【龔成問答信箱】（Q22161-22180）

Q22161：

老師，我見你話如果該股票是近幾年上市的，當分析該股時，都可睇一睇佢的招股書，但不明點解要再看招股書？
有什麼用？

龔成老師：

我地買股票，就是買企業，你要盡能力了解企業的業務情況，以及財務數據，只要企業是近年上市（例如近3年內），我地都會睇佢的招股書，這樣可以了解企業的發展，以及當中的財務數據情況，就能有效評估企業的質素，以及進行估值。

招股書有好多行業的資料，市場研究報告，行業預期的發展，企業預測數據等，都是好有用的。

------------------------------------------------

Q22162：

龔成老師你好！我留意左你FB已半年多，買左你幾本書，已睇完80後百萬富翁和股票勝經，現在睇梗財務自由行。睇左你既書感覺獲益良多，謝謝。幾時會係澳門開班？（已登記留位）

請教一下老師，我今年36歲，月入4萬，扣除供樓、家用同生活費，每月可儲蓄1萬5千左右，層樓仲有140萬要供，現在現金只有20萬左右，持有股票有：

9988 — 200股@206
1810 — 2000股@21
0270 — 18,000股@11.68
1113 — 3000股@38.65
1177 — 3000股@7.08

1113可以長期持有嗎？270要減持嗎？

上面組合如需重組，希望老師多多指導。

短暫目標係五年儲到200萬，退休時希望達到財務自由。

謝謝老師

龔成老師︰

由於疫情關係，暫時都未可以係澳門開班，當情況許可，我會馬上過澳門開班，到時同事會聯絡你。

你現時持股，都係有質素，全部都可以長線持有。

但任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

粵海(270)明顯太集中，要作出調整。

未來投資策略上，你可以投資「平穏增長股」和「潛力股」。你每月5成儲蓄，即是用$7500做月供。其餘先儲起，用一邊月供一邊儲蓄的策略。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

現時大市只是合理區，資金不宜用盡去入市。你現有20萬資金和每月所儲倒的資金，建議等大市出現一定程度的下跌，才大力度掃貨，然後長線投資。

我假設投資回報有10%（連股息再投資），你每月投資$15000 + 現有資產60萬(持股和現金)，5年後要增值至200萬，相信係很大機會成事。

至於長線增值，你都係維持這個大方向，咁就可以。

------------------------------------------------

Q22163：

龔老師, 打攪你, 請問1919 中遠海控除淨10送3點樣計算? 除淨前$19.36入左3000股, 應該送900股, 請問到時送的900股系咪除淨後價錢$15?

到時送股到戶口我的成本價點計?吾識計~ 請幫忙解答~

龔成老師︰

我地再精準D咁講，你除淨後每股成本，會下調至$15左右。(而非只係送的900股)

其實佢除淨後，就會按比例，將個股價向下調整。變相你每股買入成本係少左，但你持貨價值係依然不變。

若以佢除淨前$19.36計，除淨後每股就應該係$19.36 X 3000 / (3000+900) = $14.89

當然，實際開市個價未入樣，因為市場還會有其他因素，令股價變動。但單係考慮個10送3，股價就應下調至$14.89。

而你計算每股成本，都應該用$14.89。

------------------------------------------------

Q22164：

老師，您好！我快提早少少退休了，兩個月前第一次買股票。一隻領展，一隻香港寬頻。後者11.4買入, 一直跌去，現在已經跌到8.7了。

請問應該再買溝下，還是等？真的不開心啊！希望你可以盡快指點我。萬分感激啊！

老師，我每天看你的文章，希望好好學投資

龔成老師︰

首先你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

香港寬頻（1310）主要在香港提供固定電訊網絡服務及國際電訊服務，以及產品銷售。

業務發展不差的，生意與盈利都有增長，不過盈利略有波動。

整體來說，有長線投資價值，收息不差，同時有基本增長力，現價算合理。

由於你將近退休，應以投資收息股為主。透過收息股產出的現金流，去支援你退休後的生活開支。

你現時持有的領展(0823)和香港寬頻（1310）都適合你，你目標主要係收息，所以股價波動，你係唔洗理。除非佢長線質素出左問題，否則你一直持有就可以。

以下係其他優質收息股，供你參考，現價都在合理區，可分注入市。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

------------------------------------------------

Q22165：

我人工每月可以存20000、想問下有什麼基金或股票可以有15%一年、月供20000

龔成老師︰

你可以選擇一些「平穩增值股」+「潛力股」作投資目標，比例你預大約各一半。

以現時大市合理區狀況，你可以每月先用一半儲蓄(即$10000)去做月供，另一半就先儲起架策略，餘下現金就是等大跌市時出手。

恆指當中有不少平穩增長股，至於潛力股，可考慮：安碩恒生科技（3067）、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814），但就要明白波動性比上述會高左，同時風險大左，你要自己平衡。

但你要明白，「潛力股」係有一定波動性，會有一定風險。你以上配置，拉長線平均計，每年大約有10-15%回報，相信可以達至你目標。

------------------------------------------------

Q22166：

龔成老師，我$31.65已入了345，買貴左，而家仲出左事，如佢有機會升多2元，我想轉去買322，請問322ok嗎？這個做法好嗎？

龔成老師︰

我地持有一間企業，主要係睇佢有無質素。而當佢出問題時，你要分析到底係中短期，還是長遠對集團有影響，才好下投資決定。

維他奶(0345)只是短期不利，但長遠，我相信影響又未算核心性，不過好睇事情的發展，要睇管理層，以及事件發酵程度，仍有未知數。

只可以話短期股價上落都大。

至於，康師傅控股（0322）其實本質不差，有品牌及規模，但內地的市場競爭都激烈。

這企業的長遠投資價值仍在，但在市場競爭較大的前提下，相信盈利會有點波動。可以理解為平穩增值股，因此估值不會太高。

現價算是合理區中上部，分注投資，長線，都可以。

若你持有維他奶(0345)，佔組合比重不高，你照持有，再觀察事態發展，係可以。但若持貨較多，你可以考慮換少少去康師傅控股（0322）或其他優質股，去平衡個風險，都係無問題。

------------------------------------------------

Q22167：

龔sir你好呀，有野想請教你。我今年40歲，月入20K，如可儲7-10k左右。

員工合作社已儲大約有20萬，利息3厘(每月儲$5000)，銀行大約有10萬，利息5.5厘、現金約10萬

現供每年約5萬保險 (醫療大約佔40%, 儲蓄大約佔60% (50歲可收回約70萬))

以前只係用最保本方法增值，但回報都未如願。剛喺Facebook 接觸老師約半年，現持有以下組合，由上年12月開始買股票

目標想年回報有8-10%！可唔可以比少少意見。

請教你應該點配置好，想有好既財富增長效果

持有股票:

1177 1000 $7.69
1345 15000 $1.09
3067 800 $17.24
6618 150 $119.98
6823 3000 $10.28
2845 50 $153.25

謝謝老師~

龔成老師︰

以你40歲年紀，依然係有財富增長需要。你現時銀行5.5息存款，勉強可以。但合作社3%儲蓄，實在太少。建議將這部份資金，用來月供優質股會較好。

"保險"只係理財中防守部份，買足夠保障就可以，增值可以留比優質資產(如優質股、物業等)去做。

你現時持有股票，都有質素，可長線持有。

但當中的中國先鋒醫藥(1345)質素都一般，盈利和股價都十分波動，最多只宜小注。建議你沽少少，換至其他優質股較好。

未來增值策略上，若你想做到長線平均有8-10%回報，你可以投資「平穏增長股」和「潛力股」。你每月5成儲蓄，即是用$5000做月供。其餘先儲起，用一邊月供一邊儲蓄的策略。

你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

到你有一定投資經驗﹐潛力股比重可以相應調高，佔組合約3-5成，視乎你當時投資經驗多寡和了解這些股票程度而定。

現時大市只是合理區，你現有10萬和每月所儲倒的資金，就等大市出現一定程度的下跌，才大力度掃貨，然後長線投資。

------------------------------------------------

Q22168：

本人34歲，已婚，有2個小朋友，我月入8萬，太太6萬，現金約100萬。

有一層樓收租（17000租金，差銀行400萬，現值800萬），有一層自住（差銀行400萬，現值800萬）。

小朋友開始長大，想換港島3房有工人房，睇過樓心水要2200-2500萬，好不好賣2間換1間？

每月可存6萬，點樣可以快d增值到足夠首期呢？另外要問下你點睇中人壽及華潤水泥。唔該你如果有空請回覆。thanks

龔成老師︰

財富增值方面，你可以用「平穏增長股」 + 「潛力股」作組合，去創造一個增值平台，去累積這筆首期。

現在你每月先用5成儲蓄，即$30000做月供。其餘先儲起，用一邊月供一邊儲蓄的策略。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

華潤水泥控股(1313)有質素，用來增值係可以，但波動性較大，不宜持有太多。

而中國人壽(2628)都有質素，但近年增長弱左，質素只算係中等，同樣不建議太大注。2隻股票都在合理區，可以分注入貨。

而置業方面，由於你本身已有一定房貸，如果你要買你目標2500萬的自住房，基本上你係較大機會，要沽出現有2個物業，再盡用資金才可以做到。(你心水物業，因為過千萬，故只能做50%按揭)

除非你有好實際需要，否則我唔係太建議你咁做。因為你會資金盡用，令你成個財富組合偏向物業類，而且仲係單一間物業，其實唔係咁理想。

你可以考慮一些樓價無咁貴的3房單位，再用細屋換屋的策略。

目標係希望不用集中在單一物業之餘，又可以每月空出較多資金，用來投入優質股增值。相信這樣配置，你個財富組合平衡性會較高，長線對你較有利。

------------------------------------------------

Q22169：

龔sir,你好。如果我只可以每月用5000供股，想儲20年後退休，退休後我想有每月股息20000，請問有可能嗎

龔成老師︰

如果你希望退休後，每月有2萬蚊現金流，以股息率6%計，你需要本金400萬。

我假設投資回報有10%（連股息再投資），你每月投資$5000，20年後大約會增值至340萬，故很大機會達至你的財務目標。

策略上，你可以用「平穏增長股」 + 「潛力股」作組合，去創造一個增值平台。

現在你每月先用5成儲蓄，即$2500做月供。其餘先儲起，用一邊月供一邊儲蓄的策略。

月供方面，你可以選擇投資在平穏增長股，例如恆指成份股當中有不少，亦可考慮、金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)

或潛力股︰比亞迪(1211)、中生(1177)、福壽園(1448)、小米(1810)、安碩恒生科技(3067)、港交所(0388)、舜宇光學（2382）、阿里（9988）、騰訊（0700）、ＧＸ中國電車基金（2845）、三星FANG ETF（2814）。

但由於你月供可用金額不多，我建議先集中指數基金，以免個股月供成本過高。到你可以加大月供金額，才加入其他股票會較好。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

------------------------------------------------

Q22170：

Sir, 我係第31期畢業生

想問下1024 快手前景如何，持貨平均價$300. 而家應唔應該放左佢入番d 平穩股如領展，地鐵？

Thx

龔成老師︰

快手（1024）係全球數一數二大的直播平台，絕對是一隻優質股，有獨特性，有客戶群，有潛力，長遠的發展力正面。這股有長線投資價值。

快手與業務夥伴合作提供了一系列產品和服務，於滿足平台上自然產生的多種需求。快手提供的產品和服務包括娛樂、線上營銷服務、電商、網絡遊戲、在線知識共享等。

快手科技已建立了穩定的用戶，在全球已佔據了重要的位置，企業有一定的優勢，以及獨特地位。加上用戶仍在快速增長，以及增長趨勢仍持續，預期有一定的發展。

雖然這刻盈利不多，甚至因加強發展業務而出現虧損，但這類股的分析特點是將來，等之後的收成期。

由於已擁有一定的優勢，以及仍增長中，企業要將用戶化成現金並不困難，只是時間問題，以及多少問題，預期2022年盈利模式已穩定，同時有一定的盈利。

簡單來說，企業有質素，有發展。

現價雖然無之前咁貴，但仍未平，可稱為合理區頂。但短期股仍會十分波動。但佢係有投資價值，雖然你買貴左，但若持資不多的話，可以守。

若持貨較多，你可以沽少少，換成領展(0823)和港鐵(0066)這類水桶2股票，去平衡風險。

------------------------------------------------

Q22171:

你好龔老師，我想問我從來沒有買股票，我每月可供股10000至15000，現在38歲，老公40歲，之前每月供保險現金30萬，長遠供那幾隻股票好？謝謝

保險係赤霞珠

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你38歲，應以增值為主，建議你用「平穏增長股」 + 「潛力股」作組合，去創造一個增值平台。

現在你每月先用5成儲蓄，即$5000-7500做月供。其餘先儲起，用一邊月供一邊儲蓄的策略。

由於你投資知識不高，因此可較集中在平穩增長類股，至於潛力股，只宜小小注(不多於2成)。最好是你先提高投資知識，等到你有一定知識和經驗，才慢慢增加潛力股比例(大約4成)。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

你個保險計劃，我無研究過。

其實"保險"你可以好簡單咁理解，佢主要係用來防守，買足夠保障就可以。儲蓄成份架保險，唔係唔可以買。如果你個人風險承受能力好低，或者完全無投資能力，這類保險都有持有價值。

但始終係財富增值角度，佢幫助好有限，一般我都就唔建議太多。做財富增值，應集中投資在優質資產(如優質股、物業等)，效果才會理想。

若你份保險，已經供了一段時間，你可以照持有。但唔好再加大儲蓄保障金額，咁就可以。

------------------------------------------------

Q22172：

老師你好，我係你澳門既讀者，我目前睇左你兩本書，《80後百萬富翁》及《股票勝經》 睇完想上你既堂學深入少少，請問你何時來澳門開課/會不會打算開網課之類？

另外比較推薦我之後看甚麼書，想學習更多評估企業是否優質的能力，謝謝你

雖然自己買入都是大公司，但由於本人評估企業價值能力弱，大大減低自己長期持有的信心。

（目前持有阿里爸爸、小米、藍月亮、東京健康、農夫山泉）平均每隻目前都跌了15-20%。

謝謝老師

龔成老師︰

我同天窗出版社，合作開辦左一個網上課程，題目是關於「資產配置」的，即是講述各種資產與投資工具的特性、投資價值、在財富組合中的角色，至於股票內容就唔算多。你有興趣可睇睇：

http://bit.ly/3pP252j

課程按「人生階段」、「財富累積」、「資產特徵」設計，更有給年輕人、已婚人士、退休人士的精明理財建議。

完成課程後，你會學到：

✓財富系統概念，不再被炒差價的框框束縛；
✓股票、基金、債券、的士牌等資產的運用和買賣技巧；
✓懂得分辨資產質素和平貴，在最合適的時機買賣；
✓如何以最低的價錢，買到最具升值潛力的物業
✓致富3部曲，如何從當下這刻開始啟動！

至於股票班，由於內容太重要，只有實體班，唔會開網上課程。

因為之前實體股票班試過比人偷拍，之後放左上網賣，最後要搞到報海關先處理到，好煩。所以，網上類的教學，都好擔心有偷拍問題，風險太高，因為好多課堂內容，都唔想太公開，只想自己學生知，所以暫時都唔會搞。

澳門班，我會等疫情穏定，可以通關後，就馬上過澳間再開翻。

你或者可以預早留位，只要whatsapp 852-55457212我同事講，打「留位澳門班」就得。我地有具體資料就會 whatsapp你。

因為現時已有好多澳門人留左位。

如果你睇完《80後百萬富翁》及《股票勝經》，都有一定掌握。你可以再睇埋《選股勝經》和《年報勝經》，這2本書，會再仔細少少，去教你點去初部分析一間企業。

睇完這2本再去上堂，對你課堂上掌握，會有一定幫助。當然，就算你睇唔明都唔緊要，上堂會再由淺入深，去解釋一次。但有個底，就會吸收得快D。

另外，我地持有一隻股票與否的重心，係企業質素、前景，不要過度被買入價影響。買入價只是一個心理因素，如果企業核心因素未被影響，我地係唔需要理會。

你現時持股，都係有質素，適合你長線持有。

------------------------------------------------

Q22173：

你好，龔成老師！最近想了解一下投資，想買你的書學習一下，請問你會建議先看哪一本書先？

另外，我媽咪有20萬叫我學習下幫佢買股票，但係我唔知點樣去選擇買咩股，請問老師你有什麼建議？

謝謝！

龔成老師︰

你可以先睇我架《80後百萬富翁》、《財務自由行》和《股票勝經》，都適合初學者。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

若你媽媽距離退休，都只有10年左時間，其實已要開始為退休做準備，但同時，財富仍有增長力（但不是進取），因此，你可以投資「平穩增值股」+「收息股」。

現時的$20萬，暫時只能動用$10萬，因為大市唔算平，你要分注投資，同時留下一半資金。長線投資。

平穩增值股，例如指數基金、金沙（1928）、長建（1038）、中銀（2388）、港鐵（0066）、恆基（0012）、粵海（0270）、領展(0823)。

同時，可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

但若果你媽媽已經好接近退休之年，甚至已退休，我地就應集中係「收息股」，重點係創造現金流，去支援佢退休生活開支。

------------------------------------------------

Q22174：

老師你好 新手一名 完全冇任何知識 想問下第一步應該開始學咩？新手想買股票建議資金幾多？

你邊本書比較岩新手從最基本學起 謝謝

龔成老師︰

作為投資新手，你要做三樣野。

第一，增加知識，你要學理財及投資的知識，記住，投資並不是坊間的炒炒賣賣，你要從書本或課堂上認真學習。

《80後百萬富翁》、《財務自由行》和《股票勝經》適合初階者的。

第二，了解銀行及證券行，去開一個證券戶口，並準備做月供股票。

其實兩者都可以，銀行就較方便，但手續費就較貴，證券行收費就較平，香港的監管不差的，風險不大。你可以先了解下不同的收費。

第三，將每月的部分資金，去做月供股票，供指數基金。對初階投資者來說，月供股票是一個很好的累積財富方法，因為可避免你一次過在高位買入的風險。

原理如同儲錢，不過就不是儲現金，而是儲股票。計劃要長期進行。

另外，指數基金是一個組合，適合絕大部分人投資，風險不高，長期儲貨可助你財富平穩增值，記住要長線持有。

當你在做上述三件事的同時，開始學下股票，了解下那些股票適合你自己。上述只同你簡單供基金，當你過幾個月，有知識及少少經驗後，就可以利用你手上的資金，其中一部分，去投資股票。

------------------------------------------------

Q22175：

龔成SIR，我今年29歲，我與家人持有下列股票，我有一些股票分配的問題想請問你，

我手上有﹔
2手京東9618@$330
1手騰訊700@$560
2手匯豐005@$51

我亦由上年開始每月供股﹔
銀河娛樂0027@$65 - 每月 $1500
中國生物製藥物1177@$7.8 - 每月 $1500
盈富基金2800@$28.5 - 每月 $1000

我知道購買京東的現價格太高，但我上年購買時都已經打算長期持有。

如果下半年時想再購買騰訊或是小米，是否會持有太多新經濟股？

如果持有太多新經濟股，是否應該買傳統經濟股呢？例如﹔領展，港鐵等等？

好多謝你花咁多時間去解答問題！

龔成老師︰

以你年紀計，應以增值為主。你現時持有和月供的股票，都係有質素，就算買貴左，都係有得守，你照長線持有就可以。

但匯豐(0005)只係收息股，增長力一般。若係你家中長輩持有，都可以。但若是你本人持有，就未必太適合。

月供方面，我建議用指數基金做主力，個組合平衡性會較好。

騰訊(0700)和小米(1810)都適合，現價在合理區中上至頂位。但若你加入這2隻股票，會有太集中係科技股的問題。

而且，這類股票雖然有增長潛力，同時風險都較高，不宜持有過多。

你想投資這類股票，唔係唔得。但同時間，你都要買入一些平穏增長股部份，去令組合保持平衡。

現時大市只在合理區，每月資金唔好盡用。最好留有部份，等大跌市出現時，可以用來掃貨。

------------------------------------------------

Q22176：

你好，龔老師 拜讀完股票勝經，增加對股票認知，令自己對股票有基礎概念，多謝老師。已買你另一本著作＜80後 百萬富翁＞

同報左你股票班，繼續學習，增加智識，希望可以達到財務自由。

本人37歲，已供完樓，有大慨20萬流動資金，月入21000，每月可以儲蓄10000蚊，已開始用5000蚊月供股票，留5000蚊作現金儲備買貨。

月供股票我選擇，盈富+港鐵+中電+領展+中銀香港+金沙+小米+港交所+騰訊+安碩A50，盈富月供佔其中2份。以上供股會否太散？

如現在小注買入騰訊，小米，金沙是否合適？謝謝龔老師

龔成老師︰

你所選的股票，係適合你年紀，資金配置比例都正確。

但的確係有點散，因為你月供總金額唔多。若你同時供咁多隻，變相個股月供成本會高左。

最好你用指數基金做主力，月供$2000， 再供多3隻各$1000，咁會較好。

騰訊(0700)和金沙(1928)算係合理區中上部，而小米(1810)就在合理頂至略貴。若你無貨，而價開始分注入資係可以。股票班見!

------------------------------------------------

Q22177：

你好,老師, 我想問下現有自住物業供緊, 近排搵緊心水車位100-130萬車位收租, 你認為加按是1個好途徑嗎? 謝謝你!

龔成老師︰

現時仍處低息期，加按是沒有問題的。

關鍵是加按後，是否能將資金買入其他資產，創造更高的回報，由於加按是要支付利息的，所以新資產產生的利息回報一定要比加按的利率高，這樣才值得做。

近年「車位」價格近年雖然已回落不少，但整體上，只係合理區頂部。相對優質股，佢投資值博率會較低，建議你先用股票增值，會較好。

投資車位與否，你就要自行衡量。

若決定投資，只要加按後，負債比重不會過多，咁就可以。假設你30歲，總負債最多可位總資產9成。但若50歲，比例就要下調至5成，會較穏當。

同時，你要明白將來加息，會令你息差回報收窄，有機會影響你回報效果，你要明白這風險。

------------------------------------------------

Q22178：

你好，龔Sir，我已經30歲，投資左5-6年都係蝕多，已經有10萬投資左係美團，現在開始每月可以$6000投資，

請問每個月$3000月供盈富，$3000月供3067可以嗎？謝謝

龔成老師︰

如果你過去5-6年，每次投資多數都是「輸」，即係你存在一些核心性問題。譬如一些錯誤的投資觀念。

記住，正確和正常的完全不同的事，多人採用，並不代表係正確的方法。

首先﹐股票是企業﹐你要分析企業的本質去投資股票。買股票也不是「賺差價」，而是享受企業成長以及產生的股息。

往後，你只要以「長線投資優質股」，作為投資目標。我好有信心，你會結束過往一直虧損的狀況。

以你現時30歲計，你這個月供策略係可以。

緊記月供係一個長線計劃，月供最少維持3年，並持有這些股票5年以上，才會有較理想效果。而中間可能會有股價波動，但你不用理，一直供就可以。因為月供本身，已有平均價格波動的作用。

當然，可以的話，最好一直持有。因為，優質股持有時間越長，財富增值效果就會越理想。

現時大市只在合理區，每月資金唔好盡用。最好留有部份，等大跌市出現時，可以用來掃貨。

至於美團(3690)有潛力的，過往一直虧損，到近一年，開始有正現金流，這是一個實質的利好因素，因為之前一直在燒銀紙，現時初步見到成效，不過，估值的方法好虛無，因為現時的市盈率仍過百倍。

如果有利好消息，佢可以上好多，但如果估值修正，股價可大跌。

只可以話，潛力是有的，現價唔算平，之前明顯貴，之後回翻好少少，大約合理區頂。此股可持有，就不能太大注。

若佢佔你組合不多，可以守。但若佔你合較大比重，你要沽出部份，去平衡風險。

------------------------------------------------

Q22179：

老師 如果有時間 可唔可以分折一下美股RIDE Lordstown motors corp 謝謝你 請問合理價位係幾錢？Thanks

龔成老師︰

Lordstown Motors Corp (RIDE)是一家汽車公司。該公司從事設計和製造電動汽車。其卡車產品主要係輕型卡車，專注於商業車隊市場。

其旗艦車 Lordstown Endurance是一款電動皮卡車，是一種利用了四個裝有集成軟件的輪轂電機。

我初步睇過佢資料，產品都有佢價值。但由於現時都尚未有正式盈利，而到底幾時會有，無人肯定到。

此股有一定不確定性，唔係唔投資得。但我地投資時，必須要控制注碼，去平衡不確定性，所帶來的風險。

------------------------------------------------

Q22180：

成哥!! 你好!! 想問8032呢隻股!!我睇佢ROE同PEG都好強!! 前2-3年是蝕錢宜家有盈利!!所以基本面是算不錯嗎??

我感覺他會成為倍升股!!?? 對嗎?

龔成老師︰

非凡中國（8032）主要從事體育人才管理及賽事／項目製作及管理、提供體育諮詢服務；以及物業與社區發展。

過往業務都有發展，不過增長力不強，同時有點波動。而盈利上落都大。

你見佢2019和2020年盈利大升，係由於出售於一間聯營公司之部分權益所致。實際上，業務方面增長，唔算明顯。

整體而言，未見企業有好強的獨特性，增長力唔算強。整體質素一般般，現價偏貴。最好等有大幅下跌，才入貨，而且只宜小小注。

我地分析一間企業時，唔好單憑指標或數據，就覺得佢好左。當佢近年和過去幾年盈利，出現明顯變動。我地就要小心分析，找出當中原因。

是企業賺錢能力提升、市場有所改變、定係其他因素。如果係一些長線利好企業本身因素，我地估值可以提升。

但若只係一次性因素，我地就唔應該用這些原因，去作估值和投資決定。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q21641-Q21660）

Q21641：

龔成：你好，我追中在你都有一段日子，我想請問一個問題，股票6127在6月22都有$164股價。

之後股價到$128，見財經網站話創上市新高，我真係唔係太了解，可否回覆，謝！

龔成老師：

因為這股進行了「十送四紅股」，股價自然地調整左。

送股只是一個數字遊戲，持有股數多左，但股價下調左。

例如你原本持有1000股，10送4後，你就會持有1400股，但整個企業價值不會因此而改變，因此，股價會自然調整，例如之前股價$164，你持有1000股，市值為$164000

現時股價會因送股的「除淨」因素而下調，調整至$117.14，你持有1400股，你持貨市值（$117.14X1400股）=$164000。

所以，之前的$164已經變成了現時的$117.14，所以當你見到$128，就是創新高。

------------------------------------------------

Q21642：

龔sir，你好，自從上年上完你既投資班，獲益良多，亦成日推介你既書，專頁同投資班比朋友

想問問金沙既財務穩健情況，流動資產淨值負值

總負債 / 股東資金比率446%，主要原因都係今年equity大減（-56.6%）翻查附註，法定儲備可按除稅後利潤調整，因為今年無錢賺，大跌是否正常？

今年係特別年份，現金流正值，見到繼續有投資，可見金沙對未來有信心，另外今年經營虧損，靠融資獲得資金。今年interest coverage係負數。

想問下除左以上不太利好既數據，仲有咩數據可以分析金沙財務狀況？ 謝謝謝

龔成老師︰

其實上年疫情，令到全球經濟活動都受影響。旅客大跌，所以成個澳門博彩業，都受到很大打擊。

總負債 / 股東資金比率大升至446%，是由於2020年出現大幅虧損，再加上2020年頭派息開支(用作支付2019年中期股息)，都令儲備大幅下跌。

因此股東權益部份，出現較大度下跌。負債本身都有增長，但幅度算合理。因此股東權益有較大收縮，故總負債 / 股東資金比率大升，係正常。

我地係睇數據之餘，都要分析個基本面。數據好差，但事件係一次性，唔會做成長遠影響。這時候，個別受影響年度的指標，參考性就未必咁大。

金沙(1928)長線質素，依然不變。

你睇倒佢過去，無論收入和盈利都有穏定增長。而且，每年都有唔錯派息，係一隻優質平穏增長股。

你見佢爭取在這個低訪客時期，加快將金沙城中心重塑為澳門倫敦人。可見集團對行業長線發展，依然係有信心。

疫情開始轉好，集團生意會慢慢重回正軌。但由於疫情對整體經濟和個人收入，都有一定影響。因此，你預此股中短期都會較弱。

若你有貨，長線持有係無問題。

------------------------------------------------

Q21643：

早晨阿sir 本人月光族 每月2萬人工 每次出糧唔知錢去晒邊。

見到有其他網民投稿，每月1萬作為月供股票 所以我現時出手的話 唔知距離5年滾存100萬會唔會太遲呢

月供股票可以提供3個組合 分別穩健增長 中風險 高風險 最近都有留意你既頻道介紹 所以今次決定狠下心去離開月光一族

中電0002、比亞迪1211, 港燈2638, 盈富2800, 中銀香港2388，各月供$2000。

未開始供 所以想問問呀sir 有冇其他組合可以選擇或替換 月光一族上

龔成老師︰

能夠決心離開月光族，已經是行出成功一大步。做財富增值，當然越早做越好，可以享受更多複息增長好處。

更重要，係你要學懂正確投資知識，和用合適投資方法，才會有效率地達成目標。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

因此，你在選擇應該投資那一類股票時，會係因應你人生階段、投資經驗和風險承受能力，去做決定。

假設你係偏年青人士，你可以用「平穏增長股」 + 「潛力股」的組合。

你現時組合中，中電(0002)和 港燈(2638)只係收息股，增長力不高，唔係咁適合這個年齡層。

你可以在下面提及股票中，選擇一些適合目標，去取締這2隻股票。

但留意，由於「潛力股」有一定波動性，你現時投資經驗較淺，「潛力股」比重就要相對下調，大於3成以下。到你有一定經驗，才加大至3-5成。

現時大市只在合理區，每月資金唔好盡用。最好留有部份，等大跌市出現時，可以用來掃貨。

------------------------------------------------

Q21644：

龔老師，啱啱聽你咁講 ， 先增值後享受， 有正如所講長線投資一定會有回報，我想問你個意見，我同先生月入大約四至五萬 ，

正因為而家有兩個小朋友讀緊小學 開支好大 儲錢亦唔多

如果我手頭上有一間價值六百萬嘅樓居屋 係自住嘅 大概仲有一百六十萬未供完

因為短時間都升值咗好多 都算係人生第一桶金，你覺得能唔能夠賣出 然後用二百萬至三百萬長線去投資 然後自己租樓住五至八年

咁到五年或者八年後 咁樣財富增值 係唔係一個好嘅選擇？

但如果最後升值唔多，有機會而家住緊嘅屋 都會再升 。

但如果我唔用呢個機會 根本就冇辦法 拎到現金去投資，拎唔到現金投資 就唔能夠錢搵錢。

龔成老師︰

每個人都有自住需要，如果你沽出租樓，就等同沽空樓市。

由於投資都係有一定不確定性，如果你最終投資回報，係差過樓市上升幅度和這些年的租金成本，你會得不償失。

我唔係話咁做一定唔得，但這個操作有一定風險存在。如果你投資經驗不多，我建議咁做。

你現時情況，較穏陣做法，就睇翻自己開支和收入，有無調整的可能性。

盡量放棄一些不必要開支，同時間，睇下有無可能增加額外收入，好似做兼職、網店等等。

令自己每月盡量去空出一筆資金，去儲優質股，為自己財富增值。這個方法財增速度，未必有你賣樓再投資咁快，但會相對穏當，你可以自己衡量下。

------------------------------------------------

Q21645：

想請教老師，3606， 同868 都係做玻璃，做埋都有做汽車玻璃，但點解個市盈率可以差咁遠?

咁可唔可以代表3606 overprice，而868 相對合理（之前$17-$18 有，但24-25 已經放哂）

後悔做左個短視嘅投機者
謝謝

龔成老師︰

雖然2間都係做玻璃，但信義玻璃（0868）業務集中在浮法玻璃，而福耀玻璃（3606）則重心在汽車玻璃上，而且企業規模都有所不同。

因此，市盈率唔可以完全直接地比較。

福耀玻璃（3606）有質素，現價會略貴，如果回翻1成會較合理。相信長遠能增長，但由股近年股價上左唔少，之後股價未必是爆升模式。

信義玻璃（0868）近年的增長力弱左，不過，佢在技術上的行業優勢仍在，相信長遠仍是正面，不過就未必是高增長的類別，潛力度比過往略有減少。

加上佢不斷將較高增長的業務分柝左上市，令現時的信義玻璃增加，只是平穩類。

現時估值偏貴，投資值博率一般，回翻近1,2成，才可以入貨。同時，你預佢中短期會比較波動，要長期先見到收成。

------------------------------------------------

Q21646：

老師你好，有啲問題想請教你。

1: 房托估值嗰時應該用 P/B 定 p/ffo 好？

2: 請問 P/ffo 應該點做？可唔可以喺度教教我？可唔可以用778來做例子？

3: 仲有個 P/affo 我都唔知係乜嘢嚟。

有勞老師

龔成老師︰

1) P/FFO會好少少，但其實2個都係一些輔助性參考指標。

所謂的FFO就是Funds from operations（營運現金流），在房託中其實比盈利更有效反映真實情況。

但要記住，我地重點都要睇埋佢企業質素，去了解佢將來發展情況，和租金增長能力，才去決定是否值得投資。

2) 有少少似PE，佢係將P(現價)除以FFO(即經營產出淨現金流)。若指標越高，代表你所投入資金，要回本年期越長，某程度上代表越貴。

3) P/AFFO是在P/FFO基礎上，作出一些資本開支相關項目的調整。

由於P/FFO和P/AFFO有些複雜，不同企業在自行估算時，都會有些分別，所以用作不同企業比較的準確性，未必太高，只宜作輔助性參考。

（其實，你細心想想，房託用股息率已是一個很有代表性的指標，因為佢根據「可分派收入」的9成作派息的。有時在分析時，太過複雜化，未必是好事）

------------------------------------------------

Q21647：

阿sir, 如果在投資角度, 你覺得內地, 例如大灣區的住宅物業, 有投資價值嗎?

現時香港的樓價實在太貴, 如果在香港買樓, 會佔用我好大部分的資金。加上現時租金回報不太好，物業升值潛力又不敢肯定。

其實我好喜歡黃竹坑的新樓盤， 但實在太貴，現在已經要三萬元一呎，將來真的有很大升值空間嗎？

我現在約有400萬現金，80萬股票， 還有一些長線的保險公司儲蓄計劃。 我知道現金比例過多，所以想加注在股票及投資物業。

上完你的堂現正整理自己的投資組合，希望阿sir可以給我點意見。

龔成老師︰

大灣區我未仔細研究，你都可以睇翻佢租金回報率和長線增長潛力，去決定其投資價值。

黃竹坑的新樓盤，都有投資價值。因為同區缺乏大型新盤，故有一定需求存在。但呎價唔平，所以升值能力會扣少少分。

其實每個人都有自住需要，最終都會買個自住物業，但當過程可以大不同。

首先，你要因應自己能力(是否供得起)，實際生活需求，去決定買入什麼樣的單位。

你要睇長D，講緊係5年、10年、甚至20年的人生計劃，到底要一個點樣架物業，先可以配合到你。

之後，我地再制定一個可行計劃。

如果你目標單位，唔係太貴，而你又有一定資金。可以買入單位之餘，有一定資金留下，進行投資增值，那計劃可以直接進行。

若你現時資金較少，你可以先用優質股，去累積資金，再去置業。

或者目標單位較貴，你可以先買入較細單位，之後放租。令你可以有一個物業，用以資產追資產方法，減少物業價格波動，對你購入最終目標物業的影響。

另一邊，再用優質股增值，到有一定資金，就細屋換大屋。

若你最終目標係一個較貴物業，你可以先買入一個細單位，做踏腳石。餘下資金，努力用優質股去增值，直到有一定金額，就去換大屋。

可用「平穏增長股」 + 「潛力股」，去創造一個增值平台。

平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、領展(0823)、希慎(0014)、太古地產(1972)

或潛力股︰比亞迪(1211)、中生(1177)、福壽園(1448)、小米(1810)、安碩恒生科技(3067)、港交所(0388)、阿里（9988）、騰訊（0700）、ＧＸ中國電車基金（2845）。

現時大市只係合理水平，扣除置業資金部份，現金和股票最好各佔一半。餘下資金，就等大跌市出現，才加大力度掃貨。

------------------------------------------------

Q21648：

龔成老師, 講個好消息你知, 我成功上樓做業主啦! 首期主要係自己積蓄, 雖然認識你較後期,

但你的page影響左我,現在省多一蚊去投資, 未來就可以累積多10蚊的資產。

最近準備供樓,開始減少日常不必要的開銷,發現原來自己都可以一個月可以用少於MOP2000,

更意識到平日的自己衝動消費的不智,日後每一筆開銷都會更謹慎, 重點係尼種有目標的節流並不會讓自己感到不開心，尼個絕對係本年度最大感悟。

現在我每個月有約MOP5000可以放到投資戶口, 以往我是全數供基金(有全股亦有股債), 至今賺5%左右, 手上亦有啲碎股(盈富, 銀娛及港交所),

但只供了一個月因置業而停供, 現在我應該:

1. 停供基金, 但不賣出基金, 將月供基金的錢轉移到月供股票(盈富, 銀娛及港交所)

2. 月供股票的手續費不菲, 每筆月供交易為MOP50, 另外每年MOP120保管費, 假如供股多但月供金額少, 手續費就顯得相當高昂。

3. 不停供基金, 之前供的碎股繼續持有抑或賣掉呢？如上述費用顯示, 擔用閑置碎股最終會被蠶食到渣都冇。我應該賣出碎股嗎?

感謝遇上老師無私的分享及指導, 感激你影響了我的消費觀, 讓我能向FIRE又邁進一步。

龔成老師︰

恭喜你，成功升格為業主。

現時你財富組合，完全偏向物業類，有集中性風險。但由於你剛置業，係正常。但長遠，你要將單一資產，控制係組合8成之內。到你較年長，比重更要進一步下調至6成，才算穏當。

所以，你未來新資金，應集中投入股票市場，去令組合更平衡。

你現時投資配置，可以先衡量翻個基金的投資策略，所投資的資產類別、投資策略、風險程度、市場、費用成本、以及過往的表現。可以睇佢過往5-10年，如果回報係比主要投資市場高，有考慮繼續投資。

相反，若你預期佢長期都會差過大市，就應將資金轉去做月供股票。

至於澳門月供費用係較高，你可以集中供晒盈富(2800)，去減低月供成本對你的影響。

若你最終係選擇持續去供基金，原有碎股可持有。但你覺得，長遠為左個少少股票，而要定期付上一定費用不值的話，沽出都可以。

------------------------------------------------

Q21649：

Hello 龔成sir , 我是一位39歲初學投資者，投資失利中。

請問以下股票應否加注或止蝕 ？

舜宇光學2手 @213
吉利 1手 @27.9
比亞迪 3手 @229
美團 1手 @428

阿里巴巴 1手 @263
移卡 1手 @100
海普瑞 1手 @18.4

謝謝你

龔成老師︰

首先你要明白一個概念，我地持有一隻股票與否，關鍵位是企業質素、前景，不要被買入價影響。因為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心，照持有就可以。

如果企業無質素，但你現時蝕錢中，繼續持有只會令你財富繼續貶值，因此要賣出。

如果企業質素轉差，就有可能要減持，因為這股佔你組合的比例，未必值得太多。

你以股票，都係有質素。唔需要太過在意中短期股價波動，長線持有就可以。

但你上述股票，都係潛力股類，佢地有增長力，但波動性都較大。特別係海普瑞（9989）和移卡（9923），不確定性就更高，只宜小注。

以你39歲計，潛力股最多佔組合一半好了。加上你投資經驗一般，要再減少少，至3成。否則你成個組合會過份進取，風險過高。

但你唔需要沽出現有股票，只要將新資金，優先投放在平穏增長型股票，去令組合慢慢平衡翻，咁就可以。

------------------------------------------------

Q21650：

龔Sir,我要同你報喜啦，我地早2日簽左合約，買2房單位，中層484尺，

由560萬講到531.8萬成交，系整個屋苑同一尺單位最抵買，而且大家都負擔到既供款。

我手持股票有以下：

小米 1200股 27.3入
中國海洋石油 10000股 10.16入
阿里巴巴 500股 283.4入
7500 10000股 6.225入

想問吓以上股票是否可守？7500應該只能等待?

你有意見可以比我嘛？謝謝

之前見你講比亞迪可以再月供翻，但我吾知應該點做，大概每月可用1000-2000做月供，因買樓後流動資金不多，亦都不想再分散太多隻股票

我只係想集中買比亞迪，我本身係用渣打戶口去買，想請教一下你用邊間銀行或者證券行會比較優惠。

再次多謝老師百忙中抽空去解答我

龔成老師︰

先恭喜你，成為業主。

從財富配置角度，你現時成個組合，偏向物業部份。但初期係正常，長遠計，你要將單一資產比例，慢慢調到去不超過8成，以免有過度集中的風險。

所以，你現在享受新居之餘，都要開始計劃，將未來的新資金，慢慢配置在優質股上。

你現時持股，唔算係大問題。小米(1810)和阿里巴巴(9988)，可長線持有。

ＦＩ二南方恒指（7500）的投資目標，係反向追蹤恆生指數每日表現。如果恆指跌1%，你就會獲利2%(另扣管理費)。但若然恆指向上，你就會虧損。

我對這類產品有保留，恆指在過去數10年反覆向上，所以長遠計持有這股對你"不利"，一定多於"有利"。

建議你長遠就算不全數沽出，也最好沽出大部份，換碼至其他優質股較好。

中國海洋石油（0883），質素都算有，但不是最高質類別，佢對油價較為敏感，所以，如果長遠油價向上，佢都會增值的。

雖然佢都有一定的規模及質素，但卻不是最高質素的企業，這是由於佢地的產品自主力較弱。

石油是商品，當中沒有差異性，佢地要將石油賣出，只能跟國際油價，這令佢地處於被動狀態，沒有價格自主的能力，這令佢地的獨特性有限。

這類商品企業，都可投資，但就要明白不是最高質的企業，不宜持有咁大注。同樣建議你沽部份，換碼至其他股票。

以你年紀，應以增值為主。你唔好太集中一隻股票，要建立一個組合。

比亞迪（1211）可以是其中一隻，但不是唯一一隻，你要考慮每隻股的%是否平衡。

如果你這刻比亞迪無貨，可小注月供，你計總比例就得。即是每隻股佔你股票組合長遠的比例。但長遠，你應該建立一個更平衡的組合。

大市只在合理區，你手上資金都唔好用盡，留部份等大跌市機會。

匯豐與南洋商業銀行月供都可以。

------------------------------------------------

Q21651：

老師 你好！ 2380 中國電力，我買入長期收息嗎？

我銀行可以借loan, loan rate 1.5% ,咁我借loan 來買呢隻股票 轉息差 ，你覺得風險大嗎？

龔成老師︰

先講股票本質，中國電力（2380）作為收息股，不差的。

佢主要在中國開發、建設、擁有、經營及管理發電廠。過往業務都有增長，不過盈利有少少波動，主要受成本及定價因素影響。

這股增長力不強，但作為收息股，這股不差，現價合理，都有長期持有的價值。

你現時借貸利率不高，的確可以因此創造息差收入，但你要留意幾點。

首先，你借貸利率是否固定，若將來加息，你息差優勢，就會被削弱。

另外，雖然現時有不錯息差存在，但股息並非保證。而且，大市只在合理區，難保會出現「賺息蝕價」的情況，你要明白這些風險。

最後，就算你要實行這個計劃。選擇收息股時，唔好集中晒係一隻，要分散幾隻不同行業的收息股，才會做到分散風險的效果。

------------------------------------------------

Q21652：

老師，想問下6098前景和什麼價位屬於平。

另外亦都想問下必瘦站還是2138比較好,我之前是2138職員，覺得前景也不錯

龔成老師︰

碧桂園服務（6098）由碧桂園（2007）分拆上市，主要於中國提供物業管理服務等服務。

例如包括保安、清潔、綠化等，物業管理組合涵蓋住宅物業、商業物業、寫字樓、多功能綜合樓、政府及其他公共設施、產業園、高速公路服務站、公園及學校。

佢無論在業務本質、規模、品牌、財務數據、前景，都是理想的，反映這企業有一定的質素。加上有一定的現金流，背景發展等，投資價值絕對有，相信這企業的前景不差，有長線投資的價值。

但要留意，行業有時會有較大的炒作，股價上落大，要注意風險，而整體是有長線投資價值的。

現價算係貴，最好等回1,2成，才開始小注儲貨。要回到平宜區，最少要回多4,5成。

必瘦站(1830)和香港醫思醫療集團（2138）都係有質素，相信業務發展都會不差，長遠有增長力。

如果你對2138較了解，你可以考慮投資佢都可以。但2隻股票，現價計都係貴。

香港醫思醫療集團（2138）要回多1,2成，才算合理區頂。而必瘦站(1830)最多回到$4左右，才開始慢慢入貨，會較理想。

------------------------------------------------

Q21653：

老師老師，我剛發現我媽係過去一個月不停買入0803（昌興國際），我睇返個股價係咁跌，我怕係伏股，可唔可以比d意見我。

龔成老師：

這股質素不佳，年年虧損，過往又供股又合股，同埋2019年度、2020年度，核數師意見為「不表示意見」，反映佢盤數「有古怪」。

叫佢自己小心D啦，問翻佢，點解入股一盤不停蝕錢的生意？

------------------------------------------------

Q21654：

你好，我有 2隻股票想問下 想睇下你點睇 ，9698 100蚊買 1044 65蚊 買 ，2隻都蟹左唔少，仲破底跌，點做好...

龔成老師︰

唔好太睇重"買入價"，因為當你購入一隻股票後，你是否繼續持有，關鍵位是企業質素、前景。買入價，只係一個心理因素。

萬國數據（9698）有質素的。

佢的業務為開發及營運數據中心，根據佢公司提供的資料，佢係全中國最大的運營商網絡中立數據中心服務提供商，市場份額約2成。

現時主要通過GDS上海、GDS北京及其子公司進行該等業務。GDS北京及GDS上海各自持有經營業務所需的互聯網 數據中心牌照。

佢提供託管和管理服務，包括創新和獨特的託管雲價值主張，機房面積為266,260平方米，有一定的規模。

見佢生意有一定的增長，行業前景正面，有長線投資價值。出現帳面虧損原因，主要係你買入價過高。

現時下跌，純粹係股價回至較合理水平。暫時守住先，除非貨太多就考慮減。

恆安國際（1044）主要業務為在中國生產，分銷及銷售個人衛生用品，零食產品及護膚產品。

恆安擁有多個品牌，如「心相印」、「安而康」、「品諾」、「安爾樂」等，而業務大致可分為紙巾產品、衛生巾產品、一次性紙尿褲產品、零食產品。

恆安具有品牌，又處於增長中的市場，前景不俗，故此企業為不錯的優質股。不過，市場競可能令毛利略為受壓，但相信隨著此企業發展更多較高毛利產品，影響不算大。

未來成本上升，令佢略有風險。整體而言，長線有投資價值，可以守。

------------------------------------------------

Q21655：

龔sir:您好，尋晚上咗你個堂，因為太多同學啦冇時間問你，所以喺呢度問你，你可以慢慢解答。

講到供股部份若果唔供，股價就會跌，如果咁是否係應該喺供股日前賣出呢？Thx!

另外想問9928質素如何，可否長期持有。

龔sir:今日重溫左你尋晚上嘅堂，知道供股要睇返企業嘅前景、目的、誠信、過往記錄、家族控制因素，及檢視此股佔投資比例嘅多少，己消化了。

龔成老師︰

其實供股，就係而家發一些新股票，向現有股東再集資。

你有權選擇買這些新股(即係供股)，或者不買。由於會發行新股，令每股盈利被攤薄，股價會因此而下跌。

但個原因唔係個企業質素，出左問題。而係每一股的價值，被這些新股分薄左，所以才出現下跌。

因此，我地係唔會因為供股，而去沽一隻股票。當然，佢進行得太多，例如5年內出現2次，我地就要對這些股票較為保守。

你最重要睇「質素」。如果佢有質素，其實可以持有而所謂的下調，其實是一個調整，你到時會收到供股權，如果你不想供但又想持有該股，可以賣出去對消股價下調的因素。

至於時代鄰里（9928），佢係由時代中國控股（1233）分拆上市，主要在中國從事提供物業管理服務及相關服務。

業務不差的，過往財務數據，生意與盈利都有理想增長，前景正面，有長線投資價值。

------------------------------------------------

Q21656：

想問下有邊隻晶片股比較好的？

老師請問1919現貨可入嗎？

龔成老師︰

你可以考慮買台積電(TSM)，佢係一間有質素架企業，在全球半導體業界有領先地位。

集團專注生產由客戶所設計的晶片，現時已經是全世界最大的專業積體電路製造服務公司。

如果你睇好半導體發展，可以月供，並長線持有。

中遠海控（1919）主要從事提供集裝箱航運、集裝箱碼頭管理與經營服務。

整體的質素算是不過不失，雖然在行業有一定的規模與優勢，但行業整體的賺錢能力無過往咁強。

經濟好轉會對佢有利，因為始終是對經濟較敏感的行業，現時的股價已反映相關利好因素。股價大升後，其後之後較難有高增長，因為已反映了利好因素，反而預佢之後轉為平穩增長。

現價略貴，回2,3成會合理翻d。

------------------------------------------------

Q21657：

龔sir， 嚟緊會上你嘅堂不過有啲嘢等唔切想而家問,

留意到比亞迪管理層講過，未來會分拆半導體業務上市，而吉利亦會分拆極氪智能電動車上市，瑞星會分拆光學業務

咁即係話佢原本呢啲賺錢業務嘅財務會獨立左反映出嚟，咁對於本身嘅1211，175，2018， 佢哋自身嘅 價值或者估值係咪無原先咁高 ?

因為原本擁有嘅嘢已經拆咗出嚟，少咗一樣嘢喺身上。
多謝龔sir解答

龔成老師︰

其實這些分柝動作，有好有壞，當一間企業擁有一些資產，市場未必完全能反映到這資產的價值，如果分柝比佢一個獨立地位，就能釋放當中的價值，從而提高了整間企業的價值。

另外，分柝上市能得到資金，而上述的幾間公司，都處發展期，希望得到資金去進行發展，當投資發展新業務，長遠能為企業帶來更大利益，對企業就有利。

當然，分這動作如同賣出該資產的部分構益，的確有可能減少了企業的賺錢能力，但就好睇企業如何運用得來的資金。另外，就算分柝上市，企業一般仍會擁有控制權，因此不影響企業在決策方面的發展。

至於會計上，要睇翻母公司會持有多少權重，才知道會否將這些分拆部份的財務數據，全面反映在母公司年報上。

但這個只是會計上，最重要係公司將這些有潛力部份上市，可以釋放其價值之餘，可以集資到一筆資金，去持續發展。

當然都有機會影響佢估值，令中短期股價較為波動。但長線而言，對集團是正面的。

------------------------------------------------

Q21658：

我係新手，諗住1833從高位140回調左25%可以入貨，點知一直都跌落去。呢三個月股市既氣氛都好差，係咪常有既事情？ 氣氛係咪又會突然之間轉好？

明明睇左你既書，要控制注碼，但都係心急⋯

龔成老師︰

記住，我地投資唔好受氣氛所影響。而且，更加唔好去估個走勢，會唔會突然變差，或者變好，咁係好危險。

我地永遠都只會用「企業質素」和「平貴度」，去作投資決定。

平安好醫生（1833）長遠有發展力，但股價在中短期，會十分波動，因為市場以「前景」作估值，故此變化必然很大。好難得出平貴的準確數，只能估估下，作參考。

因此，你緊記要控制注碼。如果你持貨佔組合，已經有一定比重，就算再跌，都唔好再加注。

再加注表面睇，係好似溝平左個買入價。但實際上，你係將更多資金，投入一隻高風險的股票，令自己風險再進一步提高。

------------------------------------------------

Q21659：

老師你好，想請教你一的問題。

我媽媽係年幾2年前0.97買左1560星星地產，買完一直跌 依家0.45。應該點做好?

同8188。0.6買。依家得0.138

龔成老師︰

星星地產(1560)主要在香港從事物業發展及物業投資、提供物業管理服務及提供融資。

佢唔係全無質素﹐集團規模細，盈利唔多，而且都較波動。

投資價值一般，若你媽媽持貨較多﹐建議沽出部份，換至其他優質股。若只係好小注，勉強都可以持有。

駿傑集團控股(8188)主要於香港從事以下地下建造服務，如隧道建造、地下煤氣管有關的地下公用設施的建造與翻新服務等。

企業規模好細，而且過去多年出現虧損情況，見唔到有投資價值，建議沽出。

------------------------------------------------

Q21660：

如何建立穩定和長久的被動收入？

龔成老師︰

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你現時2X歲，先用優質資產，如有增長力的優質股、物業等，去累積一筆資金。

到有一定數量時，就將佢地慢慢換成優質的收息類資產。

這些收息資產產出的現金流(如租金、股息、利息等)，就是你的被動收入。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q19821-Q19840）

Q19821：

阿sir 我最近工作好唔如意 雖然是鐵飯碗 但同理念好唔一致 最近仲同老細直接抗衡 成為左眼中釘 唉 我都唔知點解會同你分享呢個 不過我想講

好想靠自己力量實現財務自由 同時我都積極搵緊第二份工 星期一interview 俾d力量我啦！

龔成老師：

我人生中，其中一個要多謝的人，就係我之前銀行工，其中一個針對我的上級。

同事都知佢係一個超級小人，當時我比佢針對，於是，我加速發展打工以外的事業，佢成為我的動力！

因為我好想出面事業到達某一程度，盡快辭職！

我真心好多謝佢，如果無呢D人，我突破的心唔會咁強烈。

你都加油呀！呢D人，係逼你進步的動力！
祝你見工成功！

------------------------------------------------

Q19822：

老師，我係你舊生。今次想請教下妖股/微信女股既問題:

1. 你上堂教左我地一D簡單既指標點樣去避開D妖股/微信女股，最重要就係市值最好大過10億，並且最好係用佢前之前既股價去計算有10億。

想問下老師近呢兩個月有兩隻股都有好多微信女去推。
例如305 五菱氣車同埋3800保利協鑫能源，前者上網睇過係有實際業務，真係有車生產/有車房/有員工，後者市值係未升之前非常高有過100億，我發現今次微信女推既股好似都係一D相對大小小規模既股。

我想問下老師其實股市係咪而家有好強烈既人為因素去操縱?有冇辦法係選股既過程避開呢D人為因素強既股?又或者例如而家市場當炒既股係咪最好都唔好投資唔好買入?

2. 相信有唔少人都問過你必瘦站1830係咪隻妖股，因為細價而家市值係未升之前都係10~20億左右，雖然有實際業務

但近呢幾年有唔少健身中意/美容院好多sell左d好貴既套票後拎錢走人，想問下老師你有冇係必瘦站上考慮過呢個問題?點解會咁放心投資?

麻煩曬！

龔成老師：

1）市值$10億，這只是其中一個因素，去方便大家分析，如果你記得第一堂、第六堂，都有教過多種避開問題股的方法。

現時股市不是這種老千股人為的推升模式，並不是。老千股一般市值細，貨源集中在少數人手上，然後佢地利用左手交右手的模式進行，去「造」個價。

至於現時你見有些股大升，不是這類，而是市場對某些類別的股票/主題有炒作，令這些股受到大量資金去追逐。可能你見某些股無實質因素支持，但佢地有些是因為「預期因素」而受市場不斷追逐。

當然，這類股我地較難分析，較難估值，但你要明白背後的原理。投資這類股，往往是有危有機的。

2）必瘦站（1830）我在《50優質潛力股》2020年的版本，加入了這股。

書中都有詳細分析，亦有講述你所講的問題，佢在品牌上，的確扣左分，所以你見佢並不是最高質的股。不過，佢始終是很好賺，整個營運模式與發展不差，現金流強，同時在2020年，大部分時間都處於合理區中下至平的水平，因此有一定的投資值博率。

------------------------------------------------

Q19823：

龔sir , 可否請教你我個組合係1347，6690 ，883 ，點睇？仲有我初玩一個月，想買你一本作品，你會推介新手買邊本？

龔成老師：

上述的3隻股票，都有質素的，可以持有，而華虹半導體（1347）是潛力股，不過股價上落較大，初階投資者不宜持有太多。

你要學理財及投資的知識，記住，投資並不是坊間的炒炒賣賣，你要從書本或課堂上認真學習。《股票勝經》適合初階者的。

另外，多從穩健的股票，長遠角度著手，要建立一個優質，平衡的組合。

------------------------------------------------

Q19824：

如果我份工一日連埋搭車成13個鐘...
如果係你

你點樣係工作外既時間做依d野

龔成老師：

第一，我會每日用搭車時間，去睇書，增值自己。同時會利用星期六日。

第二，我會思考這份工是否長遠對我事業有利，如果只是不斷消耗我的時間，用我的青春去換取生活費，就無意思。

我會盡日尋找突破點，這工是否有發展，還是轉去另一份工。要從長期角度出發，唔好過得一日得一日。

------------------------------------------------

Q19825：

老師，我買左你本股票勝經就快睇完了，之後會繼續買其他增加知識

我從來無試過認真睇一本書嫁，但睇你既書好有興趣同好易明所以一直睇落去！

我開始左你的建議，現在月供盈富基金、港鐵這兩隻股，同時入左3手安碩恒生科技。

另外我有問題想請教你，太煩唔好意思呀～

1.如果我想加多隻月供$1000，應該選擇金沙、中生製藥、福壽園，邊一隻較好？

2.另外月供長線一般需要持續多少年供款才算長線投資？感謝感謝

龔成老師︰

1） 我地投資選項時，會因應你處於架人生階段。若果你係偏年青，可以選中生（1177）或福壽園（1448）這類潛力股，去增升組合增長力。

若你已經係中年人士，咁金沙（1928）這類有平穏增長之餘，又有一定股息的股票，就會較合適。

2） 月供係一個長線計劃，月供最少維持3年，並持有這些股票5年以上，才會有較理想效果。

如果知識不算多，就集中在ETF，如果有信心，就可選個股去月供。

------------------------------------------------

Q19826：

Hi 龔sir 想問下吉利現價仲可吾可以買？或者去到幾多錢先可以買？

另外我$256買左一手9988,而家個情況應吾應該買多手？如果買多手應該幾錢買？

定係應該買其他呢 ,thanks

龔成老師︰

吉利（0175）現時價位已經略貴，要回多3,4成才算合理區，才可分注入市。

至於阿里巴巴（9988）由於你己有貨，若你本身預定投資阿里的資金，可以以分成多注的話。

現價加一注係可以，之後每跌1成左右，才再加注。

------------------------------------------------

Q19827：

老師您好，請問新意網集團（1686）及萬國數據（9698）這兩隻股票您怎樣分析及比較，希望能夠獲得您較為詳細的看法。

之前大概用P/E進行了一些估值，1686的合理股價大約在5.8-7.2，取中間價大概為6.5

您覺得現價7.4可以入嗎，因為我還是學生，現金不太多，但若有機會還可以買幾注。非常感謝您

龔成老師︰

新意網（1686），有質素，但現價不平。佢主要從事提供數據中心、設施管理、網上應用及增值服務，系統之安裝及保養服務。

佢除了租用設施空間存放客戶服務器外，亦提供24小時設施管理、互聯網連接、系統管理及互聯網技術服務。是全港最大的數據中心服務營運者。

綜合來說，新意網有一定的質素，穩定的租金收入，強勁的現金流，加上行業的增長潛力，都令這股有投資的價值。

不過，亦由於上述所講的種種利好因素，市場亦對這股有相當的期望，市盈率現處高水平。近年由於高速發展，令負債增多了不少，是一個風險。現價偏貴，要回調2成半才到合理區，到時候才可以開始分注入貨。

萬國數據（9698）主要通過可變利益實體在中國內地及香港從事運營數據中心，以提供託管服務、管理、諮詢等服務。

初步睇佢都有投資價值，但係此股則上市，可參考數據唔多。而且集團過往一直在燒銀紙狀態，未有盈利。而是市值郤去到過千億，當中主要都係"估"佢將來發展。

當將來發展不似預期，就會出現較大回調，故此股相對新意網（1686），風險係會較高。唔係話唔投資得，但不確定性較大，只可小注博下。

睇翻兩隻，本質都不差，而新意網業務較穩定，同時現時有盈利，穩健度較高。而萬國，發展力度較大，潛力度較高，不過股價上落就會比新意網較高。因此，要睇你自己的投資目標及風險承受程度。

由於你係學生，相信總資金唔多。你唔好將大部份資金，都入晒落同一行業，咁個風險會過大。應該平均分配係唔同企業和行業上（相同行業不可佔組合多於3成，而單一企業不要高過15%。），令整個組合平衡才算係理想。

------------------------------------------------

Q19828：

龔老師，可以比意見我嗎？我就快60歲，去年失業一年，開始買股票，投資額25萬幾。

883中海洋買入8.86/8000
788中國鐵塔買入1.12/10000
552中國通信買入3.34/10000
762中國聯通買入4.52/8000
728中國電信買入1.89/10000
941中國移買入41.50/2000

龔成老師︰

你個投資組合，有幾個大問題。

首先，以你年紀，投資應以保守為主。中國鐵塔（0788）雖有質素，但波動性較大，現貨可持有，就唔好再加注。

中海油（0883）質素都算有，但不是最高質類別。石油是商品，當中沒有差異性，佢地要將石油賣出，只能跟國際油價，這令佢地處於被動狀態，沒有價格自主的能力。這類商品企業可投資，但不宜太大注。

另外，你投資組合中，極大部份係電訊股。我地個別行業比重，係唔應該佔組合超過3成，否則會有過度集中風險。

現時中海油和電訊類股份，建議沽出部份，換碼至以下股票。這些股票都係收息為主，增長力唔算好大，但可以為你提供穏定現金流，去減輕你生活負擔。

當佢地有5-6%股息率，你就可以慢慢儲貨。

收息股︰港燈（2638）、工行（1398）、恆生（0011）、置富（0778）、陽光（0435）、深高速（0548）

現時大市只在合理區，資金唔好盡用。最好留有部份，等大跌市出現時，可以用來掃貨。

你失業，點都要留有一定的現金，我地投資一定是「先想風險，後想回報」。

------------------------------------------------

Q19829：

老師，請問一下你怎看內地新能源發電市場？有那些公司比較有潛力？

另外想請教一下老師怎看滔搏6110？

龔成老師︰

信義光能（0968）和福萊特玻璃（6865）主要在中國生產及銷售光伏玻璃，都會受惠於新能發展。龍源（0916）都可留意。

但由於已被熱炒，股價已升至一個偏貴水平。想入首注，最好等有較大回調才出手。而且有一定波動性，故不宜大注。

滔搏（6110）主要係中國從事運動鞋服產品零售業務。佢大多數門店為單一品牌門店，以所售運動鞋服產品的品牌冠名。

現時同11個品牌合作，當中主力品牌為Ｎｉｋｅ、ａｄｉｄａｓ，其他品牌包括Ｐｕｍａ、Ｃｏｎｖｅｒｓｅ等。

零售網絡包括8300家直營門店，有好強大的網絡，過往業務不差，有增長，有盈利，有正現金流，只是半新股類，分析與估值上較為困難。

新股上市前一定整靚盤數數，所以要打折扣。業務上，都有投資價值，但考慮新股上市不久，不建議大注。長線投資都可以。

------------------------------------------------

Q19830：

龚成兄您好，现有问题如下，希望得到您的宝贵意见:

本人现持有9000股腾讯，我本价$170，持货已七年，升幅已经不少，但由于本人现年51岁

一直在国内工作並刚回流香港，目前並没有主动收入，所以想认真考虑是否应该在股价600元或以上

沽出三分一腾讯，换马收息股，如置富房产信讬，港灯等，以保持隐定被动收入应付日常开支？

但又担心错失股价进一步上升机会。龚成兄意见如何？

另外本人从自置物业加按了200万，以槓杆形式买入债券，年净回报约7厘

你觉得我应否换马买入目前具上升潜力的股票如比亚迪，小米，美团等？

最后，请问您怎么办看Tesla?它最近上升速度如火箭，你觉得仍有上升空间吗？多谢指教！

龔成老師︰

我地投資增值，係要考慮到成個組合架資產配置。騰訊（0700）長線有增長潛力，但由於你已是中年人士，騰訊（0700）、比亞迪（1211），小米（1810），美團（3690）這類波動性高架股票，唔應該持有太多，否則風險會太大。

建議你沽出約一半，換碼至一些"平穩增值股"和"收息股"上。前者有增值能力，但相對波動性無咁高。後者，可以為你提供平穏現金流。

平穩增值股，例如盈富（2800）、金沙（1928）、長建（1038）、中銀（2388）、港鐵（0066）、恆基（0012）、平安（2318）。
目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）都可以。

至於債券，這其實只是「產品」，物業、優質股是「資產」，所以從財富本質上，我地應較集中持有「資產」，才對我地最有利（你可以睇睇《財務自由行》一書，我從財富本質上，講述了當中原理）。同時，現時息口低，但未來有機會重回加息週期，債券未必是最好的投資工具。

而且你用"槓杆形式"去投資，嬴會係加倍，但輸架時候都會令損失放大，這種模式太高風險，唔建議去做。

其實現時大市只在合理區，唔係一個"借貸"投資架好時機。這筆錢最好等大市有較明顯回調，才去買入"平穩增值股"和"收息股"，咁會較好。

至於TESLA都有質素，但近期唔少新能車股都炒到好高，現時投資，風險唔細。

------------------------------------------------

Q19831：

老師你好，之前不懂，只盲目跟隨買股票已經輸好多😞又不懂止蝕。

手上蟹貨多到不得了，我應該而家放哂，轉投資其他嗎？

蟹貨購買價例如：
1776 $25.5
1800 $12.5
2342 $3.22
6060 $50
謝謝你

龔成老師︰

首先你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

廣發証券（1776）質素算是中等，業務有點波動，這類股唔會持有得太多。

中交建（1800）不是全無質素，但近年賺錢能力有所減少，這股不是高增長股，之後只會平穩增長，現時估值合理。

暫時都唔好對股價有太大期望，目標只是收息，你預股價上得較慢，負債較高，因此市場比佢估值不會太高。

京信通信（2342）主要從事研究、開發、製造及銷售無線電訊網絡優化系統設備、提供相關工程服務，以及提供電信服務及相關增值服務。

現時5G的發展，都會對佢有利，但這股規模唔算好大，因此又未算最強之列。但由於規模細，當企業發展時，潛力較可較大。

質素都算有的，但就不算好強，整體上都有投資的價值。不過睇翻佢最近的業績，又唔算好勁。

眾安（6060）這類股，好難玩的，因為多年都在燒銀紙，就算近年才初見盈利。但都仍未能確定長線情況，這類股要估值好難。因此，股價一定好波動，所以，只能小注。

------------------------------------------------

Q19832：

老師你好，我想問銀娛、港鐵、領展，希慎咩價位入會係合理區? 依家呢個價錢是否太高 thanks!

同埋想問下你點睇恆大，入唔入手好? 發展潛力可以嗎?
06666

其實我對地產股同領展都有興趣 但領展對我黎講一手有啲貴 想月供 反而大陸既萬科

金地，恒大發展都好似唔錯，大陸房地產都有興趣，入場費都唔算貴 想問你點睇，係咪應該對佢未來發展方向著手

因為我見恒大都係上個月先公開招股，果陣$8 依家11 應否入手 謝謝

龔成老師︰

銀娛（0027）、港鐵（0066）、領展（0823），希慎（0014）都在合理區，可以分注入貨。

恒大物業（6666）在2020年11月從中國恒大（3333）分拆上市，主要在中國從事提供物業管理服務及相關增值服務。

此股都有質素，但由於上市不久，現時數據只可作參考。長線發展潛力，尚要時間觀察。

由於佢係新股，加上負債都唔輕，此刻只宜小注投資。

領展（0823）現價在合理區中至上部，若有5%股息率，會較理想。

其實內地不少地產相關股票，唔係話無投資，但都有同一個問題，就係負債好高。經濟好，當然問題不大。但經濟變差，資金鏈有機會出問題。

所以，你投資係可以，但只可小注，同時要明白當中風險。

------------------------------------------------

Q19833：

龔sir 想問如果投資新手
26歲 有90萬 只有做定期同買ibond

想儲錢2年後買樓 應該如何投資較好？希望可以指教一下。。月入4萬

龔成老師︰

2年是一個較短期的時間，就算企業再優質，中短期都會出現波動，影響你回報。

若你只有2年時間去做增值，投資選項要相對保守。你可以用「平穩增值股」+「收息股」作增值組合，比例約各一半。

平穩增值股，例如盈富（2800）、金沙（1928）、長建（1038）、中銀（2388）、港鐵（0066）、恆基（0012）、平安（2318）。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）都可以。

現時大市只是合理區，90萬資金可以先投入一半，用"分注"形式，慢慢買貨。餘下一半資金，就等大市出現一定程度的下跌，才大力度掃貨。

到你要置業前半年，就要開始分段沽貨套現。

------------------------------------------------

Q19834：

老師你好，想請教一下，本人31歲，每月可儲2萬，現有資產如下:

現金100餘萬，當中包括股票約20萬
買入價位:
1177 - 2000@$7
823 - 500@$63.4
1928 - 2000@34
914 - 1000@$48.15

以上組合分配如何？如果希望於兩年內將資產增值並置業，增加一些有潛力的股票

你建議加入1448及968，或者增持現有的股票嗎？還是有其他更適合我的股票建議？謝謝。

龔成老師︰

投資股票，就等同買入一間企業，企業是要時間去升值。2年係一個短期的時間，就算企業再優質，中短期都會出現波動，影響你回報。

由於時間較短，只宜作一些較平穏的投資。現在你每月5成儲蓄，去做月供，其餘先儲起，用一邊月供一邊儲蓄的策略。

分配上，平穩增值股和收息股大約各一半。

平穩增值股，例如盈富（2800）、金沙（1928）、長建（1038）、中銀（2388）、港鐵（0066）、恆基（0012）、平安（2318）、煤氣（0003）。

收息股︰港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。

現時大市在合理區，你可以先用40萬現金，慢慢分注入以上股票。之後若果大市有明顯回調，你才再用餘下40萬現金去加注。

到你要置業前半年左右，就慢慢分段沽出持股套現。

------------------------------------------------

Q19835：

你好 龔成老師 我29歲月入15000做物業管理 我持有10手煤氣 6手hsbc 3手盈富

1手2163 現金大約有4萬左右 我想1至2年後買樓結婚 普通居屋或者400萬以下私人樓

投資方面應該點樣分配好d？係咪應該買隻進取d既股好？同埋我hsbc大約50蚊左右買入既

想問下應該放左佢換過第2隻定繼續擺係到等收息？

龔成老師︰

你1至2年後，這些資產有明確用途。由於2年只係一個好短架時間，投資再優質架股票，都難免有機會出現股價波動。

因此，你只可以作較保守架投資，現時持貨可以不用變動。另外，你可以再用「平穩增值股」+「收息股」作月供組合，比重大約各佔一半。

現在你每月5成儲蓄，去做月供，其餘先儲起，用一邊月供一邊儲蓄的策略。

平穩增值股，例如盈富（2800）、金沙（1928）、長建（1038）、中銀（2388）、港鐵（0066）、恆基（0012）、平安（2318）。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨。

------------------------------------------------

Q19836：

我已經上了股票班，但仍然想對投資方面，認識多一點，所以想報這個。

另外，我手持中國移動，本來我覺得佢係水桶三既股票，對佢既股價沒有期望

只係我已經揸左超過10年，諗住佢在發展5G，係國內也有壟斷既地位，點跌都應該有個譜

用黎收息。點不知美國個邊一搞，佢就跌到慘不忍睹。美國將它下架

其實應該唔會影響佢賺錢能力，雖有短期沽壓，但長遠係咪無問題，我想法正確嗎？

龔成老師︰

你的想法，大致都正確。

中國移動（0941），近期國際問題令佢風險大左。但這都是中短期因素，長線佢質素唔算有太大變動。

此股係有質素，5G雖然對佢有正面影響，不過中國政府希望相關費用不會太貴，令資訊流通更便利。

長遠只會慢慢平穩增長，若你目標係為收息股，持有係可以。

------------------------------------------------

Q19837：

龔成老師你好，想請問下981中芯國際同322康師傅前景如何？

我$23.8入了981 5000股
$14.1入了322 12000股

現在中芯有少少收穫，康師傅就未到位，我是否要離場換另外一些股

還有可持有現在的股票好？
謝謝老師抽空回覆

龔成老師︰

中芯國際（0981）本質不過不失，雖然仍每年的生意都有增長，但盈利就有波動，反映雖然大環境的市場在增長中，但佢的成本與售價，就未必在佢掌握的範圍，最後造成盈利波動的結果。

雖然這股都有前景，但以佢面對的情況，但好難將佢定義為好優質的股票，只屬中等。此股質素和吸引力算一般，若只佔你組合小部份，持有係可以。

康師傅控股（0322）本質不差，有品牌及規模，2016年後其實股價大升，但之後又大跌翻，股價甚為波動，反映內地的市場競爭激烈。

佢近年股價回落了不少，市盈率仍是略高，估值處合理區較上部。

長遠的投資價值仍在，但在市場競爭較大的前提下，相信盈利會有點波動。此股算是平穩增值股，都質股素，可以持有。

------------------------------------------------

Q19838：

龔sir,想請教一下你覺得吉利如何？適合長線定短線持股？

另外想問埋3800保利協鑫，我幾年前$2.6x入咗，之後見佢一直跌無止蝕，後來$0.7x又溝咗轉

之後再繼續跌到無眼睇，到20年7月佢個廠爆炸，股價已經落到$0.21

個股價殘到咁我就決定唔再放錢落去（呢個決定而家好後悔），三十幾萬本金變到得返四萬.....

以為真係無希望，點知突然有政策支持，股價急上，但我都無再溝貨，因為唔敢再放錢落去

而家仲未到家鄉，龔sir,你覺得政策能否支持3800股價再上升？我應該一到家鄉就閃定係有機會第佢股價再上？

龔成老師︰

任何優質股，都應該係以長線持有，增值效果才會最好。緊記唔好短炒，這個唔係一個理想的財富增值方法。

吉利（0175）本身的質素不差，擁有一定的銷售網絡及品牌，不錯的市場策略及定位，而又能把握中國汽車市場增長的機遇。

未來電動車將為汽車業帶來很大發展空間，吉利在電動車方面技術都有，但唔算最高。相比比亞迪（1211），優勢唔明顯，故對這部份唔好有過高期望。

現時價位已經略貴，要回翻D先算合理區，才可分注入市。

保利協鑫能源（3800）質素一般，近年更出現虧損。最令人最擔心的，是佢2018年的核數師報告，出現了修定，反映核數師曾經對佢的賬面有疑問，這是一個不利訊號。

另外，這股過往是散戶其中一隻炒股，我最怕就是這類。這股質素一般，不適合持有太多，可以考慮反彈後先賣出一半，餘下再觀察少再做決定。

------------------------------------------------

Q19839：

龔sir 如果長線投資 941會否比12更好？現價平 股息又高

龔成老師︰

2者股票性質不同，唔可以單用股息高低，去比較其投資價值。

中國移動（0941）不是無質素，5G雖然對佢有正面影響，不過中國政府希望相關費用不會太貴，令資訊流通更便利。所以，佢只會係平穏增長。

你可以視佢為收息股，唔好預佢會有大增長。現價計有逾7%，可分注入貨。

恆基（0012）前景正面，加上佢是全港持有最多農地的發展商，長遠的價值一定會慢慢釋放。

此股相對中國移動（0941），未來增長潛力會較高。現價處合理區，雖然股息率無中國移動咁高，但投資此股應較著眼未來增長潛力。

你可以因應你自己投資目標，去決定買邊隻。

------------------------------------------------

Q19840：

老師你好，我今年四十幾歲了，將會移居澳洲，先生係當地有穩定工作同收入，過到去，我可能會搵下Part-time 做

未必可以儲到錢。現時資產如下:
現金$1.4M
股票$400K

$100K 941
$100K 9988
$50K 688
$50K 883
$30K 1093
$30K 12
$30K 1928

現金1.4M 中會留0.6M作備用，其餘0.8M 可投資股票，希望每年有10%回報,投資期十年。如果繼續加注以上股票，
可以做到10%回報嗎，可以俾啲意見我參考吓嗎，多謝你先，祝身體健康，會繼續支持你嘅新書。

龔成老師︰

你以上股票都可以，但中國海洋石油（0883）雖有質素，但不是最高質類別。

石油是商品，當中沒有差異性，佢地要將石油賣出，只能跟國際油價，這令佢地處於被動狀態，沒有價格自主的能力，這令佢地的獨特性有限。這類商品企業可投資，但不宜佔太多。

現時大市在合理區，現金和股票比例大約各一半，故你可以再動用多20萬，分注入一些優質股。餘下資金就等大跌市，才加大力度入貨。除了投資以上股票，以下股票都合適，供你作參考。

平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、領展（0823）、希慎（0014）、太古地產（1972）。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。