前言：寫呢篇文章，係想同大家講，同2017年果一波以投機為主嘅升值熱潮唔同，ETH同BTC今次嘅暴升，係因為響金融應用同科技技術上面真真正正出現突破，足以令佢超越黃金單純儲值功能之餘，過往為人詬病嘅一啲傳統問題（例如BTC交易速度緩慢之類）亦已逐步解決。

我自己好好彩，雖然響幾個月前買一堆垃圾幣輸咗唔少錢，但亦因為咁痛下決心將所有家當全部擲哂入BTC同ETH呢兩隻最穩陣嘅Crypto，結果由10月6日買齊貨去到今日短短兩個月10日升咗七成……所以我覺得你就算無興趣／唔敢投資落呢樣嘢住，至少都要知道發生緊乜事先

2020年末以以太幣與比特幣為首的加密貨幣價值暴升，其中比特幣更一度突破2017年創下的19800美元歷史新高。由於這已非加密貨幣第一次出現暴升情況，一些傳統金融分析員仍沿用過去看法，認為加密貨幣只是發揮著其避險和走資作用（尤其是中國政府正積極推出能追蹤流向的數碼人民幣），而比特幣作為傳統貨幣的替代品仍有不少限制，再加上各大政府為防金融主權受到挑戰定必插手干預，因此最終幣價必會如以往一般，最終大幅回落云云。然而同時也有另一種意見表示，這次的加密貨幣升值是伴隨著技術進步、有備而來。

首先讓我們回顧一下2017年的加密貨幣熱潮，乃源於有人利用發行各種新幣作Initial Coin Offering（ICO）集資之用。由於ICO本身有著很高的騙局風險，加上ICO集資過程完全繞過金融機構監管也令各國政府難以容忍，因此在多番打擊後如今已成明日黃花。然而在2020年的今天，去中心化金融（Decentralized Finance，DEFI）卻賦予加密貨幣新的價值：一方面加密貨幣可以透過區塊鏈的智能合約技術，毋須透過銀行或金融機構作中介即能進行貸款配對，另一方面流動性挖礦（Yield farming）亦令一般加密貨幣的持有者，能夠以一個相對安全的方式將原先只有保值用途的加密貨幣，透過處放於這些兌換或借貸平台產生獎勵性收入，年回報甚至可達10%以上。

再者，擁有美元資產作後盾的穩定幣出現，長期維持與美元一兌一匯率亦可以成為「錨點」，大大減低了加密貨幣因幣值不穩定而產生的交易成本；而透過Wrapped跨鏈技術而把比特幣與以抵押方式轉換成WBTC、RENBTC等功能更多、交易速度更快的新幣種，市場一直批評的缺點得以解決。甚至乎以太幣亦在新近進入2.0進化程序，在這些技術背景加持下，縱使加密貨幣價格仍將激烈搖擺不定，但至少和三年前相比，是有更實在的價值支持。

後記：當然，以而家BTC升破歷史高位、ETH去番幾年前我買嘅第一粒ETH果個家鄉價，隨時會響幾日後跌番一大截；但你話想番番去半年至一年前BTC幾萬蚊港紙就可以買倒一粒、ETH千零蚊港紙可以周街買倒，我諗就真係無乜可能，同埋而家DEFI嘅普及，係令你就算Strong Hold都仲可以收息以戰養戰

不過呢啲投資建議我就唔敢亂比，響將來會全部加哂入去聖殿級會員文章尊享（未知幾時開始寫，但叫做順帶比番一直以來每個月比20蚊美金月費嘅會員一啲回饋…咁耐以黎都支持我真係多謝哂…），你地有興趣先Join入黎睇啦！

［貨幣101—美匯指數］兼講金本位，同簡明貨幣制度史

繼續事忙（好快忙完！過埋生日啦），出啲簡單文教學。反正上個post 反應都不錯（https://bit.ly/3fgSP1i），話見到美股，同美金美匯指數，基本上係反向咁行。

TL:DR —　你日日見到嘅美匯指數，係1973年嘅產物，咁多年冇update過。而美匯指數出現，正係因為美元本位金本位收皮。

1. 但，好似都未講咩係美匯指數，其實唔難，Google就得。但都解下。照計細細個都會諗（我有啦下，你冇好奇心係你嘅事），世界上咁多貨幣，我細個年代甚至仲有咩西德馬克法國法郎意大利里拉之類，咁咪好多唔同嘅匯率？同埋，你講西德馬克強勢，係指對乜先？瑞士法郎？日圓？古巴披索？定乜呢？

2. 當然大個咗就知，Pax Americana嘛，美國美元獨大，所有嘢以對美國為準。英鎊弱，就係講對美元。日圓強，亦係指對美元。至於AUD/JPY呢啲咁niche嘅cross rate，就用嚟寫文嘅（＊）

3. 但，咁，講美金強弱呢？點算？對乜好？其中一個方法係講相對於黃金，「屌，咪即係金價咯」。咁另一方法，對返其他貨幣，「屌，咪即係EURO掉轉」，又唔多好喎，想對晒咁多隻。

4. 於是乎，就有所謂嘅「美匯指數」，Dollar Index，DXY，有時又會就咁叫「美金」「美匯」「greenback」。就係對返一籃子貨幣，不同比重。

5. 呢度就有問題啦，到底用咩貨幣呢？同埋比重點計？

6. 留意呢個「美匯指數」，可以直接拎嚟炒，有期貨賭，仲有ETF，有期權。而入面啲成份，係極之咁化學同兒嬉嘅。

7. 答案就係，歐元佔差不多六成，日圓十四巴仙，英鎊十二巴仙，加元九巴仙，剩返係瑞典克郎同瑞士法郎。

8. 人民幣呢？冇噃。咁當然啲網友梗係講人民幣點廢點乜。Fine，你覺得開心啲嘅，隨你。但，印度盧比呢？一樣冇。親，印度有民主啦掛，印度經濟規模大過英國添。瑞士瑞典都有，印度冇？仲有巴西韓國，全部唔見影。瑞典老幾呀？GDP細過泰國，好快就伊朗尼日利亞都大過佢

9. 明顯地，呢個美匯指數，係反映「舊世界」秩序。

10. 呢度講遠少少歷史，希望唔悶。可能有聽過Bretton Woods system，布列頓森林體系，亦可能冇。但冇都好，應該聽過「金本位制」，以前美好嘅年代，你阿爺嘅年代，好好的，貨幣背後有黃金支持（不過冇得上Facebook，亦冇得一年去幾次日本）。你有幾多金就印幾多錢，冇得係咁印。

11. 金本位制已不復再，而家行嘅係fiat currency，法幣，講個信字，任印。貨幣嘅「intrinsic value」，等於零。港紙叫做有美金支持，但美金背後一樣講個信字。具體啲就係誰大誰惡誰正確， monopoly of the legitimate use of physical force 即主權，亦好多時包埋鑄幣權。當然有啲國家選擇用其他貨幣，係選擇。但一般嚟講，你在越南就要用越南紙，餐廳肯收美金係選擇，但亦可以堅持你畀越南盾，你唔畀就打柒你。就是咁簡單。

12. 而在金本位，過渡去到而家fiat currency，中間嗰三十年左右，就係呢個Bretton Woods system。係邊三十年？係1944-1973。叻嘅大約估到同乜有關，正係二次大戰。

13. 二次大戰後，歐洲英國等等元氣大傷，日本炸到稀巴爛，中國褲都未有著。基本上就係美國獨大，Pax Americana嘛。最後重建秩序，好多人只留意咩馬歇爾計劃呀，日本天皇去神化之類，完全冇諗金融秩序。你而家見嘅咩IMF 同 World Bank，都係二戰後搞出嚟的東西

14. 講返，二戰後，歐洲日本打到仆街，英國亦正式退下神壇，美國成為無可爭議嘅唯一大國。亦都因為咁，呢套Bretton Woods system，就係人人掛美金，唔準貶值，然後美金掛黃金，咁咯。因為美國拎住最多黃金嘛。

15. 但，呢度唔講太深啦，大家都估到呢啲固定匯率有乜問題（其實亦係香港盯住美元嘅問題），總有人各懷鬼胎想貶值。更大鑊係，總有人覺得固定匯率對自己唔著數（＊＊），咁你保證我可以換金嘛，我就換金，於是美國嘅黃金都不停流失。

16. 結果你估到了，就係美國嘅黃金儲備都不停流失，等同擠提。然後當然係落閘，但唔使放狗。就係棄守呢樣嘢。美金再唔盯住黃金，其他貨幣亦唔盯住美金，全自由浮動。時為1973年，Bretton Woods system唔夠三十年後。點解係呢個時間？正因為歐洲經濟全面復蘇，同埋美國爆咗幾次危機。

17. 講到好遠，但，美匯指數，就正係Bretton Woods system收檔之後，1973年嘅產物。如果人人對美金固定匯率就唔使指數啦，日日一樣！而樓上講嘅「歐元佔差不多六成，日圓十四巴仙，英鎊十二巴仙，加元九巴仙」比重，正係嗰時定嘅！之後一路都冇郁過！死未，夠化學未？

18. 聰明嘅你又可以反駁，喂，1973年邊有歐元呀？冇錯，當時係冇的。當時係德國馬克法國法郎（唔知有冇意大利里拉西班牙比薩塔，懶查）。但，其實一樣。應該話，1973年之後，唯一再轉嘅一次，就係1999年，叫做歐元誕生，取替咗細細個屋村師奶炒嘅ECU歐洲貨幣單位（呢個詞好有歷史感）。

19. 打後咁多年，完全冇郁過。根本就係連1999年嗰次，亦只係將德國馬克法國法郎等等，加晒入去歐元。就所以，唔會見到人民幣，印度盧比，巴西雷亞爾，墨西哥披索等等東西。

20. 咁白痴都得？係咁的。所以早有人發明一個更與時並進嘅東西，叫TWEXB，Trade Weighted U.S. Dollar Index: Broad。唔複雜，就係用返而家美國嘅貿易額嚟做比重，加權咁計每一隻貨幣。同埋，可以每年update 一次，咁就當然有人民幣呀甚麼了

21. 不過，正如好早都寫過，美股道股係十分過時嘅東西，計法唔太科學，成份股又得三十隻。真係專業（＊＊＊）嘅，當然講標普指數。亦好合理，因為道指已經百幾年前嘅產品。但，新聞好多時都仲係報道指為先，甚至「專業」嘅都會講。歷史嘅嘢，唔係咁易取代。「即係好似，明明電路中電子就係負極流向正極，但conventional current 電流都係當正極流向負極咁」

下篇會講埋，美匯指數同港股

（＊）其實唔難，大約估到，AUD/JPY亦係量度「風險胃納」。後者係險避貨幣for some reason（唔記得有冇講過，第時再解），同美元同瑞士法郎一樣，但凡見兵荒馬亂，美金瑞郎日元都升。前者呢，澳元一般就係「冒險貨幣」，同韓WON印尼盾之類差不多。倒唔係因為地理，或者因為澳洲係新興市場。最主要係，其實澳元係China proxy，鐵礦石亦係，中國經濟差就全球都冇乜運行，澳元鐵礦銅價等等，多數都大插。

（＊＊）想像下，歐元亦係同一個問題，意大利同德國用同一種貨幣，廢柴意撚當然覺得唔公平。以前意撚就話貶值救經濟，而家冇呢回事。但，又諗返，歐元咁撚廢嘅，就人人爭住退出啦。但你見事實係點？事實你見意大利西班牙之類根本唔想退出，反而係有事個個想加入。原因亦好簡單：因為歐盟有錢分畀意大利西班牙之類，仲有意大利西班牙人可以去德國打工。當然歐盟同歐元區係兩樣嘢，但，正路地，只可以入歐盟唔用歐元（瑞典，同埋以前英國等等），唔可以用歐元唔入歐盟（非歐盟嘅黑山同科索沃理論上都用歐元，但只係單方面，在歐央行並冇任何話事權）

（＊＊＊）上次都有人挑機問何謂專業，係咪串人唔專業。咁只能答你，冇話專業一定叻，但就係講金融業界咯，基金經理，分析員之類。咁當然你唔著波砵都可以勁過美斯，理論上。

———————
版務：收費專欄已減價。支持埃汾高質文章。
一星期三篇，$175睇到6月22號，加埋過去兩個幾月所有文章。

請去呢度訂：bit.ly/2wVXndj
課程編號填: CC01
報完會有email通知，繳費後有Login及Password
逢一三五入去 homebloggerhk.com （入到去就睇到《事先張揚》）
亦睇得返以前嘅文。一般我都係會黃昏出文嘅。