見，現時公司頭$200萬的盈利，交約8%稅，比高薪打工仔交的稅仲少，你可以上網了解下。

------------------------------------------------

Q22055：

龔成老師你好，我想问下7522只股，当时听朋友介绍买下7522，平均价为3.75买入8万股，这股现在一直向下，我应该怎樣处理，是否应该溝貨，还是走货？请賜教。

这只股會否會跌倒变费纸的

我不憧买股，这段时间看了你的视频，知我买的股亂七八糟，有909、9888 全部虧損。我有一百万來投资，现在用了一半，我应怎樣重新组合，麻煩晒。

龔成老師︰

你先要緊記一個好重要的概念，我地買入一隻股票，一定要知道佢質素、行業前景、財務狀況等，才去投資。

唔好聽朋友講、或者聽消息，就去買貨。如果你連隻股票背後買什麼、公司如何賺錢、行內有什麼優勢、點解未來有發展和增長潛力，都答唔倒自已，咁就要停一停，唔好投資住。

ＦＩ二華夏納一百(7522)投資目標是提供在扣除費用及支出之前，盡量貼近納斯達克100指數每日兩倍反向表現（-2x）的每日投資業績。

如果納斯達克100指數跌1%，你就會獲利2%(另扣管理費)。但若然納斯達克100指數向上，你就會虧損。

我對這類產品有保留，納斯達克100指數在過去一直反覆向上，所以長遠計持有這股對你"不利"，一定多於"有利"。

建議你長遠就算不全數沽出，也最好沽出大部份，換碼至其他優質股較好。

其實，我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

因此，你在選擇應該投資那一類股票時，會係因應你人生階段、投資經驗和風險承受能力，去做決定。

假設你係年青至中年人士，你可以用「平穏增長股」 + 「潛力股」的組合。如果你係偏年青，比例大約可以去到各一半。

但由於「潛力股」有一定波動性，較適宜年青和有投資經驗人士。若你投資取態較保守、經驗較淺或者較接近中年，「潛力股」比重就要相對下調。

明源雲(0909)和百度(9888)都係偏向潛力股類型，都係有長線投資價值。若你係年青至中年人士，只要唔係持有過多，可以守。但若佔你佔合較多，最好沽出部份，去平衡一下風險。

若你對投資知識不多，我建議你先用月供去儲貨。現在你每月先用5成儲蓄做月供。其餘先儲起，用一邊月供一邊儲蓄的策略。

大市現處於合理水平，餘下50萬和每月儲蓄，就等大跌市機會出現，才大力度掃貨，並長線投資。

若你現時組合，只係得1,2隻股票，我建議你都將部份股票，換碼至上述優質股，令組合風險可以更分散，整個組合也會較健康。

------------------------------------------------

Q22056：

老師，我近期抽到白居二，想購入沙田愉翠苑，為小孩的校網作準備。

問題1. 三房盤唔多，呢期成交量又高，價錢有的癲，三月至今升了12.3% 有的單位價亦企得好硬，心怕而家唔安排，睇定啲遲下連盤都冇！借問一聲，你有何看法？

問題2. 看新聞明年會加息，我究竟用H息口好，定用P息口好呢？

人生第一次 去選擇買樓 這麼重大的決定，真想跟老師分享

有睇中到盤, 但價錢不到位,預700-720萬, 睇中單位為740萬，在想要不要去馬, 怕錯過左, 之後就冇合心意的盤...

老師...求你指引我...

龔成老師︰

1) 本身三房這類大單位，供應係較少，故價格較敏感都係正常。雖然佢近期升左唔少，但由於白居二始終跟市價，有一定拆讓，故有一定吸引力。

加上這個是你自住房，考慮重要主要係是否配合「你長線生活需要」和能否做到「供得起」。如果係無問題，你都可以考慮入市。

2) 明年是否加息，暫時都係一個問號。以現時狀況計，H息會較好。但政府規定，居屋只能用P按，故你其實無得選擇。

------------------------------------------------

Q22057：

老師你好！我係你股票學生，完最後一課，感受到老師的愛心同努力，一星期兩晚3-4小時站立不停講課，課程內容非常豐富，非常感激, 辛苦你了。

另外，想請問之前不懂股票，自己又想穩健及有利息，買了：

恒生銀行 。3500
匯豐銀行。4400。
領展。$2000。（月供）
盈富基金。$3000 （月供）
小米。200
瞬宇光學。300

其實之前買匯豐恒生作收息，其他是認識你後才購入。我知道要減持銀行股，請指教應該怎樣保留。謝謝

龔成老師：

你現時較大的問題，是銀行股較多，你不要再增持這類，你應該溫翻第2堂的筆記，慢慢調整翻一個適合你年齡及風險承受程度的組合。

我會建議你過1年後，經濟好翻D，匯豐（0005）上翻D，減持部分，餘下就慢慢減，直至去到適合你配合配置的比例。

至於恆生（0011），質素比匯豐好，因此留低的比例不較匯豐多。

至於其他選股，其實無問題的，都是一些有質素的股票，你持有無問題。至於月供部分，你可以長期進行。

------------------------------------------------

Q22058：

老師 我抽中白居二 但而家二手樓市都好貴

但唔利用今次機會又怕再抽唔到
你覺得其實買公屋（eg 華貴邨）有你升值潛力？

樓齡29年 - 但好似有地鐵2026年華富有地鐵。

另外一係買私樓 要承擔有機會租唔出時 要俾供費 ，心目中係天水圍wetland seasons bay.

主要都想升值 搵到錢 可以財務自由！

你點睇呢兩個選擇，我知都幾大分別.....

龔成老師：

從自住的角度，你好好運用白居二會較好，公屋在投資角度的價值不及私樓，但從自住角度，其實可以考慮，因為你能以較少的現金流支出，解決了自住方面的問題，你就可以有較大的餘下現金流，去進行其他方面的投資。

華貴邨在地點不差的，港島區始終近中環，但地鐵相信有排先起好。因為佢要拆左華富邨，安頓好原本的居民，之後先用地鐵一整發展，相信要10年時間先落成。

華貴邨在公屋裡，算是有質素的，但不是大升類，只是平穩增長。如果你從自住的角度考慮，不是不可。

------------------------------------------------

Q22059：

龔 Sir，現時持有：

1000 股 9988 @$213
4000 股 1928 @$36.9
120,000 股 728 @$2.58
2000 股 941 @$48.7
30,000 股 3033 @$7.9

請問對此組合有何意見?建議加入金股，車股到組合?

現時買 7299 定2840 會較好?

龔成老師：

你現時持有的股票，基本上都是有質素的，其實問題不大，你持有就得，部分股雖然略有回落，但長線有得守的。

但你長遠，最好建立一個更平衡的組合，同一股票，最好佔組合比例15%以下。

你可以加入ＳＰＤＲ金ＥＴＦ（2840），這是一隻追蹤黃金價格的交易所買賣基金，當金價上升，佢都會上升，當金價跌，佢都會跌。

睇翻佢過往的價格表現，基本上都追蹤到黃金的價值，因此都可以成為投資黃金的工具。

只要佔組合比例不過多就得。

------------------------------------------------

Q22060：

想問，其實如果我長揸6666，唔會會可以上番去呢？

好驚佢會爆煲啊，到時渣都冇

龔成老師︰

若母公司出事，的確有機會出現，母公司要沽出恒大物業(6666)股權套現還債的情況。如果真係出現，的確會令股價受壓。

但你要記住，我地投資係睇長線，和企業本質。恒大物業(6666)負債情況，無母企咁差，加上物管行業，預期未來會發展得唔錯，因此有投資價值。

不過，集團大部份物業，都係來自母公司。故母公司出問題，令發展減慢，有機會會影響到集團發展。

當然，這些都是未知之數。以現時狀況計，恒大物業(6666)都有投資價值。如果你真係較擔心佢前景，你可以沽出部份，去平衡風險。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q18861-Q18880）

Q18861：

龔sir Hello，以前我好唔鐘意睇書，但係最近睇咗你幾本書，同埋你推薦嘅幾本書，都獲益良多！

改變咗我唔少諗法，尤其係《有錢人和你想的不一樣》，而且令我愛上睇書！非常多謝你分享！

見到問答好多人都只係問你對邊隻股有咩睇法咁，你成日教人睇長線，所以我反而想了解龔sir你未學識投資股票時，係點樣去精通投資？

同埋有無邊幾本書特別推薦？（除咗你出嘅書！因為你嘅書我已經買哂返黎睇！哈哈）感謝龔sir！

龔成老師：

書本可以學到好多有用知識，保持進步！

我20年前，都是短炒者，技術分析者，用左幾年，輸足幾年，之後長線投資，就開始不斷賺錢。

我好後悔當時浪費左幾年去學這些分析技術，我當時不斷睇書、上堂學短炒，但最後都是輸，好後悔，只怪我當時無知。

之後做銀行同證券行，見大部分輸錢的客，就是短炒的一群！這是我10年見到的情況，這是行內的秘密，根本大家都知短炒者一定輸，但業界一定唔會講！

另外，如果你分析全球真正賺錢的投資者、經金經理，佢地都無人短炒，都是長線投資的，巴菲特更講明反對短炒，反對技術分析。

只要我地細心少少去想，都會明短短炒根本賺唔到錢。長線先至係王道。

以下是我認為不錯的書，部分要到圖書館找的，另外，如果想學好投資，就狂睇同巴菲特有關的書。

《我十一歲，就很有錢》
《經濟蕭條中，七年賺$1500萬》
《富爸爸，窮爸爸》
《思考致富聖經》
《秘密》
《財富金鑰匙》
《有錢人想的和你不一樣》
《世界上最偉大的成功寶典》
《洛克菲勒寫給兒子的38封信》
《解讀巴菲特》
《巴菲特傳-永恆的價值》
《勝券在握》
《智慧型股票投資人》
《非常潛力股》
《彼得林區的選股戰略》
《誰搬走了我的乳酪？》
《人性的弱點》

------------------------------------------------

Q18862：

老師早晨,我個仔啱啱出嚟工作,一年半前開始月供股票$2000,但兩年期免手續費快過,仲值得供落去嗎？因為手續費每月$50！

龔成老師：

如果手續費佔比去到1%，就未必值得

佢可以停一停，儲下現金先，等佢可以每月供到$5000時再開始翻（但如果佢是儲唔到錢的人，建議佢每月就算$3000、$4000都照供）。

------------------------------------------------

Q18863：

您好，小弟20歲仲係學生哥，3月起因為美股熔斷上曬新聞，加上自己online learning，就開始學投資。有以下問題，想請教一下:

1) 只有現金45k，只用了當中18k作投資，這金額是否太少? 是否應該等本金多一點才作投資?

2) 在過去幾個月，當持有股票的時候，忍唔到手經常望住股價，令到自己過分緊張。或者我沽出的時候，見到佢繼續去又想講粗口。呢個問題令到我成為短線投資者，投資心態其實應該是如何?

3) 股票應該幾時才做止蝕或賺? 早幾日因為2382大跌，所以止蝕離場。但是我睇財務報表符合預期，基本面上看好。但因華為消息令股價急插，若有下次遇到這些情況需不需要做止蝕?

4) 我是否應該當每一次交易都是獨立的，不好因為以往的買賣價格而影響自己決定? 三月時，我曾經在95元沽出3690，過一排見佢103元想買回，但係冇入到，因為曾經95蚊沽過，心諗而家上返車蝕咗升幅咪好傻仔。結果錯過咗一隻倍升股嘅機會。

5) 我呢幾個月都嘗試學習計算估值，不外乎是上下網睇下大行研報告等等。我覺得自己的計算如履薄冰，請老師指出當中的錯誤:

i) 用息率嚟釐定合理價，例如在計算823的合理價時，有5%息就係平，3%息就係貴。

ii) 在計算增長型股票時，列出過往幾年的各業務收入毛利等等的數字和變化，然後按比例估計今個財政年度數據等。

再按大行研究報告，給予該業務的PS值或PE值，計出該業務的業務價值，然後將該公司所有業務價值總和除股本，就應該是合理價。

見過大行指出，科網股今年的價格其實是下年度的合理價，所以計算2020年的合理價，要以2021年的估計數據作估值。

6) 平和貴的股票，平過合理價幾多先叫平。還是合理價不是一個指定價格，而是一個區間，跌出這個區間就叫平，升穿這個區間就叫貴?

7) 之前留言問過學估值要睇巴菲特的書，請問有冇特別推薦邊本?因為我見市面上都好多。

感謝龔Sir寶貴時間，祝 平安!

龔成老師：

你這年齡開始學理財、投資，十分好。記住，你要學「正確」的投資知識，要學最賺的人所用的知識（例如巴菲特），否則好易行錯路。

1）現時已經可以開始，但最好留翻$2萬點都唔用，要到股災先用。

2）你要平常心面對上落，這是心理質素的訓練，要練到「無感覺」，另外，建議你試下「訓練一個月唔睇股價」。

3）首先你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

你要分析企業的長遠發展，如果仍是優質，就可以守。

4）你絕對唔好比「過往的買入價」、「賺蝕」、「買過這股」等因素影響，過去無意思，分析這刻最重要。

5）要計企業的價值，過程比較複雜，好難三言兩語就講到，就算在我的股票班，都要講5小時，裡面會講3種估值方法，有難有易，但同學都用到的。

簡單來說，你要考慮企業的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。這都是計算的基礎。

如果要深入計算，基本上要好仔細的研究企業，要分析好多財務數據用比率，先至有較完整的答案。

6）你先要計到估值，例如這股的合理區在$50-$70，如果現時股價是$30，就是平。$71就是貴。

7）《解讀巴菲特》
《巴菲特傳-永恆的價值》
《勝券在握》
《智慧型股票投資人》

------------------------------------------------

Q18864：

老師 多謝你回覆 在剛剛過去一星期 我身處悉尼 朋友身在香港 想向代購生意發展 我在澳洲買貨 寄去香港賣 想在Facebook或Instagram做平台

打算以30-40女性為市場 因為她們有穩定經濟收入 亦係做媽媽既開始 我地打算主打XX、XX

你覺得呢個市場可以嗎？賣既野算唔算散？一開始可以點樣吸引人follow我地既專頁？

龔成老師：

我相信有市場的，最重要是定位要明確，做專唔好做雜，要有自己的獨特性，等人容易記得你。

我建議你最初可以同時試這幾個項目，之後如果有一邊反應較好，就收窄，集中去發展，如果客戶會同時買幾邊的產品就一同發展。

最初只能用你身邊的人，幫下follow，同時你想方法在不同的地方增加暴光率，如果可以找到傳媒幫手就更好。如果有資金，就可以賣廣告。

最初是難的，因為無人知你地的存在，所以要用不同的方法做宣傳，唔好直接賣產品，而是先做好你的平台的宣傳。

------------------------------------------------

Q18865：

老師，想問吓你，而家嘅經濟好似同以前好唔同，你仲係咪相信價值投資？

同埋你會唔會講吓投資物業例如樓，車位，納米工商單位？Thanks

龔成老師：

價值投資永遠都適用的，只是我地運用時要靈活，不能一成不變。

無論是新經濟股、舊經濟股，最終都會去翻佢地的價值，價值投資法一定適用，只是角度與計算的問題。

另外，唔好太過著重中短期經濟，要睇長期。

至於其他資產，你可以睇《大富翁致富藍圖》，部分都有講述的。簡單來說，物業類資產，現時都唔算平，例如住宅物業，投資價值唔算高，不過自住價值仍有。至於納米工商單位，投資價值就一般。

------------------------------------------------

Q18866：

師兄有問題想問你
我想入手06電能實業現在可以買入收息現金保險的保費可以嗎？

因為我想慢慢財務自由我知有點遲但係都要實踐
因為本人小時候好爛賭請放心現在唔會因為我現在有的現金大約500,000經過一次經歷學懂儲蓄因為想同師兄分享

是你本人嗎這個帳號因為我知道有好多是假的？

龔成老師：

放心，這個FB的專頁是真的，但我都知近期好多假野，其實最好的方法，就是你在我的書「作者簡介」，有寫我的FB網址的。

電能（0006）有質素的，但增長力唔強，是收息股，但就唔好對股價有太大期望。這股現價合理的。

如果你想財務自由，我地會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

------------------------------------------------

Q18867：

你好，成哥，想問一些問題：問題1，你覺得美团如何？

問題2，我係初哥，覺得d股票太貴，入場入5起，可以轉入佢ge窩輪嗎？

問題3,短炒同長楂分別那樣好？謝謝回覆

龔成老師：

1）美團點評（3690）有潛力的，佢之前出左業績，見到開始有正現金流，這是一個實質的利好因素，因為之前一直在燒銀紙，現時初步見到成效，市場對佢重新估值。

當然，現時仍有不確定性，估值唔易。

只可以話，潛力是有的，現價唔算平，但不是完全無投資價值，不過，一定不能大注。等回少少先開始小注，是較好的做法。

2）唔建議，我20年前都有同你一樣的想法，但後來先知，發行商食水好深，長遠你一定輸多贏少，唔好做水魚。

建議你月供股票，長線投資。

3）我20年前，都是短炒者，技術分析者，用左幾年，輸足幾年，之後長線投資，就開始不斷賺錢。

我好後悔當時浪費左幾年去學這些分析技術，我當時不斷睇書、上堂學短炒，但最後都是輸，好後悔，只怪我當時無知。

之後做銀行同證券行，見大部分輸錢的客，就是短炒的一群！這是我10年見到的情況，這是行內的秘密，根本大家都知短炒者一定輸，但業界一定唔會講！

另外，如果你分析全球真正賺錢的投資者、經金經理，佢地都無人短炒，都是長線投資的，巴菲特更講明反對短炒，反對技術分析。

只要我地細心少少去想，都會明短短炒根本賺唔到錢。長線先至係王道。

------------------------------------------------

Q18868：

你好 龔成老師，我今年23歲 目前全部現金總共八萬多港幣，每個月收入12000左右，除去家用3000以及大約500多的花費

其餘8500都可以存下來。我很早之前就對投資很有興趣，但一直未有實行，只是看很多的新聞以及學一些簡單的理財知識。

現在因為我內地的家鄉準備開通地鐵，我比較擔心直接樓價會大升而失去買樓的機會，但是如果買了內地的單位

我就需要消耗全部的現金以及背負大約60萬的負債，亦會失去現在進行投資的機會。我因為小時候比較窮，所以一直都很努力存錢

中學時期接觸到財務自由的概念之後就以這個作為自己的目標，希望自己有一日亦可以不需要做不喜歡的工作亦可以有足夠的收入。

但現在我實在感覺十分困擾，希望老師能夠指點迷津，多謝。

龔成老師：

如果開地鐵這個事件，當地居民已經知道，其實樓價已反映左，唔會因為之後正式通車而大升，最多少少上升的。

所以，你唔需要因此而心急做決定，只要用長遠適合你自己的財富配置進行就得。

所以你首先想清楚，自己的財富配置想如何，如果買樓，盡量儲多少少現金去等買樓。如果未有太快買樓，你就可以利用手上現金，部分買股票，如果未有投資經驗，就利用月供盈富（2800）進行先。

------------------------------------------------

Q18869：

龔sir 你好，自從上完你堂之後，而家見到比亞迪既升幅，真係多謝你之前既教導，雖然我投資數目唔大但見到自己有利潤就證明學得到野。

小弟係呢段時間，一路睇下有無其他野可以買，最後買入左一隻etf,（3175），小弟好好采係低位買入到2.3，我買入既原因係因為之前油價出現千年難見既現象（負油價）。

所以認為肺炎後世界回覆正常時油價就會回覆正常，但係之前熱炒（3175）時出現大量買入該股票，我係等熱炒過後先買入，之後一路分注買入

同現價差不多位置，我想問一下（3175）係跟住油價指數運行，呢個說法有沒有錯誤？

同時熱炒期間我睇新聞知道因為基金多人熱炒出現大量買入，係呢個情況會唔會影響佢既升幅呢？

我睇番肺炎前既價格，佢係受到肺炎影響而變至現在價位，我諗肺炎後油既供應同用量都會回覆正常，本質上產品沒變，所以我出現呢個想法。

請龔sir指點我一下思路同想法有沒有誤

龔成老師：

Ｆ三星原油期（3175）就是追蹤標普高盛原油額外回報數之表現，不過，唔代表佢能追足油價，第一，佢只是追蹤油價的相關指數，第二，佢的誤差率極高，第三佢的轉倉成本可以好大。

其實當中有點複雜，唔止關油價事，例如轉倉成本等因素，價格與期貨有關，而期貨會到期，所以要不斷轉倉，而轉倉要成本，就會令這基金價值減少。

即是說，就算油價上翻過往的水平，也不代表這基金會上翻過往水平，因為當中已經減少了價值。

中短期油價會好波動，風險高，如果油價持續不利，每月有成本，都好麻煩。因此，你一定唔可以大注。

------------------------------------------------

Q18870：

Hello 龔Sir, 想請教下你關於一啲 投資產品for 退休嘅 睇法

我比較緊 政府 扣稅年金同埋一般嘅儲蓄 保險， 根據 回報表所例嘅數字， 年金嘅回報率相對地會低啲， 但就 比較穩陣

而儲蓄保險個投資成分就會高好多， 喺回報表寫嘅回報數字 係比年金嘅 回報 多一倍或以上， 但當然 這是不保證的， 所以想睇下你嘅 意見， thx!

如果我想買一份作為防守性嘅投資工具, 去到 退休時最少有一筆錢在手， 選擇哪一個會比較合適

龔成老師：

退稅年金有好有壞，好處是稅務上的優惠，但就要強行投資一個較低回報的項目，你的資金會因此而被鎖死。

當然，如果你本身都想買的話，絕對是無問題的，但如果只是為買而買，就要清楚翻對自己是否長遠有利。

至於儲蓄保險，如果當中有投資成份，回報就有機會比退稅年金為高，當然，風險度都會高左。但整體上，一般都是穩健的。

如果你目的是較低風險，投資退稅年金會較適合你的。

------------------------------------------------

Q18871：

老師，價值投資法，可否只以月供方式進行？把現有資金加大額每月供股票？

我實在沒有時間經常看股價，待大市下跌分注或大手買入優質股。還有，心理壓力很大，也會錯過投資機會。

MPF已供有20年時間，也看到成績。可否效法只月供股票的方法？

龔成老師：

價值投資法的核心，就是視買股票如買企業，買優質企業，長線投資。

至於你用月供，或一次過入，這是投資策略的問題。

只要是優質股，你當然可以用月供模式進行，將現時的現金，變成月供金額保持進行，原理就是將現有資金投入，能有效平均買入價，策略上可以。

如果你無時間留意，以月供長期去買入，適合你。

------------------------------------------------

Q18872：

老師 兒子是舊年股票班舊生 今年18歲 剛出來工作 每月可有27000用來儲蓄跟買月供股票

想請教一下 應該如何分配 用多少來做儲蓄 剩下來應該買幾多隻股票

應該選擇邊幾隻股票適合他 他希望5年可儲500萬 有沒有可能呢。謝謝老師幫忙解答

龔成老師：

如果想平穩，就可以將資金$15000，去做月供股票。

佢可以考慮盈富（2800）$5000。

另外再加其他：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：安碩恆生科技ETF（3067）、阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。部分要等回少少先入。

如果想進取，想以5年$500萬為目標，就要更進取（當然，這是一個好高的回報，佢將會面對較大風險）。方法就是，全部集中投資潛力股。

現時每月將$8000買入潛力股，同時儲現金，等機會。

同時，每個星期要自己研究一隻潛力股，要比市場早一步發現，找到後如果價位合理，就買入，如果平，就大手入。

這是一個進取方法，有危有機，佢要自己決定。但每星期一定要花時間去尋找潛力企業，否則一定做唔到。

------------------------------------------------

Q18873：

龔成你好，我係一位保險Agent，好欣賞你一直以黎既無私分享，期待有一日可以成為你一樣既人

我經常都會同朋友討論起你，對於一般只會問你邊隻股票好既網民，反而應該先理解左你既投資理念，加油！！！

另外，有個小小既問題，對於保險產品，你持有一個點既態度。正面/負面 & Why？Thanks

龔成老師：

保險在理財中，有一定的作用。

我地投資，並不是炒炒賣賣，是理財，是建立一個財富組合，要平衡，要攻守兼備。

保險，就是將我地唔想承受的風險，轉嫁比保險公司，在理財中有防守的作用，當然，我地同時要有進攻，投資股票就是進攻。

------------------------------------------------

Q18874：

龔先生，你好，希望有些股票上的知識能請教你。

由細到大，媽媽教落，聖誕中，買匯豐，由129買，之後買了一路無理，跌時便一直侵，侵到在83個半，最後在$35放了，蝕了好多錢，這是有多年來的積蓄，好肉痛啊。其實正確嗎？

之後覺得一定要學投資，所以我買齊了你的書籍，只欠年報，因為怕自己看不懂，現在先看80後百萬富翁，待細仔考完試後，便會報名報讀你的課程

龔成老師：

我地投資，並不是盲目長線，而是要持續檢視，我地每隔半年，會分析翻持有股票的企業本質，了解翻是否值得長線投資。

匯豐（0005）在大約10年前，賺錢質素有所減少，其實其他銀行都有類似情況，我過往在銀行工作，都見證了佢地賺錢能向下。

當然，這不代表零質素，但質素減左，賺錢能力低左。這類股，我地就唔會持有過多，因此你不斷加注是錯誤方法。

------------------------------------------------

Q18875：

阿Sir你好，我有啲大目標想請教你，可能會浪費你好多時間睇，因為呢個係我人生規劃同目標:

我24歲:

喺大陸有樓,減咗租金每月供$3000港幣。

股票入面有53萬，主要比亞迪升咗帳面賺左16萬。其他都是優質股，不過暫時帳面下跌。
留有的現金18萬。

股票加現金共71萬左右。

喺香港每月盡力儲1萬5千。
我想兩年後有130萬-140萬
請問可以嗎？會不會太快？

因為我希望有100萬投資美國樓，因為我有親戚在那邊，說在那邊買比香港回報更高。

因為這71萬有30萬是親戚借給我投資的，所以兩年後我要還

我希望在美國買了後，然後在香港租地方住，大陸和美國收的租金用來在香港租住，然後再儲下一個100萬

龔成老師：

2年並不是一個好長的時間，所以好難確定投資能否有回報。而你$30萬是借貸的，在投資時不能太進取。

因此，你投資時，自有資金部分，進取少少都可以，但借貸部分，宜投資平穩增長類。

如果要兩年有$130萬，你可能要進取少少，這點要自己衡量風險，同時，你要有一定的投資知識，能比市場早一步，找到潛力股。

至於大方向，美國樓是否比香港樓一定高回報，這個未知，始終要睇當地的長遠需求。而香港樓，相信長遠會穩定，加少少增長，但就不是高增長，同時亦不會大跌。

你以大陸樓及美國樓去對沖香港樓租金，不是不可，但長遠來說，如果你在香港有自住需求，都要分析買樓自住的可能性。

------------------------------------------------

Q18876：

你好！請問老師，我28歲，有一個己供斷單位（樓齡50多年）是一個有lift既洋樓。之前都租緊比人住，而家想自住成立家庭

請問如果我想按樓價既50萬出黎做美股投資會否不智？

因根據走向，科技股既增進日益增強。想請問老師希咩睇法？

請問有更好既建議比我參考嗎？

龔成老師：

有利有弊。

加按投資不是不可，因為你年輕，可以承受風險，加上現時利息低，以及你本身無負債，因此，不是不可進行。

但比較關鍵的位，就是投資能否有確保的回報。

因為加按的原理就是借錢，你現時借錢投資，是否有信心得到回報？在你過往的投資經驗中，是否8成都能獲利？

投資不能睇表面因素，要經過詳細的研究，確保你本金的安全，以及得到合理回報。

如果你以自己資金，投資美股，最簡單是投資ETF，如VOO、QQQ，是可以的，但如果加按，就要更為小心。

------------------------------------------------

Q18877：

我最近在圖書館租了你的財務自由行, 了解到你的作風.
最令我欣賞不是你書中講解的理財知識, 是睇到你對財富的深入理解的和怎樣落實行動. 老實說, 理財知識其實不會太難

基本上好多人都知這些知識. 問題是怎樣做到知行合一, 我係你本書就看到這種特質. 很多人都知只靠打工收入是很難累積財富

亦知道要作出改變, 但就是不想改變, 寧願辛苦打工幾十年都不願持續努力幾年增值自己, 改變自己人生

這個感受我都是最新兩年前先開始慢慢深刻體會到. 我反而有興趣知道, 老師的爆發點先從甚麼時候開始?

你是看到一本書受到啟發, 然後決心改變人生?還是從小就有這個願境? 可否分享一下你脫變的過程嗎?

龔成老師：

可能我過往住公屋，都會想改善生活，所以我18歲已開始有目標，希望將來有$1000萬。

於是，當時仲讀緊書的我，就開始想方法去賺錢，在18歲就開始投資股票，最初有賺有蝕，後來蝕錢多，就問自己問題係邊，於是去圖書館睇書，先發現當時自己好無知，輸錢是合理結果。

當時我明白，如果我想有$1000萬，就要大量增加知識，當時睇左好多書，明白有錢人的賺錢方法，於是更相信，只要自己落實去做，就可以做到。

------------------------------------------------

Q18878：

老師，我有一個難題，困擾左我一段時間，想不通，我已經將股票+現金儲夠差不多一百萬，買哂股票，只留番比亞迪，夠比首期買第二層樓，但比左首期后，我只餘下約5萬現金，和2手比亞迪，值得去做嗎？

龔成老師：

如果你本身已有物業，就唔需要太急去進行這動作，因為你已經處理好自住問題，當你再買物業，就是「投資」。

我地會衡量，你同一筆資金，以股票模式持有，還是轉為物業，那個增長力會較強？

以現時的樓價分析，樓市未必特別平，因此，你持有股票，回報率會好D。如果你真的想買樓，就建議你儲更多資金先，當你儲到較多資金，已經足夠買樓後仍有股票與現金利，就可以行這一步。

又或者，你儲資金去到中途，見樓市明顯向下，成為入市機會，就可以進行。

------------------------------------------------

Q18879：

你好，本人47.5買入6060，請問可以幫忙分析一下短線和中線的走勢？值得繼續持有？

還有6060前景如何？

龔成老師：

眾安（6060）業務不是無潛力，但並不易分析的，到目前為止，佢的實質盈利未算好大，這刻的實質業務價值不大。

但佢做這類互聯網保險公司，的確有潛力，同時背後有支持，所以有發展，這部分產生了「概念價值」。

佢無乜盈利，但市值可以去到百億，當中大部分都是概念價值，而這個價值值多少錢，其實無人知，市場對這價值的看法不一，同時經常改變，所以令股價大上大落。

所以，之後的股價，仍存有相當的不確定。如果你貨不多，可持有，貨多就要注意風險。

------------------------------------------------

Q18880：

成功先生，我想問XXX有一個基本mixed 債券plan 叫XXX，我本身2017年已經有買，為期五年，買20萬每月有$1,2xx, 你認為值得加注投資？抑還是加注買有增長力股票eg 9988｡

另外我之前大概, 半年前買左融創中國43蚊買入，你認為咪繼續坐住先？

另外，我亦買咗857 ($3.5) & 883 ($13.7) 何時有起息？Thanks

龔成老師：

我無特別研究該債券，但初步睇，回報都不差，可以投資。

其實我地理財，最重要是平衡組合，做好配置，所以你可以在部分資金，持有這債券，作為防守部分，餘下資金，則進攻，投資股票。而防守不用太多的，所以，未必要加注，只要持有就得。

佢至於融創中國（1918）業務不是無質素的，有規模、品牌、銷售網絡，但同時有一定風險。

首先，中國樓市如果逆轉會有很大打擊，另外，這股的負債超高，無事就無事，有事大件事。

因此，持有這股不是不可，暫時都可以守，因為不是完全無質素，但要明白背後的風險，同時明白這一定會令股價較波動，自己最好控制注碼，不宜持有太多。

中石油（0857）雖然質素都算有，但不是最高質類別，佢對油價較為敏感。

雖然佢都有一定的規模，但卻不是最高質素的企業，這是由於佢的產品自主力較弱。

石油是商品，當中沒有差異性，佢地要將石油賣出，只能跟國際油價，這令佢地處於被動狀態。沒有價格自主的能力，這令佢地的獨特性有限。這類商品企業，都可投資，但就要明白不是最高質的企業。

由於質素中等，唔建議大注投資，但相信油價上翻佢會上升的。中海油（0883）都有類似情況。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q17821-Q17840）

Q17821：

成哥你好！我follow左你一段時間，我都好認同價值投資法，所以有少少問題想問你。

本人今年23，岩岩fresh grad, 9月開始返工，人工2萬3、4左右，因為有睇你既分享，所以都有搵part time ($5-6000左右）之後返工都打算繼續兼職。

因為未開始儲蓄，所以本金只有1萬。

重點想問：我想之後10月出糧（2萬）應該點樣分配儲蓄同投資既比例？ 我希望可以趁後生積極少少

投資經驗：我有自學投資的知識，如：學緊睇3大財務報表，有係虛擬投資網絡上練習（但都只係買ETF,3個月投資報酬率17.6%，我知只係遊戲玩下）

但現實生活因為冇錢，但又唔確定要儲蓄幾多錢先算合理？BTW 我想問成哥建唔建議新手用證券行投資，如「富途牛牛」是不是比較好？因為免了很多費用較適合初學者又冇咩錢既我。

目前自己打算上網學完再買你既書睇！第一次發問打左一大段野，真係唔好意思。希望獲得你既建議

龔成老師：

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

如果可以的話，儲起一半的收入，盡全力去儲錢。

當然，我地唔會全部現金都投資，你先要留一些備用資金，例如$2萬，餘下就可投資，但投資都要睇平貴，如果只是合理價，就只可一邊投資、一邊質留現金。

富途是可以的。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。

你可以考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡，最好當然回落之後先投資。

------------------------------------------------

Q17822：

老師你好，我係你進階班學生。今次主要係想同你講聲多謝，我由2018年開始上你堂同買你嘅書，其間亦因你介紹睇左好多關於吸引力法則嘅書

到今年我開始用跟你學到嘅知識，同自己講今年內要有100萬資產，結果因為隻1211（多謝你嘅介紹）令我提前達成目標。

但最開心嘅係你令我明白致富呢條路原來真係有方法同行得通。黎緊我會繼續用跟你同書本學到嘅知識，繼續去增加財富。多謝你！

龔成老師：

太好了！

我所教的方法，是價值投資法，亦即是巴菲特所用的方法，佢是全球最賺錢的投資者，我地跟佢這方法，成績點都唔差。

加上你運用吸引力法則，相信自己，做到是遲早的事！

現時你的成績，是你努力的結果，之後要保持進步！

------------------------------------------------

Q17823：

龔sir 你好，本人27歲 月入15k，現金只有6萬，我參考過你既文章及投資核心價值後都十分認同，我先前買了一些潛力十分弱的股票，現在想將全部放售，增加現金流投資其他優質股，麻煩龔sir 比比意見

以下係我有持倉既股票:

600股領展00823(買入平均價67)
18000股建成控股1630(買入平均價1.6)
3000股新城悅服務1755 (買入平均價25.5)
5000股北京汽車1958 (買入平均價 8.62)
2100股易居企業2048 (買入平均價 11.9)

我希望過濾沒有潛力的股票藉此增加現金流
謝謝老師

龔成老師：

你27歲，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。

領展（0823）可持有

建成控股（1630）年年虧損，賣出較好。

新城悅服務（1755）可持有，但唔建議過多。

北京汽車（1958）質素中等，未必適合持有太多。

易居企業控股（2048）質素中等，未必適合持有太多。

另外，你組合中地產類別太多，這會出現集中風險。

------------------------------------------------

Q17824：

龔成老師, 你好。我今年30歲而家持有以下股份 係上年大概7月份左右香港經濟出現下調先開始買股票, 希望2年有多點錢增加財富。

而家股票嘅價值有20萬左右，有5萬左右可以再做投資。

0002 500shares @80.75
00823 100shares @64.2
00066 500shares @38.9
00019 1000shares @73
00405 5000shares @5.17
01128 800shares @14.58
07500 2000shares @6.475

其實我剛剛賣出了09988 2500shares @258, 再之前都幸運的係00388同00700 有收穫過D, 但後黎升得太急, 我唔敢再入。所以想開始認真學你做研究, 以下係我的一些問題。

1. 我睇過評論同自己經驗, 其他只集中投資幾隻好過我分得散。

想等9988, 388, 700回落我再入市, 同時諗緊好唔好加多幾隻潛力股，但因為我現金唔多，我諗緊係應該集中啲幾隻股票加大數量好，定係加2隻潛力股係我個組合?

正考慮緊以下股票請問老師建議買嗎? 我現有組合同年齡應該買邊隻好? 可以接受大一點風險。
潛力股(我認為) 981/ 9990/ 1928
如集中 66/ 2/ 823

2. 我最近入左7500, 其實我之前買過2800但覺得佢太慢所以賣了就情願放點係其他地方先。你認為呢隻ETF如何?

好多謝有老師分享你既睇法！好難得有一位老師講野中肯同願意真心分享賺錢方法，Thank you for answering my question!

龔成老師：

你現時持有的股票，基本上都問題不算大。

要留意太古（0019）質素中等，太古地產（1972）會更好。

至於ＦＩ二南方恒指（7500）這是反向工具，唔太建議投資。

另外要留意翻，你現時持有的股票，增長力都不強。

你犯了一個大部分散戶都會犯的錯，就是著重「賺差價」而不是建立「長期組合」。

你原本的組合不並，有不同類別股，平穩增長股、潛力股等，但當部分股升左你就賣出，你令到組合失衡，餘下股票增長力不強。

你30歲，組合應該平穩增長股+潛力股。

你等以下股票回落翻，可考慮：阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177）。

------------------------------------------------

Q17825：

老師你好！我兩個月前先開始學投資，然後一個月內睇咗你嘅《80後百萬富翁》、《80後2百萬富翁》、《5年買樓4部曲》同《股票勝經》（宜家睇緊《選股勝經》）。

我覺得老師你個套投資方法好可靠，而且啲理念我都好同意，所以宜家努力學習緊。

我今年24歲，喺3月嘅時候趁樓價小跌，問屋企人同親戚借咗80萬首期買咗個細價樓，買完即刻放租。所以我現時嘅情況如下：

（收入）
每月薪金：$33000
額外兼職收入：$4000
租金：$14000

（支出）
供樓：$25000
家用：$5000
月供股票：$10000

每月可儲：$11000

--------------------
股票組合：
（月供）盈富：$6000
（月供）銀娛：$4000
小米：3手
中國財險：2手

-----------
我目標係想6-8年後買多間現價1200萬嘅dream house自住（宜家嘅細價樓會繼續放租），但我唎幾年同時要還款俾親戚…

1.想問我宜家嘅月供組合需唔需要調整？我有諗過轉做$6000盈富+$2000銀娛+$2000小米 之類嘅組合，但唔知咁樣啱唔啱…

2. 如果想8年後買多層，咁其實洗唔洗8年內供完宜家層樓/ 供完某一個成數？

3. 我工作穩定，但每年人工只會加$1500-$2000左右。如果按照宜家唎個理財組合，有冇機會喺8年後達成目標？

我之前冇儲開錢嘅習慣，所以宜家都好後悔…但我信老師你所講，有心唔怕遲！而且我願意捱願意搏！所以希望老師你可以指點一下迷津！謝謝！

龔成老師：

1）如果你現時現金不多，應該先儲多少少現金，現金的作用是備用，以及「等投資機會」，如果想有高回報，就要留有現金等機會投資。

$6000盈富（2800）+$2000銀娛（0027）+$2000小米（1810），可以進行。但最好有一定的現金。

2）唔需要供完，你現時的物業，照放租照供就得。

努力在這段時間，利用現金及股票，盡力滾大財富。

3）未必得，因為$1000萬以上的物業，首期要一半，你要在這段時間內累積到相關資金不易，就算細價樓升值能提高你本金，都不易。

你可找一些提高收入的方法。又或在投資上提高能力，加大投資潛力股，你要有自行分析及投資潛力股的能力，要比市場早一步找到潛力股，就有機會令財富大增。

另外，你24歲，是黃金時期，一點都不遲，我相信你只要努力，完成目標是可以的，只是遲與早的問題。

------------------------------------------------

Q17826：

你好呀，想請教一下1538現價可入嗎，我見大部份既物管平均PE都2X賠，但1538只有11左右，是否便宜嗎，唔該龔成兄

龔成老師：

中奧到家（1538）都可以考慮的，這股的業務都穩定，只是規模較細，加上背景方面不算強，令增長力不及其他大型物管企業。

現價合理，不過要留意股價較波動，未必適合投資太大注。

------------------------------------------------

Q17827：

老師你好﹕而家我媽咪大約55歲，半退休人士，銀行有~10萬資金

想幫佢投資30%落D收息股，30%考慮儲蓄保險，另外40%作流動資金

本身心水有你「財務自由行」書籍提供的為主
如2638港燈、0066港鐵、0823領展
但我想清楚知道我應該幫佢一手一手咁買
定月股?

因為我並未清楚月供的好處，個人諗法係有足夠的現金係吾係應該一手咁買理想
&
考慮到過去的社會運動，對以上3個價值會否是一個合適的投資?

本人為新手投資者，希望能請老師幫幫忙。

龔成老師：

你的配置方向可以，收息股佔3成無問題。

你可以建立一個更平衡的組合，唔好只集中在3股，你可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、領展（0823）、港鐵（0066）都可以。

月供的好處就是「平均買入價」，無人知買入後會否下跌，如果你一次過將資金買入，就可能面對這類風險。而月供就是月供都入，買入價自然平均。

因此，如果你能自己一手手買，做到「分注」「平均買入價」的效果，就可以。否則，就以月供模式進行。

------------------------------------------------

Q17828：

龔sir，最近睇咗你本股票勝經，對股票的知識增加咗，你本書都幾適合我尼啲初季學者，用咗一晚就睇曬本書，好正。

另外，現時開始了之前請你介紹的股票已開始月供。自從錯過今年3月4月時的跌市，到現在眼見心儀的企業股價都上升咗唔少，手頭上的備用現金只用了少部分買了少少9988 (220)

現時個市況都不停少少咁上上落落，冇乜信心入市，但睇住舊錢齋擺都擺到浪費曬機會，想請教一下你港股現時是否處於牛三及熊一的階段？ 現時某啲板塊被熱炒，又有新的指數推出，應該如何部署？ 謝謝

仲有有時問價見你講便宜、合理區上中下部，其實尼幾個價格區域係咪都可以分注咁買入股票？

因為我想買啲阿里巴巴同港交所，個價位都好高，但個市場情緒要回落返合理區看似唔係咁易，咁應該如何評估現時的企業價值？

龔成老師：

你唔好太著過中短期大市的走勢，最重要睇「企業」，要睇長遠的發展，業務與前景，這點是最重要的。同時分析現價平貴，去決定投資策略。

如果你見到優質股處合理區，而你又無貨，就可以入。如果你本身有貨，合理區就未必會入，會等平先入。去到平就是一個掃貨的價位。

新經濟股有當中的價值，但不少都有少少貴。

你持有阿里（9988），可長線，唔好賣。

如果你現金多，可以等阿里及港交所（0388）回翻D後，已可分注買入，因為無人會知股價走勢，所以唔能夠永遠等佢大跌，有時都要用有效策略去進行投資。

至於你月供，只要是優質股，就可佔保持進行，月供的好處就是減少了人為主觀的分析。

------------------------------------------------

Q17829：

致龔成老師，本身我買入左1928,939，同一的月供股票既碎股，但本身我係月光族，個人比較懶，成日唔返工，所以冇積蓄

近排返返工，見個市都好多抵買股票，所以想月供股票，但我見你信箱回覆人地既時侯，都叫人留有一定現金

甘我應該儲幾多後備現金才開始進行月供股票呢，但現在唔供，我又怕錯過現在呢個價位

龔成老師：

首先，你要留一定的備用現金，例如3-6個月的支出。

另外，就要睇大市的平貴度，去決定股票與現金的比例，現時大市處合理區，你留3-5成的現金可以，餘下現金的作用，就等大市進行便宜區時作動用。

無人知大市的升跌，這是一個較為平衡的做法。

------------------------------------------------

Q17830：

我想請問有關7200
7500
這兩股是不是可以穩賺

如果係
咁好過投資長遠的股票

我見有人買7500 7200
一個月已賺六十萬

龔成老師：

絕對不是穩賺。

ＦＬ二南方恒指（7200）投資目標為追踪恒生指數每日表現兩倍（２ｘ）的投資業績。

ＦＩ二南方恒指（7500）投資目標為追踪恒生指數每日兩倍反向表現（－２ｘ）的投資業績。

這些都是一些槓杆的工具，睇中市會好好睇，睇錯市會輸好多。只是中短期投資，睇市的工具。

你見佢賺錢，只是佢好彩，因為要分析大市走勢，連有幾千億身家的巴菲特都話無本事。

我過往做銀行及證券行，見好多這類人，不停炒賣市況，有時會幾好賺，但長遠總計，10個有9個都輸，這就是我見到的事實，當然業界無人會敢講出來。

------------------------------------------------

Q17831：

龔成老師你好，因為本着分散投資嘅理念，我年頭既時間以平均價＄47買左兩手匯豐（嗰時仲未話會停派息）……想請問而家我應該有得佢放喺度，定係止蝕離場？

本身嗰兩手嘅錢我都唔係急住用嘅，不過望住佢咁樣跌法，都會有猶豫

本身都有根據你嘅分析，有買開盈富基金、港鐵等優質股票的

買匯豐嘅時候，本着「別人恐懼我貪婪」，諗住買少少放喺度問題唔大，結果發覺係個無底洞……

龔成老師：

我地投資，最重要是「優質股」，以優質程度去決定佔組合比例多少，以及投資策略，而「別人恐懼我貪婪」只是一個輔助策略，最重要都是睇企業質素與發展。

盈富基金（2800）、港鐵（0066）都可長線，無問題。

至於匯豐（0005），早前的業績令人失望，相信要較長時期先會好翻。如果貨太多，宜減，如不多，守住先，這是收息股，相信過1、2年後，股息會正常翻d，不過，唔好對股價有特別期望。

------------------------------------------------

Q17832：

大師，維亞生物點睇？
維亞生物會不會好似微盟甘推上去？

大師，6078，9997這幾只股值得買入嗎？

龔成老師：

維亞生物（1873）集團主要就臨床前藥物開發提供基於結構的藥物發現服務，服務包括：基因到蛋白質（Ｇ２Ｐ）及基因到結構（Ｇ２Ｓ）等。

行業發展是有的，但同時存有不確定性，加上股價都上左唔少，現時值博率唔高。

海吉亞醫療（6078）以腫瘤科為主的醫療機構，主要在中國經營醫院業務、第三方放療業務和醫院托管業務。

此股上市不久，故很難估值，而且要時間才可以慢慢見倒真章。

2019年盈利約0.4億，但市值去到190億。初步睇佢股價在一個十分高水平，所以風險不少。如果投資，小注好了。

移卡（9923）是有風險，有潛力的類別。

首先，佢的業務為一站式支付服務，包括基於應用程序的支付服務及傳統支付服務，並支持逾500款發卡機構的移動應用程序，以支付為基礎的科技平台。

其中包括微信支付、支付寶或雲閃付，涵蓋了中國大多數的電子錢包。

另外，佢業務亦有科技賦能商業服務，即是提供商戶ＳａａＳ產品（包括實時庫存管理、消費者關係管理、智能訂單管理及全方位僱員管理）、營銷服務（包括量身定製的精準營銷及客戶忠誠度計劃電子工具），以及金融科技服務（包括助貸服務、委託貸款及保險轉介服務）等增值服務。

睇翻佢的財務數據，增長快速，但業務變數大，行業有不確定性，估值上比較難，這一定會令股價上落大，這刻仍唔平，投資值博率只是一般。

你預佢有潛力，同時有風險，如果控制注碼，都可以小注投資。

------------------------------------------------

Q17833：

謝謝老師【影響投資決定的3大因素】的分享
現在太多負面消息，如果不是一直提醒自己價值投資，一早放了所有股票了。

但我想一下，何時該考慮資訊呢?萬一資訊的影響性很大（例如打扙），我們還是應該以超長線的角度去看嗎?

感覺上打仗，無論現金或者股票都會大受影響

龔成老師：

在這篇文中，你會見到「知識」最重要，之後就是「資訊」，無知識基礎，比你資訊都無用，所以，你首先要大量學習知識。

下一步，就是要了解資訊，你要著重一些「核心」資訊，有些表面、短期的資訊，就唔好太理會。

例如打扙，這當然要了解情況，然後分析，對企業的「長遠」影響多大，如果只是中短期，長期無影響，但股價因此而向下，這就是買入機會。（你要小心金析打仗對企業長遠的發展及賺錢能力有那些具體影響，而不是一聽「打仗」，就立刻認為企業玩完。

------------------------------------------------

Q17834：

龔成老師，我已月供股票1年多，有港鐵，比亞迪，盈富，煤氣等

想再加買一些優質股，在上面幾隻股選擇，還是買其它股，比較好? 還有9618 ， 值得投資嗎?謝謝你！

龔成老師：

你原有的股票，可以保持月供及持有，都是優質股，但如果想再加，你可以加上盈富（2800）及其他股，選其他的優質股，長期月供，這樣會建立一個平衡的組合。

京東（9618）業務有質素，發展仍是正面，不過現價就唔算平。

佢係一間電子商業銷售平台，佢定位為「以供應鏈為基礎的技術與服務企業」，現時是中國第二大電商，有一定的品牌。同時，根據《財富》按收入統計的全球500強排行榜，集團是中國最大的零售集團。

佢目前業務已涉及零售、數位科技、物流、技術服務、健康、保險、物流地產、雲計算、AI和海外等領域，其中核心業務為：零售、數位科技、物流、技術服務四大板塊。

京東已建立自己營運覆蓋全中國的物流基礎設施，以支持電商業務，打造了線上購物體驗，係2017年、2018年、2019年，活躍用戶數達到了2.9億、3.0億、3.6億。可見已建立了一個巨大的網絡。

佢經營線上零售，以及電商平台業務，線上零售業務方面，從供應商購買產品，然後直接銷售給客戶，並從24,000多家供應商採購商品。

佢的物流基礎設施佈局覆蓋了中國幾乎所有的區縣，包括遍佈89個城市、累計總建築面積約1,690萬平方米的700多個倉庫，包括京東物流技術開放平台所管理的倉庫面積。

過往的財務數據，收入每年都是20%左右增長，2019年收入為5700億人民幣，已經有實質的盈利，2019年盈利為120億，初步以此推算，股價並不算平。當然，這股有一定的增長力，之後的市盈率會減。

從質素上，這股不差的，但估值上就不算平，如果買，都可以，但要控制注碼。這股可以長線投資的。

------------------------------------------------

Q17835：

Hi 成哥! 已留意你page around 3/4年，過去略有所成，去年已首置物業，首先藉此機會多謝你先

我現在27歲，月入around 30K，扣除供樓保險自用等日常消費後，每月還有around 5K，打算月供粵海/金沙，想問下你睇法?

Also, 呢家我持有雅居樂，長和，建行，楓葉教育，坤集團(考慮賣出)，想問下成哥有咩睇法，thank you!

龔成老師：

你持有的股票，基本上都是有質素的，可長線，坤集團（0924）就只屬中等。

你27歲，其實可以進取少少。

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」。

你可月供盈富（2800）及另一隻較有增長力的股。

如果想增長力高少少，可考慮：阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。

如果你擔心，就只供一些平穩增長股。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q17836：

龔成老師不好意思，我未上你堂，但我正在看您的股票勝經，提到該如何用選股器去篩選優質股，但不知道是否我的方法有問題或者填錯，跟著您說的條件都沒有任何股票提供。

想請教一下，按您書中所說的：

股本回報率>12%
市值>10億
總債項<100%
每股盈利增長>10%
市盈率5
不好意思，明白應該在課堂中詢問的，但又未能上到堂所以先此發問了，謝謝

龔成老師：

我相信你用錯了選股的程式，又或你填錯了指標。

或者你試下先輸入個別的指標，睇下有甚麼結果。

上述的指標無問題，相信是你的程式或輸入出了錯。當然，具體的選股輸入及技巧，都會在課堂提供。

------------------------------------------------

Q17837：

龔成老師你好! 本人近一個月開始仔細閱讀你每一篇帖文, 真的獲益良多, 後悔以前甚麼都不懂便隨便跟人投資, 導致損失不少資金. 雖然多年沒有再投資

但之前買的股票由於一直處於蝕錢狀態所以一直沒有沽出, 現在想你給些專業意見, 本人持有以下股票已經多年, 部份已經過十年

但一直處於蝕的狀態, 而且蝕了不少, 請問現在應否止蝕把它們全部沽出轉投資盈富基金? 謝謝~

00697(首程控股) ---- 16000股 (平均價8.925)
00857(中國石油股份) ---- 22000股 (平均價4.112)
01251(華油能源) ---- 300000股 (平均價1.742)

另外, 本人34歲, 已婚, 有60萬現金定期, 每月可存2萬, 想提早為退休作規劃, 沒有再買股票後都只是一直把現金做定期, 但發覺不能抗通脹, 現在定期利息也很少, 所以想向你請教一下應該怎樣做? 謝謝你~

龔成老師：

首先你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

首程控股（0697）投資價值一般，長遠賣出較好。

中國石油股份（0857）只是商品企業，雖然都算有質素，但賺錢能力較補動，你暫錯可以守，但當經濟好翻油價上翻後，轉其他會較好。

華油能源（1251）質素一般，長遠賣出較好。

你這個年齡，財富仍可增值，你可以考慮盈富（2800）。

另外再加其他優質股（每隻$1500）：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q17838：

龔成老師您好，我希望擁有一間兩房單位預算600萬左右

今年45歲，現金16萬，股票200萬

每月收入：$25000
每月支出：交租$12500，個人使費$4000
月供股票：$3000 仍供緊005 HSBC 收息

7100 股 005 - 平均價$48
3000 股 006 - 平均價$53.5
800 股 388 - 平均價$250
1900 股 700 - 平均價$160
1400 股 1299 - 平均價$26
1000 股 2638 - 平均價$5.45
2100 股 2800 - 平均價$22
6000 股 3988 - 平均價$3.02

請問老師，可以怎樣去令資產增值20-30% 每年
005 HSBC 仍然值得再月供嗎？
謝謝老師

龔成老師：

其實你可以想想買樓計劃，因為你現時流動資金都有一定的數量。另外，你45歲，當年齡不斷增大，你按揭年期會減少，影響了買樓的動作。

所以你應該想好置業計劃，之後就較易處理下一步。

現時的持股，基來上都是有質素，不過銀行股已佔有一定的數量，唔建議再買入太多，因此你供盈富（2800）好過供匯豐（0005）。

同時你現時現金的比例較少，因此現金比例應該增加翻。

------------------------------------------------

Q17839：

老師你好！請問匯豐現在前景如何，現持有一手，40蚊買入的，現在匯豐一直跌，需要放嗎？

另外早前買了一手0853微創醫療，39蚊買入，請問一下老師您覺得前景如何呢？

作為大學生，只是股票初哥，欠知識和經驗，現在暑假多了時間可以閱讀更多有關書籍。

我積蓄不多，現收入主要靠補習，比較不穩定。現有積蓄都主要買了股票。除了上述2隻，還有月供盈富和港鐵，各1000蚊。

老師您覺得如何？

感謝老師！！！萬分感激！

龔成老師：

匯控（0005）賺錢能力與增長力的確弱左，但又未去到完全無質素，相信長遠是收息股，但股價增長就有限。可以先從佢近年唔派息及財務情況分析。

首先睇翻佢財務數據唔算話十分差（但都少少差），今次要停派息，主要原因係接獲英倫銀行透過審慎監管局發出的書面通知，要求匯豐取消派息。

所以，佢並不是自己好唔得，而去到要唔派息，而是因應翻英國監管局要求，才這樣做，所以，雖然是不好的利息，但不是核心性不利。

停派息對收息股從來都不是好事，但在這全球經濟咁差時候，為集團預留一筆資金備用，對集團和股東都是有利的。

在全球經濟環境影響下，集團中短情況相信都會維持波動，未來再停派息也說不定。但我地投資應該要集中考慮翻佢長線因素，雖然預期匯豐中短期表現會受壓，但長線質素依然存在。

作為收息股係可以，概念上，就是放棄中短期股息，而預期將來慢慢回到正常狀態，只要你投資組合唔好太偏重單一隻匯豐或銀行業就無問題。

但記得，唔好佔比太重就得。同時明白這只是收息股，唔好對股價有太大期望。

不過，你這年齡，收息股未必最適合你，如果匯豐之後上翻，你可考慮轉其他。

至於微創醫療（0853）就算有質素與增長力，點計都貴，因此唔太值得投資。最多只能小注持有。

月供部分無問題，可長線。

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q17840：

老師你好，我26歲，係投資初哥。

有十萬蚊儲蓄，由今年年初開始聽你平台月供股票。
衣家月儲$4000，月供$6000，分別係盈富，領展，同香港電訊（6823），每隻每月$2000。
目標係30歲有$100萬。

衣家市道差，係咪應該趁低吸納每月供多d？儲少d。另外老師有冇研究美股？謝謝你。

另外，經常聽老師講複利既影響。到最近派息發現複利是不是要靠以股代息才能發揮作用？這三隻股票除了領展其餘的都冇以股代息。

龔成老師：

你上述月供的，都是有質素的股票，月供的方向大致正確，不過以你的年齡，收息股如香港電訊（6823）未必最適合，應該投資較有增長力的股。

市道差，理論上應該買多D股票，不過，你要睇個別股票，有些股票如部分新經濟股，股價根本貴，唔值得入，但有些舊經濟股，則可以買。

所以，你都要考慮各自的平貴，同時，要建立一個「長遠的投資組合」，不同類別的股票都要有。要平衡。

我專於港股。

股價長期的升值，以及你收到股後自行再投資，都能產生複息效果。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。