好多人關心上次俾人有投訴啲乜嘢。說穿了，就係我唔肯對住Big6講普通話。Big6入嚟，同我劈頭第一句就講普通話，我問番佢你識唔識聽廣東話？唔識，我再問佢用英文你O唔OK？

大學生英文雖然唔好，但係起碼能夠比我問到佢基本嘅食物藥物敏感，之前健康嘅狀況，有冇食煙飲酒習慣，家族歷史等等。另外我可以問到佢皮膚痕癢出紅點嘅時間，身體位置，痕癢程度，有冇越嚟越好緊/差緊等等。

如果我用英文問，問黎問去都問唔到我想要嘅嘢，我先至會就範，講普通話。但係既然你又溝通到，咁我覺得你英文程度唔差。你如果覺得溝通唔到，你可以選擇睇第二個醫生。你可以要求翻譯。你可以用紙筆寫中文字俾我。

但係你冇要求到任何野，冇喺診所發爛渣，無含住泡眼淚同姑娘即刻講我嘅不是。淨係兩個半月之後先至心血來潮D7我，咁我覺得你有精神病多啲囉。

我唔係話我去佔中我係激進黃絲，但係我始終係一個香港出世嘅香港人。我鍾意張國榮多過譚詠麟。我係聽四大天王大。我細個講咗好多句「飲啖茶食個包。」我覺得周慧敏宮廷嗰輯Yes！卡好靚。我迷過陳曉東大家一齊打開天窗。我掛住深井燒鵝，雞蛋仔，卡樂B薯片，維他檸檬茶。呢啲係我係外國住嘅時候全部都冇。但係我繼續唱卡拉OK ，繼續買勁貴嘅Yes！黎睇。喺學校炒Yes！閃卡賣俾同學仔賺零用錢。

我覺得我想有返基本權利去揀我鍾意用廣東話或者英文去睇症。其實我遲早知,佢哋會投訴我唔鍾意講普通話。雖然我普通話應該勁過好多人。我中同好多都係台灣人。我老公屋企係講普通話。我啲口音唔正,但係至少一定聽得明我講啲乜嘢。當我讀Medic嘅時候，教嘅係用英文教。我睇病人係用廣東話睇。點解我出到嚟你劈頭第一句我就要就返你講普通話？我唔係話我唔肯講普通話。但係至少你可以學吓啲唔鹹唔淡嘅廣東話，或者攞啲Effort出嚟證明你好想學但係始終唔識。你劈頭第一句老奉咁覺得我要同你講國語，老娘就係唔順超！如果你去日本睇醫生，你會唔會逼一個日本醫生同你講廣東話？英文幾時已經變咗唔係國際語言？

我知道遲早有一日我係會俾人投訴。我四年黎喺呢間診所都係咁樣做。而家先俾人投訴應該係我賺咗。我想講我係有件「我係香港人T恤」。幾年係年宵買，一直着到而家。好有衝動聽日着返工。

～～～

Apparently坐過我間房嘅好多醫生都好快SortSort地同走左。姑娘1同姑娘2好快就買咗陸柚葉，煲咗水幫我抹過手/摸房。跟住兩支嘢係我個X光箱前邊。我好多謝佢哋。雖然我唔信，但係如果佢地覺得心安理得嘅，我唔會反對佢哋嘅心意。其實我知係我個人嘅問題。呢間診所容納唔到我。又或者係新嘅香港人已經容納唔到舊一批嘅香港人。就算你係專業人士也好，唔改變都好快被淘汰。面對要改變同放棄自我價值VS被投訴被炒嘅風險該如何平衡？諗到嘅留comment俾我。