“Hot Girls Wanted” – 為咗自由同自主，你可以去到幾盡？

https://link.medium.com/h71PUKgpr5

//

又係 #較早前錄影 嘅時間。今日同大家介紹嘅，係 2015 年 Netflix 出品嘅紀錄片 “Hot Girls Wanted” 。呢套 docu 圍繞男男女女、朝朝暮暮都會睇嘅一樣嘢：鹹片， porn 。

食色性也，人嘅性慾同對飲食嘅慾望，一樣與生俱來。當然，男仔可能到十零歲先至識得自瀆 (唔好同我吹水話你六歲打飛機、七歲隊穿牆、八歲搞大咗隔離中學個師姐個肚) ，而女仔對於身體生理上嘅需要，就更加因人而異。

咁要滿足肉體上嘅需要，最簡單嘅方法當然係同你身邊嗰個「行埋」。不過，首先⋯⋯你要有個對象囉。喺大家情竇未開之前，或者甩拖之後，鹹網往往都係大家嘅救贖。

- - -

Okay 賴叔年紀唔細，早年未有互聯網呢，係偷睇老豆床頭啲《蛇貓狗》雜誌嘅。學譚校長名曲話齋，「《龍虎豹》好睇！好睇！但係又好撚貴～」咁人仔細細去唔到報攤或者便利店買閒書，當然就係喺屋企搵「梳屎」。

後來中學時期有個有錢同學仔真金白銀買咗本《名樹舞子寫真集》公諸同好，但係都已經冇本港土炮纖毫畢現咁震撼。

呀又，除咗純文字嘅鹹古同埋硬照之外，賴叔之少年時代係有錄影帶嘅。 VHS 呀， 全寫係乜嘢？有冇人答到我？ Video Home System 呀。喺屋企播錄影帶，影像男男女女喺度𠵱𠵱唷唷，認真入屋。

最陰公嘅係，家父嘅鹹帶都擺埋咗好一段時間，又冇適當抽濕防潮，結果睇親十次有七次都整壞部錄影機嘅磁頭，我識得用洗磁頭嘅帶去清潔都搞唔掂。老母問到，我咪又係之吾以對囉。

- - -

好喇，講返 porn ，或者香港人慣稱嘅 「AV」 。其實大家都知道係一門娛樂事業，有成億計嘅觀眾得閒無事就搵片睇，色情網站淨係收廣告費都賺到笑，莫講話有啲鹹片網推出 Premium 服務，等用戶可以專享更高清嘅片種同埋免受廣告破壞雅興。

有需求，自然有供應，製片商需要演員，而中間人，即係所謂 agent ，就係負責喺網上招人 (全部索女同我入嚟！) 然後幫啲演員接 job (you know what I mean) 。

「Hot Girls Wanted」 嘅中介人 Riley 喺美國邁亞密駐紮，佢求學時期被欺凌，出嚟工作之後喺快餐店洗碗，轉行做 Porn Star Agent 反而發過豬頭，有屋有車有番狗 (鬼佬好難唔係養番狗) ，收班女演員房租，仲喺佢哋片酬度抽一成佣。所以話， middlemen 呢種角色好值錢。

咁 Riley 出完 post 就有來自美國大城與小鎮嘅 wannabes 飛撲埋嚟，各有前因，為錢、為離家出走、為咗唔敢拍拖但又要做愛，乜都有。咁成班十八二十 (sorry ，廿二可能已經過咗入行年齡) 嘅𡃁妹就喺 Riley 安排交通同食宿之下，去到陽光與海灘、豪宅與遊艇俯拾皆是嘅佛羅里達州。

- - -

由於時下流行睇「鄰家女孩」，即係，有大明星你唔睇，硬係要睇啲有親切感，喺西洋菜街跌個招牌落嚟打中兩打嘅「素人」，所以 Riley 招募呢班冇人識、用藝名嘅女演員，都絕對不愁冇工作機會。

喺為期四個月嘅拍攝期間，新晉女優 Tressa 經歷過高山低谷。由最初興致勃勃要闖出一片天，唔想喺 Texas 老家終此一生，以為八嚿水美金拍一齣好好搵；到放假返老家對住老豆老母難以啟齒；到之後因為三個月新鮮感漸過而要越玩越大，例如嘗試塞節瓜咁粗嘅假狗入下體，又例如要接 facial abuse 嘅片種，之類。

咩係 facial abuse ？ Er ，唔係一啲會令人睇得愉悅嘅片種，集侮辱、強迫、痛苦於一身，但呢個世界百樣米養百樣人，百樣片養百樣閒塞仔，冇計。

咁 Tressa 呢，就仲要有個男朋友嘅。佢男朋友都接受 Tressa 向外闖嘅決定，但係當大家一齊出席朋友聚會而其他人問起「我可以喺乜嘢片種度搵到你」、「不如直接射上個屏幕度大家都齊睇」， Tressa 男友登時想搵窿捐。

- - -

「Hot Girls Wanted」 其實冇咩好爆嘅情節，故事推進落去，都係典型嘅女優回頭是岸，同男朋友返鄉下共賦同居，做個餐廳經理咁平凡過活，告別水銀燈下嘅紙醉金迷。

不過呢套 docu 又咁啱 side-track 咗一位藝名為 Belle Knox 嘅女優，佢特別在佢本身喺美國著名大學 Duke University 攻讀，一邊讀書，一邊拍鹹片去籌措學費。當真身被踢爆之後， Belle 上電視接受訪問。以女性主義、身體自主等大道理侃侃而談，並自稱享受作為 AV 女優嘅體驗。

當 Riley 同其他女演員講起 Belle 嘅時候，態度就比較不屑⋯⋯原因？ Belle 接拍嘅第一套片，都係前述嘅 facial abuse 。嗰套戲嘅導演串爆佢作為女性主義份子而出賣肉體，然後指令男優凌辱到 Belle 要 say sorry 同 open wide ⋯⋯ Riley 旁邊啲女優睇到冇眼睇， #FacePalm 。

其實關於鹹片、關於 AV 女優嘅紀錄片或書籍，天南地北都大把，尤其是香港人特別鍾意睇日本嘢，對於女優引退前後嘅辛酸、哀歌或悲慘身世，多少略有所聞。

咁美國嗰邊可能文化有少少唔同，冇有識死嘅𡃁妹仔因為拜金而下海，搞一大輪 (literally) 發現扣除買衫、造甲、比妝、交租等開銷之後，根本賺唔到幾個錢，只係上咗成長速成班。

或者咁啦。時下流行講 ESG (Environment, Social and Governance) 同埋 Responsible Investing 。連買海鮮都可以揀「可持續」嘅。如果成人影業界都可以推行「人道對待」或「安全拍攝」、 「Fair Trade」 等標籤制度，普羅觀眾或者可以睇得心安理得少少咁多多。

因為，睇完 「Hot Girls Wanted」 ，我真係對於睇鹹片興味索然⋯⋯

//

想睇更多賴叔時政見聞、金融掃盲及職場文章，請訂閱 Patreon:
https://www.patreon.com/shuklai

#hk #hongkong #patreon #blogger