【龔成問答信箱】（Q22301-Q22320）

Q22301：

Hello 龔 Sir, 幾個月前開始接觸你，另外，我先生買咗幾本你嘅書，我睇咗你其中一本書，其實我二十多年對投資都有少少心得，只係較少接觸新經濟股….

Anyway, 依排個市跌，股票跌了 10%，咁多年股市上上落落我都無乜所謂….

其實我想講返重點，因為做全職媽咪，我十幾年無返工，但我睇了你嘅書後，決定跳出 comfort zone, 揾咗一份我很愛的 part-time, 返咗幾個月，

我真係覺得好有意義又表現幾好….但係，我今日竟然唔知醒，今日公司叫咗第二個人頂上一日，我真係喊足成日….衝動下買了 #700 發洩…

今日的故事講完，想同你分享，希望下星期我繼續有工返

龔成老師︰

如果你有上過我股票班，就會明白，我地的同學好小心投資的。課堂會派一份6頁紙的「企業評估表」，我會逼佢地填好6頁紙，先可以進行投資，所以佢地的投資都好穩健。

人生路上，我地難免會遇到一些令人氣餒的意外。最重要，係我地有無方法，令自己收拾好心情，重新上路。

發洩，其實係無問題，因為係一個情緒抒發，可以幫自己調整好心情。

每個人抒發的方法都不同，有人會做運動、有人會去唱K狂叫、有人會去沙灘對住個海沉思...。只要唔好傷害到自己和其他人，咁就無問題。

當你情緒，開始可以慢慢回復平靜，我地就要客觀分析，點去解決當前問題。(記住情緒未控制好，唔好做重大決定。)

其實遲到，我相信好多打工仔都試過，除非你本身係遲到常客，或者本身比人印象係唔盡責。否則一次半次，你誠心道歉，相信問題不大。

由於你缺席，公司要找人頂一日，都係正常，因為人地都要運作。

希望你可以明白，人生總會遇上不如意的事，重點係你面對的態度，而唔係件事本身。

其實，我好欣賞你走出comfort zone的勇氣。特別你係一個無做野1X年的全職媽媽，就更加難得，你要加油!!!

另外，你好衝動咁買左架騰訊（0700），現價算合理區中部。雖然近期中央政策，對相關大型企業，有不利影響。

但騰訊（0700）係有質素和規模的公司，相信會慢慢適應如何在這些新法規下營運，因此長線投資價值依然存在。

不過，你預佢中短期一定會較波動，但長線持有的話，就無問題。

------------------------------------------------

Q22302：

1) 龔sir你好，最近我學習了SOTP估值方法，我用此方法評估了最近金山軟件的估值，你可以給我一點意見嗎？

金山內在價值：
網遊+辦公軟件=70億人民幣
金山雲= 108億人民幣
淨現金= 140億人民幣
獵豹移動= 10人民幣
但參考aastock 496.93憶市值
我計漏咗啲咩？

網遊和辦公軟件以33%增長，金山雲以一倍增長。獵豹移動大約股價$2美金，大概18億人民幣，現金就參考披露易最近的2020年全年業績

如果計算之後就變成價值$28.46一股，這樣就高了30%

2) 另外，信達生物最近研發出pemigatinib藥物針對治療癌症,並已經在台灣日本美國批准使用,並對信達生物業績增長一倍以上,如果股價跟隨大市回落至$60，即是到250天線附近。有見及此，值得買入嗎？

不好意思一次過問你這麼多問題

有機會出現MACD背馳嗎？恕我班門弄斧

1801信達生物(六個月圖)

龔成老師︰

1) 雖然有參考價值，但你都要明白背後原理，由於唔知你具體每一部分怎樣計算，有可能你這個估值方法，只簡單將企業子公司市值加起(持股部份)，再計入集團本身資產和負債，去做出一個市值作估算。

現時財經網站提供的市值，純粹係現價，再乘以發行股數。

而你這個方法，係要對不同分部，因應其特性和發展階段，用相應估值方法，去作出評估，所以唔一樣係正常。

其實，市值計算本身係好主觀，特別係一些估值方法，如果你唔係非常有經驗，只要數字有些微偏差，個結果可以差好遠。不同估值方法，會適合不同性質企業，唔可以亂用。

而且附屬公司、聯/合營公司計算比較複雜，如果直接閱讀財經網數據，係會有偏差。

所以係估值前，我地要按實際情況，對數字作出相應調整。這部份較難，我都係在自己的進階班，才會教授同學。

因此，我唔建議你單用市值，作為分析基礎。你可以用佢參考，但最重要都係了解企業本質，佢做什麼業務、行業發展狀況、財務數據、競爭情況等，去做核心會較穏當。

金山軟件（3888）主要從事遊戲研發及提供網絡遊戲、手機遊戲及休閒遊戲服務；提供雲存儲及雲計算服務；設計、研發及銷售推廣辦公軟件產品及服務。

業務有質素，長遠發展力不差，不過擔心股價較為大上大落，現價合理區，唔建議大注投資。這股前景正面的。

2) 你要記住，我地投資股票，就等同投資一間企業。你最重要係知道佢本質、行業等基本因素。

過去股價未必能反映其未來情況，因此唔好再睇圖的趨勢，這是好錯的投資方法！巴菲特已經講到明，技術分析沒有作用的。我地只會分析企業的質素，以及企業的價值。

我20年前，都會用移動平均線、RSI、圖表等分析方法，但當我輸完又輸時，我決定放棄這些技術分析，從此我就不斷贏錢。

信達生物（1801）係一家中國生物製藥公司，開發了集研究、發現、開發、製造及商業化於一體的生物醫藥平台。

睇翻佢資料，佢亦係腫瘤、眼科、自身免疫和代謝疾病領域建立了一個包括單克隆抗體和其他生物藥物的產品管線。

你所講的，是一個利好因素。

但由於仍處於燒銀紙的狀態，所以有危有機，潛力度是有的，但估值好難，現時市值都唔細，只能完全「估」佢將來的價值，不確定性好大。

只可以話，這刻投資值博率中等，你投資係可以，但唔建議大注。

------------------------------------------------

Q22303：

Hello 龔成你好，想請教下你關於現況應該點樣投資

我地二個人(30歲頭), 每月固定收入66000(已扣MPF)，係外地有個物業價值600萬左右係按揭每月交17000左右

現在手頭上有大約150萬現金，30萬股票，20萬黃金 (結婚收到的)

現在需要搬屋, 正係度煩惱緊買定租好 (如果租大約13000-15000左右)，銀行就話我地可以最盡係香港置業借到6百萬 (有說明外地物業同按揭情況)

不過我地就怕太risky/未係合宜嘅時間(定係等多1-2年再升人工先), 不過又好似好浪費現金,定係可以做一點其他投資? (唔係買物業)

希望你可以指點下我地. 不過如果你Post出黎我驚比人估到係我地, 好多朋友都有follow 你

萬分感謝!

龔成老師︰

香港物業，我唔知中短期會點走，但長線我預期都會維持上升。如果你2人係計劃，長線都會留係香港生活，我建議你要為自住屋，做定準備。

現時樓市雖然唔算平，但若果有配合到你長線生活所需，價格合理，足以你們長線"供得起"的物業，其實已經可以出手。

若果你都係想穏陣D，等人工高D先再算。現時資金，可以先投資在優質股，去進行增值。

你們可以選擇一些「平穩增值股」+「潛力股」作投資目標。若每月有一定儲蓄，建議進行月供股票，去提升增值能力。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄，另一半就先儲起架策略。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

大市現處於合理水平，那150萬資金，你可以先用一半，以"分注"形式慢慢入貨。餘下一半和每月儲蓄，就等大跌市機會出現，才大力度掃貨，並長線投資。

而黃金是貴金屬，有「終極貨幣」之稱，是人類自古以來的貨幣，因此，有持有價值，而現時我地的現金，一定長期貶值，所以黃金長期會向上。

不過，黃金沒有現金流，持有無法創造出經濟價值，其主要作用是對沖黑天鵝事件。

所以，你可以投資黃金，但不用佔財富比例太多(<3%)，而且持有的應該為實金。

當然，如果這些黃金若有紀念價值，你係可以自行衡量是否保留，不必跟足<3%的標準。

------------------------------------------------

Q22304：

Hello 龔成老師，上次聽左你意見開始抽部分資金去月供2318，現在組合配置更佳。另外有幾隻股票想問下你意見。

1. 3309
2. 1368
想了解你對呢2隻股票睇法

3. 1830
由2.x 見你講必瘦站但一直無入貨，見而加升到差不多10蚊
想問下合理區同便宜區位置係邊呢

謝謝你！

龔成老師︰

希瑪眼科（3309）有質素的，佢主要於香港及中國內地提供眼科服務，及銷售視力輔助產品及醫藥產品。

另外，睇翻佢，都尋找加大在中國擴展業務，係2019年透過收購眼科醫院於昆明及上海拓展服務網絡及在惠州設立一間新眼科醫院。

除了一線城市，佢亦係昆明及惠州等二線城市拓展服務網絡。

這股在業務上，的確有吸引力的，相信生意將會不斷擴大。不過過現時估值都唔平，現時估值略貴，基本上已反映了企業的增長力。長線投資不是不可，但就唔建議太大注。

特步國際（1368）不差的，生意與盈利都有增長，本身都算有品牌，不過盈利就較為波動，部分年份盈利出現下跌。但長遠仍是正面。

個別年份有生意上升但盈利下跌，反映成本增加，同時未能轉嫁消費者，又或者佢要用減價策略才能吸客，反映賺錢能力未必好強，質素有，但不能定義為最高之列。

整體都有長線投資價值，現價偏貴。等佢最少回2,3成，才好開始小注。

完美醫療（1830）長遠有發展，本身有一定的質素。而價唔平，$6/7算係合理區頂部。若你到平宜區，需要出現好大幅回調，才可以。

------------------------------------------------

Q22305：

講完投資，保險個part都想請教下老師

以3X歲女士有家庭，1個3歲小朋友為例，其實要投保（危疾）既保額大概係幾多先叫合理？（另有買醫療）

每個經紀講既都唔同，都唔知幾多先叫足夠

龔成老師︰

危疾，佢賠償係已一個指定金額計算，同醫療保不同。這筆賠償，無指定用途。

因此，危疾除了可用作抵銷部份醫療開支外(超出醫療保保障部份)，最重要係填補你因長期不能工作，所失去的收入。

由於危疾係一些大病，一般治療至休養，可能講緊係2-3年。所以，你可以用你2年年薪，作為基礎標準。

再按你現時和預期將來家庭開支狀況、保單條款等，再進行調整，咁就可以。

------------------------------------------------

Q22306：

龔sir你好，我現在持有 主要是收息股。正為退休作準備，還有少量其它股 等合適時機沽出換馬

現在有點舉棋不定，因為以下4隻收息股都是我比較喜歡的 但只能4選2:

1098 路勁
3383 雅居樂集團
604 深圳控股
1883 中信國際

有勞龔sir幫幫眼 打擾了 謝謝！

龔成老師︰

中信國際電訊（1883）業務穩定，整體質素算是不差，作為收息股係可以。

深圳控股(0604)和雅居樂集團(3383)都適合做收息股，但佢地負債較高，風險會高少少。

而路勁(1098)都有質素，但派息較受盈利所影響，作為收息股，就未必咁合適。

這些股票，現價都在理想，已經可以分注入貨，並長線持有。

------------------------------------------------

Q22307：

想请问Geely Auto 您又怎么看呢？

Xiaomi 现在的价钱算贵吗？


龔成老師︰

吉利(0175)本身的質素不差，擁有一定的銷售網絡及品牌，不錯的市場策略及定位，而又能把握中國汽車市場增長的機遇。

長遠來講，佢的品牌與發展在中國仍理想，2018年，吉利透過旗下海外企業，動用超過$500億人民幣收購戴姆勒股份公司9.69%股份。由于戴姆勒股權結構分散，所以吉利已經成為了戴姆勒集團最大單一股東。

另外，佢早前杭州灣新工廠正式發布純電動新品牌新車「極氪（ＺＥＥＫＲ）００１」，宣布吉利進軍高端電動車。

這些動作不單有利佢有中國發展，同時長遠，可能加快了海外發展速度。因此，這股長遠仍是正面的。

現時價位在合理區頂，至略貴。你預佢股價會波動，有貨可長線。如果現價入貨，小注都可以。

小米（1810）有潛力的，佢的產品性價比高，相信在全球好多個國家都會有市場，佢長遠只會進一步增長。

同時，佢建立的平台是佢長遠的增長動力，先賣手機，再利用手機的平台延伸銷售小米家電。長遠正面的。

這股可長線，現價略貴，回多1,2成，才開始小注會較好。

------------------------------------------------

Q22308：

龔成你好呀, 我一直有睇你既page同專欄, 好讚成你所講, 股票係應該要睇長遠, 加上近期短炒蝕過錢, 更加同意你的觀點。

因為都踏入中年, 加上疫情期間工作大受影響, 所以都好希望可以盡快學識投資,

近期自己心目中都mark定左兩隻, 希望可以請教一下你的意見 (唔知可唔可以咁樣PM你問, 如果唔得都唔緊要的。)

唔知可否請教以下幾隻股, 可長揸嗎?

- 中遠海控 (見佢升咁多一直冇買, 但前景幾好咁)
- 國泰航空 (一直在7蚊左右持有左好耐, 希望等到疫情完後)
- 醫思健康 (有新世界入股, 加上是醫美行業, 自己比較熟悉, 覺得前景不俗, 但之前又係升左好多, 一直未敢入)

多謝指教

龔成老師︰

我想你先明白一些投資概念，我地做財富增值，就係尋找優質企業，用一個合理，甚至平宜的價錢，去買入，並長線持有。讓其自然增值，以達至財富增值目的。

成件事，重點係「優質」之餘，買入價格都要係「合理」。

中遠海控（1919）主要從事提供集裝箱航運、集裝箱碼頭管理與經營服務。

整體的質素算是不過不失，雖然在行業有一定的規模與優勢，但行業整體的賺錢能力無過往咁強。

經濟好轉會對佢有利，因為始終是對經濟較敏感的行業，現時的股價已反映相關利好因素。股價大升後，其後之後較難有高增長，因為已反映了利好因素，反而預佢之後轉為平穩增長。

這股係有投資價值，但現價略貴，未係投資時機，要等佢回2、3成會合理翻d，我地才可以考慮。

而國泰（0293），坦白講質素只是一般。

其中一個風險，是油價，睇翻佢過往多年，油價對佢成本影響好大，令佢盈利十分波動，就算佢利用對沖，都唔係好成功，反而試過因對沖而蝕大錢。

另外，航空業對經濟週期較敏感，收入不穩，同時唔算係一個好賺錢的行業，因此這股的質素只是一般。

就算佢重組，得到新資金，只是比佢「捱過這一關」，並不是賺錢能力方面有改善。

若你持貨較多，建議等疫情過去，經濟好轉時，佢反彈就減持部份，去平衡風險。如果只係小注，你照長線持有都可以。

香港醫思醫療集團（2138）主要以ＤＲ　ＲＥＢＯＲＮ品牌提供醫學美容服務。企業都有質素的。

（１）醫療服務：包括整形外科手術、微整形療程及由集團醫生操作的能量儀器療程及一般診症服務，以及牙科（ＯＮＥ　ＤＥＮＴＡＬ及ＯＮＥ　ＤＥＮＴＡＬ　ＰＬＵＳ品牌）、中醫及眼科服務。

（２）準醫療服務：包括由已接受培訓的治療師操作的能量儀器療程，該等治療師已完成集團醫生主導的內部
強制性培訓。

（３）傳統美容服務：包括面部護理、按摩以及其他無創療程。

（４）護膚及美容產品：主要為集團的自家品牌寶特曼娜及瑞研雅。

業務發展不差，長遠有增長力，不過業務中短期會有少少波動。現價合理區頂至略貴。如果你資金較為充裕，現階段先入一小注，係可以。

否則等佢回多1成才入貨，值博率會較高。

------------------------------------------------

Q22309：

你好, 龔成老師。最近開始睇左你d 文章, 想試下投資股票, 本人沒有投資經驗, 最多只買過ibond, 我對小米, 騰訊, 港鐵, 領展等都有興趣, 但最近個價位好似唔係好夠平, 唔知入唔入市好,

除左上述股票外, 有沒有些係最近較平同值得入手的? 還是等待時機入手上述股票好呢?

本人33歲, 有價值港元$55萬的英鎊, 港元$20萬在銀行高息戶口(2.5 厘息), 如果投資股票的話, 我應該動用英鎊還是高息戶口中嘅港元呢?

動用英鎊的話, 現在係好價位嗎?(其實我一直都想等好價位時把英鎊轉返港元再放入高息戶口) 謝謝!

龔成老師︰

任何貨幣都可以無限發行，因此長遠只會貶值，唔係有一個財富增值的好方法。若你的英鎊無實際用途，建議你將英鎊換回港紙去投資。

如果你擔心匯價問題，你可以分注咁，慢慢換翻做港元就可以。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你33歲，應以增值為主，建議你用「平穏增長股」 + 「潛力股」作組合，去創造一個增值平台。除了用你現有資金，我都建議你用每月空出來的儲蓄，去做月供股票，去加大你財富增值速度。

現在你每月先用5成儲蓄做月供。其餘先儲起，用一邊月供一邊儲蓄的策略。

月供方面，你可以選擇投資在平穏增長股︰指數基金、金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)

或潛力股︰中生(1177)、福壽園(1448)、小米(1810)、安碩恒生科技(3067)、港交所(0388)、舜宇光學（2382）、阿里（9988）、騰訊（0700）、ＧＸ中國電車基金（2845）、三星FANG ETF（2814）。

大市現處於合理水平，那75萬資金，你可以先用一半，以"分注"形式慢慢入貨。餘下一半和每月儲蓄，就等大跌市機會出現，才大力度掃貨，並長線投資。

現價計，平穏增長股都在合理區，可開始分注入市。

而潛力股，暫只有安碩恒生科技(3067)、ＧＸ中國電車基金（2845）、騰訊（0700）、阿里（9988）、中生製藥（1177）、福壽園(1448)勉強算在合理區中上至頂部，可分注入貨，其餘都略貴，想買就要等一等。

------------------------------------------------

Q22310：

龔sir, 好感恩幾年前有緣睇到你專頁，一向有買股票，都是輸多贏少，直至睇你分享先開始改變投資概念，1177,1211,285,到1810我都獲利不少，已賣出部份，

再加部份儲蓄，買到一個小單位收租，雖然不算很好的物業，但是真的好開心，剛看到你分享別人的喜悅，我也要向你説多謝，感恩你無私分享

龔成老師︰

唔洗客氣，我都係希望透過這個平台，去分享一些正確投資觀念。

希望可以幫到投資者(特別係一些初階投資者)，知道一些較重要概念，從而令佢地更大機會，找住正確方向。

雖然，你現時已有一定成績。但緊記要保持學習，長線投資才會做得好。

而且，你所講的股票，都係有質素。如果你係較保守投資者，而獲利又較多，可以"升一倍，沽一半"。

但緊記大部份貨，應該保持持有。因為長線持有優質股，增值效果才會係最好。加油!

------------------------------------------------

Q22311：

你好呀, 我脫你有介紹ETF #2800 隻股, 我想問咩價位入好呀? 我本身流動資金唔多, 又還緊債, 但我又希望可以增加資金, 想睇下買邊一隻好?

本身知道ETF 股都係收息多, 好似比較啱我咁

龔成老師︰

首先，盈富(2800)是包括58間質素不錯上市公司股票的組合，這些股票有升有跌，但長期計，都有不錯的回報。

買入盈富主要有兩個回報(分別是股價升幅，加上股息回報)，股息不多，大約只有3%，而股價升幅，其實有升有跌，每年都會波動，但長期平均計，都有5%-10%，當然，這是不一定的。

現價計，算係合理區，已經可以分注入貨。佢係平穏增長股，有一定增長力，但股息唔算多。

若你目標係收息，可以選擇X恒生高股息率（3110），是一個投資收息股的基金，追蹤恆生高股息率指數之表現。

可以視為收息股的組合中其中一員。這基金可投資的，現價合理，可分注。佢是投資香港大型，較穩陣，派息較高的上市公司。

這是不差的收息組合，但增長力不強。

至於投資邊個，你就睇翻你自己投資目標。一般情況，如果你係年青至中年，我會建議你投資盈富(2800)，因為你應先做好財富增值部份。

若你年紀較大，接近退休之年，穏定現金流去支援生活，才是你投資重點，故X恒生高股息率（3110）會較合適。

你可以因應自己人生階段，去進行配置。

另外，你要審視翻自己現有貸款，若息口較高，我優先清還貸款，以免影響長線回報。

------------------------------------------------

Q22312：

想請教1302 6988 及 9666。

龔成老師︰

先健科技（1302）為心血管及周邊血管疾病及紊亂所用先進微創介入醫療器械的研發、製造及營銷商，主要提供先天性心臟缺損封堵器（包括ＨｅａｒｔＲ、Ｃｅｒａ及ＣｅｒａＦｌｅｘ等三代系列）。

雖然近年生意都有增長，都有潛力，但始終規模細，不確定性較高，業務可能有潛力，但現時的市盈率處高水平，值博率較一般。

現價偏貴，要有好大幅回調，才好開始小注入貨。而且此股盈利都好波動，只宜小注投資。

樂享互動（6988）是中國的效果類自媒體營銷服務提供商，利用商業智能技術為行業客戶及自媒體發佈者提供服務。

睇翻近年的財務數據，佢增長力是有的，但上市前的數據參考價值較低。

相信佢長遠，業務都有增長力的，公司話佢自己能盈利高增長。但就唔平，小注持有可以。

金科智慧（9666）有質素。

佢係中國西南第一的綜合智慧物業服務商，如果按佢綜合實力計，集團自2016年至2020年連續五年被中指研究院評為中國物業服務百強企業十強之一，自2015年至2020年，連續六年西南地區排名第一。

收益主要來源於四條業務線：物業管理服務；非業主增值服務；社區增值服務；及智慧科技服務。

包括各類住宅及非住宅物業，包括但不限於中高端住宅、商業樓宇、產業園、政府公建、高校醫院等其他物業。

生意與盈利都增長理想，暫時睇佢都有投資價值，但負債高會係一個扣分地方。此股投資係可以，只要唔好太大注，咁就無問題。相信長遠有發展的。

------------------------------------------------

Q22313：

老師你好，本人和太太各36歲，上年剛剛買樓尚有430萬貸款供29年，月入大概10萬，每月有4萬流動資金作投資，再加現金90萬，

想在3年後儲夠3百萬買多一層樓收租，本人唔識投資，想問下有咩投資組合可以加快達成目標，謝謝

龔成老師︰

我假設投資上進取少少，令你可以做到有回報有12%（連股息再投資）。你每月投資$40000 + 90萬現金，3年後大約會增值至300萬。

但你要明白，3年只算得上係一個中短期時間。最終實際回報，可能會較為波動，風險會較高。

從資產配置角度，你現時已經有一個物業，如果你咁短時間，又在增持有一個新物業。

除左成個組合會好偏重物業之餘，太短期內買2個物業，都會受較高價格波動性風險。(一般2個物業，買入時間最好相隔一個週期，大約8年左右。)

我建議你按部就班，透過月供和買入優質股，去為自已資產作增值。到你累積到一定金額，足夠你買入第二個物業之餘，都可以留下若干優質股增值才出手，會較理想。

財富增值方面，以你36歲，可以選擇一些「平穩增值股」+「潛力股」作投資目標。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄，另一半就先儲起架策略。

若你投資知識不高，可先較集中在平穩增長類股，至於潛力股，只宜小小注。到你提高投資知識後，才慢慢增加翻潛力股比例。

大市現處於合理水平，那90萬資金，你可以先用一半，以"分注"形式慢慢入貨。餘下一半和每月儲蓄，就等大跌市機會出現，才大力度掃貨，並長線投資。

------------------------------------------------

Q22314：

1) 我又如何得知此公司的每股盈利有冇加上物業重估呢？

2) 我想計比亞迪電子的合理股值，唔知我計得啱唔啱？

比亞迪電子現價$46.35

市盈率 水牛網沒有提供2021年市盈率所以我用9年
2020年 7.483 2016年 7.871
2012年 9.333 2013年 10.04
2018年 10.24 2014年 12.02
2017年 12.50 2019年 14.13
2015年 16.46

市盈率合理區域是 9.333 ～ 12.5

每股盈利 資料來自Aastocks
2016年 0.6112 2017年 1.3787
2018年 1.1044 2019年 0.7935
2020年 2.8725

5年平均值係1.35206，估計公司盈利還會持續增長，所以保守估計每年增長10%

1.35206 x 1.1 = 1.487266

股值合理區域是13.88 ～ 18.59

不知有沒有計錯，因為現價才$46.35相差太大。

3) 我最近留意緊國藥控股（1099）和中智藥業（3737）。我用阿sir你初階班比的企業評級表頭兩頁查過這兩間公司，機本上兩間公司都過關雖然唔係全部100分。

我睇兩間公司的官網都寫得自己點樣勁，但兩間公司的市盈率都低過10倍。流動資產-流動負債係正數。

初步睇價錢也在合理區之下。

想知道為何這兩間公司的市盈率會咁低？值唔值得投資？

謝謝！

龔成老師︰

1) 你可以睇年報中的損益表，就會知道佢有無物業重估成份。

2) 你現時這個計法，概念上係無錯。但做好初步估值之後，我地要再考量，到底這個估值，係唔係足以反映企業現時價值。

比亞迪電子(0285)近年賺錢能力有所提升，我地用過去5年平均數字，就可以能出現過於保守的情況。

因此，我地會以佢最新一年每股盈利作為指標，即係用HKD2.8725。

由於集團始終係代工企業(雖然有一定技術)，市盈率唔會太進取，我地會用佢過去10年中間4年數字，大約為10-12倍。

之後，再加多10%緩衝區。合理價大約為︰HKD26-38。

3) 其實就算係相同行業，只要業務性質、潛力、風險等不同，個市盈率都可以差好遠。

國藥控股（1099） 質素都可以，但增長力已經不算好強。

睇翻佢資料，佢係中國最大及具實力的醫藥分銷和零售企業，集團在中國主要城市以直接經營和特許經營方式管理零售連鎖藥店網絡，向終端消費者銷售藥品及大健康產品。

此股有質素，但賺錢能力唔算高，而增長力唔算太強，是平穏增長型。佢有個比較大問題就係負債比較高，而度會扣左D分，整體而言此股有質素，可投資，現價合理的。

由於佢已經係平穏增長型企業，增值潛力不及中生(1177)這類潛力股高，故市場給予市盈率，都會較低。

而中智藥業（3737）則相反，由於企業規模和品牌不大。雖然佢近年盈利增長係唔錯，但市場會較擔心，佢這個優勢，能否長線維持。

因此，會給予中智藥業一個較保守的市盈率，以反映當中的潛在風險和不確定性。

此股現價合理，但由於存在一定確定性，故只宜小注。

------------------------------------------------

Q22315：

我個人睇法認為。新世界，長期一定會好番，因為佢再俾人爆大鑊就可以執笠，但問題係驚短期甚至中期都有機會發現更多問題，始終起樓唔係一時三刻，

而今次事件反映QC部門同埋管理層有啲得過且過，其他項目都有一定機會有類似問題，只係未俾人爆或者佢地禁住咗，令中期不確定性同埋風險增加

另外留意到美國嘅經濟數據，FRB話經濟雖然開始復甦，但基層勞工市場仍然麻麻地，而高通漲相信係暫時性，仍未係時候改變貨幣政策。

咁樣會唔會令成個市場失衡，為市場復甦帶黎壓力？

龔成老師︰

中短期，新世界(0017)股價難免會弱。

但我地睇翻佢過去咁多年，其實都無出現過重大問題。所以，我會偏向覺得，個營運和監工上風險，未到話十分高的狀況。

長線投資價值，依然存在，但你預佢短期會較波動。

疫情雖然未算清零，但大部份已發展國家，已經開始穏定。相信經濟會慢慢向好，但這個唔會係一時三刻就出現，可能要幾年時間。

而中短期，依然會有好多不確定因素。例如不少發展中國家疫情未受控，對不少消費市場，或者不少企業的產業鏈，都造成不同程度的影響。

但相信這都是中短期，我都分析最好都係集中翻，係企業本質。外圍經濟因素，各國貨幣政策，係有參考價值，但佔比重不應太多，重點都係放係企業本身較好。

------------------------------------------------

Q22316：

Sir,水桶2 有咩好選擇啊？日清和雅生活算嗎？還有甚麼好選擇的？我今年34歲每月可儲2萬，現在儲一萬現金和一萬每月買d 股票的

暫時如下：

1. 科指 ETF 3032 15000股 $8.37
2. 小米 1810 1000股 $27.48
3. 阿里 9988 300股 $235
4. 京東 9618 100股 $309.5
5. 平安好醫生 1833 100股 $87.8

6. 日清 1475 3000股 $6.87
7. 京東物流 2618 100股 $40.36
8. 雅生活 3319 250股 $36.7
9. 福壽園 1448 2000股 $7.5
10. 鐵塔 788 10000股 $1.545

現金：35萬

龔成老師︰

日清(1475)和雅生活(3319)都係唔錯的水桶2股票，你現有持股，都係適合你。

以你34歲，可以投資「平穏增長股」和「潛力股」。你每月5成儲蓄，即是用$10000做月供。其餘先儲起，用一邊月供一邊儲蓄的策略。

選股上，你可以投資在平穏增長股︰指數基金、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、粵海(0270)、領展(0823)。

潛力股可選安碩恒生科技(3067)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）。但佢地波動性和風險會較高，你要自己平衡。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

現時大市只是合理區，你現有35萬資金可以再投入多10-15萬，用"分注"形式，慢慢買貨。餘下資金和每月所儲倒的資金，就等大市出現一定程度的下跌，才大力度掃貨，然後長線投資。

------------------------------------------------

Q22317：

首次置業 按揭多好定係少好？

依家開始有個好習慣就係先儲蓄投資 再消費，一個月儲＄5000 另外$5000攞嚟投資 係3-4年之後有＄100萬 有冇問題？

龔成老師︰

其實多與少，跟你首置無關，我地主要係睇佢現行息率。現時貸款息率低，我地應該盡借，令我地可以空多更多資金，作其他投資增值。

你現時養成這個先儲蓄和投資，之後才消費，係一個非常好的習慣，你保持。

以你2X歲，可以選擇一些「平穩增值股」+「潛力股」作投資目標。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄，另一半就先儲起架策略。

由於你投資知識不高，因此可較集中在平穩增長類股，至於潛力股，只宜小小注。此期間，你最好是努力提高投資知識，才慢慢增加翻潛力股比例。

餘下現金就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

假設投資回報有10%（連股息再投資），你每月投資$10000，4年後大約會增值至55萬。若你要達至100萬，就需要將金額升至$14000和供5年，才可以做到。

------------------------------------------------

Q22318：

師父1212 利福下至合理價低部5.95 ， 值得加注？

近曰消費股如六福，周生生， 莎莎都上番不少，何解1212返而向下？

啟德項目應該有利佢發展對嗎？

另外完美醫療已升至over $8 , 稍貴， 應否放一半？

3069 ETF 你有什麼意見？

龔成老師︰

我地投資，唔好太在意中短期走勢。我地要睇翻個重點，就企業自己本身狀況。

利福國際（1212）主要從事經營生活時尚百貨店及其他零售業務，以及物業發展及物業投資業務。佢透過崇光在香港專門經營百貨店。

中短期一定弱，但長遠仍會正面，不過回勇就要時間。同埋要留意，佢負債較高，因此唔建議投資太大注，現價合理區中下部至底部。

啟德項目，對佢長線發展係有利。但股價唔會一時三刻反映出來，要需要時間。

完美醫療（1830）長遠有發展，本身有一定的質素。

睇翻之前的疫情，佢身處的行業受影響，但佢的現金流及財務數據都唔算差，這點可以想象到，當正常的經營環境，佢的生意一定唔錯。

加上佢的野心愈來愈大，本身有一定的技術，同時不斷將香港的業務模式複製到其他海外地區，我見佢加強了發展其他地方，因此發展不差。

這股有長線投資價值。

之前公佈業績理想，但業績後股價升左好多，雖然我在業績後調高左佢企業估值，加上管理層加大了企業發展的力度，前景正面，但現價點都都有少少貴。

如果本身有貨，就長線持有。若你持貨較多，現價沽少少獲利，都係可以。

華夏恒生生科（3069）主要係追蹤恒生香港上市生物科技指數之表現。

指數包含51隻成份股，當中有「藥品」、「⽣物技術」等公司。較為人熟識的，有藥明生物（2269）、京東健康（6618）、中生（1177）等等。

隨著人口老化和人均收入增加，對優質醫藥的需求只會有增無減。此股都有質素，可作長線投資。但你預佢會較波動，最好用月供模式儲貨，並長線持有會較好。

------------------------------------------------

Q22319：

龔老師你好，我今日34歲，未婚，冇乜經濟壓力，現時未有結婚及生育打算，月入二萬，月儲大約七千，現時擁有資產大約二十萬，其中八萬現金，十二萬股票。

經過你前三個月的教導，我購入多左水桶二的股票，現在股票組合比例大致平衡，現時持有的股票如下：

水桶1
1177 中生製藥 2000x$7.27 11.7%
3718 北控城市 8000x$0.99 6.4%
3067 安碩恒生 100x$16.06 1.3%
1448 福壽園 2000x$7.46 12.1%
3319 雅生活 250x$32.85 6.6%
2057 中通快遞 50x$230.4 9.3%

水桶2
823 領展 100x$74.55 6.0%
2800盈富 1000x$28.38 22.9%
2388 中銀香港 500x$25.1 10.1%

水桶3
778 置富 2000x$8.34 13.5%

快速增值：平穩發展：收息資產=47:39:13

1）請問現時股票組合比例平衡嗎？我打算長期持有無問題嗎？

2）現在我目標先儲現金，等儲到現金佔50%，才加水桶一股票合適嗎？

3）請問3718北控城市資源質素無問題嗎？現價（$0.96）是合理價還是平？我$1.92同$1.28都入左一手，現價可以再分注入嗎？值博率大嗎？等可以再等下？

還有等$15買3067，或等$80買平安好醫生，或等$23買小米，哪個值博率大些？謝謝指導！

龔成老師︰

1) 現時配置係可以，你長線持有，係無問題。但留意中通快遞(2057)始終唔係上市太耐，要再過一些時間，才可以見真章，所以暫時唔好再加注。

2) 現時大市在合理區，現金應佔3-5成左右。目的係等大跌市出現時，我地可以有資金入市買平貨。

而目標唔係集中係水桶1，因為水桶1雖然增長潛力大，但風險都高。建議你視乎當時平貴，再去慢慢平均分配在水桶1和2，咁會較穏當。

3) 北控城市資源（3718）有質素的。

佢主要在中國從事環境衛生服務；危險廢物處理業務；以及廢棄電器及電子產品處理業務。

環境衛生服務方面，佢的服務涵蓋綜合道路清潔、垃圾分類、垃圾收運、垃圾轉運站管理、公廁管理、糞便收運、綠道養護、河道保潔服務。

同時自2019年起開始，佢有係北京的若干商住區域提供物業管理服務。

過往財務數據不差，有一定的增長力，有長線投資價值。之前股價貴，現價落翻D，大約合理區中下部。現價加小小注，都可以。

至於平安好醫生（1833），無貨現價小注都可以，但由於佢不確定性都高，要控制注碼。

而安碩恒生(3067)和小米(1810)都有質素，但前者係一籃子科技股，較有分散風險能力。

3067現價中合理區上部，而小米就要回多1,2成，就算合理區頂，才可開始分注入市。以現價計，安碩恒生(3067)值博率會係3隻當中較高。

------------------------------------------------

Q22320：

龔成老師，我44，現在有以下股票，共35萬，另有15萬現金，月入2萬+佣金。

170萬按揭，供25年，每月供樓$7700，因為依家巳44歲，好希望可以10年內供完，請問我應該點做可以達到這個目標?

煤氣 18手
港鐵 3手，正在月供1000
中國鐵塔 5手

領展 1手，正在月供1000
盈富 2手，正在月供1000
阿里巴巴，上月開始月供1000

我有諗過每年年尾將花紅約2萬還按揭去減年期，希望可以加快完成供款，做法正確嗎？

龔成老師︰

以你44歲年紀，你持股和月供組合，都係合適的。你現時可以用這些增長股，去累積財富。

由於現時按息不高，我較建議資金先用作增值，而唔係去還款。這樣做，成個財富增值效率，才會較高。

現時大市只在合理區，每月儲蓄唔好盡用。最好留有部份，連同現時的15萬現金，一齊等大跌市出現時，可以用來掃貨。

我假設投資回報有10%（連股息再投資），你每月投資$4000 + 50萬資產(股票和現金)，10年後大約會增值至200萬。

到時你可以因應情況，再決定先還款(若到時息率好高，係可以先還)，還是保持增值。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q21821-Q21840）

Q21821：

hi，龔sir,一直都有留意開你嘅Facebook ,本人30歲，都有買開股票有好幾年，都成日比老婆笑係燈神，買襯啲股票都跌，但放曬就會升⋯

就好似金蝶國際，吉利汽車，碧桂園服務，移卡⋯哩啲，買入時其實都係低位、但經唔起考驗，好早就會放曬⋯想請教一下，應該要點樣調整好心態

仲想問下百富環球同微萌點睇，百富環球5蚊時買入，但跌到4.7時同樣放左～

龔成老師︰

如果你每次投資都是「輸」，即係你存在一些核心性問題。譬如一些錯誤的投資觀念。

記住，正確和正常，是完全不同的事，多人採用，並不代表係正確的方法。

首先﹐股票是企業﹐你要分析企業的本質去投資股票。買股票也不是「賺差價」，而是享受企業成長以及產生的股息。

現你的情況，買入股票唔係無質素。但你錯用短線投資，賺差價的思維去諗這件事。令你可能一見佢跌，你就以為有問題，即沽貨，才做成你過去出現的情況。

往後，你只要以「長線地，投資優質股」，作為你投資策略。

緊記，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

而且將來再投資前，要先做好估值。價格偏貴，就唔入貨。等佢回到合理，甚至平宜區，才分注吸納，或者利用月供去儲貨。

我好有信心，你會結束過往一直虧損的狀況。

百富環球（0327）係一家電子支付終端機解決方案供應商，主要在中國從事開發及銷售相關產品並提供相關服務。

佢產品及服務包括移動終端機、消費者操作設備、非接觸式讀卡設備及提供售後服務等。佢的客戶大致可分為收單機構（如支付交易處理商及金融機構）及商戶服務供應商。

質素都有的，但未算好強，同時業務與股價都有點波動。現價合理區上部，這股係有長線投資價值，但又未算好值得持有太多。如果小注長線可以的。

微盟集團（2013）集團主要在中國從事提供軟件即服務產品及營銷服務。

佢的產品分為「商業雲」解決方案、「營銷雲」解決方案及「銷售雲」解決方案三類。

「商業雲」可助商戶開設線上業務並助彼等提升顧客參與度、轉化率、收益及忠誠度。「營銷雲」通過大數據分析能力及ＡＩ技術為商戶提供智能營銷服務。

這些都是將來發展的大趨勢，從業務潛力上，的確是有的，見佢財務數據的增長都強勁。但在估值上都唔平，所以，如果投資，這刻小注好了。

------------------------------------------------

Q21822：

你好龔Sir! 我係啱啱上完股票初階班嘅學生嚟，有野上向你請教一下。

福壽園(1448)，喺堂上龔Sir你話呢隻係水桶1。 我好簡單咁睇返佢嘅市盈率，我以佢最近7年(計埋2021)嘅市盈率揾返佢嘅中間3年
27.4 27.44 28.06

之後我再搵近平均5年每股盈利係$0.2226(人民幣), 即係$0.27(港幣)。

咁佢嘅合理股價就係
$0.27x27.4 - $0.27x28.06
=$7.4 - $7.6

而現時嘅股價係$7.4。咁我可唔可以推論現時喺合理區嘅低位?

同時我根據篩選三步法分析，第一二步都冇問題，但去到第三步，我想揾佢嘅同行比較時，又唔太揾到真係同福壽園類近嘅企業，咁嘅話我上面嘅推論會唔會唔穩陣? 定係我會睇漏左其他因素?

謝謝你

龔成老師︰

你用佢近7年市盈率，再取中間3年，和用每股盈利5年平均，係可以。

但取出相關數據之後，你要都睇翻，到底這些數據，係唔係足以反映現時企業和行業發展的真實狀況。

你見集團盈利持續都有唔錯增長，故用5年平均每股盈利時，應該再加上5年的年均增長率(約16%)去做指標。(即大約HKD0.37)

另外，由於近年中國政府，對行業有不少新指引，主要方向都係控制價值，避免殯儀業相關產品和服務，出現定價過高情況。相信未來，殯儀業盈利會回到較合理水平。

因此，你計出來的個市盈率，需要打折扣，來反映這些因素，你預大約合理市盈率係15-20倍。

合理價值︰HKD5.5 - 7.4，故現價算係合理區頂部，無貨可先小注。

殯儀業本身好分散，而福壽園係當中龍頭，故真的較難找到相近對手作比較。因此，你係做分析時，應較集中在企業本身和整個行業發展。

最後，係計出合理價值後，你要留意佢是否相距多於20%。

若好似你計出的答案$7.4-7.6，區間太窄，我地就要將合理價值上下限，再額外加多10%緩衝區，令佢更能反映合理區情況。

------------------------------------------------

Q21823：

龔先生你好!我是最近才開始接觸 貴專頁，也報了基礎班，很欣賞你對投資和教學的熱誠，也明白了為什麼你這樣成功！

單親媽媽 兩子就讀小學，每月支出$27000，沒有工作 要照顧兩子

賣樓後現存270萬，希望以投資作被動收入，請問哪種形式或組合較適合我？

謝謝解答

龔成老師︰

這筆錢點樣用，要視乎你實際生活狀況而定，當中考慮重點，係住屋和就業問題。

首先，如果你長線住屋無問題的話，這資金可以用增值。若你有再買自住屋的需要﹐而又要短期內進行，就要先扣起相關支出。

另外，你現時無工作，若只係短期，你可以預留一筆生活費，之後餘下部份，就可以投資「平穏增長股」 + 「潛力股」作增值。

若你預期會較長時間，都無法工作，或者只能有限度咁工作。你就可以考慮，將部份資金，買入「收息股」，去創造現金流(即係股息)，以舒緩日常開支的壓力。

但由於投資係一個長線計劃，我建議唔好急住行動。等你上完堂，有一個完整概念，才去進行會較好。
股票班見!

------------------------------------------------

Q21824：

老師，想問下653，見佢主席換左人，舊既大股東持股量都賣得7788，新人事新作風，股價可否睇好?

另外，請問點睇2148，可否長期持有?
謝謝

龔成老師︰

卓悅控股（0653）自更換主席後，加強了集團在電商方面發展，但長線有無成效，還有待觀察。

若用以往集團表現，只算是一般般。集團在過往的經營環境都唔算好好賺，經常出現虧損，近期面對疫情，情況更弱。

相信佢疫情過後會好翻D，但根據過往表現來分析，長遠的投資價值唔算高。

VESYNC（2148）有少少潛力的。

佢係美國小家電線上市場的市場參與者。根據報告，在小家電零售商中，佢係美國就通過亞馬遜產生的零售額而言排名第三及通過所有線上渠道產生的零售額而言排名第五。

係美國通過亞馬遜產生的零售額而言，其空氣淨化器於其類別中排名第一，空氣炸鍋於其類別中排名第二。

佢業務主要專注於線上營銷及銷售品牌下的自主設計開發的小家電及智能家居設備。主要通過電子商務交易市場，主要為美國最大的電子商務交易市場亞馬遜銷售其下的產品。

佢的產品主要銷往美國、加拿大、英國、德國、法國、西班牙、意大利及日本等數個國家的用戶。

業務不算差，發展有潛力，但企業規模始終較細，業務未穩定，加上現價略貴。整體都有風險。

這類股，小注投資都可以，但就要明白當中的風險。

------------------------------------------------

Q21825：

想向龔成老師發問：本人47歲，月入4萬。 與伴侶共同擁有一自住物業（樓按還有$4百萬）。互相財政獨立，對分日常開支包括供樓。

現在我每月花費$2萬（即日常開支包括供樓）和堅持貯蓄$2萬。

持有1,000股00016 和 3,000股00175, 現金流$50萬。

雖然工作穩定，但相信沒有打不破的飯碗。懇求龔老師的意見，我該如何策劃財務和投資以致可以盡快財務自由。 謝謝。

龔成老師︰

你現時已有自住屋，係財富組合上，物業類佔比重很高。所以，我地新資金應先投入優質股，令成個財富組合變得更平衡。

以你47歲，都有一定增值需要，你可以選擇一些「平穩增值股」+「潛力股」作投資目標。

我地投資前，先要做好防守部份，建議你先扣起12萬(即半年開支)作應急錢，才開始投資計劃，會較穏妥。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄(即$10000)，另一半就先儲起架策略。

由於你投資知識不高，因此可較集中在平穩增長類股，至於潛力股，只宜小小注(<2成)。此期間，你最好是努力提高投資知識，才慢慢增加翻潛力股比例(最多3-4成)。

另外，你現時組合中，新地(0016)佔比重好高，個別企業和行業不要佔組合15%和30%以上，否則會有過度集中性風險。

但你不用沽出，用新資金慢慢調整個比例就可以，但暫時不要再投資地產相關股票，去平衡風險。

現時大市只是合理區，你可以用多5-10萬，用"分注"形式，慢慢買貨。餘下資金和每月所儲倒的資金，就等大市出現一定程度的下跌，才大力度掃貨，然後長線投資。

如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q21826：

龔sir,早晨，請問京東sw有10萬蟹貨平均315蚊 先平價。 京東物流已上市，係咪如果阿媽京東sw算係高位，分拆業務，阿媽就會跌返最少50蚊出黎?

2～3年都返唔到300蚊？

另外，我排左你d書成幾個月（哈哈）

龔成老師︰

你這個計法不正確，其實分析上市，只係集團將部份業務上市去集資，從而得到發展資金之餘，又可以釋放內在價格。

就算京東物流（2618）上市，其價值依然存在係京東(9816)之內，因此唔會因為分拆上市，而出現你所講的情況。

另外，你要明白，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

京東（9618）業務有質素，發展仍是正面，不過現價就唔算平，算合理區上部。

至於幾時會上翻$300，我預計唔到。但此股有投資價值，長遠要回到$300，相信問題不大。

只要佢現時佔你組合，唔係好多，你照長線持有就可以。

至於書本，圖書館的確好多人在排。如果你有需要，建議你去買。因為用來做記號，抄筆記都會較方便。

------------------------------------------------

Q21827：

老師...你好! 本人39歲，有兩個小朋友，與先生月入8萬，現租住公司提供的房屋，持有三個物業，收租足夠供款，其中兩個十幾年前購入，

因為呎數太細(under300呎實用) 現在放賣中， 想用兩間細樓換一間大樓(700呎，千一萬，30年的二手港島樓地鐵上蓋，需借300萬)繼續收租，for 15~20年後退休一家人住，

如果換樓需付印花35萬，值得嗎？定等退休先換樓呢？ 層樓到時已經五十幾年樓齡，對於樓齡太大有問題嗎？

現金100萬，有少量股票，但懂選股，蝕過三十多萬，所以敢買多，麻煩老師比d意見我，感謝老師。

3033 $8.2 8400股
914 $47.1 1000股
3918 $9.28 2000股

龔成老師︰

由於你現有2個細單位，呎數太少，連一個基本家庭需要的大小，都未達到。長線投資價值較弱，建議你找機會將佢換其他較大單位，唔好到退休先去換。

地鐵上蓋樓盤，始終有一定潛力，但由於已有30年樓齡，你要睇翻佢幾時會做樓宇大維修，因為這個是其中一個較潛在成本。

到你入住時，都已經50年樓齡。就算保養得再好架樓，相信都會出現老化，你要預備一定維修預算，係你退休入住時，甚至之前就要動用。

除左以上2點，你還要了解佢現時租金回報率，和長線增長潛力(如附近未來發展、交通配套等)。如果這幾個因素都過到關，那就值得你多花35萬印花稅去投資。

當然，若你退休時真係太殘舊，你都可以用佢去換另一間較新的自住樓，但相信當中會有一定差價。

因此，你現時可以利用優質股去增值，為退休所需資金，和潛在可能換樓的成本，作準備。令自己到退休時候，有較多本錢在手，令可選擇的方法也會較多。

至於財富增值方面，你現時組合太偏重物業類，令成個組合十分不平衡。因此，你新資金要優先放入股市，去調整翻個財富組合比重，咁會較好。

我地開始新投資前，最好先要找出你過往虧損原因，以免再出現不利情況。

你現時持有股票，都係有質素和適合你。我估計都有一定選股能力，大致能判斷企業好壞。但你都蝕過30萬，若不是選股出問題，較大機會係未能定平貴，或者用左短炒模式去投資。

記住，我地投資股票，就等同投資一間企業。就算再好的企業，都要時間成長，故必須長線持有。中間可能有些波動，但只要佢長線質素無變，照持有就可以，唔好太在意中短期波動。

若你對定平貴，無乜信心，又或者經常比大市氣氛影響，見多人買就衝入市。我建議你用月供模式去儲股票，會較安全。

以你39歲，可以選擇一些「平穩增值股」+「潛力股」作投資目標。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄，另一半就先儲起架策略。

潛力股：安碩恒生科技（3067）、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814），但就要明白波動性比上述會高左，同時風險大左，你要自己平衡。

大市現處於合理水平，那100萬資金，你可以先用20-30萬，以"分注"形式慢慢入貨。餘下資金和每月儲蓄，就等大跌市機會出現，才大力度掃貨，並長線投資。

------------------------------------------------

Q21828：

龔成老師，你好，我今年33歲，月入2.5萬，另有物業收租1萬 (已供滿，未來婚後會收回來住)，每月平均支出1.5萬。

現有現金 $60萬，現開始進行月供股票：

#2800 - $5000
#823 - $2000
#1398 - $1500
#270 - $1500
#3067 - 每個月買1-2手

目標: 穩定收息，提早退休 (或為興趣返工)

屋企人已經失業2年(現63)，再過2年可以拎出強積金 約$60萬，現在考慮有什麼方案可以令到佢每月有穩定收入($2500-$3500)：

1, 購買保險公司的每月派息基金;
2, 幫佢買高息股 (5-6%)如 #778, #941, #3988;
3, 未諗到

老師，想請問我屋企人的情況可以有什麼更好的選擇，希望可以給我意見。

龔成老師︰

先講你本人部份，我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你33歲，應以增值為主，建議你用「平穏增長股」 + 「潛力股」的組合。

現在時大市只在合理區，你每月儲蓄不要盡用，建議先用5成儲蓄做月供，其餘先儲起，用一邊月供一邊儲蓄的策略。

你現時月供股票都合適，但有少少保守。建議你可以增大潛力股部份，以你年紀計，可以佔5成。但若你投資經驗較淺，或者相保守d，就要向下調整。

另外，工行(1398)只係收息股，增長力好一般，唔建議你用來月供。

潛力股︰中生(1177)、福壽園(1448)、小米(1810)、安碩恒生科技(3067)、港交所(0388)、阿里（9988）、騰訊（0700）、ＧＸ中國電車基金（2845）、三星FANG ETF（2814）。

現時大市只是合理區，你現有60萬資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

到你累積到一定資產，你就可以慢慢換成收息資產，透過其現金流，達至財務自由。

至於你家人部份，由於佢地已好近退休之年，投資目標會同你不一樣。以佢地人生階段，應集中係收息資產類，去創造現金流，來支援退休生活上的支出。

你所講的派息基金(我建議考慮用3110)，和高息股都係可以。

如果你家人希望每月有$3000現金流，以股息率6%計，需要本金60萬。

因此，你可以建立一個「收息股」的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）或收息基金(3110)都可以。

如果你家人能承受到風險，有些更有超過8%、10%的高息股，但股價就略有風險，要自己衡量，佐丹奴國際（0709）、中石化（0386）、互太紡織（1382）等（記住，股價略波動，只能小注）。

(你可睇下我本《50穩健收息股》當中仲有好多)

但要留意，現時股價只是合理，未到平宜，因此買入時宜分注，同時不能用盡現金。要留有部份，等大跌市才入貨。

------------------------------------------------

Q21829：

龔老師你好，本人30歲全職主婦，老公今年41，月賺3萬，一個月大約草到6000左右，有兩個小朋友，冇物業冇供樓。

資產如下：

黃金暫存5粒一兩重
港股有大約12萬，
2手匯豐005「44$，打算收息」
1手小米「24.5」
1手中國人壽「16.08」（打算18$離場）
1手868信義玻璃「高價26.9」

流動現金有5萬，外幣有4萬「留著旅行用」

想問一問868今年可以一直長持嗎？定要止賺離場？今日由31.3跌到30.4，未來兩日派息！所以好困擾！如果止賺離場又應該轉碼邊啲岩我？

因為暫時不考慮加錢到股票帳號，其他現金先留，股市下跌先入市

龔成老師︰

以你30歲計，應以增值為主。匯控(0005)只是收息股，增長力好弱，唔適合你這個年紀。你可以減持部份或全部，轉至其他增長股，對你較有利。

中國人壽(2628)近年增長力弱左，質素只係中等。你可持有，但唔好再加注。若相換碼，都係可以。

至於小米(1810)和信義玻璃(0868)有質素，都適合你長線持有。

你要記住，當一隻股票股價下跌，你一定要了解當中原因，基本上，股價中短期上落好正常，但如果上落太大，就要了解翻當中的事情，有無一些影響企業核心的因素。

信義玻璃（0868）近年的增長力弱左，不過，佢在技術上的行業優勢仍在，相信長遠仍是正面，不過就未必是高增長的類別，潛力度比過往略有減少。

加上佢不斷將較高增長的業務分柝左上市，令現時的信義玻璃增加，只是平穩類。你預佢中短期會比較波動，要長期先見到收成，現貨照持有就可以。

而黃金無現金流，我地持有佢，主要係為左對沖金融市場的突發性事件。因此，唔需要太多，大約佔組合3%就可以，而且以實金持有最好。

現時大市只在合理區，資金不宜盡用。你5萬可以留待大跌市才出手，咁會較好。

但同時間，你可以用每月儲蓄，進行月供股票。每月先用$3000月供，其餘儲起，同樣等大跌市機會。

現時你們資金較少，可以先集中係優質股，來進行增值。但長線計，當你累積到一定財富，就要慢慢加入物業類，成個財富組合才算平衡。

------------------------------------------------

Q21830：

阿sir 關於第七課的年報問題，想問這個新的租貸會計制度好像有點兒扭曲左真正公司實際情況，當我們分析企業的情況又要不計才有真正的意義，那為什麼需要有這個新的會計準則？有什麼好處？謝謝你！

這個會計數字對企業的情況有什麼implications?

龔成老師：

這是一個新的會計準則，全香港都會用，能夠反映企業「租金」的風險，因為過往不當負債，現時已變成負債，就能更有效反映風險。

但對於零售企業，我地過往分析的指標，同現時最新指標，就會有所不同，所以我地在一些量度佢是否合格的財務指標時，最好有合理化的調整。

------------------------------------------------

Q21831：

Hello龔Sir！很高興認識你，我是你股票班學生，剛上完你最後第八堂，無論在心態、理念、技巧、智識都增進不少

在此再次衷心感激你的無私教咗我好多嘢，希望將來你能在財務自由路上更上一層樓和更加Succeed！

還有在你課堂及FB帖文上的教學, 令我清晰了解選股策略和重要性！

龔成老師︰

多謝讚賞！

我只是盡力，將我所學、所研究，投資及成功的方法、技巧、心得、經驗，教大家，這些方法好多成功人士都做過，我只是用翻這方法，並教翻大家。

你要保持進步，多溫書，多用評估表，加油！

------------------------------------------------

Q21832：

你好，想向你請教本人的投資問題。你好！本人仲有6年便退休，月入$3.5萬，每月約有$13000作儲蓄，希望在2年後可以資產增值至100萬，現時持貨如下：

1177 @8 / 4000sh
762 @4.82 / 6000sh
1972 @17.7 / 400sh
1810 @30.58 / 200sh

6060 @41.03 / 200sh
788 @1.37 / 4000sh
9988 @239.27 / 200sh
883 @8.56 / 3000sh

2382 @149 / 400sh
939 @6.79 / 1000sh
282 @0.192 / 30000sh
6993 @10.793 / 3000sh

提問1: 每月堅持儲蓄$13000，可否達至2年后資產$100萬？（連同現有現金約$15萬）

提問2: 上述持股配置是否合適？須刪減部份/增持其他呢？

提問3: 上述那些持股係水涌1、2、3？

多謝你不段為網民解答疑問，祝身體健康。

每年額外花紅約5萬

龔成老師︰

1) 假設你投資一些較有增長力股票，年均投資回報有10%（連股息再投資），你每月投資$13000 + 40萬現有資產(25萬股票和15萬現金)，2年後大約會增值至80萬。

但由於2年係一個好短時間，好易出現波動，令最終回報不確定性好高。而且，你都接近退休之年，我唔建議作太高風險投資。

以你年紀，只宜進行較保守的增值。

2) 你現時持有不少潛力股(1177, 1810, 6060, 0788, 9988, 2382, 6993)，佢地增長潛力高，但風險都好大。

由於你接近退休，應該要開始減持這類股票，換至較平穏的「平穩增值股」和「收息股」。

還要隨著年齡增加，慢慢將收息股的比例提升。到退休時，你收息股比例，應佔100%。

平穩增值股，例如盈富（2800）、金沙（1928）、長建（1038）、中銀（2388）、港鐵（0066）、恆基（0012）、平安(2318)。

收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。收息基金(3110)，都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

壹傳媒(0282)近期股價較波動，長線投資價值不算高，建議你換至其他股票較好。

中石油(0883)只係商品類股票，佢價值自主能力好低，投資價值只係中等，唔建議持有太多。

其餘持股，都係有質素。

3) 水桶1︰1177, 1810, 6060, 0788, 9988, 2382, 6993
水桶2︰0762, 1972, 0883
水桶3︰0939

你現在要做，就是將「潛力股」，慢慢換至「平穩增值股」和「收息股」。至於現有資金，就等大跌市才動用。

另外，每月$13000的儲蓄用一半去月供「平穩增值股」和「收息股」，另一半儲起，同樣等大跌市機會。

若你想增長力大少少，可以較集中「平穩增值股」。但緊記要慢慢將比重，轉去「收息股」部份。

雖然這樣做，不能達至你2年100萬的目標。但由於你快將退休，唔建議你太冒險。因為若你此時投資失利，你無足夠時間去再追回這筆資金，風險很高。

所以，我建議你考慮我上述策略，相信會對你較好。

------------------------------------------------

Q21833：

龔成老師，想請教你的理財意見。本人今年44歲,已婚,無細路, 兩公婆冢入大約$55K,自置物業完供, 一向由家人代為儲蓄, 近年開始自學一下,想為兩公婆退休作準確

本身自己都有些年金儲蓄(已完供,等多10年收$),手頭亦有些股票(樣樣有D), 但股票蝕多過賺(因個性心急,次次一買就跌,有點心灰)

現有現金:30萬左右
現有股票
買入價

已持有2年
0002 - 500股 70.7
0005 - 400股 72.5
0012 - 1000股 40.5
0939 - 1000股 6.5

近期亂入 (多數1-2手)
00992 - 2000股 9.89
1208 - 4000股 4.64
02158 -200股 47.95
01398 - 2000股 4.99
00762 -2000股 4.37
00384 - 400股 28.9

剛入
02618 -100股 45.9
01177 - 2000股 8.65

唉!感覺自己在股票方面是盲頭烏蠅, 想重新建立一個老師講的長期「財富組合」，所以希望老師俾D意見

1. 想問問需要沽出現時股票?

2. 月供股票是否適合我? 大約月供多少(本身預$2-3K)? 那些股會比較適合我?

謝謝你的指導。

龔成老師︰

如果你過往經常出現虧損，反映你有一此核心投資問題，建議你增加知識。同時，你最好用月供優質股的模式進行，相信會較為適合你的。

1) 五礦資源（1208）主要從事有色金屬經銷、製造及鋁、銅製品分銷。

過往有多年出現虧損，企業投資的價值不高，加上股價十分波動，炒作多過實際。這股不建議長線。

2) 我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你44歲，應以增值為主，建議你用「平穏增長股」 + 「潛力股」作組合，並以「平穏增長股」為主力。

你現時持有股票(除了1208)，都適合你。唔好太在意中短期波動，你要清楚這些股票質素所在。就算出現下跌，只要佢長線質素係無變，你照持有就可以。

月供方面，你可以每月先用5成儲蓄，其餘先儲起，用一邊月供一邊儲蓄的策略。

以你家庭每月入息55K計，月供只有3K係太少。由於你已有物業類資產，建議你每月閒錢，都用來月供增值，咁會較好。

月供方面，你可以選擇投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)

或潛力股︰比亞迪(1211)、中生(1177)、福壽園(1448)、小米(1810)、安碩恒生科技(3067)、港交所(0388)、阿里（9988）、騰訊（0700）、ＧＸ中國電車基金（2845）、三星FANG ETF（2814）。

由於你投資知識不高，因此可較集中在平穩增長類股，至於潛力股，只宜小小注(不多於2成)。最好是你先提高投資知識，等到你有一定知識和經驗，才慢慢增加潛力股比例(大約4成)。

現時大市只是合理區，你現有30萬資金可以多用5-10萬，用"分注"形式，慢慢買貨。餘下資金和每月所儲倒的資金，就等大市出現一定程度的下跌，才大力度掃貨，然後長線投資。

------------------------------------------------

Q21834：

龔老師你好，本人今年52歲，想請教我現除了持有現金30萬。 每月可儲八千元。 計劃8年後退休。

還有以下股票數量

#763( 中興通訊)
7000股 21.5買入
4000股 20.3買入

#175(吉利汽車)
2000股 22.55買入

1. 請問我應否繼續持有或 止蝕？

2. 請問問怎樣可以將現有的現金價值8年內增加兩倍?

3. 請問你我的股票組合應該怎樣安排？

求指點

龔成老師︰

1) 我地是否持有一隻企業，主要係睇佢長線質素，唔好太著眼係「買入價」，佢純粹係一個心理因素。

除非你發現佢長線質素轉壞左，否則係唔需要賣出。

吉利(0175)有質素和潛力，此股可持有。

中興通訊（0763）從基本面分析，這股不差的，我亦相信5G的發展，會對佢長遠有正面影響，因此長遠不會太差。

佢本身係中國高科技通信設備主導供應商之一，通過提供客戶化的產品及解決方案，目前主要服務於中國及其他發展迅速的新興市場。

佢主要同中國電信、中國網通、中國聯通和中國移動等中國主導的電信運營商建立了長期穩定的合作關係。這部分是較穩定的。同時，佢亦向全球多個國家銷售產品，但之前同美國果邊，因政治問題而有影響。

不過，政治等因素令佢股價大上大落，從生意分析，長期仍會有發展的，只是有潛在的政治風險，這點不能忽視，而這個風險好難分析及預測。此股可長線，但不宜佔組合比重太高。

記住，我地唔好成個組合，只集中係1,2隻股票身上。

最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

因此﹐我建議你每有反彈，就慢慢分段沽出部份中興通訊（0763），換碼至其他優質股，咁會較理想。

2) 你要8年做到2倍增長，需要每年平均升幅達15%，才可以做到。

要達至這個升幅，你必須要投資一些增長力較高，但同時風險較大的股票，才有機會做到。

由於你只有8年就退休，不宜承受這樣高的風險。因為投資這類股票成功時，回報當然可觀。但不理想的時候，你損失都會較嚴重，你要明白這個風險。

我會建議你，最好集中係「平穏增長股」。這類股票升值能力雖然不算好高，但勝在有平穏增值效果，波動性無咁大，較適合你這個年紀的人士。

到你接近退休的年齡，應該開始投資一些收息類工具，例如收息股，以平衡組合，同時減少風險，到退休時，就宜將較大比例，持有收息類資產，減少平穩增長股比例。

3) 你52歲，可以用「平穏增長股」作組合。現在你每月先用5成儲蓄，即$4000做月供。其餘先儲起，用一邊月供一邊儲蓄的策略。

月供方面，你可以選擇投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、領展(0823)、希慎(0014)、太古地產(1972)

至於持有30萬和每月儲蓄，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

------------------------------------------------

Q21835：

龔成老師你好，現時我28歲已每月月供股票$5000大約有2年，但係理財方面仲係好生疏，所以想請教你的意見。目標想係之後的2-3年內儲到70萬左右，並為將來可以有財富滾存同時達到財富自由。

現金:10萬左右,月入20K

手持:
100股(00823)領展
800股(00005)滙豐

現時月供組合：
$1500（02800）盈富
$1500（00066）港鐵
$2000（00388）港交所

1.月供股票有無邊隻股需要賣出?

2.如果要達到目標是是否需要更變投資組合方向?如果需要增加， 哪些股可以?

3.想請問(00945),(00001),(01810),(00012)現價是否合理,是否可以分注買入, 還是適合月供?

4.基金投資是否適合我?

謝謝！

龔成老師︰

1) 當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

以你28歲計，應先做好增直部份。你現時月供股票和資金分配，係合適的。

但現時大市只在合理區，最好每月的資金不要用盡。要留有部份，等大跌市出現時，可用來掃貨。

另外，我建議你將$2000，加到盈富（2800），因為盈富本身是一個50隻股票的組合，就算資金多一點都無問題，可以令你的組合更為平衡。

2) 以大市過去年平均回報10%計（連股息再投資），你每月投資$5000再加上你現有10萬資金和持股，5年後(已計算已供的2年)大約會增值至52萬。

如果要達至你的財務目標，你可以增加投資年期，例如去到7年，就會滾存到$75萬，較接近你的目標。

或者，你可以選擇現時將月供金額，加大至$9000，都是一個方法。

又或者，你可以提高你的回報率，例如投資較多潛力股，當然，這會令你風險度提高，以及要求你有更多的投資知識，你都要明白這點。

3) 這4隻都適合月供，現價月供係無問題。

但若要直接入貨，小米(1810)現價偏貴，要回多1,2成，才開始算合理區頂。其餘3隻，現價合理，可以分注入貨。

4) 要視乎基金投資目標、質素等去考慮。以你年紀，盈富基金(2800)、安碩恒生科技（3067）這類有質素和增長力的ETF基金，就會適合你。

------------------------------------------------

Q21836：

龔老師，我大約兩年前開始拜讀你的文章，資產在這兩年大跌巿間，幸有聽從你的建議，不但沒有少了，還喜見增長，多謝你。現想請教你，我可以如何改善我的資產配置，早日達到第一個一百萬，

從而步向財務自由呢？

我現時36歲，文職公務員，月入4萬5左右，持有現金＄26000。另持有保險現金價值約有＄63500, 當中有50萬人壽，100萬意外和116萬危疾保障。

MPF現有約27萬7千，過多一年半就過probation, 屆時僱主供款會增至15％。

現時每月債務還款約＄12000, 2022年12月還完；交租及雜費＄15000；孝敬爹娘＄9500。

現時持股如下：
4手 3072 買入平均價＄162.4
2手 3187 買入平均價＄21.4
16單位(碎股 ) 0066 買入平均價$41.279
2手 0303 買入平均價$47.35
2手 0388 買入平均價$445.1
1手 1373 買入價$2.5

我對新上巿的2814有興趣，應否用來取代3072？還是可以同步進行？

謝謝賜教

龔成老師︰

首先，若你現時債務，貸款利息係較高。最好係開始投資前，先作清還，因為佢會拖低你長線回報。

以你36歲年紀，應先做好財富增值部份。

ETF三星亞太高息房地產信託(3187)和偉易達(0303)主要係收息，增長力唔高，唔建議持有太多。

其餘股票都有質素，你照持有就可以。

三星FANG ETF（2814）的投資目標，係追蹤NYSE FANG+指數的表現。是一個美股潛力股基金。

而日興環球聯網(3072)投資目標是尋求提供在扣除費用及開支前與iEdge-Factset Global Internet Index (“指數”)的表現緊密相關的投資回報。

當中包括不少環球有潛力企業，例如阿里巴巴、FACEBOOK、AMAZON、百度等。

相對之下，3072會較全球性，而2814會集中在美股。2隻都有增值潛力和投資價值。你可以睇翻佢10-15大持股，去決定邊隻較適合你。

3072和2814同步進行都可以，但當中有不少股票，都係重覆。因此，這2隻ETF佔組合比重唔可以太高，連同其他科技類股票，你要控制在3成佔比以下。

另外，我建議你用每月閒錢，去做月供，來進行一個長線的財富增值。

策略上，你可以投資「平穏增長股」和「潛力股」。你每月5成儲蓄做月供。其餘先儲起，用一邊月供一邊儲蓄的策略。

選股上，你可以投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、粵海(0270)、領展(0823)。

潛力股可選安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）。但佢地波動性和風險會較高，你要自己平衡。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

餘下資金，我地就等機會，當大市出現較大回調，就加大力度掃貨，然後作長線投資。

------------------------------------------------

Q21837：

老師，請問 7226 同 3076性質是否一樣，7226是否一樣可以長期持有。

如果我早年半前睇到你page就好，年半前那時係低位入過金沙，舜宇，但都只係賺差價，甚至騰訊係186同439有貨，都沽咗，真係好後悔。

現在開始要慢慢調整手頭股票，將無質素換有質素去長期持有。早前33.7入了一手金沙，諗住分注入，

(我理想價係希望30左右先入，但今年好似比較難去到30，所以33.7都先入一手)長期持有，不過這之後已升，又要再等下。

龔成老師︰

你才40歲，只要現在學好正確投資方法，依然有充份時間，去做好增值。

你現時入金沙(1928)策略正確，好多時優質股，都唔會咁易回到較平水平，所以我地要分注，去平衡入唔倒貨架風險。

現要時$33.7入左首注，你預每回調10%左右加注，咁就可以。

ＸＬ二南方恒科（7226）產品之投資目標為追踪恒生科技指數每日表現兩倍（２ｘ）的投資業績。

雖然我長遠認為，恆生科技指數正面，但中短期可以較波動，由於這基金有槓杆，就會令價格更加波動，其實有風險。

雖然都係追蹤恒生科技指數，但我會較建議投資無槓杆的恆生科指ETF（3067），始終較好。

------------------------------------------------

Q21838：

阿sir 雖然距離1,000,000仲差好遠，但想同你講多謝你, 自從2018年尾同男朋友分手, 人生好似無咩目標！

但2019年初認識到你, 不停睇你fb, 我就由零知識開始不停儲錢同長線技資，供股etc. 2018年年尾由10幾萬努力儲錢投資到而家70幾萬（我知道雖然唔多錢, 比起好多80後既人)

呢兩年幾不停睇你既書同你介紹既書藉增值知識，然後2019年就報名上你堂, 更加明白價值投資法同長線投資嘅重要性....

你既正量真係幫到好多人，岩岩睇完你既千萬富翁既書, 而家思考緊點樣可以用空閒時間去做副業, 我其實覺得keto desserts呢個market係有得做,

本身都鐘意baking, 而家仲思考緊點可以行出第一步, 始終要拎個食物牌先可以賣出去, 但拎一個正規既食物牌要投資好多錢, 而家就係stuck住係呢一步。

唔知阿sir你會唔會有d意見可以比到我？

PS 希望不久將來成為千萬富翁

我希望盡快可以cap screen到我第一個一百萬給你，多謝你。

同埋我2019年頭開始每個月供0003($2000) & 2800 ($3000)，因為當時無咩投資知識，因為你話供股最少要3-5年先可以平衡風險,

想請教你 我係唔係應該繼續供到去5年就停？ 到時就轉供潛力股？

定一話而家可以停供呢兩隻股轉供潛力股？

我今年34歲了

龔成老師︰

能夠有這樣成績，都是你自己努力學習和實踐的成果。記住，投資路上要一直保持學習，才會成功。

至於100萬，我相信你按部就班，可以好快會達成。

至於月供方面，我希望大家最少供3年，並持有5年以上。但當然，不論係月供年期，定持有時間，都係越耐會越好。

而幾時加入潛力股，這個係睇你人生階段作決定。

我地投資會運用「先增值，後現金流」作方法，初期應投資較多增值類資產，較後期則應投資較多保守類項目。所以係分配投資項目時，會因應番你的人生階段。

較年青人士，可以用「平穩增值股」+「潛力股」。中年人士，可以較集中翻係"平穏增長股"。當你已近退休之年，就應集中在「收息股」，去創造平穏現金流。

以你34歲年紀，應用「平穩增值股」+「潛力股」作組合。

潛力股︰可選安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）

如果你現時覺得，自已投資經驗都未算多，潛力股這類風險較高的股票，你就不要持有過多，最多維持2-3成好了，甚至先維持現狀。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

另外，你要合法從事這門生意，這個成本始終都要投資。但若你覺得太貴，你可以睇下有無志同道合架朋友，一齊去開，去分擔成本。

但你要明白，當多一個生意合伙人，就會多一個變數，甚至係多一個麻煩，你要了解這個風險。

又或者，你最初可以到相關公司工作，最好是一些中小企，你要盡力了解該生意的營運，同老版傾計，這都是一個方向。

------------------------------------------------

Q21839：

呀sir,最近先有時間去買你嘅書睇,但係好似已經太遲,因為係3月左右係高位買左3690,9618,9988,已經蝕緊好多,呀sir想請教下依加應該止蝕定係轉買另一隻股呢？謝謝

龔成老師︰

首先你要明白一個概念，我地持有一隻股票與否，關鍵位是企業質素、前景，不要被買入價影響。因為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心，照持有就可以。

如果企業無質素，但你現時蝕錢中，繼續持有只會令你財富繼續貶值，因此要賣出。

如果企業質素轉差，就有可能要減持，因為這股佔你組合的比例，未必值得太多。

這3隻股票，都係有質素。就算你買貴左，長線企業會增值，慢慢會重回你買入價，故可以守。

但當中美團(3690)有潛力的，過往一直虧損，到近一年，開始有正現金流，這是一個實質的利好因素，因為之前一直在燒銀紙，現時初步見到成效，不過，估值的方法好虛無，因為現時的市盈率仍過百倍。

如果有利好消息，佢可以上好多，但如果估值修正，股價可大跌。

因此，這類不確定性高的股票，只能小注。若佢佔你佔合較大比重，建議你沽少少，去平衡下個風險。

------------------------------------------------

Q21840：

您好 ! 龔成老師,

1. 本人2020年7月14日$8.12買入01114 華晨中國 ,但於2021年3月已停牌, 以你專業意見, 此股有無機會復牌呢?

2. 2021年 2月8日 $0.485購入#00451協鑫新能源, 可繼續持嗎?

3.2020年11、12份 分別$4.74, $4.59 (股數3萬)入00831 利亞零售 之後於12月份分別$0.69, $0.63 (股數7萬)

12月31 日已收了股息$114,900 你覺得應該繼續持有，還是放再賣其他股呢?

龔成老師︰

1) 華晨中國(1114)自2021年3月31日起停牌，集團由於未能完成2020年年報，故要待公司釐清當中資料後，相信會有機會復牌。

但由於暫時無佢太多資料，根據以往數據分析，集團只算係不過不失，投資價值一般。

現時你暫時無野可以做，你預復牌後，如果2020年數據較差，股價會有較大波動。

2) 協鑫新能源（0451）主要從事光伏電站之開發、建設、經營及管理。

生意增長力不強，可過盈利十分波動，股價上落大，高風險類，市場往往炒作多過實際。

要睇你承受風險的能力，股價有時會大升，但又可以跌得好快。整體的投資價值，未算高。長線計，換至其他優質股，會比較好。

3) 利亞零售（0831）賣左「ＯＫ便利店」業務資產後，就只剩餘集團的品牌（聖安娜、Ｍｏｎ　ｃｈｅｒ和Ｚｏｆｆ）。

預期發展只是一般，同埋之後好睇佢資金的運用情況，投資價值只是中等。

若你持貨佔組合比重不高，你持有都可以。但若佔比重較大，最好估出部份，換至其他優質股。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q21281-Q21300）

Q21281：

我係你股票班舊生，有一個關於現金流折現法的地方不太明白想請教一下。

在第4課中，計算現金流折現法時，我們要為有增長的企業假設一個增長率，請問我們可以基於甚麼去決定這個增長率？我們是否可參考企業過往報表內的甚麼數字來作決定？

另外，請問為甚麼這個增長率是一定會低於折現率？

如果以阿里巴巴為例，請問我們應該怎樣決定這個增長率呢？謝謝你！

龔成老師︰

這個增長率，我地可以從佢過往數據、企業和行業本身發展潛力，去大致估算出來。

如果佢現金流係穏定，有一個明確發展年期，好似我課堂例子中的"西隧"，佢每年盈利增幅，大至平穏，你就可以從佢過往數據中的"股東利益"，去計算佢估值。

但增長率，唔一定低於拆現率。係一些高增長企業，就有機會出現增長率大於折現率情況。這時候，就不能用簡易公式去計，要自行每年去計。

其實，係處理增長高的企業時，現金流折現法可以有較大的誤差，因此運用時要較小心，若果是初階者，建議用其他估值方法做核心，現金流折現法只是輔助。因為較多數字係主觀判斷，而且當有少少偏差，計出來結果可以差好遠。

------------------------------------------------

Q21282：

老師你好，我40歲都未接觸過股票。見月供股票風險較低，亦好似唔需要成日睇住個市

如果我依個年齡係咪唔適合月供？

如果我想投資，應該月供邊幾隻股票？
謝謝解答

龔成老師︰

簡單來說，月供股票就是你每月將現金，買入某一隻或多隻股票，慢慢咁樣儲貨。坊間不少銀行都有提供月供股票服務，你先開證券戶口，然後登記做月供股票。

形式就是每月投入相同的金額，買入同一隻或多隻股票，並持續進行。

例如，每月以相同金額$10,000 買入盈富基金（2800），假設第一個月股價為$25，就能買入400股；第二個月升至$35，就能買入286 股；第三個月跌回$30，就能買入333股。

總結這三個月，投入了的資金為$30,000，累積股票為1019股，平均買入價為$29.4。

由於月供股票每月投入的金額相同，因此當股價上升時，買入的股數自然減少，而當股價下跌時，就自然會買入較多股數，如同自行調節一樣。

基本上，任何年紀都可以月供股票。但要注意的是，由於每月持續投入資金，因此一定要選優質股，長線投資，同時要以儲股票的概念進行，最少持續供3 年以上，之後持有5年以上。

由於財富增值係一個長線計劃，唔係短炒。只要選對優質股，你是不需要成日睇住個市。

你40歲，建議你用「平穏增長股」 + 「潛力股」的組合。現在你每月5成儲蓄，其餘先儲起，用一邊月供一邊儲蓄的策略。

月供方面，你可以選擇投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、領展(0823)、希慎(0014)、太古地產(1972)

或潛力股︰中生(1177)、福壽園(1448)、小米(1810)、安碩恒生科技(3067)、港交所(0388)、阿里（9988）、騰訊（0700）、ＧＸ中國電車基金（2845）。

但由於月供最重要的一點，是「選股」。你投資經驗不多，無選股能力。最好就是投資ETF，如盈富(2800)。到你有能力，才慢慢加入其他股票，咁會較穏陣。

另外，潛力股比例在初期不要太多。

至於每月餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

------------------------------------------------

Q21283：

Hi龔Sir，你好，我喺2.81時入咗五菱汽車，近期跌左，請問是否值得再入手，謝謝。

請原諒我的不專業問題。

龔成老師︰

沒問題，每個人都會經過初學者階段。只要你學好正確投資理財方法，你就會慢慢懂得點去處理這些問題。

五菱汽車（0305）質素算中等，業務都不算差，潛力度有的，但同時都有風險。

近期款新能源車「五菱宏光MINIEV」已較平民價出售，令銷售打嬴TESLA之餘，增長也算理想。

但我地分析時，唔可以只用咁短時間，就去決定一間企業品牌。這個平價車模式，可否能為佢持續增長，依然係一個問號。

以佢過去幾年，最高單年純利都不足2億，但現時市值好高，已經係唔平。近期此股急升了不時，此刻投資有一定風險。

如果以長遠角度分析，佢主要業務為於中國從事汽車零部件、發動機及專用汽車之製造及銷售業務。為中國商用微車發動機及汽車零部件之領導製造商，製造設施設於柳州及青島。

最近有中國品牌電動車大賣，而五菱汽車有做供應所以在當中有利益，因此都有潛力度。

不過，考慮到近期股價上升不少，這刻投資價值博率未算高。加上你本身有貨係手，最好回翻先再考慮。

------------------------------------------------

Q21284：

龔成sir您好，自從一八年開始follow你嘅FB，覺得你嘅投資觀念好正確，今年卒之有時間報讀您股票班，希望再為自己增值投資知識。

本人女47歲，家庭主婦手持股票如下：

0005/6000股@62
659/20000股@12
6823/15000股@11
12/4200股@38
0003/10350股@14.5

1928/4000股@34
2800/6000股@25
66/3000股@42
1211/1000股@122
1448/8000股@7.7

1177/5000股@7.6
3067/2500股@20
9928/10000股@5.9

收息基金2隻共40萬
現金15萬
有買危疾醫療意外保險。

請問：

1.我手持的股票可長線嗎？比例合適嗎？

2.有邊幾個等價位高時需要放售/減持？之後可增加/增持哪些股票？

3.想增加多一點現金流可點樣轉換手上的股票？（因暫時不會再投放新資金入股票戶口）

多謝您的耐心解答，祝生活愉快！期待開班見！

龔成老師︰

1) 你現時持有股票，可長線。同時比例上，都無太大問題。

2) 我地唔會去定個目標價，只會係大市去到好貴，或者隻股票本身，長線質素轉差，我地才會考慮沽貨。

以你47歲計，投資策略要開始保守些。未來再入貨，可以較集大係「平穩增值股」類。

平穩增值股，例如盈富（2800）、金沙（1928）、長建（1038）、中銀（2388）、港鐵（0066）、恆基（0012）、港交所（0388）。

另外，你要留意唔好太集中係個別股票，每隻最多佔15%好了，否則會有過度集中的風險。

好似匯控(0005)就有少少偏高，故唔好再加注。

3) 若你想增值現金流，你可以調高「收息股」比例。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）或收息基金(3110)都可以。

雖然咁做可以幫你增大現金流，但由於收息股主要係派息，唔會有太大增長力。

若此刻佔比重太多，會拖低成個組合增長，你要明白會有這個情況。

股票班見！

------------------------------------------------

Q21285：

老師你好，上年年中認識到你呢個page,但就未非常認真跟你嘅意見去管理財富同為財富增值，只係開始咗月供2800。依家想請教吓你

本人40歲，有2個小朋友8歲6歲，我月入4.2萬。我自己（唔計老公）現手上有$80萬現金，$70萬保險連基金 （每年供$40000，仲有3-4年供完拎得番），另外約26萬股票，包括：

0005: 800股@$46.25
0939: 2000股 @$6.23
0999: 6000股 @$4.9
1137: 2000股 @$16.08

1810: 1000股@$25.5
2800: 2600股 @$27.49 （月供$4000）
3898: 3000股 @$60.35

本人股票知識好少，以前都係人云亦云咁去買。依家好希望可以好好管理增值，將來有足夠資金送小朋友出國讀書。

1）現持有股票中，3898係咪應該一等佢升番啲就放咗佢轉其他有增長潛力嘅股？
2）可以再月供$4000-$5000，3067定388好？
3）手頭上嘅現金可以點運用？

先多謝你花時間解答，麻煩晒老師！

龔成老師︰

我地買入一隻股票，一定要知道佢質素、行業前景、財務狀況等，才去投資。

唔好只係聽人講，或者聽消息就去買。如果你連間公司點賺錢、行內有乜優勢、點解未來有發展和增長潛力，都答唔倒自已，就唔好投資住。

另外，"保險"主要係用來防守，買足夠保障就可以。儲蓄成份架保險，我就唔建議太多，增值最好都係留比優質資產(如優質股、物業等)去做。

但由於你現有保險，尚有數年就供完，唔建議你作出變動。

1) 中車時代電氣（3898）係中國鐵路車載電氣系統供應商及集成商。

佢的產品可分為兩大類：（１）車載電氣系統：包括列車牽引變流器、輔助供電設備與控制系統、列車行車安全裝備。（２）電氣元件：包括電力半導體元件、傳感器及其他相關產品。

佢主要客戶為鐵道部及其地方鐵路局、中國主機廠及城軌運營商。

佢向主機廠及城軌運營商提供新造機車車輛的車載電氣系統，以及向鐵道部的地方鐵路局及城軌運營商提供作維修及更替用途的車載電氣系統。

業務不是無質素，但增長力一般是較大的問題，企業價值無乜向上，盈利亦很普通。

你買入時，正值熱炒時候，當市場回復冷靜，令佢股票慢慢回調至較合理水平。質素只是中等，你預佢增長力不強。你可以持有，但唔建議佔組合太多，你可以沽出部份，換至其他股票。

另外，持股中香港電視（1137）不確定較高，現貨可持有，但暫時唔好加注了。

2) 以你40歲這個人生階段，供這2隻都可以。

港交所（0388）佢係香港唯一獲認可的證券市場及期貨市場，提供現貨、期貨、衍生工具的平台買賣，以及股票上市業務。絕對有長線投資價值。

而安碩恒生科技（3067）則包括一籃子恆指科技股，都有潛力。相比港交所（0388），安碩恒生科技（3067）會有較大分散風險能力。

現時大市只在合理區，每月你可以$4000供盈富(2800)，再$2000供港交所（0388）/安碩恒生科技（3067）。餘下$3000就儲起，等大跌市出現時，可以用來掃貨。

3) 以現市大市水平計，你80萬可以入多少少，大約多用15-30萬，以分注形式入市。

目標是一些「平穩增值股」+「潛力股」。不過，潛力股有一定波動性，佔你3成左右好了，你可以集中在平穩增值股先。

餘下現金，我地同樣係等大跌市機會，才會動用。

------------------------------------------------

Q21286：

老師: 請問3067是否仍然值得分散買入作長線投資? 謝謝

另外, 每月可儲10000元, 目前月供$3000盈富, $3000平保, 尚有$4000純儲, 請問應怎樣優化?

補充資料: 本人目前41歲, 有2小孩, 上唔到車要交租

謝謝老師指點

龔成老師︰

安碩恒生科技（3067），有長線投資價值。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂至略貴，因此，這刻不能大注投資。最好的策略，就是月供，或自行分注小注慢慢收貨（例如每月買一次、或2個月買一次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

你現時月供組合，都適合你41歲。但你可以再加入一隻潛力股，去提升組合增長性，令你快點可以儲到一筆置業用的資金。

組合供款可以變為，$2500盈富(2800)、$1500平保(2318)、$2000安碩恒生科技（3067）或另一隻潛力股。

餘下$4000我地就儲起，等大跌市出現，才用來入貨。

潛力股︰中生(1177)、福壽園(1448)、小米(1810)、港交所(0388)、阿里（9988）、騰訊（0700）、ＧＸ中國電車基金（2845）

------------------------------------------------

Q21287：

老師 我想問 ，平穩增值股 例如1972太古 如果這些等他們增長 我知道要長遠投資。

但我不明白 要到一個什麼時候才可賣出?

例如初期投資較有潛力的股票 令財富較快增值 那是不是要經常要賣出買入?

還是一開頭都是投資平穩增值股、潛力股 不斷利用儲蓄令自己有資金投資 待5至10年後就會有回報 就是你說的財富增值。

龔成老師︰

只要一隻股票係有質素，我地長線持有就可以，唔會成日買買賣賣。

我地投資，會睇翻自已當時人生階段。若果你係較年青，可以集中係平穩增值股、潛力股，去做增值。

這些股票值長力高，但會有一定波動性和風險。但由於年青人有較多時間，承受風險能力較強，所以無問題。

但若果你係接近退休，你未必有年青人咁多時間去增值，故這些波動性大股票，就未必咁適合，反而只可以做些平穏增長。

到你已退休，正常收入變零，你就需要一些收息資產，去產出一些現金流(如股息)，去支援你退休後的生活。所以，我地這時就會將以往累積下來的增值類資產，換成收息類資產，去創造現金流。

因此，在退休前要先努力累積一筆資產。而用什麼樣類型的股票去做，就要視乎你當時年紀和投資取態去做決定。

唔係一開頭一定用"投資平穩增值股 + 潛力股"，若你年青，當然無問題。但你開始投資時，已經係50歲多 ，我地就唔會用潛力股，因為風險會太高，只用平穏增長型股票。

至於何時沽貨，除了企業長線質素變差時會沽，或者股價異常地貴，我地都會咁做。

若你無法掌握平貴，你可以用「升一倍、沽一半」策略，咁就可以。

------------------------------------------------

Q21288：

龔sir,我現在的投資組合：

3033、3988、6600、9888、9988，市值約$6萬。

如果想長期持有及加注，有那些可以賣？那些應該保持？（全部都現時價位入的）

龔成老師：

你現時持有的股票，基本上都是有質素的，大致可以長線，只是在配置上可以優化。

賽生藥業（6600）都有發展力。

佢係一家擁有產品開發和商業化集成平台的生物製藥公司，戰略上專注於包括腫瘤及重症感染治療領域。憑藉集成平台，力圖在治療領域開發優質上市產品，包括自有產品日达仙及在研藥物的組合並對其進行商業化。

佢主要從事銷售自有產品日達仙；銷售授權引入產品；及代表業務合作夥伴在中國銷售推廣產品。

佢亦開始開發多種在研候選藥物。目前在研候選藥物組合包括多個已進入II期臨床試驗或更早階段的早期階段候選藥物。

日達仙已獲列入肝癌、胰腺癌及淋巴瘤治療指南，並已獲得多個司法管轄區的批准，包括中國以 及韓國、泰國、阿根廷、意大利、柬埔寨、新加坡、菲律賓及印尼等其他國家。

整體來說，這股都不差，都有投資價值。但業務始終波動，小注投資好了。

因此，這股你可持有，但就未必要再加注。

另外，你現時除了中行（3988），另外4隻都是偏向有潛力但有風險類別，由於佔比已較多，因此你要注意翻，日後有資金，就不宜再加注在這類股。可先考慮平穩增長。

同時，阿里（9988）佔你的組合比例略高，因此不宜加注，到日後有較多資金，組合規模更大時才加。

------------------------------------------------

Q21289：

龔老師你好，最近開始接觸學習股票，持有4隻股票都高位買入虧損狀態，0233，0968，6865，3800。
想請教應否止蝕離場，還是應如何部署。
希望得到你解答，謝謝

龔成老師︰

你先要明白一樣野，我地持有一隻股票與否，關鍵位是企業質素、前景，不要被買入價影響。買入價係一個心理因素，但唔係全部。如果企業核心因素未被影響，我地係唔需要理會。

信義光能（0968）、福萊特玻璃（6865）都有質素，可以守。

保利協鑫能源（3800）質素只是一般。

佢主要為光伏行業製造多晶硅及硅片；銷售電力；開發、投資、管理及營運光伏項目。

市場炒緊佢前景，但當中存有不確定性，股價大上大落，佢的確可能會大升，但同樣可以大跌，無得估。投資此股都可以，但小小注好了。

銘源醫療（0233）好麻煩，證監會引用證券及期貨（在證券市場上市）規則之條文第8（1）條發出的指令，暫停股份買賣。主要係涉及一些虛假公佈及陳述。

至2020年1月23日上午9時，聯交所宣布該公司的上市地位將根據《上市規則》第6.01A條予以取消。即係佢已經無上市，你只能向該公司查詢你股份情況和處理上安排。

------------------------------------------------

Q21290：

老師，我今年20歲，仲讀梗書，有2萬蚊本想接觸股票，睇左好多股票同資訊都唔知入咩好，之前見你話冇乜資金應該要啲高增值力嘅股票長揸，定你覺得我太少本應該等多啲先？有咩意見？

龔成老師：

你現時本金唔算多，宜想方法，例如做兼職去增加本金。

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，如果你能承受風險，就投資潛力股，安碩恒生科技（3067），有長線投資價值。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂至略貴，因此，這刻不能大注投資。最好的策略，就是月供，或自行分注小注慢慢收貨（例如每月買一次、或2個月買一次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

到你本金再增加，就應該加入其他類別的股票，慢慢豐富及平衡翻個組合。

------------------------------------------------

Q21291：

老師，我想問2138，331長線可以考慮嗎？現價合理嗎？

另外，我想請教你合理價位怎樣 計算

龔成老師：

香港醫思醫療集團（2138）主要以ＤＲ　ＲＥＢＯＲＮ品牌提供醫學美容服務。企業都有質素的。

（１）醫療服務：包括整形外科手術、微整形療程及由集團醫生操作的能量儀器療程及一般診症服務，以及牙科（ＯＮＥ　ＤＥＮＴＡＬ及ＯＮＥ　ＤＥＮＴＡＬ　ＰＬＵＳ品牌）、中醫及眼科服務。

（２）準醫療服務：包括由已接受培訓的治療師操作的能量儀器療程，該等治療師已完成集團醫生主導的內部
強制性培訓。

（３）傳統美容服務：包括面部護理、按摩以及其他無創療程。

（４）護膚及美容產品：主要為集團的自家品牌寶特曼娜及瑞研雅。

業務發展不差，長遠有增長力，不過業務中短期會有少少波動。現價合理區頂。

豐盛服務集團（0331）主要係於香港、中國內地及澳門，從事機電工程服務、建築材料買賣、環保產品貿易及提供相關工程諮詢，亦於香港從事清潔及廢物處置管理服務、回收及環保處置服務以及洗衣服務。

過往生意都有穩定的增長，而盈利都是，但企業的規模較細，因此風險較大，同時規模效益不高。但以佢現時的估值計算，價格是在合理區。

你可以投資這股，分注買入就得，長線持有，但就不建議投資得太多，始終這企業有點風險。

要計企業的價值，過程比較複雜，好難三言兩語就講到，就算在我的股票班，都要講5小時，裡面會講3種估值方法，有難有易，但同學都用到的。

簡單來說，你要考慮企業的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。這都是計算的基礎。

例如，我地會考慮佢有多少生意，有多少盈利、現金流，有多少資產，從而計算該業務值多少錢，同時會推算將來的盈利情況，去推算這企業長遠的價值。

如果要深入計算，基本上要好仔細的研究企業，要分析好多財務數據用比率，先至有較完整的答案。

------------------------------------------------

Q21292：

你好呀成哥，我有啲嘢想同你分享

我今年22歲，上年9月正式跳出舒適圈，加入左保險行業，但都依家個成績未如理想，反而令到生活更難。雖然我係學到好多嘢同心態，但一直都得唔到理想嘅成績，仲要賣晒之前嘅股票。唉～你覺得我係咪要離開呢個行業？

做左半年，拿到嘅係一份態度同將我由機械人變成正常人，我係中意呢份工作，為我嘅生命改變左好多，不過都係錢到掙扎。

龔成老師：

我地所有野，都是從長遠角度分析，如果你用半年時間，可以令你大幅提高心態，其實是值得的。

另外，所有決定都會有風險，我地都唔知跳出去好定唔好，但我一般都會建議你試，因為從長遠角度，這動作將會對整個人生較好的。

當然，有可能會更加不利，正如你現時面對的情況，但我認為，你唔需要後悔跳出來，因為唔試過，永遠唔知，同時這個跳出的動作，可能對你一生影響好大。

現時，我會建議你試多3-6個月，如果真的唔得，先轉，你可以試下用不同的角度去開發收入，這刻的情況不是核心，長遠才是最重要。

你要抱一個「盡100%」努力的心態，去試多幾個月，用不同的思維，同時更加大膽，做平時不會做的事，要更加不顧不切去找生意，唔好比自己有後路。加油！

------------------------------------------------

Q21293：

老師，你有冇打算講吓國外嘅投資工具？我注意到你而家都係集中係香港嘅唔同工具

龔成老師：

如果外國投資工具，你可以考慮外國樓，以及外國的ETF。

外國樓最要是你熟識當地的情況，城市發展，租務市場，以及法規等因素，同時，要選擇一些大城市，配置成熟，有發展力的。

至於ETF，可以考慮一些追蹤美股的ETF，例如VOO，就是追蹤普標500指數的，至於QQQ，就是追蹤納指的。對於想分散風險，建立環球配置，但又無個別心水股，投資這些最適合的（VOO會較穩健，而QQQ風險略高）。

------------------------------------------------

Q21294：

我有個問題想請教，希望老師可以解答到。

我想問為何819和1772，兩只都係做電動車電池，但係它們PE值可以差咁遠，如果想買，應該買邊只好？

龔成老師︰

天能動力（0819）有質素的，同時業務仍在增長中，不過，增長力由過往的高增長，轉為平穩增長。

佢主要係中國從事研發、生產和銷售新能源鋰動力電池、特殊用途鉛動力電池、電動自行車鉛動力電池；廢舊電池回收處理；以及智慧能源解決方案業務。

佢業務都正面的，但盈利就比較波動，因為幾年前曾出現過虧損，這是扣分的地方。近幾年已無這問題，見佢生意同盈利都有理想增長。

市場一直對佢經營模式，評價都係唔算好高。而且市場預期佢增長唔會有以往咁快，所以給予市盈率唔會太高。

留意這股業務始終有潛在波動，股價上落會較大。現價合理區頂，但不能大注。

贛鋒鋰業（1772）是潛力股，但估值較難，分析時的確資料較少。由於上市年份少，我地較難有長期數據分析。

佢為鋰化合物、金屬鋰及鋰電池等鋰資源生產商，業務涵蓋上游鋰資源提取、鋰化合物深加工、金屬鋰生產、鋰電池生產及鋰二次利用及回收。集團提供涵蓋五個主要類別逾40種鋰化合物及金屬鋰產品。

其實佢的產品應用都廣泛，包括電池相關產品、化學品、藥品及新材料等，而客戶主要包括電池材料公司、電池製造商、化學品製造商、製藥公司及電子器件製造商。產品主要於中國、韓國、日本及新加坡等十多個國家出售。

我相信佢長遠有潛力，有長線投資價值，問題只是平貴度的問題。

市場預期贛鋒鋰業（1772）相對天能動力（0819），增長潛力較高。因此，係市盈率估值上，都會相對較高。

但由於1772上市唔算耐，故市場給予的估值，會有較多比重來自將來的願景。若果發展不似預期，可能會有較明顯的回調。

現價算係略貴，小小注好了，之後等佢回落先正式入貨，始終行業有一定的變化。

天能動力（0819）的波動性會較低，而且現時值博率都會較贛鋒鋰業（1772）高少少。

但若以發展潛力去計，贛鋒鋰業（1772）就會較高。當然同時間，不確定性贛鋒鋰業(1772)都會較大，你要明白這風險。

------------------------------------------------

Q21295：

你好，本人32歲，月入5萬，想每月拎10000月供股票，目標係平穩增值。請問以下組合如何？

盈富2000,中電2000,港鐵2000,煤氣2000,領展2000
有諗過港鐵轉做安碩恒生科技

龔成老師︰

若你目標係「平穏增長」，你所選擇的5隻股票，都係合適的。

這些股票，增長力唔會話好高，但勝在波動性無咁大，而且有平穏增值能力。

至於安碩恒生科技（3067），有長線投資價值。港鐵(0066)都有唔錯增長潛力，對就無3067高。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。

這ETF組合中的股票，有較強增長潛力。但同時間，波動性都會較大。對於追求「平穏增長」的你，就未必太適合。

當然，若你想加強少少個組合架增長力，係可以加入安碩恒生科技（3067），因為你32歲，其實財富仍有增長力的，但佔比唔好太多，約2,3成。同時你要明白佢波動性較高，會令你個組合風險相對增加。

現時大市只在合理區，每月資金唔好盡用。最好留有部份，等大跌市出現時，可以用來掃貨。

------------------------------------------------

Q21296：

你好老師！我同我老公一直都冇乜點儲錢， 直到睇到您既專頁，同埋依家有左個小朋友，真係想改變、可以比一啲好嘅生活小朋友及自己。

我本身從事美容行業，老公就冇固定工作既，兩公婆收入扣除開支，大約每月可以儲到$10000。

對投資黎講係新手，唔知點樣做？ 希望老師可以比啲建議

1. 結婚時買左一堆飾金，大約8-10両（當時$13xxx/両），依家想賣左佢套現資金去投資股票，好唔好呢？

2. 之前買落一份基金，大約今年8月就可以拎返，暫時價值15萬左右，應該點樣做好呢？

感謝

龔成老師︰

1) 黃金沒有現金流，持有無法創造出經濟價值，其主要作用是對沖黑天鵝事件。

你可以投資黃金，但不用佔財富比例太多(<3%)，而且持有的應該為實金。但由於這些飾金係結婚時用品，若佢對你地有金錢以外的意義，你係可以另作考量。

進行人生財富累積時，我地會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

策略上，你地可以投資「平穏增長股」和「潛力股」。你每月用5成儲蓄，即$5000做月供。其餘先儲起，用一邊月供一邊儲蓄的策略。

但你現時投資知識不高，可先較集中在平穩增長類股。至於潛力股，只宜小小注(約3成左右)，最好是你提高投資知識，等你有一定知識，先慢慢增加翻潛力股比例。

餘下現金就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

另外，你先生收入較不穏定。我建議你在投資前，先儲起半年基本生活開支的應急錢，才開始增值計劃，咁會較為穏當。

2) 贖回基金後的15萬，都可以投資在上述優質股。

當然，可以睇翻你持有的基金，本身有無質素，如果有質素，有機會值得持有，當然要睇佢的條款。

你可以衡量基金的投資策略，所投資的資產類別，投資策略，風險程度，市場，以及過往的表現（可以睇佢過往5-10年，如果回報比主要投資市場高，有機會值得繼續進行）。

現時大市只係合理水平，你可以先用7,8萬，以分注形式入貨。餘下資金，就等大跌市出現，才加大力度掃貨。

------------------------------------------------

Q21297：

Hi 龔sir
想問下你美股Coupang Inc

係潛力股嗎
佢係韓版亞馬遜2010成立

2019年銷售額超過59億美元，到2020年翻了一倍，達到120億美元。

此股值得投資嗎？

龔成老師：

Coupang Inc（CPNG）我都無深入研究。

佢是一家電子商務公司。公司銷售服裝、電子、鞋類、食品、傢俱、營養補充劑等產品，發展都幾快。

睇翻資料，佢係一個韓國設立的電子商務公司，佢公司的「火箭送貨網絡」提供超過數百萬件貨物的當日或次日送達服務，同埋佢公司聲稱99.6%的訂單可以在24小時內送達。

財務數據其實改善中，收入增長理想，同時虧損收窄中，相信處於投資期。但這股我無深入研究，因此唔知平貴，相信是潛力類股，當然，同時有風險，如投資要控制注碼。

------------------------------------------------

Q21298：

老師，909，1177，1448的合理區是多少？
謝謝

龔成老師：

明源雲（0909）有潛力。

佢主要係中國房地產開發商及房地產鏈參與者，提供企業級ERP解決方案及SaaS產品。

睇翻佢之前的資料，佢係中國房地產開發商的第一大軟件解決方案供應商，市佔率有約2成。係呢個市場裡面，按收入計，亦為ERP解決方案及SaaS產品的最大提供商。

其實，佢的角色可以話中國房地產行業的數字化轉型，為房地產開發商及其他參與者，開發了一套行業垂直的ERP解決方案及SaaS產品，以助其管理廣泛的業務運營。

包括銷售及營銷、採購、成本管理、項目管理、預算以及房地產資產管理，佢的SaaS產品包括雲客、雲鏈、雲採購及雲空間。

業務雖然有增長力，但股價都唔平，如果初步分析，處貴水平，值博率未算強，始終市場現時對這類股有好大期望。只可以話，如投資，小注可以，長線可以。

中生製藥（1177）是潛力股，人口老化令佢長遠有唔錯的增長，無論是政府投入的行業資源，又或是人民生活質素令可控制資金上升，都令人們更在醫療方面投入更多。

佢已建立一套完整的商業系統，有多個已賺錢的藥品類別，同時毛利高，可以不斷將錢投資在新藥裡，這模式運作很好。

但這類藥物企業，難免有一點風險，因此要久不久檢視，中短問題不用理會，但如果有一些核心性的問題，就要再全面分析。

就這刻來說，這股可以一直持有，因為商業模式理想，高回報，不斷再投資令股東利益快速增長。加上睇翻佢的業績，保持增長，這令企業價值有實際的上升，令股價得以支持。

現價合理區頂至略貴，有貨可持有，分注或月供可以，這股可以長線持有的。

福壽園（1448）有質素有發展力。

佢係中國最大的殯儀企業，有一定的規模，而針對的是高端市場，服務有一定的質素，擁品牌及知名度，有相當的賺錢能力，財務穩健負債少，因此企業本質不錯。
由於行業處增長的市場，而新競爭者要入行不易，因此對原有企業有利，故福壽園是優質的企業。

佢憑著本身的優勢，能取得比同業更好的回報，而福壽園管理層表明會持續擴展，策略上會透過併購同業及買墓園去擴充。

由於福壽園的模式成功，因此只要投入資金去發展，複製過往的成功，已經能取得理想的再投資回報率，長期來說此股有一定的增長潛力。

不過，由於此股業務好獨特，因此業務情況在年報上或資料上，未必能完全反映，雖然數據及資料上都顯示此股有質素，但往往要時間證實。

至於企當估值方面，市場對此股的評價亦不低，企業經常處略貴水平，$7是合理區頂，不能太過進取，以分注小注投資是一個策略。

管理層的野心很大，投資後不要升少少就賣，要耐心持有，等長期更大的收成。

------------------------------------------------

Q21299：

龔sir,外邊有消息話最近要留意歐洲烏克蘭，可能會跟俄羅斯打起來

如果美國加入就可能會變成世界大戰
你点睇？

龔成老師：

這類政治及打仗因素，其實唔易分析的，因為變數太多，同時你永遠唔知佢地底牌，正如之前北韓同美國，關係有一段時期好差，講到成日打，但最後都無打，所以，好多時只是一些表面因素，背後仍有好複雜的。

我始終相信，唔打的可能性較大，當然，永遠唔會知事件點發展。而發展到世界大戰，可能性就較低。

當然，我地在投資角度，永遠都要留有一定現金作備用，預防一些黑天鵝事件，同時，都要持有一些黃金，同樣都是對沖相關因素。

我地不是預期事件點根發生，而是任何時候都做好配置。

------------------------------------------------

Q21300：

老師，剛看財經新聞，提及小米本年至今共回購在唔少股票，企業為何會作出回購行動的？

這行動對投資者來說有甚麼意味？在評估企業時，如何評價回購這動作？謝謝老師

龔成老師：

企業回購的意思，就是企業買翻自己公司的股票，而在很多情況，企業之後都會註銷相關股票，因此，這動作會令企業的總股數減少左。

當一個企業，總股數減少，代表著每一股的價值得以提高，企業回購，就能這樣為股東提高價值。

同時在短期，股價會回為回購動作，市場會有一定的買盤，這就會對股價有支持的作用。

不過，在我地投資者的層面，在一般的情況，會集中分析企業的「業務基本面」「長遠發展」，這類回購因素，只是一些加分位。

另外，如果一間企業，如果回購股票的%不算多，對企業每股價值影響不算大。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。