［葬禮進行曲］你四十歲人，去過幾多次葬禮？

TLDR ：Always Go To Other People's Funerals — Otherwise, They Won't Come To Yours

＝＝＝＝＝＝＝＝＝＝＝＝＝＝
一週年！月頭訂最抵！比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費100，已經1900人訂！ 畀年費仲有85折，20/40年費VIP 送本人著作一本。
＝＝＝＝＝＝＝＝＝＝＝＝＝＝

1. 而家聲名極臭嘅朱利安尼，講過相當老派嘅人情世故嘢：婚禮呢，其實唔得閒真係未必要去，反正錦上添花，少你一個唔少。但葬禮，雪中送炭，務必要去支持遺屬，多你一個好多。況且，人可以唔結婚，結婚亦可以唔行禮，但總會死。死咗嘅，唔係完全無親友嘅，總會做啲嘢。當然明顯唔係佢發明呢套講法，佢只係在書講，我亦只係聽人講佢本書講

2. 況且葬禮，相當Flexible，流水席，幾時就到時間咪過去，見到遺屬講兩句，望下有冇識嘅人，喜歡嘅好快都走得。

3. 後生嘅朋友寫咗篇文（https://lkdin.io/3VOb），佢剛四十，即係後生我幾年。咁我呢幾年都冇去過葬禮（我記錯嘅請你報夢話我知），所以我四十時嘅數字，同而家一樣。朋友話三個或四個，咁我應該多過佢。你可以計下，去到你四十歲為止，去過幾多個葬禮。未夠嘅？「自己pro rata返」。「當然唔好計咩法治已死香港已死嗰啲一日去幾次嘅」

4. 當中，不存在咩「四十歲人應該去過幾多次葬禮」，正如我不打算研究「四十歲人應該打過幾次飛機／有過幾多性伴」之類。但背後，總會反映到啲嘢。雖然又話人老咗去嘅葬禮多咗，但照計四十歲呢，你同年啲朋友，一般都未死。你去嘅都係長輩之類，細細個都可以去。

5. 朋友話去得少，反映佢毒，冇乜朋友，同屋企人關係惡劣。可能都有啲關係。我都冇乜朋友，同屋企人關係都惡劣（但好似冇佢咁惡劣，真係人上有人）。但仲有好多因素影響，例如你有另一半嘅，往往就去多一倍。

6. 我試下數，我去過嘅葬禮，應該八個？有兩個我好似冇印象有去到，但照計我係有去的。然後寫完呢篇文我就會洗自己腦，十年後我就又變得肯定自己有去。人嘅記憶幾咁唔好可告！況且我地年代唔興「懷念爺爺」咁影響，好似暫時我都冇在殯儀館打過卡。（然後我查返手機app，原來係有！三次！都話記億唔可靠。咁其實殯儀館打卡冇乜嘢。冇人叫你在入面打嘛。）

7. 我父母好早生我，老母今年62，老豆64．兩個都唔食煙（老豆N年前食，戒咗好耐），所以根據大數法則，健在嘅機會比較大。咁你估到，八個之中佔咗四個嘅，就係阿爺阿麻，阿公阿婆，全數釘蓋，好合理。

8. 我嘗試排序，雖然未必太準。但，頭兩次應該最震憾，冇經驗嘛，況且細個（雖然都十歲以上），有啲驚的。

9. 第一個死嘅，係我阿公，我讀緊小學，四五年班咁上下？嗰時放學成日同老婆出去瑪嘉烈探病。應該係九龍大酒店？冇玩咩破地獄嗰啲，但都真係都仲係一回事，去足全程，同學校請假的。冇守夜，或者有人有但我冇份。阿公印象都多，細個在石圍角村，拎佢本不文集睇，佢又會帶我飲西茶，西多士冇餡嘅年代，幾咁美好。星期六佢睇賽馬，我就睇中間插播嘅大力水手，或者德國波。不過死嘅人太多，不能個個講好詳細

10. 之後係我阿爺，更加親近。冇錯係我出世時已經著咗草去台灣嗰個，堅稱自己冇收片但又走咗佬嗰個。但我有記憶時，佢已經返咗香港做返老正，當然亦唔見有乜錢（聽聞在台灣敗晒）。阿爺嘅感覺，就係唔係幾好老脾，但又唔係會打我嗰種，都係慈祥嘅。但又不過，我完全不能將佢同差佬扯上關係，雖然我一路都知，但總係覺得好似換咗另一個人。阿爺都算死得早，大約我中二三時死咗。嗰時佢臥病在床，我仲在側邊打機，真係不孝。記得佢死前健康當然更差，脾氣亦差，好多嘢唔食得，最記得成日要食田雞—唔係佢要食，係好似唔食得其他嘢。嗰時就開始知道死亡，可以揀真係長痛不如短痛，但邊度你揀？我唔相信阿公或阿爺咁選擇。當然佢地亦未去到話受好多痛苦，或者吊住好耐咁。阿爺最後死在大陸，唔知返去搵神醫定換腎定乜鬼。就係記得解穢酒食過「黃埔炒蛋」，記得阿麻好似幾風騷。唔知係因為照顧病人好累丫（咁阿爺病重時都真係好臭脾氣），定係拎咗唔少錢。冇錯，阿爺到底有幾錢遺產，去咗邊，都係大家扯貓尾，永遠冇真相，有人話根本冇，有人話去咗我阿麻度，有人話去咗我老豆度（應該都有啲），總之冇一仙去過我度。

11. 講咗咁耐先兩件，加快速度。見到嘛？阿公阿爺死先，佢地老婆反而擺耐好多。咁好合理，一來女人長命過男人，二來佢地娶老婆都揀後生，阿公更加係再娶，所以阿婆未咁快。由我中二定中三（1992？），打後十年，好似都冇再去過葬禮。阿婆幾時去架呢？慚愧，我都真係唔係好記得。細個當然都有啲感情，但後來阿婆已住老人院，咁大家知，慢慢就少深，我就更加少去 —唔好記嗰時我已經高中或者大學，有自己多姿多彩嘅生活，主要係溝下女做下愛咁，點都好玩過去老人院吧？你反對嘅，我同你交換。直到而家，我都唔記得阿婆幾時死，甚至唔記得我有冇去佢葬禮（希望阿婆唔好上嚟留言話：仆街仔！你死我都未死呀！），但合理地假設，應該總有出現下？當埘我同我老母關係未咁惡劣，佢叫我去我應該會去。不過又諗下，實情阿婆唔係佢親老母（都話再娶），至於我老母親母，我冇見過的，好早死咗。

12. 然後，又好似一輪高峰，嗰幾年去較多。我阿麻死咗，好似十年前多啲？留意佢最後就住在我而家住嘅地方，佢瞓廳（唔通我瞓？況且床架高，佢爬唔到）。事實佢臨終前幾年，都係同我一齊生活嘅。我係咪喪盡天良？都未完全係嘅。有時都會慚愧，冇陪佢多啲。佢健康尚好時，都試過我返工拎漏嘢佢拎去中環畀我（！），又或者我要帶女返屋企搞嘢時，醒一百蚊畀佢落去飲茶（唔係點？）。

13. 無論如何，當時已經有Facebook，亦係比較深刻嘅。當時係年尾，阿麻之前健康並唔特別差，即係長命病嗰啲當然有，但佢話唔舒服入醫院時，都仲係自己執嘢自己叫車。佢去醫院時我都探過下佢，都仲係幾健康。但話咁快。有一日我老母打嚟，就同我講，「你阿麻走咗啦」。我想講，我老母當時在屯門醫院返工，阿麻亦都住屯門醫院，我真係以為佢嘅走咗係出咗院，然後佢先話我知。當時我在公司，仲係十分搏命嘅分析員，我甚至諗緊使唔使放工先去，好似有上Facebook出post，甚至諗係咪要坐的士之類。無論如何最後就坐的士，去到叫做見佢最後一面（已香，但仲在床上，明啦）。

14. 往後嘅事，好多人都聽過。見完最後一面，不過係午飯時間咁上下？我返咗屋企瞓（分析員嗰時七點幾就返到公司，我係摸黑出門的）。然後？我去咗旺角。做乜？睇戲。同埃汾太睇戲。睇嗰套戲，叫做《3D娜塔莉的情人》，聲稱係全世界第一套3D韓片，條韓妹好靚，又好波，我都冇深究係咪整，有乜關係？

15. 我走咗去睇《3D娜坦莉的情人》（https://bityl.co/8Hsd），非常之卡繆，非常之《異鄉人》。我甚至應該係因為睇咗《異鄉人》先會咁。成件事我已經唔係好記得。我上一次寫文，係講「咁買咗飛丫嘛，唔通唔睇，點預到佢咁啱嗰日死」。但，我諗返件事唔係好合情理，首先嗰個年代，我好似仲唔多興網上買飛。之但係又不過，如果我唔係一早買咗飛，照計我唔會特登出旺角睇戲？Anyway同埃汾太睇完，就梗係上床啦。都話十分之《異鄉人》（正因如此，如果我冇買飛，點會特登出旺角？唔係叫埃汾太返屯門會簡單啲？留意我午飯已經返咗屯門）。第二日，我照樣七點半返到公司。冇能力的人嘛，唯有早返工。

16. 埃汾太當然都見過阿麻，食過好多次飯，當然都有去葬禮，不過遺憾阿麻冇機會見到我成婚。亦冇機會同我影畢業相。當然遺憾係佢嘅遺憾，我先唔理呢啲嘢。咁而結婚亦冇可能特登就阿麻，況且當時亦唔知佢就死，佢都唔知自己咁快死。但畢業相嘛，理論上可以就老人家嘅，不過事實上港大行畢業禮時我已去咗英國，英國行禮時我又返咗香港，而我又唔會唔係正日自己搵套衫同勞蘇影相咁

17. 第幾個？數完第四個。然後第五個，我老豆老婆（非我老母，但亦唔係「後母」，都冇一齊生活過，正如我老母老公我都唔會叫「後父」，佢出現時我都中七啦大佬），其實時序上早過我阿麻，但舖排上好似應講晒麻爺公婆先。實在件事有點複雜，我亦都唔係好想講。當然唔係死者嘅問題，又唔係我問題，係顧及下其他人感受。話說我老豆老母，在我阿爺死後就好似離咗婚，冇因果關係，但時間大約係咁。我老母再嫁但冇小朋友，我老豆再娶，生多咗件，所以我有個同父異母嘅妹，不過比較少提，亦唔係十分熟。但講時講，我老豆呢個再娶嘅對象，廿年前左右就死咗，自殺的，燒炭，成件事十分震憾。當時係我大學畢業後，去英國之前，我在老豆公司過下日晨（係佢返工嘅公司，唔係佢開間公司咁爽）。佢都有講另一半抑鬱症呀之類，然後事發當日我甚至係同佢一齊在公司的，不過冇同佢一齊返去破門，嗯，成件事都幾震憾，所以我都唔係好想講太多。佢嘅葬禮我有冇去？我估應該有吧？（我同死者關係並不差，反正都唔會成日見到，亦冇啲啲咩「你拆散咗我屋企」嘅憤恨，畢竟真係冇人拎支槍迫我老豆有婚外情的，對不？）

18. 第六個，我外母。同樣地，涉及其他未死嘅人不講太多。當時我已經結咗婚，當然係有去葬禮的。不過講真，結婚冇耐外母就去咗，一直都唔係太多交集，同外父就多啲。外交仲係好健康，日日炒股票，大家有心。

19. 第七八個，算唔算特別少少？第七個係恐龍，冇錯，就係叫恐龍。中學同學嘅大學同學，成班一齊玩，稱不上極之好朋友，但至少會私下傾計兩個人食飯咁。點死的？自殺。我仲記得佢在甚麼教堂定乜做後事，平日嘅夜晚，我仲要一半走咗出去同倫敦鬼定美國鬼conference call講港交所。嗰時嘅工作真係十分困身。真係搞搞下嘢在時鐘酒店 conference call又有，聽聞有人一路conference call一路被吹蕭（唔通幫人吹咩），無從證實，但唔係我。亡友好多金句，被其他朋友拎出嚟講，例如嗰句「呢啲我愛你呀會結婚呀，性行為嘅潤滑劑嚟啫，唔想講嘅咪去樓下買支KY，雖然凍啲但效果唔爭太遠」，好多人以為係佢創作，實情係我話佢，佢發揚光大的。

20. 如果我冇記錯，亡友好似細我兩年，副作用就係我在英國返嚟香港後，仲會借用佢啲大學戶口做各樣嘢，例如上呢個 data base搵工．我最記得，好似嗰時佢畢業我未搵到工，佢都有安撫我，同我講，「唔緊要，一個恐龍倒下，仲有竹萬萬隻恐龍」—講嘅係佢細佬仲讀緊大學。不過後來我冇用到恐龍二號，放心，我搵到工，佢都搵到，佢死時我都差不多離開金英了，好似2012年前後？

21. 多得電話，我都仲保留住同佢最後嘅message（當然唔知佢自殺），就係我推介完元朗嘅煲仔飯，佢覺得好正。就係咁。後來我都仲成日去，都會諗起佢，雖然我同佢冇一齊食過。

22. 最後一個，你可以話「最不重要」，但亦係性質上完全唔同。工作上嘅……前輩？唔係我本書鳴謝嗰幾個，但係嗰堆人。亦都係自殺，相當震驚。佢不算同我極熟絡（雖然我在倫敦出trip佢都打畀我有嘢搵我救火），亦唔算直接幫咗我極多嘢（咁當然都有啲）。但始終係個慈祥嘅長者，亦係業界有啲聲望嘅人。壇嘢都搞得幾大，俗啲講句，生前好友們幫佢風光大葬，算係極度榮哀？未致於好似「大時代」咁，但的確見到一啲猛人，甚至會同我講「佢都有提起你」。

23. 我記得應該係英國脫歐公投嗰年（冇錯，相入面嗰次，睇返日子正係公投之後嗰日），就係我最後一次去葬禮，就係呢位前輩。我嗰日不停心諗，到底葬禮係咩回事？係畀邊個睇（當然係畀生嘅人睇），係為咗表達大家對佢懷念？定係話畀大家知，第時你死咗大家都會咁對你？

24. 總之，都係嗰句，Always Go To Other People's Funerals — Otherwise, They Won't Come To Yours

25. 冇乜特別，都唔算寫得特別好，甚至差過我朋友，「都幾大鑊」，只係留個紀錄。另外，關於葬禮，寫過篇舊文，原來都未夠一年前。舊文就寫得幾好（https://fbook.cc/3Z0d）

26. 不過有個講法，一個人死兩次，最後一次有人提起佢地先係真正死。咁以上呢啲故人，我又幫佢地續一續命咁，個感覺好似泊車餵錶咁。以前仲有個紅色旗，十分有實感。

＝＝＝＝＝＝＝＝＝＝＝＝＝＝
一週年！月頭訂最抵！比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費100，已經1900人訂！ 畀年費仲有85折，20/40年費VIP 送本人著作一本。
＝＝＝＝＝＝＝＝＝＝＝＝＝＝

［藺相如，司馬相如，名相如，實不相如］（＊）咪講笑！同Freddie Mercury同Billie Eilish 齊名！獲得誠品認證！我是一個文青！

TLDR：屯門牛呢，真係睇好嘢都慢人一步，睇戲又多垃圾。所以要有馬蘭頭獎學金

1. 實情係屯門誠品，已經有貨。都話日日去睇，我仲發現搬咗位，原本係在啲財經書度，而家已經literally 「上神枱」，同Freddie Mercury同Billie Eilish 齊名！雖然暫時我都未見有任何人拎起嚟睇。實情咁耐以嚟都冇！

2. 又，真係的，明明銅鑼灣，太古同尖沙咀誠品都一早有，屯門就要再遲啲。真係鄉下地方資訊不便。「啲小朋友都要遲兩個星期先接觸到啲高質毒物」。

＝＝＝＝＝＝＝＝＝＝＝＝＝＝
一週年！月頭訂最抵！比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費100，已經1900人訂！ 畀年費仲有85折，20/40年費VIP 送本人著作一本。
＝＝＝＝＝＝＝＝＝＝＝＝＝＝

3. 你真係唔好睇少呢樣嘢，What we talk about when we talk about 村上春樹？好多人都知道佢開coffee shop/酒吧，收工在廚房寫嘢。亦都有啲人聽過個契機係明治神宫野球場（我都去過朝聖），養樂多燕子隊

4. 但再之前呢？村上春樹係關西人，京都伏見出世，但神戶讀高中。佢唔止一次提過，神戶改變佢好多。神戶係個海港，易接觸外國文化（你見仲有異人館），佢就在嗰度睇好多西洋文學。

5. 我話睇書都慢人兩星期，當然只係講笑。「而家屯門都有Donki」「仲有Mirror」。但，你可以留意下，屯門戲院（屯門戲院並唔單指「屯門戲院」）上嘅戲，都真係同「市區」唔同。唔通會上《惡與他們的距離》？主要都係上「長相屍手」之類。有人話歧視，有人話市場考慮，「啲屯門牛就係睇垃圾」，乜都好，客觀結果都係一樣。喂，呀影帝林家棟，都公然恥笑去巴倫紐睇戲嘅人啦。2015年咋喎，香港人好尊重本地電影咩？（而不幸地，套《點對點》我都有睇，但居然唔係在巴倫紐！正如導演話頭，根本巴倫紐冇上呢套戲，全新界得葵芳新都會上，我就在嗰度睇）

6. 你都唔好話冇影響，我講兩件事你知。第一，好少同人講，當年我買樓，係有諗過買駿發花園嘅。咩話？駿發花園在邊？點解我會想買？「駿發花園咪會樓下上《惡與他們的距離》」。最後點解冇買？唔係因為冇錢（我有咁窮？況且我講緊2013年），而係因為懶，同埋我諗真啲，「我買完百老匯電椅中心搬走我咪仆街？去廟街聽數波波定食煲仔飯？定學麥路人郭富城咁去聽楊千嬅唱歌？」。第二，當然係因為我懶。租開我老母（真係我老母，唔係助語詞）屯門嗰樹好地地，咪買埋佢。係呀，買架，咪撚以為佢送畀我。電視框？框你老母（呢度就助語詞）。創屋苑尺價新高添呀！虎毒不吃兒呀。「不過冇人拎支槍迫你買」「況且之後都升咗好多」「所以真係唔使怕高追，咪縮數話咩等調整」

7. 一念任天堂，一念海天堂。一念八天堂，一念朱天堂。如果我當初買咗駿發花園？而家我係咪好有文化我就唔知，「但應該執多幾球嘢」

8. 講返，我變成「港片之鬼」，你估係偶然？並唔只係因為我細細個鍾意睇港產片。喂我年代啲小朋友，個個細個都睇港產片架啦，但大咗佢地自然就會覺得好check，我溝過N條港女，都以自己唔睇港產片為榮，我最鍾意都係我問佢睇乜戲，答曰「我個人冇乜所謂不過唔睇港產片」，充份反映到港女嗰種自以為嘅優越感同懶撚係considerate，多撚謝喎。不過我都冇諗住同佢去睇港片，因為我主要係為上床。到後來睇港片先有得上床，就係後話，只能講句十年河東，十年煩西

9. 我之所以到中學都不停睇港產片，主要係因為一個人。他的名字叫徐一刀。四十歲以上嘅麻甩佬應該聽過。根本就係香港全裸監督村西徹，佢進軍海外時吳宇森都未去荷里活。佢就係自己親身上陣，同「五十嵐」一齊拍愛情動作片

10. 但關我乜事？我又唔係蘇B（一個徐一刀有份用嘅演員）。主要係，徐一刀係我同學嘅舅父。咁佢就畀好多免費戲飛我地睇，當然唔係睇佢嘅戲（當時我中二咋），而係可以去睇任何戲。我唔知係咪只係港片，但肯定嗰時咩 凱都呀， 巴倫紐呀，仲有「屯門戲院」，都好多時係上港片。

11. 我仲記得我第一套用佢嘅飛睇嘅戲，就係《水滸傳之英雄本色》，李克勤唱主題曲，梁家輝做林沖，徐錦江做魯智深，劉青雲做大茄，但最正係豹哥單立文做高俅個仔去淫辱林沖老婆王祖賢。

12. 另外仲有《風塵三俠》（梗係柏安妮嗰套），仲有套日本人拍但廣東話配音嘅《三國志》（1990年代初，已經好過《三國無双》N倍，可見周顯揚真係食撚屎的，係呀，我又要好波過美斯先可以評論？）等等。可見我嘅中學年代，就係咁渡過。

13. 然後你諗下，埃汾太（名校女生嘛）。人地呢，午飯去Pacific Place食嘢—仆你個街到我在金鐘返工我都仲嫌貴呀！另外有個朋友仲誇張，中學年代，去「有馬」日本料理午餐。

14. 朋友同我同年，但你老味，我地年代在屯門？日本嘢？「就係去八佰伴食熱海麵屋」，好撚難食的，難食過味千。當然我好後來先知道，熱海係地名（大佬呀，嗰個年代冇維基百科，又冇一年去十次日本），而八佰伴第一間店，就係在熱海。

15. 至於我嘅名句（其實係朋友講），「嗰時食百人一朱已經覺得自己好撚high」，sorry，呢個係去到出嚟做嘢嘅事。仆你個街，我去到教書嗰時，兩皮嘢個月，都係同成班搣時去荷里活（梗係鑽石山啦，好彩未去旺角荷李活）食百人一朱咋！（話時話，就快又七夕，有冇人未聽過七夕搣時嘅教事？）

16. 睇到呢度，你心諗，有冇咁誇張。都真係有的。例如我估我好似去到2000年，即係，大學畢業，我先知咩係Tiramisu，「開頭以為日本嘢」。而家啲小朋友，幼稚園茶點都食喜知次一夜干啦！

17. 真的，as a 學霸，我博聞強記嘅能力，叻過好多「名校」嘅普通學生。但行出嚟就係冇嚟貴格，食幾多貴格燕麥片都冇用。「即係余文樂咁」，真係好多年先洗到嗰種新界牛嘅味。

18. 你話冇影響？有機會我細寫。但當年我去in Oxford獎學金，邊個in我？係李兆基，冇錯係四叔。仲有楊鐵樑。同埋羅德丞（唔係羅傑承），同埋一條牛津嚟嘅鬼。喂，我見到都變秦舞陽，腳震震啦。最記得鬼佬問我點解地盤啲鐵係工字型，我都答唔出，但其實我係知嘅。（BTW，當年我報N展，真係好彩冇收我）．後來當然獎學金拎唔到，做唔到乜乜學人，返去港大繼續have fun stay poor．四叔變咗亞洲股神。楊鐵樑變咗教英文。羅德丞？選唔到特首，冇耐死撚埋了。（原來都隔咗十年）

19. 事後諗？如果我醒少少嘅，我應該話畀四叔知，我阿麻係順德大良人。我成日返去的。拿，呢啲咪分野。但冇計，歷史沒有如果，洛賓2010年球單刀如果入咗？

20. 寫咗好多，都唔係咩獅子山下可歌可泣。你心諗，而家扁平化咗好多啦。而家屯門都上到NetFlix嘛，屋企都睇到 德國飛機吸血片啦，有得上網，拉近晒啦。

21. Yes and No．但其實，個世界，都係向比較有錢嘅人傾斜嘅。我甚至覺得，我幾幸運，我年代都仲可以叫做「上流」，即係一個普通家庭（唔好講到自己赤貧啦，至少有錢去睇戲）嘅屯門仔，都仲有得發下圍。而家？未必冇，但大家心知，越嚟越難。

22. 最新嘅趣聞，英國A Level，一半人A或A+。因為多咗Teacher assessment，fuck that 教師好專業唔偏私。但有乜所謂？好似阿婆賣紙皮咁，你會噴水上去，我又自然會計返你平啲。英國好嘅大學，更加大條道理自己搞admission test，甚至乎用自己嘅discretion—冇錯，就係傳說中嘅去緬甸做義工。點解啲名人富豪仔女都入到名大學？真係叻啲？你話呢？

23. 寫咁多，冇錯，最後都係講「馬蘭頭奬學金」嘅理念。呢個年代呢，你做屯門牛又冇錢嘅，真係比較大鑊。可惜我暫時都仲係只有理念，未有好多錢，更重要係未有執行力。但，總會搞到出嚟。

（＊）又，我都係早排先知，司馬相如唔係真名，正如河國榮崇拜張國榮，佢因為崇拜藺相如先叫自己司馬相如。正如司馬遼太郎，都係因為崇拜司馬遷（應該唔包括腐刑嗰part），但自愧不如亦係自謙，先叫自己司馬遼太郎。

似乎姓司馬嘅都啱呢味嘢（司馬遼太郎又會姓司馬啦！）。不過司馬賽兒，就唔係因為鍾意馬賽所以變咗馬賽。主要係鍾意波圖。講返，上季法甲馬賽第5，冇歐聯踢，所以要等波圖歐聯分組賽第三，先有機會馬賽對波圖

＝＝＝＝＝＝＝＝＝＝＝＝＝＝
一週年！月頭訂最抵！比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費100，已經1900人訂！ 畀年費仲有85折，20/40年費VIP 送本人著作一本。
＝＝＝＝＝＝＝＝＝＝＝＝＝＝

［國際學校嘅嘢］感覺呢間嘢都幾唔掂，「仲要海濱花園」，「仲要出埋中文廣告」。一係就出簡體字算啦。「但我懷疑簡體字人未必吼」

1. 即係，我英文都唔係十分好（拎個B仔啫，況且畀高我啦）。所以一般都唔會指正人或乜。況且有時語文嘅嘢，都真係幾多主觀，約定俗成，現代用法同五十年前又唔同，鬼佬日常用同你讀書又唔同，搞搞下就變成語文塔利班或者何文匯，十分煩膠。

2. 不過啦喎，真係久病成良醫，我睇得多英文，自己寫就唔得啦，但大約都識分邊啲好邊啲唔好。呢段東西，唔少位我都覺得怪怪地，「完全好似我寫咁」，等你地專家出嚟指正。

3. 但，30,000 square foot，係feet 下話？

4. 而我相當肯定，個advance是錯的。陳芷菁mode，話晒本人啲Proof Reading都幾高分的。

＝＝＝＝＝＝＝＝＝＝＝＝＝＝
月頭訂最抵！2021比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費100，已經1800人訂！ 畀年費仲有85折，20/40年費VIP 送本人著作一本。

5. 順手自抽，我本新書都唔少錯字。有個讀者全部幫我列晒出嚟整咗個list，都好似有廿幾三十個（未計佢未見到嘅），7萬字，「兩千幾三千字先一個，又好似唔係好多」

6. 但實情，編輯嗰邊已經睇咗第一次（係有捉到不少錯字的），我又都睇咗第二次。都仲係有二三十個，所以我同個讀者講，早知搵你做義工校對。

7. 不過啦喎，「都仲係有啲唔同」，首先我嗰啲好多係打錯字，意義上有啲唔同。二來，我唔係出廣告嘛。三來，我唔係教人Grammer或開國際學校嘛。四來，你出個Post圈我啲錯字，咁都係冇得投訴的，因為真係錯嘛。五來，我篇文仲要講多兩千字幾多嘢嘛！

8. 講開國際學校，本人識條鐵，反正又冇小朋友。不過呢，第一印象當然係「逃學威龍」。第二印象就係大學年代有一期我在浸會（大學，唔係醫院）返暑期工，做打雜，咁放工成日都在又一城，睇下書（Page One）睇下戲（AMC）睇下女（好大個冰場，但我係睇看台上面嗰啲女，唔係踩冰嗰啲）。呢，台上面嗰啲女，就好多係附近國際學校的。

9. 後來到我表妹都讀國際學校，就詳情不方便透露啦，陣間又有人唔高興。不過呢，我就未變態（其實有乜咁戀態？）J我表妹的，我大佢十幾年，「雖然佢啲仔仲老過我」，但我舅父好撚煩的

10. （好似以前都寫過文講我舅父，我對佢嘅感情就複雜啲，外甥多似舅，是真的，我情況絶對係，我唔似任何親戚，但真係講最似，唔係老母唔係老豆唔係叔伯父表哥，而係舅父。都話佢比我十五六年入港大，雖然係雞科，但都係勁，仲要真係窮門，石圍角公屋咋，唔好話自己房，係連碌架床都冇，在廳瞓帆布床咋。而當年我就係睇佢啲讀者文摘呀，地球的奧秘呀，甚麼二十世紀大事回顧呀，咁學埋好多嘢，所以影響我幾大）

11. 之後呢，港大年代，我都周圍幫人補習，托賴高考成績好，港大個招牌又呃得下人，啲家長都唔介意我係大西北窮書生（雖然有啲會擔心我溝咗佢個女，事實亦有啲家長幫個女補習唔會請男仔，咁又事實我第一次上床就係同個補習女學生，可見啲家長嘅擔心合理，雖然擺明條女唔係第一次，應該係我老母去投訴佢個女多啲）。

12. 嗰時都補唔少名校學生，咁又出得起錢呢，況且太雞嘅我都費事補。咁除咗令我見到啲有錢人嘅屋企外，亦都真係發現—屌，有錢人啲女仔都真係靚啲，冇得講。反而仔我覺得分嘢冇咁大，有啲幾有錢讀名校嘅都係七六一條。

13. 咁當然，國際學校嘅女都有補，so happy，係靚啲的，打扮都唔同。有啲仲要講英文添，都有啲吃力，但又令我啲英文冇大幅下降。旨意讀港大就真係含得撚。我一路都話我港大畢業後嘅英文水平，一定低過中七嗰時。當然都好大程度係我自作自受，刁，我年代嘅價值觀呢，大學唔係教埋你英文下話（而家就大學中學化，教埋你普通話，教埋你英文，甚至教埋你見工，教你創業，爭在未教你點扑嘢）

14. 國際學校啲女，係真係唔同的。有個當年隊草添，真係對我嘅三觀造成幾大嘅衝擊。放心，冇甜，不過佢wing 下 wing下，我就錢照數。而我當然係幾年後去到英國先知嗰啲係草味。

15. 回想返，當時我都真係一個補習之霸。雖然我年代其實唔係好多地方洗錢：你見我暑假返浸會大學做打雜咋，嗰時邊撚興咩一年去幾次日本，澳門都冇得你去啦。咁有女，但梗係帶返宿舍或自己屋搞啦。又冇埃瘋，真係冇咁多嘢洗錢的。但冇法，嗰時真係開始接觸到花花世界，瘋狂補習，係多到有錢剩的 — 我仲要交租喎（第二年我在正街住，第三年住西邊街）。

16. 另外都要再提，嗰時有個好過癮嘅補習學生，其實應該相認到，皇仁仔，讀醫，住置富的（你老母不如開埋人地名丫，好似姓劉的）。過癮在，佢會考係9A的，勁過我，但都搵我補。佢老母（真係佢老母！）有玩試鐘（有錢畀返啦，都唔係罕見），個仔同我就一拍即合。高手過招呀，佢都叻，但我就數學叻佢些少咁多，就係可以幫佢突破到再多一層。補足兩年，佢如願讀醫，十分生，老母都好安慰（冇病），臨尾好似醒咗一兩皮嘢酬金畀我，真係十分感動。

17. 而家諗返，雖然補習嘅經歷都唔少（甚至令我有得做愛，雖然就算冇嗰個學生都遲早有愛做），但都係有啲後悔的。亦係我書有講嘅嘢。學生年代，真係唔好去搵錢，因為你根本搵得唔多（你去援交另計，但有其他問題，例如會衝擊你三觀，另文講）。後生細仔吸收力大，你畀我揀多次，我就寧願唔好補咁多習。講真咪多幾千蚊個月，一萬蚊好未？小錢嚟的。但當時應該去裝備自己，睇多啲書又好，學好啲煲冬瓜又好，學好啲德文法文日文韓文又好，睇多啲戲又好，乜都好。就係拎去搵錢，唔化算。因小失大

18. 呢個亦係我搞呢個「馬蘭頭獎學金」嘅原因，雖然十劃未大一撇。順手澄清返，我本書，128蚊本，初版2000，你當賣晒，你估我好多錢落袋咩。根本就算賣晒都係我倒貼啦，定你以為我啲獎學金一千幾百咁仆街？所以唔使小人之心覺得我借呢啲嘢cap 水。我又係嗰句。「我打次方榮記都千幾銀，使唔使寫7萬字呃你錢？」

＝＝＝＝＝＝＝＝＝＝＝＝＝＝
月頭訂最抵！2021比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費100，已經1800人訂！ 畀年費仲有85折，20/40年費VIP 送本人著作一本。
＝＝＝＝＝＝＝＝＝＝＝＝＝＝

魚蛋，將廉價魚剝皮拆骨打肉，化腐朽為神奇。王老太，王林記魚蛋粉靈魂人物，粗壯爽朗；年輕時是個美人胚子，困頓苦學至中三，在六十年代殊不簡單。

「我有個老師說，人的遭遇講你出生的環境。龍生蛇竇，你就當蛇，蛇一樣的遭遇；鳳生雞巢，你最叻也在雞群，飛不到哪裏。」68歲的她，從沒飛出筲箕灣，和魚蛋糾結大半生：小時在魚蛋檔劏魚；24歲嫁予魚蛋佬，做魚蛋軋斷三指；後來魚蛋佬變醉酒佬，工場與店，她苦苦獨撐……橫逆不息，她一一用狠勁對擊。鳳，終究不是雞；就像草根魚蛋，也蛻變為代表香港的美食。

王林記在筲箕灣東大街的盡頭，平日店外沒人龍，但由六七點早市直下，幾近座無虛席。不獨賣魚蛋粉麵，還有濃郁豬手清腸腩白飯多士；來的不是漁民街坊，就是白領熟客。王老太說，兒子阿傑認為貼名人相太老套，所以常來的發哥周潤發、方中信等全沒合照。


不過，眼前的王老太實實在在是一本魚蛋秘笈。是日清晨七點，跟她接收香港仔買手運來的漁獲。卸魚時，她已知魚新鮮不新鮮：「你看，䱛魚眼仔精精靈靈，好新鮮；倒下來那一下是雪味而非腥味，不新鮮才有腥味。」王老太中氣十足，聲大自信。

這天收了䱛魚、黑門鱔和鰽白。「竹籤（魚）我們也照打，因為現在魚很缺乏。今天有，明天不知有沒有。」她見過內地兩三層高「鐵拖」漁船，「戰艦一樣大，有先進雷達，一掃（海裏魚）就捕光了。」十多年前她發覺漁獲漸少，已置雪房，「魚多我就買多些，先冰封它，無魚了就要拉出來用。」

魚要有魚味
「做魚蛋，魚一定要新鮮。」王老太常掛嘴邊。「魚唔靚，你怎樣雪都無用，但新鮮的魚雪了，牠會有幾成靚存在。」在缺魚如休漁期，她預先冰封「撚手貨」，打魚蛋時再混合艇家釣回來的鮮魚。


今天，很多行家採用供應穩定、由越南菲律賓入口的大黃鱔，「那種大黃鱔，肉很白淨，但無味，你要放味道下去。」王老太鍾情中國海域的黑門鱔，「這種鱔魚肉鮮甜，我們潮州人很喜歡用來煲粥，放鹽和少少冬菜，那煲粥就好正喇！」如此鮮味用來打魚蛋，就不需要放太多調味料了。坊間魚蛋有些死實實，有些爽如蒟蒻，她形容「鬆化」才是正宗潮州魚蛋。人家多少會混些澱粉，她卻堅持全用魚肉不下粉，「我們喜歡幾種魚混合，譬如九棍、黑門鱔、大䱛細䱛，纖維不同；愈多種魚，俗稱的明膠就愈強。」至於魚肉混入多少水分和鹽、浸魚蛋怎樣調節水溫以致一粒魚蛋內外爽彈又鬆軟，全要歲月磨練。王老太的叔仔王炎興打了魚蛋50年，就在王林記擔大旗。

鳳生雞巢
不同魚種的纖維、黏性、魚味濃淡……王老太了然於胸，畢竟做魚蛋超過40 年，可是這並非她原來想走的路。她本名劉蘇女，祖籍潮州，在筲箕灣東大街出世，童年喪父，母親再嫁，弟妹眾多，小時候就很窮。「我們去魚蛋檔幫人免費劏魚，人家就送些魚頭魚春給我們作米糧。魚春當飯魚頭做餸，不飽，只是滯。」她想起也打嗝。

因為母親不識字，常被人欺負；蘇女誓要讀書，靠賣爛銅爛鐵讀上小學。她樣子像混血兒般玲瓏標致，成績也好，是校內的風頭躉；順利考上中學，卻交不出學費，加上家人溫飽排首位，只有去工廠打工，但仍爭取返金文泰夜校，努力讀至中三才再沒有精神兼顧下去。

「知識改變命運」終成泡影。就在失落的14歲，芳心許了同鄉小子王炎林，「我們青梅竹馬，也是初戀，雙眼盲咗！」王老太回到少女時，笑眯眯。24歲那年，患癌的母親病危，為了沖喜，二人半夜拜了王家祖先草草完婚，「媽媽心事了卻，我結婚那天她就走了。好淒涼！」

本來，丈夫在北大酒家做燒臘，沒多久轉跟他大哥學打魚蛋。「我好怕做魚蛋，因為我小時拿着石春揼魚，揼到手指全彎了。」當時她沒選擇：「嫁雞隨雞飛，嫁狗隨狗走，嫁隻馬騮通山走。老公做魚蛋，你就跟他做魚蛋。」

1979年，兩口子在山邊台（筲箕灣天后廟後山）母親遺下的山頂小木屋開設工場，做魚蛋批發。她日做最少18小時，每天吃11碗飯但體重才90多磅。「那時夜晚12點才吃晚飯，男人睡了，我還要洗衫洗尿片洗碗，兩點才睡。朝早四點五點就要起床，魚蛋我一個人浸，一個人切，一個人炸……到老公起床時，我第一批貨已經要出了。」28歲那年，因為睡眠不足，「絞魚肉，一插，插了入去，沒了一截。」她輕描淡寫，摩娑着左手三隻手指：食指和無名指指頭被削平，中指斷了半隻；今天已不當一回事。

牛的反抗
日積的勞累褪盡鉛華，88年蘇女腰痛至無法再推貨上下山，於是和丈夫商量買了東大街現鋪，前面擺十幾個座位賣魚蛋粉麵，後面做工場。兩口子從零開始，胼手胝足捱到有樓有鋪頭，她一直等待上律師樓和丈夫簽契聯名做業主，可是丈夫早已靜靜寫了自己的名字。

「為何我沒有？」有天她忍不住問。「有甚麼呀？你似甚麼呀？你似一隻牛罷了！牛耕田馬食穀。你有腦嗎？你無腦。」王老太憶述丈夫的回應，依然動氣。「就被他一句驚醒夢中人，原來我是一個無腦的女人。」抹乾眼淚，她明白不需再為這男人仆心仆命。

蘇女大解放，即刻重拾舊夢——返夜學，去英國文化協會讀Free Talk，又去劉家傑那裏學英語。家婆是個守舊潮州人，重男輕女，「我生了三個女，她已不喜歡；我讀書更加不得了。她說，你讀這麼多書為何？你想控制我王家呀！」丈夫以前打魚蛋，因魚肉要加冰，冬天尤其寒苦，習慣飲烈酒如瀘州大麯、拔蘭地禦寒。那時已上酒癮，功夫盡喪，也不忘揶揄她：「你學這麼多英文幹甚麼？東大街有幾多個鬼佬跟你說話呀？」

41歲的蘇女做到七勞八傷，於是向丈夫「辭工」。她一離開工場，丈夫無法做下去，唯有將工場和訂戶一起讓給五弟炎興。蘇女不參與批發，只負責店鋪樓面，丈夫自此再沒給她家用。「家婆教他不要過錢給我，怕我『走佬』。實在，我不捨得四個子女，不容易放棄這個家。」她於是跟丈夫「講數」：「得！你不用給我錢，但你供仔女讀書、出國留學。」丈夫對子和女總算公平，後來讓大女和孻仔放洋讀飽書。

貓狗也溫飽
2002年，王老太跟叔仔商量將王林記現鋪全做門市，在對面街另置工場。其時丈夫終日醉昏昏，店務早由她一手打理。至於4年前開大坑分店、今年9月開柴灣分店都是兒子接棒的後話，丈夫無從見證，因為7年前他「被酒浸死了」。

王老太自小命途多舛，心有千千結。45歲到志蓮淨苑學了4年佛學，種下因緣，慢慢放下從前怨恨。「兒女眼前冤，夫妻渡客船。到底是我太強，還是他太自卑？難說。對我老公恨與不恨都算數喇！總之我日日都有三枝香插給他。」她哈哈大笑。

現在，她在王林記已是半退休，主要任務是買魚收魚，9點吃過魚蛋早餐做了QC，便去筲箕灣避風塘游泳兼餵野貓野狗，風雨不改。三道防波堤不接陸地，十足孤島，上面卻有很多水上人棄養的貓狗；王老太見牠們無水又無食物，於心不忍。王林記每日都用老雞熬高湯，她就挑骨留肉，混入魚腩或牛腩碎作貓糧或狗糧。

「我餵了30年了。我們這一代，小時最緊要有溫飽。」她笑言，小時侯信基督教和天主教，因為前者派奶粉，後者派米，餓肚皮話事。因為自己困難過，幾十年來她買魚日日清數，不需買手墊支；教子女做生意，不可騙人也不可欠夥計錢。

「人又好，貓又好，狗又好，最緊要有溫飽暖著。」她慣租的小機船駛向石壆，高呼一聲：「貓！」十幾隻肥貓即從四面八方的石罅跑出來，翹首朝她喵喵叫；其他堤上的黃狗、黑狗，未待叫喚，老遠看見她，已不停搖着尾巴蹦蹦跳。

撰文：韓潔瑤
攝影：梁偉德

王林記魚蛋粉
地址：筲箕灣東大街10號東寶大廈地下A號鋪
電話：2886 0068
營業時間：星期一至日 6:30am-8:00pm
詳情： http://bit.ly/2R7wbwZ

===================================
立即Subscribe我哋YouTube頻道：http://bit.ly/2Mc1aZA (飲食男女)

新店食評，名家食譜，一App睇晒！
立即免費下載飲食男女App： http://onelink.to/etwapp

《飲食男女》Facebook：http://www.facebook.com/eatandtravel

飲食男女網站：http://etw.hk

Follow我哋Instagram，睇更多靚片靚相：http://bit.ly/2J4wWlC (@eat_travel_weekly)