《東歐民族風》陳心遙
《信報》2018年5月2日《視線所及》專欄

最近某電視台嘅世界盃宣傳曲引起網民討論，作曲嘅歌手指歌曲靈感源自東歐民族風。
民族風喺香港流行音樂上已經係一個近乎絕種嘅名字，或者民族風嘅時裝會俾文青追捧。但係民族風嘅音樂喺一個大城市入面就彷彿一早被掛上「老套」、「落後」嘅標籤，理得佢係咩「民族」嘅「風格」。
香港八十年代初粵語流行樂壇開始改編外國歌曲，一早將日本嘅民族風傳入，八十年代嘅日本歌謠曲，旋律同編曲上承自演歌嘅味道，梅艷芳嘅《赤的疑惑》、羅文嘅《錦綉前程》、徐小鳳嘅《人生滿希望》，聽幾句，或者聽前奏，已經知係源自日本，非常易認。嗰陣時，想要一首日味嘅歌曲，俾版權費原作者就好，點解？模仿唔到囉。
到東歐嘅民族風，唯一一個引入而又能夠用粵語唱出味道嘅，只有林子祥。
林子祥先改編過前蘇聯嘅歌曲Moscow Nights。呢首應該係俄國最為人熟悉嘅歌曲，全世界改編過好多語言嘅版本，國語版叫《莫斯科郊外的晚上》，連胡錦濤都曾經公開唱過。我聽過前蘇聯紅軍合唱團嘅版本，有氣勢又有感情。粵語版叫《美麗的小姑娘》，雖然係情歌，但林子祥嘅唱腔仍保留一份狂放澎湃，係最動聽嘅版本之一。之後阿Lam又改編過著名以色列傳統民謠Hava Nagila，粵語版《狂歡》，鄭國江嘅歌詞係忠於原詞嘅意思。林子祥真係畀到一種聞歌起舞嘅感覺。首歌雖然誕生喺八十年代，好似到2000年初，仍然係大學O Camp跳Mass Dance嘅指定歌曲之一。
此外，林子祥改編過三首前西德Disco樂隊Dschinghis Khan嘅歌曲，分別係《世運在莫斯科》、《古都羅馬》同埋《成吉思汗》。Dschinghis Khan雖然係西歐嘅音樂組合，但用上「成吉思汗」做隊名，歌曲就有歐亞各地濃厚嘅民族風情，1979年佢哋喺Eurovision歐洲歌唱大賽嶄露頭角，唱出隊伍同名歌Dschinghis Khan六位成員都着上色彩鮮艷，剪裁誇張嘅服飾，一路唱一路大跳土風舞，用而家嘅角度應該算係一種Cosplay。樂隊之後嘅歌曲Moskau成為澳洲電視台宣傳1980年莫斯科奧運嘅宣傳歌，傳誦天下。雖然首歌係走東歐民族風，但樂隊喺八十年代被指係反共產主義，而俾蘇聯政府封殺，反而成為好多東歐人民心嚮自由嘅象徵。
之後樂隊解散，有成員離世，不過因為YouTube，令到人重溫到佢哋獨樹一幟嘅曲風同舞台演出，仲掀起網上嘅小熱潮。樂隊加入年輕成員跳舞，仲復出舉行演唱會。先唔好理老唔老套，好聽嘅歌，會歷久常新㗎。

#東歐民族風 #林子祥 #世界盃 #譚詠麟 #我們的愛 #信報 #陳心遙