【龔成問答信箱】（Q16881-Q16900）

Q16881：

成哥，如果我每個月只得1萬蚊投資，甘35年後有沒機會有3500萬？謝謝

龔成老師：

如果每月投資$10000，即是1年$12萬，假設回報率為10%（你要將收到的股息，再投資），35年後，大約會滾存到$3200萬，與你的目標都好接近。

因此，你之後只要集中力量，保持每月儲$10000，同時爭取10%的每年回報率。

------------------------------------------------

Q16882：

老師，先謝謝你！
我早前睇阿sir書後入左“天能”

其後大升幾倍，不過之後被沽空機構出沽空報告，之後又無乜事，阿Sir你有咩睇法呢？

龔成老師：

天能動力（0819）本質不差的，業務有發展有增長力，但佢的財務情況，基本上無問題的，不過，財務數據如果有心出古惑，有時唔易睇的，因此，我都唔敢講100%無問題。

不過我建議唔好投資太多，這股規模始終唔大，存有風險。如果你注碼不多，可持有，太多，就可賣部分獲利。

------------------------------------------------

Q16883：

龔成你好，想請教下關於現有既投資組合

今年27歲，現金150k，月入22k，每月儲8k，月供10k (供左年半)

月供如下：
2800 4K
0066 2k
0012 2k
0939 2k

另有 9988 一手@186.6，285一手@19.42，0823 兩手@72.23，0014 一手@28.2

而家香港局勢咁樣有啲擔心，月供既全部高於市價

1. 請問而家組合合理嗎？
2. 需要將0939月供既2k轉去供另一隻現供緊既股票嗎？
3. 需要轉啲港元去外幣？
謝謝！

龔成老師：

月供是一個長期的策略，最好5年以上，而你不用擔心中短期的股價不利。只要是有質素的股票，保持進行就得，反而最希望是「先跌後升」，這樣會最為有利。

1）合理，都是優質股，但建行（0939）只是收息，對27歲本說，未必適合太多。

2）如果你想增長力多少少，可以轉去其他較高增長力的股票，如不懂選股，就盈富（2800）。

3）不用。

------------------------------------------------

Q16884：

龔sir，你好呀！
請問除2400盈富基金外，
還有冇一些ETF 可以長線侍有呢？

例如: 3169領航中國 或3140領航標普五。
請指教，晤該。

龔成老師：

你可以投資領航標普（3140），這是追蹤美股的指數，有投資的價值，你可以投資。其實，建立一個更環球的組合，有分散風險的作用，所以可以。

但這ETF，成交比較少，你要長線投資，不能炒賣。

------------------------------------------------

Q16885：

Hello 龔成
房託要將90％收入作派息，對嗎
但係領展去年盈利有8.457 但派息只有2.712 ? 這是什麼原因？

另想請教太古A 同太古地產個分別，太古A持有太地8成多股權，那買太古A 其實等於買太地？而且太古A 有其他業務如航空等？謝謝！

龔成老師：

嚴格來說，房託要求將90%的「可分派收入」，派比投資者作股息。

盈利是包左「物業重估」，而「可分派收入」則是反映從經營上賺到的盈利。所以，你見到的數字，只是盈利，包左物業重估，而這只是一個虛數。

因為太古A（0019）除了持有太古地產（1972）外，還同時持有其他業務，而其他業務的優質度只是一般，最終令0019的盈利一般。

反而1972集中在地產，長遠的價值會更高，因此投資價值比0019高。

------------------------------------------------

Q16886：

龔老師，本人月入約30000，現持有兩手滙豐（平均價$58），兩手煤氣（平均價$15），另月供$3000盈富、$2000煤氣、$2000領展，打算三年內置業結婚

但見近期滙豐同煤氣都停或減派息，估價不停跌，想問以上月供組合應否重新分配，應否繼續持有現有股票？

龔成老師：

如果你現時有一定的現金，可以月供同時，並行留有一定的資金，就可以進行月供。

你現時月供的，都是有質素的股票，基本上可以繼續，不用擔心，但現時大市上落大，最好同時留有現金，如果大市向下就能把握到機會。

至於匯豐（0005），相信會弱一段時間，你最好視佢為收息股，唔好對股價有太大期望，這股唔建議持有太多，暫時唔好心急加注。

------------------------------------------------

Q16887：

老師，我現時讀緊大學，今年9月就final year
現時手持30k獎學金

我想問我應唔應該買一兩隻股票收息或增值，之後到將來出來做野再月供股票？
謝謝你

龔成老師：

你可以好好利用手上的$3萬。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你可以考慮投資盈富（2800），相信是最適合你的。

由於你現時資金不算多，所以買入時不要急，要等大市下跌先入。而到你正式出來工作時，就利用收入去進行月供，可以選盈富及其他股票。

------------------------------------------------

Q16888：

老師你好！一直有睇你嘅書亦都非常仰慕你！

小妹喺$60嘅時候入咗823 20 手同分別係$20 同$17.7入咗1972 15手，近排見佢好似不斷跌下跌下，請問係咪可以繼續持有呢？

龔成老師：

領展（0823）與太古地產（1972），都是好優質的股票，你可以繼繼持有，唔需要理會中短期的股價，集中長期的企業價值就得。加上你買入價不貴，更加不用擔心。

相信中短期股價可能會波動，但你只需集中長期的企業價值面就得。

不過，過份集中在同一行業，就會產生風險，這點你要注意。

------------------------------------------------

Q16889：

老師 你好
請問1753 如何？

還有512 感謝老師

龔成老師：

兌吧（1753）主要係中國從事用戶運營軟件即服務平台，以及互動式效果廣告等業務，不過這刻仍處虧損狀態，只可以話分析不易，有危有機類。

這都是潛力股，但風險較高，其實佢生意增長不差，只是未進入收成期，如果你睇好，小注投資可以。

至於遠大醫藥（0512），係中國從事製造及銷售醫藥製劑及醫療器械、生物技術產品及營養產品、精品原料藥和其他產品。

佢旗下公司係中國最大之安乃近製藥商之一，其另一產品替羅非班作為治療心血管疾病之主要抗血小板藥品主導中國醫療市場。

整體質素是有的，但未去到好高，現價合理，投資價值都有的。

------------------------------------------------

Q16890：

老師想問#604深圳控股這隻可吾可以入?

龔成老師：

深圳控股（0604），主要從事物業開發、物業投資、物業管理、銷售工業及商業產品、酒店業務建造物業等。

物業主要分布在珠三角、長三角和中部地區，服務涵蓋政府機關、寫字樓、住宅社區、別墅、科技業園區等多種物業類型。

整體質素是有的，但增長力不算好強，是平穩類型，現價合理，有投資價值，分注投資無問題。

------------------------------------------------

Q16891：

你好，如果有大約100萬現金分別係港紙，人民幣及美元，依嫁應該點分配比率？美元吾換哂現炒，做定期係咪都安全？

龔成老師：

其實貨幣始終是貨幣，長遠都會貶值，所以長遠應該將現金投入成資產項，當然，都要留適當的現金作備用。

港元由於有聯匯，與美元基本上是一樣的，你持有那一邊都無問題，做定期都可以。至於人民幣，持有部分，如3成已經足夠。

------------------------------------------------

Q16892：

想問下2342，我持有，值唔值得長線持有，比起788?會唔會係潛力股?

龔成老師：

京信通信（2342）主要從事研究、開發、製造及銷售無線電訊網絡優化系統設備、提供相關工程服務，以及提供電信服務及相關增值服務。

現時5G的發展，都會對佢有利，但這股規模唔算好大，因此又未算最強之列。但由於規模細，當企業發展時，潛力較可較大。

質素都算有的，但就不算好強，整體上都有投資的價值。不過睇翻佢最近的業績，又唔算好勁。

至於中國鐵塔（0788），質素會比2342高，但如果講潛力，2342可能略高。（不過，由於現價都唔算平，所以股價增長在這刻不算強，之後要業務有實質增長才能帶動股價向上）。

如果講整體上，一定是0788較好，但如果你想進取少少，加上投資注碼不算多，2342都可以。

------------------------------------------------

Q16893：

老師，我大概20多歲，如果我可用資金只有3萬左右，月入16k，那我打算分注入盈富，pattern可以怎樣分配比較好呢？

因為現在股市比較波動，我投資的知識不足。不過又怕錯過低吸納的時機

龔成老師：

由於你現時資金不多，運用時要較小心，現時大市大致處於合理區，你如果完全無貨，可以現價買入一手盈富（2800），之後就要持有現金，等大市有好大的跌幅，才買餘下的資金。

你買入盈富方向正確，因為佢的風險比較平衡，對初階者較為適合。

另外，以你的年齡，財富仍有一定的增值力，建議你多增加投資知識，在選股、企業估值、投資時機上落功夫，對你長遠財富有好大影響。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q16894：

老師，請問現在香港情況，股市一直下跌，中美關係未明朗，我這一年買港鉄(蝕$5xxx), 盈富(蝕$3xxx), 情一直供下去也因経濟差丶美撤離資金，長遠也難以回復原狀，想停供放左佢，可以俾D專業意見嗎？

龔成老師：

你唔需要太著重中短期股價，最重要是睇長期的價值，你持有的兩股都是有質素的，因此，你可以一直持有，無問題的。

我地投資股票就是買企業，最重要是睇佢的長期發展，唔好太理會中短期股價。

因此，並不建議你賣出，特別是現時這個價位。如果你擔心，可以停供，但我不建議你在別人恐懼時恐懼。

------------------------------------------------

Q16895：

你好，我想請教一下，我27歲月入2萬，無咩投資經驗，每月有1萬流動資金

我睇左d股既過往業績同前景，諗住拎10萬出黎入12，2800，823，1928，3，1038各一手，我想問一下我黎緊既投資方向應該點分配？謝謝你

龔成老師：

上述的都是優質股，加上現價大致處於合理區中下部的水平，你可以買入。

盈富（2800）是組合的核心，可以加上其他股票作配置，你平衡分配就得。但要留意，市況波動，建議你同時留有現金。

例如你有$20萬，就可以投資其中的$10萬在上述的股，同時留現金作備用，當大市有較大下跌時，就是機會。

現時大市波動，你唔好一次過入，要分注慢慢入。

------------------------------------------------

Q16896：

龔sir你好
我現在手持
2手 0005 $59.95
2手00066 $39.25
2手00052 $25.15

匯豐同大快活應唔應該放左佢？
還是等收息？
謝謝老師

龔成老師：

匯豐（0005）的質素比過往有減少情況，但不是零質素，你可以持有作收息，但就不要對股價有太大期望，如果你持貨不過量，其實可以持有。但如果太多，可以等上翻D時，賣出部分。

至於大快活（0052），有質素的，現時面對中短期不利情況，但長遠仍是可以，耐心等香港經濟正常翻。

------------------------------------------------

Q16897：

老師，想請教：

1. 如果以投資物業角度，應該點揀優質盤？咩地區有較大升值/抗跌力高？單座還是大型屋苑管理？新盤還是二手好？

2. 如果買第二層樓，係咪揀樓齡30年以下？如果屋苑已有35年以上，但又已經完成大維修，又建唔建議買來投資？

3. 如果現在加按套現$200萬，但樓市又未到價買入，或者未有合適的樓盤，應如何運用呢筆錢？放mortgage link 戶口收低息？還是用一半買入收息股？還是等股市跌到便宜區，用一半掃的優質股？

謝謝Sir

龔成老師：

1）一定是長遠供應較少的地區，你要見到該區，根本不會有大量地去起樓，最多只是拆一棟起一棟，同時，要市區，租金回報率較高，這都是選樓的條件。

如果你投資經驗不算多，就投資二手大型屋苑。

一般來說，投資二手樓會較好，一手樓有時會賣貴左，除非你找到租金回報率、呎價較吸引的。

2）可以咁講，但都要睇實際情況。

有些屋苑，就算樓齡較高仍是有一定質素，例如美孚新村。

3）如果你打算1、2年內會隨時入市，就唔好心急買股票，除非出現暴跌就可以買平貨。

在一般市況，你持有現金是最好的，可存於高息戶就得。

------------------------------------------------

Q16898：

老師好,
1. 請問 1038, 0012 現價可投資?
2. 如富爸爸, 窮爸爸一書中, 你會建議人在香港買黃金 / 黃金存摺?

龔成老師：

1）這兩股都是有質素的股票，雖然增長力比過往年代略有減慢，但仍是有投資價值的，可以分注投資，長線持有。

只要你唔好太進取去入，分注，同時留現金，就無問題。

2）黃金在財富組合中，有對沖大型黑天鵝事件的作用，你可以投資。但由於黃金無現金流，因此，買少少就夠，你可以買實金。

------------------------------------------------

Q16899：

龔成老師，想請教你，2812.HK龍網你點睇？值得做月供股票嗎？

龔成老師：

三星中國龍網（2812），基金之投資目標為追蹤中證全球中國互聯網指數之表現，長遠有一定的增長，有投資價值。

不過股價會比較波動，因此唔建議太過大注，你月供可以。

相信在2020年代（即是這個10年），行業會有一定的發展，因此有增長力。

------------------------------------------------

Q16900：

老師你好！ 我係股票新手，想請問點睇吉利汽車， 在11.9買入1手，12.38買入兩手

諗住趁低吸納， 而好似冇人睇好吉利，因為冇人揸國產車了， 會升得番嗎？ 定上番平手左右價就要賣出？

謝謝你！

龔成老師：

你唔好太著重中短期情況，要睇長線。

吉利（0175），本身的質素不差，擁有一定的銷售網絡及品牌，不錯的市場策略及定位，而又能把握中國汽車市場增長的機遇。前景仍是正面。

但中國車市放緩、外來競爭、行業競爭加劇，都成為不利的因素，相信中短期仍會對佢不利。

股價由高位回落不少，除了反映過往處貴水平，現在回落至合理水平，同時反映市場預期中國車市的不利情況。長遠前景仍在的。

現時價位在合理區，但股價波動，你持有無問題，只要唔好持有太多就得，你買入價太近，產生唔到分注的作用。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q16121-Q16140）

Q16121：

中文不好請見諒！龔成老師

幾年後我打算辭職，全職攻讀博士，大概讀五年，希望畢業後可以轉行，不過到時候由低做起，收入減超過一半或待業。期間真的負擔不起的話，可以part-time做原本的專業。

（不會考慮part-time讀博士）

現在月入10萬,有一層自住樓,現時市值約$1000萬。按揭欠銀行約$400萬。

讀博士的時候打算搬去大學附近劏房住，層樓就可以出租。不過因為從來沒有裝修，一定要出錢裝修過先可以租出去。

有一個車位，現時市值約$300萬。租金$5000

現金有$170萬
另有$20萬做了定期

股票：
Stock code。Qty。Average price

2。1500。$85.78
3。10000。 $15.16
6。2500。$51.15

5。2800。$61.33
11。700。$128.63
2388。5500。$24.13

66。2000。$51.5
823。1500。$66.6
590。8000。$14.97

1928。800。$27.6
1929。1000。$5.23
700。1000。$318

扣除供樓、保險及其他所有洗費，可以儲一半人工。

1）想問剩下有收入的日子不多，應該怎樣部署投資月薪和手頭上的現金以應付我沒有收入的日子？
（不打算賣樓賣車位，逼不得已才會賣車位）

2）我現時的股票組合，有沒有問題？有什麼需要改進？因為平均價都比較高。

謝謝老師！

龔成老師：

從理財的角度，讀博士未必是最好的選擇，因為你現時的收入不差，我相信你事業上應該不錯，如果要花數年時間讀書，然後由頭來過，對你來說會有不確定性的，長遠收入會產生未知數。

當然，如果你為個人興趣及夢想，這就是另一回事，當然，這就要睇你願意為這個夢想棄多少。

1）首先，當你正式讀書後，收入會大減，所以由現在起到讀書，是你儲錢的黃金期，要盡力儲多少少資金。

如果可以的話，可以做月供股票，盈富（2800）加上其他收息股，對你的現金流有較大幫助。

另外，如果你到時搬去大學附租樓住，就可以將你現時的物業放租，以你現時的按揭情況，可以抵消供樓的每月支出，起碼這方面的壓力。

至於現時的現金，都可以適當投資，但就要較低風險，著數現金流。你可以問下銀行有無適合的產品，同時，你可以投資收息股。不過，不會再投資固定資產如物業、車位，因為你本身已有，避免資產類別太集中，所以應該投資收息股及其他。

你可以建立一個收息股的組合，目標是6%的股息率的收息股，例如港燈（2638）、深高速（0548）、香港電訊（6823）、置富（0778）、陽光（0435）都可以。

你可以將資金，慢慢分注投資。

同時，要預留一定的現金在手，當大市下跌時，就可以買平貨。而現金，對你來說有備用的作用。

2）至於現時的組合，大致上都是有質素的股票，你可以持有，但銀行股有3隻，你要睇翻比例會否過多，同時之後未必適合增持銀行股。

雖然部分買入價略貴，但不是全無質素，守住先都可以，你預有平穩增長力，但就不是高增長。另外，有部分股買入價不差，這些股都要長線持有，不要心急獲利，因為當我地要進行長期的財富增值，就要長線持有優質股，心急獲利無法賺大錢的。

------------------------------------------------

Q16122：

呀sir
終於都上完你哩8堂既基礎班

當初上頭三堂
可能因為有睇左股票勝經同埋自己都有投資經驗
所以都覺得比較易上手同入腦

但係去到第4堂開始
要開始計數同上網睇公司既資料數據 就開始有吃力同有D力不從心

有一刻諗住想放棄
當黎到課室聽你演講就算

但係內心既另一面又好掙扎
因為始終都俾左$8800 學費
淨係過黎聽演講 唔做練習實戰
好似浪費左個課程咁

最後一堂 最後15分鐘
呀sir 對一班陌生既學生 都仲苦口婆心
咁講香港環境 要我地逆境自強

再加上你自己既經歷 夢想
我即刻回想我黎投資班既初心

真係好多謝呀sir你 咁用心咁熱誠去搞哩個投資班
真心覺得獲益良多 希望學有所成

能夠學以致用
祝呀sir 身體健康 早日完成你既目標同理想

龔成老師：

其實股票班的材料是好充足的，由基礎的股票知識，到投資股票要求你的選股、估值等，但時間始終較緊逼，所以要多加溫書每先得。

其實，你只要再重溫課堂的內容，自己試下睇年報，同評估表，你的得著會好大，課堂可以比你好大的進步，但就要你付出多D，努力多D。

你仍可以有好大進步，唔好浪費課堂的內容，試下慢慢重溫，同步分析年報。

學習投資其實是一個長期過程，要8堂內成為專家並無可能，但課堂所講是最核心的保持，長遠對你幫助好大的，加油！

------------------------------------------------

Q16123：

龔成老師，我啱啱開始月供股票，有2條問題想問。

1. 我依家係用XX證券，佢可以俾我地係每第五個交易日同第十五個交易日進行月供股票。

我想問下如果我每個月打算供$6000，應該拆開每次供$3000定係一次過供$6000，定係其實兩者分別唔大。另外，如果係一次都供的話，有無話選擇第五個交易日定第十五個交易日好啲？

2. 想問下你點樣睇3883 前景？我當佢係潛力股，依家月供緊呢隻股票，連同其他平穩增長股作為我嘅月供組合。

感謝！

龔成老師：

1）如果手續費無分別的話，其實拆開是較好的，因為買入價可以更加平均，風險進一步減少。

至於選邊個交易日，無所謂。

2）中國奧園（3883）主要於中國從事物業發展及物業投資業務，近年增長快速，這是受中國樓市保持向好的情況帶動，加上佢利用大量負債運作，當好景時，佢就會好好賺。

但佢的負債有點多，有危有機，好景時好好賺，但逆景時，就幾大件事。

所以，這類股不是無前景，但風險較高，所以如果月供，小注好了。

------------------------------------------------

Q16124：

龔sir你好呀
岩岩起步想學投資

而家月入～17000 想做返投資第時有d積蓄結婚買樓去旅行 而家大概想用7萬去投資目標3年可唔可以滾到超過20萬

1成日聽講月供 我黎緊set左下個月開始$2000供電能實業 呢隻月供可以嗎？定係都係盈富基金較好？

2想買匯豐純粹收息現價仲會唔會跌？或者恆生？

3想基本打底應該由你邊本睇起好？

龔成老師：

1）電能（0006）雖然有質素，但增長力不強，加上你初投資，應該選一些組合作為組合，好多單一股票，因此，盈富（2800）是較合適的。

2）匯豐（0005）長遠來說，收息仍是可以的。

佢宣布取消派發2019年第四次股息，在過往經濟較差時期，其實都無試過停止派息，今次有少少突然。

睇翻佢財務數據唔算話特別差，今次要停派息，主要原因係接獲英倫銀行透過審慎監管局發出的書面通知，要求匯豐取消派息。

所以，佢並不是自己好唔得，而去到要唔派息，而是因應翻英國監管局要求，才這樣做，所以，雖然是不好的利息，但不是核心性不利。

停派息對收息股從來都不是好事，但在這全球經濟咁差時候，為集團預留一筆資金備用，對集團和股東都是有利的。

在全球經濟環境影響下，集團中短情況相信都會維持波動，未來再停派息也說不定。但我地投資應該要集中考慮翻佢長線因素，雖然預期匯豐中短期表現會受壓，但長線質素依然存在。

作為收息股係可以，概念上，就是放棄中短期股息，而預期將來慢慢回到正常狀態，只要你投資組合唔好太偏重單一隻匯豐或銀行業就無問題。

但記得，唔好佔比太重就得。同時明白這只是收息股，唔好對股價有太大期望。

3）《80後百萬富翁》《股票勝經》。

------------------------------------------------

Q16125：

龔成老師你好呀！我今年31歲，女，月入大概15000，從未買過股票，準備入一手滙豐，主要想收息，可能之後會再買入其他股票，未但知買咩股票？

同呢個策略唔知好唔好？希望你比d 意見我,謝謝你

因為考慮到有機會將股票賣出，係咪最好每次都係一手咁買？

龔成老師：

如果不是好長期的累積，以一手手模式買，會好過月供，月供是長期儲股的策略。

以你的年齡來說，其實應該投資較有增長力的股票，會比匯豐（0005）好，加上你未買過股票，從風險角度，組合會比單一股票好，因此，盈富（2800）其實較為適合你。

當然，匯豐都可以考慮，但如果可以的話，這只是組合的其中一部分，並不應該成為組合的核心。

這仍是收息股，雖然最近話唔派息，但長遠仍會保持的。

------------------------------------------------

Q16126：

您好！最近留意到您的網頁，及買了財務自由行、50優質潛力股，除302中手游外，我都跟你書上建議買入一些股票，但我不知302中手游可否長渣？

應該要如何分析？請有空賜教

龔成老師：

中手游（0302）這類股，業務變化大，因為本身的行業不確定性高。

佢主要透過合約安排於中國從事手遊發行及遊戲開發業務，提供多種類型的手遊，集團透過ＩＰ授權（從版權方取得ＩＰ授權後委聘第三方開發遊戲）及遊戲代理（代理自第三方取得的已開發遊戲）兩個渠道獲取遊戲。

現時佢獲得超過31項ＩＰ的授權，如「傳奇世界」、「龍珠Ｚ」、「航海王」、「火影忍者」、「擇天記」等，大部分遊戲均在第三方發行渠道發行。

過往財務數據理想，增長快速，但這類手遊行業，加上新股，估值十分困難，不確定性好高。

只可以話，這股有投資價值，有增長力，但股價一定會好波動，企業估值不確定性太高，所以風險高。這類股，你小注持有都可以，可長線。

------------------------------------------------

Q16127：

龔成。你好。
本人36歲。現有100萬存款。

每月月供股票共一萬（有恒生，長和，盈富）
想樓價低啲時買樓或財富增值多啲。有咩方法？ 謝謝

龔成老師：

你現時持有的股票，都是有質素的，不過，增長力就不算強。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

所以，你可以以盈富為核心去平衡組合，同時加上一些較有增長力的股票，加快財富的累積。

同時，如果你未有物業，可以同步留意下香港樓，香港經濟將會轉弱，樓價1、2年可能下跌，但相信不會大跌，而長期仍會因供應不足而向上，因此，你可以在1、2年把握機會。

------------------------------------------------

Q16128：

龔老師，你好，最近股市跌了很多，情緒確實很差，想了解一下，你股票，資產，現金的大概比例是怎樣， 之前的比例，和市跌的比例，想知道應該留多少現金比例才正常合理。

龔成老師：

在幾個月前，我持有現金的比例應該高過5成，到時現，大約為3成。

現時大市有投資值博率，我仍會保持入貨，不過就會慢慢入，一定不會一次過用盡現金，現金比例相信會進一步減，可以遲D會去到2成。

其實跌市，只要你持有優質股，唔需要太過唔開心。

好多人都著重「這刻的股價」，但這是錯誤的，如果我地明白企業價值的概念，就知這刻應該開心，你只是心理問題，並不是投資問題。

其實要克服心理因素，就要有「將來財富」的概念，我投資股票20年，久不久都會遇到一些大跌市，當時我都會持有有一定的股票，身家會縮水，當刻如果我好集中在「這刻的股價」「這刻的股價」，我都會唔開心。

不過，我每次都係著重「入貨的機會」，而唔理我原有的貨有無蝕錢。通常過一年後，身家都會大增。

當我經歷過幾次後，就會明白，如果我想之後的身家大升，就要這刻的身家縮水，這刻縮得愈勁，之後身家就會升得愈勁！

簡單來講，在大跌市，我唔理「之前買的股價蝕左」，只著重「這刻的入貨機會」，同時會心裡想，如果可以比我用更平的價入貨就好了（就算我已經持有這股並賬面上蝕緊），所以，我當刻反而希望跌更多！

------------------------------------------------

Q16129：

老師好!，想問問(1)一位65歲老人如果有30萬左右閒錢想收息,你會建議邊隻收息股?(2)另外你認為電能00006如何?

龔成老師：

1）最好建立一個組合，而不是集中單一收息股。

因為任何一隻股票，都會有價格與派息的風險，所以一個組合會比較好。

目標是6%以上的股息率的收息股，例如港燈（2638）、深高速（0548）、香港電訊（6823）、工行（1398）、匯豐（0005）、置富（0778）、陽光（0435）、電能（0006）都可以。

買入時要分注，唔好一次過用盡資金。

2）電能（0006）都是不差的股票，可投資，但增長力不強。

------------------------------------------------

Q16130：

成哥你好，想問點睇717英皇證券的前景，似乎近年來證券行板塊的股價都唔太討好，謝謝！

龔成老師：

英皇證券（0717）的質素，只是一般。

其實睇翻佢近年的財務數據就明，生意不穩，長遠增長力不強，盈利波動，有時會出現虧損的情況。見唔到有明顯的優勢，前景只是一般。

------------------------------------------------

Q16131：

你點睇玖龍紙業(2689)?我之前我係高位12.7買左,宜家升番應唔應該放?thanks

龔成老師：

玖龍紙業（2689）質素不過不失，雖然股本回報率高，但成本令佢盈利波動唔細，這一定會帶來風險。

玖瓏算是當中不差的一隻，但相信中短期較弱。這行業投資價值算是中等，因此不宜投資金額太大。如果你持貨不過多，這刻守住先，可以。

------------------------------------------------

Q16132：

龔Sir你好，我今年27歲，月入18K，月儲6-8K，現持10萬現金，1年後剛供完10萬儲蓄保險，未試買過買股票。

最近拜讀了你的新書《50優質潛力股》獲益良多，計劃買入港燈，陽光，新意網，但不懂如何分配投資金額，目標33歲儲到100萬去外國進修，想問可行嗎，是否應投資更多書中提及的潛力股如小米，望老師指點迷津，不勝感激！

龔成老師：

27歲這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股只能小注。

因此，你可以將平穩增值股、潛力股的比例，控制在7：3比，或8：2比。

港燈（2638）是收息股，未必適合你，你可以考慮盈富（2800）、陽光（0435）等，作為平穩增長股，新意網（1686）、小米（1810）作為潛力股。

如果你想33歲有$100萬，起碼要每月儲到$8000，加上適當選股及把握時機投資，可以累積到$100萬的。

------------------------------------------------

Q16133：

老師你好，小弟有小小問題想請教一下老師；本人宜家23歲，而月薪大概$22XXX左右，有$250K做緊定期，如果宜家開始，淨係用收入既四分之一（$250K唔郁佢）去月供股票的話足唔足夠？

同埋想問下你平時有冇用開咩app去留意股價架？

龔成老師：

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你23歲這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先。

如果只是用收入4分1去月供，未足夠，你其實可供多D，因為你本身有較多現金，應該好好去用。如果你無投資經驗，這刻就唔好一手手去買，而集中只做月供，例如每月供$12000，供盈富（2800）及其他優質股，這會慢慢用左你$25萬現金部分，但我正正想你用月供的方法，將現金轉為股票。

AASTOCK、經濟通、中銀香港。

------------------------------------------------

Q16134：

龔老師你好，想請教一下投資上嘅問題。
我爸爸早幾年退休，佢本身唔係好識投資，嗰時兑200,000人民幣同澳幣，點知之後人民幣同澳幣都係咁跌。

佢今年年頭叫我幫佢做定期，但係個零息真係好低，唔知你有冇一啲投資意見可以分享下。謝謝你

龔成老師：

當然，如果佢定期只是整個財富組合的其中一小部分，就無問題。但如果佔較多，就要調整。

長期做人民幣同澳幣定期，並不是好策略，因為貨幣始終會長期貶值，除非有好高息，否則唔太值得。可以先等升翻少少時，賣出部分，轉到收息股，餘下的定期就暫時繼續。

------------------------------------------------

Q16135：

龔成老師老師，你好！

隨著5G發展，我相信數據儲存需求會大量增加，最近研究1686 ，覺得不錯，背後又有新鴻基支持，但他的負債也相當高。有以下幾個問題想請教老師！

1）不知這股是否值得投資？

2）如可以，預算佔總投資組合約2%，可以嗎？

3）我估計，PE 約20-25 ，仍是合理區，即$4.28-$5.35 ，請問正確嗎？

4）便宜區就要$4.0 樓下才算，正確嗎？
謝謝！

龔成老師：

1）新意網集團（1686）是有質素的股票，《50優質潛力股》新版都有加入這股。長遠有潛力的。可投資。

2）這股只要不過多就得，這比例無問題。

3）大約是這數，但會因應最新情況略有調整。

4）暫時$4以下平宜。大約是這數。

------------------------------------------------

Q16136：

成哥,想問一問為什麼你會覺得比亞迪是有潛力的呢,因為他無論是市盈率,ROE,總負債/股東權益都不符合書中的財務指標;還是有更深層次的理由我是不懂的,求求指教

龔成老師：

書中所講的指標，是一些較入門的指標，當我地分析一間企業時，要好深入及全面分析，但一般人好難掌握，所以，書就會有一些初步指標，但這只是入門，雖然對大部分企業都適用，但總有些例外。

比亞迪（1211）這類潛力股，當我地分析時，會著重將來多過過去，因此分析點會略有不同，往往用一些預測數據去作為推算的基礎。

佢本身現金流不差，加上電動車發展得不錯，過幾年後，數據會比現時更加正面，而我地的分析點是將來的情況。

------------------------------------------------

Q16137：

龔成老師，你好
請問你點睇08225同2660前景呢?

龔成老師：

中國醫療集團（8225）主要從事藥品研究、開發及商業化。

佢主要向中國的製藥商提供技術及服務，其中一個收入來自技術轉讓；提供藥品開發服務及臨床研究服務。佢的技術平台可大致分為兩大類，即藥品實體開發及藥品傳遞系統。

業務本質算是中等，不算好差，又不算很吸引，不過，睇翻佢過往的核數師意見，試過有D修定報告，反映可能有D問題。加上這是創業版的股票，會比較小心，我唔算好建議。

禪遊科技（2660）係中國一家手機遊戲開發商和營運商，專注於棋牌及其他休閒手機遊戲。前景不是無，但風險略高。

這類股的波動較大，因為業務的不確定性大，風險高，當然可能回報大。我只可以話，這類股，小注好了。

------------------------------------------------

Q16138：

你好，現在32歲，
月入5萬

手頭有流動資金100萬，
每月支出約2萬。
請問我應該用流動資金的多少percent去投資股票

龔成老師：

如果你現時無股票，可以動用$50萬去投資股票，但不用一次過入，而是分注，用一年時間去入。

看地投資，一定是建立一個長期的組合，你先要定出想投資類別股票的方向，各股票的比例，然後再設定買入策略。

同時，你可以同步進行月供，每月供$20000，如不懂選股就盈富（2800）。

------------------------------------------------

Q16139：

龔老師：你好！老師感謝您熱誠助人的態度，願意把你的經驗同別人分享，幫到好多人，讓我們獲益良多。自去年開始購買老師的著作，增長知識並實踐，現時已累積若干股票作為資產的一部份。以下是我和先生的退休計劃，不知是否可行，請老師指點一下。

我和先生的年齡是 53 歲，沒有子女，我是自僱人士收入不穩定，先生則有固定工作和收入，月薪 9 萬，每月供樓$22000，扣除供樓及雜費開支，每月可儲蓄$30000。

~有一個自住的物業約值$1400萬，吉隆坡物業價值HK $350萬 (打算以 Airbnb 出租，此項投資未知是否成功因為仲係樓花）。

~現時銀行可動用現金有HKD$270萬港元及 USD$20萬美金。

~7 年後退休時有$500萬退休金，到時會贖樓還款$250萬給銀行，將會剩餘$250萬，連同退休前薪金積蓄合共約有$500萬現金。

參考了老師《50 穩健收息股》一書，過去一年以月供形式及趁低買入2800，1928，66，12，1398，2388，823，548，2638，778，435，6823，2378，9988 等收息股及少量潛力股，2378 及 9988是最近買入的。

現已累積相等 $100萬元股票，為準備 7 年後退休生活，想以股息作為每月收入。目標是用未來 7 年時間慢慢累積 $500萬收息股票，製造每月約有$20000 股息作生活費。

即是60歲贖樓後，連同退休前的積蓄，到時會有$500萬股票，另$500萬現金備用，不知道這個分配如何？老師有更好的建議嗎？

總結：
~夫婦二人：53歲，無子女。
~現可動用資金：HKD$270萬港幣, USD$20萬美金
~現有股票：等值$100萬元股票（大部份是收息股）2800，1928，66，12，1398，2388，823，548，2638，778，435，6823，2378，9988（計劃慢慢累積等值$500萬元的股票）

~基金：USD$10萬美元，是某知名財演創辦的回報基金，每年派息3-5％
~每月入息：9萬，扣除開支，每月可儲 $3萬（7 年後退休）

~退休安排： 贖樓後，剩餘 $500萬現金備用，$500萬股票用作收息，股息希望每月有$20000。
若身體狀況仍good，間中會做 freelance
~物業：自住物業現時約值$1400萬，吉隆坡物業約值HK$350萬（打算出租）

問題 1：以上計劃可以應付通脹嗎？

問題 2：如果香港的金融體系有變，港元不再同美元掛鉤，到時港元貶值，股票都會變相貶值，那麼需要持有部份美元避險嗎？

現在我所持有的30萬美元（連同基金）應繼續持有，還是兌換番做港元繼續投資港股？加上我對美股沒有任何知識，美元只可以做定期。

問題 3： 退休應該贖樓？還是繼續運用這$250萬資金？因為份按揭單原本可供到 70 歲先完

問題 4：因為日後沒有工作就不能做按揭了，現在應該趁仍有份工而且低息環境，銀行仲肯借錢的時候向銀行按揭多些金額來運用嗎？例如靠股票利息來還息？還是日後用逆按揭的資金？ 因為若是百年歸老，我地層樓都唔打算畀人

問題 5： 我們夫婦二人現自住的是大單位，曾考慮換成兩間細單位，一間租出，一間自住，這樣較靈活？ 還是其他資產應該已足夠應付需求，可不用變動？

問題6： 請問盈富基金應佔總投資金額多少％？其他如銀行股、地產股及公用股的投資百份比應多少？ 忘記老師曾提及銀行股不可佔超過幾多 %？

感謝老師抽時間回答本人的問題 ，十分感激！
祝 生活愉快，身體健康！

龔成老師：

1）睇翻你整體的計劃，物業、股票、現金、基金，都算是平衡，基本能對抗通脹，當中能產生一定的現金流，而你仍有一定的現金，其實可以再買多少少收息的工具，這樣會進一步增加你的現金流。

現時持有的股票都是不差的，但就有少少散，唔好再增加其他股票，如果之後要加股，集中增加這部分股票就得。

另外，你可以同時考慮債券、年金、銀行或保險公司的低風險產品。

2）我相信這可能性好低，所以不用擔心。

如果你真的擔心，可以投資部分到外國的基金或物業。

3）如果到時的按揭利率，處於3%以下，其實保持現況無問題，因為你將資金還款，會減少利息支出，但如果不還款，會得到更高的回報，那麼，當然不要還款。

4）如果是加按，就一般，因為原理是增加負債，始終會提高了你地的風險，因此，除非有好明顯的投資項目，否則，並不建議行這一步。

相反，利用逆按揭，我認為是可行的一步，因為你地不打算留給任何人，所以要好好利用你地的物業，產生現金流，我相信你可以了解下相關資料。

5）變成兩間會較靈活，方向是可以的，但要考慮管理、買賣成本、重新按揭等問題，但這是可以考慮的。

6）如果以「股票組合」的比例來計，30%-50%無問題，不過，你地打算數年後退休，應該以收息為主，反而盈富（2800）比例不會太多。

------------------------------------------------

Q16140：

老師，早前已購入你的財務自由行已經好多得著。會慢慢買你其他書，我睇到買樓既部份，其實我好想利用我首次置業既機會去買入資產。

目標係希望可以係今年到賺到大概40萬入市(租出去希望產生正現金流亦同時擁有資產)。

但我負債中！我知道呢個可能性唔大所以我而家係個市低位入面會一手一手咁買入2800，而且會持有少量1137作中短期，以及1448目的係持有優質資產。

而家希望生意上有突破可以比我快D完成目標，但疫情問題所以最近都比較差，如果疫情過後會跳出去私人市場做freelance，人工應該好易比現在高。

保守故計希望到時freelance+生意會有大約4萬收入，+股票資產既增長完成40萬目標。

但同時間因為freelanec既話會影響到銀行申請按揭（因為冇入息証明），想老師比比意見我應該點樣計劃會比較最為理想，謝謝老師！

龔成老師：

你的大方向正確，只是中間的執行上的問題。

首先，你盡力一年內累積到$40萬，如果因為負債因素，就可能遲少少完成，但都希望你先定立這個目標。

近期疫情如果影響你的收入，你只要在之後追翻就得，所以只要你定了方向，其實問題不大，現時只是一些中短期的問題。

同時，這刻疫情，你應該時間會多左，這樣就可以建立定更多野，例如開拓一些新生意，新方向，只要之後好翻，你生意就會進一步向上，好好利用這卿段時間。我好相信，最差的時候，往往是我地突破的機會！

至於按揭方面，由於你收入不穩的類別，因此要留較多現金先正式置業，因為銀行有時的審批都會變，你要有較多的準備，這一步我反而覺得唔好太急，你先做好一年有$40萬先。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。