［是日科幻］人類先係地球最大病毒

1. 埃汾去九龍城食糖水（真係食糖水，係九龍城唔係九龍塘），打卡嘅名句：「癌細胞嗜甜，我就係呢個城市嘅癌細胞」。100%原創，有啲深度，朋友好鍾意。有朋友（政見不同的，好難得）理解話因為我返工用腦多所以要糖份，但你見其實好多人返工唔撚用腦都係咁食甜嘢（其實我都係）。

2. 咁正題，有啲人係城市嘅癌細胞，而遊客（包括我）先係意大利嘅病毒。

3. 再推遠啲，雖然我唔係「人類萬惡死不足惜」嘅Thanos 或 《幽遊白書》仙水忍（黑之章錄影帶，我估新一代唔明咩係錄影帶），但都係要講

4. 廣義嚟講，就真係人類先係地球嘅病毒。

5. 所以大陸段子有講：點解科幻片外星人襲地球，一定要剿滅人類？其實好合理，即係佢地嚟救地球，咪消滅對地球禍害最大嘅嘢咯，本質上同疫苗抗生素差不多，入到人體咪消滅啲病毒。企高一格，全新體法（！），換個角度思考就唔同。正所謂明月裝飾了你的窗子，你裝飾了別人的夢。下聯係莫道你在屌柒人，人亦能屌柒你。你身體入面有病毒，你自己亦係地球嘅病毒。劉伶（正係酒仙）話齋，屋係我條褲，天地先係我間屋。

6. 地球其他生物可能好歡喜，你唔係條魚點知佢唔係咁諗？可能成個過程在真—銀河衞視轉播，宇宙啲高智慧生物睇住外星人代表點殺人類，本質上亦係同直播手術過程，或者播打獵差不多。

7. 類似嘅講法，細細個睇衞斯理都有講，好早期嘅「紅月亮」都講差不多嘅嘢。如果地球係個宿體，咁人類就真係似病毒（甚至唔係寄生蟲），搞爆晒玩爛晒，咪移民去火星再玩過。

8. 講返近啲，雖然我係個樂觀嘅人，但我對climate change係相當悲觀嘅，照計個地球都係冚球鏟嘅機會比較大。但冇所謂，in the long run we are all dead，我死後話你知洪水滔天。照計我冇命見到呢日了。

9. 之前寫文都講過，唔生仔就最環保（http://bit.ly/3dek4cE）。絶對係科學的，有嚴謹計算。你咩食齋burger呀開電動車呀去少幾次日本呀之類，全部做晒，做十世，都未夠生少件咁環保（指碳排放）。因為現代人類文明生活就注定係咁。固然有人講（都係真），咁你自殺仲環保添。係，但唔生都生咗出嚟，況且自殺痛苦，唔係咁易。但唔生仔，相對係容易的。當然生仔應該好過癮（我指個結果，過程就唔使講啦），否則唔會咁多人生。

10. 但又講下，所謂咩「環保」，其實都係人類角度。我避免太過環保膠動物膠，咁so far啲狗呀花花草草呀墨魚滑呀響鈴呀未出嚟一齊反抗（＊），我當佢地同意啦下。

11. 所以呢，其實應該更正，地球唔會玩完的，最多人類玩完之嘛。

12. 又真係，去過切爾諾貝爾嘅埃汾（你估好似你咁睇完Netflix先Google咩，先知就係早你少少），都知道，當地其實啲生態就最好，大把嘢睇。唔係啲畸型輻射三頭馬，而係真係生物多樣性—原因？因為咁多年冇人去搞咯，直到有啲唔撚識死嘅遊客（well）走去睇

13. 咩啫，學者科學家都話安全架，梗係，你去之嘛，又唔係學者科學家去。我只記得係要簽生死狀（！）。仲有，當年去完，我部相機都打埋柴！好驚。唔知點解。啲相都死咗唔少，當年仲係用SD卡。打後幾年我都有啲輻射後遺症，主要係成日發火啦，日頭冇乜精神啦，鍾意食炸嘢啦，夜晚唔願訓啦，成日都好累啦咁。不過多數星期六日就好返。

14. 無論如何，我去威尼斯（意大利嗰個，唔係澳門）嗰時，當然已經係人山人海好多人，時為2012年（正係我去完切爾諾貝爾之後）。當其時坐Gondola，好似八舊水兩條友，但還好，雖然人山人海，意大利佬又好忙，但都做戲做全套，會唱下歌咁。但同你想像中嘅「鷹粟粉確係好，煎炸係唔同播！」就真係唔多同咁咯（＊＊）。

14.5 反而再早年，我同條女（呼，人地條女添）去康橋（唔係護老院），就真係可以「撐一支長篙，向青草更青處漫溯」（＊＊＊＊）。咁梗係人地撐啦，唔通我撐。但威尼斯船同康河係唔同玩法的。

15. 正如我去嵐山（梗係京都啦）睇櫻花，簡直係一生人最錯嘅決定，亦都令我力排眾議，相當唔鍾意京都，仆你個街，去到電話上網都收唔撚到，你想像有幾多人？而冇網上我會發癲的。「冇人叫你旺季去」「京都都有淡季？」「有，而家咯，不過去唔到」。呢啲，一樣係全球化嘅禍。而再政治不正確啲，其實我接受到港女，或者大陸妹著和服浴衣扮可愛影相，韓妹更好，「但我真係好難接受黑妹著和服」。不過唔緊要，黑人都覺得你亞洲人整黑人頭係文化剝削，咪大家互相鬧。

16. 再講開少少，疫情之前已經係全球化退潮，有埋肺炎更加會多人講。但我就冇咁悲觀。其實啲友反全球化，唔係想人唔好嚟，係「冇錢就唔好嚟」，高質遊客，即係有錢嘅，依然人人歡迎。又或者，人地就破壞環境異化當地人，但本人例外。講真的，你睇反全球化啲友，自己一撚樣一年去幾次日本，一撚樣去睇英超西甲炒貴人啲飛玩到足球仕紳化。你有得睇波有得一年去幾次韓國有得食靜岡蜜瓜，全部多得全球化。否則你就去裕華國貨打康樂棋啦（都幾過癮的）

（＊）建議你去睇《群》呢本小說（http://bit.ly/2Uc6EVS），好厚。講「當海洋有了意識，第一個念頭居然是殺人」，真係啲扇貝呀脆肉鯇呀打打下邊爐上嚟搵滾水潑你的，好撚痴線。有一期成日有啲扶手梯意外，我都懷疑係啲扶手梯有意識，開始攻擊人類

（＊＊）應該好多人都知，真係意撚歌，Santa Lucia。亦都真係船歌，意文歌詞有講。不過係拿坡里／拿不勒斯，唔係威尼斯。而其實大利同越南一樣，雖然一國，但向來都有南北之別，越南好啲，北越打贏，河內首都，但最大城市依然係南邊胡志明（西貢），意撚啦喎，向來北方人都覺得啲南方人係生番窮撚黑手黨冇文化，唔信你可以問下。梗係問北方人啦。意甲球會亦一路係北邊為大，「意甲七雄」（＊＊＊）亦全數係北部。拿坡里？馬勒當拿年代後就收咗皮，近幾年先再冒起的。去過拿坡里，馬勒當拿真係神，唔係講笑，啲餐廳將佢張相放在聖母側邊，因為佢難得地幫南部出頭。

（＊＊＊）其實唔鍾意附注再附注，但，意甲七雄呢啲真係出賣年紀，祖雲達斯米蘭雙雄羅馬拉素柏爾馬費倫天拿。

（＊＊＊＊）有人話呢句嘢其實係暗示，你懂的。

【足金勁喉ep 104】

《球壇Hot Dog》: 從「厄齊爾」被中國媒體封殺看本周離奇事件簿

《主打菜式》: 歐聯歐霸抽籤即時分析

【全港最快】歐聯+歐霸淘汰賽抽籤結果「新鮮出爐」(抽籤時間係香港時間7點)，我哋當然要馬上為你奉上分析同總結啦！另外，奧斯爾 / 厄齊爾被中國大陸封殺惹來全城討論，但其實呢個禮拜仲有好多離奇事情發生，今晚同你飽覽！19:30 準時入嚟收睇直播啦！

《估波》: 香港 vs 中國 (東亞足球錦標賽分組賽第三輪) / 巴塞隆拿 vs 皇家馬德里 (西甲)

《投票》: 誰是今屆世界冠軍球會盃冠軍？

《主持》：防中維、聰

《幕後》：越仔

財務報表分析(3) - Big6 收入比較 (電視播映收入)

前文提到，英超同歐聯嘅獎金都會歸納為呢一項。從 Big6 各隊呢方面嘅收入，可以見到喺歐聯取得成績有幾重要。上屆打入決賽嘅利物浦，順理成章成為六隊之中電視播映收入最高嘅一隊，亦只能參加歐霸嘅阿仙奴，收入亦係六隊之中最低嘅一隊。以下同大家講講兩項賽事嘅收入係點樣分配俾各支參賽球會：

英超
英超比較着重平衡各隊嘅利益，盡量避免側重大球會。從下圖可見，中央廣告收入與及海外播映權收入，都係平均分配比20支參賽球會。至於本土收入部份，其中50%亦都係平均分配，剩返另外50%，就按照以下方式分配：

- 25% 按照球會最終排名，包尾嗰隊分得大約 £1.93m, 對上每高一名就分多 £1.93m, 如此類推，冠軍就得到£38.6m;
- 另外 25%, 按照每隊當季獲選作本土直播賽事場數，每場大約分得£1.2m.

大家可以睇到，上季第二名嘅曼聯因為比曼城多兩場比賽獲選作本土直播，最終總獎金反而比冠軍嘅曼城高出30幾萬英鎊。而曼聯同包尾嘅西布朗相比，獎金大概多出5,500英鎊。

歐聯
相比英超，歐聯嘅獎金分配就複雜得多。首先球會參與唔同階段嘅比賽都會分到以下嘅定額奬金：

參與分組賽：€12.7m
分組賽每場獲勝：€1.5m
分組賽每場賽和：€0.5m
(每場和局因而少派嘅 €0.5m，又會累計起嚟按照各隊分組賽獲勝次數再作分配)
參與十六強：€6.0m
參與八強：€6.5m
參與四強：€7.5m
獲得亞軍：€11.0m
獲得冠軍：€15.5m

但各支參賽隊伍可以分到嘅並唔只係係呢一部份。以上屆亞軍利物浦嚟講, 呢部份佔咗佢地整體歐聯收入 64%, 而對十六強出局嘅車路士，更加只係佔 38%. 原來仲一部份係嚟自所謂嘅 “Market Pool” 分配。

呢個 Market Pool 其中一部份會先睇每隊參賽球會所屬地區各自嘅歐聯播映權價值佔整體嘅比重，比如若果英格蘭嘅播映權合約比德國費用較高嘅話，所有英格蘭參賽球會可以分到嘅金額就會高過所有參賽德國球隊嘅總和。而各隊前一季度 (16/17) 用作獲取歐聯參賽資格嘅排名，會用作決定每一隊可以分得嘅比例。有四支球會參賽嘅地區，聯賽首四名嘅代表，會順序獲分配 40% / 30% / 20% / 10%, 而有三支球隊參賽嘅地區，首三名代表就會順序獲分配 45% / 35% / 20%. 不過大家要留意，以上屆歐霸冠軍身份獲得歐聯資格呢部份係無得分。我哋可以作出以下嘅觀察：

- 同樣十六強出局嘅車路士(英超冠軍)、熱刺(英超亞軍)與及曼聯(英超第六)，因為 16/17 聯賽排名導致所得出現顯著差異；
- 曼聯喺 Market Pool 比車路士獲分配少 €27m, 意味即使當屆曼聯獲得歐聯亞軍，所得都可能比十六強出局嘅車路士少；
- 袓雲達斯同羅馬受惠於意甲只有三隊瓜分, 所得比車路士多；
- 熱刺受惠英格蘭播映權費用較高, 比西甲同德甲冠軍(皇馬同拜仁)獲分配更多。

唔怪得咁多英格蘭球會嘅營業額都比歐洲大陸嘅球會高！

#曼聯 #MUFC #ManUtd #曼城 #MCFC #ManCity #利物浦 #LFC #Liverpool #熱刺 #THFC #Spurs #阿仙奴 #AFC #Arsenal #車路士 #CFC #Chelsea #英超 #PremierLeague #歐聯 #UEFA #ChampionsLeague

香港曼聯官方球迷會 MUSCHK 曼聯專區 曼聯Talk 曼聯聯盟 Manchester United News 曼城香港球迷會 MCFC Supporters Club HK 香港利物浦官方球迷會 lfc.org.hk 熱刺香港 Lilywhite HK Chelsea F.C. Supporters Club Hong Kong Arsenal Supporters' Club Hong Kong 一本曼利 拾苟說足球 足球快報 FootballExp

參考資料：
英超收入分配 - https://www.premierleague.com/news/691073
歐聯收入分配 -
https://www.uefa.com/insideuefa/about-uefa/news/newsid=2578222.html

【足金勁喉ep 104】

《球壇Hot Dog》: 從「厄齊爾」被中國媒體封殺看本周離奇事件簿

《主打菜式》: 歐聯歐霸抽籤即時分析

【全港最快】歐聯+歐霸淘汰賽抽籤結果「新鮮出爐」(抽籤時間係香港時間7點)，我哋當然要馬上為你奉上分析同總結啦！另外，奧斯爾 / 厄齊爾被中國大陸封殺惹來全城討論，但其實呢個禮拜仲有好多離奇事情發生，今晚同你飽覽！19:30 準時入嚟收睇直播啦！

《估波》: 香港 vs 中國 (東亞足球錦標賽分組賽第三輪) / 巴塞隆拿 vs 皇家馬德里 (西甲)

《投票》: 誰是今屆世界冠軍球會盃冠軍？

《主持》：防中維、聰

《幕後》：越仔