Diet Culture 節食文化 #wyk9up 今日想同大家討論下Diet Culture🥰 節食文化並唔係「節食」咁簡單，而係一整套對審美、運動、生活方式嘅價值觀，為咗達到一套狹隘嘅審美標準，而罔顧甚至犧牲社交、身體及精神健康。 節食文化有啲咩實際呈現？ -認為外表、身材係人至為重要嘅特質 -將人嘅飲食習慣、體型等連繫到人格道德 -將食物死板地分成「好」或「壞」 -過分著重卡路里攝取 -鼓勵自我、互相嫌棄嘅對話 -沉迷討論減肥方法 -過量運動導致身體勞損、荷爾蒙失調等 -罔顧健康，胡亂食藥、捱餓、扣喉etc -會因爲無法達成節食/減肥目標而情緒大起大落 其實我認為適當地討論如何飲食、運動可以令自己變靚、變健康係好應該嘅，訂立一啲同外表或健康有關嘅目標都係可取嘅。問題係，唔同人經歷緊唔同嘅嘢，有權選擇佢哋希望專注嘅範疇，可能當下要專注家庭、努力讀書、打拼事業，唔係個個都有能力、有興趣兼顧所有嘢。而Diet Culture就係會忽略每個人嘅需要、特質，一尾要求所有人不惜一切去變瘦、變靚，並且會認為「身型唔靚」係嗰一個個體自身出咗問題，用極度負面嘅方向怪罪、排斥不符合審美嘅人。 但其實好多研究都已經討論過，一個人肥甚至去到對食物上癮引致癡肥（bmi >30），好多時都受社會、經濟、家庭、食物產業等多方面影響。 首先講吓食物產業。 喺呢幾十年，好多零食製造商直頭係會有整個科學團隊，研究如何令佢哋嘅產品更加上癮，令顧客不能自拔：由脆度到香味、鹹味、糖份都係經過精心調配，不斷實驗。 喺發達嘅地方，高卡路里嘅食物亦都係垂手可得，甚至比所謂嘅健康食品價格更加相宜。高卡路里、高鹽高糖高脂嘅食物可以令我哋腦部產生開心激素，有啲研究甚至話係同吸毒有差不多嘅效果。 我哋腦部之所以會有咁嘅反應，係因為卡路里代表能量，能量可以令我哋生存下去。喺糧食唔太充足、無咁多精製食物嘅時代，我哋嘅身體當然要對高卡路里、三高食物有特別嘅鍾愛，先可以變得強壯去應付日常生活。但係呢幾十年，我哋嘅食物已經變得唔同晒，供應亦充足，隨時隨地好平都食到高卡路里食物，甚至有商家特登令食物變得上癮…我哋嘅身體進化根本就未適應到呢個新嘅世界😅 又講吓經濟因素。 其實都係常識，去街市買餸自己煮，就一定係最健康又平。但如果一個人成日都要為口奔馳，下下放工已經好夜，或者要輪班，仲邊有時間心力去煮？唔係個個屋企都可以有人做家務，好多都市人就會變咗餐餐外賣，或者求其煮個餐蛋麵，結果又係會又肥又唔健康。 仲有好多好多因素啦～ 講咗咁多，其實都係想講一個人「身材唔靚」，並唔係好似Diet Culture所認為，必定只係個體嘅錯、嗰個人嘅懶惰不道德。有部份人都係被社會、生活逼成，部份人嘅基因係對食物特別難以抗拒，或者特別吸收，又正好生於呢個充滿引誘嘅年代。 所以外國唔少政府開始收糖税、鹽稅，就係為咗減低食物製造商生產不健康嘅上癮食物嘅誘因，又有規定不健康嘅食物不能夠放喺超市當眼貨架咁。因為佢哋都知道單靠每個人個人嘅能力，未必能夠抵抗龐大嘅industry、科研嘅逼迫。唔「靚」、唔「健康」，好多時都未必係個人嘅問題。 用負面甚至欺凌嘅方式去針對肥人（或者根本唔係肥，但都被講成肥嘅人），係殘酷地忽略咗其他佢未必能夠控制嘅種種因素。而且單純嘅欺凌、負面嘅執着，並唔會令佢地更「健康」，亦好容易就會令大家都跌入Diet Culture嘅漩渦，就係為咗追求瘦，而放棄精神健康、社交需要、身體實際健康等等。 所以各位BB要減肥、要變靚，都係跟返自己嘅節奏同埋用正面嘅態度啦😇😚🙏🏻 甚至其實唔想減肥唔想變靚都冇乜所謂，每個人有唔同嘅追求，大家都過好大家嘅生活就可以了😚 至於天生就好瘦可以係咁食都好健康（注意：望落瘦唔代表一定係健康啊☺️）又唔使減肥嘅人，我真係恭喜你😭😂