【龔成問答信箱】（Q22501-Q22520）

Q22501：

老師！有個問題我想問好耐！

我見你講1211 現價偏貴。咁點解你而家唔先賣出？？？

低位再買返（我絕對明白投資要長線）

但亦冇理由睇住股價由最高位跌返落去？長期持有但高位沽貨！咁又如何獲利？

龔成老師：

因為無人知股價走勢。你這句「冇理由睇住股價又最高位跌返落去」，是「預期股價走勢」的思維，即是「散戶思維」。

這種思維，令一般散戶，無法賺到10倍回報，因為佢地見到某股到了高位，就會「賣出等跌先買」，但結果是「賣出後一直升」。

如果我真的賣出比亞迪（1211），但佢股價唔跌，然後佢的企業價值不斷增加，今天的$2XX是貴，但過一年可以變成合理，我就會買唔翻。

企業的平貴，與股價的走勢，中短期可以無關。

你仍停留在「一般人思維」，你以「現金」作貨幣單位，而我以「資產」作貨幣單位。

一般人認為「持有現金」才是有財富，認為「獲利，賣出股票」才能賺錢，但有錢人思維，就明白「現金永遠貶值，持有優質股才是真財富」，根本不用賣出股票。

一般人擔心「如果高位不賣出股票，不賺錢，有機會股價跌翻」。

有錢人擔心「如果賣出優質股，有機會買唔翻，持有貶值的現金根本無用」。

------------------------------------------------

Q22502：

老師，想請教隻完美醫療

1）公司向主席授出購股權是什麼意思呢？對公司前景是好與壞呢？

2）上海市打擊非法美容服務，正路理解是如果完美醫療係正規，理論上是可以打擊其他同行違規對手，有利完美醫療做到寡頭壟斷和汰弱留強，

從而整治行業而令其受惠及增加市場競爭力及份額，實屬利好！但問題是……作為我們散戶及投資者怎樣可以知道完美醫療有沒有違規呢？？

現在我們都只是能看財經新聞消息和媒體報導，雖然暫時未见到上海市政府有點名批評（完美醫療有違規）的報導好似之前騰訊或阿里違規而遭罰款和要求改善和禁令，

但目前這兩個月從高位$10.9下跌至$6.6，會否已經提前有些預兆和隱藏一些殺機呢？

3）之前聽你講過$6是合理區間的頂部，所以我也本來打算準備$6.5左右開始分注入市的（之後近$6再加注），現階段的策略應該是怎樣呢？需要調整嗎？

觀望一下還是照原定計劃進行呢？盼龔sir指點一下！

4）另外你曾說你之前有入貨完美醫療，私人想問下你之前什麼價位入呢？如果以你自己角度，你會用咩價位再加注呢？

純粹想了解和學習多D你個人意見及做法（如果你介意的話可以唔需要講的）

謝謝龔Sir

龔成老師︰

1) 購股權，其實就係一個權證，給予持有者可以在未來時間，用特定價格買入該股。不少上市企業，都會以購股權作為管理層獎勵。

因為購股權的行洗價，是固定的。若日後企業股價提升，即管理層有機會用比市場更平宜的價錢，去買入該股。

其實這個動作，唔代表公司前景是好，定是壞。作為投資者，你只要留意購股權數量，當全數行洗，會佔已發行股量多少。

因為，當行洗購股權時，公司係會發行新股，變相令現有股東的利益被攤薄。以完美醫療(1830)為例，發行的70.9萬份購股權，只佔發行股份的約0.058%，這程度就影響不大。

2) 我地唔係行內專家或者用家，更加唔係企業一份子，的確很難去知佢現時有無違規風險。所以，我地只能用佢過去紀錄和現時質素，去作為參考，例如以現時香港情況去分析。初步睇，個風險唔算好高。

至於點解跌咁多，係因為之前股價太貴，現時純粹只係回調至一個較合理水平，當然，市場對潛在監管有擔心，都是風險。但現價未算平，只係合理區頂位，只宜小注。

3) 估值上無大變，現價係合理區頂位，如果你無貨可以先小注。但由於此股都有一定不確定性，故長線不宜持有過多。

4) 我在$2左右入，暫時唔會再加注。

------------------------------------------------

Q22503：

龔Sir，你好!我現年59岁，仍在工作，現持有以下股票，是否会适，請賜教:-

#00003 (香港中華煤氣) 2100股 @11.86
#00011 (恒生银行) 200股 @144.25
#00012 (恒基地產) 1000股 @28.75
#00066 (地鐵公司) 3,000股 @41.12
#00303 (伟易達) 500股 @60.58
#00435 (陽光房地產基金) 7000股 @3.75

#00548 (深圳高速公路股份) 2000股 @6.88
#00590 (六福集團) 3000股 @18.50
#00778 (置富產業信託) 5000股 @6.99
#00823 (领展房產基金) 600股 @70.60
#01310 (香港寬頻) 2000股 @11.04
#01448 (福寿園) 3000股 @7.70

#01928 (金沙中国有限公司) 1600股 @33.33
#01972 (太古地產) 1000股 @21.68
#02388 (中銀香港) 2000股 @25.58
#02638 (港燈) 2000股 @7.70
#02800 (盈富基金) 5500股 @27.44
#03067 (安碩恒生科技) 1300股 @17.71
#03110 (GX恒生高股息率) 1200股 @28.50

1) 老師，最终#00788 (中國鐵塔) 及#1177(中国生物製药)賣出了，前者蚀约1700元，后者賺了150多元。在这段日子裡我也按您给我的意見，

加持了部份的股票，有時間請您抽空再给我宝贵意見。

2) 老師，按以上这个组合，我这个年纪应否到价時可减持或全賣出#01448(福寿園) #03067(安碩恒生科技)，会否造成组合不平衡呢？

3) 老師，另外我想问问#01928 (金沙中国有限公司)，这年头怎麼不公佈業绩的，这情況会对企業有影响嗎？还可继續投资？

4) 而#01310(香港寬頻)，我也希望到价時賣出，加持组合內其它的股票。

老師，請抽出您的宝贵時間多多指教提醒。

龔成老師︰

1) 現時這個組合，大致上可以。但緊記，這個組合不是永遠適用。你要按自己人生階段，慢慢將收息股比例加重，至退休時應佔100%。

2) 如果佢地去到好貴水平，你就可以減持(現價只是合理區上部，跟好貴還有很遠距離)。或者到你退休前2-3年左右，慢慢分段沽出，換成收息股，咁就可以。

3) 中期報告，佢往都係8月尾先有，至於2020年全年業績己在2021年3月公布。上年受疫情影響，出現虧損，但相信只係影響集團中短期，長線投資價值依然存在。

4) 香港寬頻（1310）主要在香港提供固定電訊網絡服務及國際電訊服務，以及產品銷售。

業務發展不過不失，中短期較一般，之後會好翻D。

整體來說，長線投資仍可，雖然增長力唔算強，但作為收息股係可以。而且你持貨不算多，唔建議你沽出

------------------------------------------------

Q22504：

龔老師你好，我於去年買入了一些股票，部分買入後幾日就可以倒蝕，當時問過老師意見，希望到一定價位後放出，但一直未有機會。

直至近期差不多全倉紅了，而我亦認為月供股較適合我，但希望老師指點一下如何處理持倉的股票，謝謝

京東健康 6618 $146 ，550股
小米 1810 $28.35 ，600股
東亞銀行 0023 $16.8，600股
云想科技 2131 $12.08，1000股
清科創業 1945 $19，800股
中策集團 235 $0.25，20000股

龔成老師︰

你太在意個買入價和帳面數字，完全錯左焦點。

你唔好再用買入價，作為判斷一隻股票優劣的標準。你應著眼佢本身有無質素，如果有，中短期價格波動，令到出現帳面虧損，係無問題，照可以長線持有。

但如果係無質素，就算而一刻是賺定蝕，你都要將佢沽出。重點分析的地方，係企業質素，而非股價上。

小米(1810)係有質素的潛力股，若你係年青至中年人士，這股適合長線持有。

京東健康(6618)、云想科技(2131)和清科創業(1945)唔係話無投資價值，只係不確定性較高，你現時只有好少貨，其實你可以長線持有都得。

但京東健康(6618)就持貨太多，就算一般優質股，我地都唔好持有過多，大約佔組合15%好了，行業上限則為30%，以免出現過度集中性風險。故你要將6618沽少少，換至其他股票，去平衡個組合。

東亞銀行(0023)和中策集團(0235)質素一般，建議你分段慢慢沽出，換至其他優質股。

其實若果你無太多投資知識和經驗，對企業估值，點去定平貴不太了解。先利用月供模式去做增值，可以減低買貴貨風險，對你而言會較理想。

假設你係年青至中年人士，你可以用「平穏增長股」 + 「潛力股」的組合。如果你係偏年青，比例大約可以去到各一半。

但由於「潛力股」有一定波動性，較適宜年青和有投資經驗人士。若你投資取態較保守、經驗較淺或者較接近中年，「潛力股」比重就要相對下調。

現在你每月先用5成儲蓄做月供。其餘先儲起，用一邊月供一邊儲蓄的策略。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

------------------------------------------------

Q22505：

謝謝老師，明白的。如果有一百萬作投資，分注的話，又估計會下跌，是如何分注？

龔老師，我老公叫我全部公積金（4成都係股票）轉現金。我覺得無必要，因為我的股票部份是港股，而且市一定會反彈的。

但是，我快退休，會於明年1月攞番公積金。請問你可以俾我意見嗎？我很不開心，因為工作多年不開心，難得做了決定，現在為賺錢又不退休，非常難受！

我身體不大好，因為多年壓力，不是一般人可以忍受的。

龔成老師︰

若你明年頭就退休，餘下可投資時間不多，公積金組合，真的不宜持有太多股票。你要開始慢慢將佢地換成較保守組合，例如債券、現金類基金。一切以保本為主，之後取回相關資金，再投資收息資產。

但記住唔洗一次過轉晒，分段咁去做會較好，可以平衡價格波動風險。

另外，我地唔好估個市走勢，無人可以估到佢中短期，幾時跌，幾時升。我地只會用股票平貴，去定我地投資策略。

現時大市在合理水平，你100萬可以先用30-40萬，慢慢分注買入我之前講的收息股。餘下資金，就等有再明顯回調，才慢慢加注。

配置比例上，唔洗諗得太複雜，平均分配在我推介你的收息股就可以。只要唔好偏重個別企業或者行業，比例控制在分別15%和30%以內，咁就可以。

辛苦日子將會過去，好好配置財富組合，去享受將至的退休人生。

------------------------------------------------

Q22506：

感謝龔sir意見！因為巴菲特都非常推薦投資者購買ETF，所以我想多了解一下ETF，龔sir在你的股票班中只有在初班有提及到ETF，

當中你提到NAV值，因為財經網站上提供的NAV值都是有延誤的，所以必須自行計算現時的NAV值。

我以安碩恒生科技（3067）做例子，想麻煩龔sir你睇睇我有冇計錯。

8/18恒生指數收市價 25867.01
8/16恒生指數收市價 26181.46

8/18 安碩恒生科技 現價 12.97

8/16 安碩恒生科技NAV 13.416

計算恒生指數8/16和8/18的差額
25867.01 - 26181.46 = - 314.45
- 314.45 ÷ 26181.46 = - 0.012 （-1.2%）

恒生指數差額為 -1.2%

再將NAV值 × 恒生指數差額
13.416 × -1.2% = -0.16

13.416 + (-0.16） = 13.256

8/18安碩恒生科技的NAV值是13.256

比較今日收市價12.97，NAV值大於收市價即代表此刻市場低估此ETF價值，是一個買入的訊號。但是我要如何得知此價是應該大手買入還是小注買入呢？

如果我想多了解一下ETF，請問有冇書籍或者網站可以介紹？

謝謝！

龔成老師︰

你唔應該用恆指去計，而要用恆生科指數數去計！

至於當中的計算模式，和得出ETF被市場低估這個結論，係正確。

但係抽取數據作比較時，就有問題。我地係決定用那個數據，同該ETF比較時，要留意有無比較意義。

你現時分析對象係安碩恒生科技(3067)，是30間科技公司的ETF組合。而恆指，則是60間藍籌企業，當中包括科技股以外，多個不同行業。故2者係有根本性的差別，用來比對其誤差，就有失穏當。

你應該用恆指科技指數，去做比對對象。因為3067，就正正係追蹤這個指數。

8/18恒生科技指數收市價 6226.69
8/16恒生科技指數收市價 6420.14

即大約 -3.0%。

而8/18安碩恒生科技股價$12.97，和8/16安碩恒生科技NAV$13.416，差距都是 -3.3%。故ETF3067跟大市，大約只有0.3%的誤差，唔算係好大。

其實一般大型ETF，好少會出現較大誤差的情況。主要係一些冷門和不活躍的ETF，才有機會出現。

如果真係有較大折讓，而個ETF本身都有投資價值。你可以因應當時平貴，去決定注碼。因為我地唔係短炒，這個折讓純粹係多個機會，令你找到別人不為意的平宜貨。

------------------------------------------------

Q22507：

龔sir 你好，已經過左半年，希望老師審視我既投資組合

2800 @ 27.5 2784股
066 @ 44.5 1402股
2388 @ 28.3 1000股
1211 @ 44 205股
1177 @ 7.7 1200股

788 @ 1.28 18000股
178 @ 2.21 6000股
1212 @ 7.6 4000股
1257 @ 3.2 5000股

1972 @ 21.05 1200股
1928@ 27.8 800股
9618 @ 290 50股
3067 @ 13.9 800股

（1） 持股組合有沒有問題？需要改善？

（2） 持股數目會否太多？

（3）月供緊788仲可以繼續？

（4）想往後賣出2388/178，再轉去其他增長股，可以嗎？

（5） 現在科技股有回落，增持3067/9618得唔得

（6）增持1972/1928/1212/1257可以嗎？

謝謝老師指導

龔成老師︰

1) 無問題，你長線持有就可以。

2) 有少少多，最好集中係10隻左右。

3) 可以，但你預佢增長力無以往咁勁，算係潛力股和平穏增長股之間，依然有長線投資價值。

4) 中銀香港(2388)有質素，唔建議咁做。而莎莎(0178)唔係無質素，但比較受經濟週期性影響，不宜持有太多。如果你想換碼，可以等大環境明顯好轉﹐佢有較大回升時，減持少少。

5) 如果你資金較充裕，現時加小注都係可以。但若資金不多，可以等佢地回多少少先，才考慮加注。

6) 這些股票，現價都合理，你最好等佢回到同你上一注，係有10-15%回調幅度，才加注會較好。

另外，中國光大綠色環保（1257）其實本質不差。

睇翻佢的業務情況，長遠發展其實是一個大方向，但佢近年負債有所上升，加上市場擔心佢之後的增長力有所減慢，因此對這股的評價減少左。的確，負債與發展持續性，是這股的風險因素。

長遠來說，這股仍是有投資價值，但不建議太過大注。始終都有風險，同時可能仍會弱一段時期。

------------------------------------------------

Q22508：

龔成老師您好，又想找您問問題。首先，好多謝您回覆所有網友的問題，又會公開俾人睇，您的每個回覆都充滿了正能量，每次我唔開心都會不停睇您的帖子。

我27歲，一事無成，靠努力有4份工，接近番足7日工，每年TOTAL放10全日假都無，雖然D工都係兼職、炒散、正職係低人工的文職，月入都係共$15,000-$17,000左右。

睇左您個page2年左右，由短炒變長渣，由輸好多錢變打和，好多謝您。

現時股票有
12(佔投資組合13%)、
257(佔投資組合7%)、
386(佔投資組合9%)、
728(佔投資組合7%)、
1448(佔投資組合8%)、

1800(佔投資組合6%)、
2388(佔投資組合15%)、
3868(佔投資組合6%)、
3320(佔投資組合6%)、
1(佔投資組合23%)

Total $250,000, 帳面(-5%)

現金$120,000(全數可投資，不用作流動現金)，每月儲$8,300左右，每年股息約$11,000，全數會再作投資

股票好似有D多，但我唔會再買新股，目標係上述10隻股票，平均每隻佔投資組合10%

因為我成日為自己工作好唔開心，所以我目標31歲左右有100萬，之後唔再儲咁多錢，再搵其它開心工作。而果100萬希望之後每年複利息6%增長，

我65歲時就有6,800,000左右，加埋MPF應該有8,200,000，而退休後每年可以用$740,000左右(如果計2021年之後每年3%通帳，我65歲的$740,000即是現時的$240,000)。

如果我現時(27歲)根據每月儲$8,300左右，股票250,000左右，現金120,000左右，再複利息投資上述10隻股票，我31歲時可以有100萬的機會大唔大?

如果我31歲時有100萬，之後不儲蓄但不停複利息增長，我65歲時有6,800,000的機會大唔大?

最後，請問老師有沒有其它財務建議?

萬分感謝，無名的支持者

龔成老師︰

其實你最需要多謝的人，是你自己。因為"改變"唔係一件容易的事，要很大力氣、意志和自律性，才可以做到。

以年均回報6%計，你31歲時100萬，應該在65歲個陣可以升值至720萬。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你27歲這麼年輕的年紀，我會建議先集中係有增長力的優質股(除非你風險承受能力好低)，去累積一筆財富。

而我地以長線平均回報計，每年平均合理增值，大約可以去到10-15%。若以年均10%回報計，你這100萬到65歲，應該已經升值至2000萬以上，故成事機會很大。

我假設投資回報有10%（連股息再投資），你每月投資$8300 + 37萬資產，4年後大約會增值至100萬，配合到你目標。

但較大問題係，你現時持股中，不少是收息股(0728, 3868, 1800,0386)，佢地增長力較弱，主要係收下息，未必可以做到年均10%增長。建議你將部份換碼至以下增長股，同時月供部份，都係以有增長力股票為主。

你可以投資「平穏增長股」和「潛力股」，去創建一個增值平台。你每月5成儲蓄，即是用$4150做月供。其餘先儲起，用一邊月供一邊儲蓄的策略。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

現時大市只是合理區，你現有12萬現金和每月所儲倒的資金，就等大市出現一定程度的下跌，才大力度掃貨，然後長線投資。

到你退休時，將這些股票換成收息資產，去支援你退休生活開支，咁就可以。

------------------------------------------------

Q22509：

阿sir,想問下如果想股換股，因為資金不足

1. 857中石油（賺錢）
2. 788 中國鐵塔 （蝕錢）
3. 9960 康聖環球 （蝕錢）

其實係咪應該將蝕錢的轉倉？如果按質素我覺得可能康聖會係最差？初時諗不如用中石油轉，但如果佢係呢3隻當中最好質素，即佢賺錢能力較強，又冇理由攞佢嚟轉，求賜教，謝謝

阿sir想問呢隻1799可入嗎

龔成老師︰

其實現時係賺錢，定係蝕錢，唔能夠代表佢質素好壞，最終我地都要睇翻佢企業本質而定。

3隻當中，中國鐵塔(0788)最有質素，雖然增長力比以往弱左﹐現算係水桶1至2，但長線投資價值依然存在，建議長線持有。

中石油(0857)都算有質素，但這始終是商品企業，產品沒有差異性，只能賺取合理的利潤，不算是最高質的類別，投資價值中等，這類股不宜持有太多。

石油是商品，當中沒有差異性，佢地要將石油賣出，只能跟國際油價，這令佢處於被動狀態，沒有價格自主的能力，這令佢地的獨特性有限。這類商品企業，都可投資，但就要明白不是最高質的企業。

由價佢會比較受油價影響，自主能力不強，加上油價中短期可以好波動。長遠增長力只屬中等，只宜小注投資。

康聖環球（9960）質素同樣只算是中等。

佢主要於中國向醫院提供6個主要專科領域（包括血液學、遺傳病及罕見病、傳染病、腫瘤、神經學及婦科）的臨床檢測服務，亦提供ＣＯＶＩＤ－１９相關檢測服務及常規檢測服務。

佢亦向合約研究機構、臨床試驗贊助商、製藥公司及研究機構提供臨床檢測服務、諮詢及評估服務，以及標本儲存服務。佢係在武漢、北京、上海、成都、天津及烏魯木齊設有7個實驗室。

其實質素都有的，但不算好高，企業獨特性未算好強，以及這刻佢在虧損中，往後的發展仍有較多不確定性。這類股都一樣不宜投資太多。

如果你0857和9960持貨佔組合較多的話，你係可以沽少少，換至其他優質股。

但緊記我地創建組合時，唔好太集中係單一股票，要平衡。個別企業和行業，不要佔組合15%和30%以上，銀行業更加不要高於組合20%，否則會有過度集中性風險。

在創建組合初期，組合金額較少，出現超標都係可以接受。但長線你要參照這指標，去維持組合的平衡性，才算理想。

新特能源（1799）係太陽能級多晶硅生產商和光伏項目承包商，主要從事中國光伏產業上游和下游環節的業務。

佢除左多晶硅生產外，亦從事電力銷售（透過自有燃煤發電廠供應電力多晶硅生產之用，並銷售多餘電力予當地電網）；工程建設承包（根據ＥＰＣ、ＰＣ或ＢＴ承包模式經營，為光伏及風電項目提供能源解決方案，包括工程設計、諮詢、建設、調試及運維）；逆變器生產（用於光伏項目的一項關鍵部件）及光伏硅片及組件生產。

其實過往的生意與盈利唔算好突出，同埋有D波動，只是近期新能源有炒作，佢都炒起左。實質支持係咪好大，未知。但建議保守少少，暫時這股投資值博率不高。

------------------------------------------------

Q22510：

老師你好，現年已經27歲，收入35k-45k左右，感謝老師一直以來的意見，現已累積超過100萬的資產現持有以下資產：

股票約60萬左右；

銀河持有2216 股，平均價為55.5；
港鐵持有1888 股，平均價為41；
中國鐵塔持有56814 股，平均價為1.22；
中生製藥持有6444 股，平均價7.7；
比亞迪持有258 股，平均價為48.5；
錦欣生殖持有1144股，平均價17.3；
盈富基金持有9148 股，平均價25.4；

現金10 萬左右；

派息基金Z07 24萬左右（五年內離場要手續費，所以至少放五年，平均每個月7%息）；

危疾（有儲蓄成份，為期25年）、醫療（消耗）以及儲蓄（為期10年，每月$3000）一年合共保費大約6～7 萬；

央積金大約4 萬（政府每年如果有盈餘會加注幾千，到65歲才能拿）；

1.請問以上股票是否有質素可以持續月供？如仍有質素，以上股票比例上需要調整或加入什麼，可以有更大收益？

2.在以上各方面配置中，老師有什麼建議？（風險承受程度中上）

龔成老師︰

1) 現時股票都有質素，但錦欣生殖(1951)不確定性較高，而且現價偏貴，不宜月供。

比亞迪(1211)現價偏貴，最好回少少先重新月供。但如果真的好想儲貨，同時現金足，現價以小注模式去月供，都可以的。

又或者可考慮GX中國電車（2845），這基金的目標是追蹤Solactive中國電動車指數NTR「相關指數」表現緊密相關的投資回報。

持股中最重就係比亞迪A股（002594），以及與中國電動車產業有關的股票，中國因為能源問題，長遠一定要發展電動車，這是大方向，故此股有一定投資價值。

2) 以上持股配置，問題不大。只要你跟我建議，調整一下月供計劃，咁就可以。

但你27歲很年青，應以增宜為主，派息基金增長力不高，其實不太適合你。但由於離場要收手續費，你照持有都可以，但唔好再加大投資。

------------------------------------------------

Q22511：

！我已經預留登記了星期六班，希望到時學到知識可以識運用！

龔sir, 可否多問一樣關於派息基金，因為這陣子很多不懂投資的同事/ 準備移民，諗住留筆錢比在港父母的朋友都向保險公司買呢類每月派息的基金當家用比父母。

請問您覺得這類型投資如何？值得作為資產配置的一部分嗎？謝謝

龔成老師︰

這類派息基金，其實分好多種，性質上可以成為退休人士資產組合的其中一員。

但問題係，你要明確知道，這些基金派息率是否保證。另外，基金本身有無賺息蝕價的風險。

用這種方法去支援留港父母生活，係一個方法，但必需了解清楚背後條款，以免失算。

------------------------------------------------

Q22512：

我努力睇你既野.可否分柝我既分配是否有問題. 我覺得無咩收息.....加唔肯定幾多錢入注。

2000sh [email protected]高價今明年內賣?
200sh -9988
200sh -1833需再入注?
600sh -0823 應幾錢再入@59.15/66.45
1000sh [email protected]應幾錢再入

以上兩隻我之前等現在升哂
3000sh -3067
500sh -6993
150sh -2807
20000sh -0788
[email protected]可再入注？

應該入金沙?0548/0778？ 收息?

龔成老師︰

我地投資股票，其實等同投資一間企業。希望透過其自然增長，以達至財富增值的目的。所以，我地投資一定係長線，而唔係短期炒賣，去賺差價。

你上述股票，都係有質素(2807相信係打錯編號)，若你係年青至中年人士，這組合係可以長線持有。

除非佢地去到好貴，或者質素變差，否則係唔需要沽出。因此，你3088照長線持有就可以。

至於平安好醫生(1833)佢有質素，但不確定性大，唔建議持有太多。

而領展(0823)有質素，你每注相距大約10-15%咁入就可以。但留意任何股票，都要控制個比重。同一行業或企業，不要超過組合15%和30%，以免有過度集中性風險。

港鐵(0066)現價在合理區中上部，你有貨在手，除非你資金好充裕，否則等佢有明顯回調才加注，會更好。

ＧＸ中國電車ETF（2845）現價在合理區頂部，暫時不宜大注，你等佢回多10-15%才考慮。

另外，你有個較大問題，就係你而家太偏重左係潛力股(3088, 9988, 1833, 3067, 0788, 2845)，佢地雖然有增長潛力，同時風險都較高，不宜持有過多。

假設你年青至中年，潛力股可佔約4-5成，餘下應用以下平穏增長股。若你投資經驗較淺，潛力股比重，要再調至2-3成以下。到你學到一定投資知識，才慢慢調高。

未來時間，你就要加大翻平穏增長股部份，令組合更平衡。

------------------------------------------------

Q22513：

龔SIR, 想問你關於你當時還在儲貨比亞迪既時候, 你話曾經比亞迪試過由$88跌到$12, 想問你當時有冇諗過自己既決定係錯?

因為 公司股價跌,跌左再溝, 又跌再溝, 有好多時會越溝越錯,所以先了解下你當時對比亞迪既諗法係點? 因為當時0幾年既時候

如果電動車將來因為技術上或者其他原因普及唔到, 好可能對比亞迪尼間公司成個諗法就錯唒, 所以好想知你當時考慮左咩因素去決定繼續增持?謝謝你龔SIR

龔成老師：

睇長遠價值，不是睇短期股價。

十幾年前，我已大量睇電動車行業資料，分析行業及技術發展，我見到電動車的最大問題，就是電池技術與配套。

如果這兩大因素解決，電動車一定能普及，因為佢比用油平好多，同時更環保。

然後，我分析電池技術與配套，這兩大因素，中國的配套在近10年間，不斷建設，例如充電設施等，在全球行得較多，多年前已相信，中國這方面的配套成熟，是遲早的事。

之後就是分析電池。

比亞迪（1211）本身就是造電池起家，之後再造車，是全球擁有較高電池技術的車企，其實佢的電動車，2007年已出產，當時已見到唔算差（雖然與市場化有距離），但佢過往的電池研發好強，因此可以推論，只要比時間佢，電池技術一定會提高，因此成功只是時間問題。

我地分析，一定要著重大方向，多年前，當其他人仍停留在「比亞迪的車會爆炸」，我就是分析，這個爆炸的原因是甚麼，是否核心因素，還是能解決的問題，我以「長遠的角度分析」，而不是這刻，我見到佢受短期不利消息，令股價大跌，就會增持，我從不擔心佢股價跌，因為我集中睇企業。

投資潛力企業，就是「這刻未成熟時買入，耐心持有，等企業成長」，所以，我地的分析點一定是長期。

------------------------------------------------

Q22514：

龔成老師你好，暫時冇乜錢，買住一隻先

3067係咪應該長期持有？

龔成老師︰

安碩恒生科技(3067)可以，這隻股票有質素。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

這基金上落較大，現價大約在合理區頂，因此，這刻不能大注投資。

最好的策略，就是月供，或自行分注小注慢慢收貨（例如每月買一次、或2個月買一次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

你現先買一隻，係可以。但長線計，我地唔好成個組合，只集中係1,2隻股票身上。

最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能高於組合30%，同一股不能高於組合15%。要平衡，建立後長期持有，不是買賣賺差價，而是成為你財富組合一部分。

------------------------------------------------

Q22515：

龔sir, 父母50多歲，冇任何保險，如果基本保險要每人2000蚊一個月左右，係唔係都最好買？

龔成老師︰

其實保險係我地理財中防守部份，主要係將一些健康風險，轉移比保險公司。所以，保障型的保險，我地係需要的。

至於$2000值唔值，你要睇翻本身個保障，係唔係真係切合你家人需要而定。

若係儲蓄類保險，我就不太建議，始終增長力不及優質股。除非你本身好保守，或者完全唔識投資，否則就不太建議。

------------------------------------------------

Q22516：

龔sir，你好！一直有關注你嘅post、YouTube Channel ，每日會花一小時去睇你解答問題同研究點可以令自己在股票市場進步，去學長線投資，

現時手頭上新經濟股比較多，都係年頭高位買入，想請教一下你嘅意見！

本人手持150萬左右現金，尚有250樓按要償還，月入3萬+，目標係3-5年後還清樓按再購入600-800物業，股票資產50萬，另100萬現金流

手持股票如下：

9988@270 400股
700@674 100股
388@499 100股
[email protected] 6000股
[email protected] 100股

[email protected] 7000股
6185@344 200股
[email protected] 5000股
2400@95 600股
[email protected] 3000股

好多股票都係高位買入，組合亦比較亂，想問應該如何再配置？等升返還是放部分等底位再吸納？

最後想同你講聲多謝，一直keep住睇你嘅post 令我自己都不斷去學習，以前上網無所事事咁過，依家會多思考點去進步，令將來的生活變得更輕鬆，

我相信越努力越幸運，多謝你令我思考點去做個有錢人，而唔係單單停留喺「想成為有錢人」嘅階段，呢啲都係睇你post學返嚟，哈哈，再次衷心謝謝你花時間睇我嘅留言

龔成老師︰

我地持有一隻股票與否，只會睇佢長線質素。同時我地唔會因為買貴左，就先沽出，等平D買翻。因為中短期走勢好難估，會受很不多因素影響，有些因素甚至係同企業本質無關。

如果你而家沽左，無人可以保證佢係唔係會再回，佢可能一直升，咁你就要用更高成本，才可以買回這隻優質股。

你現時持股，都係有質素，應長線持有。但有個較大問題，就係比較偏重潛力股。佢地雖然有增長潛力，同時風險都較高，不宜持有過多。

同一行業佔組合的比例，不宜多過30%，如果你上述有些行業過了這比例，就要減持。

另外，見你不少股都在貴的價位買入，你要大幅強化企業估值及投資時機的能力，又或日後多用分注、月供等投資策略。

如果你係年青至中年，潛力股可佔約4-5成，餘下應用以下平穏增長股。若你投資經驗較淺，潛力股比重，要再調至2-3成以下。到你學到一定投資知識，才慢慢調高。

現貨可以不用沽，但未來時間，你就要加大翻平穏增長股部份，令組合更平衡。以下平穏增長股，現價合理，已可分注。

另外，微盟集團（2013）、心動公司(2400)、康希諾生物(6185)和中國飛鶴(6186)不確定性較高，不宜持有太多。

現時大市在合理水平，你可以多用30-40萬，買入一些平穏增長股。餘下資金，我地就等大跌市，才出手掃貨。

至於物業投資方面，現時按息很低，你唔洗急住清還樓按，反而應該用資金去投資，爭取更大回報。

而投資第二個物業時，緊記要確定買樓同時，你留有一定優質股作增值。否則，你成個財富組合，就會偏晒去物業個邊，造成過度集中性風險。

記住，投資路上係要一直保持學習，長線回報才會好。加油!

------------------------------------------------

Q22517：

老師，可唔可以講解下1825同2944。如果跌到0會點架？

龔sir, 我最終賣咗0136， 另外一隻1825，止蝕離埸，蝕左20万

好彩還有隻1211 保住，15x-17x 入手，入咗6 手，仲有D小注0285，1830，2388， 3319，3918 ， 坐艇。我以後都聴晒你講。

龔成老師︰

美臻集團（1825和2944）過往業務一般，之前因為有炒作，現在只係回調翻去較合理水平。不過以業務發展來分析，這股的投資價值，只是一般般。

正常股票唔好跌到零，點到有些剩餘價格。但由於這股質素好一般，你沽出都係可以。長線換至其他優質股，回報會更好。

至於餘下持股，都係有質素，你可以長線持有。

但組合現時較偏重左係潛力股(1211, 0285, 1830, 3918)，而且非常集中比亞迪系股票，佢地雖然有增長潛力，同時風險都較高，不宜持有過多。

若你偏年青，潛力股可佔約5成，餘下應用以下平穏增長股。若你投資經驗較淺或較近中年，潛力股比重，要再調至3成以下。

未來時間，你就要加大翻平穏增長股部份，令組合更平衡。

------------------------------------------------

Q22518：

你好龔Sir ，你對ESG 投資有咩睇法？邊隻股票好值得投資

龔成老師︰

ESG，就代表環境、社會及管治。是近年多左人討論的一個項目。

這部份係一些非會計上的因素，而這些因素，係有機會影響企業長線經營和發展。

投資者過往選擇投資項目，主要係分析企業長線盈利表現。但近年已開始愈來愈重視ESG，企業能否在賺錢之餘，對社會和環境作出一定貢獻。

而且，全球法律改變，人們對環境關注度增加，都令企業對ESG的實踐造成推動力。但現時亞洲ESG未算好普及，主要都係一些歐洲企業，佢地對ESG關注度會較高。

其實我地係分析企業時，除了財務數據，我地都會分析企業和相關行業本質，如果ESG因素係對企業有長線影響，我地都應該將佢加入估值考量之列。

而我分析無特別用ESG表現，去做分類。但ESG比較多人關注會係綠色能源，你可以向這方向找投資機會。

------------------------------------------------

Q22519：

你好， sir 1.其實700 我453入貨有無錯？

1.其實700 我453入貨有無錯？
2.下一级支持位在哪？
3.rsi 好似無乜用
4.牛熊分析恒指没乜用
5.恒指25000是否有支持？
6. 700,6618那個較好可以吸？

Thx you

可否比d意见

我又放左

龔成老師︰

1) 騰訊（0700）你買入價合理，但你預佢中短期會較弱，長線持有就可以。

2) 我唔會睇支持位，只會睇企業質素，去決定長線持有，還是要沽出。

3) RSI係一些技術分析，只係短炒架人用。我唔建議你用短炒方法去投資，因為中短期會受好多因素影響，只有長線持有，才可以有效反映企業價值出來。

你見全球最賺錢的投資人巴菲特，去都係只會長線持有優質股，唔會做短炒或者用技術分析。

4) 牛熊分析，可以作參考，但實際用途唔大。因為其走向不一定順序的，因為有好多外在因素影響，我不會用「預期」的方法，去估股市、股價點發展，

我只會用「測量狀態」這方法，分析現時處甚麼位置，從而作出策略，但就不會預測。

5) 25000點算係合理區較底位置，有一定值博率。但都要睇翻個別企業平貴，因為大市在合理水平，唔代表企業都一定係合理價，有權可以係好貴。

6) 騰訊（0700）算係合理區中部，而且整體質素都較高，值博率會較高。而京東健康（6618），不確定性較大，無貨現價可小注，但長線不宜佔組合太大比重。

------------------------------------------------

Q22520：

抱歉老師，我發現自己打錯字…是0688 （中國海外）15.3入2000股

不過謝謝老師的詳細解答 我是因為看過老師在fb的發文或閲讀過老師的書籍才有些少能力判斷某些公司的前景。縱然現在大市回落一些，但仍然二千元盈利。

我家人説很多人在這段時間都是虧損 所以還得感謝老師

其實建行是我還在在學期間聽信祖母的意見買入的 現在 家人也建議我待它升回6.X元時便會沽出所以股分。我也有這樣的打算

因為在學期間沒有很多的收入，不太敢輸錢。所以只是把積蓄放在一些收息股上

龔成老師︰

中國海外發展（0688）不是無質素，在發展商來講，不算最強，長遠有平穩增長的能力，前景都可以。

睇翻佢的財務數據，基本上都是正面的，但生意增長力不是好強，見佢過往的生意都只是平穩，而整體都有投資價值的。

可以視這股為平穩型的企業，中短期可能因樓市一般而股價一般，但長遠，仍是可以的，你可以持有。

至於投資初期，買一些波動性較細的收息股，其實都係可以。但由於建行(0939)你持貨都唔少，為免佢過度拖低你組合增長力，你都係沽少少，換至其他我之前建議的優質股，咁會較好。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q17221-Q17240）

Q17221：

成哥你好，小弟今年26歲，出左黎做野大約3年，但在2018世界杯的時候染上賭癮，世界杯過後仍有賭波的習慣，結果前前後後輸了十多萬，現已戒賭大半年。

半年前左右有幸係Facebook見到你既專頁，就開始打算重新出發，長線投資股票以在未來達到財務自由。

現在手上持有股票：

00868 信義玻璃 4000股 平均買入價: 8.19
01177 中生製藥 1357股 平均買入價: 10.4
01928 金沙中國 698股 平均買入價: 31.33
02400 心動公司 1200股 平均買入價: 22.37
02777 富力地產 2000股 平均買入價: 12.83
02800 盈富基金 953股 平均買入價: 26.23

以下有幾個問題想請教一下成哥你，

1) 我現在的持股比例有沒有太大問題？

2) 2777富力地產負債對比起同行企業超出好多會是一大隱患，打算在大市回暖的時候，等它回升到一定價位再將其放出，有機會嗎？

3) 2400心動公司有長遠投資的價值嗎？現在比起上市價已經翻了一倍有多。心動公司除了旗下既遊戲業務外，還有TAPTAP遊戲社區平台，TAPTAP能否成為心動公司的護城河？

之前看見配股的消息，以先舊後新方式配售2609.42萬股，每股作價29.9元，籌資7.8億元擬用於為TapTap的進一步發展及一般公司用途提供資金。對於一間剛上市不久的公司便配股籌資，這是不是壞事？

4) 現時月入2萬，扣除所有支出最少能月存萬5，打算月供以下幾隻股可以嗎？另外手上還有10萬現金等待時機入市。

00823 領展 / 00012 恆基 @4000 這2隻哪一隻會比較適合我一點？
01928 金沙 @4000
02800 盈富 @3000

問題比較多，先多謝成哥既細心回答。小弟亦現正拜讀你的一系列書籍，獲益良好，對投資新手十分有幫助。最後祝成哥生意興隆，身體健康。

龔成老師：

1）你持有的，基本都是有質素的股票，可長線。比例上沒有太大的問題，如果想組合更加平衡，宜加入盈富（2800）。

2）富力地產（2777）的確有負債較高的風險，但不是無質素，只要你這股的持股比例唔好太多，仍可以持有的。

3）心動公司（2400）這公司有質素，不過業務存有不確定性，股價上落會較大，你持有無問題。只要唔持有過多就得，如果股價再上，你可以考慮賣出部分，餘下持有。

企業集資作發展，對長遠有利的，不過股價就會有中短期波動，只要長線投資就得。

4）這些都是有質素的股票，可月供，不過應該增加盈富（2800）的金額，減少個股月供的金額。

同時，你唔好用盡現金，要有一定的資金在手，如果大市出現較大的回落，你就可以把握到機會買平貨。

------------------------------------------------

Q17222：

Hello sir，我最近睇緊1530嘅年報
發覺佢近五年商譽同埋其他無形資產都佔咗非流動資產超過一半

其實咁樣係咪唔係咁好現象？
係咪谷數呢？

龔成老師︰

其實"商譽"是由收購產生的項目，這是由於佢的收購價比起會計上的賬面值高，此部份會以商譽入帳。

商譽佔非流動資產佔比較大，反映佢以較高價錢買入這些營運項目。但用較高價格買入未必一定負面，重點是其能否創造同等，甚至較高價值。

所以三生製藥（1530）這個情況，我地唔會對企業的優質度作扣分，因為這只是正常的會計入賬。

不過，當我地分析佢的賬面值時，就會有保留，參考度會減少。

三生製藥這企業係有質素的，但業務較為波動，雖然近年的生意保持向上，但盈利有時增長較快，有時出現下跌，反映企業本身有風險。

但我地以長線分析，見到這企業業務模式不差，每年現金流強勁，不過股價上落就較大。整體上，這股有投資價值的，只要投資時不要太大注就得。

------------------------------------------------

Q17223：

老師你好, 本人的家人在海外工作, 累積了一定的財富, 約1200萬左右

但因為他在香港沒有工作, 所以未能係香港申請按揭買樓
一次過比哂去買樓會唔會係好選擇?
定係應該買股票?

目標都係希望投資, 多謝老師

龔成老師：

首先，你地要確定買樓的目的，是投資，還是有自用的需要，如果是投資，其實香港樓的價值未必及外國樓，因為香港樓的租金回報率這刻唔高，反而你投資外國樓可能更好。原因是你地無法用按揭這工具，而現時低息環境，正正是按揭因素令樓市較高。

另外，你投資收息股，一般都會有6%的回報，所以未必值得買樓。

當然，你地都可以建立一個平衡的組合，就是部分投資外國樓，部分投資股票，部分投資其他資產項。

------------------------------------------------

Q17224：

成哥，我是你之前星期六班的學生，有d問題想請教下你。

現時剛剛26歲，有現金6萬幾，股票16萬到，人工22K，扣埋mpf及生活支出每月可儲蓄約13K, 目標30歲前買到一層約4百萬的樓。雖然訂立了目標，但不知道是否可行。

我大概計過到2023年初，假設股票連息（8%回報）可儲到70幾萬。家人首期會拎300K幫手置業。其實如果想係2023年初儲到100萬，是不是不太可能？

現時股票策略是，不知有冇地方可改善？：（下圖）

2800 均價26.6 保持月供
66 均價40.99 保持月供
1928 @29/一手 睇機會再入直至去到15%
1211 均價40.2 停左一陣月供 等回少少再供
1810 均價11.33 每隔兩個月到入一次

另外，我記得之前你講過不建議買細過300尺的樓，但我睇西環、灣仔、大角咀都較難有350-400萬的300尺樓，有也是舊樓，請問我應該先以細價樓（180-200幾尺）作為目標，買完再收租嗎？

最後，想問一問我這情況，是不是到準備買樓前一至兩年就要減少買股票，甚至等高位賣出以儲多d現金準備入市買樓？

感謝成哥百忙之中抽空解答

龔成老師：

以現時儲錢及增值速度，預計到2023年，你可以滾存至$80萬-$110萬，能否去到$100萬，其實都好睇這段時間的投資市場，以及你的選股能力，可能性是有的

你現時的組合持股，都是有質素的股票，其實你的方向正確。而持股與現金的比例都無問題，只要你每月儲到的現金，適當地投入股市，以及同時把握投資時機就得。

至於樓方面，始終200樓不太建議，你可以試下找250呎的物業，只要不太過舊，已經可以考慮。

你可以到買樓前一年，開始賣股票，當然，如果任何時間，見到股票處貴的水平，都可以作賣出的動作。

------------------------------------------------

Q17225：

中芯國際。同6186飛鶴
可以嗎？

龔成老師：

中芯國際（0981）本質不差，每年的生意都有增長，但盈利就有波動，反映雖然大環境的市場在增長中，但佢的成本與售價，就未必在佢掌握的範圍，最後造成盈利波動的結果。

雖然這股都有前景，但以佢面對的情況，加上近期股價升了不少，投資值博率這刻只屬中等，因為估值上有少少貴，最多可以小注。

中國飛鶴（6186）不差，在大陸有一定的品牌，增長力不差，前景正面的。但現水平在合理區頂部，小注好了。

------------------------------------------------

Q17226：

老師，你的投資課程會否在澳門舉行？ 因疫情現在不方便來往港澳，或者會否有Live課程？

另外有小小問題，盈富基金是否偏向於收息股？ 我見尼隻股過往十年的升幅不算太大，我唔了解投資這隻股的價值之處。

另外港鐵及領展都偏向房地產類型，兩者之間升幅潛力誰較大？ 你好像好少推薦讀者買中概股，但這類股最近三個月升幅創新高，想知道點解你好像不推薦讀者買這類股票。多謝。

龔成老師：

我到疫情減去後，就會過澳門的，所以唔洗擔心。

至於網上的股票班，暫時唔會，因為之前實體班試過比人偷拍，之後放左上網賣，最後要搞到報海關先處理到，好煩。所以，網上類的教學，都好擔心有偷拍問題，風險太高，因為好多課堂內容，都唔想太公開，只想自己學生知，所以暫時都唔會搞。

盈富（2800）的增長的確減少左，預期中短期都唔會太強，但始終有平穩增長力。相信是增長與收息同步的工具。

盈富最大的價值是，是組合中的平衡作用，因為這基金有50隻股，比起自行投資單一股票，風險能更有效分散。

港鐵（0066）領展（0823）都是優質股，但地產市道，中短期會較弱，要長遠先慢慢好轉。兩者中，港鐵的獨特性會較強。

至於中概股，其實我在2020年頭出的《50優質潛力股》都有好多中國業務的股票：騰訊（0700）、比亞迪（1211）、中生製藥（1177）、平安好醫生（1833）、雅生活（3319）等，其實都是很優質的股票。

------------------------------------------------

Q17227：

老師想問下0302同6820邊隻好d？

龔成老師：

中手游（0302）主要於中國從事手遊發行及遊戲開發業務。佢提供多種類型的手遊，包括ＣＣＧ（可收集卡牌遊戲）、ＲＰＧ（角色扮演遊戲）、ＭＭＯＲＰＧ（大型
多人網絡角色扮演遊戲）、ＳＬＧ（模擬遊戲）等。

過往生意不差，有持續的生意與盈利增長，財務數據初步正面。

不過，上市年期不算長，這會令財務數據代表性較低，同時，行業業務波動，不確定性大，都令這股造成風險。

至於友誼時光（6820），係中國的手機遊戲開發商、發行商及營運商，專注於女性玩家的手機遊戲。

業務的情況與中手游相似。

如果要2選1，可選友誼時光，因為賺錢能力較高。

------------------------------------------------

Q17228：

老師，我由於疫情加上大病，現沒有工作，自住居屋物業，手持現金八十萬，應怎樣投資保本防貶值及自制日收息作

日後退休生話之用

希望龔成老師指點

補充： 我現年51歲，病愈康復中，已不能再工作了，並沒有投資經驗，對日後生活感到憂慮。

龔成老師：

以你現時的情況，資金運用要較保守，要小心運用這$80萬，絕不能投資高風險的項目。

你可以大部分持有現金，就算做定期回報少都無辦法，因為你不能工作，所以這筆錢唔能夠蝕。最多只L是將少部分，例如$20萬，投資收息股。

你可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、匯豐（0005）、置富（0778）、陽光（0435）都可以。唔好只集中一隻，要建立一個「組合」。

你暫時以這方法進行，之後就要睇你的康復情況，日後能否做一些兼職或在家工作的模式，令你能產生收入，因為坦白講，你51歲，而香港人口平均年齡8X，現時$80萬是不足夠的。

------------------------------------------------

Q17229：

老師，我買錯書..我買左3百萬富翁....而非第一版的百萬富翁。但看了頭幾章也有收獲。可能要買埋百萬富翁1和2？我主要想補充理財和投資我概念。

另外，見你課程也開班了。請問是否都集中講選股票和買股票的嗎？

發覺自己就是你書中形容的無知大眾....讀到大學都冇用..

龔成老師：

《80後3百萬富翁》都有好多有用知識的，你要好好閱讀，一定有得著。因為之前《80後百萬富翁》全港斷市，所以你買唔到，而最近而加印，你可以再找。

我建議你睇《80後百萬富翁》、《股票勝經》，對你的影響會較大。

我每隔1、2個月都會開一次股票班，最近已去到第31期，搞左好多年。以下是課程的基本內容：

第一課：投資與股票基本功
第二課：投資策略與行業分析
第三課：穩健股及收息股投資術
第四課：買賣時機與估算合理價
第五課：企業估值模式
第六課：選股秘技
第七課：分析年報技巧
第八課：特質類倍升股與潛力股

課程教你投資股票，對象是初中階的投資者，選股、捕捉時機、策略、分辨平貴等。

這是一個終生受用的課程，課程內容十分豐富，除了有很多實戰例外，企業估值技巧、選股模式、年報分析，都有一定的內容，同時會派一份「企業評估表」給學員，令大家可以自行為企業進行有系統的質素評分。

我地香港的大學，只是訓練學生成為一個「好員工」，好多更有用的社會知識，根本無教。所以，我地要自己主動去尋找這些知識。

無人一開始就識，大家都是從無知開始，慢慢進步。

------------------------------------------------

Q17230：

你好 我想開始入0823 月供
呢個價位應可入？

另外金沙價位好像幾吸引 ....想大入幾手
3k 盈富
2k 金莎
2k 領展
2k 港鐵

我想平穩增長地月供 以上組合會否太進取？

龔成老師：

領展（0823）現時已經是合理區，可以開始月供。

至於金沙（1928），現價合理區中下部，可以投資，分注開始就得。

另外你上述的4股，都是有質素，平穩類的股，增長力不算強，但風險就不高，你可以進行月供。只要你「一邊月供，一邊留有現金」就得。

------------------------------------------------

Q17231：

老師你好
自從睇左你啲書及fb
半年前開始實戰
首先多謝老師教導
現略有所成

1211 1500股@$43.7
388 200股 @$239
9988 200股@$190
823 500股 @$75.3
9999 200股 @$133.9
2018 500股 @$36.35
9618 100股 @$236
1177 1000股 @$11.28
1810 800股 @10.08
1448 1000股 @$6.8
788 4000股 @$1.8
87001 21000股 @2.17

月供

2800 339股 @$26.79
66 204股 @$44.12
3 612股 @$14.7
27 92股 @$54.35
1928 146股@$34.25

還有6成現金
覺得組有點多及亂
老師覺得這組合有問題嗎？
有需要減持一些嗎？
因為存倉都係成本
謝謝老師

龔成老師：

你現時持有的，基本上都是有質素的股票，見你的買入價不少都不差，相信你已明白長線投資的力量。

但隻數開始多，你自己要留意翻，或者可以減3隻，這樣會較易管理。

至於月供，都是有質素的，可以保持進行。無問題，但月供的選股，增長力就不算強。

現時的現金6成，有點多，如果見大市回落，可以把握機會買翻D貨。

------------------------------------------------

Q17232：

龔sir,好奇問一下,你說你使用價值投資法有50%的股票回報有一倍以上,請問你使用價值投資法曾有失誤的經驗嗎?

由於澳門月供的手續費較貴,所以我都採用逐手入的方式買股票,但有時見到大市下跌到一定程度時唔知道應該入邊隻好,導致買的股票有D散,我手上持有的股票有:

1177 3000
778 2000
3140 200
788 10000
2800 500
7500 1000
270 2000
2388 500
66 500

得知你今年都未必可以來到澳門開班,但我想把握時間增值知識,所以想問下如果我想學股票估值,你會推薦我睇咩書呢?謝謝

龔成老師：

當然有失誤啦，我只是50%有一倍回報，餘下的50%，有試過虧損，有部分回報只是一般。我地講求「組合」，因此，有好有壞是正常的。

過往都有出現過虧損，例如十多年前買入一隻股票叫嘉利國際（1050），財務數據不差，業務穩定，由不少大品牌的容戶在手，而佢是做電腦代工的。

之後，中國的成本不少上升，佢的成本也增加，但卻無法將成本轉嫁比客戶，因為佢規模唔大，容易取代，大客戶可以有好多選擇。

於是，當成本增加令佢無法加價比大客，成本無法轉嫁，最後自己的盈利受損，令股價下跌，當年要止蝕。

這反映企業的經營模式，最好有價格自主能力，有成本轉嫁能力。

澳門月什較貴，你可以自行分注，總之，你的大方向是「建立平衡組合」，在買入時，如果優質股在合理區，都可買，但如果去到貴的水平，就要小心，可以入少少就算。

你可以睇《股票勝經》、《年報勝經》，以及巴菲特相關的書，對你都有用的。

------------------------------------------------

Q17233：

你好，龔成老師, 我係25歲男， 月入18K, 剛睇完你既作品『五年買樓四部曲』,現在才開始想有買樓既夢想, 目標在五年-八年內可以買到400萬-450萬細價單位！

以及在期間籌備未來穩定現金流，希望起步唔會太遲。所以有幾樣問題想問下老師你。

1) 每月可以儲$5000-$6000, 可以有啲咩投資選擇/建議?

2) 比例上, 我應該著重於增長股或是潛力股?

3) 如果想有穩定收息, 我應該要做咩步處?
唔該哂龔成老師。

4) 如果為五至八年內買樓，月供美股又可唔可以？我應該從邊到入手及留意？

龔成老師：

你25歲，是財富增值的黃金年期，絕對唔會遲。

1）你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先。做月供股票，每月$3000
。

你可以考慮盈富（2800）$2000。

另外再加1隻（$1000）：銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）、希慎（0014）、太古地產（1972）等，你可以了解下這些股票，然後從中選股。

2）應該潛力股多少少，不過這類股要求你的投資知識都較多，所以，你這刻要努力增加股票知識先。

3）你應該以「先增值，後現金流」作方法，所以這刻唔需要集中收息股。

4）可以。

只要是有質素、有增長力，而你又熟識的股票，就可以進行。

------------------------------------------------

Q17234：

老師你好 我月供港交及比亞迪 但現價很高 我應該暫停月供這兩隻讓價格下跌小小再供 還是不理會照供？

求老師指導

龔成老師：

這兩股的確升了不少，港交所（0388）略貴，建議你減月供金額或停一停。

但要留意，無人知股價的升跌，即是佢就算再升都是有可能的，始終是有質素的股票。

至於比亞迪（1211），現時合理區中上部，仍可以月供的，只要你月供的金額唔過多就得。

------------------------------------------------

Q17235：

老師，如果以現時股價計
0823由買入佔的26%
降至現時佔大約20%
請問還需要買出嗎？

1177快成為我人生的
第二個倍升股
平均買入價為$7.57
如果股價達$15.20
我應否利用賣出的一半
買入2800呢？

P.s.第一個倍升股為BA
感謝老師教導我們的投資心態
在眾人最害怕的時候

以$99.9買入波音
並以$208.2賣出全部
再利用純利以$180買入一半
並希望永久持有

直至BA完全復蘇
老師可否分析
BA還是有質素的公司嗎？

龔成老師：

領展（0823）長遠你要賣出部分，唔需要睇中短股價，而是在長期的比例上，唔建議過多，你可以等佢上翻多D先，然後賣出3分1至4分1。

中生製藥（1177）有潛力，這就是長線投資的力量，所以當持有優質，有增長力的股，就算要賣，都唔好賣晒。

你可以賣中生製一半或3分1，餘下長線持有。

至於BA，都有質素，但中短期風險唔細，唔建議持有太多。如注碼不多，一直持有等佢回勇是可以的。

------------------------------------------------

Q17236：

龔sir你好，我打算呢一兩年內買樓，唔係有自住需要，但見到自己有積蓄，而且有能力供樓，所以想入手500-700萬嘅樓先。

想請問，呢刻如果股市平，或者心水嘅優質股跌到去便宜區，我應該先動用積蓄買左優質股升值先，定係保留現金去物色單位，可以即時有資金上車呢？

我等緊你過嚟澳門開班上堂，想跟你學股票投資

1211若$60樓上，月供嘅係咪要先停一停

龔成老師：

我相信澳門與香港的情況都類似，如果你長遠有自住的需要，其實現價都可考慮，因為樓市處供不應求的格局，樓價長遠仍會向上。

如果你打算在1、2年內買樓，就應該將資金持有現金，唔應該投資股票，因為股票要較長期才能有效增值，中短期股價則存有不確定性。

如果你只是純投資的考慮，就可以遲少少先考慮買樓，因為這刻股票的投資值博率，會比樓市較高。

至於比亞迪（1211），$60大約在合理區中上部，因此，只要你月供金額不多，可以供，但如果較多，可減或停一停。

------------------------------------------------

Q17237：

龔sir，真係好多謝你一直為讀者解答海量問題。
想請教：

正通汽車我在2.15時買入

目的純收息，一直持有。但最近看到它急跌至1蚊都試過，過往股價最高有9蚊以上。佢業績都是有錢賺的，為何股價一直走下坡？是不是企業質素出現問題？2.15區域買入算不算合理？

耐心靜侯老師解答
辛苦了

龔成老師：

正通汽車（1728）質素一向只是中等，近年更有質素向下情況，加上單一股票不能太集中，這類質素不高的股票就更加是。

先講佢業務，佢係汽車經銷商，亦提供汽車相關物流業務、潤滑油貿易業務，以及金融服務。佢銷售之汽車品牌包括寶馬、ＭＩＮＩ及奧迪等豪華品牌，此外，還包括日產、現代、本田及雪佛蘭等中檔市場汽車品牌。

這類業務不是無價值，但企業的獨特性不強，當經濟轉弱時，好多時就會成為其中一個最受影響的類別。

見佢盈利增長有減慢情況。股本回報率處較低水平，同埋佢較受經濟週期影響，對貿易相關都會有影響，所以股價會較為波動。

近期中國車市放緩、外來競爭、行業競爭加劇等不利的因素，都對整個汽車行業造成影響，相信中短期仍會對佢不利。

這股不是劣質，但都不是高質，但只算中等。而且你買入價有點偏高，要回到買入水平的確難。如果此股佔你投資組合比重高，建議分段賣出，目的是減翻你的風險，你可以賣部分，餘下再守。但我不建議一次過在這位賣，因為這價位賣晒又不值得。

你長遠將賣出資金，轉到其他更有增長力的股仲好。

------------------------------------------------

Q17238：

成哥，經過兩個月不斷重複跟進你的page, 開始明白你的概念，小弟知道你有股票班，可惜時間上未能配合，如果想閱讀你的著作，應該從何開始，在那購買？

小弟現有四百萬資金準備投資，目標為長遠收息，因為我將於下年移居大馬，起碼五年不回港，請問成哥有什麼建議？謝謝

龔成老師：

你可以睇《大富翁致富藍圖》，好適合你這刻的情況。而《股票勝經》都可。

如果你打算下年移居大馬，應該建立一個更環球及平衡的組合，當地的物業你可以了解下，現時香港樓的投資價值，未必及外國樓，所以從配置角度，外國樓都可考慮。

至於股票，是另一個配置，你投資港股都可以，又或可以選擇一些ETF，如盈富（2800）、南方Ａ５０（2822）、領航標普五百（3140），都是可取之選。

又或在當地投資一些當地的ETF，這是最簡單的配置方法。

只一方面，由於你見標是收息，可以考慮一些收息基金，以及收息股，當地的及香港的都可以。

投資收息股，可以作為財富分配的一部分，但不建議將全部資金都投資，因為一定要留有一定的現金作防守，以備不時之需，以及若大市下跌，可以買平貨之用。

你可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、匯豐（0005）、置富（0778）、陽光（0435）都可以。

------------------------------------------------

Q17239：

老師，冒眜打擾，想請教一下我的財政狀況及這個組合配置如何

30歲，每月扣除必要開支及儲蓄，每月約有1萬現金，另月供2800 $3000。

組合如下：
823 - 300股 - $61
1810 - 1000股 - $10.2
1928 - 2000股 - $31
2018 - 500股 - $ 41
2800 - 500股 - $24.8
3988 - 16000股 - $ 3.2
9999 - 200股 - $130

請問你認為有沒有需要調整的地方？
先感謝你

龔成老師：

你持有的股票，基本上都是有質素，有長線持有價值，無問題。

以你30歲的年齡，其實可以進取少少。當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

所以，中行（3988）未必最適合你，同時，你可以加多少少潛力股的比例。

另外，以你的年齡，財富仍有一定的增值力，建議你多增加投資知識，在選股、企業估值、投資時機上落功夫，對你長遠財富有好大影響。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q17240：

老師，我用市盈率估值法去計左幾隻美股既價值，全部都係昂貴區，even 3月個陣佢地既價都係回到合理區中至頂，但係無限QE下

真係有機會落番到便宜區？

我依加手持用黎投資金既現金放灑係離岸證券戶口到，都唔知入唔入貨好...

龔成老師：

其實估值無絕對的方法，如果企業有一定的增長力，當我地在估值計算時，都要考慮較多「將來」的因素，而唔能夠用歷史數據。

至於能否落翻平的區域，這點真的唔知，因為我地只能計算平貴，無人能預測股市走勢，但在經濟仍有不確定性的前提下，股市仍會有潛在波動的。

你唔能夠100%現金，無人知股市走勢，我地只能按股市平貴，去進行配置，決定現金與股票的比例。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q16161-Q16180）

Q16161：

龔老師你好，我今年29歲，剛買樓，俾完首期後儲蓄只剩下2萬，之後扣取家用及供樓等必要開支，每月應可儲5500，請問我可以點樣理財令自己財富增值？謝謝！

龔成老師：

如果現金不多，會建議$2萬留現金，唔好動用。

而每月就每月$3000股票，保持財富增值。

你29歲這年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先。

你可以考慮盈富（2800）$2000。

另外再加1隻（每隻$1000）：銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）、希慎（0014）、太古地產（1972）等，你可以了解下這些股票，然後從中選股。

如果你不懂股，就集中供盈富$3000。

現時大市波動，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q16162：

老師，我想上你的堂，但沒錢報讀，點算?

龔成老師：

我有一個3年前的學員，佢當時19歲，讀緊書，無錢，之後為左讀我的班，去馬會做兼職，利用自己的力量賺到學費，之後投資算是有少少賺，總之，所有錢都是佢自己努力得來，而家22歲，好有前途。

你都加油。暫時無資金，但唔好因此而停止進步，你唔一定要報我的班，但就一定要想方法突破！唔好一世都停留原地！

------------------------------------------------

Q16163：

如果有150萬本金，點投資賺錢好？
股市定樓市？

龔成老師：

如果你本身無物業，可以等機會投資物業，香港經濟將會向下，樓市1、2年好大機會會向下，但相信不會大跌，長遠計，樓市仍會向上。

所以如果你有資金，而未有物業，可留意下。

但如果你本身已有物業，就可以投資股票，建立平衡的組合。加上股市這刻有投資值博率，只要分注投資，同時留現金，就得。

------------------------------------------------

Q16164：

龔老師，你好，我同老公月入約4萬。
依家租屋住$7500/月。
支出約$5000/月。

即可以儲蓄或投資約$25,000/月。
請問我應該作怎樣的投資呢？

盈富基金會否太保守呢？但因為我唔太識股票，最近先開始學習相關資料。謝謝。

龔成老師：

如果你未有投資知識，投資較穩健的項目，是較好的，之後等你有知識先增加其他項目的投資。

你可以做月供股票，又或自行分注投資。好處是將買入價分散，減少一次過高位買入的風險。

你可以將年每月的$10000，用作投資股票，同時增加下投資知識，約半年後先開始加大金額。

你可以考慮盈富（2800）$6000。

另外再加2隻（每隻$2000）：銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）、希慎（0014）、太古地產（1972）等，你可以了解下這些股票，然後從中選股。

如果你不懂股，就集中供盈富$10000。

現時大市波動，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q16165：

龔成老師你好，本人今年25歲月入$35000，每年大約加薪＄2000。扣除開支家用等每月可存$17000。

現在月供
2800 ($3000),
3 ($3000),
66 ($2500),
1928 ($2000)

餘下的就存作現金，現持有以上股票總共23萬，現金15萬

打算把15萬分成三注，每注大約5萬，約恆指每下跌千五點，我就從上述4隻股票當中每隻入一手，不知道策略是否正確。

另外，因最近（3）煤氣的業績不太理想，考慮停止月供，正留意 （12）,（823）和（1211），不知道那一隻比較適合我現時的投資組合，還是我應該繼續供煤氣？

因工作穩定，所以不用留太多的現金，希望利用價值投資，把握今次跌市的機會，謝謝老師。

龔成老師：

先講你現時的持股，其實不差的，煤氣（0003）香港業務不強，但中國部分不差，中短期雖然較一般，但見佢的長遠發展力仍在，但就要耐心點。

我睇翻佢近年在中國的投資，仍是保持進行的，每年都有幾十億，這些投資不會好快就見到收成，但這企業就仍是發展中的。我對佢長遠發展仍是正面，只是增長力的問題。

你可以保留原有貨，之後減金額。如果真的想轉其他，都可以。如果你25歲，可以考慮比亞迪（1211）。

至於入市策略，通常我地分注，都會每隔10%一注，你可以考慮2000點為一注。

------------------------------------------------

Q16166：

龔成老師，你好，一年前開始看你的書，和對讀者問題的回答，獲益良多

小弟今年43歲，在公司服務了廿幾年，現在月薪17000元，扣除大灣區的樓貸、保險和日常開支

現在有一手1177和一手1211，每月可儲蓄3000元，我想在5年內儲蓄＋投資有100萬元，怎樣才能做到？
多謝老師抽空解答

龔成老師：

現時的股票，可以持有，但你應該同時要有一定的現金。

如果你每月可以儲$3000，1年$36000，5年$18萬，要累積到$100萬，要有好高的投資回報先得。

如果為了有過高的回報，而背後面對太高的風險，就唔值得。

因此，建議你加大儲蓄，同時增加知識去提高回報，不過都唔能夠太進取。

你可以月供$2000去盈富（2800），餘下資金就儲現金。

建議你多增加投資知識，在選股、企業估值、投資時機上落功夫，對你長遠財富有好大影響。

現時大市波動，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q16167：

龔sir , 吾知有冇記錯，你之前好似有提過如果買樓投資吾建議新樓及唐樓。但係西環果邊唐樓可以考慮，是嗎？

因為凖備用父母現契樓加按再加自己名借以家庭單位，共借到540-560萬，壓力測試下應該不太可能再借到其他大額按竭。

本人35歲月每月大概可儲1.7-1.9萬，現金不多，只有13萬，有一些坐艇的股，打算留6萬等之後股市低殘時入手sir 介紹的股長渣，之後再想有沒有能力再月供。

所以想請問應full pay買西環西營盤唐樓/50年以上近地鐵站翻新舊樓還是其他地方如九龍城舊樓或其他地區比較隱陣？謝謝您

龔成老師：

我在《大富翁致富藍圖》有講述過，這是考慮供應與地點的情況，這是其中一個可考慮的地區。

不過，太舊的樓，如50年，在維修的成本會較高，你要注意，同時當你持有一段時間後，要賣出，就已經更舊，下一手買家會壓價，因此資產長期升值的作用不大。

至於按揭方面，我會建議你點都借少少，等你可以有一些現金剩，唔好令自己完金無現金，咁樣可以有助你財富增值。

------------------------------------------------

Q16168：

龔成老師你好，看了你fb有好一段時間，好欣賞你的見解。之前工作太忙夾不到你上堂時間，這兩天買了你兩本書《股票勝經》和《50優質潛力股》。希望短時間內有機會同時夾得到你上堂時間。

近排股市下跌，希望藉此時間買多點優質股。但有少少迷惘如何入手，希望得到老師的意見。

現在29歲，月薪5萬，總資金大約有130萬。分佈如下：
10萬 基金
28萬 年金（一次過俾5年，有需要餘額可隨時取回）
40萬 現有股票
50萬 現金

現有股票 (主要2019-20買入）:
2800 @5,000股 (平均$24.98) 平穩
939@2,000 ($6.1) 收息
2388@1,500 ($31.27) 平穩
2318@500 ($40) 平穩
405@3,000 ($3.72) 收息
778@2000 ($10.36) 收息
823@400 ($63.5) 平穩
1928@1,600 ($31.9) 平穩
3@2,000 ($16.9) 平穩
1038@500 ($35.6) 平穩
66@500 (47.3) 平穩
1211@1,500 ($40.85) 潛力

按現價分佈大約(如果沒有分錯）：
平穩 77% 收息 9% 潛力 14%

未來六個月打算再入市，留有$15萬現金，剩餘50萬分4次入市(包括未來半年人工)。但老師我發現我的問題可能是不太懂得選股，之前入市的股票是老師曾經有提過的優質股，但可能自己不太懂從中選擇，所以買得比較散。

除了加注在現有股票未來還想再入多些股票，之前有留意老師fb和書本曾經推荐，以下股票有興趣入手但好像自己選擇得太多會令組合更加散，想問老師如何從中選股，不知老師可否給予意見：

打算組合大概比例為:
平穩 70% 收息 10% 潛力 20%

平穩
3140, 11, 14, 12, 1972, 27, 9988, 388

收息
2, 2638

潛力
1448, 1177

老師不好意思問得比較長，希望老師能夠幫忙解答給點意見。非常多謝你！

龔成老師：

你現時持有的股票，質素不差，基本上都可以保持有，比例上，平穩增長型佔大部分，適合你的，你之後仍可以繼續這方向。

不過，你持股有少少散，你應該小心研究每一隻股票才投資。

現金方面適中，而年金，這是防守性產品，你這刻是增長年齡，其實不用太多防守產品。

你將組合設定為：
「平穩 70% 收息 10% 潛力 20%」
可以。

當你上完堂後，會有更好的配置，暫時就以這為方向先，無問題。

暫時會建議你考慮：盈富（2800）、領航標普五百（3140）、恆基（0012）、太古地產（1972）、港交所（0388）、比亞迪（1211）、中生製（1177）、福壽園（1448）、阿里（9988）。

你暫時可以照你上述的投資策略進行，但唔好太急，最好最好等你上左堂先動用較大部分的現金。等你有選股、配置、把握時機、投資策略方面的能力，對你財富會較好。

------------------------------------------------

Q16169：

老師你好，本人45歲，仲有10年退休，一年前每月各供$1000 823 (領展）和012（恒地）

現想下月開始供多$1000 。唔知開始供盈富基金定繼續供番本身二隻其中一隻？謝解答

龔成老師：

原有的兩股，都是有質素的，可以保持月供。

如果想加多$1000，會建議你加盈富（2800），對組合平衡有較大的作用。

------------------------------------------------

Q16170：

Hello, 我之前入左144 （跌左）想問建吾建議再入？

然後仲有5萬現金， 有冇建議邊支股值得入？ 還是月供好？因為自己並吾係好識得點揀邊D股好。 thx

龔成老師：

招商局港口（0144），本身都算是有質素，不過，近年有關貿易的行業，賺錢能力低左，同埋風險大左。

先講佢的基本面，佢係中國最大，世界領先的港口開發、投資和營運商，係中國沿海主要樞紐港建立了完善的港口網，並成功布局南亞、非洲、歐洲及地中海等地區。

佢有龐大的港口業務，於中國處領先地位，絕對有其優勢。不過，貿易因素受全球及中國經濟情況影響，將令業務出現略波動情況。

另外，股本回報率低，加上中國進入經濟增長較一般的年代，都令這企業的賺錢能力較一般，整體質素而言，算是中等。

過往股價一般般，長遠來說將平穩，股息可以，但增長有限，現價有投資價值，但貿易問題對佢股價有波動，如果持貨不過多，守住先。但不太建議加注（除非你打算建立一個收息組合）。

你可以考慮月供盈富（2800），長遠財富增長會更好。

------------------------------------------------

Q16171：

龔成老師 你好，小弟21歲，大約有50-60萬cash 和20萬資產在手,但是收入不穩定

有時候可以一個月賺10-20萬糧，有時候可能2-3個月都冇糧出，本人打算現在開始每月供（2800盈富）$2000 （0066港鐵）$2000 （6823 香港電訊 ）$1000 （2638 港燈）$1000

請問老師你認為小弟應該選擇月供還是直接買入一手？目標在25歲前上車。

龔成老師：

如果收入不穩，你要預留一定的現金在手，最重要先計算自己每月的基本開支，例如$10000，就要預3-6個月的支出金額，作為最後防線。

餘下的資金，就可以進攻。我相信，你留$10萬作現金備用，已經足夠。

餘下的資金，可以在這幾年內盡力增值，投資以及等待投資之用。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

盈富（2800）是平穩增長股，另外兩隻則只是收息股，未必適合你。

其實你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先。做月供股票，每月$10000
。

你可以考慮盈富（2800）$4000。

另外再加3隻（每隻$2000）：銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）等，你可以了解下這些股票，然後從中選股。

如果你不懂股，就集中供盈富$10000。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q16172：

龔成老師,你好，想問問0390中國中鐵,我之前係5.72買入,因為環境同經濟影響,現在只有3.87

想問問未來能否追番上去

另外, 現在環境未明,股市大落,想問問如果而家入市是好或壞

不知道來緊指數繼續跌或是會升
感謝你

龔成老師：

至於中國中鐵（0390），本質不算差的，但唔好預佢的增長力好強。睇翻佢的業務同財務數據，生意同盈利都處於穩定狀態，但增長力唔算強。

所以長線睇，佢有投資價值，但增長只是平穩。佢過往股價曾在2015年大升大跌，這只是炒一帶一路，但之後回復原狀，因為這因素只能為佢帶來平穩增長，而不是高速增長。如果你持貨不過量，這股都可以持有的，要耐心點先有機會上得翻。

至於大市方面，相信會波動，唔好特別股，但如果是長線投資，都是一個不差的時機，可以尋找一些優質股，又或基金。如盈富（2800），分注投資，慢慢入，記住，要留有一定的現金慢慢用。

------------------------------------------------

Q16173：

龔成老師 想問下你對樓市點睇？
因為我岩岩落左訂買樓，並唔係自住，係打算租出去。但供起上黎係用左我成份糧

但近排社會事件 加上美國近排做既野都好似會影響到香港既國際地位 我怕樓市股市會因此大跌

想問下老師我應唔應該撻訂？同埋對樓市前景點睇？謝謝老師

龔成老師：

現時的確有不確定性，但有可能只是中短期不利情況，我會建議你「不要撻訂」

香港經濟會轉弱，但長遠的樓市，仍是處於供不應求的格局，因此，長遠香港樓仍不會太差。唔好太著重中短期，要睇長期。

不過，你要考慮自己的供款能力，我相信「供得起」是最重要的。

如果你將物業放租，應該能支付大部分的供款。

------------------------------------------------

Q16174：

老師又有問題，幫朋友問， 今年28歲，每月大約儲$10,000 -$15,000

朋友唔熟股票，有少量月供，除咗月供股票之外有沒有其他儲錢計劃可以另佢五年內多錢過放銀行呢？ 謝謝

龔成老師：

佢可以考慮銀行或保險公司一些「產品」，可以叫佢自己問問。

這些產品會得到比存款較高的回報，但風險會低過股票。不過，我覺得28歲，應該「增值」多少少。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

如果佢未有選潛力股的能力，未有掌握投資時機的能力，就可以簡單地投資盈富基金（2800）。

如果唔想月供，就自己分注，例如每隔2、3個月買一手，都是一個方法。只要唔用盡現金投資就得。

------------------------------------------------

Q16175：

龔成老師，我一直都係比較鍾意花錢，但因為計劃下年結婚，所以開始儲錢。加上最近Facebook 聽到你講野，我開始覺得增值迫切過購物。

今年36，儲蓄現金480k,
700股渣打$48入，
中人壽1000股$17.2入
2000股中國鐵塔$1.6入
200股華泰證券(抽）$24.8

一直以來人叫我買咩 我就買咩，以上都係可信既人叫我買我就買。

我仲有d變左仙股既野，其中算無咁衰既彩星 $4買入既有萬幾股，由4-5萬跌到依家得返2，3千蚊。其他得1，200蚊價值個D就唔提了。

有邊d股應該放左去？

睇左你本書，我決定要增值，唔再做羊太。咩～～～
等緊你股票班羅

每月可儲20k-30k（因從來無計算過，唔知實質可儲幾多錢）

我想試下月供股票，請問應如何分布，供d咩？供幾錢左右（本身心態覺得平先買， 睇左你D片，決定試下月供） 亦打算樓市下跌市時置業，應如果部署？

一直以來生活都傾向吃喝玩樂，感覺自己比人遲了很多，身邊既人都上左車，幸好係Facebook 同YouTube 睇到你既野， 暫時改變了花錢既習慣，希望今年可滾儲到90-100萬，謝謝你啊，祝你愈來愈多學生，愈來愈多like 。

龔成老師：

我地繼續持有一隻股票與否，是基於這企業的質素、前景，如果質素不好，就要賣出，但如果只是股價跌，就不用賣。

你現時持有的股票，質素算是一般，但不算強，因此不應持有太多，長遠應該建立一個更有質素，更有增長力的組合。而彩星玩具（0869）最好還是賣出。

你要設計一個組合，我地投資是一個配置的過程，你要設定，多少比例在某類股，多少比例在那行業，這行業那些股最有質素，如果你不懂分析，投資盈富（2800）是最好的選擇。之後就要長線投資。

你亦可考慮：銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）、希慎（0014）、太古地產（1972）等，你可以了解下這些股票，然後從中選股。

你可以月供做月供，$18000，保持進行。

另外，建議你多增加投資知識，在選股、企業估值、投資時機上落功夫，對你長遠財富有好大影響。

現時大市波動，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q16176：

龔老師，我阿媽今年55歲，佢想攞一筆15萬嘅現金投資一下，最近股價見到有回落，想請教一下以下股票值唔值得入手：

1. 日清食品(01475)
2. 粵海投資(00270)
3. 維達(03331)
4. 長實集團(01113)
5. 港鐵（00066）
6. 港燈（02638）

以依家市場不穩定嘅情況之下，適唔適合入市or係呢筆錢中攞部分作月供股票，部分錢稍後係股票較低價入手呢？？？

Or 襯依家其他貨幣貶值時買入一啲貨幣係手呢，例如：澳元、英鎊？？？謝謝

龔成老師：

以佢的年齡情況，會比較適合投資粵海投資（0270）、港鐵（0066）、港燈（2638）。

利用月供是較好的做法，因為大市好波動，要成功捕捉不易，反而用平均模式，月供去入，風險會較低。

但要留意，唔好太快用盡現金，要慢慢用。

------------------------------------------------

Q16177：

老師你好，我有個問題想請教下你！

我印象中之前領展系 500股一手 ，現時改做100股一手

點解要咁樣做呢？
請問咁樣做對領展係好事定係壞事？

如果轉成100股一手
代表着市民可以更輕易入市
咁係咪就代表佢集資會多咗呢？

一隻股票如果有呢方面嘅更改
請問係我哋選擇買入嘅時候有需唔需要考慮呢個因素？

Thanks 老師 .

龔成老師：

其實，這同佢集資無關的。

由於佢最初上市時$10，多年來升左好多，散戶的入場費因此而大增。所以佢想一般人，都能以一個唔太高的金額入場買到佢的股票，所以佢調低左手數，無乜特別的。

目的只是方便散戶，以及增加流通量，對企業價值無影響。

------------------------------------------------

Q16178：

龔成你好，疫情之下終於有時間睇書增值，一口氣睇左兩本你的書「80後百萬富翁」「大富翁致富藍圖」獲益良多，謝謝你分享你的寶貴經驗。

我是一個70後，這年紀先學人投資股票，雖然有點遲，但學海無涯，我還是想請教一下老師。

其實之前我有買舜宇光學(02382)持有1500股，因呢隻股有做手機鏡頭同汽車用鏡頭，所以我覺得潛力應該不差。
但拜讀你的書籍後，發現它的市盈率非常高(25) 於是想請教一下老師呢隻股票值唔值得長線投資？還是減持等待其他機會？謝謝你的寶貴意見

龔成老師：

有心唔怕遲，保持進步就得！

舜宇光學科技（2382）有一定的質素，不過之前股價處貴水平，上年手機市場疲弱，佢都回至合理水平。

過往由於手機市場高增長，令佢鏡頭業務受惠不少，但近年手機增速開始減慢，增長力會變得較平穏。

我的《50優質潛力股》（2020年版）都加入了股。

中短期，佢會平穩，但長期，無論是手機，還是鏡頭相關的發展，都會帶動佢增長的。20倍以上的市盈率，不能算平，但現價算是合理，只要分注投資無問題。如果你貨不過多，長線持有就得。

------------------------------------------------

Q16179：

你好 龔成老師
假如$5000月供盈富基金 大約何時到達50萬？

龔成老師：

你預大約6、7年，要預視市況而定。

盈富（2800）最好的方法當然是長期月供，保持是最好的。如果市況出現先大跌，後大升的情況，你就可以以較短時期能累積到$50萬。

------------------------------------------------

Q16180：

Hi 龔成，已家月入萬四，月供緊$1000(2800) $1000(0066) $500(1211),呢個組合會唔會太分散

另外有兩手金沙，但賭業前景好似不太看好？另外想問下美團(03690)個質素，Thanks成哥

龔成老師：

上述所供的，都是有質素的股票，基本上可以保持進行，當然唔會太散啦。如果日後有更多資金，可以加大盈富的金額。

金沙（1928）中短期當然會弱，但長遠仍是正面的，你持有就得。

至於美團點評（3690）我唔敢睇少佢的業務，因為真的業務巨大，同時增長快，不過，佢仍是有危有機的股票。業務較新興，估值難，這一定會令股價好波動，這類企業不是不可投資，而是不能大注。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。