《喺巴士上面識咗個男仔頭嘅女仔》(終) . .【阿喵－分手之後】 . 自從被父母送去外國讀書，畀Roy父母拆散過我同佢嘅關係。我就唔敢再相信「父母」呢樣生物。 因為父母係唔會理我意願，只會將佢哋認為對與錯嘅事，強逼我去服從。再行返同佢哋一模一樣嘅舊路… . 人生就好似遊戲「大富翁」一樣。 就算你每局都行返同一樣格數，都未必會贏。 因為「機會」同「命運」，每個人都唔一樣。 . .所以我唔敢畀父母知道我同阿橙拍拖，我怕會被父母拆散我哋。 但當阿橙喺Newway同我講嘅一番說話之後，我先發現… 將呢段關係拆散嘅，係我自己。 . .當晚返到上K房，阿洛同其他人問我發生咩事。 阿洛：「阿喵，妳帶埋啲乜鬼嘢怪朋友嚟啊，打輸機發脾氣嘅。」 . .「佢…」 .Jason：「佢出嚟幾次都淨係識陪笑，我已經盡量關懷佢，撩佢傾計啦哈哈。」 . .「唔係啊，因為呢…」 阿洛：「喂阿喵，我見係妳咋。如果唔係實串到佢一棟都無。下次佢唔想嚟，就咪逼人啦。」 .「夠喇！」成間K房再次靜晒。 . .「佢、佢係我男朋友啊…」 .阿洛：「吓？唔係嘛…阿喵妳幾時鍾意咗吸毒啊？哈哈哈，食毒撚！」 . .「我鍾意邊個關你乜事？點解我要為咗其他人點睇去避忌同鍾意嘅人一齊喎。」 . . .當下腦海不斷重播阿橙同我講嘅說話。我完全失去思考能力，只係想結束所有外界對我嘅珈瑣，我剩係想為自己而活，我唔想再討好任何人。 . .嗰一刻，我已經有同朋友絕交嘅心理準備。 . .Jason：「Sorry囉…點解妳唔一早講喎。」 .「因為你哋有人識得我父母啊，當年佢點樣硬要送我去外國，佢有晒你哋全部人 Facebook，我知佢一定會跟蹤住我嘅行蹤。」 . . .阿洛：「所以妳就一直做緊戲畀妳父母睇？」 .Jason：「阿喵，妳估我哋間碟咩，妳講一句！我哋全部人幫妳保守秘密！…不如妳去追返妳男朋友先啦。」 . .坦白係一件好難嘅事。因為你唔知道其他人會點睇，就算表面贊同，亦唔知人哋背後會點講你。但當你下定決心之後，其實都唔係咁難，感覺仲好舒坦添。 . .我即刻追咗落街，搵唔到阿橙，我仲打過好多次電話，但佢都無聽。 最後，我無上返去就自己一個返咗屋企。 . .阿橙Block咗我whatsapp，又唔肯聽我電話，我完全聯絡唔到佢。呢一刻，我先開始驚因為呢個誤會，可能永遠都見佢唔到。 . .我問過好多人，亦去過好多電話舖頭。我想將之前Roy刪除咗，阿橙畀我嘅訊息復原，我想知佢同我講過啲乜。 但佢哋話訊息刪除一、兩日都可能仲有機會，隔咗咁耐，個訊息已經無可能復原。 . .我失去咗同阿橙嘅未來， 我只能夠追返以前唔識珍惜嘅回憶。 . .事隔一個月，我知道現實無韓劇咁多巧合，好多嘢失去咗就係失去咗。 但如果…可以畀多次機會我，無論如何，我都唔會放手。 . . .【阿橙】 . .地鐵車廂，一個所有乘客連抬起頭望一眼都懶嘅偶遇。 .對我嚟講，係一次畢生難忘嘅失而復得。 . .「阿喵？」我。 .「佢係我男朋友，佢叫阿橙，佢係我鍾意嘅人。」阿喵撓實我隻手，向阿洛解釋。我望住佢哋所有人，阿洛、Jack定Jacky、仲有幾個我連見過面都唔記得嘅人。 . .「阿橙，對唔住…」 咁啱，地鐵到站開門，九龍灣站。就嚟閂門嘅提示嘟嘟聲遮掩咗阿喵把聲。 . .「我叫阿橙啊你老味！阿喵係我女朋友！」我指住阿洛講。 . .然後一手拖住阿喵衝出車廂！ . .車門剛好閂埋，我完美咁將小野貓從一班狗公手上救出嚟，哈哈我係英雄啊！Jack定Jacky喺車廂入面猛咁揮手，我向佢哋舉起中指。 . .然後，阿洛一臉錯愕，舉起咗手上拎住嘅背囊… .「傻橙你做乜鬼啊！阿洛仲幫我拎住個背囊啊！」 .「吓？！」 .「傻瓜，我同佢哋講清楚我哋嘅關係啦！」 .「但佢哋頭先仲唔認得我…」 .「佢哋夾埋做戲玩你咋！」 . .彩虹站，阿洛成班喺下一個站等我哋去拎返個袋。阿喵同我講返晒當晚Newway之後發生嘅事。如果你問我而家有咩感覺，我可以講，簡直好似喺巴士肚痛仲要塞車，返到屋企後除晒身上所有衫褲即時肛門大解放咁。 . .「呃…唔好意思頭先我語氣重咗少少。」我承認，呢一刻我真係柒過關家姐。 . .「咪講埋呢啲嘢啦，我哋去游船河，你一齊去唔去啊？」 .「但我…乜都無帶。」我望住小野貓：「妳去玩啦，玩完打電話畀我，好無？」 . .我開放拖住小野貓隻手。 佢拖返實我。 . .「我唔去啦，我想同阿橙去拍拖～」 .「唉好啦，唔阻你哋恩愛。」阿洛。 . 阿洛將個袋畀返阿喵，成班人搭下一班地鐵離開。 . .「咁我哋…而家去邊？」我問。 .「咁你想去我屋企，定你屋企吖？」阿喵。 . .愛情嘅嘢就係咁，有人窮盡一生都追求唔到自己真愛。 但當追到嘅時候，之前無論經歷過幾多辛酸，都會一瞬間變成甜蜜嘅回憶。 . （全故完） . ＊反應好嘅話，下個故事就會喺下星期即時開始！如果唔係…咁我休息返一頭半個月先＊ . fb：BlueGodZi