【龔成問答信箱】（Q21901-21920）

Q21901：

你好龔sir，多謝你無私既教導，係2019年6月我只月供股票，多謝你不停叫我們一定要留有資金等大市跌入貨，

終於我係疫情期間買了比較便的股票，有部分合理價，由賺第一個10萬，到而家賺到$70萬，離100萬差小小，開心到不得了，

有個2問題想請教龔sir, 因黎緊諗住同女朋友買樓投資，可能要賣出部份股票先夠，手頭上資金大約10萬，及我持有以下股票：

2手1211 @34.9
3手1830 @2.4
2手9988 @218
10手1177 @7.8
2手3319 @29

8手3067 @16.5
6手1928 @29
12手 1972 @19
1手270 @11.5

1）潛力股同平穩增股差唔多5:5，我在考慮如果需要買樓我應那種隻股票較好？請教老師幫忙

2）我睇過龔sir 既買樓4部曲，所以想將股票投資細物業，等將來換有能力再換Dream house,我們睇左2個細單位

佐敦$570萬 250呎 15年樓齡 2分鐘行到地鐵站，附近多食肆交通方便 / 西九龍 $530萬 280呎 4年樓齡，地區旺中帶靜，行8分鐘到地鐵站，附近食肆林立

兩個單位都係一房一廳

如果以投資角度是否佐敦升值會好啲？

龔成老師︰

1) 其實你最重要的分析點，是「餘下的組合，之後的長遠發展情況，怎樣配置對你最有利」。

這些股票都有質素，最理想係長線持有。但若真的要動用，可以從估值著手，先沽出較貴，變相無咁高值博率的股票。

比亞迪(1211)和完美醫療(1830)現價都偏貴，由於佢地升左唔少，令佢地佔你組合比重都偏高，你可以優先沽少少。記住，一定要留部分在手，不能無貨。

其餘股票，你按比例沽就可以。但緊記只係沽出部份，唔好沽晒，必需留有一定持股，去維持股票類的增值。

如果你想組合增長力較強，就賣出一些增長力相對無咁強的，例如太古地產（1972）。

2) 初步睇，2個物業投資價值都相若。佐敦較接近旺角，人口較密集，感覺會比較迫和雜，會扣少少分。（因為從自住的角度考慮）。

而且，西九龍呎數較高，同時較新，整體投資價值，可能會好少少。

------------------------------------------------

Q21902：

啊sir 我想請問你點解可以咁厲害。咁多人問你咁多唔同行業股票 你都可以講到咁多評論同深度分析

龔成老師：

因為我每日就係花時間，研究企業及行業，這是我的全職工作。

我幾年前職去銀行工，做全職投資者，所謂的全職投資者，並不是日日睇住個市睇股價，真正專業的投資者，是花時間研究企業，睇企業年報，大行報告，行業研究，我的工作就是「研究企業」。

我未必比人叻，但我每一間企業、每一個行業，研究的時間都比人多，自然對企業有更深入的了解，投資成續都較好。

------------------------------------------------

Q21903：

早晨呀！龔Sir, 我有2隻股票想請教你呀！

1. 快手(01024): $315時入左一手, 衰貪心高位時無放, 跌緊時又無止蝕, 請問我現在應否止蝕 或 再持有等高位再放呀？若等, 大概咩價位放？

2. 華泰(06886): 抽新股時$24.8抽中一手, 到現在一直回不到招股價, 請問我應該止蝕呢？

希望得到你回覆寶貴意見. 謝謝！

龔成老師︰

1) 首先你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

快手（1024）係全球數一數二大的直播平台，絕對是一隻優質股，有獨特性，有客戶群，有潛力，長遠的發展力正面。這股有長線投資價值。

快手與業務夥伴合作提供了一系列產品和服務，於滿足平台上自然產生的多種需求。快手提供的產品和服務包括娛樂、線上營銷服務、電商、網絡遊戲、在線知識共享等。

快手科技已建立了穩定的用戶，在全球已佔據了重要的位置，企業有一定的優勢，以及獨特地位。加上用戶仍在快速增長，以及增長趨勢仍持續，預期有一定的發展。

雖然這刻盈利不多，甚至因加強發展業務而出現虧損，但這類股的分析特點是將來，等之後的收成期。

由於已擁有一定的優勢，以及仍增長中，企業要將用戶化成現金並不困難，只是時間問題，以及多少問題，預期2022年盈利模式已穩定，同時有一定的盈利。

簡單來說，企業有質素，有發展。你現貨可以長線持有，但你預佢短期股仍會十分波動。

2) ＨＴＳＣ（6886）以「華泰證券股份有限公司」於國內開展業務，佢主要為個人、機構和企業客戶提供的金融服務：

（１）經紀及財富管理業務
（２）投資銀行業務
（３）資產管理業務
（４）投資及交易業務
（５）海外業務

其實業務都不差的，但增長力就唔算強。若你只有一手，你可守住先，等下次大市狂熱期才沽出。

------------------------------------------------

Q21904：

你好！龔成老師，我今年27歲，月入$25k，三年前睇左你既著作，就開始月供股票，一開始都係$1-2千咁供。最後悔係大概$60既時候放左比亞迪！

依家我都有維持月供既習慣，以下係我既股票組合，想請你比少少意見

股票/持股數/月供金額

2800 盈富/1757/ $1000
1928 金沙/999/ $2000
9988阿里巴巴/47/ $2000
1299 友邦/77/ $1000

0052大快活/1000/- -
1310 香港寬頻/2000/ - -
3067安碩恆生科技/200/ - -
1297 中國擎天軟件/ 2000/ - -

暫時手頭上現金不多，9成儲蓄都用作投資股票市場

黎緊我會加大儲錢力度，每月大概可儲$15000，如果我希望5年內滾存到120萬或更多，請問我可以如何部署？

我已經錯過左比亞迪呢隻潛力股，龔老師，可以請你再推薦一隻潛力股給我嗎？

另外我想提升自己選股能力，由其是企業估值方面的能力，可以為我推薦一些學習途徑嗎？

龔成老師︰

緊記，一間企業再優質都好，成長係要時間。所以，當你持有一隻優質股，就要比時間佢慢慢成長。唔好急於為左10-20%回報，就急住放。我地要長線，爭取係以倍計的回報。

比亞迪(1211)現時依然係有質素的潛力股，有長線投資價值。但現價已經偏貴，要回到$135才算合理少少。如果月供，最好再等回少少先，或者只宜月供好小注。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你27歲年紀，應集中在財富增值部份。你現時持股，大致都適合你，長線持有就可以。

當中中國擎天軟件（1297）本質不差的，但規模較細，以及行業存有風險，唔建議太過大注。

香港寬頻（1310）則只係收息股，增長力欠奉，唔適合你。

你還很年青，應該好好把握時間優勢，去盡力做好財富增值。你現時月供組合係可以，但以你年紀，有少少保守。建議你加入一些潛力股，去增升增長力。

潛力股可選安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）。但佢地波動性和風險會較高，你要自己平衡。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

另外，現時大市只在合理區，每月資金唔好盡用。最好留有部份，等大跌市出現時，可以用來掃貨。

若你目標係5年增值至120萬，我假設年增長率為10%，你就需要每個月投入$16000，才可以做到。

而學習方面，你可以多讀投資相關書本、年報，新聞和課程。

你可以睇我寫架"80後百萬富翁"、"財務自由行"和"股票勝經"，都適合初學者。

另外，本人的【投資倍升股課程】適合初學者的，每一課後都會有指引比你，要你在一星期內找那些資料，溫那些內容，只要你跟著去完成。

到你讀完整個課程後，你已能自己選股、投資、評估平貴，在投資上已掌握了一定的知識。

------------------------------------------------

Q21905：

龔sir,（1）請問龔sir，＃1988 民行還是＃1658 郵儲銀行好？

（2）另外，其實我一直想入9988，聽龔sir 教阿里都好正面，請問應該咩價位入好？近期都升了不少了

＃823 一直响$70邊，想佢跌少少再入，但又唔跌
＃1810已經揸住差不多10萬蚊，均價都係$28左右，想溝（現價$24邊），但會唔會重倉左？

我持有 823 好少貨，如果想入173 嘉華，會唔會有重覆呢？173 既前景如何？龔sir 建議入嗎？

龔成老師：

1）民行（1988）及郵儲（1658）都不差的，而郵儲略好。

郵儲銀行（1658）有質素，佢業務包括公司銀行、零售銀行及資金業務，以「自營＋代理」的營運模式。

佢共有4萬個營業網點，有一定的規模及網絡，過往發展正面，都有增長力，但就未必是高增長型。

現價合理，有收息及增長，都有投資價值。

2）阿里（9988）有質素，有增長力，之前貴，現價去翻合理區。

係業務層面，擁有相當的優勢，不少業務處於壟斷狀態，同時增長理想。加上正不斷發展延伸業務，這都會成為企業增長的潛力，預期增長會持續，這是阿里最大的賣點。

以企業的長期發展計，這股的確優質，但股價都有一定的波動，現價算是合理翻D，但都不是大手時候。

始終將面對內地監管可能收緊，因此風險度增加左，不過，我相信佢的整體優質度仍在，內地不是不想佢賺錢，只是想規管佢。佢已建立好完善的業務，因此本身是無得輸，只是賺多賺少問題，現時監管多左，點都會影響賺錢能力。

對於這類優質、有發展，但現價未算特別平的股票，小注分注投資，或月供，是較好的方法，算是平衡了風險與增長的考慮。這股可以長線投資的。預佢現價約合理區中上部。

領展（0823）現價合理，如果你本身持貨不多，現價加注可以。

小米（1810）雖然有質素，但如果你已有一定的持貨%，就不要再加了。

嘉華國際（0173）算是香港的中型地產商，都有投資的價值。

如果睇翻佢的財務數據，雖然收入有點波動，但地產企業常有這情況，特別是中型一類，有時會令股價較為波動。

整體來說，都有質素的，但又未去到好強。你預佢只能平穩增長，潛力唔算好大，長線持有係可以，但不宜持有太大比重。

佢同領展，算是有部分重覆左類別，因此合共的比例不能太多。

------------------------------------------------

Q21906：

老師你好，看過你的書及網頁後，明白行動重要性，感謝你的分享，現想請教關於置業及財務自由問題，先簡單講一下我們情況

家庭成員：我41歲，丈夫43歲，兩名小朋友3歲半及10個月

每月家庭收入：$64,000
每月家庭支出：$40,000
流動現金：$2,600,000
股票：$80,000
物業：已供滿荃灣2房單位，約值450萬

現想購買第二物業作投資，樓價預算400-500萬左右，3-5年後希望換同區3房單位作自住，現有物業放租，老師建議應該如何步處，選樓時又應該注意甚麼地方？

理財一向過於保守，近一年才開始月供股票，每月$6,000，以盈富基金及比亞迪為主，長遠希望可以製造每月2萬現金流，獲得財務自由，應如何投資比較好？謝謝

龔成老師︰

如果你希望長遠會有每月2萬蚊現金流，以股息率6%計，你需要本金400萬。

現時，你可以利用月供股票和現有資金，去累積這筆資產。以你41歲年紀，你現時月供組合係可以。

但比亞迪(1211)這類潛力股，波動性較大，不宜持有太多。潛力股，佔組合4成左右好了。若你投資經驗較少，最好下調至2成大右。

而且，比亞迪(1211)現價略貴，月供係可以，但小小注好了。以下是其他適合你的股票，供你參考。

現時大市只在合理區，每月你可以用儲蓄一半，去做月供﹐另一半儲起。而現有現金，都可以用部份，去分注買入上述股票。餘下資金，就用來等大跌市機會。

至於買收租樓，係可以。但我地財富組合除左要有增長力和質素外，平衡性都好重要。

你現時已有一個物業，若再加一個，會令你組合有少少偏重左係物業類，會產生過度集中性風險。

而且，現時香港樓市唔平，若從投資角度計，股市值博率會較高。除非你找到一個增長潛力不錯、租金回報率理想的旬盤，否則你先用優質股去做增值，會較有效率。

因此，買樓收租這一步，方向可以伴，但未必一定要太急進行。

------------------------------------------------

Q21907：

龔成老師你好，我今年32歲，今年開始偶然間留意到老師個Facebook page，認識到長期投資嘅威力，之前多數都係短炒，蝕左唔少錢，

宜家想好好設計自己長期投資組合，想問下老師如何改善同部署。多謝老師！

基本資料：

32歲，月入22K，有一自住物業，一個小朋友，月供連家用13K，每月可儲5K。

股票本金$148,000

水桶1 $69913 ：47.24%
1177 $7.56 中生製藥 1手 藥品 $7560 ：5.11%
9928 $7.13 時代鄰里 1手 物業管理$7130 ：4.82%（打算$7放）
3067 $18.28安碩恒生科技 6手 ETF$10968：7.41%
6690 $30.8 海爾智家 1手 家用電器$6160 ：4.16%
981 $22.65 中芯國際 1手 半導體$11325 ：7.65%
658 $5.08 中國高速傳動 1手 環保$5080 ：3.43%
2618 $45 京東物流 1手 倉儲物流$4500 ：3.04%
6060 $38.65 眾安在線 2手 線上保險$7730 ：5.22%
6618 $103.2 京東健康 1手 線上醫療$5160 ：3.49%
1773 $4.3 天立教育 1手 教育$4300 ：2.91%

水桶2 $78090 ：52.76%
1313 $8.9 華潤水泥 1手 建築材料$17800 ：12.03%
688 $18.5 中國海外1手 地產發展$9250 ：6.25%
3868 $3.7 信義能源 1手 替代能源$7400 ：5%（打算$4放）
270 $11.5 粵海投資 1手 水務供應$23000 ：15.54%
3718 $1.29 北控城市 4手 環保$20640 ：13.95%（打算$1.3放2手）

1.唔係好識分咩係潛力股咩係平穩，唔知有冇分錯，覺得增長好似有啲慢，應該投資多啲優質股嗎？將來想集中投資係電動車/環保/再生能源/京東/阿里/小米。

2.會太過分散嗎？如果會老師建議賣邊隻？本人可以接受風險！

3.三年後有機會增值到50萬嗎？因想再投資物業自住，原物業放租，及計劃會再生多個小朋友。

龔成老師︰

1) 我地投資股票，其實等同投資一間企業。希望透過其自然增長，以達至財富增值的目的。所以，我地投資一定係長線，而唔係短期炒賣，去賺差價。

你現時水桶分類，大致都正確。除了海爾智家(6690)和天立教育(1773)算係水桶1至2之間。

而你持有的股票，都有投資價值。你唔好太過在意中短期回報，我地要睇長線。這企業都有質素，你只要長線持有，就自然會有唔錯架回報。

至於你將來集中投資的行業和股票，都係偏向潛力股類別。佢地有較高增長潛力，但同時間風險都唔細。

以你32歲計，潛力股佔最多5成左右好了，否則會令成個組合風險過高。若你投資經驗較一般，你更要將比重進一步下調。

其餘部份，你應該配置在平穏增長股，組合才算平衡。

平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、粵海(0270)、領展(0823)。

2) 你現時組合的確有點散亂，以你組合金額來計，大約持有5-10隻會較理想，會比較易於管理。

但由於佢地都有投資價值，我唔建議你沽出任何一隻。但將來時間，你最好集中翻係5-10隻較有質素的股票，會相對較好。

中國高速傳動(0658)質素較中等，而眾安在線(6060)和京東健康(6618)不確定性較大，這3隻股票，都不宜持有過多。

3) 我假設投資回報有10%（連股息再投資），若你每月能投資$10000 + 現有持股約15萬，3年後大約會增值至60萬。

但3年只係一個中短期時間，最終回報的波動性會較大，你要明白這個風險。

而且，你現時已有一個物業，若你勉強再去買多一個物業收租，你會令成個財富組合，偏重晒係物業類，會有過度集中性風險。

因此，我建議你先用優質股做增值。到你財富累積到一定水平，係足以買入新物業之餘，都有一定優質股留底作增值，你才出手會較好。

------------------------------------------------

Q21908：

龔成老師你好，自從上年同你第一次對話之後已經開始月供計劃，明白財富需要時間去累積，所以我都學識唔好成日望住個市，多謝你無私教導！

現時開始緊每月供款如下:

$2000 @ 盈富 (2800)
$1000 @ 新鴻基地產 (00016)
$1000 @ 比亞迪 (1211)

想問如果想加0388港交所，其實月供係咪唔使太在意現價？1211依家咁貴係咪應該停一停？謝謝你！

龔成老師︰

以你30歲計，現時月供組合係適合的。

其實月供，我地同樣都要用平貴去定策略。只係月供有平均價格的效果，相對直接買貨，風險會較細，所以個價格可接受空間，會稍稍較大。

但若果佢價格水平，係太貴，我都會需要控制月供注碼，甚至係停供。

比亞迪 (1211)現價偏貴，月供勉強可以，但只可小小注，故你維持住$1000先。但佢再升，你就可能要減供款，甚至停供。

至於港交所(0388)現價略貴，但無比亞迪咁嚴重，你現時做月供係無問題。

現時大市只在合理區，每月資金唔好盡用。最好留有部份，等大跌市出現時，可以用來掃貨。

------------------------------------------------

Q21909：

我每年大概要給9萬保費（連家人），我唔想草係銀行到，近一年都有月供股票，月供2800@6千，9988@4千，另外每月1手3067

剛剛草10萬現金，以家想草多5-8千，做月供股票for每年繳9萬保費，保費要供20年。當中有2份醫療，3份危疾供20年，1份年金供10年

龔成老師︰

其實"保險"主要係用來防守，買足夠保障就可以。儲蓄成份架保險，唔係唔可以買。如果你個人風險承受能力好低，或者完全無投資能力，這類保險都有持有價值。

但始終係財富增值角度，佢幫助好有限，一般我都就唔建議太多。做財富增值，應集中投資在優質資產(如優質股、物業等)，效果才會理想。

你現時要支付的年金保單，如果係你較年長家人持有，係可以。但若你係這類3X歲的偏年青人士，就不太適合。

另外，你要明白一點，我地投資股票，其實等同投資一間企業。希望透過其自然增長，以達至財富增值的目的。

所以，我地投資一定係長線，而唔係短期炒賣，去賺差價。

你唔諗住年頭不停月供去儲股票，之後年尾就沽晒佢，去交保費。因為優質股係要長線持有，才會有理想效果，長線係講緊3-5年，甚至更長。

短期投資回報，會好波動，如果你用這個模式去操作，好易會失預算。

我建議你維持現時月供習慣，並將這些股票長線持有。而交保費部份，你另外以現金模式儲起就好了。

你現時月供計劃係可以，現時大市只在合理區，每資金唔好盡用。最好留有部份，等大跌市出現時，可以用來掃貨。

至於現有10萬資金，可先動用一半入，餘下一半同樣等大跌的機會。

------------------------------------------------

Q21910：

老師我想月供股票，但我間證券行無提供月供股票服務，如果我將自己的資金自動分配，
e.g. A, B, C, D 股票，
一月 A
二月 B
三月 C, D
四月 A
五月 B
六月 C, D
如此類推，請問可以嗎？

龔成老師：

可以。

月供股票的目的，就是將買入價平均，減少一次過在高位買入的風險，你上述的投資策略，都有類似的作用，因此可以進行。

------------------------------------------------

Q21911：

請問6969有前景嗎
請問北水流出流入什麼意思？

龔成老師︰

思摩爾國際（6969）係霧化科技解決方案提供商。近期國家衛健委表示電子煙並不健康，相信對佢會有影響。

先講佢業務，第一，佢以ＯＤＭ模式為全球煙草公司及獨立電子霧化公司（如日本煙草、英美煙草、Ｒｅｙｎｏｌｄｓ Ａｓｉａ－Ｐａｃｉｆｉｃ、ＲＥＬＸ及ＮＪＯＹ）研究、設計及製造封閉式電子霧化設備及電子霧化組件。

第二，佢做研究、設計、製造及銷售自家品牌（包括「Ｖａｐｏｒｅｓｓｏ」、「Ｒｅｎｏｖａ」及「Ｒｅｖｅｎａｎｔ　Ｖａｐｅ」）開放式電子霧化設備或ＡＰＶ（高級進階私人電子煙設備）。

相信，中國將加強行業監管，對佢有核心不利，這點都會影響企業估值，加上這股一向唔平。

基本上業務不算差，有當中的獨特性，以及長遠有增長力。不過，現價唔算平，加上監管風險，如投資，要小心控制注碼，真的小注好了，而這股有長線投資價值的。

北水流出流入，是坊間指內地投資資金，進出"滬深港股通"的意思。

------------------------------------------------

Q21912：

你好龔成，現正拜讀您的新書-千萬富翁，因剛剛已成為了百萬富翁！haha!

多謝您！我好感恩有您教導香港人正確投資方法，而不是炒炒賣賣。您真的影響左好多香港人，而家多左甘多百萬千萬富翁一定有人係因為受您影響！包括在下。

除了多謝您都不知說什麼好，同埋我好tang您開心，深信愛股比亞迪長遠有高增長，擁抱價值投資法，不理坊間閒言閒語，經過多年努力投資，今日成為千萬富翁，吐氣揚眉，恭喜您！

您將會成為億萬富翁，只是時間問題。

大家香港人一起努力

龔成老師︰

多謝你的支持

我都係希望透過自己知識分享，去幫助更多人，去真正理解投資理財這件事。

看到你能成功成為百萬富翁，真係好開心。但緊記，長線投資要做得好，除左用正確方法之外，必需要保持學習，令自己一直進步，這點是很重要的。

我相信，不久將來，你都會和我一樣，成為千萬富翁，甚至走得更遠，加油。

------------------------------------------------

Q21913：

龔sir，唔好意思呀，又想問問小米1810, 我30.5買， 2000股，早前升到最高去番30.45 但我冇放到，下星期我係咪應該蝕放，等佢跌番落去先再入番呢？ 謝謝解答

龔成老師︰

你係投資理解上，存在一些好核心性的問題。

首先，我地投資股票，其實等同投資一間企業。希望透過其自然增長，以達至財富增值的目的。

所以，我地投資一定係長線，而唔會係做短炒，去賺差價。

另外，我地投資唔好去"估走勢"，無人知你沽左貨之後，會唔會一如你預期咁再跌，佢可能會反而大升，到時你就會進退失據。

我地投資應該係先了解企業質素和前景，當確認係有優質，就再審視佢平貴，去定入市策略。

小米（1810）有潛力的，佢的產品性價比高，相信在全球好多個國家都會有市場，佢長遠只會進一步增長。

同時，佢建立的平台是佢長遠的增長動力，先賣手機，再利用手機的平台延伸銷售小米家電。長遠正面的。

這股可長線持有，但你預佢股價會較波動。

------------------------------------------------

Q21914：

你好，龔sir, 現有276萬現金，但1年後要比200萬我家姐，請問呢1年內買咩可要賺取高息又保本

龔成老師︰

坦白講，只有1年時間，要保本和收息，那200萬部份最穏當選擇就係做定期。

因為，就算係再保守的收息股，都會有機會出現價格波動，令你出現賺息蝕價的情況。

至於餘下76萬，你可以因應你人生階段、投資經驗和風險承受能力，去作出配置。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

假設你係年青至中年人士，你可以用「平穏增長股」 + 「潛力股」的組合。如果你係偏年青，比例大約可以去到各一半。

但由於「潛力股」有一定波動性，較適宜年青和有投資經驗人士。若你投資取態較保守、經驗較淺或者較接近中年，「潛力股」比重就要相對下調。

大市現處於合理水平，那76萬資金，可以先用一半，以"分注"形式慢慢入貨。餘下一半就等大跌市機會出現，才大力度掃貨，並長線投資。

------------------------------------------------

Q21915：

我其實是你的學生，但我於上年開始follow你的post，從中學到很多投資股票上面或人生的導向的知識，真的獲益良多，希望你介意我稱呼你為老師！

我在幾年前因被公司遣散，之後適逢社運之係又疫情，所以順理成章專心做家庭主婦照顧家人。我一向有投資股票的。

但過往買的真是一些垃圾股，過去的就不再提了，當是一個教訓。 自上年我在fb認識到你。我都買了你的一本著作[股票勝經], 仍在努力中，希望盡快睇完這本再睇第二本。

你常常提醒我們{買股票不是買佢的股價，是買佢的企業，若是優質有質素的企業，就算跌市也不用怯}，同時買股票都要有耐性不能心急，要長期不是短視。

我之前就是中哂這些錯誤的方法。1、2月時幾次大跌市，我手上有2382，175，2333，3690，因跌好多，好驚越跌越蝕得多，所以忍痛蝕走。但之後市回返就升返上來。

可能你睇到依度都會話我蠢、傻！。 依家我會時時刻刻都記住你的真言。若是優質的企業就不用怕。

sorry, 好長篇。想借此機會多謝你。 同時有幾點想請教你

1. 怎樣知道是股票是優質不優質？

2. 我現有3993，358，是優質股嗎？ 3993 > 6.28 算高位入358 > 21.5 算高位入，兩隻可繼續持有嗎？

3. 另外，想幫我仔（剛成年）月供股票，心目中想供1810或1211，兩者邊隻較適合？但兩者現價又升返上來！同時不知道怎樣月供股票？可否賜教？非常感激!

龔成老師︰

你過往所經歷的，絕對唔係你個人問題。其實很多初階投資者，都會經歷的，係一件平常事。重點係，你有無從中吸取到教訓，之後再重新上路。

1) 要分析一間企業，有無質素。過程比較複雜，好難三言兩語就講到，就算在我的股票班，都要講數小時。

簡單來說，你要考慮企業本身質素、行業發展、財務狀況等，去分析一個結論出來。

2) 洛陽鉬業（3993）並不是完無質素，但不能說是穩健，佢的營業額同盈利都十分波動，這點令分析佢較困難。因為好難確定到往後經營環境對佢的影響，同埋，佢亦因成本令佢盈利較波動，這同樣是較難預測的。

我地好需要，用過往的數據去分析，同時判斷往後的經營環境，如果過往數據變化太大，會較難分析。

另外，這股的股價較為波動，這股不是不能投資，但不宜大注。

江西銅業股份（0358）係中國一家綜合性銅生產企業，主要業務範圍為於江西省東北部經營銅采礦、選礦、熔煉與精煉以生產陰極銅、銅杆線及副產品，包括硫精礦、硫酸及電解金和銀以及稀散金屬，如鉬精礦。

佢亦會為客戶根據來料提供熔煉和精煉的加工服務。

就過往的業務情況來分析，這股不過不失，盈利較為波動，反映無乜產品價格自主的能力，長遠企業價值增長只是一般。

這股不是劣質，但都不是高質，相信股價長遠未必有明顯上升，只是較普通的企業，投資價值只是一般。

這2隻股票，若佔你組合比重不高，可以守。但若果係較高，我建議你沽少少，去平衡個風險。

3) 月供其實好簡單，你去銀行或者證券行開個可月供的投資戶口。你睇下個月供費用，同埋邊個方便你自己，就可以。

你仔仔較年青，投資可以進取少少。你所選的2隻股票，都係適合的。

但現時比亞迪(1211)偏貴，要月供的話，只宜小小注。而小米(1810)現價開始月供，係無問題。

另外，我建議都加入一些平穏增長力股，在月供組合。因為畢竟潛力股(1810, 1211)風險都係較高，佔組合比重太多，唔係咁理想。

你仔仔在潛力股和平穏增長股，最好約各佔一半，就算得上平衡。

平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)

或潛力股︰比亞迪(1211)、中生(1177)、福壽園(1448)、小米(1810)、安碩恒生科技(3067)、港交所(0388)、阿里（9988）、騰訊（0700）、ＧＸ中國電車基金（2845）、三星FANG ETF（2814）。

大市算在合理水平，每月資金唔好盡用，大約可以動用一半做月供。餘下一半就等大跌市出現時，可以用來掃貨。

------------------------------------------------

Q21916：

上完你堂， 特別係最後一堂，覺得好有意思。

原來會將間屋當wallpaper唔係得自己，不過我係自己間鐵皮屋，日日提醒自己連普通人都算唔上。

好記得你27歲果陣就有一百萬，我都岩岩到數，不過行的路同實現的方法同你都唔同。我過去係靠基金都努力甘捱到宜家33K人工。

來緊會多用你方法，希望你我最後都可以有自己想要的物業，對你來講可能果個係自己的一個小天地，對我來講物業反而係代表我的存在價值。

共勉之。多謝你搞呢D Course比我地。

龔成老師︰

你無需要這樣想，在這個世界，每個人都是一個獨立個體，無得定義話邊D係普通人，邊D係唔普通人。

我地做人，最重要係對自己內心負責。你唔需要同別人比較，因為你就是你。只要找一條自己合適的路走下去，咁就可以。

你27歲，相當之年青。只要你好好學習，用正確投資方法(記得溫書)，持之以恆。我好有信心，你一定可以擁有自己理想中的物業。

加油，保持努力!!!

------------------------------------------------

Q21917：

想問問中國白銀集團00815 前景點睇

中國海洋石油00883。10.18@17000，中國鐵塔1.23@64000，呢2隻止蝕離場定可以長揸..？Thanks

龔成老師︰

中國白銀集團（0815）的質素不太好，因為佢的業務較為波動，之前亦出現了虧損，佢主要於中國從事製造及銷售白銀及其他有色金屬；黃金、白銀及珠寶產品的零售及批發等。

這股又不是完全無價值，現價合理，但只宜好小注。

中國海洋石油（0883），質素都算有，但不是最高質類別，佢對油價較為敏感，所以，如果長遠油價向上，佢都會增值的。

雖然佢都有一定的規模及質素，但卻不是最高質素的企業，這是由於佢地的產品自主力較弱。

石油是商品，當中沒有差異性，佢地要將石油賣出，只能跟國際油價，這令佢地處於被動狀態，沒有價格自主的能力，這令佢地的獨特性有限。

這類商品企業，都可投資，但就要明白不是最高質的企業。若佔你組合不多，可持有。但若佔你組合較多，建議沽出部份。

中國鐵塔（0788）不是無質素的。始終中國的3大電訊巨頭，都是佢的主要客戶，以及大股東，當5G發展，佢一定會受惠，因此前景仍然正面。

佢現時的收入都增長，盈利都保持向上，但增長比之前略減，加上股本回報率不高，是這股較弱的地方。若分析佢市盈率，會見到現時仍然處較高水平，反映佢雖然股價回落左唔少，但仍然未到平。

這股長遠仍算有發展力，可長線持有。不過，潛力度比過往略減。

------------------------------------------------

Q21918：

老師你好， 想問一問如果我還是投資初學者，但準備下年到加拿大移民， 當我移民後，應該繼續研究香港股票市場，還是美股？ 繼續研究香港上市公司買港股投資應該較易掌握？

龔成老師︰

預期未來一段時間，中國和美國會係全球最重要的經濟體系。因此港股和美股，都係有投資價值。

而你投資那一個市場，就要視乎你對相關市場的了解。基本上，研究2個市場的企業方法，都係好接近，無話邊個較易掌握。當然，你本身係香港人，相信會較了解香港和內地文化，在分析港股行業時，會有優勢。

如果你想投資港/美股，但現時對港/美股又唔係好認識，你可以先投資係佢的相關ETF。以下3隻股ETF，都係不錯的選擇。

當中，QQQ波動性會較高，要注要風險。

盈富(2800)係包括58間質素不錯上市公司股票的組合，有長線投資價值。

Vanguard標普500指數ETF〈VOO〉，是追蹤標普500指數的ETF。

Invesco QQQ Trust(QQQ) 是追蹤納斯達克100指數。

------------------------------------------------

Q21919：

龔sir，本人現56歲，月入19,000（近乎月光族）, 每月供樓約6,000作自住（最後供款期為小弟73歲），流動資金40,000，現想開始月供股票，每月投放約1,000-1,500。

小弟有以下問題想請教：

1. 以我現時情況，如開始月供股票，應否選擇增長型股票，還是選擇穩健型股票？ 以下股票合適可選嗎？

0016 新鴻基地產
0066 港鐵
1211 比亞迪
1810 小米
9988 阿里巴巴
2382 舜宇光學科技

2. 因樓按要供至73歲，應否於加息週期開始時，將樓按改為最後供款期為65歲，這樣更改去減小利息開支，做法是否明智？ 還是將月供股票財富，到最後幾年才提早贖回按揭？

龔成老師︰

1) 以你的年齡，其實已開始為退休做準備，但同時，財富仍有增長力（但不是進取），因此，你可以投資「平穩增值股」+「收息股」。

你選擇的股票，係有質素。但組合過於進取，除了新地(0016)和港鐵(0066)是平穏增長股，較合適外。其餘都係潛力股，對你而言，風險太高，我都太建議。

而且，你現時每月可以資金好了，供太多隻，會令個股月供成本過高，咁係唔理想。

你可以暫時先隻中供新地(0016)和港鐵(0066)，到你有再多資金，才月供以下股票。至於現有資金，可以先用一半。餘下一半，就等大跌市時，才動用。

但由於你已近退休之年，這2隻「平穩增值股」唔適合一直供落去。你要隨著年齡增加，慢慢換碼，去增加收息股的比例。到退休時，收息股應佔100%。

2) 這個要視乎加息多少，因為只要你長期平均回報率和借貸息率，係存在一個明顯息差，你係應該維持現有還款計劃。

但若果加息比較多，可能息差以收窄(不足2%)，你就可以考慮用較多新資金，去做還款。

不過，我唔建議沽貨去清還貨款。因為我地無人知個市場環境會點走，你一次過清晒成個股票組合，其實係好高風險。

------------------------------------------------

Q21920：

老師好，最近很迷失，想問以下幾隻股票應該怎安排好。

136,
369,
769,
1029,

1705,
1830
3800,
6988

龔成老師︰

完美醫療（1830）和樂享互動（6988）有一定的質素，現貨照長線持有。但現價偏貴，不宜加注。

恒騰網絡（0136）都算有質素，但不確定性高。而賓仕國際（1705）質素較一般，2者都不宜持有太多。

永泰地產(0369)、中國稀土（0769）投資價值好一般，長線換至其他優質股，會較好。

鐵貨(1029)無乜投資價值，建議沽出。

保利協鑫能源(3800)比較麻煩，現時暫時停緊牌，因為佢仍未出到業績，將公佈業績的日期延遲了幾次。

最近現任核數師更請辭，我對這類股票，會較有保留。但由於現時停緊牌，暫時乜都做唔到，只有等。

初步睇佢的財務數據，都幾弱，相信日後就算復牌，股價都會受壓，要有心理準備。

我地投資一隻股票，就等同投資一間企業，我地必須認真分析佢的質素、行業前景、財務狀況等，才好做投資。

我見你過往選股，大部份質素都唔係太理想。如果你選股能力較弱，我建議你買一些ETF，好似盈富(2800)。

它是包括58間質素不錯上市公司股票的組合，這些股票有升有跌，但長期計，都有不錯的回報。買入盈富主要有兩個回報(分別是股價升幅，加上股息回報)，股息不多，大約只有3%。

而股價升幅，其實有升有跌，每年都會波動，但長期平均計，都有5%-10%，當然，這是不一定的。若你以月供股票，買入的價格就能平均，不用擔心一次過在高位買入的風險。

雖然盈富(2800)增長力，唔算十分高。但佢係一籃子優質企業的組合，對於選股能力較弱的初學者，絕對係一個唔錯的選擇。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q21201-Q21220）

Q21201：

你好龔Sir , 上完你堂就計一計吉利(175)既估值，麻煩睇下我做成點呀

因汽車界近來有著革命性的改變, 所以只用近5年的數據
主要競爭公司 2016-2020年PE raio

(因比亞迪完全是一間電動車公司而且市盈率太極端所以不用來比較)

以下數據按大小排

吉利(175)8.551 12.58 13.87 14.41 26.97
長城(2333)6.676 7.178 8.777 8.812 11.11
廣汽(2238) 4.22 6.802 8.584 9.454 10.19
北京汽車(1958) 6.236 7.766 8.495 9.402 12.14
(因2018年一次性PE大升,其後回復正常, 所以不用2018年改用2015年)

用你課堂教的調整，再綜合分析，推算行業平均市盈率 : 8.5815 - 10.5195

吉利(175)市值大, 業務規模比其他同業大, 值得調整，大約調整50%。經調整後吉利合理市盈率 : 12.87 - 15.78

吉利5年平均每股盈利 : (0.64 + 1.4 + 1.58 + 1 + 0.61)/5 = 1.046

大行預期2021年每股盈利為 : 0.94

因吉利積極發展電動車品牌及推出新車, 但同樣銷量亦受疫情及芯片短缺帶來一點拖累

所以先假設每股代表盈利是5年的平均數1.046
所以吉利的合理估值為 : 13.46 - 16.51

請問咁計同你計出黎既差得遠嗎? 你計出黎又係幾多呢? 謝謝

龔成老師︰

首先，北京汽車(1958)2018年市盈率大升，並唔係一些會計因素，純粹係當年不少汽車股被炒起。

因為價格大升，所以市盈率就被大幅抽高。將來都有機會出現這種情況，故你都應把這年，計算在內。

吉利(0175)本身的質素不差，擁有一定的銷售網絡及品牌，不錯的市場策略及定位。

佢早前杭州灣新工廠正式發布純電動新品牌新車「極氪（ＺＥＥＫＲ）００１」，宣布吉利進軍高端電動車。

這些因素，都值得給予吉利較高評價。加上佢近年加大新能車部份發展，預期會令增長力增加，故市盈率可以比以往，再調升少少，大約17-22倍。

合理估計，你可再上調多D，會較為合理。

其實，你已掌握了估值的方向，你最重要在計算後，明白這計算背後的基礎，當中是考慮了那些環境情況。

有時我在估值時，會同時計幾個情境，例如好景時的EPS會怎樣，如果差的情況估值又會怎樣，去得到更立體的答案。

另外，你要多做練習，為不同企業進行估值，這樣才會更掌握當中的技巧。

------------------------------------------------

Q21202：

龔老師您好，想問下中國鐵建，長遠和短期投資可以嗎，現時pe2-3，點解佢賺到錢，又有股息，但係格價咁低？

龔成老師：

中國鐵建（1186）業務以鐵路及交通相關工程為主，包括高原鐵路、高速鐵路、高速公路、橋樑、隧道和城市軌道交通工程設計及建設。

業務地區包括中國，以及中國以外地區，工程承包業務是這企業的核心業務，例如基礎設施建設，鐵路、公路等。

這企業的發展不過不失，但增長力及賺錢能力都比過往有所減少，從一些財務數據，例如資產回報率、股本回報率、EBITDA利潤率等，都見到這企業的長期財務數據有轉弱情況，反映企業現時每個項目的賺錢能力，不及過往年代，企業質素因而下跌，而市場估值都會因此而減少。

這股的整體質素算是中等，發展力比過往有所減弱，這類股不是不可投資，但就不值得投資太多資金。

至於市盈率較低，並不一定代表吸引的。

第一，每一間企業，每一個行業，都會有其合理的市盈率，雖然數字愈低一般代表愈便宜，但在實質操作時，先要了解每個行業及企業自身的情況。

第二，當一個行業、一間企業的發展前景不及過往年代，賺錢能力減弱，市場就有可能將其合理市盈率的估值調低，投資者要小心解讀數字背後的意思。

第三，近年一帶一路的發展力，並不及之前所預期，部分國家的工程都減少了，這企業的長遠生意都會因此受影響，同時每項工程的賺錢能力都有可能因此而受壓。

第四，當投資者分析企業時，要了解生意的持續性，例如一些從事零售行業、飲食行業，只要大環境無太大變化，生意往往會持續。但若然企業從事工程，投資者就要了解生意持續性的因素，若果一個國家該類建議最大規模發展的時期已過，企業生意可持續發展能力就會轉弱。

在中國鐵路最大規模建設時期已過，以及一帶一路國家對中國興建鐵路的需求，未必及預期的情況下，這企業自然受影響。

若投資者見到這企業長期的市盈率，經常都處於很低的水平，反映市場認為這企業面對上述因素，只是值這個市盈率，因此，並不代表特別便宜（情況與內銀股一樣，長期低市盈率背後是有原因的）。

------------------------------------------------

Q21203：

你好，想問下你有冇長線投資邊隻美股或者ETF？知道你長線投資1211，覺得你好有毅力，

想問下如果我長線投資arkk / arkf好吾好呢？另外你還睇好邊隻港股可以長期持有呢？thanks

龔成老師︰

其實你只要明白，真正最好架財富增值方法，就係長線持有優質股這個道理，你都可以做得到。

美股和ETF，我自已無投資，我都係自行選股，好似比亞迪(1211)、小米(1810)等。

美股我自已無特別研究，所以這些股票比唔倒太多具體建議比你。

但初步睇佢地都有質素和潛力，但你預佢地波動性會較大，緊記投資持要控制注碼。

而港股方面，都有不少優質股，值得長線持有。若你係年青至中年人士，以下股票都適合。

平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、領展(0823)

潛力股︰安碩恒生科技(3067)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）。

但你要留意翻，部份潛力股已有輕微過熱情況。只有安碩恒生科技(3067)、ＧＸ中國電車基金（2845）、 阿里（9988）、中生製藥（1177）、福壽園(1448)勉強算在合理區頂部，可分注入貨，其餘要等等。

------------------------------------------------

Q21204：

龔sir，你好👋🏻本人30歲，是全職媽咪，現持有以下組合嘅股票：

1. 01093石藥 （平均價$9.56）持有12800股

2. 2342京信通信 （平均價$2.612），持有16000股，現價跌到兩蚊，請問應唔應該再購入？

3. 941中移動（平均價:44.85 ） ，持有1500股

4. 939建行（平均價$6.41 ）持有4253股

請問這些股票是否都是有質素？除了建行外，其他另外三隻都打算長渣，是
否可行？謝謝你抽空解答

龔成老師︰

你以上持股，都係有質素，全部都係可以長線持有。

但選股組合上，京信通信(2342)質素未算好高，唔建議再加注。

現時你除左石藥(1093)外，其餘幾隻增長力都唔高。若果你個人投資取態係較保守，咁都可以。否則，你就你加入多少少有增長力股票，去提升財富增長速度。

另外，有一個較大問題，係你好偏重左係石藥(1093)身上，佔組合比重很高。任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於3成，而單一企業不要高過15%。

長期你需要建立一個更平衡架組合，唔好太集中係幾隻股票。

------------------------------------------------

Q21205：

你好，龔sir 小妹今年28歲，月儲一萬左右，想係30歲前有100-130萬，有可能嗎？現時持股如下
(坐艇中）！！！

匯豐2000股@70元
騰訊100股@662元
美團300股@330元

小米400股@32.7元
安碩恒生科技600股@20.58元
21世紀教育33000股@1.38元
易鑫集團500股(新股上市抽中的）

另外有大約價值6萬港幣的美股(哈，終於系正數😅唔洗負數負到懷疑人生）和30萬左右現金！

龔sir,請問有機會達成目標嗎？有無邊d股票應增加或減持？希望你比小小意見我，多謝解答。

btw報左你股票班，因為你太神秘關係，好想揭開你的面紗！

龔成老師︰

其實你唔好太著重係股價上，帳面賺定蝕，從來都不是持有一隻股票與否的因素。

關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

假設回報10%計(連股息再投資)，你每月投資$10000 + 現有資產約值65萬，2年內增值至100萬，計算上係可以。

但由於2年唔係一個長的時間，就算優質股也有機會出現波動，影響到你最終回報，你要明白有這個風險。

先講你現有持股，都有質素。

但匯控(0005)只係收息股，唔會有太高增長力，唔適合你。

易鑫集團（2858）、21世紀教育(1598)質素中等，而美團(3690)有質素，但不確定性較高，都不宜持有太多。

你現時28歲，較適合用"平穏增長股" + "潛力股"的組合。每月用5成儲蓄，去做月供，其餘先儲起，用一邊月供一邊儲蓄的策略。

現時大市只係合理水平，現金和股票最好各佔一半。餘下30萬和每月儲蓄，就等大跌市出現，才加大力度掃貨。

股票班見!

------------------------------------------------

Q21206：

Hello!請問龔sir你覺得比亞迪電子285 現價可以入嗎？其實我都有啲睇好佢，但知道佢，依家呢個價唔平，要落返去20-30蚊都幾難下！謝謝

同埋阿sir 我想問你依家手上有咩股票同平均咩價位入？

龔成老師︰

比亞迪電子（0285）質素不差的，有潛力。睇佢過往發展都正面，有技術，而前景都唔錯。

考慮到近期的增長，$40左右算係佢合理區頂部，現價略貴。要等回翻才好分注，或者可用月供去儲貨。

至於我的持貨，講其中幾隻啦，比亞迪（1211）、小米（1810）、中生（1177）。

現時比亞迪較貴，唔好考慮住，而小米同中生，算是合理區頂至略貴。相信這3隻股，都會好長線持有。

------------------------------------------------

Q21207：

龔sir,你好！本人45歲，已婚有2個子女讀中學，夫妻有穩定工作及收入共6萬元。

我上年12月在FB follow 你，除了睇完百萬富翁系列書籍，也買齊你的聖經及50系列的書，
真是獲益良多。

今年1月開始月供1萬股票，包括2800＄3000, 1810＄1500, 9988＄1500, 66＄1500, 823＄1500
及1928＄1000。

現手持有股票：
1手2382＄175入, 1手9988＄222入, 6手3067＄17.15入, 1手981＄24.5入, 1手2018＄43入

1）有10萬資金想在跌市時再買入上述持有的股票，還是買入月供的股票，哪個會比較好？

2）以上股票分布會否太散太多？有否集中某類型？

3）2018及981仍可持有，還是賣出轉換1928或其他會比較好？

懇請龔sir指教分析，謝謝。

龔成老師︰

先多謝你支持，你可以先睇"80後百萬富翁"、"財務自由行"和"股票勝經"，由淺入深，咁會較好。

1) 其實2者都可以，除了中芯(0981)較一般，唔建議加注之外。

同時間，你入市架時候，唔好太偏重新經濟股，都要加入部份舊經濟股，令組合更平衡。

2) 不算太散，但有少少偏重天係新經濟類別，會令組合波動性偏高。

3) 瑞聲科技（2018）不差的，本身有一定的規模與技術，長遠發展正面，不過，佢增長力不是好強，只能視為平穩增長類別，你可以長線持有。

中芯國際（0981）業務有增長力，但未必能稱為好優質的股。

睇翻佢過往的業務情況，雖然仍每年的生意都有增長，但盈利就有波動，反映雖然大環境的市場在增長中，但佢的成本與售價，就未必在佢掌握的範圍，最後造成盈利波動的結果。

雖然這股都有前景，但以佢面對的情況，但好難將佢定義為最優質的股票。加上之前熱炒過，股價大上大落，投資要注意風險。現貨1手可持有，但唔建議你再加注了。

------------------------------------------------

Q21208：

龔成老師你好，我今年32歲，其實我已經接觸股票超過十年，在最近開始留意你的fb才發現原來我一直都買錯哂/亂咁買，有一種一言驚醒夢中人的感覺

我已經買了股票勝經，希望重新開始真正學習如何買股票，非常感謝你無私的分享

我現時持有以下股票：

267 - 1000股 @15.48
388 - 100股 @297
745 - 12500股 @2
1733 - 60000股 @0.5

1776 - 1000股 @24.65
1816 - 5000股 @3.71
2382 - 100股 @176
6886 - 200股 @24.8

我知道大部分蟹貨應該賣出，其實我深知積存蟹貨的原因是我買股票後就好少留意股價，到想起來時先發現原來跌咗好多

加上我不知道應該幾時賣出才好，感覺過去十年的時間及金錢都浪費了。

看了老師你的分享後，我才知道月供股票，覺得頗適合我這種很少留意股價，但又想獲得合理投資回報的人，希望老師有時間的話可以對我的投資組合給予寶貴意見。

萬分感激龔成老師，謝謝!

龔成老師︰

你想先更正你一個投資想法，蟹貨與否，唔係一個重點。我地投資最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，賺緊定蝕緊，都要賣。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你今年32歲，建議你先集中做好增值部份。現有持股中，舜宇光學(2382)和港交所(0388)係合適的。

中國國家文化產業(0745)見佢過往有20合一，而且多年出現虧損，好大機會係財技股，建議你盡快沽出。

易大宗(1733)，如果有睇佢的企業年報，就會見到核數師，多年來都有「保留意見」或「不表示意見」，這已經賬目「有古怪」。這類股基本上無投資價值，賣出較好。

中信股份（0267）、廣發証券（1776）、中廣核電力(1816)、ＨＴＳＣ華泰證券（6886）質素一般，唔建議你持有太多。

至於月供適合較初學者原因，唔係因為唔洗成日睇住個價。而係佢可以透過拉平均左個買入成本，令你減少買貴貨架風險，從而長線得到較佳回報。

月供策略上，現在你每月用5成儲蓄，去做月供，其餘先儲起，用一邊月供一邊儲蓄的策略。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

而何時賣出，基本上企業質素一直無變差，你係唔洗賣。除非個市去到好狂熱，如果你現階段無信心判斷大市平貴，你可以用"升一倍、沽一半"架策略。

先收回成本，餘下一半讓佢自行慢慢增值，咁就可以。

書本上，我建議你先睇埋我寫架"80後百萬富翁"、"財務自由行"，咁會較理想。

------------------------------------------------

Q21209：

我爸爸岩岩過身
原本供緊層樓諗住比佢養老
我租左新樓 $12500
但依家舊樓就空左市值300萬左右
我諗緊賣唔賣好
層樓倍升左幾倍
岩岩我公司燉我冬菇
減左20%人工

股票我仲有
比亞迪
盈富
領展
小米
3033
全部小量
想睇下你會點睇

龔成老師︰

每個人都有自住需要，除非間屋已經明顯無乜增值潛力，咁你才考慮沽出。

否則，你可以考慮自已住，可利節省新樓租金，用來投資增值。又或者，放租比人，自己另租地方。大前題係，如果物業依然係有質素，就應留住這個物業。

你現時持有的股票，都係有增長力和質素，適合年青至中年人士。這些股票，你長線持有就可以。

若你將來會再投資恆生科技股ETF，建議你用安碩恒生科技(3067)。

相對南方恒生科技(3033)，佢每年收費和追蹤誤差都較低。但由於幾隻恒生科技ETF都係初上市，追蹤誤差只能作參考。實際誤差未必一樣，你要知道這個風險。

------------------------------------------------

Q21210：

龔sir,你好，又要你幫手解答問題了，想問萬國數據值得持有嗎？我知道都有新意網，2隻長遠黎講邊個好？

新意網又持續上升，萬國數據就蝕錢，但又因為覺得中國發展潛力大

另外亦知道美股亦有呢隻股，那麼大家有什麼分別?見佢低過招股價 想入手，那麼我買美股定港股?唔清楚呢d範疇，謝謝。

龔成老師︰

我地持有邊一隻，唔好太著眼係中短期股價走勢，要用翻佢長線質素去做考量。

新意網集團（1686）主要提供數據中心、設施管理、網上應用及增值服務，系統之安裝及保養服務。

行業長遠發展正面，佢已經做到全港最大，加上行業的需求不斷增長，對佢長遠都有正面影響。佢過往生意與盈利保持增長，財務數據正面。

這股有投資價值，不過現價就唔算平，大約在合理區頂。如投資，小注分注都可。

萬國數據（9698）有質素的。

佢的業務為開發及營運數據中心，根據佢公司提供的資料，佢係全中國最大的運營商網絡中立數據中心服務提供商，市場份額約2成。

現時主要通過GDS上海、GDS北京及其子公司進行該等業務。GDS北京及GDS上海各自持有經營業務所需的互聯網 數據中心牌照。

佢提供託管和管理服務，包括創新和獨特的託管雲價值主張，機房面積為266,260平方米，有一定的規模。

見佢生意有一定的增長，行業前景正面，只是現價唔算平，投資價值都有，但就唔建議太大注。跌翻10%較合理。

2者都有長線投資價值，規模上，萬國數據（9698)會佔優。但此刻值博率，會係新意網集團（1686）較高。

至於，買港股定美股，其實分別唔大。

------------------------------------------------

Q21211：

龔SIR，我想講你知，我上過你股票班，跟咗你兩年之後，認同你套方法係得！

我今年28歲，成功說服家人賣了住了20年的兩房自住物業，目的一部分資金幫老人家做收息作生活費，還了另一物業的樓貸(因自住物業作抵押)

剩下部分讓我倆兄弟(弟弟22歲)投資增長股，目標是5~10年再運用借貸買兩個物業，一個值300多萬的細價樓，一個過千萬的三房物業。

目標投入潛力股的資金約340萬港元，目標組合:舊經濟股1177, 3319, 1830, 新經濟股 2382, 0636, 2845, 9988

340萬本金的組合，若選擇投資以上的股票，應選幾多隻好呢?建議比例如何?我會留意股價睇值博率

龔成老師︰

你所講的組合，都適合用來做財富增值。

但這個組合中有主要係潛力股，佢地雖然有增長潛力，但同時波動風險都唔細，唔建議全部資金盡用在這些股票身上。

我建議你加入一些平穏增長股，同你上述架潛力股，比例上各佔一半，咁會令到個組合更平衡。

大市現處於合理水平，那340萬資金，你可以先用一半，以"分注"形式慢慢入貨。餘下一半就等大跌市機會出現，才大力度掃貨。

由於你現處於"沽空樓市"狀態，股票增長和樓市增幅未必同步。所以，假若股票升幅跑輸樓市，反而會令你日後買樓成本上升。

你可以在投資組合中，加入多少少房產類股票，去盡量平衡翻這個風險。

至於老人家收息部份，就唔好用以上股票，應以一些優質收息股為主。策略上，都係先用一半資金，分注入市，餘下就等機會。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）或收息基金(3110)都可以。

如果你能承受到風險，有些更有超過8%、10%的高息股，但股價就略有風險，要自己衡量，佐丹奴國際（0709）、中石化（0386）、互太紡織（1382）等（記住，股價略波動，只能小注）。

(你可睇下我本《50穩健收息股》當中仲有好多)

------------------------------------------------

Q21212：

老師我想請教，其實我等緊2020居屋結果，搞珠號碼好後，本身以為冇機，但又收到信補料，之後仲收到二次急件要我補料，好似比咗個希望我。

現在有現金100 万，覺得而家係買樓時機，唔買冇機會，目標500万樓下，做9 成，其實冇咩實力。

聽講居屋5、6 月𢵧樓，如果到嗰時先知自己原來冇机先再睇返私樓巿場，會唔會太遲，我已經41，買舊樓驚做唔到長年期，500 樓下變得冇乜選擇，好心急，求意見

龔成老師：

你可以等埋居屋果邊先，我相信私樓未必會一下子上得太快，估計1年內上落都唔會太過多。

如果居屋果邊唔成功，到時就睇私樓（當然，現時你久不久睇下私樓先，都無壞的）。

要留意，你的「供款能力」是最重要的考慮因素，唔好太過勉強，如果這方面不足，就寧願調低目標樓價金額。

------------------------------------------------

Q21213：

你好龔老師 關於上次你既解答 我風險過高，除左買3067，如何可以提升組合平衡性？ 現持有小米及雅迪，但不是月供

小米有1800股，雅迪4000股； 是否建議買短期股？想每個月都增加$4000以上收入，有可能嗎？

龔成老師：

恆生科指（3067）是一個組合，會比單一股票的風險度較低，當然，由於佢持股都是潛力類股票，因此本身都有一定的波動性，你要留意。

小米（1810）絕對有質素，可長線。

至於雅迪控股（1585），都有潛力，不過要留意股價升左好多。

佢主要係中國以「雅迪」品牌從事電動兩輪車（包括電動踏板車及電動自行車）的開發及銷售，亦銷售電動兩輪車用的電池、充電器及其他零部件（包括電機、車架等）。

睇翻過往財務數據，唔差的，生意的確有增長力，潛力度有。不過現價唔算平，因此唔建議持有太多。

另外，不建議你短炒，全部都要長線投資，不要著重每月賺多少，要睇長線。

------------------------------------------------

Q21214：

龔成老師本人30中，有一自住物業育有一子，供樓等家庭開支全一力負擔，每月可尚餘2-3千元。。。

而儲蓄則由老婆負責，現有100手a50，2手電能，2手中國建築，3-4萬現金。應該如何重新分配令財富有長遠的增長保障退休後的生活？

而5-6年後除去支出本人每月可有8-10k的餘額，50％作月供股票50％用作儲蓄流動資金合適嗎？而40歲才由零開始理財會否太遲？

本人明白財富增值非一朝一夕的事，但人總有貪婪的一面，會引發一些錯誤的想法，所以唔知醜咁希望龔成老師指教一下以滅絕那錯誤的想法！

另外想問問老師的投資初階班學費是多少

龔成老師，我媽媽遲下會退休，強積金大約有50萬左右，我應該以咩比例分配係收息股同平穩增長股，而到左退休年齡可以投資少少係潛力股嗎？

龔成老師：

你現時現金其實不足，以一個家庭來說，加上要供樓，如果只有$4萬現金並不足夠，最好去到$7萬-$10萬作備用現金，餘下的才投資，這會較好。

另外，A50中國可長線的，但要留意，雖然這是組合，但都不能過度集中，宜同時投資其他股，如果不懂選股，就考慮其他ETF。至於電能（0006）及中國建築（3311），質素是有的，但增長力不強，收息為主，以3X歲來說，算是較保守，因此，日後可增持一些有基本增長力的股票。

至於你自己要5-6年後除去支出本人每月可有8-10k的餘額，50％作月供股票50％用作儲蓄，最好當然盡快啟動這計劃，但如果無計，就等5年後啟動，40歲，有心都唔怕遲。

現時你每月可儲$2-3000，都可以盡力投資，月供股票都得。

當然，希望你在收入上更進一步，想想長遠增加收入方法，對你會更有用。

至於你媽，潛力股就唔太建議，如果佢真的好想，就1、2成好了。

佢你可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

股票班共8堂，暫時優惠價：$8800。

------------------------------------------------

Q21215：

龔成老師你好，我40歲，睇左你FB 一段時間，另外都購買左你先前的網上課程，有得益。希望你能指導下。麻煩曬，長文

因為以前父母系股票輸左好多錢，多年前讀 U 就開始兼職賺錢供父母層樓，也一直都抗拒進入股票投資。
但幾年前開始有剩餘錢就學人抽下新股或短炒賺餐晏仔。

現時還繼續持有幾個蝕本股
3883，1916, 8511, 8313, 6886, 1932, 1227(呢個是父親的)

想問下應該蝕住放甘點？

另外上月開始月供3067, 暫時每月7000
還有1833, 6060, 386, 1786, 1299(都是2至3手)

成40歲最近我被裁，有筆20萬長期服務金。請問應該投資股票定放系供樓的高息戶口等跌市？

我同先生目前有2層樓，一層租萬5(月供5千到2016完), 一層自住(月供2萬8). 另外有150萬現金，股票40萬。我同先生月入8萬(我被裁前人工4萬), 但要供養4大長老同個女，經常性使費都大。

龔成老師：

首先你要明白一個概念，我地持有一隻股票與否，關鍵位是企業質素、前景，不要被買入價影響。買為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心。

如果企業無質素，但你現時蝕錢中，繼續持有只會令你財富繼續貶值，因此要賣出。

如果企業質素轉差，就有可能要減持，因為這股佔你組合的比例，未必值得太多。

中國奧園（3883）有質素可持有。
江西銀行（1916）質素一般，增長力不強，宜減持。
ZC TECH GP（8511）無乜質素，賣出較好。
杰地集團（8313）無乜質素，賣出較好。
ＨＴＳＣ（質素中等），可守住先，但增長力不強。
中漆集團（1932）質素一般，增長力不強，宜減持。
國盛投資（1227）無乜質素，賣出較好。

至於你「上月開始月供3067, 暫時每月7000
還有1833, 6060, 386, 1786, 1299」

基本上無問題，只是鐵建裝備（1786）質素不太好，宜賣出。

由於你現時有一定的物業資產，反而股票部分很少，因此應增加股票比例。

你$20萬應投資股市，但你投資知識與經驗不多，暫時只建議你月供股票，以及投資平穩增長股。盈富（2800）、港鐵（0066）、領展（0823）都可以。

你可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q21216：

龔sir，有啲野想請教下你
月供基金,我應該要留意啲咩

龔成老師：

首先，要睇翻該基金的投資範疇，投資策略，因為基金有好多種的，你要了解該基金投資的資產類別，是否你睇好的，長遠向好的。

另外，過往回報是否理想，比起大市時否較好或較差。

當確認有質素後，就可以投資，月供是一個方法。如果該基金不是在交易所上市，你就要睇翻有那些條款，會否要求你最少持有幾多年。

------------------------------------------------

Q21217：

老師好！本人50歲持有股票。

公用股：0003 6823 6.51%
REITS：0823 10.96%
醫藥：1177 4.23%
潛力金融：0388 15.54%
石油：0386 1.24%
家電：6690 2%

保險：2318 7.13%
電動車：0175 1211 21.38%
內銀：0939 1398 3988 21.38%
新資訊科技：9888 1.98%

另外以下基金：已供占10.81%
2800 月供$6000
3188 月供$4000

計劃每月買一手3033
已買了一手2845

1. 以上組合是否太亂？有什麼需要加減？
2. 想每月買入一手3069 3109？有咩意見？
3. 手上還有60萬現金，等機會？
多謝

龔成老師︰

1） 都有少少，最好組合數量維持係8-10隻，咁會較理想。

持股方面，都有質素，可長線持有。但你比重上，太偏係潛力股類（1177, 0388, 0175, 1211, 9888）。

佢地雖然有增長潛力，同時風險都較高，不宜持有過多。以你50歲計，潛力股佔組合20%左右好了。

現貨可持有，但未來時間，你要加大翻平穏增長股部份，慢慢令個組合平衡翻。

平穏增長股：金沙（1928）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）、長建（1038）

月供方面，同樣要作出調節。而你想投資恆生科技股ETF，我建議用安碩恒生科技（3067），佢費用成本會較低。

2） 華夏恒生生科（3069）主要係追蹤恒生香港上市生物科技指數之表現。

指數包含51隻成份股，當中有「藥品」、「⽣物技術」等公司。較為人熟識的，有藥明生物（2269）、京東健康（6618）、中生（1177）等等。

隨著人口老化和人均收入增加，對優質醫藥的需求只會有增無減。此股都有質素，可作長線投資。但你預佢會較波動，最好用月供模式儲貨，並長線持有會較好。

南方科創板５０（3109）都有投資價值，但成交比較少，會有機會買賣差價偏高。

但你要留意，這2隻都算係潛力型股票，以你年紀，不宜持有太多。

3） 現時大市只係合理水平，現金和股票最好各佔一半。若你持股總值已超過60萬，有手現金就最好等大跌市出現，才加大力度掃貨。

------------------------------------------------

Q21218：

你好，老師
35歲，家庭月入約6萬
每月儲到2萬
2小朋友讀緊幼稚園

持有以下，希望可以盡快儲到200萬作首期，買多層樓收租。不過，我都唔係好清楚當有200萬時，應該購樓收租，還是繼續投資股票？

農行：10萬股$3.38
建行：17000股$6.58
交行：10000股$4.9

9988 阿里：300股$463
快手：200股$402
中移動：1000股$53.8

總成本：70萬

另外可動用多50萬投資股票，請問投資方案應該係點？謝謝你

龔成老師︰

我地做財富增值，係要建立一個有不同優質資產的組合，除了股票，物業都係其中之一。

以你現時情況，由於現時資金較少，應先利用優質股去增值一筆財富，再買入物業。但同時間，必需留有一定數量的股票，作增值之用。

而這物業可以放租，用「以租養樓」架模式去運作。較詳細方法，你可以睇我本<5年買樓4步曲>。

你現時持股，主要有2大問題。首先，農行（1288）、建行（0939）、交行（3288）和中移動（0941）只係收息股，增長力好一般，不宜用來增值之用。

另外，你組合好集中係銀行股。記住，個別行業唔好佔組合3成以上，否則會有過度集中風險。

我建議你用「平穏增長股」 + 「潛力股」作組合，你可以慢慢將部份收息股，換至以下股票。

現在你每月5成儲蓄，去做月供，其餘先儲起，用一邊月供一邊儲蓄的策略。

大市現處於合理水平，那50萬資金和每月儲蓄，就等大跌市機會出現，才大力度掃貨，並長線投資。

------------------------------------------------

Q21219：

Hi 龔sir你好
我今年35歲 穩定職業
想每月供$5000落金沙、阿里、小米或比亞迪
是但兩隻可以嗎？
邊隻會前景好d?

龔成老師︰

4隻股票都係有質素，但我地做配置時候，都要考慮平貴、年紀等因素，去決定成個組合。

以你35歲計，建議你用「平穏增長股」 + 「潛力股」的組合，比例大約各一半。

現時比亞迪（1211）略貴，回到$120才可以月供。

金沙（1928）係「平穏增長股」，而另外阿里（9988）和小米（1810）係「潛力股」，你可以在當中2選1，去創建你月供組合。

現時大市只在合理區，每月儲蓄不要盡用。你要留有部份，等大跌市機會出現時，用來掃貨。

------------------------------------------------

Q21220：

龔sir,你好，我今年大約35歲，現有股票如下：

788@6000股 買入$1.16
1810@1400股 買入$24.59
1922@8000股 買入$5.1

2031@2000股 買入$16.63
3067@400股 買入$17.11
3718@12000股 買入$1.28

1）想問現有股票會唔會太多？同埋有無長遠投資價值？
2）1922，2031，3718可以長遠持有嗎？
3）想問下京東健康，阿里健康同平安好醫生嘅分別？邊個比較有投資價值？同埋長遠發展
邊個比較理想？有月供價值嗎？
謝謝

龔成老師︰

1） + 2） 數量上，唔算太多，長線維持8-10隻就可以。

持股方面，銀城生活服務（1922）上市時間唔算長，不確定性較大。而澳至尊（2031）質素只係好一般，2隻都不宜持有太多。

其餘都有質素，可長線持有。

3） 京東健康（6618）、平安好醫生（1833）和阿里健康（0241）都係有質素和潛力，業務上都非常相近。

但問題係佢地是有危有機的類別，雖然業務增長好快，但這刻仍處於燒銀紙的狀態中。估值上好困難，因為無實質的盈利數據作為基礎，市場只是估估下。

質素和值博率計，平安好醫生（1833）會較為佔優。但始終有一定不確定性，因此，低風險者未必適合投資，若投資者考慮這股，亦不能大注投資，買入後就耐心長線持有，等待這企業改變整個行業的情況。

現價算合理區頂，但好波動。你可以用月供儲貨，如直接買入，就只能小注。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q14101-Q14120）

Q14101：

阿sir，我是你的股票班學生，有d問題唔係好明，想請教下阿sir

1)優質股其中一個指標係總負債/股東權益<100%，但我見有幾隻你說有質素的股票都大過100%，何如北控水務(371) 總負債/股東權益就超過300%,中國飛機租賃(1848) 更差不多1000%，請問這代表了什麼?這類股票財務穩建嗎?

2)想問下現金流量表問題，我見到中國聯塑(2128)既經營活動現金流由16年到17年減左，請問這是反應他經營能力差嗎?還是其他意思?

3)我都有睇你既著作，但想問下我想學識解讀財務數據背後數字的意思及解讀年報，請問我可以睇咩書或途徑去學識?

希望龔Sir 解答，謝謝。

龔成老師：

1）我在課堂中，列出了一些選股的原則，你會見到其中有5個財務指標，以確認這股的優質度，如果企業能合符，當然最好，但如果唔合符，就要睇情況，去扣分。

其實，你在企業評估表中，會見到有得為企業評分，這會更準確去確認，一間企業的優質度，有時，若企業有某些特點，就算其他地方差少少，都可以勉強合理，當然，優質度會減，扣分是一定的。

你講出的例子都很好，北控水務集團的負債的確太高，因此扣分難勉。但由於涉及公共事業，加上企業有優勢能不斷取得項目，因此才能列入優質股，但已經扣分。

中國飛機租賃（1848），的確是負債好高，但佢的玩法，其實是賺息差，即是先借錢，利用借貸去買飛機，然後出租，因於租金遠比利息成本高，因此好好賺。

由於是出租模式，因此業務基本穩定，但由於負債太多，當中的風險也很高的，故這股不只要扣分，同時只能小注。坦白講，我認為這企業不適合低風險投資者。

2）佢經營現金流由$30億，減至$9億，的確是減少左，但我地分析這報表時，會睇多年，不會只著重一年的情況，因此，唔需要擔心這問題，佢有正現金流，反錢企業仍正面。

3）你睇巴菲特的書，坊間有好多，你盡睇，之後睇《證券分析》《智慧型股票投資人》。

------------------------------------------------

Q14102：

龔成，您好！想你給一些意見。

1） 恒生銀行是否屬於平穩增長型？
應否長期持有？

2） 應如何調整投資組合？本人持有以下股票。

2380 中國電力 1手@1000
0011 恒生銀行 6手@100
6886 華泰證券 2手@200
1299 友邦保險 1手@200
0005 匯豐控股 2手@400
1810 小米集團 1手@200
9988 阿里巴巴 2手@100
謝謝！祝生活愉快！

龔成老師︰

1） 這股以收息為主，而增長力都有，但就不算好強。如果你目標主要是收息，長線持有是可以的。

2） 先講個別股票質素，大致都可以。除了華泰證券（6886）質素較一般，可持有，但不要增持。

至於組合的質素，你本質上講，基本上都有質素的，問題不大，不過，在你這個組合當中，以價值計約7成來自銀行股（匯豐0005和恆生0011），而且2間銀行是有關聯，令集中性風險更高。同時，金融類（銀行、保險、證券）較多。

任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這樣會更好。

------------------------------------------------

Q14103：

你好龔成老師，我是一名學生和一名part time攝影師，月入大概3-4000左右不穩定，現有十五萬儲蓄，你認為一個收入不穩定，加上一個學生的人適合投資嗎？

我現在手持1810 8.45入 1186 8元 1731 0.45

龔成老師︰

其實越早投資越好，能投資時間越長，複息效果就會越明顯。

收入不穩定是一個問題，但你可以試下找一個較安全金額（如果你收入波動，並非每月都去到$4000收入，就下調到一較低金額如$2000，作為月供金額。），去做月供股票。

以你年紀，是財富增值的黃金時期，不要浪費。月供方面，由於金額不多，你可以直接全數做盈富基金（2800）。

現時大市只在合理區，而你現有15萬可以分成2半，一半先以分注形式投資在平穏增長股︰盈富（2800）、金沙（1928）、恆基（0012）、中銀（2388）、港鐵（0066）、煤氣（0003）、港交所（388）、長建（1038）、粵海（0270）、領展（823）或潛力股︰比亞迪（1211），中生（1177）或福壽園（1448）等。

至於餘下的一半現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

而你現有持股，意見如下︰

小米（1810） - 有潛力的，佢其實唔差，但這刻仍然未有似樣的盈利，因此估值困難，好難分析到佢真正的合理價。故建議可持有，但此股不宜太大注。

中鐵建（1186） - 質素中等，可持有，但不要加注。

其利工業集團（1731） - 此股上市不足2年，而且市值細。如果你有留意開我FB，我一向都新股半新股都無興趣，因為真實面要慢慢先見到，加上佢股價十分波動，估值困難，只建議小注，同時你要明白當中的風險。

------------------------------------------------

Q14104：

Hi，龔Sir，想問下隻華南城（1668），記得你書中提過依隻。

依隻股票想問仲有冇價值？我見佢股價不斷向下，而且佢收入方面又比較波動，加上佢想複製係深圳華南城成功既模型去其他城市，但又好似成效不大，令到佢只係處於不斷買地但難銷售既情況出現。

而且開始發展電商，但始終唔夠巨頭爭，話就話係叫商貿交易中心，但始終實體形式冇咁受歡迎，我扣除佢物業升值所得既盈利，大約預估佢市盈率10倍左右，但始終營運模式單一及簡單，所以覺得質素一般。

以依家既股價同佢每股資產值有好大折讓，但依啲只係會計上既數字，未必可以套現到，你點睇？

龔成老師︰

華南城（1668）佢業務係中國開發及經營大型綜合商貿物流及商品交易中心，為內地和國際批發供應商、買家、製造商及分銷商提供原材料和製成品的全面交易平台。

業務模式除營運這些大型的商品交易中心外，亦會銷售交易中心的商舖，成為主要的收入來源。

佢的收入來源可視為兩個類別，商舖物業銷售為一次性的收入，而收租管理等持續的收入，而銷售部分的收入，仍是華南城的主要收入來源，但要建立新的華南城才能帶動這部分的收入，而要選址及建立等都不易，所以華南城已難以高速增長，除非一帶一路有較多的機遇，但這仍充滿未知數。

中國以至全球經濟的放緩，再加上貿易戰等因素，都對其會有負面影響。其實此股本質不差的，只是佢近年的業務比過往有少少減弱，增長力不及從前，但其實基本的賺錢能力仍在。大灣區其實對佢長遠都有正面影響，因此都有投資值博率。

扣除佢物業升值所得既盈利後，合理市盈率大約值10倍左右，所以你想法合理。另個簡單些方法，就是用過往幾年的平均息率計，並要7%、8% 以上才考慮此股。

至於我地計算一間企業的價值時，會考慮資產價值與業務價值，而這兩個往往是配合的。

資產價值只是其中之一，我地唔能夠因為咁樣而買入。我地要了解資產的質素，當中的實質價值，因為這只是一個會計上的價值，我地仍要對其他數據和資料作出分析。

------------------------------------------------

Q14105：

成哥，我係你學生，你的筆計，及好書推介，令我腦袋開發唔少，堅謝謝你！

請問成哥，巴菲特的勝劵在握看完，下本看非常潛力股書定智慧型股票投資人書好。

成哥，期待你進階課程，及新書
謝謝成哥

龔成老師：

你可以睇《非常潛力股》，以及其他作者寫的巴菲特的書，《智慧型股票投資人》有少少深，你可以睇，但最好排後少少。

------------------------------------------------

Q14106：

成哥，855中國水務現價5.66屬於便宜，合理定貴？什麼價便宜價？對這股有什麼睇法？thx.

龔成老師︰

中國水務（0855）本質正面的，業務發展不差，生意保持理想增長，不過，負債是佢最大的問題，這令佢的風險度增加。

當經濟轉弱時，佢這類負債較高的企業，要對的不確定性會更高。佢股價不斷下跌，就是市場正常反映佢的風險度。

這股可以長線，但注碼不建議太大，同時你要明白佢股價仍會波動。現價合理偏低位置，再下調約1成會開始進入初步平宜區。

------------------------------------------------

Q14107：

你好,今年25歲, 月入18K, 每月保守估計可儲3000元左右。現持有2手中銀香港2388, 3手煤氣（0003）—2手16.8入,1手14.74入。

現時亦供緊1份危疾保險,1份人壽保險。應留有更多現金等入市，還是可以月供股票2800，又或再投資儲蓄險避險?謝謝。

龔成老師︰

現時大時只在合理區，我地會用邊入市，邊儲錢的策略。

你可以將現時每月儲蓄$2000去月供盈富（2800），餘下的資金先儲起，到大市大跌時，才用來大力掃貨。

至於保險，這是理財中其中一部分，買保險的原理就是將風險分散，將風險轉去比保險公司。

至於買多少，則視乎個人需要，我則建議買「最基本」的就需，唔需要多。因為只要做好基本的防守，餘下我地就應集中力量去進攻。

------------------------------------------------

Q14108：

成哥，一直有睇開你post 好多謝你教導，想問下 點睇5G科技 1729 同 552 ，會係將來既倍升股嗎？

龔成老師︰

匯聚科技（1729）主要以合約製造服務，照客戶提供的規格及設計，從事生產電線組件。

而電線組件為一個包含一條或以上電線的裝置，表面被銅線或光纖包著，而末端則接駁連接器；連接器與其他電線或設備互相連接，及用作發送傳感器信號及傳遞有關操作的信息。

佢的電線組件產品可按傳輸媒介，分為銅製電線組件及光纖電線組件兩類。電線組件可應用於電訊、數據中心、工業設備及醫療設備。

5G都會間接令佢有受惠，但就不夠直接，同埋公司好細間，未見有獨特優勢，就算行業發展，佢都不一定取得較多份額。不過正正企業不大，因此有發展，可說是有危有機的類別，如投資，只能小注。

中國通信服務（0552）本質唔錯的，佢係中國電信（0728）的子公司，是中國一家具領導地位的服務供應商。

佢的主要客戶包括國內電信運營商客戶，以及政府機構、行業客戶、中小企業等國內非運營商集團客戶，亦有海外客戶。業務範圍包括電信基建服務、信息技術設施管理維護、軟件開發及系統支撐、增值服務及其他。

基本上，業務好穩定。而係佢過去的購務數據，亦見到這一點。相信5G的發展，點都會對佢有利。但預期佢唔係倍升股類，只會是平穩增長類型。

------------------------------------------------

Q14109：

龔sir, 你好，請問1109咩價位可入？ 此股是優質股來嗎？謝謝你！

龔成老師︰

華潤置地（1109）係華潤集團旗下的地產業務旗艦，是中國內大型綜合型地產開發商，主要業務為物業發展、投資及管理、建造及裝修的服務。業務本質不差，生意與盈利都保持增長，有投資價值，相信長遠不錯的。

但要留意翻佢負債偏高，是風險所在。雖然國內好多同行都有這情況，這企業已經不算嚴重。

不過，從風險角度分析，負債始終會令這公司扣分，因此投資時不能太大注。整體都有投資價值的。現價合理，分注就得。

------------------------------------------------

Q14110：

我現時持有的股票 恆生銀行 25%，載通 10% ，新創建15% ，中電15% ，領展15% ，交通銀行 10% 長實集團 10% 其中新創建 表演最差的 平均價要13 左右入
有什麼建議 可以調整 股票組合嗎？ 謝謝！

龔成老師︰

首先你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

新創建集團（0659）有質素的，佢係是新世界發展（0017）的基建及服務旗艦，業務遍及中國內地、香港、澳門。

佢質素算是不差，但又未到最高級別。近期賺錢能力略有下降，加上企業本身已很龐大，如果你目標是收息的話，可以繼續持有。

你組合中股票都有質素，但增長力唔會強，如果目標是收息為主，以上組合無問題。

------------------------------------------------

Q14111：

老師 陽光房地產$5 抵唔抵入呀

龔成老師︰

陽光房產（0435），是不錯的收息股。其投資於香港的寫字樓及零售物業。

寫字樓分佈於中環、灣仔、上環、尖沙咀等地，而零售物業則位於上水、將軍澳、元朗等。寫字樓與零售的所佔的比例，以估值計大約各半。

從長遠及超長遠的角度看，香港的寫字樓及零售市場會處於求過於供的格局，故長遠租金仍會平穩上升，因此有投資價值。

從長遠及超長遠的角度看，香港的寫字樓及零售市場會處於求過於供的格局，故長遠租金仍會平穩上升，因此有投資價值。

以現價約$5計，股息率已有近5.5%，已具有長線投資價值，可以買入。

------------------------------------------------

Q14112：

龔成老師你好
想問一下維他奶跌到依家28蚊 可唔可以買？算唔算平？

龔成老師︰

維他奶國際（0345）是很不錯的優質股，這股在兩年前出的《50優質潛力股》，已推這股為優質股，更有「4分」的小數高評分，可見有一定的優質度。

這股前景正面，但這股比當時推介時，已上升了倍幾。雖然最近有明顯回調，但現價依然處於少少貴的水平。

你可以再等佢回落多10%，讓股價重回合理區，你才開始慢慢分注入貨，咁會比較好。

------------------------------------------------

Q14113：

龔成老師，請問 1628 禹洲地產值得長線投資嗎？是屬於收息股還是潛力股呢？

龔成老師：

禹洲地產（1628）主要於中國廈門、上海、福州及合肥從事物業開發、物業投資、物業管理以及酒店業務。

近年的業務增長不錯，但負債問題比較令人擔心，如果中國樓市逆轉，對佢打擊唔少，股息亦會明顯減少。

如果真的投資，不是不可，但不宜投資過高金額，長線投資都可以，由於業務有潛在不穩定，因此不能視為收息股。

------------------------------------------------

Q14114：

成哥對啟明醫療呢隻新股點睇呀？

龔成老師：

啟明醫療（2500）這類半新股，會比較難分析，因為資料較少，加上初上市股價有可能波動，要小心。

講翻基本面，佢係中國的經導管心臟瓣膜醫療器械企業。
根據資料，按2018年TAVR產品植入量計，集團在中國的市場份額為79.3%。其自主研發的產品VenusA-Valve是首個獲NMPA批准及在中國進行商業化的TAVR產品。

佢係2009年創立，專門從事經導管心臟瓣膜產品的設計、開發及商業化，開發出一個全面的產品組合，涵蓋四個心臟瓣膜的經導管解決方案及主要配套產品。

隨著於2018年12月收購Keystone，集團亦在產品組合中新增一款處於臨床階段的主要CEP裝置－TriGUARD3。

目前，佢擁有389項專利及專利申請，其中包括中國93項已公告的專利及60項專利申請以及美國及歐盟等主要海外市場100項已公告的專利及136項專利申請。

但要留意，雖然佢業務增長力唔差，但企業規模細，未有正式的盈利，風險高。前景不算差，如真的投資，小小注都可以。

------------------------------------------------

Q14115：

老師，我打算買樓，但我大部份資金是做定期，只是少部分買收息股！不過，增值唔到！儲蓄更難因租金昂貴！

所以......不知應該怎樣令資金増長？

龔成老師：

你先要計翻，你打算幾時買樓，有無一個大約的目標計劃，如果在2年內，你就只能保守，儲現金。

但如果在3年以上，就可以多少少增值，投資平穩增值股，例如盈富（2800）、金沙（1928）、長建（1038）、中銀（2388）、港鐵（0066）、恆基（0012）、港交所（0388）。只要唔好用盡現金就得。

所以，你先定一些方向，計下自己要點做，有無具體的計劃，唔好無計劃，以為儲左先算

------------------------------------------------

Q14116：

Hi 成哥 我聽聞投行唔用技術分析，但係佢地又唔似用價值投資，好似用d類似趨勢投資，想問你知唔知佢地具體用咩方法？

想睇下有冇參考價值

2. 同埋想問咩係量化寬鬆

龔成老師：

基本上，基金公司、投資銀行，絕大都唔會用技術分析，這只是財演先用，無知散戶先會信。

投資銀行，有些會以基本分析作基礎，佢地會分析經濟基本面，企業基本面，然後再配合較近期的情況，行業發展、趨勢、資金流等。

其實佢地都會根據好多經濟與企業的基本面去做決定，但就比較中短期，未必以長期作原則，例如中短期經濟轉弱，佢會計算對企業中短期基本面的影響，從而在組合中作出調整。但如果是長線投資，則不會理中短期因素。

至於量化寬鬆，簡單來說，就是利用印銀紙、放水、增加市場資金等方法，即是形容一個較寬鬆的貨幣政策。

由於過去10年不斷進行，所以令銀紙的價值大跌，資產價值大升，這是必然會發生的事。

------------------------------------------------

Q14117：

龔Sir，我想請教一下：
近來借了稅貸，港幣30萬，還款期一年，每月定息定額清還。

我沒有特定的使用方向，目標是想用作投資。
這樣“短”的情況下，你有何高見呢？

龔成老師：

這類借貸投資，是創富方法，但都有利有弊，你一定要明白這點。

首先要考慮你本身的風險情況，你負債會因此而增加。當然，負債不一定有問題，但你要考慮自己的年齡、情況、風險承受能力，去決定是否增加這負債。

現時低息環境，如果你的「實際年利率」不高，投資一些收息股，已能取得一定的息差回報。不過，股票的價格總有上落，你如何保證不會出現「賺息蝕價」的情況？

這正正是你要思考的問題。

由於現時收息股及其他類別的股票，暫時只處合理區，未到平宜區，你好難確保不會出現「賺息蝕價」的情況，因此，這刻做加按買股的值博率，只屬中等。

如果大市處平宜區，那你投資，蝕價的可能性就會較低，你這動作的值博率就會大增。

因此，現時借貸買股，不是不可，但值博率只屬中等。而由於這筆錢增加了你的負債，因此不能太進取，你只能投資平穩增值股及收息股類別，同時最好有部分留跌市後先入。

------------------------------------------------

Q14118：

一隻股冇永遠大紅大紫，好似騰訊咁，400個位應該沽，買股票無須永遠，高位要“沽”，對不對？

龔成老師：

其實，我地好難完全掌握到這情況。

騰訊（0700）由幾蚊上市，升到$10應該沽？

再升到$50應該沽？

再升到$100應該沽？

再升到$400應該沽？

要小心一個馬後砲的邏輯問題，回頭看，總認為應該在某些高位賣出，但如果心裡經常都想著賣出，就會錯過了上升100倍回報的機會！

所以，我地應該還原基本步，如果企業有質素的話，可持有，這與升多少無關。

如果你組合中，想投資高增長的話，當騰訊去到了近年，見到佢增長減慢，可以賣出部分（但不建議全部賣出，因為佢到現時，不是無增長，不是無質素，只是增長減弱左）。

雖然我地會因企業的質素與增長，而在組合的比例作調整，但如果你只想「高位賣出」，你好易會與大部分散戶一樣，在股票升少少的時候賣左，而錯過了100倍回報。

因此，你一定要理性想想這問題，如果真正做到投資高回報，而不是如一般散戶馬後砲般，認為某些高位要賣出。

------------------------------------------------

Q14119：

龔老師，我在儲蓄路上遇到些問題，希望老師能賜教。

現時我月入兩萬二，供樓一萬一，家用給四千五，另外保險、稅金等，大約每月需儲起二千作應付。每月的可用金錢大約只餘四千五。

因買了樓，預留了大約二十萬作還款的應急錢。手頭可用現金則只餘大約四萬。

因為希望三年後有約七十萬結婚，請問老師，我該如何增值呢？

另外老師可否分享一下出糧後資金流向步驟？我現在是：
（1）出糧戶口收到人工
（2）從出糧戶口轉錢往供樓戶口
（3）將每月零用額（4500）減去當月卡數，把餘額由出糧戶口 撥向 消費戶口
(4) 如果第三步計出餘額是負數，則不撥錢往消費戶口。或當消費戶口向出糧戶口借錢，下月再還錢回出糧戶口。

實行近一年以來，儲蓄額好像並不如預期，而且常常被大額消費（如朋友結婚的人情、旅行）打亂陣腳，請問老師我是哪個步驟/思維出錯了？我應該如何調節自己的思維呢？

有勞老師

龔成老師：

其實上述的步驟，好個人化的，你只要有一套適合自己的方法就得。

你上述的過程，無問題的，你照方法做就得。

不過，你習慣以信用卡消費，每用以「找卡數」去取替了每次比現金的支出感覺，這會失去了一總聯繫，即是你消費的一刻，無左「支出，減去」的感覺。

我建議你每日記低支出，當用信用卡的一刻，就是消費，你就要做記數，每月睇翻自己的消費是否合理。

如果你要做到儲蓄目標，就要有更大的決心，如果你經常被外界因素打亂，就是你目標不夠強烈，決心不足夠。

如果要進擊少少的方法。首先，唔好再用信用卡，另外，每月從出糧戶口轉錢往供樓戶口，再將想儲蓄的數，轉去一個不能動用的儲蓄戶，令你餘下的現金好少，而你只能用這刻現金。

這方法是「先儲蓄，後消費」，而你之前是「先消費，後儲蓄」的。

------------------------------------------------

Q14120：

請問698 質素係咪麻麻地，698 & 285 都係手機相關股，但698股依然喺低位。

龔成老師：

通達集團（0698）質素算是中等，雖然佢過往的財務數據不算差，但業務正受大環境影響，這點都要考慮，亦反映佢的生意保障程度並不是太高，由於這點，在估值時都要調低翻少少。

相信佢業務中短期仍會較弱，但長遠相信會受惠5G因素，因此又唔會話好差，但未必會用強來形容。

如果以質素來講，比亞迪電子（0285）當然好好多，研發能力，發展，業務上都較好。

----------------------------------------------

多謝各位提問，若然你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網的，當然，會將發問者的身份，以及有關個人的部分刪去。

另外，由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。