【晞。觀影記事今日正式邁向第13個年頭🥳】  #晞觀影記事12週年  一如以往，喺度，我先祝自己呢個場12週年生日快樂。  每一年我都唔知用咩相祝自己好，好多謝大家，俾我今年有機會，真真正正有張代表到嘅相，出呢個Post。  真係架，呢次包場，我好感動。呢12年嚟最大得著，唔單止係個Page，仲係識到咗你哋。人大咗，你會更珍惜人與人之間嘅關係，多一個朋友，好過多一個敵人。現實中我朋友唔多，但喺呢12年嚟，我透過呢度識到好多朋友，好多仲熟過身邊嘅人。一直儲儲埋埋，直至呢一晚，成就咗一件事。  今時今日，大家玩social media，就係將人與人之間嘅關係online，我就反其道而行走去玩offline。如我當日所講，大家關係唔止係「網友」，有人會定期分享消息、有人真係做到朋友、有人變成過同事、有人仲佔據咗我人生中好重要嘅位置。  仲有，好多喺業界嘅朋友，你哋無論喺呢次活動入面，甚至我人生中好多大大小小事上面，都幫咗我好多，真係變成到朋友。有時講起做Blog經驗，總會有人話，PR做嘢嘅姐，你試吓你冇嘢幫到佢，佢理唔理你丫，呢行點會同你講真心呀？咪咁天真啦。我唔排除有好多人係咁，但我好開心呢12年嚟，我識到好多業界朋友，係真係做到朋友，傾到心事果隻。  我一年有兩個生日，一個係我自己生日、一個係我Blog生日。12年前嘅今日，2008年6月20號，我開始咗一件我以為冇回報嘅事。  一做就12年，冇收入冇贊助，寫咗接近2200篇文、唔知幾多個post，我諗有過萬（一日5個 X 365日 X 7年 -- Page只有七年），咁多年嚟mid-term、考試、見工interview前、去旅行搭飛機搭火車，甚至Working Holiday喺個只得有限Signal荒島上，都係咁打文，我得到啲咩？過去11年，我成日咁問自己，除咗有戲飛睇戲，我唔知道呢件事為乜；去南美果一年，我甚至努力想說服自己執Blog，真係喎，去旅行舒舒服服冇寫個Blog唔理個Page，我咪又係咁？  最後，我都係好固執咁放棄唔到。無形間，呢度變成咗我生活一部份。  直至今年包場呢單嘢，我諗又唔應該咁樣去量化？得到嘅冇比失去嘅多，已經好好，睇開啲，做得開心啲，咁呢一切都係值得嘅。可能，呢度我得唔到咩實際金錢上嘅收入，但我喺呢度所得到嘅感情，係無價嘅。  今時今日，我諗大家都會覺得，今日唔知聽日事，未來唔知咩環境，最重要係活在當下。可能明年今日Facebook已收皮，都可能一切繼續如常，可能我咁好彩移民咗，可能更好彩香港突然去到大家心目中理想位置，大家開開心心，寫Blog都寫得更痛快，都可能我成功如大家所講，開到間公司... 只希望無論咩情況，呢度都可以繼續營運。明年係點我唔知啦，但喺今年今日，多謝大家同我見證，我踏入12週年、玩到咁大嘅歷史性一刻。  由果日散場，到今日仲收爆Inbox叫我包下一場，《潛行凶間》又好《TENET天能》又好－－堅抽有人叫我包《花木蘭》，唔好玩我啦喂😂係，食住個勢係好，但根據過往經驗，一次成功搞第二次總係會賴嘢。我諗吓點啦，今次係個好經驗，下次再搞，希望做得更好。我會想我有時間講多啲嘢，Q&A做得更好。  唔知13週年會咩光景，let's see。  多謝睇到呢度嘅你，歡迎留幾句祝賀說話或感想🤗  【‼️留意‼️】 「晞。觀影記事」Patreon加強版已經開幕，更多精選深度獨家電影文章，請即訂閱：https://www.patreon.com/travelerwithmovie  📣文字工作者也得要吃飯，你的支持是我的原動力。請給點心意，給小弟寫更多好文章，歡迎透過payme課金以作支持🥳：https://payme.hsbc/jackyhei 或使用QR code：https://bit.ly/3a9wOzy 或透過Paypal捐款：paypal.me/jackyhei  🙏感謝各位支持，小弟執筆之原創小說私人貨存已全部售罄，有意者可到此文章內的連結購買：https://bit.ly/3dRuUWu  【IG請follow】www.instagram.com/travelerwithmovie  #晞觀影記事 #travelerwithmovie