當遇上家寶，阿公先瞭解整個人物關係圖，動機亦好自然咁浮上水面，更加能夠確定阿公嘅推測係正確嘅，潘叔唔知喺邊度學識半桶水嘅道術，能夠見到小鬼，喺鬼屋畫符咒，將周圍嘅小鬼養喺鬼屋入面，等待復仇嘅一日來臨。 家寶、婷婷、小鈞三個小朋友一齊嚟到荔園，絕對唔可能係巧合，而係潘叔嘅精心安排。 佢哋嘅父母，家寶父親李卓榮、婷婷父親周凱明同埋小鈞嘅母親王敏，三人從中學就係好朋友，讀同一班，有共同嘅喜好，亦都有共同嘅欺凌對象－－潘叔。 畢業後，佢哋仲有聯絡，一齊讀大學，工作上亦有互相扶持，偶爾出嚟聚餐會，會一邊飲酒一邊傾返中學時嘅往事，每次講到欺負潘叔嘅時候，三個總係笑到臉紅耳赤，彎腰飆淚。 呢啲青春往事，每次諗返起都係咁好笑。笑到夠喇，就摸住酒杯感嘆：「真係歡樂燦爛嘅青春啊～」 然而，對於潘叔嚟講，中學發生嘅事就只有絕望，多年嚟好似夢魘咁纏繞住佢。 學校有一隻狗，叫阿財。係校工養嘅，用嚟防止有賊走入學校。 某一日，周凱明咁啱見到阿財喺學校門口大便，佢就用膠袋將新鮮得冒煙嘅糞便裝起，然後偷偷丟入潘叔嘅書包入面。 「老師！阿潘個書包好臭，我懷疑佢帶違禁品。」上堂嗰陣，周凱明以宏亮嘅聲線報告老師，令本來昏昏欲睡嘅同學都精神抖擻起嚟，視線全部集中晒喺阿潘個書包度。 佢哋知道，今次有好戲睇喇。而老師用狐疑嘅眼神望住阿潘。 「我、我無啊！」阿潘一臉茫然。 「或者會唔會係…佢嘅午餐呢？聽講阿潘有食屎癖好。」李卓榮附和，班上開始傳出竊笑聲。 阿潘心知不妙，結果老師打開佢個書包，課室頓時臭氣衝天，食屎潘呢個名就喺嗰 日得返嚟。 當然喇，欺凌少不了暴力毆打，有一次，李卓榮雙手拎住張椅子，跳起再坐落阿潘身上，佢宛如灰熊一樣嘅身軀，將阿潘嘅盆骨當場壓碎。 阿潘痛到瞓喺地下慘叫，咁啱落課鐘響起，全班同學都離開課室，無一個人理佢。最後，係佢咬緊牙關，自己企起身行去醫院，結果仲要住院一個月。 出院後，阿潘唔敢再返學校，但又唔敢同父母說明狀況。只好每日假扮上學，喺附近嘅餐廳等到放學先返屋企。終於學校接受唔到阿潘長期缺席，將佢踢出校。 以中途退學嘅學歷，當然搵唔到舒舒服服嘅工作。盆骨有永久後遺症，就連體力勞動嘅工作都做唔掂。 幸好，阿潘搵到一間酒樓做服務生，仲喺嗰度結識咗而家嘅老婆，生咗瑋晴呢個寶貝女。 但佢嘅生活並無因此而擺脫惡夢重回正軌，十年後嘅某一天，不唔知係邊個同學，竟巧合地揀咗佢工作嘅酒樓舉辦舊同學聚會。 當晚，王敏發現到佢，於是欺凌嘅遊戲又開始喇。佢畀咗雙倍價錢酒樓經理，要求潘叔成晚淨係幫佢哋斟酒。 當潘叔行入包廂，就見到一堆熟悉嘅臉孔，熟悉嘅笑容，熟悉嘅蔑視眼神。 所有同學都長大咗，佢哋都著住成熟嘅西裝，一副事業有成嘅樣，但佢哋嘅行徑一啲都沒變。 嗰晚，因為潘叔呢個「餘慶節目」大家都玩得非常盡興。從佢哋嘅談話內容得知，三人都已經結咗婚，有一個幸福美滿嘅家庭。 潘叔體內嘅怨憤幾乎忍唔住要爆發出嚟，連呼吸都會呼出黑色嘅煙霧。呢班惡魔，將佢嘅人生搞成咁，憑咩可以有咁幸福嘅人生？！ 潘叔唔敢話自己係好人，但佢哋肯定就係「惡」，惡有惡報，唔通只係呃小朋友嘅大話？ 散席後，其中一個已經唔記得叫咩名嘅同學，覺得畢竟係同學一場，咁樣做太無禮貌，特意封咗大利是同卡片畀潘叔，話以後有咩需要幫忙，可以搵佢。 當係贖罪劵啊？潘叔嗤之以鼻，將卡片丟埋一邊，直至幾年之後，佢搵到一份荔園嘅清潔工。某一日，公司可能想吸引更多客人嚟樂園玩，將一大疊免費玩機動遊戲嘅優惠劵派畀員工。 潘叔無將呢疊優惠券送畀佢個女瑋晴，反而搵返張卡片，聯絡個舊同學，拜託佢將優惠券不動聲色咁送畀李卓榮、周凱明和王敏。 然後，潘叔就每日都期望住佢哋嘅光臨。 佢哋個仔女嘅光臨。 《阿公講鬼４：魑魅》預售開始！ ７月出貨！ 留言「買」我inbox 你