長文慎入，此文將會在明天的華富財經專欄刊出

--------------------------------------

港交所趁脫歐博一鋪

港交所(0388)宣佈收購倫敦交易所，風頭可謂完全蓋過咩QFII全面放寬及買農地起公屋，青冰晚上搵咗少少料，諗住安排在專欄寫啦，估唔到今晚已經有唔少名家評論，過多幾日青冰的料就已經唔新鮮，不如提早寫吧。

先唔講政治動機，當然青冰又唔會傻到認為這收購不是北京指使，但首先都要理解咗金融層面的事，才是青冰的專長。

港交所將會以發新股及現金的形式向倫交所收購，現金2045便士加2.495股港文所股份，以港交所收市價245.20元及通告上所提及的英鎊匯率1兌9.6865港元，收購價是每股8361便士，換言之涉資296億英鎊，即2867億港元，果然是超級大刁。

港交所上月公佈業績，手頭現金有1145億，仲有520億係以公平值入賬的投資，當然加埋都唔夠2867億啦，但重點在於，今次係以印新股加現金的形式，現時倫交所發行股本為3.54億股，即係話會動用701億港元現金，港交所主要的負債來自保證金及抵押品，都有1341億，斷不可能用清手頭上的現金作收購，所以之後批股供股都係有可能的。現時香港政府持有港交所5.95%股權，交易完成後要發新股，將被攤薄至約3.5%，以現時的局勢，要定向批股畀政府集資，肯定會引起市民反感，如果選擇供股，為了保持權益而拎錢出來，反對聲應較細。

好喇講完枯燥的數字，要去返重點，就係收購的那條方程式。雖然現金及新股比率是死數，但其實整個價值係浮動的，兩大變數就是匯價及港交所的股價。大家都知英國正在煩緊脫歐，似乎硬脫的機會都唔細，市場普遍認為，愈亂愈大鑊，英鎊自然愈低，舉個例如果英鎊跌一成，至1兌8.7港元，整個收購價就是每股9076便士；假設匯價仍是9.6865，如果港交所升到270蚊呢，整個收購價每股8999便士，如果英鎊又跌港交所又升，收購價就更吸引啦，現金畀少咗整體價又高咗。

現時倫交所最大股東，是持有一成股權的卡塔爾投資局，他們的取態將是成敗的關鍵，倫交所話港交所事前冇通知，但港交所有冇搵過卡塔爾呢，又或者北京有冇同卡塔爾傾呢？大家都只能夠估。在消息公佈前，倫交所股價已經在歷史高位，主要受收購Refinitiv推動，Refinitiv即係Thompson Reuters旗下做數據的公司，如果係行家一定唔陌生啦，Eikon及FXall一定用過吧。而港交所出價的條件，就是要倫交所董事局否決收購Refinitiv，市場上都幾看好這收購的，睇股價就知，因此如港交所一心係想食倫交所，就絕不能讓佢再壯大，配合脫歐亂局而出手，可謂趁火打劫。

不過由於這盤生意太敏感喇，英國政府或監管機構應該會出手阻撓，收購或會拖好耐，但如果最後董事局OK，股東會又OK，要政治KO這筆刁，真係要說服股東及卡塔爾先得，話晒你打開門上市，如要選擇性夾硬KO，日後的估值又未必值咁高了。

【全民媒體】你的手指還在嗎？（老狐狸）

脫歐後，匯市大上大落，英鎊兌港元曾一度跌穿$10元，為30多年低位，同時日圓在避險因素下兌港元一度升至$7.7，有外滙專家稱英鎊會低見$9.5，而日圓兌港元會重上$7.8云云，結果如何？短期既結果係隨著安倍在日本選舉勝出，市場憧憬會有新一輪或高至10萬億日元的經濟刺激方案，怕日本會在直昇機上撒錢後，日圓兌港元回落至$7.45，英鎊又上番$10.32。

小弟並唔係外匯專家，只係一個小小的外匯用家，故其上落都我都有d影響，加上投資市場環環緊扣，留意多一點都好少少。

話說市場在央行放水下股市開始回升，美國杜指和標普已創出歷史新高，中國滬指升至3個月高位，而在昨天港股亦上升至1 個月高位。而更值得留意的是市場上避險資產兩極，金價在英國公投後上升，反映資金湧入金市，帶動原材料價格回升，另一邊廂小弟一向睇的指標係10年期美債債息，2 日內由1.37%上升至1.51% (債劵係價跌息升)，即係資金流出避險資產，衝左去風險資產尋求較高回報，值得一提係10年期美債債息係5月尾時係高逾1.85%，如果債市可以跌至呢個位，相信股市或可創出新高。

股市方面，領展和港鐵呢D香港本土避險資產在大摩睇好後同創新高，但若然市場放水，股市再，市場定必重回稍高Beta 既股份，咁早前做好既避險資產或者就會表現得無咁好了，呢點大家都要留意一下。

個別熟悉小弟的朋友或者知道，小弟曾在個多月前買入過莎莎(178.HK)和卓悅(653.HK)，但由買完後急升得太快，文都未寫得切就飛左上去，莎莎更在業績差的時間由$2.3左右不經不覺上升至$3.2，當然老狐狸未能盡食，但反映個別呢類股份有一定的吸納價值。

可能大家話龍頭零售股點解唔睇周大福呀？因為小弟一直都覺得佢管理不太好，就算當日佢地不斷開店，只會覺得佢地搶貴舖，難道開到一條街全條街都係佢d生意就會佢做晒咩？生意，並唔係咁做既，所以我只會當佢係燈。

點解會開始睇零售股？一個字：「抵搏！」

如大家有睇今早的財經報紙，講緊海港城有藍精靈俾你去呃LIKE，No no no！而係另一段講海港城銷售跌幅喘穩，九倉的股價已重上$48.4的相對高位了，而個個月數字都唔好既澳門賭收又係7月份話反彈，就算股價PK到無人，個個財演都出黎踩一腳既翠華都係$1.26企得住腳，種種跡象顯示似乎市場估值重估或可以令呢D股股價重上，咁都唔出下黎，又好似對唔住自己咁。

今日老狐狸唔打自長篇大論去鑽研某一隻股，因為無做一次原氣大傷，寫錯左又怕俾人笑，所以打算用最簡單睇下圖去講下。

包浩斯國際 (483.HK)

呢隻股係小弟一隻又愛又恨的股票，好的係佢幾乾(3大股東持股約75%)，市值低 (只$5.8億)，業務又不俗，單單係佢個SALAD品牌都可以慢慢拆出黎係創仔上下啦。而唔好既係佢好難買，就算係5月19日出過盈警，6月24日出業績盈利下跌59%，又或者佢前幾日出左同店銷售下跌都未能令股價回落，低位橫行價都係$1.45左右，加上成交疏落，所以到宜家老狐狸都未買得到 (所以唔係好想寫的)，但又唔想壞了宗旨，所以都係寫寫佢。

雖然佢同店銷售有所下跌，但只係跌13%，老狐狸又覺得算係咁，如果同期可以將營運成本下降番，主要係租金 (應該可以減得更多)，咁整體黎講又不致太肉酸喎，而且佢息率又唔差，老狐狸真係有興趣買黎坐下。

最值得一提就係個圖表好似好靚仔，只要突破佢條100天平均線，基本上無乜壓力區，加上佢相對比起其他公司少財技野，唔睇佢都可以安心少少。

上面呢一隻股，其實大家都唔使大急買，因為急唔黎，慢慢吼同收啦。

老狐狸唔敢話什麼熊三定牛一，因為就算專家都只會係過左去至會確定係邊個STAGE，加上專家都係搵食者，唔出來說三道四搵阿水請佢咩，所以自己參考就算了，而炒股票首重不要領野，如果手指仍在，有值搏率就可以試試，唔係日日睇咁多文黎托咩？

如大家有興趣，歡迎大家加老狐狸的FANPAGE交流下啦

https://www.facebook.com/oldfoxfanclub

老狐狸