超越加稅1.25%嘅咁簡單 （前言：作為一個國民、一個選民、一個納稅人，對於政府加稅嘅關注，應該係天經地義嘅事。講緊加稅呀，至少我有份比，特別係自己有份選嘅政府，緊係要到清楚點加，點解加，加咗洗响邊，相信呢個係公民責任嘅一部份，至少我係咁覺得。） 尋日响Patreon大概講過下英國政府內部關於加National Insurance 1.25%嘅風，今日首相肥波正式公布詳情，用意同後續影響比尋日傳媒分析嘅更加深遠。1.25%呢個加幅同預料嘅係一樣，但係短期同長期性質就好有分別，等同加多一個稅基超闊嘅稅項，咁就唔只係加NI解決疫情後醫療滯後咁簡單。重點不在乎嗰1.25%，而係面對人口老化嘅退休褔利政策改革。 由明年四月開始，無論傭主同傭員嘅National Insurance都會加1.25%，呢1.25%嘅主要用途，正如之前放風咁講，响2023年前係用黎解決NHS响疫情後積壓嘅個案。重點就係2023年4月之後，呢個1.25%就會變身成為獨立於National Insurance、入息或利得稅嘅「徵費」（levy），可以理解為全新稅項。呢個徵費連在職退休人士、做生意、受雇，理論上返工嘅都要比，覆蓋率可以話僅次於銷售稅（VAT），用黎支付未來需要改革嘅退休福利政策。 咁即係唔只針對疫情對NHS影響嘅支出咁簡單，而係一次過要國民面對人口老化，總有一天要處理嘅退休福利難題，呢個就係今日肥波公布政策之後，全國爭議嘅核心。老實講，1.25%對大部份人黎講話多唔係多，要短期解決疫情製造出黎嘅醫療滯後亦人之常情。但將呢個變成獨立稅項（叫levy（徵費）只係好聽啲），加埋肥波同時宣布嘅Social Care老人護理改革，咁就令好多人質疑得係向勞工階層同年輕納稅人開刀，保障擁有物業嘅老人家財產。 大家都知英國納稅人只要一生中供National Insurance到特定年期，响法定退休年齡之後就有資格每個月攞退休金，不過呢啲退休保障並唔包括需要長期護理費用，例如日間護理或者全日制老人院等等。呢類費用講緊每個星期至少要500至1000鎊或更多，足以燒晒老人家嘅資產。長久以黎，政府只會全數資助資產少過£23000嘅老人家，多過嘅話就要自行負責。因為社會結構嘅關系，英國大部份年老嘅中產最大嘅資產就只係自住間屋，即係所謂嘅Property Rich，萬一老來有長期病患，需要全日護理嘅話，越長命就越燒得多銀紙，賣樓加按嘅為數唔少。 呢個多年黎無乜邊屆政府有膽解決嘅問題，而肥波今日就順便進行改革，將呢類費用置上限£86,000。例如我老咗又病到照顧唔到自己，要住每個月收£4000嘅老人院，我住咗兩年幾之後地方政府就會幫我比到死之止，我最多都係比£86000，唔洗變賣資產。而資產响£20000至£100000之間嘅老人家，政府經審查之後就會按比例資助部份費用。 對於好多有物業嘅老人家黎講，呢個改革無疑係得政黎嘅，不過對於大部份勞動階層或者年輕選民黎講，1.25%「新稅」加埋呢啲改革，就等如全民夾錢保護中產老人家嘅資產（間屋）。同時，肥波亦都違反咗唔加VAT同National Insurance嘅保守黨嘅競選承諾，更令人擔心今日嘅1.25%，未來會成為有加無減嘅變相附加稅。 從宏觀政黨政治去睇，肥波今次「加稅」明顯係財務大臣嘅影響，大家都知肥波一路以黎，特別响疫情期間，都係希望以大政府大消費理念施政，北部嘅leveling up係咁，抗疫期間嘅政策都係一樣，彷彿好似左翼政府一樣。但金融出身嘅財務大臣Rishi Sunak就係堅守保守黨量入為出傳統嘅政治人物，所以一路以黎都有消息話佢多次出手制止肥波亂黎（財相嘅職責本來就係咁）。洗錢？得，收返先洗囉，唔識生錢㗎喎。今次宣布當中都有例子嘅，好似老人護理費用上限，肥波一路都希望係£50,000，但財相就驚地方政府頂唔順堅持至少要£86,000。 最後，都係嗰句，2023年係大選之年，所以真正嘅戲肉唔係呢幾日或者幾個月，而係呢個「徵費」正式獨立嘅2023年。 Patreon一字不改原文： 英國加稅的後續 https://bit.ly/3yMW5uZ #肥波真係勇者 全國左右翼傳媒部份冷嘲熱諷評論： 《Financial Times》How will reform of social care in England work? https://on.ft.com/3DVcb9o 《The Telegraph》I'll tell you what's un-Conservative: failing to guarantee the elderly a dignified old age https://bit.ly/3nbZxgr 《The Guardian》Boris Johnson’s plan to ‘fix the crisis in social care’ is no game changer https://bit.ly/3DYXSkb

肥波「送大禮」，如無意外，聽日就會公布加稅，從National Insurance入手，1.25%。 疫情期間嘅政府消費，英國國民聽日就會知道「找數」嘅前菜。呢幾個個星期英國政府內部盛傳，首相同財務大臣與成班內閣爭拗係咪應該响呢個時候加稅，如果加嘅話如何包裝。去到今日議會重開，睇黎肥波以一敵百，堅持聽日公布以加National Insurance（僱主同僱員各1.25%）嘅方式加稅，政府將來大概每年會多咗一百億鎊，先注資解決年幾以黎疫情令NHS服務嚴重滯後嘅問題，然後改革福利政策。 仲有兩年先大選，時間計得啱啱好....最緊要慣... Patreon原文： 英國首相加稅的謀略 https://bit.ly/38JdlGT #一啖砂糖一啖_ 報導： 《Financial Times》Johnson to unveil £10bn a year tax rise to fund NHS and social care https://on.ft.com/3h8DUK7 *************************************** 📢月頭乞食：文字、時間與心血有價 🥣乞兒兜（月頭課金係最抵）： https://www.patreon.com/goodbyehkhellouk 最近更新： 下議院重開，議長定下服裝新規矩 https://bit.ly/38Mr3Zz 【客席作者葉梓誦文章】回憶的兩種投射方法 https://bit.ly/2YpnOVP 英國如何安置阿富汗移民（純政策分享） https://bit.ly/3tg6YnX 英女皇後事（"Operation London Bridge"）詳細曝光 https://bit.ly/2WVM3uz 八屆Paralympics，從游泳到單車十七面金牌打破英國紀錄 https://bit.ly/3zGwaGl ***************************************

議會新「校長」，校服新「校規」 英國國會聽日响無抗疫限制之下正式重開，即係唔會再有人數上限，亦唔會有視象模式。政治題目未開始之前，啲議員首先就要知道疫情限制過後議會衣著新規矩。 因為疫情令大部份英國國民都work from home，開會見客都係用視象，上身跨啦啦，下面就睡褲拖鞋，就算已經回復正常，好多公司都只係要求員工著smart causal返工，搞到英國嘅西裝銷售額跌咗八成，連Mark & Spencer都宣布全國一半分店都唔會賣西裝。咁近年對議員衣著要求有所改變嘅英國國會，會唔會迎合「新常態」呢？ 2019年大選後當選嘅新議長Lindsay Hoyle睇黎疫情職場samrt causal風氣帶入議會，甚至將幾年前放寬嘅收緊返，回復傳統。 牛仔褲就當然唔得啦，但講明唔可以著Chinos同波鞋，即係唔洗諗扮美式年輕才俊。上一任議長响2017年放寬咗打呔嘅要求，不過依家就鼓勵議事期間要打呔同著住件褸。女士方面，因為兩年前有個工黨議員著跌膊衫以示女權，所以依家指明不論男女都唔可以著T-Shirt或者無袖衫。 "the way in which you dress should demonstrate respect for your constituents, for the House and for the institution of Parliament in the life of the nation." 最後一個新規定就好中學生喇，唔準轆手機。 P.S. 講到咁，點解唔順便要啲議員（特別係首相） 頭髮整齊？ Patreon原文： 下議院重開，議長定下服裝新規矩 https://bit.ly/38Mr3Zz #校規一樣 *************************************** 📢月頭乞食：文字、時間與心血有價 🥣乞兒兜（月頭課金係最抵）： https://www.patreon.com/goodbyehkhellouk 最近更新： 【客席作者葉梓誦文章】回憶的兩種投射方法 https://bit.ly/2YpnOVP 英國如何安置阿富汗移民（純政策分享） https://bit.ly/3tg6YnX 英女皇後事（"Operation London Bridge"）詳細曝光 https://bit.ly/2WVM3uz 八屆Paralympics，從游泳到單車十七面金牌打破英國紀錄 https://bit.ly/3zGwaGl ***************************************