【身為一個影迷嚟到全中國最北戲院，點可以唔睇返場戲？】
＋
【《葉問外傳：張天志》短評幾句】

嚟到漠河呢個全中國最北城市——我會話係小鎮啦，夜晚氣溫係零下三十度，真心就冇想像中咁凍。個人覺得低過零下二十度，根本幾多度都冇分別，哈爾濱有風，可能仲凍。喺一個咁嘅地方，未四點就日落，食完嘢你都唔知有乜好做，忽發奇想，不如搵下有冇戲院，點知真係有。

呢間全國最北戲院講真極難搵，連正常門面都冇，係要行後樓梯入去，唔講以為自己去緊搵咸片戲院咁。戲院目測得兩個影廳，上映都係同期大片，例如《武林怪獸》、《天氣預爆》、《水行俠》、《蜘蛛俠：跳入蜘蛛宇宙》、《葉問外傳：張天志》等等，戲票好平，唔駛團購即場買，都只不過2D 30蚊人仔。

有咁價錢，當然唔會期望有咩好質素。因為小弟一個人包場，似係一個人包戲院，直頭見到我先至開場，事關我買完飛遲咗幾分鐘入。一如大陸好多非院線式細戲院，冇乜行高，都冇咩音響效果，但據聞東北戲院冬天會熱到你標汗，呢間感受到有微微暖氣，又冇太離譜，恰到好處啦。咁價錢、咁小鎮、咁位置，都有間戲院，好過你南美連大城市都搵唔到戲院。

《葉問外傳：張天志》短評幾句：

1. 真心《葉問》愈拍愈差，但呢隻金蛋竟然玩到半個Universe，估你唔到。考張晉叫座力嗎？好似仲衰過之前...

2. 動作場面真係唔錯，尤其同楊紫瓊對打果場。

3. 大量動作場面吊威也吊得太失真，一如事先張揚果場「大廈招牌打鬥戲」，Tony Jaa師妹套《女拳霸》精彩好多。

4. Tony Jaa次次都要做呢啲冇對白又好似好型角色？駛唔駛將來俾多套《葉問外傳外傳：無名英雄黑蝙蝠》佢？

5. 袁和平做動作指導係掂，做導演講故事差少少，一如當年《蘇乞兒》。其實你睇到某某角色出場，都知一定要搵個理由打，但搵都搵得好少少啦。

6. 黃子桓將《葉問》同一故事套路玩到去外傳，又係識英雄重英雄，又係不打不相識，又係挑起民族仇恨情緒，又係有個屈辱於外族角色？睇得多真係會悶。

7. 劇本設定其實都好奇怪，到底Tony Jaa個角色幫緊邊個？周秀娜係未來老板娘但係走去陪酒？楊紫瓊個大家姐角色作用就係說教？

8. 柳岩個樣次次都唔同咁嘅？佢到底識唔識打？

9. 真心呢套連大陸都好難搵場次，做咗一星期一億都冇，食老本食唔掂喎呢次。

10. 睇完呢啲戲，你明點解外國人會覺得你班Chinese個個都識打。