香港有四大奇食：澳牛光速餐、星座蕃茄面、新記芝士面同九記牛腩。四樣都係非常地道、非常香港的一件事，同「收陀地」、「九龍城寨」一樣咁具香港風味－我估Michael Bay嚟香港拍變形金剛四之前，完全唔知乜嘢叫「收陀地」。我係好認真嘅：如果你廿五歲以上，無試過四大奇食的任何一樣，請主動要求入境處重新檢視你香港人嘅身份。又或者綜援、公屋、車船津貼、生果金嘅申請表，第一個問題應該問：你有冇食過澳牛光速餐、星座蕃茄面、新記芝士面或者九記牛腩？無聽過唔該你返鄉下啦朋友！ 四大奇菜都有一個共通點，就係創新及堅持，人做我唔做，殺出新血路，仲要做得專門：星座蕃茄撈蛋麵、新記芝士麵是香港獨有的。九記牛腩只賣牛腩一樣，更加令人嘖嘖稱奇。 某程度嚟講，譚仔三哥嘅米線都有資格當選，不過我係一個左膠，好憎任何連鎖集團、更加憎資本主義，所以三哥做得點好，永遠比唔上四大奇菜嘅專心致志－除左新記之外，另外三間都只係營運一間總店，並無分店。九記對面嘅勝香園，亦有蕃茄麵，個人認為星座嘅味道同風味遠勝前者。 其實，我覺得四大奇菜最堅持嘅，係嗰一種視客人為乞兒嘅待客之道，當中以九記及澳牛尤甚。 去食澳牛，首先要喺門口集齊人腳。你五個人去幫襯，一定要肯定你五個人都喺度，先好行入去。萬一你入到去，同伙計講你未齊人但又想坐低，擔保你屎忽開花，然後畀人趕返出門口。 你想一個人坐張四人枱？發你媽的春秋大夢。小朋友，你玩過俄羅斯方塊未？澳牛啲伙計當每個客都係方塊，一定左塞右塞，務求令到每張枱都坐滿人。你又唔可以唔讚賞佢哋塞方塊嘅能力，佢哋從來唔會要個客坐低咗再調嚟調去。 嗰度啲伙記好賣力，全部好有效率。估計佢哋應該有花紅分，兼且分唔少。印象中見過幾個伙計戴勞力士，加上佢哋嗰副「客又點？阿叔唔撚使畀面你」嘅面口，令我深信佢哋每人都有幾楝樓收租，返工只係為咗打發時間，以免自己行咗去麻雀館。 好咧，你畀人指手劃腳一輪，終於可以坐低。 叫得光速餐，由安排坐位開始，真係乜都好快。由你屎忽掂到張櫈嘅五秒內，唔該你好一口氣講出光速餐嘅菜式：炒蛋／煎蛋／蛋治、多士／麵包、意粉／通粉。澳牛天地內，絕不容許思考與發問。我見過有個天真無邪嘅靚妹，一臉無知問咗伙記一句「呢度有乜嘢食？」，坐對面嘅我忍唔住冷笑咗一聲。個伙計二話不說就走開咗，頭也不回。順帶一提，有次喺九記牛腩有人唔識死，對住老闆娘點「魚蛋麵」－仲要叫咗兩次－個老闆娘大叫無呢啲嘢食，之後無再幫佢哋落單。 食澳牛，一定要有個熟人陪，仲要喺門口同你brief一次個落單同食嘢嘅程序，簡直好似東莞去滾咁：「拿！阿史，你除佢衫，佢會幫你含鳩很耐。然後隊入去插插插啦。記住呀，最後先畀錢，唔係條女會hea做。」所以，千祈唔好屎忽痕落單嗰陣叫埋嘢飲呀，澳牛張枱好細，只係啱啱夠放炒蛋多士意粉，放唔落杯嘢飲。你叫咗，伙計都唔會理你，一支箭好似標童咁走咗。 你落完單，轉個頭就會有人將飼料放喺枱面。落錯單，喺澳牛是不存在的。因為嗰啲伙計唔會落錯單，只可能係佢拎錯咗。最重要係，錯，點都只可以係你點錯咗。澳牛嘅伙計是不會錯的！調枱？碟蛋治污糟咗想換過？當你說服到蔡志森容許同性戀，澳牛啲伙計就會同你換過。 如果你以為三十幾蚊一個餐，啲嘢係渣流灘，咁你就錯，超錯。澳牛係第一間用忌廉炒蛋嘅餐廳，超滑超好食，熱辣辣。大家畀三十幾蚊，有九成嘅錢去咗個炒蛋度。佢嘅厚多士都ok，但牛油少啲囉；意粉、通粉冇乜特別，同一般茶記無分別。 光速餐食到一半，伙計會埋嚟迫你叫嘢飲。你唔叫嘢飲，伙記死都唔會行開的。好多人都會發現，光速餐杯嘢飲，加咗兩蚊嘅凍飲個杯，同熱飲一樣，同樣矮到好似老夫子個大蕃薯咁，一啖就飲完。 餵飼完畢，你唔好諗住可以同朋友吹下水，傾下計。喺伙記收咗你枱面所有嘢嘅一刻，佢同時會畀張草紙你，上面寫住一堆數字。呢個時候， “run, Forrest, run” 你要即刻立刻連忙趕快即時飛快唔可以猶豫咁拎張草紙跑去櫃枱埋單，唔係澳牛嘅伙記會安排九十人企喺你後面，示意你阻住個地球轉。阻人搵食，猶如殺人父母－呢個正正係澳牛最能代表嘅香港精神。 坐喺收銀嘅老板娘，用眼角瞄一瞄草紙，收你四十元，沿枱面將$2跣畀喺收銀另一方嘅你。你老早就發覺，老板娘同找換店的銀紙機一樣，不斷數住一堆又一堆嘅銀紙，頭不曾抬起過。好似數下數下，銀紙會多兩張咁。 你行出澳牛，呼吸一口自由的空氣，望一望錶。吃過四個course（炒蛋、多士、意粉、咖啡），前後不過十分鐘。在這600秒，你飽歷風霜，老母被人屌過、菊花畀人撕開過，炒蛋食到一半要飲嘢，最後一啖多士吞落肚之前好準備埋單走人，以免有人對你冷言冷語。你完全感受到內地維權人士被共產黨監控下嘅生活有幾咁悲涼。 但你並不感到害怕、失落與空虛。因為，你知道， 你係特登去澳牛畀人屌的。