慨嘆與家人失聯絡
藍潔瑛難忘《大時代》：想復出

在《大時代》飾演玲姐的藍潔瑛，戲裏戲外一生坎坷。原來，玲姐是藍潔瑛從演以來最喜愛角色，在今晚nowTV節目中，52歲的藍潔瑛大談當年《大時代》最深刻、最愛場口及劇中人物，渴望跟兩年沒聯絡的家人見面。談復出，藍潔瑛坦言有興趣，並不忘幽默笑說：「梗係做演員啦，唔通要我寫稿呀？」

藍潔瑛曾靚絕五台山，十多年前精神狀況出現問題，現在靠綜援過活，在赤柱公屋深居簡出，近日《大時代》重播，令飾演玲姐的藍潔瑛再度成為焦點。上周nowTV力邀藍潔瑛出山接受《102觀星總部》主持梁榮忠訪問，並於今晚播出。雖然《大時代》是23年前作品，但藍潔瑛仍清楚記得當年拍攝點滴，坦言玲姐是她演藝生涯中最愛角色。由《大時代》講到當年感情和現時生活狀況，言談間並帶點幽默。

梁：梁榮忠　藍：藍潔瑛

梁：83年點解去考訓練班？
藍：楊羚同我好熟，係一個朋友表妹，佢叫我陪佢考訓練班，結果到咗交報名表嗰日佢臨時唔去，我話你唔去我自己去，咁就參加咗。
梁：一出嚟做《430穿梭機》，有冇覺得點解唔搵我拍劇，要我做綜藝性節目？
藍：嗰陣《穿梭機》有個女主持想出話劇組，人哋講我先至諗，我都想出話劇組。其實《穿梭機》都OK㗎，唔使日夜顛倒。
梁：《家有嬌妻》奠定你一線地位，嗰時心態有冇唔同？會唔會覺得行出街就有人識自己？
藍：有次同劉青雲、吳啟華幾個朋友去大嶼山，喺巴士站上的士去貝澳游水，有個着住校服嘅女仔，突然間敲的士個窗，然後掉咗張紙入嚟，寫住「八婆你冇衫換呀？」因為我去記者會（當年《超越愛情線》記招）又着住藍白間件衫，嗰日又係着住藍白間嗰件，個學生妹唔知點解會咁。

《大時代》之愛
■藍潔瑛接受梁榮忠的專訪，今日播出。
自爆改劇本
梁：拍過咁多劇集咁多個角色，你最喜歡嘅角色係邊個？
藍：都應該係《大時代》。
梁：對呢部劇仲有冇印象？
藍：劇本好好、好清楚，導演、演員都好好。我以為學生妹個角色好容易做，點知睇番playback，原來好唔掂，可能髮型加埋燈光、自己表現，輕視咗，以為得，睇番好過唔到自己嗰關，韋家輝監製畀我再重拍嗰場戲，好彩再拍過OK，去得好順。
梁：邊場戲特別深刻？
藍：有場戲，丁蟹阿媽（黎宣演）上門，搞到又跪又拜要求原諒佢，原本劇本係我行埋去喊住咁拖起佢，話唔關佢事叫佢走，但臨場我就行埋一邊，蹺住對手喺度流眼淚，默默喺度喊，唔行埋去扶佢，冇話唔關佢事，嗰場都係一take OK。
梁：自己最鍾意又係邊一場？
藍：匿埋後巷見到劉松仁叫佢救我。
梁：包括埋你自己，咁多個演員中覺得邊個最好？
藍：龍紀文郭藹明都做得好好㗎，楊羚做得好好，佢瞓喺醫院，我同李麗珍去睇佢，before佢跳樓嗰場，佢做得好好呀。
梁：呢個角色對你影響好大，抽離唔到？
藍：真係冇咁嘅事，我去邊度搵個方展博、方乜乜嚟我身邊？何來抽離唔到吖！

【出山梗做演員】
梁：《大時代》之後，你想自己邊一套作品攞出嚟同大家分享？
藍：我想睇《430穿梭機》（開心地哈哈大笑），睇吓到底啲稿講乜嘢、發生乜嘢事情。
梁：坊間民意調查最想睇《蓋世豪俠》，你自己又喜唔喜歡？
藍：我梗係唔鍾意啦，要做個咁嘅角色，咁慘。
梁：有人想搵你復出，幫你避開晒傳媒，你會唔會想復出？
藍：會！點解唔會呀？
梁：想做啲乜嘢工作、乜嘢崗位？
藍：梗係做演員啦，唔通要我寫稿呀，揸camera我又唔得。
梁：你當年有個稱號，靚絕五台山。
藍（搶着說）：嗰個唔好啦，個稱號真係冇乜好，係靚就靚啦，做乜要絕啫？講靚我真係唔算靚，我覺得關之琳，李嘉欣嗰啲就好靚啦。

■不少網民希望重播《蓋世豪俠》，但藍潔瑛卻指自己角色太慘不大喜歡。劇照


【兩年以上冇見家姐】
演藝事業之外，藍潔瑛感情生活亦受關注，對於有報道指她曾跟已故藝人鍾保羅拍拖，藍潔瑛斷言否認。
梁：盛傳86至89年你同鍾保羅邂逅？
藍：冇冇冇，我見過佢冇幾多面，佢係我一個女朋友嘅朋友，我同鍾保羅直情唔熟，我可能見車保羅仲多過鍾保羅。
梁：之前姓鄧嘅男友，佢離開咗，有冇懷念佢？
藍：佢gentleman得嚟唔誇張，係一個好好男仔朋友。
梁：之後盛傳你同富商個仔都有一個關係，係咪？
藍：佢本身都係一個富商。
梁：對佢又有冇啲回憶？
藍：人哋結咗婚啦喎，我對佢都有啲回憶㗎，有時想搵佢、問佢，幫襯佢公司會唔會有折頭優惠。
梁：好多人覺得以前藍潔瑛同𠵱家好有分別，你介唔介意大家咁樣睇你？
藍：嗰啲報章雜誌娛樂記者寫嘅報道，佢鍾意做啲譁眾取寵嘅嘢，佢做新聞手法非常之冇傳媒良心，非常之冇公眾良心，非常之冇公德心，非常之冇道德。
梁：身邊有冇家人分享你睇法？
藍：我成日打畀我家姐，一打就去咗電話錄音，我家姐係比較最close。
梁：對上一次見家姐係幾時？
藍：都好耐囉，兩年前以上，上次我入醫院，家姐去探我，買嘢畀我食。
梁：想唔想同佢哋傾偈？
藍（渴望眼神）：想。

■提到家人，藍潔瑛渴望跟兩年沒聯絡的胞姊（圖）接觸見面。資料圖片
■提到家人，藍潔瑛渴望跟兩年沒聯絡的胞姊（圖）接觸見面。
資料圖片
最緊要健康
梁：身邊有冇朋友同你傾偈？
藍：都有㗎，唔多。我比較熟係以前Maggie（張曼玉）、吳君如、楊羚，𠵱家真係冇乜啦，有嗰啲你唔識㗎，比較成日見住面，都係住喺嗰區。
梁：𠵱家生活上點處理？
藍：綜援囉，同埋有一個講國語嘅（據悉是內地影迷）每個月借錢畀我囉，每個月畀幾千蚊我。
梁：我哋除咗聆聽，有乜幫到你？
藍（沉默一下，然後笑說）：我真係唔知，有好歌咪錄嚟畀我聽吓囉，有好電影咪錄埋畀我睇吓囉。
梁：觀眾好希望你開心。
藍：最緊要健康，唔係淨係開心，健康可能係好寧靜好安寧，係內心嘅喜悅，緊要過開心。
梁榮忠訪問結束前，送上一本牛津字典給藍潔瑛作禮物，原來近日藍潔瑛興趣是閱讀字典，藍潔瑛打開一看後開心興奮地說：「好呀，好呀，唔係簡體㗎。」最後，節目送上葉蒨文主唱的《祝福》，還有邵仲衡、楊羚、梁思浩、李麗蕊和寇鴻萍為她打氣，希望藍潔瑛繼續好好生活下去。
採訪：魯吉
攝影：沈健程

【影視皆精】宜古宜今
藍潔瑛畢業於第十二期無綫電視藝員訓練班，首部演出劇集《畫出彩虹》已擔正「女一」，直至客串《義不容情》才為人熟識，更拍過不少令人深刻的電影，而且時裝古裝扮相都得。

http://hk.apple.nextmedia.com/entertainment/art/20150511/19142797