送命（上）
　　
我曾經以為，自殺嘅人，都想死。

但呢一刻，我準備自殺，但我其實唔想死。
　　

2500年，科技發達，低技術工種大多已被機器取替。

好似我呢啲低學歷、無乜特殊技能嘅中年女人，根本無公司需要我。

我嘅上一個老闆係我阿叔，我先得到一份勉強謀生嘅工作，前排公司執咗笠，我再都搵唔到工。

嚴格嚟講，有人肯請我，但人工好低，要低過機器運作嘅成本，公司先會用人手。
　　

計起上嚟，如果我做嗰啲工，一個月人工都食飯都勉強，咁我每個月就唔係賺緊錢，而係蝕緊錢。

我嘅賺錢能力，比唔上我生存所需嘅消費，我嘅存在係負債而唔係資產。

我個仔啱啱出嚟做嘢幾年，佢都捉襟見肘，我做人阿媽，唔捨得為佢增添負擔。
　　

好彩，兩百年前，科學家已經發現咗，人體內有「生命能源」，係支撐人類生存嘅根本，科學家就發明咗轉移壽命嘅方法。

為免窮人被壓榨，政府迅速禁止壽命交易，只准「自願轉移」，
但上有政策，下有對策，據講只要有門路，仍然可以買到壽命。

我當然唔知邊度有門路，我只知道，城中首富今年已經二百五十歲，我相信佢一定有門路囉。
　　

總之，我去醫院偵測過，我仲有二十年嘅生命能源。

我決定將能源抽晒出嚟，轉贈畀個仔，咁阿仔可以更長命。

如果我唔咁做，繼續生存落去，我每一日都用緊錢，浪費金錢，仲要浪費埋生命。

我考慮得清清楚楚，帶齊文件，去醫院申請。
　　

職員向我講解條款，「自願轉移」要抽稅三成，即係我有廿年命，轉畀個仔，佢只會得到多十四年命。

「你申請轉移二十年嘅生命能源，轉移後，你會剩番一個月嘅壽命。

醫院會幫你免費保存一個月，受益人需要在一個月內提取能源。

一個月內，你都可以反悔，取回能源，但三成嘅稅係唔會退。」

我簽字，然後行入「生命能源轉移器」，好快就提取咗能源。
　　

我無覺得有咩唔妥，但我知道，我已經自殺成功，一個月後，我就會自然死亡。

我返到屋企，同仔仔講咗呢件事。

我事先無同佢商量，仔仔一向孝順，如果佢早知道，一定會阻止我，但米已成炊，佢最多鬧我幾句啫。

仔仔難以置信：「你嘅意思係，你去抽咗自己廿年命，轉移畀我？」
　　

「準確嚟講，你只會收到十四年命。唉，阿媽無本事，得番條命可以畀你。我計過數啦，我日日都要食飯，入不敷支......」
我將我嘅思路講晒出嚟，回想我嘅一生，我不禁悲從中來。

我條命真係好苦，又唔靚又無本事，後來嫁咗個老公，大家都係貧窮線上掙扎嘅人，相濡以沫。

好不容易養大個仔，我諗住以後三個人賺錢，三個人夾份交租，日子總會好過啲，點知老公又撞車死咗，無幾耐我又失業。

依加我連條命都保唔住，唉，其實保住都無乜意思。

點知，仔仔斬釘截鐵咁講：「我唔要。」
　　
下集：http://bit.do/fyqya
　　
將專頁設定為「搶先看」/ "See first"，最新故仔馬上睇！
　　
注定戴綠帽：https://goo.gl/R6k7UK
相隔千年的愛：http://bit.do/eTnnX
　　
#短故 #短篇 #小說 #陳美濤 #廣東話 #粵語 #tomatochan #送命