【龔成問答信箱】（Q21981-22000）

Q21981：

龔sir 你好，上完你既基礎班，我自己整理咗投資組合，希望想聽下你既意見。

本人40歲，資金唔多，得幾萬蚊，（黎緊會keep住儲現金）之前一直都無投資底，我希望係呢10年盡量爭取時間，所以盡量集中水桶1、2既升倍股：

水桶1 -
福壽園 （1448）$1000/ 月供
金界 （3918）$1000 / 月供
希慎興業（0014） $1000/ 月供

水桶2
港鐵 （0066）$1000 / 月供
盈富（2800）$1000 / 月供

另外之前上堂有聽你提過下美股，以下呢兩隻都係追踪指數，亦都係水桶1，係有限既資金上，邊一隻比較忙可取呢？！
（2814）（QQQ)

唔該龔sir

你放心，我唔會訓番身去買水桶1，我記得你講過，要衡量自己可承受風險，所以我都係小注投資，

另外都會用你教既方法去搵潛力股同優質股，唔好盲目去亂買股票，呢個我好勤記

龔成老師︰

你投資的股票，都適合你年紀。但希慎興業（0014），我地會視為水桶2的股票。

Invesco QQQ Trust(QQQ) 是追蹤納斯達克100指數

三星FANG ETF（2814）的投資目標，係追蹤NYSE FANG+指數的表現。是一個美股潛力股基金。

首先，FANG+係代表美國上市多隻領先既科技股票，即係代表Facebook、Amazon、Netflix、Google，而該指數會再加上其他科技股，如Twitter、Tesla、百度等，即是全球處最前列的科技類公司。

這基金是一個潛力基金，長遠正面，但要留意價格會較為波動，加上近年科技類公司上升左唔少，因此現價唔算平，建議以月供的模式投資，買入後長遠持有。

QQQ和三星FANG ETF（2814），2隻都係水桶1的股票，都係有質素，而潛力度和波動性，會係2814較高。

由於「潛力股」係需要一定經驗和有一定波動性，你經驗尚淺，可以先小注，大約佔組合2-3成左右。若你係有一定經驗，你可以投資到約4-5成比重。

現時大市只在合理區，每月資金唔好盡用。最好留有部份，等大跌市出現時，可以用來掃貨。

------------------------------------------------

Q21982：

老師你好。作為收息股，請問覺得 386 ＆ 405 可以嗎？

另1772 現價雖然下跌，但都好似略貴，而且有風險，請問這隻股你覺得可取嗎？

謝謝解答。

龔成老師︰

中石化（0386）和越秀房產（0405）都係有質素的收息股。

中石化（0386）質素算是不差，但又未到好好，始終這只是商品企業，沒有一些太大的優勢。

石油是商品，當中沒有差異性，佢地要將石油賣出，只能跟國際油價，這令佢地處於被動狀態。沒有價格自主的能力，這令佢地的獨特性有限。這類商品企業，都可投資，但就要明白不是最高質的企業。

生意近5年只是上上落落，無乜增長力，這是受油價等因素影響，反映佢處於一個被動的狀態。收息是可以的，但增長力唔算強。現價合理，可以分注入貨。

越秀房產（0405）物業以大陸為主，會較受中國經濟因素影響，以及有人民幣風險。

同時當中的物業，都以商業為主，所以在疫情中波動性也會較大。現價在合理區，可以分注。

贛鋒鋰業（1772）是潛力股，估值較難，分析時的確資料較少。由於上市年份少，我地較難有長期數據分析。

佢為鋰化合物、金屬鋰及鋰電池等鋰資源生產商，業務涵蓋上游鋰資源提取、鋰化合物深加工、金屬鋰生產、鋰電池生產及鋰二次利用及回收。集團提供涵蓋五個主要類別逾40種鋰化合物及金屬鋰產品。

其實佢的產品應用都廣泛，包括電池相關產品、化學品、藥品及新材料等，而客戶主要包括電池材料公司、電池製造商、化學品製造商、製藥公司及電子器件製造商。產品主要於中國、韓國、日本及新加坡等十多個國家出售。

我相信佢長遠有潛力，有長線投資價值，問題只是平貴度的問題。現價略貴，小小注好了，之後等佢回落先正式入貨，始終行業有一定的變化。

其實你選擇上述3隻股票時，除左睇質素外，都要睇翻自己風險承受能力和年紀。

收息股，增長力較弱，就要係創造穏定現金流。較適合近或已退休人士，或者風險承受能力好低的投資者。

而贛鋒鋰業（1772）是潛力股，佢增長潛力高，但風險同樣都大，適合較年青和有經驗的投資者。

你可以因應自己情況，去進行配置。

------------------------------------------------

Q21983：

Hello, 老師，本人也想開始試吓每月投資法，每月可儲三萬左右，你會建議儲邊隻股好呢?

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

因此，你在選擇應該投資那一類股票時，會係因應你人生階段、投資經驗和取態，去做決定。

假設你係年青至中年人士，你可以用「平穏增長股」 + 「潛力股」的組合。如果你係偏年青，比例大約可以去到各一半。

但由於「潛力股」有一定波動性，較適宜年青和有投資經驗人士。若你投資取態較保守、經驗較淺或者較接近中年，「潛力股」比重就要相對下調。

現在你每月先用5成儲蓄，即$15000做月供。其餘先儲起，用一邊月供一邊儲蓄的策略。

月供方面，你可以選擇投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、領展(0823)、希慎(0014)、太古地產(1972)

或潛力股︰中生(1177)、福壽園(1448)、小米(1810)、安碩恒生科技(3067)、港交所(0388)、阿里（9988）、騰訊（0700）、ＧＸ中國電車基金（2845）。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

------------------------------------------------

Q21984：

龔sir，你好！已經follow左你一段時間，睇左你不少分析同意見，獲益良多！希望能夠有幸抽中並得到指引！

現在想重整自己的股票組合，有冇咩股票會放左佢會好d ?

股票組合如下：

1475(日清食品), $8.74, 5000股
3988(中國銀行), $3.71, 1000股
6618(京東健康), $185 ,100股
9600(新紐科技), $4.24, 800股

2013(微盟), $25.08, 1000股
00992(聯想集團),$9.37, 2000股
1186(中國鐵建), $5.14, 1000股
00769(中國稀土),$0.96, 4000股

感激不盡，謝謝老師！ ！

龔成老師︰

你現時持有股票，大致上都係有質素，有長線投資價值。

除左中國稀土（0769）質素一般般。炒作多過實際，過往賺錢能力不高，業務波動，間中出現虧損，投資價值唔算高。

另外，中國鐵建(1186)質素只係一般，現貨持有係可以，但唔好再加注。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

因此，你在選擇應該投資那一類股票時，會係因應你人生階段、投資經驗和風險承受能力，去做決定。

如果你年青，可以「平穩增值股」(1475, 0992, 1186)+「潛力股」(6618, 9600, 2013)。中年人士，可以較集中翻係"平穏增長股"。

當你已近退休之年，就應集中在「收息股」(3988)，去創造平穏現金流。

你可以睇翻自已年紀，去作出配置。

------------------------------------------------

Q21985：

老師，剛剛睇到80後千萬富翁中段了，但我現時身處一個疑問，現時我擁有一樣價值接近5萬元收藏品

但對這個收藏品的未來，及不知道市場嘅走向感到有點迷惘，咁我應該8折讓出去換現金去投資，定繼續起碼2-3年等佢可能升值？皆因我只見到現時虧損率，但不知道未來嘅增長率。謝謝

龔成老師：

由於「收藏品」不能產生經濟價值，也不會產生出現金流，因此，我地在定義佢質素時較困難，同時不一定是資產類別。

而當中的價格，就取決於大家的認同價值，如果將來對這項目的認同增加，就會對佢價值增加，由於每種收藏品都有各自的市場及認同價值，因此，你一定要有相關的專業知識、分析力。

如果無相關知識，建議賣出。如果有，就要分析這項目長遠的價值。

------------------------------------------------

Q21986：

早晨龔sir，最近睇你pages, 見你介紹3110 高息股作收息。。請問這些有風險嗎？因我幫小朋友長線儲錢用！

另外 3067 我都係跟龔sir意見買左幾千股，但聽龔sir講一隻股不能太多，所以我想分散落 3110！但。。我又唔見 3067 有派息。。

龔成老師：

上述的兩隻，都是交易所買賣基金（ETF），當中都是持有一些質素不差的股票，但性質不同。

安碩恒生科技（3067）風險會較高，投資者進求股價增長，但股息較少。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

這基金上落較大，現價大約在合理區頂，因此，這刻不能大注投資。

最好的策略，就是月供，或自行分注小注慢慢收貨（例如每月買一次、或2個月買一次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

如果你投資目標是收息，就不應投資3067，應考慮3110。

GX恒生高股息率（3110），是一個投資收息股的基金，追蹤恆生高股息率指數之表現。

可以視為收息股的組合中其中一員。這基金可投資的，現價合理，可分注。佢是投資香港大型，較穩陣，派息較高的上市公司。

這是不差的收息組合，但增長力不強。

可以上基金網站有介紹的，我建議你睇睇先。

------------------------------------------------

Q21987：

龔老師，上完初階課程後，希望你指點一下我的投資組合

1,000,000現金
400,000人民幣定期存款
200,000保險基金，主要是投資美股科技股每年有7%利息收入
有四手i bond
230,000股票

吉利汽車 00175. @21.000 3,000股
康師傅控股00322@ 12.800 2,000股
中國石油化工[email protected] 2, 000股
置富產業信託 [email protected] 3, 000股
中國鐵塔[email protected] 8, 000股
中國海洋石油00883 @8.050 1 , 000股
友邦保險[email protected] 200股
三生製藥[email protected] 1 , 000股
小米集團一w01810 @29.350 400
平安好醫生 01833@88 200股
港燈一SS 02638 @7.590 4 , 000股

本人40歲，月入30,000，支出大約8000一個月，每月儲蓄大約兩萬蚊

我與家人同住沒有置業需要，有機會也想投資一個物業收租

想五年賺到2,000,000，55歲退休

但由於是投資新手,只懂把資金放進定期及收息產品，高風險投資不知道那樣做，那些股票不是優質股或潛力股可以賣出。

我是可以承受中高風險投資。我知道很多股票現貨價在比較高的水平，我想等回歸合理區才分注買入。多謝賜教

龔成老師：

以你的年齡情況，上述的配置沒有問題，方向基本正確，選股大致都是有質素的股票。

你40歲暫時唔需要再增加收息股，你原有的收息股，就持有先，唔需要特別變動，但之後唔需要再增加就得。例如港燈（2638）、置富（0778）、中石化（0386）。

因為你有15年時間，你可以在頭的7-10年，做好「增值」的部分。到之後的幾年，就開始轉為收息類別，即是運用「先增值，後現金流」作方法。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。

每月$20000的儲蓄，可以用月供，或自行分注的模式投煽總之現時不能用盡現金就得。

平穩增長股：潛力股
7：3
（如果你投資實力較強，可增加潛力股比例）

平穩增長股：考慮盈富（2800）。

另外再加：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

潛力股：安碩恆生科技ETF（3067）

另外再加：阿里（9988）、騰訊（0700）、港交所（0388）、舜宇光學（2382）、小米（1810）、ＧＸ中國電車基金（2845）、比亞迪（1211）、中生製藥（1177）、三星FANG ETF（2814），但就要明白波動性比上述會高左，同時風險大左，你要自己平衡。部分要等回少少先入。

現時大市波動，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q21988：

Sir你好！已經遲職了, 決定去創業～～再做下去已沒意思, 浪費時間。 想剩下的人生時間活得精彩, ～～始終創業才可以真正做到財務自由， 自己話事。將會開間細美容院（大約資金20幾萬）

1）有62萬股票， 40萬現金

2）計劃將剩下1211/1手（$60買入）＆1830/6手（@$3.98）, 全部賣出作為創業資金。

3） 還是賣出其他股票代替1211 1830？想你給予意見作為參考。 謝謝

以下是本人手持股票資料
788 [email protected]
1108 12000@7-
1177 [email protected]
1211 500@60-
1317 [email protected]
1448 [email protected]
1810 [email protected]
1830 [email protected]
2388 [email protected]
3067 [email protected]
6993 [email protected]
謝謝龔Sir回覆

龔成老師：

創業中途會有不同的困難，但只要堅持，就終會有成績，加油！

現時你唔好再買股票，因為創業都要一定的資金，同時要為各種可能做準備，因此要多留現金。

至於賣出那些股票，其實你應該將想法倒轉，你想留下那些股票，那些股票較有質素，以及長遠較有增長力。

上述的不少都是有質素的股，但現時應該賣出一些增長力較一般的。

我會建議留低比亞迪（1211）、中生（1177）、福壽園（1448）、恆生科指基金（3067）、小米（1810）、完美醫療（1830）（如果上述有個別股，佔你組合%較多，都可減持。而餘下就可能考慮賣出。

------------------------------------------------

Q21989：

你好龔老師，我是投資新手，看了一段時間你的教學片，增加了一些投資的知識，未留意你之前買了些股票，包括

0005 @ $60
0410 @ $4 (最近$2.3止蝕賣出後急升）
1310 @$10

今天1310跌到$9.3 ， 我也看到有債務問題，請問現時股價合理嗎？是否值得持有？還是應止蝕沽出？

多謝老師寶貴的意見。

龔成老師：

我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

你最大的問題，就是集中分析短期股價與消費，你犯了一般散戶都會犯的錯。

你記住，買股票就是「買入企業等企業成長」，一般都要3年以上先會見到成果。同時，你不是炒賣，是「財富配置」。

匯豐（0005）、香港寬頻（1310）質素都算有的，但不算高，你可持有，但不建議太多，之後要選更優質的股票。同時，你。建議你睇《股票勝經》。

------------------------------------------------

Q21990：

老師想請教下a股既問題，因為比較接觸多港股，最近買了a股後有點問題

1：5送1的部分，如果係碎股，a股碎股係唔係沽唔到，如果沽唔到應該點做好

2：10股派股息2cny，此股票每手100股，假設我有100股，應該收幾多錢股息？

3：老師，想請教下，週期性行業，係未應該用pe模型，計算果時應該著重pe定係eps，因為我見週期性行業pe高低都好大上落，完全好似冇參考價值咁，應該點計好

龔成老師︰

1) 碎股都可以沽出，但實際處理方法，要問翻你用緊的金融機構。

其實只要係有質素股票，不論係完整一手，還是碎股。佢長線投資價值，都唔會有分別。

2) 若每10股派人民幣2元，你會收到人民幣20元。但實際上，你收到金額會少於20元。因為收到股息前，係先要扣除內地相關稅項，和金融機構代你收息之費用。

3) 去計算一些週期性行業，你可以用市盈率估值法，作為其中一個參考方法。當中，市盈率和每股盈利，都同樣重要。

由於企業盈利，係受一個特定週期所影響。故你在拿參考數據時，係需要拿一個較長年期(7-10年)，已確保數據可以包含整個週期的變化。

但你要留意，在這些年期內，會唔會有一些事情，令成個大環境出現改變。就好似我初班第5堂，用港交所(0388)作例子。佢雖然係週期性企業，但由於近年多左中概股回歸。

在抽取數據時，只會用最近幾年，而唔係用一個週期性長度的時間。

------------------------------------------------

Q21991：

Hello 龔老師，早晨!

現有一層供完樓，作收租之用。如將呢層樓，再造銀行按揭，用作買些电力股收息。請問是否可行？

因本人巳近退休年龄. many thanks

龔成老師︰

現時息口偏低，利用加按貸款，去買入收息股，從而賺取息差，係一個可行做法。

但我地要考慮翻，自己本身負債能力。由於你按揭已經全數清還，所以再透過物業，去借一筆資金投資，係可以。

不過，你現時已經50歲，借貸金額不宜太進取。以你年紀計，總負債佔總資產比倒，唔好高過一半。到60歲，更加下調至30%以下。

另外，我地建立一個收息股組合時，不應太過集中個別企業或行業。因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

特別要留意銀行業，佢營運模式較特別，風險會比一般行業為高。必需堅守30%這個準則，如果可控制在20%以內，會更好。

以下是一些有質素的收息股，你可以參考下。

現時大市只在合理區，新取得的資金，唔好盡用。最好留有部份，等大跌市出現時，可以用來掃貨。

港燈（2638）、香港電訊（6823）、恆生（0011）、工行（1398）、置富（0778）、陽光（0435）、深高速（0548）等，大多有5%股息

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、完美醫療（1830）、互太紡織（1382）等（記住，股價略波動，不能太過大注）。

（你可睇下《50穩健收息股》當中仲有好多）。

------------------------------------------------

Q21992：

吖Sir，2809 GX中國潔能，由之前90幾蚊都升了不少，股價屬於什麼位置？ETF不太清楚平貴

長遠睇好綠色能源板塊，世界各國致力推動碳中和，中國亦已訂立2060碳中和目標，相信未來會有不同政策岀台去支持行業發展的

龔成老師︰

GX中國潔能（2809），其目標為追蹤SOLACTIVE中國清潔能源指數NTR之表現。

當中佔最多為"半導體產品與設備"股份，約組合4成，其次是逾2成的"獨立電力及可再生電力"。

此股平貴不易分析，而且頭10大股份中，除了信義光能（0968）外，其餘都在內地上市。

潛力度是有的，但會比較波動。

你預現價大約係合理區頂，至略貴水平。如投資，宜慢慢分注或者月供儲貨，並長線持有。

------------------------------------------------

Q21993：

多謝老師之前的回覆，我會叫阿仔去上你堂。

$8800真係超值，日後學懂投資長智識一定賺得返。我自己就是一個例子，以前投資真係輸多贏少。

老師，但我更想如何令自己小孩早啲開竅？知識是終身受用。

老師，我有問題唔明。你也建議大家買REITS，回報等同買樓收租，但係如果投資者有能力買樓收租，長遠利益來看，買樓收租更可賺樓價升幅，不是回報更佳。

我明白買樓投資需要龐大資金成本，且流動性較慢，我朋友現在每月供樓壓力頗大，但我深信幾年後他必定有高回報的。

龔成老師︰

無錯，有錢人著眼"回報"，普通人則著眼"付出"。所以，我地學習不應該只著眼於付出多少成本，而是可以從中獲得多少回報。

點樣可以幫小朋友開竅，最主要方法，就係唔好令佢地將"學習"同"返學"掛鈎。

因為，其實有好多有用知識，包括投資，係平常學校都唔會學到。如果小朋友只係學學校教授的知識，他們只會成為一個好員工，但永遠唔會知道，自己可以當主人。

更甚的情況，就係佢畢業後，會認為自己人生的"學習"過程已經完成，永遠只停留在畢業一刻的水平，人生從此就再無前進過。

其實書本，係一個好好學習媒介，你可以鼓勵佢多閱讀不同類型書籍，去開闊自己視野，對佢會將來會好有幫助。

至於REITS和物業，都係優質資產，都應包含財富組合當中。性質上，會有少少不同。

由於物業金額較大，對資金較少，但又想投資物業類的投資者，REITS會係一個好選擇。

但物業雖然流動性較低，成本也較大。但由於佢除了可以收取租金回報外，本身都會有增值潛力，令你資產價值上升。

而REIT，主要係收取當中物業租金回報，資產增值部份唔會明顯。回報部份，主要來自租金產生現金流。

因此，你要睇翻你投資目標，去決定邊個項目才適合你。

------------------------------------------------

Q21994：

龔成sir 你好，我現時32歲

想請教以下問題：

1. 我將手上的股票，按水筒123 分類，想問問分得正唔正確，以及比例上希望俾俾comment

2. 藥明生物2269 的合理價是多少？
謝謝

龔成老師︰

1) 以下是要修正的股票。

水桶1︰港交所(0388)

水桶2︰中金公司(3908)、煤氣(0003)、越秀地產(2934)、長建(1038)

中金公司(3908)經營投資銀行、財富管理等金融業務。佢業務係有，但賺錢能力唔算好強，整體質素算係一般。你投資都可以，但唔好太大注。

ＸＬ二南方恒科（7226）產品之投資目標為追踪恒生科技指數每日表現兩倍（２ｘ）的投資業績。

雖然我長遠認為，恆生科技指數正面，但中短期可以較波動，由於這基金有槓杆，就會令價格更加波動，其實有風險。

我會較建議投資無槓杆的恆生科指ETF（3067），始終較好。

以你現時32歲，應以增值為主，水桶1和2各佔一半都可以。

由於「潛力股」(水桶1)係需要一定經驗和有一定波動性，如果你經驗較淺，可以先小注，大約佔組合3成左右。若你係有一定經驗，你可以投資到約5成比重。

2) 藥明生物（2269），主要提供有關生物製劑藥物發現、開發與生產服務。

佢涵蓋生物製劑發展過程的所有五個階段，即藥物發現、臨床前開發、早期臨床開發、後期臨床開發及商業化生產。

潛力是有的，因為過往的財務數據的確理想，但現時的估值唔平，這刻投資值博率一般。

不過，這類股好難話現價一定貴，因為佢有好高的增長，只可以話現價唔平，但如果之後有高增長，那就未算太貴。只可以話，如果你真的想投資，小注好了，你要明白業務有不確定性，同時股價會好波動。

------------------------------------------------

Q21995：

你好呀龔成老師，多謝你一直以來嘅分享。我同男朋友都有聽你講每月月供優質股，穩定儲咗一筆資金。

我自己有keep住月供恆基，現升幅不少，所以想放少少轉現金，再買入另一啲有升值潛力的股票。

想問問老師意見，我應該等除淨派息後就放一半轉為現金，定係應等恆基價位升到40左右才放呢？有機會嗎？

謝謝老師解答

龔成老師︰

恆基(0012)是有質素，當然，增長力減少左，預期佢中短期都是弱，不過，這股是睇長線及超長線的。

這單計佢手持農地是全港最多的發展商，就明有一定的價值，當然，農地要發展要好長時間，所以這股要好長線。

我地投資優質股，其實就係將只會貶值的現金，轉成有優質資產的過程。只要質素無變，而價格又唔係升到太過高，我地係唔會沽出。

恆基(0012)有一隻有質素的股票，現價唔算特別貴，只係合理區內，唔建議你沽出。可能你會覺得近期升唔少，但我地持有優質股，目標係希望倍升，甚至更多，所以你目標要放遠D。

除非佢已經升到好貴、長線質素明顯變差，或者大市好狂熱，你才好考慮減持。

若你想加入其他優質股，可以用新資金去做，恆基(0012)照長線持有就可以。

------------------------------------------------

Q21996：

龔sir，我買左你好多既書黎睇，宜家已經睇左8成，亦留意到巴菲特都講過婚姻先係人生最大投資，

加上睇埋你幾年前分享的曾同有錢女的拍拖的帖文，我突然有感而發：

我想問下︰

1. 如何用理性地以超長線眼光來擇偶或是

2. 該有何較通用的標準來評估對像的優質度？

因為這是人生最重要的投資之一！

由於學生想獲得較深入的指引，加上比較私人和個人化，如果可以，不知你可以在6月17日股票班課後詳細一點點指引學生好嗎?

利申：男，22歲

感謝

龔成老師︰

我過往有錢女朋友故事，主要係想帶出，只要你有目標和動力，你才會進步。

另外，你身邊要結識一些比你更叻和更高水平的人。如果你身都是同水平的人，你就不會有動力，去再提升自己。

因此，你要創造一個環境，令自己有動力去保持進步。

至於擇偶，每個人都有不同的準則，唔會有一個通用標準。最重要，係佢明白你，同時間願意和你一齊進步，咁就可以。

其實最重要，是同你夾、適合自己，大家有共同的方向。

------------------------------------------------

Q21997：

龔sir您好，想問吓你意見，想將媽媽啲定期存款買股票收息，可否提供幾隻股給我。

如果買1煤氣2匯豐3領展4地鐵現價合理嗎？又想收息同時又可以增長，麻煩比啲意見給我，十分感謝

龔成老師︰

你所講的4隻股票，現價都合理，可以分注。當中匯控(0005)係偏向純收息，增長力唔會明顯。

其餘3隻係平穏增長股，股息係有，但唔算好多，不過會有一定增長力。

投資前，你先要明白，收息股回報雖然高於定期。但就算再穏定的收息股，都會有波動，係可能會出現"賺息蝕價"的情況。唔會好似定期咁，保證你個本金。

若你媽媽距離退休，尚有一段時間，你投資上述股票係可以，去邊收息，邊增值。

但若果你媽媽已經退休，就最好集中翻係收息股，去創造現金流。以下是一些優質收息股，你可以參考下。

現時大市只係合理水平，現金佔比重大約3-5成。故你可先用部份資金，去分注入貨。餘下資金，就等大跌市出現，才加大力度掃貨。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）或收息基金(3110)都可以。

------------------------------------------------

Q21998：

龔成 你好 想問8160我由0.6入手，現在跌到0.083，是否應損手離場？

龔成老師︰

金滙教育(8160)在香港以「勵致研習中心」品牌，向中小學學生提供補習服務。

佢業務係有投資價值，但集團規模好細，每年營業額才相連4千萬都唔到。

其品牌唔算好強，見佢多年出現虧損，反映其賺錢能力不足。

此股投資價值好一般，長線計，你換碼至其他優質股會較好。你可以等佢出現反彈，就慢慢沽貨換碼。

------------------------------------------------

Q21999：

Halo 成哥，1357 美圖
708 恆大

如果依兩隻股票一年前都係喺低位只不過依三個月前曾經高過（我喺佢哋高位嘅時候入）但係而家又開始跌返落去，我將三份一嘅股票賣出去做法唔知正唔正確？

恆大而家跌到29，我當時67入
美圖而家跌到2，我當時3.7入

買完之後就一直跌跌到而家幾個月後我都唔知好唔好放定係等一年之後有可能佢哋會再升返我買嘅時候嘅高位？

感謝。我知我傻了，在高位入左

龔成老師︰

首先你要明白一個概念，我地持有一隻股票與否，關鍵位是企業質素、前景，不要被買入價影響。因為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心，照持有就可以。

如果企業無質素，但你現時蝕錢中，繼續持有只會令你財富繼續貶值，因此要賣出。

如果企業質素轉差，就有可能要減持，因為這股佔你組合的比例，未必值得太多。

美圖公司（1357）長遠仍算正面，佢過左最差時期，現時正向好。

佢主要從事提供在線廣告及其他互聯網增值服務；以及開發、製造及銷售智能硬件產品。

見佢財務數據改善，這企業仍有發展力，有長線投資價值。不過業務變化始終大，不建議大注投資。

恒大汽車（0708）雖然可能有潛力，但風險高，佢資金投入的確強，大力發展新能源車，但這些仍未有賣產品真正的實力，長遠能帶動多少收入，未知。

由於仍有好多未知數，而股價已經大升左好多（比半年前），因此，這刻要自己衡量風險。

可能佢真的有潛力，但連基本的銷售銷售都未有，我地作為投資者，就好難分析，只可以話佢股價會大上大落。

我唔係話佢無投資價值，只係不確定性較高。投資時，必需控制注碼，不能太大注。

這2隻股票，若佢佔你組合不多，你可以守。如果佔比重較高，最好沽少少，去平衡翻個風險。

未來再投資前，記得先做好估值。若你投資經驗較淺，可以考慮用月供去儲貨，透過長期平均價格買入法，去減低買貴貨的風險。

------------------------------------------------

Q22000：

龔Sir, 想請教一下有冇分柝過一些公司，從潛力股到不再是潛力股? 會有什麼先兆 從而知道要及早離場

亦想請教一下現有什麼板塊你認為未來10年會大躍進?

龔成老師︰

除左你可以從年報中，管理層將來發展計劃，可以了解到企業狀況外。

你都可以睇一些財務指標，好似股東權益回報率(ROE)會由以往較高水平，一直回落。派息政策，由以往零派息，到現時較高派息比例。都反映企業增長潛力，係下降左。

另外，當你見到大環境對佢不利，有其他新的產品替代原有產品及行業，都是一個不利訊號。

當然，我地唔可以一概而論，要每隻股票認真分析，睇佢數年發展情況，才可以下定論。

但你要記住，企業增長潛力慢左，唔等同於佢無左投資價值，純粹係企業或/和行業開始成熟，股票由「潛力股」慢慢變成為「平穏增長股」。

我地係投資配置時，唔會全部分晒係「潛力股」上，因為風險會太高。必需配以一些「平穏增長股」，令成個組合風險更平衡。

未來10年，相信新能智能車、醫藥相關、物聯網、綠色能源等行業，會有較大優勢。

----------------------------------------------

若你有問題想向本人發問，可在龔成的fb專頁中（龔成）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q17741-Q17760）

Q17741：

老師 巴菲特選股既時候會留意管理者係咪精明能幹 但係我地平常人消息渠道有限

又冇得好似巴菲特咁同佢地親身接觸 咁點先可以更了解間公司管理人員呢

龔成老師：

我地可以利用年報，得到好多資訊。

例如我會睇企業5年的年報，由過往年份開始睇，到較近期。在年報中，我會睇到管理層面對不同的經營環境，怎樣應對，以及結果如果，我一次過睇5年，就可以知道這些資訊。

另外，當中都會見到好多管理層的質素情況，例如滙源果汁（1886），我在多年前有睇過年報，當時企業業務開始轉差，除了市場環境問題，另一個因素我發現是融資成本，因為利息盈利率，當時已去到少過2的水平，已到了危險狀態，但管理層對問題卻完全不提，沒有講解決方法，我認為管理層有問題，因此對這股的質素打折扣。

------------------------------------------------

Q17742：

龔sir, 純分享。本人是今年5月舊生。我好高興已經感染咗身邊幾位朋友上你股票班！兩個正上9月班，另外還有一個報咗11月班！呢位朋友喺我個年代嘅學霸，Harvard畢業！現在係4名小朋友嘅媽媽。

自從我上完你嘅堂，我都一直將學到嘅跟朋友與家人分享。慢慢、慢慢，佢哋都覺得我講嘅嘢有道理（即係你教我哋嘅知識）！所以佢哋決心去上堂。

我亦有希望我父母重組收息股組合。你成日鼓勵我哋，我都想鼓勵下你！你真係好正面、好值得大家去向你學習！好多人都因為你嘅分享而獲益不少。多謝你！希望你繼續加油！

龔成老師：

多謝你的鼓勵，令我更明白自己所做的是正確！

我希望我所教的知識，可以真正幫到人，因為我平時所講的，都是理財，較正統的投資，並不鼓勵炒賣，都是香港人認為無趣味的。因為香港人喜歡炒炒賣賣。

但見到愈來愈多人，學到正確知識，明白正確理財，要做風險管理，不是炒，不是賭，而是建立財富組合，做好配置，我相信我做的是正確！

大家都加油啦！

------------------------------------------------

Q17743：

老師我成日聽人話金價會升，其實點買金？係米有好多種金?我都想買D,點買架？

龔成老師：

金價中短期的走勢，其實好難估的，不過在長遠來說，一定會向上，因為現金只會不斷貶值，因此金一定升，只是多與少的問題。

不過，金由於無現金流，所以又唔值得持有太多。

所以，你可以在財富組合中，持有小量金，長線持有。你可以買實金、金ETF、紙黃金都得。

------------------------------------------------

Q17744：

本人將繼續月供股票。唔會停
1928
2800
1211
388
1299
1038
2388
700

再等機會，在大跌市買入優質股。

龔老師，我還未有價入，未知現在是買入時機？
月供股票已維持二年了

龔成老師：

你所供的都是有質素的股，保持進行就得，中短期股市唔需要理會。你可以保持，長期。

現時大市處合理區，可以一邊投資一邊留現金，而餘下現金的運用，就是等大跌市時出手。

如果你現時現金多，可以分注入少少貨，只要同時留有現金就得。不少舊經濟股都在合理區中下部，有投資價值，至於新經濟類別，則唔算平，如投資最好等下（或保持月供就得）。

------------------------------------------------

Q17745：

想問下之前睇到你話領展跌10% 係平直區。。打算等佢56 先買入。。但依家氣候商舖減租or好多關門。會唔會影響便宜區下降。。應該幾多度買入先好呢？

另外現有15 萬cash..3年如果想去到50 萬。。有冇可能同提議丫。。唔該晒

龔成老師：

領展（0823）有質素的。我地在分析股票時，會考慮長期情況，相信這股中短期一定弱，因為香港的市道差，但在長遠，例如3年後，情況如何？相信點都唔會好似現時情況，因此，當用長線投資分析，就會見到這企業點都有一定的價值。

這股現時在合理區中下部，可以分注投資，長線持有。你分注買入最好，唔好只集中一次過入。

另外，要3年將$15萬增值成$50萬，並不容易。唯一的方法，就是集中投資潛力股，在市場發現該潛力股之前買入，但太集中潛力股會有風險，同時要有較強的分析技巧，你要自己平衡。

------------------------------------------------

Q17746：

老師，最近疫情空閑所以已經讀完幾本老師的作品，令我對理財觀念有所改變，謝謝你。

最近已入手金沙作長遠投資，另外開始每月少量投股 舜宇和港交所。

（因現量好像太高）另有一手地鐵。

老師之前講過港鐵屬於半地產股，但我覺得1113是有長遠發展的企業，請問如果入手的話，地產股比重會唔會太多？

$4X 估值是否已經在便宜區？

龔成老師：

你上述持有的，都是有質素的，港鐵（0066）是半隻地產股，你在設計股票組合時，要睇翻一個行業，會唔會佔組合比例太多，你預去到30%已是上限。

至於長實（1113）正面的，這股現時在合理區中下部，有長線投資價值，不過你預中短期仍會較一般。長遠會平穩發展（但不是高增長類）。

------------------------------------------------

Q17747：

成哥,我想問下有關保險股的問題:

1.根據經濟通顯示,保誠2019年的EV是541億美元,除26億股數後,每股內涵價值=hkd$161.2,對比起現時股價$115.5相差大約$45,是否呢個EV有水份?還是現時股價被低估?

2. 保誠份年報一直以歐洲內含價值顯示EV,是否有所隱瞞實質?EV還是歐洲保險制度與美國保險制度的分別?

3.你會點樣比保險股合適的multiple?

麻煩你

龔成老師：

1）利用內涵價值等方向去分析，是掌握保險企業價值的方法之一，但並不是唯一的方法，同時，你唔能夠單單比較數字就定義為平與貴，要考慮一些調整因素。

因此，這是方向，但並不單是這樣運用的，這方面要解釋會花較長時間。

2）又唔會特別隱瞞，這只是跟翻制度去公布。坦白講我都唔知具體有咩分別。

3）好難三言兩語講，就算進階班，會講少少，但未必深入，這會用質素與增長有關。

------------------------------------------------

Q17748：

龔SIR你好。本人於2019年開始留意龔SIR你既FACEBOOK，並係2019年7月開始月供股票，內容向下：

盈富基金：$4000 （平均價為：$25.46）
媒氣：$2000 （平均價為：$14.09）
港鐵：$2000 （平均價為：$43.23）
友邦：$2000 （平均價為：$75.45）
共$10000。

另外有兩手領展，分別係$66.4 同$59.8 入（平均價為：$63.1）。

（1）龔SIR我問題主要有兩個大方向，首先係月供股票。
由笫二課筆記提及投資5大方法，月供指數（e.g. 盈富基金） 其實係比較得到的回報應該係以上最少。我是否應該減少月供數量，反而利用恆生指數市盈率作參考，以一手手買入盈富基金？

另外由於現時香港因疫情影響，我所月供之股票中短會比較弱。我是否需要調動一定資金月供現時表現較好之新經濟股（e.g. 阿里爸爸/美團/小米）？考慮到時間成本問題，感覺上中短期內既投資應該唔會冇太大回報甚至係負回報。

又或者龔SIR建議應該維持$10000月供再另外搵水桶1既股票月供？請問有冇咩水桶1既股票建議？

（2）笫二個問題係關於我持倉既領展。

考慮到領展既背景同穩建程度，我笫一手領展於$66.4買入，因為上堂知道呢隻股票就算股價受壓都仍然有得守。當佢股價下跌一成時我於$59.8再入一手，現時平均價為$63.1。

想請問龔SIR如果計算下一次買入時機，應該用平均價$63.1下跌一成：$56.8定係用最後買入價$59.8下跌一成：$53.8為參考指標？

最後仍然要多謝龔SIR既FACEBOOK PAGE，多本著作同埋股票班教到我好多野。雖然現時所有股票都係負回報，但我深信龔SIR所教既價值投資終有一日會開花結果。希望疫情快D過去，好期待再上龔SIR堂。

龔成老師：

1）如果你有選股的能力，的確可以減少少盈富（2800），不過，我仍建議組合中有基本的盈富比例，這可以幫助你組合平衡風險。

至於你所講的中短期，其實好難估的，唔好咁樣去捉中短期的模式，總之所有野都以「長期」為前提。

當然，你上述的持股，在長遠的增長，未必及阿里（9988）等股票，所以你組合加翻少少較高增長是可以的（但這不是建基在短期考慮）。

如果想增長力高少少，可考慮：阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。

2）比較好的策略，就是你第二注買入價計算，再跌10%，即是$53。

你唔需要擔心中短期股價，只要我地長線投資，有企業概念，我地會「期待股價下跌」的。

------------------------------------------------

Q17749：

龔老師你好！近年開始follow你的facebook，發現短期的買買賣賣賺取差價並不是致富的方法。再買了你幾本著作，開始使用你教的方法，每月固定月供2800 1211 1928。

投資優質企業作長線投資，也預留資金等待時機。發現投資的心景也放鬆了很多。改變了心態也改變了回報。謝謝你。

但我有一疑問，2008年金融海嘯，美國實行QE，普遍認為樓價受QE所帶動上升。現金貶值。2020年美國更加實行無限量寛。這樣大量印製銀紙。而美金早早就不是金本位。

在聯邦儲備局負債大幅上升情況下。究竟樓價會像2008年一樣大幅上升，還是會因為大量印製銀紙而使市場對美金失去信心？

假設市場對美金失去信心，資產例如股票和樓房會否大跌？到時是否投資黃金進行避險？

因家人想換樓改善生活環境。但想不通樓市之後的去向。求解答 謝謝

龔成老師：

大量印銀紙，現金只會進一步貶值，無論市場對美元有無信心，「資產項」，如優質股，物業，都只會向下。

就算市場對美元有無信心，只是對「現金」無信心，資產本質的價值不改變，例如一層樓，佢就會有租金收入，現金是報價單位，如果極端D，現金已無人用，物業就會產生「租金」，而租金不是現金，而是其他有價值的野。

所以，物業、優質股，本質從本無變過，但現金價格，就會因為大印銀紙，而報價向上。

------------------------------------------------

Q17750：

龔成老師你好，
睇咗你影片教學，獲益良多！
有個人問題想參考你意見！

我今年30歲，儲左30萬當中有10萬流動資金，想投資股票，想睇吓點投資好，自己有玩過股票但次次都平手走人仲蝕咗手續費

但係而家冇收入，又想財富增值下 ！有冇咩方法可以十萬變廿萬咁增長落去

龔成老師：

我相信你之前是中短線投資，這其實無法賺錢的，應該改變你的方式，轉為長線。

我地理財投資，其實是建立一個「長期的組合」，將現金轉為股票，長線持有，當中要優質股，以及平衡配置。

你現時無收入，在投資上要較為保守，大部分要持有現金。部分就持有股票，你可以考慮一些平穩增長股，長線持有，例如盈富（2800）。

另外再加其他：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

到你日後收入正常，以及更多投資知識，就可以加入潛力股在組合。

------------------------------------------------

Q17751：

老師你好，想請教一下點睇6869長飛光纖前景
謝謝

龔成老師：

長飛光纖光纜（6869）長遠的質素仍在，但增長力比過往略有減弱。

全球光纖光纜市場，仍會保持向上，智能手機、互聯網、大數據等科技，成為了行業的推動力，但由於本身的賺錢能力略減，令長遠增長都受影響。

長飛光纖之前受惠三家國有電訊營運商發展網絡基礎，所以生意算是不差，但這亦令這公司出現風險。市場競爭有所加劇，佢的賺錢能力有可能略有減弱。

整體上，質素仍在，但增長與賺錢能力就有就減弱，現價合理。

------------------------------------------------

Q17752：

龔老師你好，一直有參考龔老師的選股方法，半年前買入1211 BYD 採取長久持有風針，賺了不少，感激不盡。想幫家人問問一些投資問題:

家人已達退休之年，退休前買入匯豐旨在有穩定息派，大概$58-$70都有入，30000股左右，平均價$64. 持有已經數年

一向知道龔老師不建議買入匯豐，現時股價已跌了不少，又沒有息派，究竟應該止蝕賣出換其他股，還是應該繼續持有？希望龔老師可給予一些意見

龔成老師：

比亞迪（1211）你能把握機會，太好了！

匯豐（0005）的賺錢能力有所向下，雖然不是全無質素，但長遠增長力不強。暫時只能當是收息股，唔好對股價有太大期望。

如果佢地持有匯豐的佔比太多，建議轉其他收息股，同樣有收息效果，但組合就能較平衡。

可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、置富（0778）、陽光（0435）都可以。

佢地可以現時轉，又或等經濟好翻少少，匯豐上翻少少先轉。

------------------------------------------------

Q17753：

老師，我想問我之前買1717澳優16.76入咗一萬股同埋16.26入咗5000股，仲有7500南方恆指7.44入咗10000

阿里巴巴256.2入咗400股，而家全部扎住咗喺度，咁我應該點樣部署，1717會唔會升返

同埋最近有留意呢啲股票，我係最近先睇你嗰個Facebook，先知道原來長期會增值，咁就想問吓如果月供股票係邊啲好啲
一個月可以用5000

仲有啱啱$366入咗港交所500股

龔成老師：

澳優（1717）雖然有長線持有價值，但之前在合理區頂，最近因盈利比市場預期弱令股價下跌，現時在合理區。這股可以守的，但中短期較弱，要長線，暫時守住先，同時唔好心急加注，單一股唔好持有太多。

至於ＦＩ二南方恒指（7500），這類反向工具，好難玩，唔建議投資。

阿里（9988）有質素的、港交所（0388），可長線。

其實你選股都無問題，但買入價就有問題，好多時在貴的價位買入，同時無用分注等策略去有效將買入價平均。

我會比較建議你用月供股票，作為長期累積財富的方法，每月供$5000。

你可以考慮盈富（2800）$2000。

另外再加2隻（每隻$1500）：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。

如果你不懂股，就集中供盈富$5000。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q17754：

龔SIR你好, 有關溝貨同分段入市概念問題, 想問問要定義投資者是溝貨還是分段入市是否要看該投資者之本金金額而決定?

假設投資者A本金$30000, 於股票A $10時投資$30000買入, 其後當股票A跌至$6時再另外投資$30000買入股票A,

就以此例來說, 是否投資者A此舉則為溝貨, 但如果投資者A本金$90000, 分別於股票A三個不同價位各投資$30000, 是否此舉則為分段入市, 謝謝

龔成老師：

對，你的理解正確。

最重要是投資者本身的策略，本金的設定，這會涉及風險。

我地投資，就是建立一個長期的組合，配置是重點，每隻股的比例都不能太多，要有策略，同時明白買入價不是影響的關鍵。

------------------------------------------------

Q17755：

老師你好 我23歲啱啱出黎做野 月入20k 兩年後過30k 而家計畫開始月供

2800： $3000
0066: $1000
823： $1000

請問呢個組合可以嗎？

另外想問吓其實投資組合係咪唔好有太多股票 而係集中幾隻？

個人希望30歲前可以儲到100萬 靠月供股票做唔做到？
感謝老師

龔成老師：

組合可以有5-10隻股票，如果股票隻數太多，每隻比例好少，同時管理及分析困難（因為投資者應該持續分析），如果股票隻數太少，會有集中風險。

你上述的股票，都是有質素的，月供可以進行。

你單靠上述月供，未必能做到30歲$100萬，最好你同時每月儲到現金，$3000較好。並利用這些現金，等機會投資股票，這樣會增加你組合的增長力。

另外，以你的年齡，財富仍有一定的增值力，建議你多增加投資知識，在選股、企業估值、投資時機上落功夫，對你長遠財富有好大影響。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q17756：

老師你好，希望得到你嘅意見

本人30歲，兩公婆每月可儲$15000，有自住樓，流動儲蓄40萬，另有股票如下：

1. 939 2200 shares @ $6.42
2. 1337 1000 shares @ $3.88
3. 3396 200 shares @ $43.98
4. 003 2401 shares @ &14.93
5. 66 224 shares @ $44.22
6. 1211 669 shares @ $45.65
7. 2800 1307 shares @ $27.34

#1 好早買落、#4-7 係月供股，因有突發事件暫時停供

1. 我嘅投資組合係咪太雜，請問有無咩建議?

2. 若我繼續月供計劃，以 盈富及聯想集團 (992) 各供$2000 會否太單一?

3. 我地暫時都將錢儲落 mortgage link account, 請問股票與現金嘅分佈應該點分配? 謝謝

龔成老師：

1）唔算雜。不過你30歲，財富應該處於增值階段。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

所以，建行（0939）、煤氣（0003）未必太適合你投資，而聯想控股（3396）增長力也只是一般。

2）你可以供盈富（2800），聯想集團（0992）就只是一般。月供股票單一無問題，但整個組合都要建立得平衡少少。

3）以現時的市況及你的情況，持有3-5成現金可以。

------------------------------------------------

Q17757：

請問您點睇1873呢隻股票?

龔成老師：

維亞生物（1873）主要就臨床前藥物開發提供基於結構的藥物發現服務，服務包括：基因到蛋白質（Ｇ２Ｐ）及基因到結構（Ｇ２Ｓ）、先導化合物發現引擎、靶向膜蛋白發現、藥物化學等。

這些類別，都是有發展力的項目，加上佢的生意與盈利有實質增長，本身質素都有的。不過，估值是最大的問題。

股價上升過多，現價已有點貴，就算有發展，但現價已過度反映，你投資值博率都唔會高。這股要小注風險，等回落先考慮，同時唔建議太大注。

------------------------------------------------

Q17758：

龔sir你好我是你的學生， 我想講下我的情況， 因為我本身都有一些資金加上屋企人的資助本身想買私樓， 但係現在的樓價都差不多五百萬至600萬

我覺得每個月的供樓負擔都很重， 所以想轉投資的士， 因為我屋企人本身都已經有一架供完的， 我諗住如果買到的話都是抽居屋或者白居易

其餘的資金拎嚟投資股票， 你覺得這個方法可行嗎有什麼好的提議thanks so much

龔成老師：

投資物業，自己的負擔情況是重要考慮，要堅守「供得起」原則。

如果你長遠有置業的需要，建議你可以考慮細價樓，只要你能夠負擔，都可以考慮的，例如$400萬。

至於的士牌，都是一個投資工具，但你都要明白當中有風險，例如疫情會令佢可能無法出租，又或租金減少，你就要用自己的資金去供款。

的士牌的投資價值，比過往年代弱左，因為市場多左競爭，不過，在正常的經營情況，可以視為收息類工具，但就唔好對增長方面有好太期望。

如果疫情令牌價下跌，你買到平價位，都可以考慮的。

------------------------------------------------

Q17759：

請教如何將自己既廿萬短時間內翻倍，係咪要借錢炒，如果唔係就有排？

發覺就咁買股票增長太慢
就算投資正確都因為本細賺得唔多

龔成老師：

借錢炒股是高風險的行為，贏會贏多D，但輸都會輸得好盡，除非大恐慌市出現，否則，唔建議用這些方法。

另外，你可以考慮投資潛力股，只要你小心選有質素的，同時市場未發現的，投資就可以有高回報。

明白你想財富有高增長，好多散戶都有這心態，但結果往往是輸返轉頭。所以要理性去投資。

------------------------------------------------

Q17760：

龔老師你好，多謝你之前寶貴的意見

我終於踏出了第一步，買了股票，也在之前三月下跌的時候, 用手頭上的現金入了一些。正如你經常在Facebook所講，股票有跌有升，大部份的都至少能保本，有些甚至倍升。令我初嘗投資的滋味。

現在很流行在英國買樓，我身邊有幾位同事都正在物色物業。

加上現時英國推出500,000英鎊樓下免印花稅，和美元有貶值趨勢，請問你認為這是合適的時候進場嗎？

我自己本身在香港沒有樓宇，但老公有一層收租物業和住在奶奶的自置物業。請你給我一些意見。謝謝你一直以來的指教。

龔成老師：

我無特別研究外國樓，但初步分析，英國樓現價應該唔貴，是可以投資的。英磅現時唔貴，加上英國經濟現時唔好，這都會出現中短期不利，但只要長線，其實又唔需要太擔心，反而提供了投資值博率。

不過，你一定要做足功課，對當地的樓市及租務市場，都要有一定的了解，才可以進行。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q17081-Q17100）

Q17081：

龔老師你好，之前上完股票班的，想同你講2020年6月11日是我的Victory Day！我食了十幾年煙，食煙除身體不好，更浪費我每個月二千元，所以決定由該天起我要戒煙！

想把省下來的錢月供更多股票，所以想借你fb 同所有同學講，我要戒煙，以此為證，希望我成功。

我現在月供12，27，66，1177，前三隻月供各3000，1177月供1000，另外178 [email protected] ，823 [email protected] 打算長期持有，會以股代息，這組合可以嗎？

龔成老師：

得，我會將我地的對話，放上網，你一定要記住自己所講的，要記住這刻的決心。最好將我放上網的對話影響，時刻提醒自己！

其實，你講得出這句，已經好有決心，接下來就是堅持！你要加油！

至於你的持股，都是有質素的，可以長線，最好加翻D盈富（2800），可以平衡組合。

你加油呀！我相信好多人支持你的！

------------------------------------------------

Q17082：

你好，龔Sir！我追蹤你嘅Facebook專頁已有一段時間，也有跟從你開始月供股票2年。

我現在覺得好徬徨。本人36歲，有一個小朋友，家庭總收入4萬5，可流動資金大約55萬，需要買自住樓，老爺奶奶住公屋單位，屬於租置計劃可購買

現在要決定應該買自住樓先，還是買租置計劃單位先，如果我買租置單位，但一家三口不會入住，只有老爺奶奶居住

若買自住樓先公屋又會除名。我應我有點貪心，想有兩層樓，為未來及下一代準備更好生活，龔Sir可否指引我，謝謝你！

龔成老師：

比較好的做法，是買公屋先，之後你買樓方面就會比買彈性。當然，如果公屋擁有人的名，同你買私樓是同一人，就要支付貴的稅率，並不著重。所以你地可研究下不同人名的策略。

買公屋先，如果你無地方住，就租樓先，同時你地要盡最大努力在這段時間儲錢，令你地有足夠的首期，去買到私樓，這樣你地就可以有兩層樓。

當然，這計劃要求你地要有一定的現金，你地可以全家研究下相關方案先。

------------------------------------------------

Q17083：

你好呀成哥，我昨日$3.56大手入左386中石化，又話疫情影響原油需求，我宜家應該點做好？

我見佢息口已經去到九釐幾，所以買入以作收息，但個市甘樣，定還是要止蝕留現金買其他？謝謝

龔成老師：

中石化（0386）本質不算差，質素有的，但又不是最高之列。

如果從過往多年的業務表現分析，佢質素算是不差，但又未到好好，始終這只是商品企業，沒有一些太大的優勢。生意近5年只是上上落落，無乜增長力，這是受油價等因素影響，反映佢處於一個被動的狀態。

所以，然股價回左令股息率拉高，但這仍只是合理水平，不過作為收息股投資，都可以，但就唔好對股價有太大期望，但由於優質度不算好強，因此不會太大注。

作為收息股組合的其中一部分，可以，但就唔建議持有太多。如果你過多，可以等上翻少少後，賣出部分。

------------------------------------------------

Q17084：

龔sir 你好，我見你會建議新手用月供方式投資

咁我供5000$分別、66-1000$、2800-2000$、0003-1000$、2388-1000$

我假設而加價位買入、一年後當升幅
一成、大嘅5千幾利潤 我有無計錯？

咁樣計法 算成功嗎？因為呢種有質素股票升幅不大、感覺似收息？

龔成老師：

對新手來說，月供是一個很好的投資方法，因為新手未有掌握買賣時機的能力，用月供就能簡單令財富增值，雖然回報未必及掌握買賣時機模式，但卻能以較低風險令財富增值。

你所月供的，都是有質素的股票，可以進行。

如果你每月供$5000，一年就是$6萬，假設10%，就是升值了$6000。當然，你唔好太著重這刻短期的回報，要睇長線，同時明白中短期總會有上落。

如果你要有較大的回報，就要有選股及投資時機的能力，如果未掌握技巧就亂用，結果只會更差。所以，學習是最重要的第一步，在你掌握選股、企業估值、投資時機等能力前，暫時集中做月供，這樣會最好的。

------------------------------------------------

Q17085：

龔sir你好，我是你6月班的學生。

現年29歲，從22歲畢業後工作即努力人揾錢，但從未涉獵股票範疇。

目前有兩層物業，一個車位，現金200萬。目前月入平均約29萬，扣除日常必要開支約剩15萬。

現時已閲畢你的80後百萬富翁，股票勝經，正在看50優質股。目前規劃三個月內睇哂你12本著作，上哂你的課程後認真研究年報，初步打算年尾開始投資股票。

股票是我希望在30-40歲主力學習的投資，打算由盈富基金開始，之後從課堂中憑自己所學找5-10隻優質股，耐心等待便宜區域投資。長期持有下，目標爭取15%回報，希望在45歲達到資產一億。

阿sir你對我的規劃有冇咩建議呢？

龔成老師：

你這個年齡，是財富增值的黃金時期，要好好把握，你本身收入不差，下一步是怎樣投資，優化你的資產。

你持有2物業及車位，在固定資產的部分已做好配置，之後反而唔好太心急增加物業，否則會過度集中。因此，之後應加強股票部分。

如果你目標是$1億，可以投資一定的潛力股，以「平穩增值股」+「潛力股」並行進行。

你可以將部分資金，投資你可以考慮盈富（2800）、銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）、希慎（0014）、太古地產（1972）等，你可以了解下這些股票，然後從中選股。

另外，再有一些資金是自行選股。我相信你在課堂中，能有更具體的方向，以及選股策略。目標15%回報是可以的。

你只要保持現時的儲錢情況，以及保持投資增值。

另外，你要建議長期的財富平衡，當你股票比例較多時，就要同時將部分，分配到物業等類別。這動作可以遲少少先。

現時大市處合理區，可以一邊投資一邊留現金，而餘下現金的運用，就是等大跌市時出手。

------------------------------------------------

Q17086：

龔成老師，你好！因為之前唔識投資，吉利以$25.5 買左好多手

而港交所以$294 都買左好多
請問兩股投資前景如何？

龔成老師：

相信你未有掌握大市冷熱，以及企業平貴的概念。

這兩股都有質素的，不過，你在貴的時候買入，相信要守較長時間先翻到上去，因為要等大市進入狂熱期，才有機會到達貴的水平。

而這兩股，你都可以守的，都是前景正面的股票，但就要耐心一點，特別是吉利（0175）。

------------------------------------------------

Q17087：

成哥，想請教你，我在5月時首置買入一間二手樓，現時很多人都說香港樓市已見頂，將來沒有更多升值潛力，想請問以現時香港工資和金融市場情況分析，樓價是否已經沒有上升空間？

因為另一派說法是因美國無限量化寬鬆下，資產價值長遠只會升得更高，兩邊說法矛盾令我非常困惑。

此外，無限量化寬鬆而實體經濟沒有改善的情況下，有不少評述員指出會導致市場出現滯脹，成哥請問你對滯脹有咩睇法？如出現滯脹，對香港資產和金融有咩影響？

龔成老師：

中短期的樓市，受多種因素影響，樓市升跌較難預測，至於長遠樓價，仍會偏向上，而分析的重點有兩大因素。

第一，現金不斷貶值，這在過往數十年不斷出現，結果好明顯，同時，現時正不斷進行，相信不難預測之後情況。

第二，供求，香港長期的土地供應不足，這情況仍未解決，因此往後仍會供不應求。

而金融市場及滯脹而風險，都只會對樓市產生中短期的影響，只要你長線持有，其實不用理會。

------------------------------------------------

Q17088：

龔成老師你好，我弟弟今年22歲，從來沒有投資經驗，有大概15萬儲蓄，想幫助他開一個證券戶口作月供股票之用，並打算每月供$3000股票。

想問一下供港鐵(0066)，新地(0016)，港交所(0388)各$1000是可行的組合嗎？謝謝！

補充：他月入大約$9000

龔成老師：

佢這個年齡，是財富增值的黃金時期，要好好把握，盡一切的力量去儲蓄、投資、學投資知識。

可以投資「平穩增值股」+「潛力股」，不過，由於潛力股要求有一定的投資知識，因此這刻不用急著投資，佢可以集中在平穩增值股先。

上述的3股，都是有質素的可以進行，長期保持月供就得，如果可以的話，可以加入盈富（2800）$1000-$2000，作為平衡組合的一部分。

當然，佢都要有一定的現金留低，如果現金開始剩下$50000，就可以要減月供或停。

------------------------------------------------

Q17089：

你好，我見到你留言講分注投資
請問係解咩？

龔成老師：

即是將一筆資金，分成多次去買入某一隻股票，目的是將買入價平均，減少一次過在高位買入的風險。

例如你打算用$10萬入某一隻股，可以將資金分成3注，每注$33000，每隔2個月入一次，買入價就可以平均。

可能你會問，點解唔一次過在低位入，其實好多散戶都係咁樣想法，但好多時佢地一次過入左他後，之後見到進一步下跌。所以，平均買入價是一個平衡風險的投資策略。

------------------------------------------------

Q17090：

老師，今日睇電視專家講9996、神推鬼咁無啦啦入咗，請問老師這可以短抄定中長線

龔成老師：

沛嘉醫療（9996）不是無發展，但佢仍處燒銀紙的狀態，虧損不斷出現，根來無人知幾時先有較似樣的盈利。

這就會出現一個嚴重問題，企業值幾多錢先合理？

答案是無人知。

市場根本無法正確估到佢地企業價值，那就只能單憑概念、前景，去估這股的股價值幾多。這就會令這企業的股價十分波動，因為大家都只是估估下。

所以，這股不是無潛力，但股價多少才是平貴，是最大的問題。只可以話，唔建議持有太過多。小注則可以守住先。

------------------------------------------------

Q17091：

請問老師怎看772 閱文集團？

龔成老師：

閱文集團（0772）有發展力，但現時的盈利仍不多，但市值唔算細，當中仍有部分是概念價值，這個價值可以變得好快，所以，佢之後大升、大跌，都有可能，這是這股的特點。

如小注持有都可以，因為佢不是無潛力。但就較難具體分析。不過，相信發展是有的。

------------------------------------------------

Q17092：

老師，我買了妖股，受騙，跌左9成！

這是我很辛苦儲的錢現在首期沒了一大部分！

龔成老師：

事情已發生，已經無辦法，你都要理性面對。

錢，一定可以賺得翻的。

這刻，從基本的理財做起，基本的儲錢，唔好心急投資，慢慢學，你要學正確的投資，唔好炒賣，唔好心急賺大錢，這是致命因素。

------------------------------------------------

Q17093：

龔成老師, 你好! 我有幾個投資問題想請教一下:

1. 我最近有一筆流動現金約45萬, 現在放在銀行先做定期, 我目標係上車買樓, 點樣可以善用呢筆現金做投資使我的財富不斷增值? (備註: 我已預留現金用作生活開支)

2. 現時持有少量滙控($65時買入)同盈富基金, 最近見到滙控價位開始升返, 我有打算再購入少量滙控來中和一下, 你認為可以嗎?

3. 你常常建議我們購買盈富基金來增值, 但我唔明白個原理, 因為盈富基金近幾年價位都算平穩, 維持$24-$27呢個價位, 除左之前曾跟大市升到$28左右, 依加都漸漸回落$25左右, 長遠而言點樣令投資者增值?

龔成老師：

1）要睇你打算幾時買樓，如果打算在1、2年買，其實你應該持有較多的現金。

因為投資股票，就算是優質股，中短期股價存有不確定性，要長期先可以較穩陣去賺錢。所以，你現時是否投資，要睇你幾時買樓。

2）匯豐（0005）是收息股，股價增長有限，你唔能夠只睇「平均買入價」，最重要睇這股應該佔你組合多少，買入價只是一個心理因素。你再投入的心態，最好是「這筆新資金，預期得到這個股息」，是否適合你自己。

3）盈富（2800）最大的作用，是平衡組合，因為這基金當中有50隻股，可以減少你本身組合集中的風險。

另外，佢每年都會派息，加上有少少增長（當然，並不多），但以組合中，建立部分穩健資產來說，盈富可以的。你唔好太著重中短期情況，要睇長遠。

其實，你可以視這是穩中求勝的工具，投資盈富是穩健部分，另外再配以其他股票，就是增長部分。

------------------------------------------------

Q17094：

老師，有幾條問題想問下你諗法

1. 借左一筆錢買股票，係低位時入左2/3左右，餘下1/3唔知點好，又覺得個市唔夠平，但唔投入埋個市又好似用唔盡資源，因為要還息架嘛，應該等到幾時入埋佢？借左錢之後入市策略應該點？

2. 派左息係唔係一定要再投資入同一隻股，定係第二隻都得？複息效應嘅重點係有再投資呢個動作？定係要係返同一項資產？

3. 買左一手12恒基，預期佢將來亦會升，但潛力應該就冇另一隻潛力股1257咁好？但1257又唔肯定係唔係一隻優質股，咁嘅情況下，建議賣出12將收回資金投資在1257嗎？就算買晒1257都唔係佔組合percentage太多。

龔成老師：

1）這刻只有等，因為你的資金是憑借貸而得，所以始終對你有風險，你的「要求回報」亦會較高。因此，你這刻只有耐心等，等到大市再有較大的下跌，才出手，如果過了較長的時間都不跌，你可以考慮還款，又或投資收息股（只要在合理價，都可考慮）。

2）不一定入同一隻股票的。

當我地利用「複利息」時，最重要是再投資的概念，投資原有股票較為正確，不過，如果收到息當刻，另一隻股的投資值博率較高，其實投資另一股，資金會有更大的回報，因此，其實可以彈性處理的。

3）我地最重要是「配置」。

恆基（0012）是較穩健的股，中國光大綠色環保（1257），本質不差，但業務有潛在風險，負債正增加，雖然在投資值博率上，不下於恆基，但從風險角度上，恆基會較穩健。

因此，你可以將較多資金投資恆基，小部分資金投資中國光大綠色環保，這已經是一個平衡的組合。

------------------------------------------------

Q17095：

龔生 你好 我想問一下

50穩健收息股
50值博倍升股
50優質潛力股

呢三本張你分別有咩期數 我想去買 但都有唔一樣嘅年期

另外 3396 我平均21蚊買入 而且持股不小 想問我長期持有可以嗎？ 還是應該減持一部分？

疫情過後 你會在澳門開班嗎？

龔成老師：

《50優質潛力股》（2020年版）是最新的。

另外兩本，應該更新到2019年。

聯想控股（3396）的賺錢能力其實不高，同時有減弱的情況，見佢股本回報率正不斷向下，企業身處的市場競爭大，同時成本轉嫁能力不算強。

現價合理區中下部，這刻賣出又唔太好，你可以等佢上翻D，先減持部分，餘下再守。當全球經濟正常翻後，佢會慢慢上翻，但要上到$2X，不是易事。

------------------------------------------------

Q17096：

想請問，父母有筆錢俾我想我幫佢地買股票，大概10-20萬，我想幫佢地投資穩健啲，但諗到如果自己選股，好驚幫佢地買中類似匯豐咁。

如果我將佢地嘅錢，每月頭固定幫佢地入一手2822同3140，隔兩個月入一手2800，目標係2800同2822各30%，3140 40%，這樣可行嗎？

咁樣做會唔會比較穩健啲

龔成老師：

可以，上述你所選的，都是指數基金，這是較為穩健的選擇，亦很適合不懂選股的投資者。

另外，你以上述的策略幫你父母買入，可以平均買入價，因此都是可以的。

但你都要留意，這樣，你地會將資金集中在股市，而股市點都會有風險的，所以都要明白，不是一個絕對穩健的投資，所以投資多少現金，都要小心計算。但在正常的情況，都能平穩增長。

------------------------------------------------

Q17097：

我有50萬資本，好想好似你成為百萬富翁，想請問我將所有資本放在奧園健康，等翻一倍，定愛康醫療，定九毛九股票好呢？請問呢三隻股票質素如何？

東陽光藥現價係咪屬於平，係咪仍然是優質股，可以買？

龔成老師：

奧園健康（3662）正面的，不過現價不算平，分注小注都可以。

愛康醫療（1789）現價貴，唔太建議投資。

九毛九（9922）同樣唔平，現價小注都可以，這股有增長力的。

上述3股，都有質素，但就唔平，你投資時要小心控制注碼。至於東陽光藥（1558），之前1送1，股價調整左，現價合理區，分注投資可以，這股仍是有質素的。

------------------------------------------------

Q17098：

老師，小弟暫未能報名上課，唯有打書釘、上網、FB看你之前的文章及留言。之前提及的＄10K儲蓄，亦已繳交保險費。但預計今個月開始，每月可儲蓄80K至60K。其實，我想盡快實行月供股票，愈早供，愈快回報。

此刻想從股票中收取最多股息來幫補我的家庭開支，所以自行做了以下簡單計算:

1038 長江基建
＄1950/＄42.3*12=553股
553股＊＄2.46=$1,360

1113 長和
＄1950/＄43.75＊12＝534股
534股＊＄2＝＄1068

2 中電
＄1950/＄77.75 ＊12＝300股
300股＊＄3.08=$924

2800 盈富
＄1950/24＊12＝975股
975股＊0.87＝＄848

股價高，所購股票量便少，但股息率高低可影響股息。我以＄2,000月供，扣＄50手續費，計算上述股票。發現1038股息最高，月供1038，你有何意見？

心中有一個疑問，盈富股價以每天恒指除10，但很難想像10年後或20年後會否翻一倍，如果未能做到，便沒有增值，我想法有否錯？

龔成老師：

上述都是有質素的股，基本上都可以持有，長遠能收息，以及平穩增長。

長建（1038）的股息率不差的，第一，佢本身派息理想，第二，近期股價回了不少，拉高了股息率。這股有投資的價值，現價分注投資，月供都可以。

如果可以的話，月供股票唔好太少，因為你現時供$2000，費用$50，成本比較高。

至於盈富（2800），這的確不是高增長類別，但過往每年都派約3%股息，而長遠能有少少增長，因此都是組合中，可取之選。

盈富最大的作用，是平衡組合，因為這基金當中有50隻股，可以減少你本身組合集中的風險。

其實，你可以視這是穩中求勝的工具，投資盈富是穩健部分，另外再配以其他股票，就是增長部分。

------------------------------------------------

Q17099：

龔sir, 想請教一下，睇左你所有著作，書中建議大多建基於美元貶值，現金唔值錢，所以要買資產。

但我想請教一下，如果買香港資產，如港股港樓，美元大冧，港紙亦會跟跌，買港元資產是否不明智?

美國狂印紙，而且債務沉重，我擔心美元有一日會爆煲，甚至失去世界既信任，到時港元跟著大瀉，港元資產會大冧。

另外，想再請教一下，我正拜讀閣下有關買樓的新書，書內提及現金不斷貶值，所以要買資產。我已手持四個物業，如果我仍有現金，不想再買物業

是否應該趁地產股, 收租股，房產基金便宜的時候買入，跟買樓有同樣效果? 地產股，收租股，房產基金有哪些現在值得買入?

龔成老師：

美元跌，港元都會跌，但這只是「貨幣」層面，不是「資產」層面。

其實在過往的數十年，我地的現金已經不斷貶值，全球所有貨幣都是，但你睇翻香港樓，數十年升值30倍，其中一個原因，就是港幣貶值，但物業本質價值不會因此而下跌，因此會令「港幣報價的樓價」上升。

其實，你應該建立一個平衡的組合，物業部分你已有一定比例，會有集中風險，之後要增加股票，建立平衡組合。其實《財務自由行》都有講述，股樓平衡策略，唔好太過集中。

買股票方面，你反而唔應該投資地產股，因為會太集中。你可投資盈富（2800）或其他股。

------------------------------------------------

Q17100：

請問1310和3868是否優質股

現價可以投資嗎?

龔成老師：

香港寬頻（1310）本質不差的，業務穩定，現金流強，不過就增長較弱，長遠亦唔見到有大的增長。優質度是有的。現價合理，可投資，但主力是收息，唔好對股價有太大期望。

信義能源（3868）有質素，佢主要於中國經營太陽能發電場業務，並向國家電網的當地附屬公司銷售電力。而佢派息高的，因為管理層話會用高派息政策。

投資價值都有，收息不差，但不能過度集中，因為佢業務都有風險的，現價合理，都可以投資。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。