［個個都做勇者，唔通個個都想做勇者咩？］
因為《勇者鬥惡龍XI》，成年冇打機的我終於打番機。
《勇者鬥惡龍》，英文名字「Dragon Quest」，簡稱「DQ」，被喻為日本國民級RPG（Role-Playing Game，角色扮演遊戲）。
我由紅白機年代開始玩《DQ》——嚴格來說是被玩。不像《孖寶兄...
［個個都做勇者，唔通個個都想做勇者咩？］
因為《勇者鬥惡龍XI》，成年冇打機的我終於打番機。
《勇者鬥惡龍》，英文名字「Dragon Quest」，簡稱「DQ」，被喻為日本國民級RPG（Role-Playing Game，角色扮演遊戲）。
我由紅白機年代開始玩《DQ》——嚴格來說是被玩。不像《孖寶兄弟》和《冒險島》，你需要做的單純是用十字桿控制Mario或嗰條踩滑板的月巴仔，行、跳以及掟武器，《DQ》要你做的只是撳指令，問題是那些指令都是日文字，而且是最基本的五十音，試問一個正在接受九年免費教育的學生點識撳？不過，因為細，記性好，好快就記得晒各指令的功能，偏偏真正攞命的是Save這步驟——不像《孖寶兄弟》和《冒險島》，一粒鐘內點都玩得完，《DQ》往往要你用上十幾粒鐘，而你又不可能佔用（屋企那唯一一部）電視機十幾粒鐘，於是不得不儲存，儲存需要密碼，密碼則是由國王所提供、一組多達幾十個五十音的日文字組合，但礙於不諳日文（加上紅白機的8Bit畫面），有些日文字，真的睇到黐線——辛苦遊玩的成果，隨時因為抄錯一粒日文字而付諸流水爆粗收場……所以有時會採用「一字兩檢」，亦即專誠請人去我屋企幫我檢查有冇抄錯（但幫我手Check的人都係估估吓）。
令我最沉迷的是第三集。第一和第二集，我都是亂咁打，唔知故事講乜，第三集不同，因為有台版攻略本。這本攻略本，堪稱80年代香港《DQ》迷的重要記憶——紅色的封面封底，設計簡潔典雅，加上還有直迫電話簿的厚度，就咁睇，根本同一本課本無異，以致帶返學校都不容易被萬惡的訓導主任發現。更難得是攻略本將成個《DQIII》故事寫晒出來，以致身為「勇者」的我，終於明白自己做緊乜，知道自己有幾咁天降大任，就算唔做功課唔備課唔溫書也在所不惜——畢竟勇者的存在，就是要令黑暗世界重見光榮，比起作為一個為分數而背鑊甘的學生光榮（即使扮演勇者無非是演繹一個已預先寫好的劇本）。
《DQ》甚至改變了我看待人生的態度。當然，到後來發現了有一些同現實不符，但有一些，相當貼近現實。
1.我向來不擅長玩動作Game，從未爆過《孖寶兄弟》和《冒險島》；但玩RPG Game，需要的只是耐性——打怪物儲Level，只要儲到一定Level，自然能夠闖過各個預設的人生難關。在《DQ》的世界，努力與成果永遠成正比，這一點令小時候的我明白到：做人，首要是努力，所以一定要努力（長大後才明白，在真實世界裡，努力Doesn't Mean Anything，再大的努力也鬥唔過最小的權力）。
2.天降大任的勇者，大晒，大到被允許擅闖塵世間所有民居，被允許打開別人的衣櫃寶箱，見乜擸乜；而那些被明搶財產的人，只會繼續按照程式為他們所安排的人生，當冇事發生（今時今日，你同樣眼白白睇住三唔識七的人，大條道理去你的地方明搶你嘢，偏偏理性務實的你還要合理化這種搶劫行為）。
3.在《DQ》的世界，除了勇者這唯一的主角，還有大量NPC（Non-Player Character），當中有國王有大臣有戰士有販夫走卒，而佔最多的，是面目模糊的平凡人。面目模糊的平凡人（被預先安排）要做的，就是終其一生都守在某個固定範圍，行來行去，無論面對任何事，都只需答那唯一一句（被預先編好的）台辭；無論外面發生任何事，他們都只是行來行去答那唯一一句台辭，全程沒有個人意志（此時此刻好多讀過書的人，為了支持一地兩檢，都勇於扮演沒有個人意志的NPC，Keep住講同一句台辭）。
講到尾我最欣賞的《DQ》設定是：勇者只需唸咒文就能夠呢度去嗰度去，那世界，沒有高鐵。
（原文刊於am730）
#月巴事
訓導主任英文香港 在 君子馬蘭頭 - Ivan Li 李聲揚 Facebook 的最佳貼文
［DSE 相關系數］英文嘅嘢，重考生兩年成績，相關系數90%以上。極少係唔好彩。中文就唔同啦！
TL:DR – 中文通識中西史分數失望嘅，不妨考多次。因為可能只係唔好彩。理科嘅就算吧啦。英文其實都係冇乜翻身機會，但好多人都係一定要試，明白嘅。
話時話，呢排記得keep 住like and share，主動入嚟睇，同埋設定做see first．真係搵食艱難。但感激大家
1. 幫考試局蔡熾昌（我知唔係考試局，亦唔係蔡熾昌好耐，但我到而都係講旺角火車站）平反下。考試局拎咗咁多錢呢，至少在年度報告，都係有啲貢獻。你咪話，真係詳細過唔少上市公司或者NGO。至少詳細過海洋公園
2. 考試局居然有出，每一科，係每一科，重考生嗰年成績，同上年成績，嘅相關系數（correlation coefficient）。真偉大。但唔知點解，去到2017年後就冇咗。
3. 唔係教數學，但相關系數不能理解：相關系數高嘅，即係舊年高分嘅好多今年都高分，反之亦然。相關系數低嘅，即係好似關係唔太大。負數？即係多數人舊年高今年低，呢度就唔會嘅。方便起見，原本係百份比，我全部倍大100倍。100分為之完美正相關，個個同舊年一樣分。
4. 實務上代表乜？如果嗰科嘅相關系數高，即係你舊年同今年都會咁上下分數。可能代表好難進步或退步，或者係個考試好能夠分辨出邊啲人得邊啲唔得。相關系數低呢？代表一年間可以好唔同，或者代表個考試好陽春，同擲公字差不多，舊年高分嘅今年可以走晒樣。
5. 之前講DSE重考，都係用英文做例子。一來英文緊要，二來多人考，亦多人重考。咁嗰時結論係好少可會升呢，亦都好多讀者指出，正常，因為英文浸十幾年，未必一年之間可以改變乜。雖然我有啲保留：「英文水平」未必可以好快改進，但「英文考試分數」係可以的。
6. 睇表啦喎，每一年之中，相關系數高嘅，紅色。相關系數低嘅，綠色。咁以下就係以所有重考生數字（＊）出嘅結論：
7. 首先，你見相關系數，普遍都幾高。好多都八十幾九十，極少會低過七十。
8. 另外，我啲紅綠色，係一年一年咁做，但你發現年年都差不多。紅嘅年年紅，綠嘅年年綠。即係基本上同考生無關，同年份亦無關，同嗰年份卷深唔深都冇乜關。係嗰科嘅性質，同埋份卷嘅本質。
9. 好啦，英文。眾望所歸，你見到英文科，紅過韓紅，紅過秦虹，紅過喬紅。九成幾嘅相關系數，差不多每一年都係最高。證實咗讀者嘅假設：英文嘅嘢，其實好難一年間改善。即使唔講英文水平，講英文成績，都係好難有乜大改。其實考多次最冇so就係呢科。但當然明白，偏偏呢科係好多人要考多次。正面啲睇，你可以話英文卷嘅甄別能力好好，冇死錯人，你係唔掂嘅，下年嚟多次都係唔掂。但你係進步咗嘅，應該有回報。
10. 但另一個極端，就過癮啦。中文呢？中文科年年綠色，相關系數極低。即係老老實實，分數唔滿意嘅，記住考多次。可能只係運氣，改卷嘅唔妥你。同樣係語言，點解分別咁大？我估係因為兩樣嘢：第一中文係母語英文唔係，唔少人都認為考中文會話或聆聽十分反智。低分嗰啲，咁平時點生存嘅？啞嘅？講法文定手語定手指指send message？考會話其實你考佢演講技巧，考聆聽其實你考佢專注力，同語言能力per se冇乜關。第二，當然係啲卷嘅設計。其實我冇教書多年，但而家中文應該都仲係冇MC玩？英文有下話？咁中文卷就變咗比較主觀。主觀唔一定差，但你重考嘅，下年唔同人，可能你同一份嘢佢畀高分你呢？
11. 另外仲有幾科綠色，相關系數低嘅，差不多全部係文科，「主觀」。亦即係你下年玩過係比較大機會翻身嘅。中史西史，中國文學，仲有惡名昭彰嘅通識都係咁。而啲友明明話通識卷有個指引唔會好主觀喎。數字唔係咁講咯。
12. 當然，仲有表上最低系數，最綠，唯一低過50嘅，視覺藝術（即係美術啦？）。原因同上。藝術嘅嘢，你識條鐵咩。畢加索去考應該拎個U（講笑，唔好咁天真，你估愛恩斯坦真係考試好低分咩）
13. 紅色，相關系數高嘅，除咗英文，就係Phy Chem Bio IT，簡單易明啦。啱就啱錯就錯，大腸就大腸架啦。易乾都係，可以問下呢度讀者，有人教易乾。但我記得都係有MC題？而家咁大鑊飯民粹嘅社會，MC題其實好東西，啱就啱錯就錯，又慳改卷時間。相反，你教文學嗰啲，分分鐘畀個學生老母（甚至學生本人）大返你轉頭。我老母年年睇莎劇喎，你邊位？
14. 仲有乜大科未講？梗係留到最後，數學。理所當然地，數學compul嗰部份，好紅，同英文有得比，相關系數好高。得就得，唔得就唔得架啦。雖然我覺得數學升呢不難的，我私人補習嘅重考生，全部都升呢。「因為U嘅我會叫醒佢去考試，F嘅會教下佢做啲初中甚至小學數」
15. 但奇怪係，分拆開兩部份嘅，唔知點解就綠，相關系數幾低。可能因為人太少？
16. 呀係啦，你見有啲科目NA嘅。如果日校學生唔夠30個人重考，就唔會出現。但好可能全體重考生係仲有幾百友嘅。例如IT在2017 NA咗，只代表唔夠30個日校重考生，但全體應該一定唔止
17. 最左邊，你可以見到2017年，全體重考生，有幾多人考各科。亦見到有啲科係邊緣化咗—其實會考年代已經係咁，只係DSE又吊多次命。
18. 你見到中國文學嗰啲，早幾年上榜，而家已變NA，Visual Arts亦係。仲在榜上嘅，你見中西史地理呢啲，都相當少人重考—固然少人重考唔等於少人考，我懶搵，但個大方向應一樣。
19. 另外小小技術嘢，我見BAFS（企會財），我見2013 2014係冇分類的，但2016就有。一拆二？無論如何，啲系數轉變不大，亦係偏高嘅
20. 最後弱弱一問，而家英國文學係咪冇人讀架啦？至少應該冇乜人重考，咁多年都唔見有上榜（咁可能因為日校不足30件重考）。不過傳說中都係巴閉名校啲女先讀咁話，呢班友唔重考亦好正路。但話說回頭，當年埃汾間屋村學校，學校普通都幾草根（我學生嘅創舉：踢完波買麥當勞新地筒一杯成隊人食！唔知佢踢五人定十一人呢）。但老校都堅持開英國文學，哈。可以話扮嘢，但又可以話堅持。邊個話草根唔可以欣賞文學先？富豪落難都要優雅嘛。
21. 正文完全講完。但忽然間感概，仲有篇後記在後面（其實我係寫咗後記先）。鍾意就睇，唔鍾意唔睇亦冇乜影響正題。
————————————————————————————
甲、 李天命講過個故事，講「命中注定」呢個字嘅含糊。羅素命中注定有四個太太，他實現了自己的命運。李天命命中注定有四個太太。可惜他沒有實現了自己的命運。
乙、 而我，都係「命中注定」教書嘅。但正如友人話齋，我冇做傳媒，係傳媒嘅損失。但做咗，就係我嘅損失。相信教書都係。我冇教書，係香港新一代嘅損失。但我教書，就係我自己嘅損失。咁我都係鍾意自己多啲。
丙、 真的，我係「命中注定」教書。你應該聽過有啲分析員或者散戶，興趣係「睇年報」。冇乜特別。你知唔知我十八廿二時有個興趣係乜？都係睇年報。但我睇考試局年報！當然我最鍾意睇啲考生錯處之類。但亦好鍾意睇啲數字
丁、 一套古惑仔收得，就有成個universe（勁過DC或Marvel），有前傳少年激鬥篇，有外傳洪興十三妹，有山雞故事，仲有reboot嘅江湖新秩序。有紅燈區，有龍虎砵蘭街，甚至有crossover開心鬼大戰古惑仔，真係勁過正義聯盟Capcom vs SNK。
戊、 亦都係好似以前香港啲殭屍片咁，一套鬼打鬼收得，就有人嚇人，人嚇鬼，鬼咬鬼，人鬼神。一套殭屍先生後，就有殭屍翻生，殭屍家族，殭屍叔叔，殭屍至尊—爭在冇殭屍超級至尊或者殭屍華堡
己、 一套收得，繼續拍，玩到爛為止，一路係香港精神。所以我今篇又講DSE重考。但轉個角度，冇魚缸溫度計了
庚、 你諗下，如果我仲教緊中學，加埋當年本人係呢個「教務組」（＊＊），若搞啲咁嘅嘢，老校家長應該都幾歡喜。一個唔該仲可以包裝做乜柒大數據分析添（都話個Excel放埋上Dropbox就雲端計算，加個密碼再track changes 就係區塊鏈技術，整個regression就係人工智能了）。但即係，What for ？讚我兩句又點？即時有女同事投懷送抱（係冇嘅，因為老校其實成日讚我）？定升我做附加數學科科主任？（＊＊＊）。
辛、 掉轉頭，我在呢度寫，即係「這雙手雖然少」，但每個like都自己呃返嚟，睇住自己成長，遇然仲搵到啲錢，唔係更好咩？
壬、 有機會再講，同樣道理，有啲金融文，其實真係我在星展年代做嘅嘢都差不多。只不過係轉做中文。但，肯定我轉做收費文（亦有試過），收到嘅錢，多過佢地畀我嘅人工。唔係話乜，願打願捱，但我覺得係值得諗下的。邊個食咗我嘅錢？點解我要經你接客？
（＊）我呢個表係所有重考生，但亦都有只係日校重考生數字。兩組有啲唔同，但我下唔到咩有意義結論，所以唔節外生枝。「或者遲下嚟多篇」
（＊＊）老師一樣有社團，基本上係強制，好多時冇得揀，負責啲非教學工作。「教務組」負責非教學嘅教務嘢，例如編成績表，編考試時間表之類。聽聞想上位，搏升SGM（所謂嘅主任）或副校或校長，做「教務組」就啱。另外仲有大家都知係乜嘅「輔導組」同「訓導組」。有啲學校（敝校）有「資訊科技組」，俗稱就唔方便講。仲有「課外活動組」。不過最堪玩味都係「教師發展組」，實不相瞞，我都唔知佢地係做乜春的。Hea人必做，守水塘守證物房咁，但就唔使諗升職。
（＊＊＊）附加數學科科主任呢單嘢，簡直係教書生涯中嘅高潮。詳見 我的辭職記 第一回（https://bit.ly/32QpCHN）
-------------------------------------------------------------------------
香港聯匯何去何從？新收費片已出，講足一個鐘，單次買200
想睇簡介嘅，呢度。亦有埋以前嘅片，有興趣可訂：https://bit.ly/3iYMD0F
報名嘅，呢度。今次課程編號填 CC005。唔想填信用卡亦可以FPS： https://bit.ly/3j0r9QZ
Log in 呢度：https://bit.ly/3gYXu9e
已付費嘅，log in後按最頂「按此觀看」就得。再唔係返呢度睇：https://bit.ly/3fyKbw0
仲搞唔掂嘅，睇埋下面，或者搵客服，或者PM我。
-------------------------------------------------------------------------------
【最新李聲揚收費影片】題目:「聯繫匯率會否脫勾？散戶應如何應對？」
影片/課程編號：CC005
播放平台：https://homebloggerhk.com/web-class-player/
付款及收看步驟：
1/點擊報名收看 [影片/課程編號：CC005]
2/利用信用卡網上付款
3/及後有登入資料可以立即收看
查詢：whatsapp 63832145
訓導主任英文香港 在 張寶華 Sharon Facebook 的精選貼文
今晚電話同fb messenger 響過不停，朋友不約而同send 同一篇文比我。讀了幾段: 寫華仁仔的，點解關我事？
原來文中有一句：保養得最好的，其中一位是張寶華。
女人，讚佢叻，不如讚佢靚！
葉朗程是有眼光的😝😝😝
穿得西裝筆挺的一位爸爸在香港某家國際學校的舊生酒會裏發表偉論，最引人入勝的一句是「而家啲 local school 唔入流」。雖然我是一位出身 local school 的香港仔，我一點也不介懷他對 local school 的看法，但他之後的意見，我覺得有點問題。「稍為好少少嘅 local school，全部都係男校，要我咁多年都淨係對住仔，我肯定心理變態。」
男校是一個 fraternity，一個 bonding 比起任何一種 fraternity 都要強的 fraternity。讀過男校的學生，都接受過一種另類的軍訓式洗腦，而這種洗腦會將你的人生徹底改變之餘，更會在你身上留下一道永不磨滅的疤痕，而這道疤痕的其中一種形態就是我們對異性的看法。
世人對和尚寺學校都有一個誤解，那就是由和尚寺出來的男生都不懂得跟異性相處，甚至乎像那位爸爸說的一樣，是「心理變態」的。世人太愚昧了，講到同異性相處，和尚寺出來的男生 can run before they even learn to walk。
尤其是香港華仁這一群。
怎樣才稱得上是和尚寺？不單內裏全是和尚，還要是方圓十里都唔會有女仔。我們的校舍處於一個非常騎呢的地理位置，所以方圓十里的確是不會有適齡異性的，香港華仁是和尚寺的極致。
雖然和尚寺學校沒有女仔，但和尚寺學校絕對有唔少女人，我說的當然是老師。從這個角度出發，我對我們當年的譚兆炳校長是心存感激的。佢請親嗰啲女，I mean 嗰啲女老師，都咁睇得，我指係佢哋出嗰啲 note-si，你話呢個校長係咪唔話得。比起嗰啲浪費資源喺改善學校設施嘅學校管理層，我覺得一位能夠在吸納老師方面想得如此周到的校長更能惠澤莘莘學子。
至於為什麼男校的學生比起那些男女校或國際學校的學生更懂得跟異性相處，就正正是因為對於我們來說，女老師便是我們異性世界的全部，係全 L 部。沒有女仔，只有女人。簡單一個問題：女仔難搞定女人難搞？梗係女人。因為我哋冇得揀，所以難搞都要焗住搞，搞吓搞吓便搞了一身好武功出來。現今正積極在社會打拼的七八十後華仁仔，便是由以下三位華仁女神調搞出來的。
第一位女神是 BBC，唔係英國廣播電台嗰個 BBC，係華仁嘅 BBC。這位 BBC 老師在華仁已經是一個 household name，除非你啱啱讀中一，否則你冇可能唔識 BBC。In fact，我讀中一讀咗兩個禮拜，未知道校長係邊個已經知道邊個係 BBC。
仲記得我第一次知道點解 BBC 叫做 BBC 之後，我差啲流鼻血。BBC 即係 Big Ball Chan，我諗之後都唔使再解釋啲乜嘢。由中一讀到中七，困擾我足足七年嘅問題係，究竟 BBC 知唔知自己叫 BBC？為咗搵出答案，我喺距離畢業仲有三個星期嘅一個星期二，我做咗一個差啲斷送自己前途嘅舉動，就係我見到 BBC 喺 chapel 對開嗰條路行過之際，好大聲咁嗌咗聲：BBC！
好記得 BBC 即刻停低咗，向我衝過嚟，直接的咗我去爆房。唔好心邪，係爆咗入羅榮新副校長間房。羅 sir 問 BBC 我衰咩，BBC 叫我自己講，我話我大嗌；羅 sir 問我嗌乜，我話我嗌 BBC。我好佩服羅 sir 嘅忍笑能力，亦都好感激佢冇喺我畢業之前搞花我個底，只係隨便咁罰咗我留一個禮拜堂。本來我大可以理直氣壯咁問，係唔係大聲嗌英國廣播電台個名都唔得，但算，我冇咁做，因為我已經達到我目的，就係原來我終於知道 BBC 係知道自己叫 BBC，其實全校都知，包括羅 sir。
BBC 教咗我一個道理：喺個女人背後讚佢嘅身材，係心存尊敬；喺個女人面前讚佢嘅身材，係心術不正。
第二位女神是 Miss 井。雖然 Miss 井不算是國色天香，但我曾經很努力的讀好我的 Bio，就是因為我想討好 Miss 井。我成功過，因為我在一次 bio 小測拿了全班最高分；我出去攞番份卷嗰陣，佢笑住咁對我話 well done Marcus。
很多男生都會犯過我犯的毛病，就是當女人輕輕讚你的時候，你便會覺得她對你有意思。對，這個毛病就是明明是你自己對她有非份之想，你就老屈埋佢都對你有非份之想。當然，Miss 井讚我嗰陣，全班一齊起哄。就由嗰日開始，as every boy would have done in any boys’ school，我班同學開始稱呼 Miss 井做「Marcus條女」。誰不知，之後出事了。
有一日就嚟體育堂，全班開始換衫。就咁啱，Miss 井喺我哋班房前面行過；又咁啱，有位老師截停咗 Miss 井，同佢有嘢傾。即係嗰一刻，Miss 井企咗喺一個全班男同學換緊衫嘅班房出面。然後，頭號損友 Benson 就在這時候忍不住說：葉朗程，除褲啦，你唔除，佢唔走㗎。
Miss 井聽到晒，即刻衝咗入嚟，然後秉承住一間 EMI 學校嘅精神，用英文話：教咗你哋咁耐，我先知自己原來係教緊一班咁冇口德嘅學生。故事嘅反高潮係，第二日，我買咗張 sorry 卡畀Miss 井，親自攞入教員室畀佢。從來未見過佢笑得咁甜，唔係幻覺。
Miss 井教咗我一個道理：激嬲一個女仔再氹番佢，原來感情進展的速度會比無風無浪更快。
第三位女神是 Miss Yu。去到今時今日出嚟做咗嘢咁多年，有咩女人未見過，但真是要數保養得最好的女人，只有兩個。一個是張寶華，另一個便是 Miss Yu了。三十歲好似十幾歲咁，四十幾歲都係好似十幾歲咁，你話有冇可能？Miss Yu 不只是一般的靚女，她是一個立體的 diva，有質感的，有光芒的，有靈氣的。
男校嘅男仔打籃球，打畀邊個睇？咪又係打畀男仔睇，但好彩華仁有一個 Miss Yu。她做我們班主任的時候，每逢班際比賽，Miss Yu 是會站在場邊，像一個少女一樣為你的三分波而拍手，為你的假動作而尖叫的。櫻木花道能夠男兒當入樽，全因為場邊那位晴子散發著的光茫，Miss Yu 完全明白這個道理。
誰不知一個如此漂亮的女人，竟然是 BOD 的成員。華仁的 BOD，即是 board of discipline，訓導處，wholly cow。我畀 Miss Yu 罰嘅次數、嚴重程度、受辱指數，徹底超越了其他老師加起來的總和。
Miss Yu教咗我一個道理：世界上沒有溫柔的女人，只有扮溫柔的女人，而一個扮溫柔的女人，是可以同時出現在你的綺夢和惡夢裏的。
華仁仔的風度是一種從小培養的自我保護機制，因為我們比任何男人都更早領教過女人的可怕。
訓導主任英文香港 在 陳心遙 Facebook 的精選貼文
《我犯咗校規，然後⋯⋯》陳心遙
《信報》2017年3月1日《視線所及》專欄
記得小學嘅時候，我曾經犯校規。因為唔覺意畀先生聽到我講粗口，所謂講粗口，其實我只係衝口而出講咗「仆街」兩個字。呢兩個字甚至連TVB黃金時間都可以出街；不過，我當時就因為呢兩隻字畀先生罰企喇。
但最近見到有網友分享，原來而家進化咗，唔單止罰企：因為講咗句英文粗口單字，個小學生喺周會上台，當住所有同學面前認錯，老師會指學校出咗個講粗口嘅學生令人好失望??
唔知有冇誇張到，不過都唔難想像。香港學校嘅校規之嚴，涉獵範圍之廣，禁忌之多真係源遠流長，而且匪夷所思。譬如，我讀中學嘅時候已經知有學校唔畀女學生嘅銀包入面有任何男仔嘅相，男明星都唔得，如果係爸爸或者哥哥嘅相，就要解釋同申請。我諗呢啲可能都濕濕碎，有興趣可以去某社交網站某個透露學校「秘密」嘅群組嗰度查找。
所以我有時真係搞唔清楚，啲學校想訓練學生循規蹈矩，定係其實只係為咗想維護校規無上嘅尊嚴。喺成人嘅世界，規矩嘅合理性，係建基於群眾認同，同埋執行嘅平等，冇大細超，冇未審先判，冇輸打贏要。雖然校規冇可能喺開學嗰日逐條逐條同學生解釋，但就一定可以喺有人犯規嘅時候，將事件作為教材，令學生理解規矩嘅重要，同埋一齊反思嗰條規矩背後嘅邏輯。
好似最近某中學嘅「便服日」事件為例，其實只係一班學生趁機偷玩，借同班女同學嘅校服反串一下，玩完一日就算，斷估唔會日日玩；但係訓導主任可能用咗一個比較有爭議性嘅方法解決：就係記缺點之餘逐個逐個男學生捉入廁所逼換衫。
學生嘅世界好單純，反串唔係殺人放火，只係偷玩，但大人如果只係用對錯思維去簡化，即使畀你係啱，但都係平白錯過咗一個教育嘅好機會。何不由佢哋玩一日，再喺課堂或周會嗰度解釋同反思「性別認同」、「男女平權」、「社會規範」等等問題。如果學校願意，我相信大把專家願意幫手教，仲令人覺得學校「開明」添。
成人世界點荒謬都好，或者你已經被迫要將荒謬傳畀下一代都好，最低限度，你唔好將佢哋天生嘅反叛力同好奇心閹割，由得佢哋無條件全盤接受社會嘅全部規範。因為社會嘅進步，自古至今，都係靠少數有智慧，又反叛嘅人甘冒大逆天下嘅風險，去質疑，去改革，焦頭爛額有之，粉身碎骨有之。希望大人眼白白睇住個世界墮崖之前，有年輕人用赤子之心及時出手相救。
#我犯咗校規然後 #校規 #校服 #講粗口 #禁忌 #罰企 #便服日 #反串 #信報 #陳心遙