▌唔知大家覺唔覺，愈係衰格嘅人，愈係出乎意料地覺得自己係個善良嘅大好人。幾年前我喺一間公司度做嘢，有一個同我同級嘅同事，佢就係呢種人。

我哋將佢稱之為縮春上校/縮春兄。每次接到一啲非常難搞、人人唔想沾手嘅大project，縮春兄都會突然消失……例如係個客神級麻煩，明知同佢開會係瀨硬嘢，縮春兄就會忽然唔見咗人，你問佢佢就話佢跟緊其他嘢嚟唔到。同類嘅情況發生超過10次，最大問題唔係佢唔出現，而係當大家夾手夾腳渡過難關，做晒啲苦差之後，縮春兄就會現身說法，突然閃出嚟指點江山，畀晒意見話應該點做點做，情形就好似二戰時成班人去諾曼第登陸，死傷無數，然後當我哋真係打贏、登陸咗，紮緊營嘅時候，條友先粉墨登場，仲好似完全冇事發生咁嚟同我哋講：「喂，紮營唔係咁紮架！」

縮春兄佢嘅惡行不只於此，明明自己做得最少嘢，就會喺老細面前話人哋唔做嘢；明明自己工作表現麻麻，又會批評做得最多嘢工作表現比佢好嘅人；再加埋小動作多多，時而扮契弟，時而見高拜見低踩，既要做大佬，同時一有事就縮陽入腹。

喺咁嘅情況之下，同事當然唔會鍾意佢，雖然唔鍾意，但僅限於有微言，未至於篤佢背脊。縮春兄自知唔受歡迎，就周圍同人講，話自己畀同事逼害，佢話唔明點解佢做嘢咁盡心盡力，對大家咁好，大家都要害佢，明明自己就係成間公司最善良嘅人……

遇見縮春兄之後，我先知，原來呢個世界真係有丁蟹咁嘅人，同一件事，人哋咁做就係自私，如果畀著係自己，就係有苦衷，係人之常情；對呢種人嚟講，其他人係唔可以有苦衷，因為「苦衷」呢樣嘢已經畀佢哋私有化，只有佢哋自己先可以獨攬苦衷，有血有肉。

可能有人會問，咁你點解唔同阿縮春兄傾下，話佢知佢嘅問題？唉，我有呀，我同佢講：「喂，你次次有大鑊嘢就走咗去，咁啲同事會唔鍾意你架喎！」縮春兄眼都冇眨，理直氣壯地回答我：「哦！係呀，我係特登畀啲機會你哋去試下架！」

▌哀傷戰記(11)
「我打死人，但冇做錯」