四年一度（或兩年一度）的六，七月，總是全民皆波。 身邊多咗好多忽然球迷，平日唔睇波都趁熱鬧，有啲係我一直都唔覺佢會睇波嘅人，都會喺呢段時間趁墟講兩句。呢啲長年現象，一直都有。幸好無聽到果啲咩碧咸做乜無份踢，呢啲咁無知嘅問題。而呢班人裡面，有唔少係將香港同冰島混為一談。 當然，勝利球迷都唔少，邊隊勁就捧邊隊，連隊中有咩人腳都唔知。不過話分兩頭，真球迷通常由勝利球迷開始。 我呢個英L，細細個開始捧，唔係佢因為可以一個扭廿個，而係前宗主國的關係，正如捧香港隊的道理一樣；當然，連尼加係我兒時偶像。 （如果我見隊波勁就去捧，我不如捧巴西阿根庭西德？由細到大我係很討厭巴西，德國阿根庭就一直係英L死敵。） 又有啲球迷，本身捧果隊今年入唔到決賽周，（意大利，荷蘭為甚）抱住食花生心態待之，咁佢哋都會特別憎某幾隊嘅。 哈利簡尼成為金靴獎得主，六球裡面有五球係對住突尼西亞同巴拿馬，另一球係對住哥倫比亞入十二碼，唔。。 英L一致睇淡之下打到入四強，隊波有幾多料大家心撚照，超額完成相信英L們已經收貨，淘汰賽的制度之下，走線也是一種戰術。 兩年後的歐國盃，四年後的世界盃，會係點呢？ （90年英格蘭四強，之後一屆世界盃，連決賽周都入唔到。。） 焦點放返去下季英超先啦，熱身賽贏到22：0？？？乜要搵隊業餘球隊來擦入球呀。。 （我成日都話，人有三衰六旺，球隊亦有高低潮，無論你部車，你層樓可以賣，女朋友可以換，但你會唔會轉捧另一隊波？在我捧愛華頓三十幾年的生涯裡面，聯賽冠軍又攞過，足總盃又攞過，護級到最後一刻又試過，而家咪又係咁，因為已成為生活中的一部份。） 呢種心態，果啲忽然球迷係唔會明。