基本功球技唔算頂級，但勝在夠爛打，夠勤力
轉自 @評球品足小球僮

今晚有英格蘭大戰德國，不如重溫一下呢場先！

【經典系列】98世界杯-英格蘭對阿根廷 ( #鍾志光旁述 ）

各位老友，今日就等我帶大家返到1998年既世界杯16強，回憶一下當年英格蘭對阿根廷呢場充滿戲劇性既世紀大戰！

當年兩軍既陣容只能以星光熠熠黎形容。英格蘭方面有施文把守最後一關，後防則由當年阿仙奴隊長阿當斯領導，中埸則有隊長恩斯，配上一代硬漢碧堤組成雙防中， 左右中場分別係碧咸同史高斯， 前面以當年英超神射手舒利亞以及時年只得18歲既奧雲掛帥。

阿根廷方面亦都不遑多讓，後防以彈弓人艾耶拉為重心右閘亦都有球壇長青樹辛尼迪， 中場掃蕩主要由今日馬體會嘅領隊施蒙尼負責， 而其實今時今日馬體會嘅踢法絕對係脫胎換骨自球員時代嘅施蒙尼， 當時嘅施蒙尼絕對係球壇一等一嘅硬漢子， 喺球場上嘅惹火尤物。 至於分波嘅工作就落係巫師華朗 同埋當年號稱馬勒當拿接班人嘅扭波王奧迪加身上， 前線方面唔使講就梗係由戰神巴迪高衝鋒陷陣， 淨係佢嗰果種霸氣就相信可以令唔少後衛望而生畏！

比賽開始無耐， 施蒙尼一次突入禁區就獲得咗十二碼嘅回報， 12碼由戰神一擊即中。 但阿根廷領先維持得唔耐， 三分鐘之後奧雲係一次快速突擊之中係查莫特同艾耶拉之間 硬食咗一嚿阿根廷三文治， 博得球證直指12碼， 結果舒利亞狂抽死角度令到比賽番到起點。 到咗18分鐘， 奧雲利用佢嘅速度接應碧咸嘅長傳係中埸快放殺入禁區， 然後扣過艾耶拉起腳破網將記錄改寫成二比一，呢個入波充分展現出奧雲當年既侵略性， 亦都係佢足球生涯嘅代表作之一。

領先之後，英格蘭都有唔少機會擴大比數，可惜都未能把握。終於係完半埸前，阿根廷憑住一次禁區邊既罰球攻勢追平， 係呢個罰球之中阿根廷既處理可謂出奇不意。

上半場結束，2比2既比分絕對可以反映戰況既激烈，呢個半場相信亦都係世界杯史上其中一場最經典既半場。

而縱觀整個上半場， 英格蘭的表現都係佔優嘅 。

但英格蘭既優勢亦都因為碧咸一次無謂嘅犯錯而消失得無影無蹤， 係一次被施蒙尼尋犯之後， 佢竟然尋唔住氣當住球證面前以一下虎尾腳將施蒙尼勾跌， 結果就梗係直紅出場喇！

呢個咁突然既轉變，相信當年唔少電視機前既老友都嚇到呆一呆。

碧咸被趕出場之後，踢少一個既英格蘭一直陷於劣勢，最後係互射十二碼階段俾阿根廷踢出局。

英格蘭出局，令碧咸當年受盡千夫所指，直至幾年後世界杯外圍賽先一吐烏氣， 不過呢個又係另一個故事！

今日就講住咁多先！
--------------------
我開咗ig啦， 歡迎各位老友一齊入嚟吹水!
https://instagram.com/chung_chi_kwong

盤點今季最浪費的球員
轉自 ＠評球品足小球僮

(主持：Roger 、朱sir )
第1節：英超神射手友賽有斬獲，英格蘭唔使等埋朗尼 / 意大利大敗，青黃不接令人擔憂 ？