【龔成問答信箱】（Q21681-Q21700）

Q21681：

老師，上完你整個課程，雖然我仍有d唔明，但我想信每天一點一滴去溫習你既notes，我會一步一步進步

我最感恩就係，依加個市上上落落，我都可以放心。因為你教識我，只要持有優質股，不用驚短暫股價既波動

1) 其實之前教既市賬率，市盈率，現金流，折現率...要計數既部份，係咪知下就得喇？

最重要係學會第6，7課既企業評估表，對嗎？

2) 你功課590話每股盈利增長係負數，即是代表什麼？

3) 老師，恕我能力偏弱，我唔識你評估表某些指標的意思，即是搵咩資料：

-生意與盈利保障程度高
-管理層理性
-總負債÷股東權益<100%
-負債的增長不過快

4) 老師，除了590外，還做了669，1211，發覺自己做多了一點，開始知d數據去邊度搵，熟習了一點。

但係指標好多都唔識做，唔能夠理性去分析，只主觀地表示 ✅或❎，甚至唔識做

5) 老師，想問下英磅走勢，你有何意見？

6) 老師，你課堂的第7堂內容非常豐富，如果分2堂講會好d

想問功課

7) 行業市盈率，照網站所示的寫下答案，還是搵返相近市值的股票公司作比較

如六福網站show 行業市盈率是35.47。

而其中 1856依波路 的PE 是710。另外，5間市值最大的股票（周大福，六福，周生生，冠城，力世紀），

當中係無盈利的，即無shows PE，係咪只計頭3間的PE? 還是照抄網頁的數字？

龔成老師︰

1) 唔係，其實這幾個是一些較主要的分析方法。除左用企業評估表中，去判定一間企業長線質素外。

我地都需要詐透過這些方法，去幫助我地計算合理值出來。因此，你係要比時間去了解的。但現金流折現法，會係較為複雜。初學者，可以先掌握其他幾個先。

2) 這個負數，係代表每股盈利由2019年去到2020年，出現66.4%的倒退。

3) 生意與盈利保障程度高︰好似一些公用股，市民基本上經濟好與壞，都要持續消費，故保障性會視為高。(六福0590︰算係一般)

管理層理性︰這個你可以睇佢市場策略，和多年年報。例如公司已經負債累累，市道又不好，還盲發展，可視為不理性。

又或者佢數年前，有些大計。但最終無疾而終，甚至朝令夕改，當經常有咁架情況，就算是不理性。(六福0590︰開店速度理性)

總負債÷股東權益<100%︰主要睇長線償債能力，你可以係BOC網站，財務比率個頁，就可以找到。我地一般要求，少於100%為之好(第7堂SLIDE45)。

但你留意翻，近年由於國際財報標準更改左。一些有較多租舖的業務，例如零售，好似六福這這類企業，我地會將個指標，調升為<150$%都接受。(六福0590︰34%)

負債的增長不過快︰你可以用過去多年數據作比較，如果負債增長較快，而負債相關的指標又明顯變差的話，你就要留意。(六福0590︰負債不多)

4) 這些係需要經驗去慢慢磨鍊出來，你預分析頭幾間，都係會有咁架情況。當你唔明，就睇翻NOTE，自己要多溫書，推論，之後真的都唔明就INBOX問我。

開頭係會較困難，但當你累積到一定經驗，你就會知道面對不同企業時，分析應該係點做。

5) 我對英磅無研究，比唔到實質意見你。但建議你除非有實際用途，否則唔好似貨幣，作為增值渠道。

在投資的角度，外匯不是最好的投資項目，因為說到尾，這些都只是一些貨幣，即是「政府借據」，貨幣中期會以週期的模式運作，但長期來說，都是貶值收場，因為貨幣只有「交易價值」，並無真正的財富價值。

而我地進行財富增值時，應該集中將資金投放在真正的資產，如物業、車位、優質股等。

6)要研究下。

7) 行業市盈率，我建議你找同業，最好係產品、質素、規模都相近的公司。你現時分析六福(0590)，你可以用周生生（0116）、謝瑞麟（0417）、周大福（1929）作參考。

依波路(1856)無論業務內容和規模，都不適合用作參考。加上過去幾年都虧損，令市盈率數據較異常，故不要將佢加入考慮之列。

你用水牛網，找到這幾間企業過去10年市盈率的4個中位數。再用這4間企業市盈率的上下限，去取出平均值，就是行業市盈率。

(即係4間企業的4個中位數，"最細"和"最大"的數字分別加起，再除以4，就是行業市盈率之上下限)

行業市盈率約為︰10 - 14倍

------------------------------------------------

Q21682：

你好，請問對退稅年金有咩評價？始終感覺上好似長時間鎖住舊錢 係唔係比較適合上左年紀而又無咩免稅額既人？

龔成老師︰

年金產品，主要係提供穏定現金流﹐較適合退休人士。

因為較年青人士，應先做好財富增值，這類產品就不太適合。

但同時，你都要睇翻佢節稅能力，同你將同一筆錢，去投資所得回報作比較。

因為投資回報始終有不確定性，而節稅金額和收取年金，係保證。若2者回報係接近，退稅年金就可以考慮。

------------------------------------------------

Q21683：

老師 你好，我手上現有1316 $13.7 有兩手, 1137 $16有1手 及圓通6123 $6.2有2手 請問可以繼續坐嗎?

龔成老師︰

持有一隻股票與否，唔好單單係睇中短期架帳面賺蝕，應從佢本質著手。就算而一刻帳面出現虧損，只要佢長線質素無變，照長線持有就可以。

你以上3隻股票，都係有質素，若你係年青至中年人士，係適合你長線持有。

耐世特（1316）本質中等，之前業績有點弱，但又唔算好差。你持貨唔算多，只係2手，照持有就可以。但因為質素始終不強，你預佢增長力之會係一般，不建議加。

香港電視（1137）業務有前景，但你要留意，佢有兩點都存有風險的。

第一，佢都會依靠人的因素，王維基成為了公司最值錢的資產，佢的想法好多，有生意頭腦。

第二，這企業現時搞網購，有增長力的，但同時存有一定的未知數。疫情過後的增長力會否減慢？故此股可投資，但不建議大注。

圓通速遞（6123）本身係一家以香港作為總部的國際貨運代理服務供應商，業務已擴展至多個國家，並在亞洲、荷蘭及北美設立了幾十個辦事處。

佢主要經營以下四項業務：空運及海運貨運代理服務、總銷售代理、配套及合約物流服務。

早前阿里巴巴（9988）入股增持，令股價大上大落，這的確會令企業有更多發展，前景正面，不過，估值方面已難。

因為這刻根本無法計算佢，之能賺多少錢，企業發展情況如果，只可以話好多不確定性，但股價就反映大部分利好因素。

因此，這股雖然有發展，但同樣股價上是有風險，相信之後的股價仍會波動。你現時只投資小注，係無問題，但要明白風險因素。

------------------------------------------------

Q21684：

Hello Sir, 我上年喺股市最旺盛嘅時間下入市, 本金80萬, 今年2月由賺20萬到今日我已經蝕咗本金30萬.

升唔識食糊, 倒跌至一個位係我覺得不能承受要止血我唯有放。而家我倉位得返50萬⋯⋯

9618 $330
1810 $25
992 $10
2269 $108
388 $515
1833 $135

請問以上股票係咪都係好股？我唔等呢筆錢用, 我其實可以長期持有, 但係長線持有係咪都要止蝕?

我知你比亞迪由$80跌落去你都冇放棄過...但係我冇這份信心

Sir, 我應唔應該放一些新經濟股轉買舊經濟股？例如1299, 5..etc

先謝謝你的解答

龔成老師︰

你同好多散戶一樣，都犯左個錯誤，就係覺得「買入價」﹐係一個神聖的指標。

記住，不要用自己的買入價作為何時沽出的指標，也不要以回本後沽貨作為策略，同時，更加不要抱著「賺了多少就沽貨」這心態去投資。

沽出是基於這股已偏貴，又或沒有前景，質素有問題，而絕非由買入價決定。

相反，若你分析該企業的係有前景，就算中短期股價波動，令你有賬面虧損，我地都唔應該沽。

你以上持股，都係有質素。但有個問題是，你太集中係潛力股類(除了聯想0992，其餘都係潛力股)。

佢雖然有增長潛力，同時風險都較高，不宜持有過多。

若你係較年青，潛力股可佔約5成，餘下應用以下平穏增長股。但若你投資經驗較淺，潛力股比重，要再調至3成以下。到你學到一定投資知識，才慢慢調高。

未來時間，你就要加大翻平穏增長股部份，令組合更平衡。

平穏增長股：盈富(2800)、金沙（1928）、恆基（0012）、港鐵（0066）、友邦(1299)、平安（2318）、粵海（0270）、領展（0823）、希慎（0014）、太古地產（1972）、長建(1038)

匯控(0005)只係收息股，無乜增長力，如果你係較年長或者好保守，都可以加入佢。

現貨要否沽出部份，去換碼至平穏增長股，要睇翻你組合大小。如果金額較多，你可以沽出部份換碼。

但若金額較細，可能每隻只有1,2手，咁你照持有就可以，用新資金去令組合慢慢回復平衡，就可以了。

------------------------------------------------

Q21685：

龔成老師你好，本人女性今年32歲, 穩定月入6萬3. 戶口僅保持10萬儲蓄應付不時之需.

以往旅遊購物月月清, 最近終想通生活目標, 學習緊斷捨離多儲錢增值自己

經朋友介紹認識你, 希望學習投資重新出發

背景:
資產:3年前8成按購入5M新樓
固定支出28k(供樓,家用,租金,保險)
日常支出希望維持7k

長遠目標:
希望可以5年內換樓

現在目標:
想學習穩定增加資本, 等待時機買dream house (10M)

本人BB班, 過往無投資經驗或概念, 完全唔識股票; 希望得到老師指點初部方向, 建立action plan 一步一步增加財富, 謝謝你。

龔成老師︰

首先，你要改變以往不好的理財習慣，你試下每日記低自己每項支出，再睇翻有無邊D係無必要，盡量空出多一點資金，去做投資增值。

你現時有明確目標，就係細屋換大屋。由於你已有一間物業，我地現在要做的，就是透過優質股，去幫你累積一筆資金，達成你換大屋目標。

你可以選擇一些「平穩增值股」+「潛力股」作投資目標。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄，另一半就先儲起架策略。

由於你投資知識不高，因此可較集中在平穩增長類股，至於潛力股，只宜小小注。此期間，你最好是努力提高投資知識，才慢慢增加翻潛力股比例。

餘下現金就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

到5年後，你可以慢慢套現股票，去實行換屋大計。

但緊記，我地財富組合，唔好偏重係個別資產類別，要平衡，樓和股票都要有。因此你換樓時，唔好股票盡沽，要留有一定數量，可以用來持續增值，才算理想。

------------------------------------------------

Q21686：

老師好，我而家最主要係糾結好唔好買樓，如果買嘅話幾時買，買咩價位嘅單位好。

今年30歲，月入9萬，和父母住。每月支出1萬至2萬。

現金儲蓄 210萬左右，強積金27萬

投資方面︰

大部分2800，有82萬左右

最近加多咗啲水桶一，加埋大概50萬左右（不過好似有啲心急咗應該分細注啲注入）

2800 - 平均價 23.2, 29000股
3188 - 平均價 60.1, 1000股
1810 - 平均價 24.9, 5200 股
1177 - 平均價 8.31 , 13000 股

788 - 平均價 1.12 , 80000 股
0027 - 平均價 65.2, 1000股
388 - 平均價 451, 100 股

遲啲諗住加埋美股 台積電。

而家亦都開始做緊月供：銀河，港交所，小米，中生 每隻5000蚊

買樓方面，唔急住自住，可能都係當投資+- 收租

自己一兩年後亦都有機會想搬出嚟租屋住或者住返買咗嘅appartment， 不過我就係度諗，買樓咁麻煩又要交差餉管理費，可能仲要比錢裝修。

到底對我嚟講呢個係唔係一個合適嘅投資呢? 如果係嘅話我咁嘅情況應該買咩類型嘅單位好呢? 定係留返啲錢遲啲買股票好?

龔成老師︰

我地投資，除左要選擇一些適合自己的優質資產外，組合的平衡性，同樣都係好重要。

若你無實際需要，我建議你先同家人同住，節省更多資金用作投資。若你無自住急切性，可先從投資角度去考慮，現時股市值博率相對樓市較高，加上你己有一間appartment，我地應先從股市這裡入手。

以你30歲計，投資應以增長為主。你現時持有股票，和月供計劃，大致上係可以。

但月供上，有少少偏重係潛力股(1810, 0388, 1177)，風險會稍高。未來可以加入一些好似盈富(2800)的平穏增長股，令組合更平衡。

另外，我建議你每月儲蓄最好可以做到，係收入一半，即係$45000。其中$25000作月供(加多一隻$5000平穏增長股)，$20000儲起。

平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、領展(0823)、希慎(0014)、太古地產(1972)

現時大市只在合理區，現金和股票，最好各一半。你現有資金可以用多少少入市(美股、台積電、港股都可以。)。餘下的資金，就等大跌市才動用。

至於物業，現時香港樓市係合理區頂部，投資價值未算好高。但若你此期間，發現一些有質素，又平宜的旬盤，你都可以考慮用現有資金入貨，之後放租。

因為，我地長線財富組合，唔可以偏晒係股票類，都要加入物業類，令組合更平衡健康。

但由於現時物業值博率不高，你可以集中股票先。而買邊類物業，我會建議初階投資者，先從住宅開始。

若資金較少，可以先入手較細單位(但最好都有300呎以上)，但必需要有質素和投資價值。你可以睇我本<5年買樓4步曲>，會對物業投資，有較完整解釋。

------------------------------------------------

Q21687：

龔老師你好，我30歲，剛在美股損失了很多，差不多70%身家！現持有︰

941*47蚊入
6618*160入
939*6蚊入

現打算月供2800 和6818

現金只餘下數萬元！

你覺得可以嗎？還有機會番身嗎

龔成老師︰

係而個時候，你唔好先諗翻身問題。你要先想清楚，美股出現重大損失的原因。

美股雖然近期係較波動，但不至於7成上落，所以你投資技巧和方法，一定係出左核心性的問題。

記住，我地買入一隻股票，就等同買入一間企業，一定要知道佢質素、行業前景、財務狀況等，才去考慮否投資。

當我地確認係值優質股後，我地會用平貴定入貨策略，並長線持有。而唔係做短炒，去賺差價。

更加唔好用衍生工具，或者槓桿，因為好難玩，個風險會好高。

你現時持有股票，都係質素。但中移動(0941)和建行(0939)只係收息股，增長力唔會太高，以你30歲計，有點保守，建議不要再加注。

至於月供方面，你可以投資「平穏增長股」和「潛力股」。你每月5成儲蓄，其餘先儲起，用一邊月供一邊儲蓄的策略。

你所選盈富(2800)係可以，但中國光大銀行（6818）都係收息股，唔係咁適合。

選股上，你可以投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、粵海(0270)、領展(0823)。

潛力股可選安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）。但佢地波動性和風險會較高，你要自己平衡。

你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

到你有一定投資經驗﹐潛力股比重可以相應調高，佔組合約3-5成。

餘下的另一半現金，我地就等機會，當大市出現較大回調，就加大力度掃貨，然後作長線投資。

最重要係，你要努力學習正確投資知識。只要你能運用正確投資知識和技巧，長線回報一定會唔錯。

而一刻你可以先做月供，但你再加大投資前，要先了解過往失利原因所在，才好再投入更多資金入市。

------------------------------------------------

Q21688：

龔sir你好，我是一個新手，想試吓買少少投票賺少少外快。我聽別人介紹買＂美團＂但不知從何入手，求指引

龔成老師︰

首先，你要清晰一個好重要的投資概念。我地投資股票，其實等同投資一間企業。希望透過其自然增長，以達至財富增值的目的。

所以，我地投資一定係長線(3-5年，甚至更長)，而唔係短期炒賣，去賺差價。

美團點評（3690）有潛力的，過往一直虧損，到近一年，開始有正現金流，這是一個實質的利好因素，因為之前一直在燒銀紙，現時初步見到成效，不過，估值的方法好虛無，因為現時的市盈率仍過百倍。

如果有利好消息，佢可以上好多，但如果估值修正，股價可太跌。

只可以話，潛力是有的，現價唔算平，之前明顯貴，之後回翻好少少，大約合理區頂，不過，一定不能大注。小小注，是較好的做法。

------------------------------------------------

Q21689：

龔成老師，你好，最近在facebook發現到你的專頁， 發現你回答讀者問題 提供的意見務實而有用， 非常欣賞 。希望你也可為我提供一些意見

本人32歲，未婚，與家人同住，沒有租樓壓力

月入22000, 擁有積蓄70萬。

一路以來都沒有意識到投資嘅重要，只係識儲錢擺銀行。 直至最近意識到錢擺銀行,遠追不到通脹。

直至上月開始學投資，由於好多嘢都唔識 同唔了解，所以暫時都係偏向保守 型投資。

1.)我放咗三十萬在銀行做咗個守約儲蓄保險計劃,年期8年

8年後可拎到38萬x，平均年利率3.6厘

請問老師你認為呢類型產品做得過嗎?定還是 只年期長回報少?

2.) 想放十萬 在股票市場,暫時手持:

中國移動一手
香港電訊一手
盈富基金一手
中國銀行3988一手
二南方納指500股
(啱啱投資就遇著跌市😅)

請問以上嘅組合可以嗎 或有冇更好的建議可供參考?

3.) 另外想投資15萬 到保險公司購買基金或 月供 盈富基金/voo

請問老師你會比較推薦哪一樣?

我希望呢15萬嘅投資係比作一個中長線嘅儲蓄

非常感激， 期待你回覆

龔成老師︰

1) 這類保險產品，係穏陣，但增長力好弱。持有太多，會拖慢左你財富增長力度。

你若真係想保守點，持有係可以，但金額上要作出平衡。

2) 當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時32歲去計，應以增值為主。中國移動(0941)、香港電訊(6823)、中行(3988)主要係收息，增長力唔高，不宜持有太多。現貨可持有，就不要再加注。

二南方納指(7266)係追蹤納指表現，納指升1%，佢會升2%。但相反，當納指回調，你架損失會係雙倍。這類槓桿ETF，我唔建你用，風險太高。

若你想投資納指，可以投資美股Invesco QQQ Trust(QQQ) ，是追蹤納斯達克100指數，會較適合你。

將來時間，你可以投資「平穏增長股」和「潛力股」。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

3) 3者都可以，但由於基金一般都有一定收費，長線拖低你回報。除非你肯定佢長線回報，會明顯優於大市，否則你投資盈富(2800)或VOO，會較為理想。

但留意，現時大市只係合理區，未到好平。資金一定唔可以盡用，而且係要分注咁，慢慢入貨。餘下資金，就等大跌市，才出手入平貨。

------------------------------------------------

Q21690：

Hello龔sir，我睇咗你本“股票勝經”，都成日睇你Facebook page嘅video同解答網友投資問題，穫益良多，多謝你！

我呢排都買咗少少“安碩恒生科技”3067嚟長線投資。想請教吓，你點睇“華夏恒生生科”3069，同3067相唔相似？係唔係長線投資嘅好選擇呢？

龔成老師︰

華夏恒生生科（3069）主要係追蹤恒生香港上市生物科技指數之表現，係一隻不錯的ETF，值得長線投資。

指數包含51隻成份股，當中有「藥品」、「⽣物技術」等公司。較為人熟識的，有藥明生物（2269）、京東健康（6618）、中生（1177）等等。

隨著人口老化和人均收入增加，對優質醫藥的需求只會有增無減。此股都有質素，可作長線投資。但你預佢會較波動，最好用月供模式儲貨，並長線。

但留意，華夏恒生生科（3069）和安碩恒生科技(3067)都係潛力股類，風險會較高。

假設你算係年青，佔5成左右好了。若你投資經驗較一般，比重就要再下調少少。如果你係接近退休之年，這類股票風險太高，就不太適合你了。

------------------------------------------------

Q21691：

龔成老師，我有個問題請教一下，我是澳門的，我打算一年半後結婚，現在和家人一起住，結婚後大機會和老婆家人住，

我比較偏向買鋪位，但可能要結婚後才夠錢，我是否應該在結婚前先用了青年首次置業先買個唐樓，到之後再用唐樓換鋪位？

結婚費用我工作一年半是完全足夠的，買唐樓首期現在是足夠，但鋪位就不足夠。

龔成老師︰

你都可以用這個方法，以資產追資產模式，去先買唐樓，再增值後轉買舖位。

至於澳門的青年首次置業計劃，其實我唔太清楚具體情況，細節位未必好清楚。

但首先，你要睇翻這唐樓是否有質素和投資價值，唔好純粹因為個價你可以承擔，就盲目出手，最緊要睇佢升值潛力和租金回報率，是否合理。

同時間，你要考慮你用左這個首置機會，你將來要自置自住居所時，就不能享受高成數優惠。

另外，投資舖位，對投資物業技巧要求較高。若你這方面經驗唔係太多，你就可能要提升這方面知識，才出手會較好。

若不買唐樓，你都可以考慮用優質股，去為置業資金增值，都係一個可行方法。

至於結婚資金，你就不要用來投資。因為只有1年半時間，用來投資增值，風險會太高，最多只宜作定期存款。

------------------------------------------------

Q21692：

龔成老師您好，今日想主要問問好多人心目中既股王 騰訊 (700HK)。

我有睇過有人問過700而龔成老師覺得依家係係合理區頂部。騰訊現時PE為29到，以historical 10年PE average 35到，我用個PE range 24.5-52.1黎睇，

依家已經俾過往既十年黎講相當較平而股價區會由500-1050所以覺得580已經相對比較便宜，所以想問問龔成老師咩睇法?

同埋龔成老師每次都基本上會叫人留有現金，係大跌市既市時候買入優質既股票。騰訊由高位770跌到依家580差唔多已經跌左25%。

想問下依家係唔係到龔成老師成日講既大跌市，而呢個係買入良機長線持有?

同時都想問下之前都係百度220蚊，姐係由高位跌左差唔多4成個陣買入打算長線持有。

因為百度仲下跌緊到依家差唔多175蚊，上次220蚊買入又合乎龔成老師” 大跌市”的睇法嗎?

謝謝回覆!

龔成老師︰

騰訊（0700）本身已經好大好大隻，要再高速增長並不容易，雖然手遊的長遠發展仍會不錯。

但要帶動這股倍升，相信並不容易。所以，我地唔可以完全參考過往數據，要因應現有情況，作出合理調節。

當你運用過往的市盈率作估值時，要留意翻環境與企業的情況有無改變，當一間企業有較高增長時，市場會比佢一個較高的市盈率，而騰訊5-10年前，仍處於好高增長狀態，到了今天，是中高增長狀態，估值當然會有調整。

此股相信依然有唔錯增長力，但唔會去到以前咁高。而價算係合理區頂，如果你去到平，你預跌多3-4成，才算平宜﹐故現時未稱得上係明顯買入良機。

百度（9888）有質素，有獨特性，長遠發展不差。

佢係全球最大的中文搜索引擎「百度」的營運商，係內地用家搜尋資訊主要對口，用戶規模突破10億，百度App日活潑用戶超過2億，多個指標都處中國第一。

百度在規模和質素上，一定係有。

但我地唔好單純用比較現價和上次高位距離，因為早前科網股被熱炒，不少相關股票，都因而被大幅推高。

我地應用翻企業本身價值，去衡量佢現時價格水平，是否合理。

佢雖然已跌到$18X，但唔算係平，只是合理區頂至略貴水平。但長線有增長力，若無貨，現價小注投資係可以。

------------------------------------------------

Q21693：

龔成老師，一直睇開你嘅理財資訊，本人34歲，持有現金50萬左右，偏向增長組合。因為最近股市比較波動，所以想問吓老師意見。現持有以下股票：

1810 200×23
6618 350×130
700 600×100
883 6000×9.3
1928 1200×32.9

請問咁嘅組合係唔係有啲雜亂無章？想再增持1810同700，亦想加入823、981同2382，但未知合理價位同時好似業務有重疊。多謝老師嘅時間

龔成老師︰

你組合唔算好亂，整體上都有質素，係合你長線持有。

中國海洋石油（0883），質素都算有，但不是最高質類別，佢對油價較為敏感，所以，如果長遠油價向上，佢都會增值的。

雖然佢都有一定的規模及質素，但卻不是最高質素的企業，這是由於佢地的產品自主力較弱。

石油是商品，當中沒有差異性，佢地要將石油賣出，只能跟國際油價，這令佢地處於被動狀態，沒有價格自主的能力，這令佢地的獨特性有限。

這類商品企業，都可投資，但就要明白不是最高質的企業，不宜持有太多。建議你沽少少，換至其他優質股。

中芯國際（0981）、舜宇光學科技（2382）、騰訊（0700）現價算係合理區頂部，小米(1810)則是合理區頂至略貴，領展(0823)算合理區中上部。

這些股票，若你無貨，而價可以首注。但有貨者，建議再等佢有明顯回調，才出手。

小米(1810)、舜宇光學科技（2382）和中芯國際（0981），行業性質上有重疊，加埋不要高於組合3成。

另外，你持股和目標股票，不少都係潛力股，佢雖然有增長潛力，同時風險都較高，不宜持有過多。

以你34歲計，潛力股可佔約5成，餘下應用以下平穏增長股。若你投資經驗較淺，潛力股比重，要再調至3成以下。到你學到一定投資知識，才慢慢調高。

未來時間，你就要加大翻平穏增長股部份，令組合更平衡。

現時大市在合理區，你50萬現金，可以用多10-20萬，以分注形式入市。餘下現金，我地就等大跌市機會，才出手掃平貨。

------------------------------------------------

Q21694：

龔成老師你好，我最近經常睇你fb專頁同書本，裡面學到唔少，宜家想付諸實行！

我宜家22.5歲，工作左兩年半，現時人工26k，每年大概會加1.5k，開支方面: 每月家用10k, 儲蓄保險每月供款2.5k （為期五年，已供了兩年）,

還有每月日常消費大概3k，剩下用作儲蓄/投資，我目標係二十五歲時有一個穩建成長及帶來現金流的投資組合，

而帶來嘅現金流則可用作再投資、儲蓄或支付日常開支, 例如每月交通費。

我本身對股票幾有興趣，炒左股一年半，雖然會自己研究下圖表、聽下財經節目，但係暫時都係輸錢，加上工作關係唔可以經常睇實個市，而且有時心理壓力都大，

因為有時啲股票好波動，可能幾日已經輸一兩成，所以我想改變下我現有嘅投資方法，以下係我嘅方案：

1. 自行睇位分注吸納科技ETF 3067, 剛在16.5入了第一注，每跌10%加注

2. 月供股票，每月供款金額約$10000
從以下每個板塊挑選一至兩隻月供，每隻供款金額約$1000-2000

- 穩定增長+收息為主 （第二個水桶）
消費板塊：1044 上月已開始供, 想加914可以嗎？
內房板塊 ： 813 or 2007 （二選一）
金融板塊：需要包含嗎？如需要，心儀2628 or 659

- 高增長 （第一個水桶）
生物醫藥板塊 ：1833 + (醫藥ETF?)
可再生能源、環保板塊: 未有特別心水（916？6865？ 586？可以嗎？）
物管板塊: 823 or 3319 or 1821 (三選一至二）
科技板塊：981，1810，2382，9988，9618 （五選二至三）

每隻股嘅供款金額應該會一樣（e.g大概每隻$1000）但係有些板塊會供多於一隻（例如科技、消費、醫療，因為我較睇好這些板塊或者裡頭潛力股較多）

所以7個板塊投資嘅金額唔會係平均14%（100÷7），反而有啲佔比會重啲，有啲則輕啲

想問這個投資方案可以嗎？

還有我現持有以下股票，打算將部分分批賣掉，套現出來的現金打算儲下來留在跌市時分注吸納或用在月供

6186 2000股 買入價 24
2318 1000股 買入價 50
6865 1000股 買入價 34.5
285 500股 買入價 43.85
7226 1000股 買入價 9.96

189 2000股 買入價 7.5
6601 1500股 買入價 9.2
6049 200股 買入價 69
6110 1000股 買入價 12.6

2333 500股 買入價 23
3319 250股 買入價 35.2
9888 50股 買入價210

想請教下你，謝謝

龔成老師︰

你過去的投資方法和理念，都唔係咁正確。

我地投資股票，其實等同投資一間企業。希望透過其自然增長，以達至財富增值的目的。

所以，我地投資一定係長線，而唔係短期炒賣，去賺差價。因此，我地唔會係用睇圖表，這類技術分析方法，更加唔需要成日睇住個市。

另外，當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時22.5歲去計，是財富增值的黃金時期。

你重點唔係要現金流去再投資，而係直接集中係一些較有增長力股票，去累積一筆財富。

"保險"只係理財中防守部份，買足夠保障就可以，增值可以留比優質資產(如優質股、物業等)去做。買太多，只會拖慢你財富增長力。

現時，你自行睇位分注吸納安碩恒生科技(3067) ，這方法可以。

月供策略上，你可以投資「平穏增長股」和「潛力股」。現時大市只在合理水平，除了月供外，每月都要留有一定資金，等大跌市才掃貨。

選股上，你上述板塊都可以。但內房負債較較高，不宜持有太多。而且一些不確定性較高的股票，都唔建議用來月供。

以下是一些較有質素的月供組合，你可以從中參考。

你可以投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、粵海(0270)、領展(0823)。

潛力股可選安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）。但佢地波動性和風險會較高，你要自己平衡。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

至於持股方面，如果有質素，我建議你長線持有。若你想留一些資金，捕捉大跌市機會，可以新資金來做。

怛留意，ＸＬ二南方恒科（7226）產品之投資目標為追踪恒生科技指數每日表現兩倍（２ｘ）的投資業績。

雖然我長遠認為，恆生科技指數正面，但中短期可以較波動，由於這基金有槓杆，就會令價格更加波動，其實有風險。

我會較建議投資無槓杆的恆生科指ETF（3067），始終較好。

東岳集團（0189）、滔搏（6110）質素中等，唔建議持有太多。

朝雲集團(6601)不確定較高，不宜持有太多。若現時只佔你組合一小部份，可以持有。

------------------------------------------------

Q21695：

老師，我這次的置業目標，計畫的使用的方法會較為特別，我想和你分享一下。

我即將39歲，月入＄29000, 已婚，有1小孩（即將6歲）。

我有1個物業（屯門兆康苑，已補地價），管理費＄700, 做按揭時是自住的，現時已出租（月租＄10500），按揭利率為H+1.23%, 2019年轉按了，轉按時銀行估價540萬，我借了6成，供款期為30年。此物業我在2010年買入，當時樓價115萬，做7成H按揭，一直收租至2015年結婚後自住。

我太太即將36歲，月入＄36000, 2019年購入屯門新樓御半山自住，樓價666萬，做6成按揭，按揭利率為H+1.23%, 30年供款，管理費＄1900.

現在我打算購置第3個物業作投資（名義上是我外父自住用途）。

我外父和外母現聯名持有1個私樓物業（深井碧堤半島）作自住（已完成供款），並持有1個該屋苑的私家車位（已完成供款）。

他們本身是舊制已退休的公務員，有長俸，外父（即將61歲）的長俸較多，有＄30000, 我跟他們談過我的想法，但要他們將現聯名持有的物業改為獨名持有（外母持有），然後當我看中物業時，我外父便可用首置名義（投資）入市

若他能通過壓測的話便可做到9成按揭（樓價800萬或以下），30年供款，供樓戶口要用他名下的，直至按揭總額還款至低於6成方可改為我名義的戶口供樓，當然，所有相關費用，包括供樓會由我承擔。又假設我外父的長俸過不到壓測，也可加我做擔保人，但便只能做8成揭揭。

這樣，我便能合法地做到我想做的。這個物業會由我打理一切，雖然名義上不是我的，但我太太是獨女，就算當我外父、外母百年歸老後，物業仍會被視為遺產留給我太太。

這第3個的物業（嘉輝花園）我會出租，實行以租養樓。

龔sir, 對於我的計畫，不知你會有何評價。

而我和我太太預計會60歲退休

龔成老師：

方向不是不可，但有幾點要講翻。

第一，你地（我以整個大家庭作單位），將會持有4個物業（連同你外父外母聯名那物業的計），在整個財富配置中，其實出現了集中風險。因為我地投資，其中「平衡」都是好重要的，加上香港物業增長力最高的年代過往，我預期往後10年、20年，將會是平穩增長年代。

因此，如果從財富配置的角度，投資其他項目的回報，以及對整體財富的平衡度，將會是最好的。

第二，當涉及的人物愈多，就愈容易出現問題，始終大家都會有不同意見，每個人都是獨立個體，因此，如果日後有甚麼問題出現，會對你地的關係有所影響。

第三，壓力測試，我都唔能夠講得好清楚，佢是否能過關，你最好問清楚先好進行。

第四，買樓有一個好關鍵因素，就是「供得起」原則，如果樓市及租金下跌，你地的防守力如何，如果有一段時期租不出，你地的資金是否頂得住？

至於大方向，其實可以，但你地要明白上述的風險，大家都有共識後，先可以進行。

至於嘉輝花園，可以的，有質素。

------------------------------------------------

Q21696：

老師。其實968呢隻股似唔似資源股，價格比市場影響。因為記得上堂老師不太建議投資呢啲股。

龔成老師：

有少少影響，因此在價格自主能力方面，未能去到好強。不過，我地要睇翻佢本身有無技術，如果擁有技術的話，其實佢能否以較低成本生產到產品。

同時，能生產到較高質的產品，這就會產生了產品價格的差異性，反映企業有質素。就能跳出課堂所課，無法加價的問題。

因此，你在分析時，要小心分析佢的技術，是否行得較前，以及往後的技術發展如何，這是決定企業有無質素的關鍵位。

------------------------------------------------

Q21697：

老師，多謝你回覆。其實我由細接觸好多活動都揾唔到自己真正興趣，直到大學期間睇左富爸爸本書改寫左我人生同觀念，就瘋狂睇其他理財投資書，開始決定長遠目標和寫成功日記，我可以樂此不疲連續睇書，就諗呢個係未我興趣但又害怕(當時中係由窮人思維變緊富人思維中)。

直到網上遇到你，你完完全全教我地點樣實行，開始接觸股票，睇你著作，呢個時侯我已經好肯定咁揾到自己興趣(想成為專業投資家)同人生價值，生活習慣，思維幾年內睇到自己變化好大，亦同身邊人分享理財重要性同推薦你網站。

見到佢地有改變 自己好滿足同開心。我想激動分享既係你地好偉大！啟蒙左我，來來回回咁多年我終於揾到自己目標，好開心！

我亦知自己揾唔到全職一時既低落，調整心態，唔會花時間諗(曬時間)，自己能力范圍亦會幫助其他人，相信你同其他作家都希望會見到呢個乘的效應！好啦！

知道阿SIR貴人時忙，我知我多野講，但太激動所以想同你分享，感謝你同其他作家，感恩遇到你地！

龔成老師：

其實你自己都好明白方向，只是一些短期問題。

你知唔知，決定一個人是否成功，不是睇佢順境，是睇佢逆境，如果一個人要對逆境，都能夠保持正確方向行，做出一些對自己長遠利好的決定，這類人成功，只是遲早的問題。

加油啦！

------------------------------------------------

Q21698：

呀sir 我現家重整左股票組合

9988@242 2手
285@47 3手
1810@26 5手
1211@178 1手

我草緊錢準備跌市加倉，但如果到時資金有限，我加倉次序應該點排好，比亞迪其實好想加先，因為得一手，唔該晒呀sir幫我解答

龔成老師：

你所持有的，都是有質素的股票，可以長線投資，無問題，最緊要唔好太著重短期股價上落。

另外，你出現了集中風險情況，同一系的公司，不能太多。

同埋，你整個組合都是潛力股，你應該加入平穩增長股，去平衡整個組合。

所以，你加倉時，應該加入其他。如果想加入上述的股，要跌更明顯下跌才出手。

------------------------------------------------

Q21699：

你好龔SIR，小弟剛睇完《股票勝經》，而家睇緊《50優質潛力股》，暫時只買了幾隻你比較常推薦的潛力股(2800, 0823, 0012, 1928, 3319, 3918)每隻目前都係入唔1-2手

部份都有輕微升幅，部份好似因為之前美國提及是否加息而出現跌市，所以有下跌，想請教一下點解只係討論美國加息與否，都會對股市咁大影響，小弟只了解過對樓宇按揭利息有影響，如果美國真係加息，是否會做成大跌市？

另外想問一隻股票，虎都(2399)早前見阿里巴巴同虎都旗下公司合作，這隻股票是否有潛力？但見最近股價一直大跌，這股值得投資嗎？

希望龔SIR可以提供意見，謝謝

龔成老師：

你上述持有的股票，都有質素的。

可能你會見到股價之前升，之後跌翻，但其實唔需要太過理會。

至於投資市場，一向是以一個「預期」的模式運作，即是說，不是發生了才反映，而是預期之後點發生。

美國加息，理論上會對樓價有影響，會下跌，因為供樓的成本增加左，但要睇到時加多少，如果加幅不大，根本無乜特別影響。

加上香港樓的供應不足，需求大，因此樓價下跌根本有限。

至於虎都（2399），擔心佢炒作多過實際，唔好比一D表面因素影響，要睇企業的實際發展。暫時唔太建議投資，風險高。

------------------------------------------------

Q21700：

龔sir, 你好，想請教一下我有2百萬想放入股市買入一些收息股來做被動收入，請問有什麼股票現在可買入/介紹？

而我會分開十期，每月買入二十萬元股票，這個方法好嗎，還是分開五期，每期四十萬較好？

我現年46歲，打銀行工，有供緊樓。想將這些被動收入補償供樓利息的支出和增值。

下列是而家月供股票

$2000 - 66 （平均價 42.77）
$4000 - 2800 （平均價 26.12）
$2000 - 1928 （平均價 32.59）

我仲想問吓，呢$2,000,000嘅投資應該買入幾多隻股票呢，五隻會唔會太多？我大概希望有 5% - 7% 嘅收入。謝謝

龔成老師：

你46歲，可投資平穩增長股，加收息股，你不用100%投資收息股，因為你這年齡仍有財富增長力。

我會建議你分10期，每次20萬，分12-18個月進行，慢慢分注投資，能將買入價平均，你可以投資5-10隻股票。

你可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

如果你能承受到風險，有些更有超過8%、10%的高息股，但股價就略有風險，要自己衡量，佐丹奴國際（0709）、中石化（0386）、互太紡織（1382）等（記住，股價略波動，只能小注）。

現時月供的，可以保持，長期進行就得。

要留意，你不能用盡所有現金，要同時留有部分資金，等機會投資。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q21181-Q21200）

Q21181：

我晤係太清楚：股息率 / 派息率/ 實際派幾多股息 係咪三樣晤同嘅嘢？

如2800.hk 盈富基金 每手1000股 股息率 2.74% 咁即係派幾錢股息？

龔成老師︰

股息率 = 每股派息 / 現時股價 [你現價計的投資金額，所收到的股息百分比]

派息率 = 每股派息 / 每股盈利 [集團會用多少比重的盈利，作為派息之用。]

實際派息 = 每股派息 X 你持有股數 [你實際落袋的錢]

假設，盈富基金(2800)每手500股、每股盈利$5、每股派息$3、現時股價30蚊

股息率 = 每股派息$3 / 現時股價$30 [即係10%派息率]

派息率 = 每股派息$3 / 每股盈利$5 [派息率係60%，即佢每有$1盈利，就會將其中$0.6以股息派發比股東。]

實際派息 = 每股派息$3 X 你持有股數$500 [假設，你收息動作，中間無其他費用成本要扣除，你就會有$1500股息落袋]

------------------------------------------------

Q21182：

龔sir 想請教
1833 （現價$99），
2382 （現價$180）,
66（現價$44.7）

現價屬於合理區頂部嗎？

這3隻的合理價區大概是多少？

龔成老師︰

平安好醫生（1833）、舜宇光學科技（2382）算在合理區頂部，而和港鐵（0066），大約在合理區中上部。

這些股票都有增長力和質素，適合年青至中年人士。

但你要留意，平安好醫生（1833）佢係中國領先的一站式醫療健康系統平台，透過「移動醫療+AI」，為每個家庭提供一位家庭醫生，為每個人提供一份電子健康檔案、一個健康管理計畫。

平安好醫生係中國互聯網醫療健康市場的先行者，以平均月活躍客戶，以及在線諮詢量計，是中國最大規模的互聯網醫療健康平台。

企業的業務有潛力，本身有優勢，大環境的配合，都成了這企業的機遇，前景正面，不過財務數據未算好理想。

雖然長遠的企業價值向上，但股價在中短期，可以十分波動，因為市場以「前景」作估值，故此變化必然很大。好難得出平貴的準確數，只能估估下，作參考。

因此，低風險者未必適合投資，若投資者考慮這股，亦不能大注投資，買入後就耐心長線持有，等待這企業改變整個行業的情況。你預佢會好波動，此股現價計，只宜小注。

------------------------------------------------

Q21183：

老師，有一事請教一下，以下係我嘅組合，請問現時我應該採取咩策略最好？

1）6690 1000股 31.16入
2）909 1000股 56.85入
3）6865 2000股 31.7入

4）968 2000股 19.1入
5）2333 2000股 26入
6）1357 5000股 3.9入

另外現金有約30萬左右。

龔成老師︰

你現時持有的組合，都係有增長力架股票有質素。若你係年青至中年人士，這組合適合你長線持有。

但你要留意翻，美圖公司（1357）佢雖然過左最差時期，現時正向好。

見佢財務數據改善，這企業仍有發展力，有長線投資價值。不過業務變化始終大，不建議佔比重太高。

現時大市只在合理水平，現金和持股最好係各佔一半。故你可以再入多少少，大約5-10萬，以分注形式去儲貨，會較好。

------------------------------------------------

Q21184：

老師 我啱啱月供股票，每月6000，供緊3328交通銀行同3690美團，意見如何？

謝謝老師

龔成老師︰

美團點評（3690）有潛力的，同時見佢增長都快，算是一隻有危又有機的股票。

由於佢不確定性偏高，作為月供股票，就未必適合。或者唔建議太大注，小注月供都得。

交通銀行（3328）本身質素不差，有一定的規模，在全球都有網絡，本身不會無質素的。

不過，這股增長力不算強，只是一隻收息股，增長力不強。月供係可以，此股會相對適合較年長和保守架投資人士。

建議你，未來組合唔好單單集中係1,2隻股票身上。我地要建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

------------------------------------------------

Q21185：

成老師，本人32歲，與女友同齡，兩人月入共7萬。上年購入現在自住的一間約800萬私樓，尚欠樓按380萬。買樓後的一年逐月建倉買入股票，現值60萬，現金還有30萬，股票倉如下：

1177 $7.1*5000
1317 $2.29*24000
0823 $59*500
0016 $91*500
0012 $29.2*1000

3988 $2.62*15000
0011 $117*300
0636 $24.2*1000
0941 $46.9*1000
0788 $1.25*40000

0857 $4.33*16000
0178 $2.33*22000
6618 $70.6*50
2238 $7.1*4000
3067 $17.67*200

1）請問股票組合買入價如何？適合我的年紀嗎？需要精簡一點去集中投資嗎？

2）我的策略是在每個月買入特價的股票，結果存了十多隻股票，請問如何抉擇集中投資還是分散投資？

3）請問為何中人壽比友邦及平保，市值差得這麼遠？前者是長期落後，後者節節上升

4）現時還可以投資車位嗎？

多謝閣下寶貴時間解答

龔成老師︰

1） 以你現時32歲計，應以增長為主要目標。中行（3988）、中國移動（0941）都係收息股，增長力不高，唔適合你。

中石油（0857）質素中等，京東健康（6618）則波動性較高，2者都不宜持貨過多。另外，你組合最好維持10隻以內，會較理想。

2） 我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

簡單咁講，就係分散不同行業的優質股，當中關聯性較少，就可以做到分散風險。

3） 市值只係一種參考，一隻股票值唔值得投資，都係要睇佢本身質素而定。

中人壽（2628）質素係有，但有下滑架情況，已經無以往咁優質。所以，市場比佢架估值都低左，因而你會見倒平安（2318）一直升，但中人壽（2628）就停滯不前。

中人壽整體質素算係中等，不宜持有太多。

4） 現時車位租金回報率唔好高，約只有3%，吸引力只屬一般。

------------------------------------------------

Q21186：

成SIR你好! 我都係80後, 但一直都無咩投資, 係十幾年前買過幾十蚊港交所, 就唔知點解放左, 就到而家都無再玩股票, 一直都抱住得過且過生活, 勁hea!

但這數月開始追你的FB和 睇你幫網友解答的無數問題, 就開始覺得自己要開始認真去投資, 就算我投資廿年, 我都未到退休年齡, 如果投資正確, 我都應該可以好舒服咁退休,什至提早退休再去享受世界! 希望而家先投資唔會太遲啦~

1. 我想請教一下, 以下的投資方案得唔得?
- 每月供$3000盈富2800
- 現有200股 3067（@17.5）, 計劃每隔兩三個月買一手
- 現有港幣約12萬, 外幣約12萬.
想用約8萬港幣買一手0001長和 + 1手1830必瘦站 + 1手1833平安好醫生 + 1手2382舜宇光學

2. 必瘦站, 平安好醫生, 舜宇光學 現價是否太貴?

3. 長和早幾年有16X, 近幾年維持$50-$60左右, 成SIR你認為佢有無機會再升返上去?

4. 現有1手 1972太古地產, 值唔值得之後再慢慢入多幾手? 定分散買其他例如港燈?

5. 同仁堂, 中藥龍頭咁滯, 但股價持續十幾年都係$4-$5, 現在買唔買得過?
感謝成SIR!

龔成老師︰

由港交所（0388）這個例子，你可以睇到，其實只要長線持有一隻優質股，個平均回報係會好唔錯。

你是一位80年人士，都算係偏年青，只要正確方法去做增值，依然會有唔錯架效果。

1） 以你年紀計，這些有增長力的股票，都係適合的。

外幣方面，如果無實際用途，最好換回港幣，用來投資增值。

現時大市算係合理水平，股票和現金最好各佔一半。所以，每月儲蓄唔好盡用，要留有部份。同時現有資金，都可以跟這個50/50比例，慢慢進行配置。

2） 舜宇光學（2382）算係合理區頂，至略貴。而必瘦站（1830）要回多1,2成，才算較合理。

至於，平安好醫生（1833）長遠有發展力。

佢係中國領先的一站式醫療健康系統平台，透過「移動醫療+AI」，為每個家庭提供一位家庭醫生，為每個人提供一份電子健康檔案、一個健康管理計畫。

平安好醫生係中國互聯網醫療健康市場的先行者，以平均月活躍客戶，以及在線諮詢量計，是中國最大規模的互聯網醫療健康平台。

企業的業務有潛力，本身有優勢，大環境的配合，都成了這企業的機遇，前景正面，不過財務數據未算好理想。

雖然長遠的企業價值向上，但股價在中短期，可以十分波動，因為市場以「前景」作估值，故此變化必然很大。好難得出平貴的準確數，只能估估下，作參考。

因此，低風險者未必適合投資，若投資者考慮這股，亦不能大注投資，買入後就耐心長線持有，等待這企業改變整個行業的情況，現價算合理區頂。但好波動，你直接入貨的話，只能小注，或者用月供儲貨都可以。

3） 長和（0001）有質素的，由於歐洲弱，相信佢中短期仍會較一般，不過，長遠會慢慢好轉。

但這股並不是高增長，收息及少少增長力。要回到這個水平，可能要較長時間。此股唔係大升類別，但作為平穏增長股，係一個唔錯架選擇，現價合理，可分注。

4） 太古地產（1972）都有質素的，算係平穏增長類別，都適合你。現價合理，有長遠投資價值。

而港燈（2638）就係純收息股，增長力唔會太高， 以你年紀，唔建議持有太多。

5） 同仁堂科技（1666）仍有質素的，不過增長力比過往略減。

佢係一家集產供銷一體的高科技現代化中藥企業，通過了澳大利亞ＴＧＡ和國家ＧＭＰ認證，企業通過了質量體系認證。

佢生產六味地黃丸、感冒清熱顆粒、牛黃解毒片等著名產品。

過往生意不差，不過增長力有所減少，由於近年賺錢能力減左，股價所以向下。其實長遠仍有發展的，但就唔值得投資太大注，當小注等佢回勇不是不可。

------------------------------------------------

Q21187：

你好，龔成老師，有個好消息最近已搵到新工作，呢段時間一直睇你之前嘅書同埋文章 ，就係想準備有穩定工作之後進行適當投資。

所以希望先儲錢，然後進行月供股票。我現時每個月大概一萬9千，扣除其他洗費一個月大概可以儲起4000-5000。

而家計劃希望每月可以多兩萬蚊投資進帳。咁我分析嘅計劃如下,，希望老師可以畀啲意見：

盈富（2800） $2000
比亞迪（01211）或 舜宇光學（02382）
銀娛（00027） 或港鐵 ， 會選擇其中兩個各$1500

之後如果有多餘資金，會想入手福壽園（01448）
唔知以上嘅計劃係咪正確適合我現在的狀況

而我亦會選擇證券行因為收費較低， 因為我亦相信香港嘅監管應該唔錯。
多謝老師嘅時間！

龔成老師︰

恭喜你! 在投資和新工作上，都要保持努力。

你以上投資選股都可以，若你係年青至中年人士，這個組合和配置係合適的。

但我地一般合理投資回報，係講緊每年10-15%。若你希望以現時投入，獲得每月額外2萬投資進帳，好難做到。建議你按部就班，用優質股慢慢為你財富增值。

你選股方面，比亞迪（1211）現價偏貴，你最好等佢回到$120才月供，或者可以用ＧＸ中國電車基金（2845）暫時代替。

至於銀娛（0027）或港鐵（0066）都可考慮，你按自己喜好選就得。

而福壽園（1448），你的策略可以，但由於現價唔算平，所以要控制注碼，同時都要留有一定的現金。

至於用銀行定證券行，正如你所講，香港監管係唔錯，2者都可以。主要考慮翻邊個方便你自已，和收費問題就得。

------------------------------------------------

Q21188：

成哥，你好！我想問下 1）長城汽車，2）中國航空，3）農夫山泉前景如何。

1）28蚊入左之後係咁插，最低見過19.x，真係心都離一離，係近排炒消息升返D, 你認為
我應該止蝕定繼續長揸？

2）買佢係因為等全球復飛嘅時候可以爆升，你認為合理嗎？ （買入價6.65～6.7）

3）見佢係高位6x跌到落黎43.4就入左，開初都有賺，但放左業績之後就跌到落38.x，你認為
（半年內）有冇機會上返買入價？
萬分感謝

龔成老師︰

1） 首先，當股價下跌，你一定要了解當中的原因。基本上，股價中短期上落好正常。若無一些影響企業核心質素，咁就無問題。

長城汽車（2333）有質素的，業務都不差，不過，過往的增長力不算好強，長遠業務發展雖然正面，但未必是潛力型。這股都有長線投資價值，可以持有。

2） 中國航空工業國際（0232）主要主要從事通用航空飛機活塞發動機及備件的設計、開發及生產、以及提供活塞發動機的售後市場服務及支援。

航空業復甦，的確會對相關企業正面影響。但我地投資與否，除左睇行業本身狀況，都要對企業本身質素，進行考量。

睇翻集團過去數年﹐多年出現虧損，可見佢估值較差，唔係單純因為疫情所致。暫時唔見有明顯投資價值，故不建議你投資此股。

3） 中短期架股價走勢，無人知。我地持唔持有一隻股票，應從長線投資角度去考慮。

農夫山泉（9633）有質素的。

是中國包裝飲用水及飲料的龍頭企業，旗下品牌包括農夫山泉、東方樹葉、尖叫等。佢係中國擁有10個區域取水許可證，並在其周邊建立生產基地。

其產品覆蓋包裝飲用水、茶飲料、功能飲料及果汁飲料等類別。根據弗若斯特沙利文報告，2012年至2019年間，連續八年保持中國包裝飲用水市場佔有率第一的領導地位。

業務上，的確有吸引力的，不過，我一向都新股半新股都無興趣，因為真實面要慢慢先見到。此股可投資，但只建議小注，同時你要明白當中的風險。

由於有一定的品牌價值，因此企業質素與發展正面，財務數據不差，生意與盈利都有理想增長，不過上市不久，股價較波動，同時上市前數據可能執靚過，因此要注意風險度。

這股適合長線的，只要佔你組合唔係好多，就無問題。

------------------------------------------------

Q21189：

老師，你好！

１）我之前 3898 分別係$39.5 & $44.5 高追, 我相信佢長遠有價值,, 但我唔識計佢值幾多,佢一直都跌,請問你有咩建議可以卑我呢?

２）有長輩係早好多年前幾乎用所以存款去買 0005,買入價＄130, 一直以股息過活

但近年股息股價都不理想，甚至無股息，生活拮据，但佢不懂股票，覺得股價同當年差太遠不願放出，即使放又唔知點做， 買返咩類型股票

請問老師有咩建議可以卑到佢呢?
感謝老師的時間！！

龔成老師︰

1） 中車時代電氣（3898）係中國鐵路車載電氣系統供應商及集成商。

佢的產品可分為兩大類：（１）車載電氣系統：包括列車牽引變流器、輔助供電設備與控制系統、列車行車安全裝備。（２）電氣元件：包括電力半導體元件、傳感器及其他相關產品。

佢主要客戶為鐵道部及其地方鐵路局、中國主機廠及城軌運營商。

佢向主機廠及城軌運營商提供新造機車車輛的車載電氣系統，以及向鐵道部的地方鐵路局及城軌運營商提供作維修及更替用途的車載電氣系統。

業務不是無質素，但增長力一般是較大的問題，企業價值無乜向上，盈利亦很普通。

整體質素只是中等，增長力不強。若你持貨不多，可照長線持有。但持貨比較多的話，最好沽出部份，換碼至其他優質股，咁會較好。

（2）至於你長輩方面，其實睇翻匯控（0005）賺錢能力與增長力比過往年代弱左，但又未去到完全無質素。銀行業的賺錢能力比過往減左，因此不能視為增長股，但當經濟好轉，始終都會有錢賺，因此都有投資價值。

用佢作為收息股係可以，相信派息方面，會慢慢回復較正常水平。由於你長輩目標係收息，故唔需要太在意個股價波動，長線持有就可以。

但成個收息組合，唔可以只有單一隻股票，咁會太高風險。要做一個全面組合，包括不同行業架優質收息股，才算係理想。

所以，如果佢太過集中在匯豐一隻股票，可以放部分轉其他，如果佢唔想這刻賣，可以等匯豐股價過多1年，經濟好翻D，銀行股經營環境好翻D，到時股價上翻D時，轉其他股。

你可以建議佢，建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）或收息基金（3110）都可以。

若能承受到風險，有些更有超過8%、10%的高息股，但股價就略有風險，要自行衡量，佐丹奴國際（0709）、中石化（0386）、互太紡織（1382）等（記住，股價略波動，只能小注）。

但要留意，現時股價只是合理區，未到平宜，因此買入時宜分注，同時不能用盡現金。

------------------------------------------------

Q21190：

你好龔sir，我本身入左3333恆大物業18蚊，仲有6993藍月亮16.8，因為都跌緊請問可以等佢升返？

定止蝕換馬？感謝！

龔成老師：

中國恒大（3333）業務本身不算差，但中央有時會出打擊樓市政策，加上佢本身負債極高（這是最大問題，風險太高），相信會對佢有一定的影響。

你預佢中短期都會波動，但如果你只是小注持有，勉強可以，但都要明白風險。如果大注宜減。

至於藍月亮（6993）有質素的。

佢有「中國P&G」之稱，成立於1992年，擁有衣物清潔護理、個人清潔護理和家居清潔護理三大系列共73個品種的產品。

佢係中國洗衣液有龍頭地位，加上毛利率高，賺錢能力強。睇翻佢之前的資料，以零售額計算，藍月亮在洗衣液市場、濃縮洗衣液市場及洗手液市場的市佔率均為第一，分別為24%、28%、17%。

整體有質素與發展力，不過現價唔平，仍略貴，風險比恆大低，但同樣不建議太大注，如果你小注可守。

------------------------------------------------

Q21191：

請問老師6993藍月亮，302中手遊，你點睇呢2隻股？

書本里面提及賭業是穩賺行業，1383太陽城有投資價值嗎？

龔成老師：

藍月亮（6993）有質素的。

佢有「中國P&G」之稱，成立於1992年，擁有衣物清潔護理、個人清潔護理和家居清潔護理三大系列共73個品種的產品。

佢係中國洗衣液有龍頭地位，加上毛利率高，賺錢能力強。睇翻佢之前的資料，以零售額計算，藍月亮在洗衣液市場、濃縮洗衣液市場及洗手液市場的市佔率均為第一，分別為24%、28%、17%。

整體有質素與發展力，不過現價唔平，之前貴，現價算是合理區頂，你長線持有可以。

中手游（0302）主要於中國從事手遊發行及遊戲開發業務。佢提供多種類型的手遊，包括ＣＣＧ（可收集卡牌遊戲）、ＲＰＧ（角色扮演遊戲）、ＭＭＯＲＰＧ（大型多人網絡角色扮演遊戲）、ＳＬＧ（模擬遊戲）等。

過往生意不差，有持續的生意與盈利增長，財務數據初步正面。

不過，上市年期不算長，這會令財務數據代表性較低，同時，行業業務波動，不確定性大，都令這股造成風險。這股如果你投資不過多，小注投資都可以，始終不是無質素。

至於太陽城集團（1383）主要在中國從事物業開發、物業租賃及管理、酒店與綜合度假村管理及顧問服務、銷售旅遊相關產品以及提供旅遊代理服務。

開賭的確是好賺，但不一定是每個範疇及每間公司都好睇，持有賭牌的當然好賺，例如金沙（1928）、銀娛（0027）。

太陽城集團，當睇翻佢過往經營數據，當澳門賭場人人賺錢（疫情前時代），太陽城卻出現虧損！反映經營方面有問題，因此，這股唔建議投資。

------------------------------------------------

Q21192：

老師你好，從上年剛疫情開始看到你fb，決心做好理財及做一些兼職額外增加收入，終於儲到人生的第一個十萬！！

很感謝你，雖然我知道十萬不是很多，但對於過往月光族的我來說，已經進步了很多 （講緊2020年因為疫情，我身處的美容業是重災區，我上年只返了大概半年工，停業期間是無薪假的）

有很多問題想問你：

1）這十萬，我該如何部署投資？ 已經做了月供股票每月3000

$1000 2800
$1000 1810
$1000 1211

2）其實我還有一些銀行貸款的，每月供$1500左右，尚餘本金$28000 ，我應該提早還款還是將錢投入股票，增值後再還款？

3）我現時的工作是美容顧問，收入不穩定，有時可以月入三萬，條數差時可以只有萬幾人工，而且做得不是很開心，可能我天生不是很進取的人，不會太chur客，加上上司不是很支持我，有時都感到很大壓力。

我的目標是成為營養師，所以一直都在進修中，現時亦攻讀了online degree ，這是我一直會前進的目標。

那麼老師你認為我應該繼續留在現有的工作，為了有時賺多點？ 還是退一步，找其他較穩定的工作，或者做回美容師，然後一路讀書一路有穩定收入較好？

抱歉老師，問題比較多
謝謝你

龔成老師：

先恭喜你！第一個$10萬好重要的，之後的財富就會繼續增長，你已經方向正確，保持進行就得。

1）現時月供的，都有質素，可以保持，長期進行就得。但要留意，你現時月供的2隻，都是潛力類別，這樣會較高風險，因此，建議你之後，加大其他類別的月供，以平衡組合。

2）如果銀行貸款的利息較高，就應該先還錢，減少利息上的開支。

3）你長遠你營養師是大方向，這段時間，就保持工作，加上讀online degree，如果你支出不是好大，其實可以轉去同營養師有關的職業，可能這刻未有專業資格而人工較低，但對你長遠發展可能更加有利，預早認識相關行業。

記住，所以野都是為長遠目標而行的，你用5年、10年這方向想想，就知這刻應該做甚麼。

------------------------------------------------

Q21193：

還想問，當你比亞廸由88跌到12時，你怎知道 或 為何有信心這股一定會升回88以上？

因為你看公司每年毛利純利，股東資金回報等，知道盈利是沒問題？

龔成老師：

所謂的股價，是這刻二手市場的成交價，而我的著眼點，不是當時的$12，而是比亞迪（1211）這企業長遠的發展，這類潛力企業，一定有高有低，有時研發及產品出問題。

但我地要從長遠的角度分析，視點是5年、10年，而我分析到這企業會在行業中行前，而這行業普及時遲早的事，即是佢的發展更強大，都是遲早的事，這就是我當時的分析點。

分析潛力企業，往往不是分析當刻的財務數據，而是研發、將來的市場情況等。

------------------------------------------------

Q21194：

老師，看完你書後想看看賭業股個價抵唔抵入，看能否在疫後受惠，你怎看？

但問題幾間大賭股都沒了市盈率看，為什麼？

龔成老師：

賭業當然是有質素的行業，長遠一定有賺錢，不過現時已比上年疫情時升了唔少，上年時平，現時是合理，銀娛（0027）、金沙（1928），現價合理區中上部。

至於你話市盈率，因為佢地上年度虧損。

而我地分析時，不止要分析一年數據，要分析多年，要分析「正常經營環境」下的營運情況、財務數據。

------------------------------------------------

Q21195：

我今年43歲，十年前移民加拿大，現在政府工作，有兩個小朋友！現在每月儲$500加幣，其中$400放在穩定mutual fund，$100放在股票戶口，我想問你點睇well health? 可否月供嗎？

我想問你會唔會開網上課程？

龔成老師：

Well Health有潛力的，見到李嘉誠都有入股。

佢通過人工智能和大數據等科技手段提高診所的效率，致力于將加拿大極度分散的初級醫療市場帶入數字時代。

Well Health能够為診所提供它們無法獨立承擔成本的軟件工具，這能提高它們的運營效率，進而改善結果，以及縮短患者的等待時間。

醫生可以加入公司不斷擴張的診所網絡，合作方式可以是簽署收入分成協議，或者是直接爲該公司的電子病歷軟件支付服務費。

相信長遠有發展力，不過我唔清楚現時估值，你要自行控制注碼，平衡風險。

我最近同天窗出版社，合作開辦左一個網上課程，題目是關於「資產配置」的，即是講述各種資產與投資工具的特性、投資價值、在財富組合中的角色，至於股票內容就唔算多。你有興趣可睇睇：

http://bit.ly/3pP252j

課程按「人生階段」、「財富累積」、「資產特徵」設計，更有給年輕人、已婚人士、退休人士的精明理財建議。

完成課程後，你會學到：

✓財富系統概念，不再被炒差價的框框束縛；
✓股票、基金、債券、的士牌等資產的運用和買賣技巧；
✓懂得分辨資產質素和平貴，在最合適的時機買賣；
✓如何以最低的價錢，買到最具升值潛力的物業
✓致富3部曲，如何從當下這刻開始啟動！

至於股票班，由於內容太重要，只有實體班，唔會開網上課程。

因為之前實體股票班試過比人偷拍，之後放左上網賣，最後要搞到報海關先處理到，好煩。所以，網上類的教學，都好擔心有偷拍問題，風險太高，因為好多課堂內容，都唔想太公開，只想自己學生知，所以暫時都唔會搞。

------------------------------------------------

Q21196：

你好，請問保險股前景點樣?
2318同2628邊隻較好?
謝謝!

龔成老師：

中國平安（2318）會較中國人壽（2628）好。

中國人壽並不是無質素，不過增長力唔強。同埋企業的賺錢能力不及過往年代。

相信這股唔會再大跌，但要佢大升都不易，長線持有價值都算有，但暫時唔好對股價有太大期望。

反而中國平安近年做得更好，佢有質素，佢有規模，有品牌，近年的發展都不差，不過，股價有時會有少少波動，這主要受投資市場表現影響。

這股有長線投資價值，是平穩增長型，分注投資都可以。

------------------------------------------------

Q21197：

老師，之前睇左你在牛牛節目嘅分享

跟你嘅posts大概4-5年, 知道你揸1211好耐, 但今次至知原來10年, 仲今次至知原來1211試過10幾元升上80幾元又跌番10幾元你都無放。

我21元入吉利,本已經高位跌落來至入, 入左㸃知仲跌, 無走學你話長揸, 升上30幾, 好開心, 㸃知最近跌低去番19, 又非常後悔...覺得應該高位放, 低位再入過...

其實. ...長揸, 吾放, 到想掉動大筆資金來買樓時, 又適逢股價跌番低位就真係似乎錯過良機？？
請龔sir有空指教吓

龔成老師：

你要克服心理問題，你現時的心態，仍停留在一般散戶的心態，如果你想在股市真正贏錢，就要學投資大師，不要學散戶。

投資大師只著重「企業」，不著重當刻股價，你現時被當刻股價上落影響，明顯已經錯左！

好多人事後孔明，以為能捕捉過往股價，但真的能捉到嗎？其實好難好難！

吉利（0175）有質素的，你長線就得。

但要提翻你，我地投資股票，一定要長線，5年是經常事，最少都3年，如果你想快速滾大買樓，就要調整一下心態。

------------------------------------------------

Q21198：

龔sir！！又係我啦！上年我辭左職多謝過你開拓左我對理財既思維，我依家每日都覺得好開心好有動力！

上年23歲生日前我立左目標要搵到第一個一百萬，自己將副業變左全職打理後有一排壓力都真係好大，開支大左但收入好似無咩增長。身邊朋友又話女仔咁辛苦做咩，搵個好老公咪得。

雖然灰左一段時間，但總算跨過左個難關，的確人既潛能係要逼既。雖然我唔反對我朋友所講伴侶重要性，但我覺得一件事還一件事，投資自己先係最重要。

我一直同屋企人住係公屋，我都曾經好自卑，屋企人從不理財，係月光族，依家兩老退休了都無好多積蓄。

上過你課程，睇過你書我反而「強逼」番父母每個月係我比既家用裡面扣除部分左月供：$3000盈富$2000港鐵$2000領展。仲買左本簿仔比佢地每日寫低用左幾多錢，交功課比我睇，佢地話好得意好開心每個月真係洗少左好多

最後我地離開左公屋呀，雖然我只係買左一間舊樓既細單位，但勝在上手業主全新裝修過節省唔少裝修錢。我相信呢個只係其中一個milestone，我會繼續努力希望真係5年內買到我既dream house。

要贏！

多謝既說話希望你唔好嫌多，因為你，當然我自己都有努力啦，啟蒙左我，我相信自己未來會更好的！老師，你也會的，謝謝你

龔成老師：

我相信尋找自己的夢想、事業發展，與找另一半，是無衝突的。

同時，心態上唔應該有「依靠別人，我不想努力了」的心態，我地做好自己最重要，其他人往往只是輔助。

加油！你的方向正確，同時心態很好，你23歲，已經有這種心態，可以預計你將來有可定的成就。

記住，成功的路不是直線，當中一定有相當的困難，但只要你保持正面心態，就一定能成功。

恭喜你成功置業，我會等你更多好消息，加油！

------------------------------------------------

Q21199：

你好！如果睇好電動車板塊，請問應該買比亞迪定2845 ETF 較好？咩嘢價位適宜買入？

另外，中銀香港近日績後股價報跌，請問是否現價可買入定選中國銀行息率較高？

龔成老師：

GX中國電車（2845），這基金的目標是追蹤Solactive中國電動車指數NTR「相關指數」表現緊密相關的投資回報。

持股中最重就係比亞迪A股（002594），以及與中國電動車產業有關的股票，中國因為能源問題，長遠一定要發展電動車，這是大方向，故此股有一定投資價值。

由於近期不少車股被炒起，此股現價略貴。無貨可以現時入少少，到有明顯回調才再慢慢加注。

潛力度是有的，但會比較波動，如投資宜慢慢分注，可長線。

中銀香港（2388）係本地銀行股裡面，是較有質素的一隻，有長線投資價值。唔需要太理會中短期情況。

不過，整個銀行業的賺錢模式已有減弱，無以前咁好賺，之後主力是收息及平穩增長模式。現價合理。

中銀香港有增長力，而中行（3988）就集中收息，要睇你的投資目標。

------------------------------------------------

Q21200：

如果我現在差不多30歲 是否該選擇3319？另外請問823和3319是否都屬同一類 是物管？

現在科技股很多都下跌 是否應該開始物色優質科技鼓？謝謝

龔成老師：

雅生活服務（3319）適合30歲這年齡人士投資的，佢本質不錯，佢無論在業務本質、規模、品牌、財務數據、前景，都是理想的，反映這企業有一定的質素。

加上這企業的背景因素，以及行業的發展，相信這企業的前景不差，有長線投資的價值。

整體是有長線投資價值的。現價合理區中上部，不過股價都會有時出現波動，投資宜分注進行。

佢是物業管理，領展（0823）是收租，不同類的。

我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟，不同行業，不用類股都要有。

而同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q18561-Q18580）

Q18561：

老師，我係進階班學生，想問下隻京東健康如何以數據分析呢?

網上資料如2019年市銷率，京東健康目標估值1560億港元，市銷率14.4倍；阿里健康25.8倍；平安好醫生22.3倍。所以數字上京東賺錢能力較強?

而營業額阿里又高過平安好醫生。我想知點解你會覺得平安好醫生較平衡。因為數據上佢又似三個中表現最差。

但如課堂你提過平安好醫生係市場先行者，同時擁有大數據庫, 這刻未賺錢因為支出資金投放於業務發展，所以有爆發潛力？請問分析時重點你會放在那幾點呢？謝謝

龔成老師：

其實要正式分析招股書，就有更多資料可以睇到，財務數據，發展等。

你利用市銷率去比較，都是其中一個估值的方向，不過，如果上述數字假設能反映出這3間公司的合理價值，反而代表市認為場京東健康賺錢能力及增長力，未必及另外兩間公司。

市銷率數字較低，的確代表較平，但我地分析時，要思考「為甚麼市場覺得佢比另外兩間公司較平？」

因此，一定要重點分析佢的業務，比較大家的經營模式那個較賺錢，以及增長力那個較強，如果大家都是接近，而京東健康較平，就反映佢的投資值博率較高。

至於你比較營業額，見到阿里（0241）又高過平安好醫生（1833），其實在這個行業，最重要是「長遠的潛力」，因為那間公司的業務較好，最好長遠吸引客戶，就能成為贏家，而這刻的數據未必是最重點。

在業務上整體來說，平安好醫生會較強的，當然，佢同阿里都會成為勝利者，只是平安各方較平衡。

------------------------------------------------

Q18562：

你好龔老師。想問吓：

1. 而家我月供港鐵金沙各二千同埋中生小米各三千都差唔多有兩年，而家個市升到咁就唔需要停一停留返多啲現金等機會呢？

2. 最近買左1337出既電競滑鼠要成千蚊，佢算唔算一間可以播種既公司呢？

3. 其實你做左股票分析咁耐，講真有冇人叫你收聲？

謝謝

龔成老師：

1）有些升得較多的，已經升過了合理區的，如小米（1810）、中生（1177），你可以減金額或停一停，餘下就保持進行。

適當儲下現金都是重要的。

2）雷蛇（1337）有潛力，但本質好波動，盈利不足，所有的市值，都只是基於「將來預期」去產生，這個預期可以變得好快，因為大家都只是「估」。

同時，電競行業的真正營運模式，賺錢能力如何，充滿了未知數，一個遊戲可以好受歡迎，亦可以好快無人玩。

另外，佢近年都有發展一些新興業務，潛力度有的，但仍左有不確定性。

因此，這股有前景，但有風險，無人知真正的價值。而佢另一些業務較是較新興，同樣有危有機類，所以，佢有可能有潛力，但風險方面就要注意。

3）我成日叫人唔好短炒，加上搶左某d多行家生意，同時有時會講某些問題上市公司，叫人小心老千股，我相信已得罪左好多人。

試過有上市公司直接比電郵我，反擊我的文章，不過就無叫我收聲。過往試過寫專欄，編輯唔比我登某些對某上市公司不利的文，怕得罰人。

其實直接叫我收聲的，就唔多，但我知出面已有人，暗中打擊我，例如在不同討論區等派打手唱衰我。不過唔緊要，我做好自己就得，有智慧的網友會知是打手，無智慧的網友，我都無辦法。

------------------------------------------------

Q18563：

你好，龔成老師！我係超級投資新手，之前從未買過股票！因為第一無興趣，第二，我自己無尼方面既認知，完全[0]概念，亦聽過好多人炒賣都輸多，所以更加吾敢掂同接觸，驚輸哂D$！

但我都深明靠打工無岀路，所以決定儲錢買磚頭較為實際，8年前我開始迫自己儲錢，最終係4年前成功置業一層細價樓 (現在仍然持有)，首期不多，做高成數按揭，因此租金吾夠cover供款，每月要補貼幾千蚊屬負現金流!

真的認識得老師你太遲，相逢恨晚！我在今年年頭才留意到你的貼文同文章，覺得你所講既野非常貼地，加上我本身都係80後，亦係公屋出身，所以感覺更加大，因為大家年紀相若，見到你甘成功，我都好想仿效你，就算一半都好，好想好想可以財務自由！

幾個月前，我開始買你嘅書睇(本人從中學畢業之後也沒有閱讀的習慣，可以話係厭惡)，我都唔敢相信自己會睇書！

但我明白唔改變自己，吾去增值自己增加投資知識，係無可能達致財務自由！所以我迫自己睇你既書學股票，希望做到股樓並行，因工作關係，一直就不到時間去上你股票班堂，唯有睇書學習住先！

疫情關係，被迫停工前後足足3個月，收入大減所以暫時未入市！好後悔錯過咗之前好多入市良機(前幾年既大牛市同今年三月見底既熊市反彈)，唯有急起直追，靜靜再等待機會！

而且我覺得現在個市好難入，好多新經濟股都好貴，你介紹嘅潛力股都倍升左好多，所以我唔知從何入手好！
希望你可以俾少少意見我，指點迷津

多謝你推介好書同你所寫的實用書籍，獲益良多

亦好佩服阿Sir你每日都耐心回答網友問題，有問必答！我一定繼續支持你

龔成老師：

第一，你要了解自己的財政、風險承受程度、投資目標等。

然後就設計一個長遠的財富比例方向，例如潛力股比例，平穩增長股比例，如果你投資知識、經濟唔多，就唔太建議投資潛力股，又唔只投資少少就算。

這刻，我會建議你先投資優質，平穩增長類股票。

第二，你如果收入不穩，中短期有風險，就應該多留現金，我地投資要攻守兼備，你做好防守先，之後先進攻，投資只能動用「閒錢」。

例如你擁有$20萬，可能要留$8萬作備用。餘下$12萬投資，而這$12萬並不是一次過買入，而是分注進行，同時要留一定的現金。

你可以考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

------------------------------------------------

Q18564：

你好呀成老師，我係最近先開始學投資既新手，而家二十七歲，最近開始追讀你既文章 我自己整左一個投資組合想請教一下老師

現持有
9988 阿里巴巴2手 @279.5=$55900
388 港交所 1手 @380=$38000
3331 維達國際 2手@25.5 =$51000
778. 置富產業 1手 @6.81 =$6810
410 SOHO中國3手@2.47=$3705
Total cost= around 150k
可上資金=400k

現時的投資粗合會否缺乏平穩增長型股票和太高風險嗎？

手上的股票和價位適合長遠地持有嗎？如果想增加平穩收息嘅股票應該加入那一種股票？Thanks a lot

龔成老師：

現時持有的股票，基本上無太大問題，你可以長線持有風險唔算高。

你27歲，其實唔需要加入太多收息股。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

27歲這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。

你可以好好利用持有的$40萬，但這刻大市未平，因此不能一次過用，要分注，同時留現金。

你可以考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：華夏恆生科技ETF（3088）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。部分要等回少少先入。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q18565：

老師你好，屋企人好耐之前買咗以下股票，想問係咪應該止蝕轉去其他收息或有潛力股？想請教應該點部署？

806 （$7.06 買入）
2600 （$5.75 買入）
604 （$3.6 買入）
665 （$5.7 買入）

龔成老師：

首先你地要明白一個概念，我地持有一隻股票與否，關鍵位是企業質素、前景，不要被買入價影響。買為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心。

如果企業無質素，但你現時蝕錢中，繼續持有只會令你財富繼續貶值，因此要賣出。

惠理集團（0806）質素中等，這股唔建議持有太多。

中國鋁業（2600）質素一般般，長遠宜賣出，可以等有反彈時賣出。

深圳控股（0604）可持有。

海通國際（0665）質素中等，這股唔建議持有太多。

之後將資金轉去盈富（2800），亦可考慮：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

------------------------------------------------

Q18566：

龔sir，本人今年36歲，收入尚算穩定正識$22000
Pt $3000-6000，沒有積蓄，一家三口
租屋$8000，扣除所有開支機本上入不敷支。

負債30多萬，仲要還多3，4年。
手持788 152000股
136 32000股
1762 4000股

買股票經驗1-2年，都係學人炒炒賣賣，都輸左20多萬，成日都想追返。

自從一生第一次投資學人炒仙股輸左15萬，我都有諗我輸左係咩地方度。直至有一次係屋企搵到你第一本出嘅書80後百萬富翁，先開始去了解金錢係咩，可謂資產，可謂儲蓄，係思維上開始有所改變，先多謝你對我的啟發！

只可惜自己賭仔性格，成日都想搵快錢，所以一路都係輸多贏少。

我好想脫離現狀，有時候都會覺得好累，所以想請教你，我應該如重整我的理財。
請指點迷津

龔成老師：

理財要一步步，不能急，你最缺的就是耐性，你要學正確的理財方法。

首先，心態上唔好成日想「追翻輸的錢」，理財要合理，要一步步。另外，要明白投資方向，唔好再炒炒賣賣，要做好配置。同一隻股唔能夠太集中。

由於你現時有負債，因此唔能夠太進取，加上你有家庭，有負擔，理財上要小心。

你這刻要做的，就是收支平衡，這是重要的第一步。

除增加收入外，控制減出都重要。

第二，你要持有基本的現金，你唔能夠完全無現金。

中國鐵塔（0788）有質素，但太集中。

恒騰網絡（0136）有危有機類。

現時企業盈利不多，但市值極高，市場對「前景」有無限幻想，有時炒作會升好多，但跌都可以好勁。

如果長遠業務成功，會爆得好勁，但失敗，會跌得好勁。因此，長線投資不是不可，但唔建議你持有太多。

萬咖壹聯（1762）不過不失。

佢幫助企業與中國智能手機用戶建立聯繫，向尋求移動廣告、網絡視頻產品分發及遊戲聯運服務的行業客戶提供安卓內容分發服務。

集團專有的平台，設有數據挖掘、數據分析及場景分析等技術，以定位於智能手機用戶，並通過智能手機製造商自帶移動應用程序及用戶界面發佈行業客戶的個性化、實時及基於場景的內容。

不過，業務就較為波動，過往雖然有增長，但近年的中期業績出現生意與盈利下跌的情況。業務波動。

這類股有危有機，可能有潛力，但唔建議你持有太多。

------------------------------------------------

Q18567：

龔成老師你好 近一年於股市因不了解衍生工具加上貪心想賺取急財

輸了全部資產接近30% 請問應該如何調節和建立心態呢？ 可以如何回本...

另外想問 我早前在高位@$26買了小米的認購證（三月到期） 請問建議擺多一陣等佢升番嗎？ 現時已蝕5-60%

龔成老師：

我20年前，都是短炒者，玩衍生工具，用左幾年，輸足幾年，之後長線投資，就開始不斷賺錢。

之後做銀行同證券行，見大部分輸錢的客，就是玩衍生工具的一群！這是我10年見到的情況，這是行內的秘密，根本大家都衍生工具一定輸，但業界一定唔會講！

這是好多投資者都會經歷的一課，發行商食價多到你唔信，有人會醒，有人唔識醒。

你要立刻停止再玩衍生工具！

下一步，就是好好學習，正確的理財、投資方法，明白理財是一價長期配置的過程，並不是炒賣。

------------------------------------------------

Q18568：

Hello 龔Sir，我係一個大學生，呢兩個月先開始接觸股票，想問一啲基本問題同意見

1. 我宜家做PT有$3000左右一個月，我打算開始月供盈富2000同港交所1000，請問咁嘅組合有冇問題？

2. 我本身仲有儲到幾萬蚊，打算用2萬投資，我會有咩選擇或者選股技巧？同埋普遍長期投資係幾耐叫長期？因為見到好多人短炒，但自己試過好似唔work...

麻煩晒你呀！Sorry問嘅問題可能好無謂

同埋想問埋月供要去到咩情況會選擇停供同放？麻煩晒！

龔成老師：

1）可以，這些都是有質素的股，你可以長期進行月供。但建議你手上點都要有基本現金，唔能夠100%股票。

2）短炒無用的，我20年前試過，你用長線投資，原理就是將現金轉為真財富，長期持有。

我會建議你留基本的現金，等到大市有較大下跌先用，唔好太心急。

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。

3）如果該股一直都有質素，有增長力，可以長線，甚至永遠持有。

月供股票一般5年以上。

如果這股已貴，又或對你組合佔比已夠，就可以停。到倍升，明顯貴時，可考慮賣。

------------------------------------------------

Q18569：

你好，本人今年43歲，持有以下的股票，有些已經持貨多年，一直不捨得沽。由於好擔心滙豐持續下跌，勁心痛，我是否應該沽出一部分，再重新作投資？

0005 買入$72.5 持 4000股
945 買入$252 持 700股
2628 買入$35.8 持 2000股
6886 買入$24.8 持 400股

由於經常坐艇，所以盡量不夠膽買細股。我有點想將部分沽後入盈富或電能，你認為值得嗎？希望你能指點一下，感謝

龔成老師：

基本上，你上述持有的所有股票，都是金融保險證券類，當中都有一定的相關性。

我地理財，要設計一個適合自己，優質股，以及平衡的組合，同一股不能過多15%，同一行業不能多過30%，雖然嚴格來算上述不是同一行業，但對金融與投資市場的相關性高，因此，合共佔比去到40%已是上限。

你賣出部分持股，轉其他，是大方向。轉盈富（2800）及電能（0006）是可以的。

這是大方向。

問題是如何轉，因為你最大問題是匯豐（0005），而這股近期股價較弱，這刻賣出未必是最好時機，相信已中短期仍一般，但如果見到有反彈時，其實應減少少先，然後等到過1、2年，經濟好翻D後，再減部分，目的是令這股佔你合比例，去翻合適水平。

------------------------------------------------

Q18570：

龔Sir你好，你嘅書我已經買左好幾本，遲下會再上埋你啲堂，因為你徹底改變左我人生。

今年三十五歲，跟隨你嘅指導，數年前由一個月光族變成今天都叫做有三十五萬現金同二十五萬股票嘅廢中，老實講對比起你，屋邨大變成千萬人士，中產家庭出生嘅我真係自愧不如。

情況如下:

現時收入四萬左右，可儲兩萬，月供一萬至萬二左右，視乎大市再改動個別股票月供金額-
1. 中電 1000
2. 中煤 500
3. 港鐵 1000
4. 港交所 500
5. 阿里巴巴 1000
6. 騰訊 1000
7. 越秀REITS 500
8. 冠君REITS 500
9. 宏利 500
10. 匯控 500
11. 恆生銀行500
12. 銀娛1000
13. 比亞迪1000
14. 盈富 500
15. 恆生ETF 500
16. 長建 1000
17. 電能 500

若想在四十歲擁150萬，該如何處理?
請龔Sir繼續引導!

Thanks so much Mr Kung!
永遠感激你的小弟上

龔成老師：

第一，你持貨太散，隻數太多，這會出現管理上的困難，我地買入股票，要經過仔細研究，買入價要持續檢討，你持有太多管理較難，要調整翻。

第二，你唔應該投資太多收息股。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你35歲，應該以「增值」為主。

上述很多銀行股都只是收息股，無乜增長力，可停。部分公用股雖然有質素，但同樣未必適合你這刻，可停。

另外，我會建議你加大盈富（2800）金額。

同時你這年齡，加多少少潛力股都可以，可考慮：華夏恆生科技ETF（3088）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177），你可從中選股，但就要明白波動性比上述會高左，同時風險大左，你要自己平衡。部分要等回少少先入。

------------------------------------------------

Q18571：

龔老師你好！
40歲， 女性，單身，月薪$33K， 沒有物業。

上年才接觸股票，一直都係向保險公司買儲蓄保險，儲蓄基金一筆過基金同MPF自願性供款

現有資產：

股票:
HSBC(00005) 4800股 （平均$62入）
領展(00823) 900股 （平均 85入）
阿里巴巴(09988) 100股 （180入）

保險：

Plan 1: 月供保險（人壽+ 醫療+少少儲蓄成份）
Plan 2: 月供保險（人壽+危疾+ 少少儲蓄成份）

基金投資：

Plan 3 ：一筆過基金，東歐基金買2013年用$80K買一手， 但到宜家都仲蝕緊， 我應唔應該放咗佢或轉買其他基金？

Plan 4: 之前月供額外強積金計劃，已有$90K (現在沒有再供，放係等價格上升，由2018年停供一路放要宜家都有25-30%升幅）

Plan 5: 一份剛剛供完的純儲蓄保險：全數供了$130K (要放多三年才開始break even ）

Plan 6: 另外有一份月供$5000 純儲蓄保險，仲要供多四年，供完都要放多幾年才會break even , 之後才收息。

Plan 7: 一份要供30年的基金plan : 2006年開始月供$1800， 大約仲有16年才供斷。呢份單由2008年開始一直都蝕，直到今年才有升幅， 應該退保攞返出來嗎？

現金:

外幣戶口： $150K
港幣：$500K

扣除必須開支同現在仲要借的保險同儲蓄計劃，我大約可以額外攞多$9000儲蓄

目標：

好想買樓 （好想擁有自己的小天地）
三年內將所有資產總和增加3倍，可行嗎？會否不切實際
希望每用被動收入有$30000

我應否終止plan 3, plan 4 同plan 7 ，然後買股票嗎？

我已買了你的股票勝經，還有什麼書可以介紹？

謝謝你抽空閱讀我的提問。
一位讀者敬上

龔成老師：

我地理財，要攻守兼備，要建立一個平衡的財富配置，同時，你現時年齡財富仍有增長力，可投資一些平穩增長型的工具。

你上述買了大多保險儲蓄計劃，其實應該調整翻。

另外，匯豐（0005）只是收息股，以你年齡不應太多，同時你唔應該同一隻股票，太過集中。

首先，你要想清楚自己是否買樓，目標是幾時買，起碼有大約的方向，因為這個計劃，會影響你之後的配置。

如果你打算1、2年內買，你就要開始準備現金，賣出部分保險儲蓄計劃，持有現金，等機會買樓，同時唔好在這段時間買入太多股票。

相反，如果你打算3年後才買樓，你現時就要投資翻一些股票，目標是平穩增長股，等你財富有基本增值。

你可以考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

另外，你可以睇《80後百萬富翁》《財務自由行》，之後再睇其他。

------------------------------------------------

Q18572：

Hello~成哥~想問下你意見呀!
我27歲,手頭上有以下股票,
（1） 303-偉易達/2手/$51
（2） 857-中國石油/1手/$3.41
（3） 788-中國鐵塔/1手/$1.6
（4） 405-越秀房託/2手/$3.62
（5） 1830-必瘦站/2手/$2.47
（6） 152-深圳國際/1手/$12.66

請問成哥,我D股票係咪優質股呀?算係水桶幾呀?可長線嗎?

我現在可用現金有5萬,應唔應該加注係呢幾隻股到呀?

定投資其他好呢?我有留意阿里同小米~但現價有點高~可入嗎?

唔該成哥!!!!

龔成老師︰

水桶1︰(3)。而阿里（9988）、小米（1810）都是
水桶2︰(2)(5)(6)
水桶3︰(1)(4)

上述都是有質素的。

我地選擇投資邊個水桶時，會因應自已架年紀。如果你年青，應集中在一些有增長力股（水桶1和2）。相反，你將近退休，但應該集中一些收息類股份（水桶3）。

你可以因應翻自已年紀，去慢慢調節。

阿里巴巴（9988）和小米（1810）現價計都係偏貴，要回2成多才算合理區，到時才用分注模式去入貨會較好。

------------------------------------------------

Q18573：

成哥你好

1）請問638，你點睇。。我係你舊生，跟你教我知識同點分識同上網篩選，搵到依隻，問你意見如果

2）638，成交量超低，有時係無，跟好定唔好？

3）如上，有638既貨，但市場又零成交，甘有貨係身放唔放到貨出去架？

唔該成哥。

龔成老師︰

1） 建溢集團（0638）主要從事設計、製造及銷售電器及電子產品、摩打驅動產品、其他製造業務，以及房地產發展。

佢都有一定業務，但睇翻佢過往幾年，盈利都幾波動。再加上負債上再有點偏高，都係會被扣分架地方。

整體而言，質素只是中等。

2） 若成交不多，代表股票流動性低。買賣差價一般會較高，影響到你利潤。

3） 如果成交量零，唔一定代表你放唔倒。有機會只係"買家最高買入價"和"賣家最低賣出價"依然有差距，所以未能成交。只要你賣出價，能配合倒買家出價要求，咁就會成交倒。

但此股成交量好低，加上市值唔大，個價好易會出現較大波動。唔建議持有太多此股，同時你要明白當中風險。

------------------------------------------------

Q18574：

老師你好，想問下香港電訊（6823）為何股價跌了咁多？

我在11.64價位買入作收息用途，但見最近股價跌到10.40之下，有點擔心，請老師指點一下，謝謝。

龔成老師︰

就算再優質企業，中短期股價都會有機會波動。原因不一定是本質出問題，可以係一些與其本質無關的因素。只要長線質素無變，中短期波動我地唔需要理會，長線持有就可以。

香港電訊（6823）在2020年中期盈利出現下跌，由於疫情關係令各國實施的旅遊限制及其他預防措施，導致漫遊收益大幅下跌。

但這個只會係中短線影響，長期業務穩定，加上用100%派息的政策，雖然增長力不強，但類收息，這股絕對不錯。

暫時睇唔倒佢長線質素有大改變，長線持有無問題。

------------------------------------------------

Q18575：

老師 想問下8153法諾集團 我$0.25 買入160000股
應該止蝕嗎？

呢隻股算唔算是炒股？
感謝你耐心回答我們

龔成老師︰

法諾集團（8153）主要於中國從事提供數字電視廣播和廣告服務；提供按揭貸款及短期貸款；證券投資及買賣。

見佢之前出現過"四合一"、"十合一"，係典型財技股。

過去多年，核數師意見都係"不表示意見"，代表佢盤數好大機會有問題，我建議你盡快沽出較好。

------------------------------------------------

Q18576：

你好龔sir，閱讀過你的著作後獲益良多，對財富管理有了基本的概念，非常感謝！

我今年25歲，持有一層7.2M的新樓 （借銀行4M，每月還14.5k），下年年尾才收樓，所以每個月只能騰出8000-10000作儲蓄投資。下年收樓後放租，應該可以騰出15000-18000作儲蓄投資。層樓將來會收回自住，現在和父母同住。

另外
- 180k cash放在高息戶口 （H按）
- 150k 放在股票
- 由於工作性質，人工雖然穩定，但不會上漲，一定跑輸通脹的。
- 我可以承擔中度的風險。

1） 以我的情況，你認為只買平穩增值股可以在50歲前達到財務自由嗎? （我暫時的財務自由目標是30k一個月）

連利息，年回報有10%的可能性有大?

2） 我預計租金回報率有2.66%，利息cap是2.35%，但扣除雜費後每個月仍然是負1k現金流，你看好康城區的發展及其租金升幅嗎？

需不需要換樓提高回報率呢？

以現時的政策，幾多年後買第二層物業較好，還是買股票的回報率會更好呢？

3） 現持有
兩手2800 （25.04買入，佔倉17%）
兩手1928 （34.3買入，佔倉18%）
一手823 （62.85買入，佔倉5%）
一手9988 （267.8買入，佔倉18%）
兩手1137 （9.64買入，佔倉14%）
美股 （佔倉13%）

非常感激和佩服你為我們解答疑難，改變到很多人的生命，在此祝你生活愉快，身體健康!

龔成老師︰

1） 以你年紀計，係財富增長架黃金時期，唔應該咁保守。你應用"平穏增長股" + "潛力股"，去做一個的組合。現在你每月儲到的錢，可以5成去做月供，其餘先儲起，用一邊月供一邊儲蓄的策略。

月供方面，你可以選擇投資在平穏增長股︰盈富（2800）、金沙（1928）、恆基（0012）、中銀（2388）、港鐵（0066）、煤氣（0003）、港交所（0388）、粵海（0270）、領展（0823）、希慎（0014）、太古地產（1972）或潛力股︰比亞迪（1211），中生（1177）或福壽園（1448）。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

如果想退50歲有3萬現金流，以5%股息率計，需要720萬資金。

以恆指過去年平均回報10%計（連股息再投資），你每月投資$15000，25年後大約會增值至1700萬，故這樣安排相信很大機會達至你的財務目標。

2）坦白講，當區大多供應，投資價值不算高，不過，我唔建議轉來轉去，因為香港買賣物業成本高，你照持有先，反正啟德發展會增加就業機會，加上將軍澳區有新路出九龍，因此並不是完全負面。

另外，第二間物業，最好跟今年相隔5-8年左右，會較理想。除非中間出現很吸引價錢，否則相隔些時間，會較為穏當。

3） 這個組合可以，但留意翻香港電視（1137）業務雖有前景，但有兩點都存有風險的。

第一，佢都會依靠人的因素，王維基成為了公司最值錢的資產，佢的想法好多，有生意頭腦，但我對這類太依靠個人的企業，不建議太過大注。

第二，這企業現時搞網購，有增長力的，但同時存有一定的未知數。疫情過後的增長力會否減慢？另外就是估值方面，我都好難講這刻的估值，只能話唔算平。你可以持有，但唔好太大比重。

------------------------------------------------

Q18577：

老師，本人30歲，月入2萬，平時都有儲錢習慣$5000左右，前排先開始研究股票，最近買左80後百萬富翁，令我對資料產生興趣。

1.問了解下月入股票可以減少風險，但同我係合理位置/低位買貨有咩分別？

2.優質股票我當有10手，佢高位時我放一半或2/3，等佢回落我再入貨，不過最少擁有1手就可以？

3.本人有1810 $19.45 三手，1928 $34.55 一手，應該放定留？

4.點解睇一隻股票既合理位置？
多謝老師指點

龔成老師：

1）例如，每月以相同金額$10,000 買入盈富基金（2800），假設第一個月股價為$25，就能買入400股；第二個月升至$35，就能買入286 股；第三個月跌回$30，就能買入333股。

總結這三個月，投入了的資金為$30,000，累積股票為1019股，平均買入價為$29.4。

由於月供股票每月投入的金額相同，因此當股價上升時，買入的股數自然減少，而當股價下跌時，就自然會買入較多股數，如同自行調節一樣。

因為你自行買入，未必知這刻是否合理，事後睇可能是高位，如果用月供的策略，就可以減少一次過在高位買入的風險。

2）都可以，但不建議賣出太多，因為你永遠唔知佢個價會唔會跌翻落去，因此，我一般只建議賣出一半。

3）都是優質股，可持有。唔需要理中短期股價波動。

4）要知合理價，就要計企業的價值，但過程比較複雜，好難三言兩語就講到，就算在我的股票班，都要講5小時，裡面會講3種估值方法，有難有易，但同學都用到的。

簡單來說，你要考慮企業的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。這都是計算的基礎。

如果要深入計算，基本上要好仔細的研究企業，要分析好多財務數據用比率，先至有較完整的答案。

------------------------------------------------

Q18578：

龔成先生你好,係上年好早時間唔小心入左少少股一隻叫00996 嘉年華國際，估價已去到0.01所以不能出售，近兩日有新聞話會再重組

但新聞內容唔係太明白，我
地小股民有啲咩要注意？？thank

龔成老師：

初步睇佢的通告，將會進行25股合1股，因為現時股價太低根本無法進行買賣，佢合股就可以令股價增加，從而可以買賣。

舉例說，你現時持有10000股，現時股價0.01。

佢合股後你會變成持有400股，而股價會上升至0.25。當然如果佢現時的實質價值低於0.01，到時的價值都會少過0.25。

------------------------------------------------

Q18579：

HELLO 龔成,朋友介紹我睇你的PAGE, 發現很有啟發性, 有一些問題想你俾下意見請教一下, 多謝!

我依家36歲, 月入$42K, 每月可儲約$13K. 兩年前因搞小生意損手失掉約30萬積蓄.

之後重新再儲錢, 依家每月供緊 $2K (0003) 同 $2K (0006)供左差不多兩年. 再有2手823. 現金大概有8萬
想問, 月供的組合可以嘛?

還是要加碼/換其他組合
亦想早日儲到100萬去為屋企裝修, 組織小家庭等.感謝!

龔成老師：

以你的年齡，其實可以投資高少少增長力的股票。

你現時月供，領展（0823）無問題，但另外兩隻都只是收息股，增長力不強。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

因此，你之後可以將資金，月供盈富（2800）及其他較有少少增長力的股。

------------------------------------------------

Q18580：

老師 1076 呢隻仙股我留意左好耐 佢已經系0.01價位好耐 但每日既成交量都好多 系咩原因？

龔成老師：

唔清楚，博華太平洋（1076）無研究過，但佢年年虧損，投資價值不高。

你永遠唔知成交多的原因是有人收貨，還是造假像。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。