嚟啦喂，放暑假都好似冇咩做架啦～

#在日落前交換日記
星期一至五 5-6 叱咤903
阿檸 - 毒檸王國

【毒檸王國有台戲檸檸檸檸檸之戲呀戲呀HEY!】
監製 檸

Yeah!終於公佈左啦!我哋今個暑假將會舉辦毒檸王國有台戲檸檸檸檸檸之戲呀戲呀嘻，亦都真係會同好多新朋友一齊搞大型舞台劇! 上莊感好似好濃烈，我個人係充滿期待嘅。

除咗期待之外當然有少少擔憂，啱啱唔小心講咗大型舞台劇，就好似更加令人擔憂。會搞成點真係未知之數，但係大型舞台劇來講都係名目嚟㗎啫，可能最後做出嚟只係微型小劇場，但係都可以攞個大啲嘅名嚟包裝反正全世界都係咁架啦～

以下係用大名目嚟將小事化大嘅例子：
1. 真名係多小小follower嘅IG用家，大名係網紅KOL
2. 真名係冇乜嘢做嘅職員，大名係公司老前輩
3. 真名係橙汁加西瓜汁，大名係夏日大繽放
4. 真名係加兩下鼓聲嘅k歌，大名係band sound music

根據以上嘅原理，我哋將小劇場改返個高級名，件事就一定會成功! 最重要係，我哋仲有戲呀戲呀嘻呢個subtitle包一包底，一定冇衰，一定皆大歡喜。

場務 Oscar

【毒檸王國有台戲 之 陰謀】

黑手 檸

我個人好期待毒檸王國有台戲 檸檸檸檸檸 之 《戲呀戲呀hey》計劃，期待既為係我希望佢可以成為一年一度嘅盛夏大祭典，每年都有人官方地加入我哋王國，為我哋嘅故事不停加入新嘅演員，但係要知道，萬國舅，萬貴妃，莎莎郡主呢班麻煩人永遠都係呢個黑暗故事嘅棟樑，我哋嘅陰謀只會日趨龐大。

以我哋每年招攬四十人呢條數去計算落去，保守估計我哋毒檸王國有台戲進行五年先啦，已經有二百個香港社會嘅未來棟樑，因為放sem break唔溫書或者暑假唔做暑期作業而需要defer或者留班，而呢二百個人，各自平均會有兩個朋友覺得「車，佢都唔溫書啦」或者「車，佢都唔做暑期作業啦」然後發生同濟效應，令到佢哋都唔做任何功課。呢六百人如果全部都defer或者留班，力量早已令到已經好崩壞嘅香港教育制度更加崩壞，可以話係全面瓦解，藉住全面瓦解，香港嘅教育又會好似火鳳凰咁浴火重生，建立一個香港教育新秩序。要知道，教育係社會一切事項嘅根源，當教育產生新秩序，香港社會就會發生骨牌效應，一切會重新排序，建立出毒檸王國支配之下嘅全新香港！

所以話，無論萬國舅，萬貴妃，莎莎郡主呢班麻煩人有幾咁奸詐，呢一套始終係一套喜劇，所謂嘅陰謀最後都會有快樂嘅大團圓結局，我哋嘅目標就係令呢個社會重新建立，重建光明！

革命家 Os.D.Car

【#HKEBY X #毒檸王國有台戲
檸檸檸檸檸 之《#戲呀戲呀HEY！》】

毒檸王國2017年嘅暑期活動！
機會要嚟啦，我地同 HKEBY 一齊預備咗個興趣班，同學仔/唔係同學仔唔知你有冇興趣參一腳呢……任何人仕都可以參加（不過學生優先）！

大家一齊好多手好多腳搞一單校園巡迴音樂劇，走訪香港中學大學，我哋仲會搵嚟大量文化界及演藝界人士做大家team leader~ 如果你係年滿十五歲，可以徵求家長同意，如果佢唔同意，就係時間反叛一次啦！

一齊嚟成為主角或者配角或者編劇或者導演或者場務或者燈光或者道具或者音樂啦！少年！兩星期內截止報名！

想參加嘅朋友仔，填一填表，inbox我哋或者寄信嚟九龍塘廣播道三號商業電台比 阿檸 - 毒檸王國 或者 奧仕卡，信封面註明《戲呀戲呀HEY！》：

名：
班級：
學號：
性別：
性格：
性格缺陷：
年齡：
電話：
學校：
生日：
參選口號：
參與原因：
人生原則：
100字讚美主辦單位 (自由發揮) (重要)：
想做嘅職位：
監製 / 導演 / 編劇 / 演員 / 道具 / 場景 / 服飾 / 燈光 / 音樂 / 歌曲

比張學生相嚟先，唔該。(唔準執)