《幻愛》：我真係好撚鍾意香港？/！

《幻愛》劇情之所以觸動香港觀眾，叫好叫座，原因在於香港民族已經開始質疑個人主義同現代愛情觀，受對香港嘅愛所刺激，深入思考愛嘅本質。即使導演功力距離以游刃有餘去形容都尚有大段距離，亦明顯唔係有意識咁引導觀眾反省上述兩者，但當愛已經因想像而湧現，如何令想像同現實結合，繼而生出擁抱命運嘅勇氣，大多數香港人仍然係迷惘。過去大家都唔會以政治觀同對香港嘅想像為擇偶先決條件，但而家對家國具有使命感嘅同路人之間就份外容易擦出愛火——正因為掌握虛無飄渺嘅愛情同承認民族情感確實存在都極具難度，而香港人終於行到呢個為情所困嘅心理關口，嘗試去諗愛為何物嘅電影因而就某程度上回應咗情香港民族嘅集體困惑：點樣對待香港至係真正嘅愛香港。

只有精神世界開闊嘅人，至會領略到無形嘅愛其實有形，而民族情感永遠都係由每個家庭同每段關係延伸而成。人若然生於缺乏愛嘅家庭，又無法憑自身努力擺脫家庭嘅影響，最後擇偶往往難免陷入又一個輪迴，導致悲劇一直重演，但若然突破得到舊有認知，愛就會如同奇蹟降臨人嘅身上。家庭係人生嘅起源，亦係每個群體嘅起源，但唔同文化係有唔同嘅家庭維繫方式，以華夏食人族為例，擺明就係空談家人關係，實則互相利用，危難之時即出賣殘殺以自保自然合理不過，可見有家庭唔等於明白愛。所以，要了解愛嘅本質，首先就要剖析自己受原生家庭同時代精神影響之下所形成嘅所謂愛係咪真係可以稱之為愛。

戲中葉嵐嘅背景相當典型，人盡可夫，源於自我嫌棄，而自我嫌棄一經探索，其實係壞榜樣壞家教所造成。當一個小朋友無法從照顧者身上獲得愛，佢就會首先失去自愛嘅能力，然後再失去輸出愛嘅能力，最後就會喺擇偶路上不停錯愛，不停撞板，葉嵐向志樂形容自己係自甘墮落而非他人所迫正係常見嘅自我描述。然而，已經愛上葉嵐嘅志樂則認為墮落並非葉嵐故意為之，喺葉嵐情緒失控嗰一幕，由憐生愛嘅人性魔法再次閃現，亦呼應咗志樂當初相遇第一眼就認定葉嵐嘅原因——當路人都對精神病患者阿玲落井下石，葉嵐挺身保護弱者，人性光輝瞬間令本來生活平淡嘅志樂見到前所未有嘅希望，於是成為愛嘅起點。

阿玲一角之安排自然屬於偶然，但偶然亦有另一詞語可以代替，又名緣分。緣分令人相聚於某時某地，但有共同經歷係咪就必然引發出慈悲之心，進而滋養出共生關係，化成生死與共嘅羈絆，則視乎愛之深淺。路過目擊陌生人阿玲失控，葉嵐大可以直接無視（讀心理學唔等於要喺生活中知行結合），但佢就係拒絕咗視而不見，選擇同志樂一齊行善，呢個選擇就成為咗志樂患上所謂情愛妄想嘅起點。相處考驗人性，困難放大人性，志樂經歷喪母之痛之後見到人性光輝即心生愛慕，其實係任何需要心靈慰藉同富有想像力嘅人身上都有可能出現嘅心理現象。

富有想像力係人類最異於其他物種嘅特質，家庭、愛情、契約以至國家其實都係缺乏想像就無法存在之概念，所以志樂幻想出名為欣欣實則係葉嵐嘅女朋友角色以自我滿足，同樣可以係實際存在，只係當自身想像無法獲自己以外嘅人接受，先至形成所謂精神病。一般人熱衷談論擇偶條件，又會以明星偶像為理想對象，其實都係種種超出現實嘅幻想，只係大多數人都唔會因為現實不如意而失控，因為對方發展戀情而做出異常行為。戲中志樂活喺自己世界其實可以相安無事，直至葉嵐本人進入佢嘅世界，佢至迫於無奈要面對所謂現實，而現實最殘酷之處從來在於無數個體其實都未認清自我，所以即使成為咗他人嘅另一半，甚至身分已經透過婚姻正式轉換為法律上嘅伴侶，個人幻想總會同呢段關係同時存在，而失控同平衡嘅界線係在於個體要將個人幻想放到幾大，於是人就難免傷心失落，陷入難以排解嘅痛苦之中。由此可知，幻愛既係快樂嘅源頭，亦係痛苦嘅源頭，而要唔要為避免痛苦而索性徹底放棄與人相交至係建立關係最難嘅地方。

人類絕對有離群索居嘅自由，但人類歷史上從來都未有只得一個人嘅社會出現過，因為人類脆弱嘅生命只有透過與人結交至有可能獲得保障，而想像力正係形成家庭、村落、族群以至國家嘅關鍵。成人見幼嬰哭鬧而心生憐愛係本能，成長之後繼續以同理心關懷他人則係護養本能，對符合自己內心需求嘅他人心生好感往往都係本能驅使，而呢一切其實都可以用幻愛去形容，只係大家普遍唔會認為同理心係子虛烏有。人類隨西方文明進入現代之後，過去綿延千萬年嘅濃厚宗教信仰氛圍自高處下跌，粉碎一地，人人都唔再相信上天旨意，誤以為一直追求激情就等於愛，更以為絕對自由同個人主義高於一切，結果就令到政治婚姻、媒人牽線、命中註定呢類詞語蒙上污名，人人為尋找真正愛情而對所謂迷信傳統避之則吉。

事實上，因兩個家族擁有共同目標而結合唔一定係迂腐，因為需要改革嘅只係拘泥於門當戶對而罔顧個人心意嘅舊俗，而相信朋友眼光而接受朋友介紹亦唔一定係老套，因為大家都會處於同一社交圈子即係代表有類似價值觀。當教會權力無限腐化，社會只重視關係所附帶嘅實利，天意自然會受到權威所扭曲，但天意本身可以係神聖如初，出錯嘅只係人類嘅一念之差，而非人心本身。志樂同葉嵐嘅偶遇，固然係社會經歷完個人從家族中徹底解放嘅巨變至會發生，但解放過後，人類社會始終需要家庭，人類心靈始終需要穩定，人類愛情亦始終需要神明追認。存在本身固然係孤獨，令人有如長期處於失重狀態，但正因為孤獨如影隨形，人類於善用本能去建立社會關係同想像世上有神去令生命變得有目標有意義，擊退孤獨——直至進入二十世紀，唯物主義大爆發，西方文明將人類引入集體虛無，孤獨至以惡魔之姿雄霸一方，將人類對美好生活嘅想像空間完全抹殺，突然大幅倒退至由叢林法則支配嘅荒涼世界。

華夏接受共產主義，並非因為共產主義強大，而係因為華夏食人族文化所及之處，本來就係一片荒涼世界。面對華夏文化經過一百八十年之後嘅首度大舉大侵，香港人已經演化成香港民族，而首次發現民族情感嘅衝擊，難免令大家擔心同心同德都係幻覺，唔敢隨便投入民族主義浪潮之中，接受想像同現實竟然真係可以二合而一嘅天命所歸。呢種遲疑喺現代人嘅愛情之中其實不停發生，大家尋覓然後結合，結合然後質疑，質疑然後放開，但放開之後又繼續尋覓，其實都係因為唔敢既感性而又理性咁去愛。將呢種患得患失之感置於香港人身上，明顯就係大家已經見到彼此已經因為手足之情而選擇齊上齊落，發現共同體愛得深刻，但喺良性循環將要更進一步之時，又擔心短短一年唔足以驗證情感真偽，緣分會轉瞬即逝，如夢幻泡影。《幻愛》劇情之所以引起香港觀眾共鳴，正係因為香港民族喺大時代之下開始排清華夏餘毒，同時對自身存在提出質問：如果眼前一切都只係幻覺，改變世界都只係幻想，但又真係感受到自己內心嘅渴望，咁到底應該要忠於自我，堅持直到最後，定係當係病態，食藥逃避了事？

睇返人類社會常態，其實自身價值觀越係清晰嘅人，係越容易吸引到傾慕者，亦越容易探測到理想對象。千萬年前，人類居於小型部落，要自立一定要習得前人代代相傳嘅社會共識同求生技能，過到成人禮嘅人都係有資格成家立室嘅人。然而，當人類一步一步前進，行入現代社會，大多數人喺成長之後反而生活得比游走山林嘅祖先更加痛苦，面對更多難以忍受嘅社會壓力，陷入情路坎坷之境，究其原因，都係因為童年陰影阻礙現代人搵到適合自己嘅愛人方式，而見人拍拖自己都要拍拖嘅同儕影響又驅使大家低估愛情之難度，結果往往就係慘淡收場，甚至兩敗俱傷。現代人缺乏信仰支撐，又難以認知到原生家庭教養方式可能有問題，結果就只可以靠自己去陪伴自己長大成人，捱唔住社會教化嘅人就只可以封閉自己或者直接了結生命。愛己愛人、群體價值同埋自成一體嘅世界觀三者皆非容易掌握之概念，所以香港人從民族主義之中搵返生命嘅活力，生活嘅方向，於是逐漸發覺愛情其實都需要以護養彼此靈魂為追求，思路完全順理成章。

思考人生，從來都係思考社會未來嘅第一步，因為社會係由人結合而成，而民族則係由有愛嘅家庭組織而成。面對精神困境，個體從來只可以逆來順受，但有積極聚合嘅群體支持，就可以借他人之力去治癒自身之痛苦，民族之所以自動自發互助互愛，道理其實如出一轍。火花四濺嘅愛情，可以係因一剎那嘅慈悲而生，未可稱為真愛，而一生一世嘅關係，則係要用無窮無盡嘅勇氣去維繫，而呢種勇氣正係人類可以懷有理想同希望嘅可再生燃料。當想像共同體已經成真，大家更要鼓起勇氣去信任所愛之人永遠值得愛護，只要喺患難中繼續互相扶持，新關係總有一日會撫平舊關係所造成嘅創傷，而幻愛終有一日亦會化為真愛，最後改寫歷史，鑄成天命。

https://gnimmm.com/2020/07/07/beyond_the_dream/

《花椒之味》：香港民族P牌建國心理戰

香港電影永遠承載香港人之集體意識，不論創作者係有意識接收然後加以轉化，抑或只係無意識透露內心想法，文本呈現都有討論嘅價值，以自己方式合理解讀都係觀眾嘅職責。由鄭秀文主演嘅《花椒之味》表面上係講因為生父離世而引發嘅家庭關係思考，但實際上係講緊主角如何面對過去，認清只有獨立至係快樂之路嘅故事，因為個體人格獨立，處理好自身情緒同家庭問題，從來都係民族健康獨立嘅首要條件。放眼東亞，觸目皆是尚未健全之民族主義，日本有日本人之堅不可摧但精神分裂，韓國有韓國人之長期受壓而強弱不定，而台灣則有台灣人之溫吞猶豫因而顯得行事迂迴，香港民族反而係包袱最輕而起步點又相當高嘅民族建國P牌仔。家庭乃係社會嘅基本結構，情緒則永遠係人類嘅長期困擾，梳理清楚，相信觀眾自然會明白到麻木過後更要精進嘅道理。

喺分析鄭秀文飾演嘅主角之前，首先要為香港人已經唔再留戀過去而拍掌，因為戲中由鍾鎮濤所飾演嘅生父，既非象徵英國，亦無意暗示華夏，直接指向大約成長於七十年代嘅香港人。嗰一輩人仍然未學識何謂愛，只係盲從社會主流去成家立室，但又成世人都唔知自己想要嘅係乜，對於家庭只係情義嘅載體呢一點，可謂近乎無知。佢不擅溝通，對曾經有過嘅三個家庭都不負責任，對主角嘅付出亦極之廉價，就連間餐廳都有經營不善嘅問題。呢類人喺香港其實相當常見，佢地遠離華夏食人族，喺香港土生土長，逐漸享受到自由嘅好處，亦意識到善待他人之必要，但始終未理解自由所附帶嘅義務，亦未明白善良首先要施之於家人，至可以推恩於其他人。於是，生父嘅形象即刻變得鮮明而容易理解：做老公做得失敗，係因為佢對愛情同親情都未有深刻體會，由始至終都係顧及自己感受多於家人感受，不斷轉換對象逃避現實，因而無法獲得三個血親嘅衷心敬愛；而做老闆反而過得去，則係因為佢對自己都係缺乏要求，所以自然接受餐廳嘅分工混亂，亦輕易接受他人未有完成崗位職責之事，結果就滋養出唔算深厚但尚算融洽嘅僱傭關係，獲得外人眼中嘅好人形象，如此形象連貫而完整。

因此，主角喺生父病死後，湧上心頭嘅只有一時迷惘，而非悔不當初，因為生父之失德失格，無論如何都已經係既定事實，亦係主角嘅切身體會。三個角色因為喪禮而聚頭，一齊發現生父之面目模糊，正係佢地建立友誼嘅契機。呢種實際上只係新友情嘅疑似姊妹之情，因血緣而起，但絕非因血緣而建立，事關友情之所以形成，完全係因為佢地三個從共同經歷之中發現大家都係努力尋找自我嘅人。生父令佢地誕生於世上，但從來未有肩負應有之責，所以佢地都係靠自己成就自己——如樹之自知，反映於佢對婚姻有所追求，拒絕未婚夫「我可以結婚」而非「我想結婚」嘅思維混亂，一幕已收以小見大之效；如知改名換姓，精進球技，咁啱遇到事業樽頸而陷入低潮，但最後都發現自己精進嘅榜樣原來係一手湊大自己嘅媽媽，生父廉價支持根本可有可無；而如果就係相當典型嘅一類中國青年，因出國留學而稍為恢復善性，識得飲水思源，再次驗證婆孫關係已經走出華夏食人族自相殘殺之傳統，釋懷收場。香港人、台灣人、中國人三個角色各自步入成長下一階段，都係因為自己諗通，而生父只係佢地人生之中曾經存在而且有待整理嘅一小頁，影響之微小，近乎波瀾不興。

香港人成日假定台灣比香港更有條件獨立，但事實係香港同台灣都各自面對緊獨立之路上嘅唔同處境，而台灣民族組成比香港民族複雜，共識因而更難凝聚，自然仍然處於一種心態上獨立但仍然無法輕易回答出「何謂台灣民族性」嘅狀態。戲中如知酒後哭訴，「如果我們很努力了，但世界沒有因此而更好的時候，怎麼辦？」反映嘅係佢仍然未達到專業運動員應有嘅心境，獨自面對結果，受一時成敗所困擾。戲嘅中段，如知母女發生爭執，由於尚未察覺到生父之廉價鼓勵只係自己幻想補完而成，如知一度以生父更識得講好聽說話去刺激媽媽，令媽媽相當傷心，但到最後佢都係明白到媽媽至係願意同後生共同成長嘅好家長，只係表達方式不當，而生父則係長期缺席，從未愛過自己——隔住電視睇佢桌球比賽，已經係生父唯一願意付出嘅所謂父愛，視佢為曱甴，可謂合情合理。對照如樹始終堅持生父確實係傷害咗大家而拒絕認陌生人為父，如知仍然會因為所謂血緣紐帶而同後父保持距離，自我尚未完全確立，甚至仍然未意識到自己之所以成為後來嘅自己只因受媽媽言行身教而耳濡目染，角色成長又隱約折射出台灣民族之困局。

主角對生父有相當清晰嘅認知，花椒之味不痛不癢，正如佢對生父嘅感情只能止步於麻。由未婚夫變成好朋友（劉德華飾）之後，好朋友繼續堅持如樹生父確實愛過如樹，因為佢自己對如樹所抱持嘅正係類近嘅情感，但如樹清楚知道，愛應該光明正大，可以宣之於口，double negative之修辭，已經係婚姻隨時觸礁嘅預警。認真對待婚姻，寧缺勿濫，其實係香港人剛烈民族性於愛情方面之體現，睇喺旁人眼中或者顯得港女，但如此愛情觀絕對比戲中任何人都要成熟，至少佢自己遇唔到真愛，佢都唔會禍及無辜。而麻醉師（任賢齊飾）之出現，亦有突顯出如樹的確頭腦清醒嘅烘托之效，因為佢欠缺明確目標，遠赴敘利亞不過係憑空想像，不切實際，實際上佢只係喺目前工作崗位感受唔到工作嘅意義。而且，佢一時又鼓勵如樹揸大膽車，一時又斷定如樹唔適合揸車，忽然又慫恿如樹退而求其次唔好堅持自駕遊，角色飄忽不定之特質顯而易見，同一心考好車牌嘅如樹又再形成強烈對比。概而言之，如樹之所以同前者無法成婚，同後者亦無法擦出火花，並非因為佢諸多要求，而係因為佢好清楚過好自己一個人嘅生活，好過因為不甘寂寞而隨便進入一段未必值得經營嘅關係。

於是大家不妨回顧電影開首，如樹係點樣應對cold call同埋婚姻不忠嘅客戶。接到cold call，一般人嘅反應多數係唔聽、直接收線或者真係中招入局，但如樹則係對答自如，令對方知難而退；聽到對方訂機票酒店同第三者出遊，一般人可能會有批判嘅神情，但如樹已經散發出見慣不怪嘅氣場，亦懶得同同事分享，足證佢具有相當消化能力，達到花椒程度。然而，大家必須留意嘅係，如樹之麻木，大異於佢生父之麻木，因為前者係因敏感而麻木，而後者則係因膚淺而麻木，兩人價值觀係截然不同。如樹重視溝通，通情達理，進退有度，麻木一面只係顯示於對待俗務同唔合格嘅人，三個角色合力研發配方之積極聚合，自強不息，正係如樹有血有肉之明證；而由一開始坐喺副駕，去到揸大膽車，再去到結局P牌上路，亦係如樹未有死於習慣而且自信未有受挫嘅例子。P牌代表嘅係通過考試，淨返嘅就係路面實戰，而只要交通規則有法可依，自由之旅自然一路順風，隨心所欲。

香港民族自主權移交之後，亦有飽受華夏食人族風尚衝擊而顯得麻木嘅傾向，一度失去活力，失去自我，但發洩過後，總要成長，至係香港民族內心深處嘅樂天本質。如樹知道生父唔可靠，但亦唔再苛責，因為佢明白命運自有安排，所以專注做好自己，但求問心無愧，就如同香港民族新生代亦已經唔再忙於埋怨上一代人安於逸樂，不思進取，因為大家都已經知道所謂泛民左膠都係全體嘅共業，承受得起，至會進化成更好嘅人。香港上一代人身處於佢地嘅時代，置身於佢地嘅空間，總難免受到局限，民族建國思潮自然不成氣候，但香港民族初生代因理解而成長，已經唔再停留於過去嘅麻木，而係趨向緊自主嘅積極。一年過去，如樹再次目睹大坑舞火龍，睇透上一代人好逸惡勞自有前因，發現自己亦有好逸惡勞之民族特質，但佢已經意識到好逸惡勞本身並非壞事，因為有目標嘅人自然會為尋求樂趣而付出，而更廣闊嘅自由天地，只有勇於開拓嘅人至會成就解鎖。香港人從來都係貪玩易悶，抗爭要多變，要流動，要靈活，但正因為有反省，有承擔，而且身受其害，大家都因而認知到只有獨立至可以保衛福地樂土——天高海闊任我行過後，始終要有家可歸，而屋企代表重門深鎖定係安身之所，完全係在乎人嘅選擇。

香港獨有嘅歷史軌跡，令香港人必然成為香港民族，故此獨立建國唔係唯一出路，而應該係快樂之路。如果大家只係想像獨立係不得不選擇嘅路，以無路可退嘅心態去接受獨立主張，咁就會成日落入灰心喪志嘅境地，因為獨立根本唔係active choice。然而，香港獨立事實上就係一個順理成章嘅active choice，大家只係怕P牌建國之後又再經歷辛苦而裹足不前，但若然大家真正明白到人格獨立同民族獨立嘅關係，亦有能力想像建國之後自己可以如何自處，咁獨立就唔會係超重嘅負擔，而係無窮嘅樂趣。麻辣火鍋之味之難以複製，源於生父因曾經錯過而加入紅酒調味，而主旨花椒之味應該如何感受，如何運用，則在乎香港民族觀影之後帶走得到幾多刺激，幾多領會。反送中之後，大家知覺唔再麻痺，方向日益明確，民族建國則係下一個心理關口，只要過到，光明好快就會重臨香港，重臨東亞。

https://gnimmm.com/2020/05/25/fagara/

淪陷區內準備反擊之心理準備

今時今日，普遍民眾都已經意識到抗爭已經升級為持久戰，因此更應該意識到每次動員上街都唔再係所謂社會運動、公民抗命，而係應當納入香港獨立戰爭框架之內看待思考。香港民族嘅中期目標已經設定為引爆中國解體，建立屬於自己嘅民族國家，得享真正自治自主，差嘅只係社會共識成型，但成型總係需要時間。與此同時，喺目標達成之前如何以最理想心態備戰應戰，保持周旋到底嘅韌力，則係大家可以自我激勵嘅思想練習。光復香港，固然係值得關注嘅口號，但要成就時代革命之壯語，大家首要做到嘅係消化光復之憑據，民族之形狀。若然大家尚未接受到香港民族呢個概念，亦未認清抗爭嘅中期目標，咁樣社會共識形成嘅速度就會停滯不前。

關於抗爭同戰爭，大概係受香港教育同社會文化所局限，接觸得太少中國歷史以外嘅成敗史例之故，部分香港人往往熱衷於以毛澤東嘅鬥爭理論去裝備香港民族嘅思想武裝，誤信以怪物姿態對抗怪物就會獲勝。所以，我在此必須一再強調嘅係：第一，要講操縱人心，蘇聯嘅列寧主義更有成效，但最終都係以失敗告終，足證勝利始終係屬於正義一方；第二，中共改革開放之後二十年表面風光蒙蔽香港人雙眼，但其實佢嘅曇花一現只係源於西方根本當佢係世界工廠看待，唔視佢為威脅，足證中共無法同蘇聯相比；第三，中共鬥爭理論可取之處並唔在於利用人性，而係在於佢提及人類如何透過團結達致自保自強之目的，但其實中共只係識得統一戰線，從來唔識凝聚人心。換言之，認清目標，保持團結，永遠比玩弄手段重要，只要抗爭有共同信念自然會有士氣有正氣，香港民族比華夏食人族更了解人性之根本良善，本身就已經係立於不敗之地，要成長亦毋須推崇毛澤東呢類人生失敗者。

以下以香港民族嘅角度，重新組織國共相爭嘅歷史，證明香港民族既唔華夏，亦唔中國，而係受益於英國文化之啟發。首先，中國共產黨同中國國民黨，雙方都係蘇聯為對抗日本而喺中華民國之內安插嘅代理人，喺未有真正民主文化同制度嘅國家之中，任何政黨都係缺乏民意認受，所以佢地爭黎爭去都只係爭緊蘇聯嘅支持同資源，因為佢地想喺蘇聯嘅扶持之下，成為剝削民眾而致富嘅小區域惡霸。蘇聯模式其實非常簡單，佢地會榨取俄羅斯貴族地主商人平民利益，然後輸出利益去支持同路人（即無產階級革命家）榨取中國境內貴族地主商人平民利益，從而建立贓物搶掠圈，同流合污。由於二十世紀嘅東亞發展遠遠落後於西方世界，贓物搶掠圈同華夏食人族自然一拍即合，加上英美兩國喺二戰之前亦無意過度干預蘇聯日本東亞霸主之競賽，中國因而順理成章，由有蘇聯資金同技術人員撐腰嘅代理人分治。反觀香港開埠之後，受英國殖民影響，成為極早置入英國模式嘅地方，不論係經營貿易定分配權力，香港人都永遠唔會落入蘇聯式或中共式嘅鬥卑鄙鬥下流鬥恐怖，而係傾向盡力顧好自己，尊重法律同按照社會共識行事，一代接一代咁淡化華夏舊俗嘅壞影響。簡而言之，香港嘅繁榮安定，中國嘅污穢不堪，正係在於各自行緊完全相反嘅路，因而獲得完全相反嘅結果。

於是大家可以反省，香港民族到底係咪要改變原有軌道去迎合中國，擁抱只有黑暗嘅未來。毛澤東終生活於恐懼之中，日夜擔驚受怕，荒淫無道只為排解內心空虛，因為權力缺乏正當性偏又居於高位就會令人心生出無止境嘅驚恐。而華夏食人族因為本身就係恐懼共同體，人與人嘅結合係消極聚合而非積極聚合，亦直接導致將恐懼運用得最好嘅人就會掌權嘅歷史進程，呢種進程其實從來未有喺香港歷史上出現過。有能者居之，係任何族群或任何社會都通行嘅常態，但有能者嘅定義，則喺每個族群或每個社會都會有佢地一套嘅原則，而香港對於有能者嘅睇法，明顯係接近世界標準同英國標準，即講道德，講信任，講公平競爭——喺香港呢個地方，毛澤東呢類人人根本就唔會有成為領袖嘅資格。

目前香港受制於中共嘅膠著戰況，應對必須有目標有策略有準備。用易理解嘅講法，可以話係類似於國民黨治下嘅共產黨根據地，但用準確嘅講法，就係一個反自由反民主嘅不義政權強行霸佔緊嘅戰時淪陷區。毛澤東喺上世紀四十年代之所以要寫指引去指示黨員動搖敵人基本盤嘅指引，源於追隨無產階級革命家嘅愚昧民眾根本無法從自身嘅群體生活中自然習得，但香港人心中有愛，齊上齊落，根本毋須任何游擊兵法或六大原則提示，自可憑自己一雙手去守住民族艱苦創造嘅現有成果。以下抽取一段毛澤東嘅戰略指引，嘗試解釋所謂戰略其實有幾顯淺易明：

第一係「積極援助紅軍的人民」，其實即係自己組織內部要團結，呢點打緊二戰嘅英國都有做到，但人地唔係刻意提倡，因為人與人、家庭與家庭、士兵與士兵之間本來就會互相支持，而香港抗爭之時嘅手足之情同埋支持黃色經濟圈，已經做得好過中共，盡量支持同路人，唔盲目鬥黃就正係確定緊大家係團結；

第二係選擇「有利作戰的陣地」，其實即係要知道自己強項，了解形勢，be water嘅抗爭方針同重視選舉已經係做緊，而且香港民族轉數快，學習能力強，一直構思唔同抗爭方式升級行動，部分地區儂牆小隊嘅不斷進化，已經係識玩；

第三係「發現敵人的薄弱部分」，以選舉為例，中共最廢就係本質上係寄生蟲，只識打散組織，擊潰個體，然後分別勒索，而暫時香港檯面上嘅民主選舉正係港英時代資產同組織香港民眾嘅有效制度，呢類已經有模有樣嘅制度永遠都係習慣暗中行事嘅中共要爭奪嘅兵家之地，所以一切鞏固已有制度同幫助民族團結嘅行為都會打擊中共，獨立前不妨繼續做；

第四係「使敵人疲勞沮喪」，中共目前已經因為反送中而飽受壓力，黨內鬥爭越演越烈，國內局勢十個煲冚九個蓋都係眾所周知，所以與其奢望以小國之力用三兩年時間去拖冧大國，香港民族更需要做嘅就係保持元氣，避免長他人志氣，要相信鋒利嘅刀仔一定會鋸斷枯樹；

第五係「使敵人發生過失」，基本上中共嘅存在就已經係過失，香港民族上街抗爭，追認民族之本質存在，就已經會令收編香港嘅中共狗急跳牆，處理反送中要上升到出動中共最愛嘅「殺、關、管」，已經令世界各國見到中國嘅無藥可救，對中國曾經有過嘅幻想已經接近崩解，所以時間一長，對方自然自曝其短，做好自己已經係最好嘅策略。

話說香港前宗主國英國，喺二戰期間本土雖然未有淪陷，但亦曾付出極大代價，一度有幾乎要不敵納粹德國嘅危險。然而，正因為英國舉國上下都知道黑暗永遠無法戰勝光明，佢地選擇傾盡全力反擊，而一早主張戰爭在所難免嘅邱吉爾之所以就任首相，正係因為民心已經無意綏靖，無意委曲求存。而Battle of Dunkirk之所以成為佳話，亦正係因為戰役反映出英國令人敬佩嘅大國風範——逆境之中，英國展示出驚人嘅韌力，既係因為小型船船長願意喺緊急關頭發揮一己之長為國效力，亦係因為邱吉爾比其他政治人物更加信任同胞嘅護國熱情同航海技術，自然散發出過人嘅領袖魅力。一般人總會認為，海權強國必然會勝出超限戰已經係呢次成功大撤退嘅合理解釋，但實際上，英國可以反敗為勝，並非單單在於軍備之優劣，經濟之強弱，而係在於比德國更團結，更了解自身民族特質。大英帝國時代雖則已為過去，但英國歷史始終顯赫，正在於後人可以從佢嘅身上，睇到民族曾經激發過嘅驚人力量。

香港歷史唔長，但絕對有資格超越其他喺二戰之後解殖立國嘅後進民族，釋放出專屬於香港民族嘅應有力量。香港自主權移交起，就已經正式成為淪陷區，呢個並唔係全新嘅敘事角度，只係經過超過二十年，大家至終於接受現實。不過大家亦要知道，成長永遠需要時間，無法操之過急，最重要嘅係喺每個階段都有努力適應，繼續向前。香港前途談判之時，香港人只係幾百萬華夏食人族倖存者，未開始以政治共同體自居，自然無法提出獨立，加以實踐，命運始終有其規律。香港人族群從英國文化習得嘅一切，必然要等到失去英國直接領導至會更顯真正珍貴，而香港民族建國嘅重任，亦必然係由決心恢復香港嘅香港民族初生代所承擔，歷史從來自有邏輯。香港民族初生代具備民族自信，喺落入中國統治嘅淪陷時期感受到應有嘅水火不容，同中共始終視香港為異質之觀念實為一體兩面。過去，香港人憑自由多元之胸懷包容華夏食人族，以選擇良善之慈悲體諒中國之貧苦，據中華民族之謊言接受第二次殖民，結果泥足深陷而不自知；如今，香港民族已經發現真相，而民族之信念亦逐漸趨向一致，未來中國解體，香港主體必然會得以光復，而民族同胞之英勇犧牲亦必然會獲得後人最崇高嘅敬意。

香港獨立只係香港民族嘅中期目標，立國之後有更多長遠目標要逐一達成，所以目光一定要放得夠遠，唔好太易因為眼前發生緊嘅事而意志消沈。用睇遊行嘅框架睇，一次遊行就只會係一次遊行；用睇反送中嘅框架睇，一次抗爭就只會係一次抗爭；但當人學識用爭取獨立嘅框架去睇，甚至用人類文明如何發展分佈嘅框架去睇，一下槍聲，一條人命嘅犧牲，就可以令人瞬間感受到命運之力如何體現於個體身上，繼而產生應有嘅感受力同觀察力，認知到自己身處歷史洪流中嘅某個特定位置，然後去做出最合理嘅相應舉動，成就自身歷史，同時成就世界歷史。透過上溯遠至千萬年嘅史前史，參考上個世紀嘅世界史，人就可以了解到香港正處身於點樣嘅處境，亦會睇得出東亞局勢以至世界局勢將會何去何從，最後返轉頭以香港民族一員嘅身份為香港民族想像未來。放低香港曾經係公民社會嘅虛假意識，接受香港已經係淪陷區嘅客觀事實，跟貼香港已經見識過嘅世界秩序，香港民族就有可能將傳承至今嘅族群資產轉化成為立國資本，最後贏得最終勝利。

gnimmm.com/2020/05/11/occupied_hk/