《陌樂Like》👍2 熱愛音樂的大廈保安
試過跟樓下的保安員傾偈嗎？
或許他們的學識和才華，會嚇你一跳
我留意到這位目標已經很久了～
他是女祕書家樓下的保安員，總是保持笑容
每天也會跟每一位進出的住客打招呼
　
實行《陌樂Like》計劃的原因：
https://goo.gl/Nc2xNd
　
除夕夜凌晨，剛踏入2018年
我從女祕書家離開，經過大廈大堂
他依舊保持微笑地對我說：「新年快樂！」
「新年快樂～」說完後，我慣性地離開了大堂
　
走了十多米，才想起今天還未進行陌樂Like
而這位友善的保安，實在非常值得稱讚～
每次看到他，也會令人心情愉快～
　
我馬上轉身，往大堂走回去！
　
然後，在大堂門外停住了
　
我猶豫了起來
　
心裡的聲音：
「剛剛才離開，然後故意走回去讚他，太奇怪了吧！」
　
於是，我想到了一個更奇怪的解決方法
我走進大堂，入𨋢搭去女祕書那一層，然後出𨋢，原地等下一部𨋢，再搭回大堂
他一定以為我漏了東西吧～
但他萬萬想不到，我漏了的，是稱讚他
　
到了大堂， 我馬上走過去
再次跟他說：「新年快樂！」
他帶著奇怪的笑容回應我：「新年快樂⋯⋯」
可能他以為這是 Déjà Vu 吧～
　
我不給自己猶豫的機會，立即給他一個陌樂Like
「X生，見親你都好好笑容，又好有禮貌」
他興奮地說：「梗係啦～我玩音樂㗎嘛！」
「你玩咩音樂呀？」
「唱歌，吹口琴，玩咗50年！
跟梁日昭學，即係黃霑個師傅
我早過佢學，黃霑係我師弟～
嗰陣練到可以震爆玻璃呀！」
　
「嘩～咁勁！咁你唱歌咪好叻囉？」
這位保安員的雙眼，突然閃出一道火光
我知道，這個moment，他要爆了～
「啊～～～～～～～～～～～～～～」
　
我不算很懂音樂，但聽得出他功架十足
低音鴻運有力，震音繞樑三日～
表演過後，他從背囊靜靜雞拿出了一個口琴
這時，大堂有住客進來，他馬上把它收回來
　
「早晨呀陳生！新年快樂～」
他細細聲跟我說：「一陣冇人，可以吹畀你聽～」
住客入𨋢後，大堂只餘下我們這兩個陌生人
他去打開了電機房的門，說可以遮擋著閉路電視
　
然後叫我幫他睇水，有人進來就立即告訴他
他半掩著電機房的的門，走了進去
他叫我站在同時可以看到兩個入口的位置
然後，一陣悅耳的口琴聲，從電機房傳出來
口琴演奏出來的音樂，非常流暢動聽～
果然是學了五十年的音樂人！
　
　
聽得入迷的我，差點沒有留意到有住客要進來
「有人呀～X生！」
口琴聲停了，他斯斯然地從電機房走出來
「早晨呀～張生張太～新年快樂！」
　
他若無其事地坐回原位，收起口琴
「你做咗保安幾耐？」
「一兩年」
「咁你之前做咩？」
「做政府工，律政司助理～」
他說律政司說什麼，他就要記錄什麼
然後，他一口氣流利地說出了大量有關法律的英文用語
　
他一直不停說、不停說⋯⋯
就像《麥兜》裏黃秋生飾演的茶餐廳侍應一樣！
　
他說了幾分鐘後，終於停了
我問他唱歌有什麼秘訣
「五分鐘可以教識你唱歌、十五分鐘可以教識你倉頡⋯⋯我仲識英文法文日文西班牙文、工商管理歷史財經投資⋯⋯」
他再一次黃秋生上身了～
　
一直想學唱歌的我，馬上請教這位黃霑的師兄
「可唔可以教我唱歌？」
他馬上龍飛鳳舞地說出一大堆口訣
「A係孔子曰日眉曰，B係月同罕愛自然體，金C眼鏡，所以金係C，D木五寸皮，女娘民災亡⋯⋯」
　
等等！這不是倉頡的口訣嗎？
　
一口氣說完倉頡的口訣，完全不用回氣，他又開始說起投資的口訣，什麼升升跌跌我完全聽不懂！只覺得他在說：「咁嚟嚟去去又確實不外乎果啲滑蛋蝦仁京都排骨中式牛柳西芹雞柳紅燒豆腐豉汁排骨 干炒牛河⋯⋯」
　
　
在他換氣那一瞬間，我立即打斷他說：
「唱歌呢？可唔可以教我唱歌？」
「可以！吸一啖氣，個肚脹起嘅⋯⋯」
他終於不再是黃秋生上身了～
　
「唱嗰陣慢慢放啲氣出嚟，放得越耐越好，啲聲要一路震上去個鼻、上額頭，先喺個口度出返嚟嘅～」
　
然後，他又再一次爆了～
「啊～～～～～～～～～～」
啊到一半，他突然停止了
原來他的上司推門進來，要他去拿東西
他就叫我跟他一起去
　
　
一出門口，六十多歲的他，竟然跑起上來！
我們邊跑邊傾陌樂偈～
　
「你好健康喎！成日做運動㗎？」
「足球籃球網球排球乒乓波保齡球耍太極學瑜伽游水跑步踏單車行山……」
　
我嘗試用稱讚來驅走他體內的黃秋生：
「你成日都咁開心，見到你都令人好開心～」
「我永遠都微笑對住人哋，等人哋都開心啲，自己個嘴笑得多， 唔開心都會變開心～ 有時啲高級過我嘅保安，會專登走過嚟想激我，我就咁同佢講聲早晨，之後唔使講嘢。佢見你冇反應，自己就會冇癮，之後就冇再激我～」
　
「你幾多歲呀？」
「64，就嚟65喇～
你好young咋喎，廿零歲咋呵？」
「係呀～」
　
「Bright future depends on bright choices! 光明嘅前途依靠光明嘅選擇～我上次過關，見到個入境處職員，有兩粒花，我以前都做過入境處，知道好難考，我都同佢講咗呢個說話～」
　
「點解你同佢講呢句說話嘅？」
「佢有兩粒花丫麻～恭喜佢囉～讚下佢囉～你讚完人人哋開心，自己都開心啦～你賣香水，成日摸住啲香水，你自己都會香啦～」
　
我沒有告訴他，我正在進行陌樂Like計劃
但他竟然巧合地說出了這一番說話
就像上天安排了一位陌生人，叫我堅持做下去
我莫名地感動得眼有淚光
這件事真的非常戲劇性
　
　
接著，發生了更戲劇性的事情
　
他突然跟我說：
「我哋交換個電話～遲啲約出嚟，我免費教你唱歌！」
「嘩～好呀！」
　
在現實世界，隨便稱讚了一個人
然後，黃霑的師兄成為了自己的免費音樂老師
這種情節，真的編劇也寫不到出來！
　
最後，我問他：
「你而家做保安開唔開心呀？」
「開心～ Enjoy my Career, 享受你嘅專業～咁你就會做得開心，如果你覺得你捱呢，咁你就唔過癮㗎喇，一定要享受你嘅工作～好～電聯！」
「多謝你，電聯～」
　
我們都是陌路人，就這樣給了一個陌樂Like
　
　
　
《實驗環節》
　
這位陌生人教我們要保持微笑～
看到這裏的讀者，請不要按「讚好」
請按「笑哈哈」！
　
另外，請投票～
你比較喜歡這個系列叫什麼名字？
　
A. 陌樂Like
B. 陌樂偈讚
C. 其他（請註明，歡迎發揮創意）
　
然後留言，寫下一個深刻的「被稱讚經歷」
　
例子1：
A 在地鐵車箱內，有位年輕的陌生人衝過來跟我說：
「我好中意睇你做直播！」
「咁你有冇睇我寫嗰啲文？」
「冇睇過」
　
例子2：
C （俄羅斯練Like大法）
一位我十分欣賞的演員，說她欣賞我做戲
　
────────────────────
這篇文算是陌樂偈Crossover陌樂Like吧～
本來想試試打短一點的文章
結果又打了二千幾字，真「Like偈」⋯⋯
　
Facebook而家不停降低啲Post嘅接觸率
好多讀者都話，喺即時動態度見唔到最新出嘅文
各位按表情、留言同分享都可以幫手增加接觸率
如果想有新文出嘅時候，FB會彈出嚟提你
可以將專頁轉「搶先看」，同埋打開通知～
（回覆有圖片教學～）
　
多謝你再一次睇晒成篇文章！

《陌樂Like》👍3 陌樂Like VS 陌樂批
https://goo.gl/4HM4qC