人生解任務（下） . 首先用獎勵，吸引你小偷小摸，然後就會係更嚴重嘅罪行。 . 「人生任務」會一直掌握你嘅罪證，如果你中途想放棄，唔再做任務，話唔定佢會用之前嘅罪證嚟威脅你。 . 係即刻坐監，定係做多舖，搏一搏唔會俾警察捉到？ . 話唔定，我細佬就係咁樣成為「人生任務」嘅奴隸。 . ， 為咗查明真相，我繼續做系列任務，有時可以好似偷可樂咁講數，但有時都難免要真係犯法。 . 不過，我犯嘅都係小法，為咗令阿媽沉冤得雪，就算我最後要坐一年半載，我都甘心。 . 終於我升到100LV，Apps多咗一個「許願任務」。 . 我可以輸入想要咩獎勵，系統經過計算，再配置適當嘅任務畀我。 . ， 我輸入「阿媽復活」，Apps顯示「無法做到」，我真心鬆一口氣，睇嚟個Apps都無神奇力量。 . 我仲未諗到要咩獎勵，我就收到阿爸電話，阿爸叫我去醫院。 . 醫生話，阿爸患上重病，要一大筆醫療費。 . 阿爸好絕望咁望住我：「我哋邊有咁多錢，阿仔，我係咪死梗啦？」 . ， 我已經失去咗阿媽，唔可以再失去阿爸。 . 於是，我喺「許願任務」度，輸入咗阿爸嗰筆醫療費金額。 . 任務難度同獎勵掛鈎，我都知呢個任務唔會簡單。 . 彈出嚟嘅任務係，要我殺人，個名同地址好陌生，係一個我唔識嘅守林員。 . ， 我個心一沉，呢一刻，如果我拎住個電話去報警，算係「教唆殺人」， 警方一定會查「人生任務」，話唔定仲會搵到我細佬，將佢繩之以法。 . 但我就無可能再做任務，賺唔到醫療費，阿爸死路一條。 . 我糾結咗一晚，人死不能復生，以後仲有捉細佬嘅機會，都係救咗阿爸先。 . ， 個守林員獨居郊外，殺人、拋屍荒野、清理痕跡，中間都遇到好多困難、噁心，同良心嘅責備。 . 為咗對得住自己嘅親人，我只可以對唔住一個陌生人。 . 我Upload條片後，好快就收到一大筆錢。 . ， 我即刻上阿爸屋企：「我有錢啦，我哋即刻去睇醫生啦。」 . 阿爸對於我突然到來，有啲慌亂：「嗰個醫生要預約。」 . 「唔緊要，我哋睇多幾個醫生，檢查多次，睇吓仲有無更好嘅治療方案。反正我哋有錢。」我正要拉阿爸出門口。 . 阿爸推開我，急忙拎起部手機：「我......我去個廁所先。」 . ， 我有啲疑惑，一手搶走佢部手機，然後我就見到「人生任務」Apps！ . 「我呢排沉迷手機game，哈哈。」阿爸仲想扮嘢。 . 我一言不發，打開阿爸嘅「人生任務」，佢已經升到200LV，比我多一個「獎勵預付」功能。 . 大概係可以先拎獎勵，再喺限定時間內完成任務。 . ， 我搵到「過往任務記錄」，慢慢睇佢啲任務。 . 阿爸體力唔及我，點都搶唔番部手機，已經嚇到面都青埋。 . 佢嘅上一個「許願任務」，佢許願要嘅獎勵，係一個講大話、證明佢有重病嘅醫生。 . 阿爸根本無病？佢想呃我錢？ . 但點解要搞到咁複雜？佢直接許願要錢，再做任務咪得囉。 . ， 我再碌上去，終於見到，阿媽死前一星期，佢許願要嘅獎勵係......希望阿媽死。 . 即係話，阿爸許願要阿媽死，「人生任務」再發佈任務畀我細佬，要殺我阿媽？ . 我好心寒：「你點解要殺阿媽？」 . 「佢對人人都好，就係對住我日鬧夜鬧，好大壓力啊，你明唔明啊？」阿爸就嚟崩潰。 . ， 我唔明，仲有一件事，阿爸要嘅「獎勵」係阿媽條命，咁阿爸要做咩任務？ . 我睇清楚，嗰個係「獎勵預付」，即係可以等阿媽死後，阿爸先要做任務。 . 佢嘅任務係：「半年內，邀請一個玩家加入『人生任務』，並使該玩家完成首個殺人任務。」 . 邀請一個玩家......係我？ . ， 我忍唔住問：「嗰日，我收到『人生任務』嘅下載邀請，係你Send畀我？」 . 阿爸垂低頭：「其實我仲Send咗畀幾個朋友，不過佢哋有人無下載，下載嗰啲都未殺人，我又控制唔到佢哋......」 . 「哦，你係我阿爸，我關心你，你就扮病嚟呃我殺人？」我難以置信。 . 「對唔住啊，但我已經拎咗獎勵，如果半年內做唔到任務，會有死亡懲罰㗎。」 阿爸崩潰大喊：「你知啦，『人生任務』可以叫其他玩家嚟殺我，唔係講笑。」 . ， 或者，我殺嗰個守林員，都係其他玩家要求嘅「任務獎勵」？ . 我覺得，我嘅人生，已經一塌糊塗。 . 我甚至唔想再考究，細佬到底收到咩「獎勵」，先肯去殺阿媽。 . 因為我同阿爸個電話，同時收到一個通知。 . ， 「人生任務」出咗新任務，要我哋兩父子合作去殺人。 . 任務獎勵除咗錢之外，仲有「系統刪除玩家上一次殺人的罪證」。 . 真係會刪除罪證？不過刪咗都無意思，我要殺另一個人，即係又有新嘅罪證，生生不息，我永遠都被控制。 . 但我可以唔做咩？「人生任務」咁樣講，好明顯係威脅。 . 只要我拒絕接受任務，罪證就會被公佈，然後係無盡嘅牢獄之災。 . ， 阿爸大喊：「阿仔，我唔想坐一世監啊！」 . 我都唔想，從此，我哋就成為「人生任務」嘅奴隸。 . 我知道，自己終有一日會被警察捉到，終身監禁，但我總係想盡力延遲呢一日。 . ， 點解我會搞成咁？或者，一開始，我就唔應該企圖透過玩「人生任務」，去擊破呢個Apps。 . 「不入虎穴，焉得虎子。」呢句話係留畀有經驗嘅獵人。 . 要做危險嘢前，先評估自己嘅能力。 . 一入虎穴，被虎咬死。 . －完－