今明兩天在天悅做Toyeast樣品傾銷天，心情複雜，話就話5年一次，其實係20年第一次，今天好多朋友 whatsapp我，好多睇得出係你珍藏，真係幾抵。。。真係的。 98年eBay賣 Tomica開始到2011年停，2002年開始做自己品牌遙控車同坦克做到2016，當中仲開過公司做左5年iPhone配件，做左5年花盆。 前半生同遙控不分，收藏好多其他品牌產品，RC書，自己RC品牌的最後一盒。。。等，但十多年後都六十歲，又有女兒，無的是光陰同空間，所以都係時候放手，希望遇上有緣人把它們繼續收藏。 昨天 Setup, 十多塊卡版貨，分做$10, $30, $50, $100, 結果自己又收回幾款，好似下圖的電子對打鎗，都15-16年前，Tomy仲未合拼 Takara, 記得仲在日昇中心在倉同同事對戰過，一眨眼已經十多年。大家在場內會發現好多從未見過的玩具模型。 其實今次好多遙控產品，產品全新但十多年前產品內的 NiCd, NiMH 已叉不到，賣$10,$30, 只想碰上改裝高手，換粒電就可將十年前三五百蚊的產品重生。而有 D Tiny缺了倒後鏡，或聲光版1/18有一盞燈唔著等等，好多改裝高手都可以以一折到三折價加上自己的專長，用3D打印，電蝕片，銲線等維修好。 過去六年一直忙忙忙，倉一直累積好多舊樣品，廠辦，展覽辦，三年前都想整理，今年遇上役情，十多間廠延遲開工，讓我們有空去整理及預備今次活動。今次活動分兩部曲，這兩天傾銷天是第一部曲，第二部曲"超級尋寶週" 下星期尾在各店開始。