我係天才兒童(上)
. 「阿細哥,大家都認為你係『千年難得一遇嘅天才』,你點睇呢?」
.
面對記者嘅提問,我好想答,我點止係千年難得一遇,我直情可以領導成個民族走向興盛。
.
不過,我都知道「謙虛」嘅重要性。
.
所以我微微一笑,然後答:「大家過獎啦,我只係喺『閱讀』方面有優勢。我會努力幫助大家,令...
我係天才兒童(上)
. 「阿細哥,大家都認為你係『千年難得一遇嘅天才』,你點睇呢?」
.
面對記者嘅提問,我好想答,我點止係千年難得一遇,我直情可以領導成個民族走向興盛。
.
不過,我都知道「謙虛」嘅重要性。
.
所以我微微一笑,然後答:「大家過獎啦,我只係喺『閱讀』方面有優勢。我會努力幫助大家,令我哋民族更加輝煌!」
.
記者又問:「你係幾時發現,自己係天才㗎呢?」
.
「咁就要由我細個講起......」
. ,
一個月黑風高嘅晚上,一個饑腸轆轆嘅家庭。
.
我阿哥感慨:「阿媽,呢個屋苑咁多人住,我哋一定可以搵到合適嘅住所,到時就有嘢食啦。」
.
係啊,做曱甴真係好慘㗎,為咗食物,我哋要同人類一齊住,
.
但人類性情飄忽,有時留低好多嘢畀我哋食,有時又發晒癲咁追殺我哋。
.
所以,我哋成日都要搬家,居無定所。
. ,
呢個時候,我突然見到牆上有張告示,話呢棟大廈已經請咗滅蟑公司,即將進行「滅蟑大行動」,會大量噴殺蟲水之類。
.
「蟑」咪即係我哋?我即刻指住張告示:「危險,唔入得去!」
.
我全家都一臉迷茫,阿媽問:「阿仔你指咩啊?嗰度有張紙,紙唔好食㗎。」
.
我好心急咁解釋:「紙上面有字,話要滅蟑......」 .
,
阿媽神色凝重:「咪住先,阿細,你睇得明人類嘅文字?你喺邊度學番嚟?」
.
我呆一呆,呢個時候,我先意識到,蟑螂係唔識字嘅。
.
人類係食物提供者,同時亦係我哋最大嘅敵人,既係神,又係魔。
.
我哋聽唔明人類講乜,亦睇唔明佢哋嘅文字,正如人類都唔理解我哋嘅溝通。
.
但我望住張紙,嗰一刻,我好似打通咗任督二脈,每個字都睇得明!
. ,
呢種超乎常理嘅事,我全家都半信半疑。
我話:「唔好冒險,我哋去第度啦。」
.
阿哥嘆氣:「呢個屋苑有啲偏遠,如果我哋放棄呢度,去第個屋苑,途中會遇到好多未知嘅危險,甚至中途就餓死。」
.
「明知人類要噴殺蟲水,我哋都要去送死?」我難以理解。
. ,
阿媽做和事佬:「阿細,你突然間講啲咁石破天驚嘅嘢,一時間,大家都好難肯定,你有無睇錯。我精神上支持你,但係......」
.
討論咗一輪,最後決定,由阿哥帶領一堆兄弟姐妹,入去探路,我哋就喺出面等消息。
.
結果,嗰一隊曱甴全軍覆沒,無一隻出番嚟。
.
阿媽唔肯走,堅持要「等多一陣」,但一股嘔心嘅氣味,從屋苑裡飄出嚟。
.
人類真係噴緊殺蟲水。
. ,
阿媽用一種好複雜嘅眼神望住我,有親人逝世嘅哀傷,亦有發現寶藏嘅驚喜。
.
不過,哀傷唔會持續好耐,曱甴族每次捕食,都係一場生死搏鬥,我哋已經見慣生死。
.
而且,我阿媽有一百個仔女,其實佢自己都認唔晒。
.
總之,從此我就成為曱甴族嘅天才兒童。
. ,
我唔再需要負責危險嘅捕食工作,
我嘅任務,係睇清楚大廈嘅告示、偷聽人類嘅對話,去決定嗰個地方,適唔適合我哋居住。
.
舉個例,如果一個女人成日話:「好驚曱甴」,
而佢身邊又有一個男人,嗰個男人通常都係曱甴殺手,見一隻殺一隻。
.
又例如一個婆婆,佢行動自如,而且同個孫一齊生活,咁就千萬要小心呢個婆婆。
.
佢哋通常唔驚曱甴,甚至可以徒手捏到爆漿,場面極為驚慄,絕對係危險人物。
. ,
有咗我嘅預測,我哋部族嘅存活率提高咗好多,好容易搵到合適嘅住所。
.
人類有一句說話:「能力愈大,責任愈大。」
.
我諗,上天畀我呢種天賦,一定係畀我哋部族有興盛嘅機會。
.
話唔定,我前世做曱甴嗰陣,做咗好多好事,先有呢種恩賜。
. ,
我雖然名成利就,受到成個部族嘅尊崇,但我並唔滿意現狀。
.
靠住我嘅天賦,我哋「好容易搵到合適嘅住所」,但呢句話有一重意思,係我哋要不斷搵新嘅住所。
.
因為人類飄忽而善變,明明綠燈,都會轉眼變成紅燈。
.
待續...
.
#短故 #短篇 #小說 #陳美濤 #廣東話 #粵語 #tomatochan #我係天才兒童