尋找靈魂伴侶（下） . 無幾耐，倩倩就搬過嚟同我一齊住。 . 但係同居後，我哋開始嘈交，導火線就係家務。 . 家務邊個做呢？一人一半聽落好公平，但劃分起嚟就相當麻煩。 . 例如我鍾意煮飯唔鍾意洗碗，鍾意倒垃圾唔鍾意拖地，倩倩都係。 . 結果，我哋決定，倩倩負責煮飯拖地，我負責洗碗倒垃圾，一人做一件唔鍾意嘅事。 . ， 但係有一晚，矛盾爆發啦。 . 因為嗰晚我哋去飲，無煮飯亦都唔駛洗碗，後來我見到地下有啲污糟，就提醒倩倩拖地。 . 倩倩大怒：「你無洗碗，你只需要你鍾意嘅『倒垃圾』，而我依然要拖地，咁咪好唔公平？」 . 連呢種事佢都斤斤計較，我都好嬲，就提醒番佢，八日前佢自己煮咗個面食，我無食到，我返嚟仲幫佢洗碗哩，我忍佢好耐啦...... . ， 結果我哋決定，將屋企嘅範圍劃分為一半，每人負責自己領土上嘅事務。 . 然後就有領土爭議，例如我返到屋企，衝住入廁所無除鞋，途中踩到倩倩嘅領土，留低一個鞋印，咁應該係我拖地定佢拖地呢？ . 你可能覺得，係我整污糟嘅，應該係我拖地。 . 但如果我拖地，我清理鞋印嘅同時，難免會拖走該領土原有嘅灰塵，而嗰啲灰塵係屬於倩倩嘅責任，咁亦都唔公平。 . ， 除咗家務之外，家庭開支亦產生咗好多矛盾，我哋日嘈夜嘈。 . 最消磨感情嘅，好多時都係雞毛蒜皮嘅小事。 . 而且倩倩脾氣暴躁，我哋一嘈交，就可以嘈足一晚，漸漸發展到初時口角，繼而動武...... . 最後我哋分咗手，但事情並無結束，倩倩喺網上控訴我打佢，又講到我平時點衰法；我唯有影低自己面上嘅抓痕，逐點加以還擊。 . 總之就係好煩，我都唔明世上點會有咁煩嘅女人。 . ， 我去「靈魂伴侶介紹所」，搵經理算帳。 . 我講晒我哋所有嘅矛盾出嚟，由「拖地事件」講到分手後嘅爭執，最後話：「你哋又話幫我搵靈魂伴侶，就搵到呢個八婆？」 . 經理慢條斯理咁答：「呢個八......呢位小姐就係你嘅靈魂伴侶，你哋唔係好夾咩？」 . 喺我發火前，經理咁樣講：「你哋嘅矛盾，都係因為你哋太夾，如果你哋一個鍾意煮飯，一個鍾意洗碗，咁咪無事囉。偏偏你哋嘅喜惡一模一樣，大家都只想做自己鍾意嘅嘢，仲要一樣咁斤斤計較。」 . ， 「咁發脾氣呢？佢日日都鬧到我狗血淋頭，佢真係好難頂。」我指住我臉上嘅抓痕。 . 經理答：「一隻手掌拍不響，你唔同佢嘈，你哋點嘈到咁耐？」 . 我承認，我脾氣都唔算好，但我無法理解：「你唔係話我知，因為我脾氣差，你哋特登搵個暴躁嘅女友畀我掛？」 . ， 經理笑一笑，然後解釋，原來「靈魂伴侶介紹所」掌握咗最新科技，可以透過血液分析出一個人嘅性格愛好，再搵出匹配度最高嘅對象。 . 理論上，呢種配搭方法，可以幫人搵到最適合嘅伴侶，至少志趣完全相投。 . 但都有啲情況，係大家性格比較極端，例如極悲觀配極悲觀，極暴躁配極暴躁，負負難以得正，分分鐘火星撞地球。 . ， 「可以話，佢就係女版嘅你。如果你覺得佢好難頂，即係你自己都......」經理好婉轉咁講：「唔係咁容易被人接受。」 . 我理智上認同佢，但我依然好嬲：「我畀咗咁多錢，結果就係證明，我唔會搵到靈魂伴侶？」 . 經理答：「咁你知道咗自己有咩缺點，慢慢改進嘛，再搵伴侶就易啲。」 . 「咁易改咩？」我翻白眼，如果知道自己有缺點就改到，咁大部份人都無缺點啦。 . ， 呢個時候，經理拎出一份價目表：「我哋仲有Plan B，叫做『不討厭伴侶』，針對同靈魂伴侶分手後嘅顧客而設。」 . 所謂「不討厭伴侶」，即係你唔覺得對方特別出色，亦無咩小鹿亂撞嘅感覺，只係你唔太討厭佢，可以勉強一齊生活。 . 經理嘅意思係，我同靈魂伴侶都夾唔嚟，就知道自己相當難頂，咁仲想搵另一半，就唔好嫌三嫌四啦，對方肯接受自己咪好囉。 . 唉，其實佢都講得幾有道理，我開始睇「不討厭伴侶」嘅Plan。 . 我終於明白到，愛情路上，了解自己，比了解別人更加重要。 . ， 你係咪想問我，「不討厭伴侶」嘅Plan成唔成功？ . 我相信，如果我失敗咗，經理一定會提供Plan C畀我。 . 一個成功嘅Sales，就係你要求佢解決任何問題， . 佢都有辦法將問題嘅答案，變成下一單生意。 . －完－ . #短故 #短篇 #小說 #陳美濤 #廣東話 #粵語 #tomatochan #尋找靈魂伴侶