. 【9月號 關於生活專欄】 . 香港今年奧運豐收，人皆賀之，突然間運動變成焦點，街市阿嬸會講劍擊，文青會捉你討論「凱林賽」同「競輪賽」分別，連十世都冇人提起嘅超小國聖馬利諾都有人留意。填詞人個腦，又點會唔參與埋一份？學黃偉文話齋，填詞人同時裝設計師其中一種絕活，就係將任何嘢嘗試放喺自己作品中。 然後又開始摷吓，究竟廣東歌同運動呢個題目，有幾多詞人寫過呢？相信最多嘅，就係足球，而用足球做主題嘅原因，就係卡通片或動畫。〈足球小將〉呢首係「廣一」（唔係世一，係廣東歌第一），鄭國江老師包辦片頭片尾兩曲，張衛健殿堂作。之後有李克勤〈足球小旋風〉，至到千禧後周國賢〈黃金入球〉，至於純粹唔關動畫事但又講足球嘅，就有C AllStar 嘅〈足球先生〉，小克填詞，用字獨到：扱、斬、推、扭、恰西、挑、剔、剷、窩利⋯⋯旁述員常用動詞都被佢用咗三分一。（至於足球會會歌則另計，好奇可以搵下陳年〈擁南躉之歌〉同〈精工體育〉。） 至於其他運動，長跑有陳奕迅〈人生馬拉松〉（潘源良填），借練跑講對抗失戀嘅有連詩雅〈起跑〉（係呀我填嘅），當然仲有容祖兒〈跑步機上〉（黃偉文填）。〈單車〉，係講父子，運動成份唔太重，唔算，反而〈韻律泳〉（何韻詩唱）就入圍，兩首都係黃偉文填。有一首算偏門，何雁詩嘅〈洞天〉，講高爾夫球（何小姐本身係高手，歌名係向衛斯理同名小說致敬，點解會知，因為都係我填嘅）。拳擊都有一首，〈鐵拳之道〉（Kolor唱），填詞嘅連揸筆嘅基本腕力都冇，我自己唔知點寫出嚟。 當然仲有好多遺珠，一時間醒唔起，但可以肯定嘅係，每一項運動嘅動作或者專有名詞，都未必個個識，歌手同聽眾都有機會黑人問號，再者點將呢項運動投放感情，此難之二。另外歷代除咗某三兩位填詞人係經常運動之外，其他都係文官，你叫林夕寫摔交同擲鐵餅，唔係唔得，有得揀佢未必會揀咁囉。之但係歌詞同運動紀錄一樣，係不斷玩突破嘅，如果Mirror、Error 可以講奧運，叫佢哋唱馬術同自由體操亦唔係冇可能嘅事。 . ——〈歌詞運動會〉 文／梁栢堅 @leungpakkin . 關於生活專欄載於九月號《藝文青》。九月號《藝文青》已上架，可在7-11便利店、OK便利店以及各大書報攤購買。 . #梁栢堅 #奧運 #藝文青 #藝文青9月號 #asartisticasyou #asartisticasyou43

《聽風的歌》，村上春樹寫於40年前。 ——————— 【聽風的歌之味】 是聯合書院胡忠圖書館的味道。 是1995年4月的陽光和風的味道。 是九廣鐵路車廂的味道。 是中大Snack Bar的油煙味…… 如果你有看過之前那一篇《金庸之味》，應知道我因為太沉迷金庸小說而（錯誤地）選修中大歷史系——為了有朝一日成為小說家，書寫融合歷史的武俠小說，惟有去鑽研歷史，結果﹐開學後……我再沒有再寫過任何武俠小說，甚至連稱得上是小說的文章都沒有寫。咁寫乜？咪寫嗰啲好悶的導修報告和論文囉。 某一天，在Snack Bar食完晏，準備上堂，路過范克廉樓，見有人在擺攤檔賣書（我不知道現在還有沒有，但在我讀大學的遠古年代，經常有學系 / 學會擺檔賣書），我望了望，被一個書名吸引——聽風的歌。 作者，村上春樹。 村上春樹的名字自然早就聽過，只是從未睇過，記憶中有朋友看過他的《挪威的森林》（如無意外大部分港人都是因為這一本而認識村上春樹），讀後感只有兩個字：好鹹。這個簡短評語理應吸引到（好鹹的）我去看，但奇怪，（好鹹的）我竟然冇睇——直到《聽風的歌》，才正式去看村上春樹的小說。 「Well，原來小說可以這樣寫。」——這是我看過《聽風的歌》後的感想。 過去只會看衛斯理和金庸的我一直以為，所謂小說，就是一種以情節串連的東西，我甚至自行歸納出一條等式：看小說 = 看情節。所以，情節愈峰迴路轉的小說，就是好的小說——人物描寫固然重要，但如果情節設計得不夠好，人物描寫也不會突出…… 但《聽風的歌》是沒有情節的——OK，姑且當作是情節吧，問題是經由那些情節，究竟串連成一個怎麼樣的故事？我不知道，而只知道，這是主角「我」在某個暑假的故事，沒有峰迴沒有路轉，有的只是瑣碎的生活片段，加一些情緒和感受，That’s All。 離奇在，我竟然覺得好睇，甚至比起情節豐富到核爆的金庸仲好睇。 好記得，看完《聽風的歌》的最後一頁，是在聯合書院的胡忠圖書館，時間是1995年4月，有陽光，有風，很舒爽的一天。 然後沒再看金庸，反而把當時坊間買得到的村上小說，一本一本買下，一本一本看下去：《1973年的彈珠玩具》（主角「我」經常捧著康德的《純粹理性批判》，估不到我終於在兩年前，讀 / 捱了這本書3/4）、《舞舞舞吧》（當年博益版的譯者不是賴明珠，而是葉蕙）、《㝷羊冒險記》（嚴格來說，這一本的故事緊接著《1973年的彈珠玩具》，但我沒太理會閱讀次序）、《世界末日與冷酷異境》、《國境之南．太陽之西》，最後才睇《挪威的森林》。 結果歷史重演。初中時因為睇得太多衛斯理而試寫科幻小說，高中時因為太沉迷金庸而寫武俠小說，到了大學，因為狂煲村上，而開始去寫連我都不懂得怎樣定義的小說——1996年夏，Year 2的暑假，在前往二樓書局的梯間望見一張海報，「青年文學獎」的海報，我突然，好想寫點甚麼。 那個暑假，我不是返暑期工，就是匿埋寫小說（明明要籌備畢業論文）；小說沒有大綱，一想到就寫，寫夠二萬五千字，唔知寫咗啲乜，擺埋一邊……開學後，臨近截止日期，用了兩日，由朝到晚再到第二朝，改寫了一遍，在范克廉樓Canteen放入公文袋，寄。那篇小說，名叫《少年》（名字借用了杜斯妥也夫斯基的同名作品），「我」在某個暑假的零碎故事和所思所想。寫的時候唔覺，到事後才發覺：深受《聽風的歌》影響。 那大概是我成世人最沒有目的最純粹的一次寫作經歷。講堅，我從來冇諗過攞獎，亦都冇諗過這一篇小說會為我帶來甚麼——反而初中時模仿衛斯理寫科幻小說，是自卑的我，渴望得到（女）同學認同——這一次，只是基於一股極度強烈的寫作欲望，而我不得不設法去滿足這股欲望。 估不到這股欲望，一直存在。 #是物味

[無綫][冒險王衛斯理之支離人] 邊個估到王晶監製嘅網劇會放喺周日播？《三個女人一個因》播完之後，會播《降魔的－番外篇 首部曲》，再之後就會播《冒險王衛斯理》。 陣容強勁，余文樂係衛斯理，任達華係白老大，支離人係林家棟，白素就係晶女郎胡然。王晶呢兩年唔再重拍自己嘅經典，今次挑戰經典科幻小說《衛斯理》，唔知可唔可以將余文樂打造成新一代衛斯理呢？ 《冒險王衛斯理》會有《支離人》、《藍血人》同埋《無名發》三季。我好想知藍血人方天係邊個！ （觀眾報料話係黃浩然） Btw，愛奇藝4月9日逢周一二播兩集，會員優先睇晒全季。 #無綫 #TVB #冒險王衛斯理之支離人 #冒險王衛斯理 #余文樂 #任達華 #林家棟 #王晶