【私隱】美國兩州立法保障「基因私隱」限制執法機關使用DNA庫查案 依家講「DNA檢測」，大家都會諗到同肺炎有關，但如果早兩年講「DNA檢測」，好有可能就係指當時興起、透過分析DNA了解身體嘅消費性產品。而喺美國，更加興起透過DNA分析了解自己嘅祖先，亦即係所謂嘅遺傳家譜學。不過隨住2018年美國警方利用遺傳家譜學公司建立嘅基因資料庫，搵出上世紀七、八十年代犯下最少12宗謀殺、50幾宗強姦及過百單盜竊案嘅「金州殺手 (Golden State Killers)」後，美國法律界就開始擔心大眾嘅DNA私隱。而馬里蘭及蒙大拿兩個州份最近就通過新法例，限制執法機關使用民間DNA資料庫查案。 雖然能夠搵到犯人的確係一件好事，但由於大眾使用遺傳家譜服務時，根本就冇預計到會被用作查案，而且只要家族中有一個人使用過該服務，理論上所有血親嘅DNA資料都已經被公開——據估計只需要130萬人嘅DNA資料，就能分辨出六成有歐洲血統嘅美國人——所以部份州份就開始立法限制執法機關利用民用DNA資料庫查案。 具體黎講，馬里蘭州嘅新法例要求執法機關利用任何民用DNA資料庫查案前，必須得到當地法官許可，而且只限於謀殺、綁架、人口販賣等重罪，執法機關亦只能使用已經明確向使用者標明DNA資料會被用於查案、而使用者又同意嘅DNA資料庫。而蒙大拿州就要求除非使用者自行免去權利，否則執法人員必先取得法庭手令，先可以利用DNA資料庫嘅資料。 美國現存嘅遺傳家譜服務，大概就係你將自己嘅基因資訊分享畀商業公司，商業公司就拎你去同資料庫中嘅基因資料配對，以搵出你嘅血緣譜系，與資料庫中其他人嘅DNA相似度，又或者某人與你嘅基因相似度 (即係驗個仔係唔係你生嗰啲)，更重要嘅係該公司仲會提供DNA相似者嘅電郵方便你去聯絡。 而2018年美國警方之所以搵到「金州殺手」Joseph James DeAngelo，就係將犯罪現場搵到嘅基因上載去遺傳家譜服務網站，搵到與該基因配對者嘅身份，再分析其家族成員，最後鎖定Joseph James DeAngelo。