荒島遊戲（下） . 我一邊擺脫我身上嘅爛網，一邊用啲唔太要害嘅部位，擋阿冰嘅刀。 . 肩背上中咗幾刀，而我亦開始逃跑。 . 阿冰明顯知道，錯過咗呢次機會，等我養好傷，佢會被我反殺，所以佢窮追不捨。 . 我係跑得快過佢少少嘅，但我身上嘅傷口不斷流血，我開始頭暈，我地嘅距離亦愈嚟愈近。 . ， 我把心一橫，向荒島外圍跑。 . 工作人員果日話：「我地唔跟遊戲規則逃跑，頸圈會注射毒液。」 . 呢三個月我太悶，睇過果本遊戲規則，只要踏入海灘超過廿米，就算係「逃跑」。 . 我唯有搏一搏，搏阿冰掛住同阿強談情說愛，掛住諗辦法陰我，無研究過遊戲規則。 . ， 我向海灘跑，故意愈跑愈慢。 . 到我踏入海灘，就計算住腳步，差唔多廿米，我成個瞓低，扮到好似力竭暈低咁。 . 阿冰果然撲上嚟補刀，千鈞一髮間，我用力將佢踢出去。 . 我筋疲力盡，呢一腳根本傷害唔到佢，但我估應該將佢踢出咗廿米範圍。 . 阿冰好快企起身，面目猙獰，再向我撲埋嚟。 . 唔通我計錯距離？定個遊戲無咁快實施懲罰？ . ， 好彩，下一秒，阿冰面上發黑，成個瞓低咗。 . 我心情一鬆，亦都暈咗。 . 到我醒番果陣，我已經喺船上面，身上嘅傷都經過妥善處理。 . 工作人員恭喜我，話我已經勝出咗，可以拎錢番屋企。 . 坦白講，一諗到我間接殺咗兩個人，我一啲都唔開心。 . 如果係生死關頭，損人利己我都明白，但明明可以和平共處，都有人會殺人，只為換取自己少少利益。 . ， 人性好可怕，我想快啲番屋企見甜甜。 . 但係落船之後，我搵唔到甜甜，反而收到甜甜留低嘅一封信。 . 甜甜話，「荒島遊戲」都搵咗佢，佢先知道我為咗買樓，參加咗呢個遊戲， . 佢都想為我地嘅未來盡一分力，所以佢都出發參加咗，而佢玩果個版本，酬金有五千萬， . 一年後佢番嚟，我地就一世衣食無憂。 . ， 我好震驚，甜甜係咪同我之前一樣，以為「荒島遊戲」無咩危險？ . 我唔求一世打跛腳都唔使憂，我只係想同甜甜過正常生活。 . 但我仲未諗到辦法救甜甜，我就俾人捉走咗。 . 夜晚行行下，俾人笠麻袋，推上面包車。 . ， 我重見光明果陣，已經全身被綁，身處一間豪宅。 . 眼前有一個打扮光鮮嘅富婆，同一堆保鏢。 . 富婆落命令：「我好鍾意你喺『荒島遊戲』嘅表現，從此你就跟我啦。」 . 「原來『荒島遊戲』，就係你地班有錢人揀玩具嘅地方？」我都有過呢個猜想。 . 富婆微笑：「知道就好，咁你就乖乖地啦。」 . ， 「我已經有甜甜，我唔會跟你。」我語氣堅決。 . 富婆冷笑：「你個甜甜已經上咗荒島啦。」 . 唔通甜甜被五千萬吸引，去玩「荒島遊戲」，係呢個富婆嘅手筆？ . 我心裡好驚，但我把口唔會服輸：「甜甜同我一樣咁聰明，佢一定會研究好遊戲規則，平安番嚟架。」 . ， 「係咩？」富婆拎出手機，手機直播緊甜甜喺荒島嘅情況。 . 甜甜戴住個頸圈，好平靜咁食緊飯。 . 「甜甜！」雖然我估佢聽唔到，但我知道佢平安，已經好安心啦。 . 富婆詭異一笑，喺手機上撳咗幾個掣。 . ， 下一刻，甜甜面上發黑，成個瞓低咗，同阿冰中毒身亡一模一樣！ . 「你啟動咗頸圈嘅毒藥？」我驚叫、掙扎，又被保鏢撳住。 . 我叫得聲嘶力竭：「點可以？甜甜明明無違反遊戲規則！」 . 「遊戲規則？」富婆摸一摸我塊臉：「遊戲規則，係畀你地呢啲人遵守架咋。」 . ， 果一刻，我終於意識到，無論我地點樣研究遊戲規則，最後一樣會輸。 . 因為真正嘅贏家，根本無視遊戲規則， . 甚至，佢地創造規則。 . －完－ . #短故 #短篇 #小說 #陳美濤 #廣東話 #粵語 #tomatochan #荒島遊戲