【龔成問答信箱】（Q22741-Q22760）

Q22741：

Ar sir, 股票係唔係呃人既呢？

龔成老師︰

股票本身係一種集資和投資工具，同世界上所有工具一樣，都無對錯之分，係中性。

呃人與否，係視乎背係相關人士，有無令用股票這類工具漏動，去合法，甚至合法地騙小投資圖利。

我地買股票就是買入一盤生意，有些生意會騙人，但有些公司會真心做生意，長遠價值不斷增長，因此，我地買入前，一定要小心了解「該盤生意」。

我地唔係無方法，去避免騙人生意。

我地可以選股一些大型企業，或者有質素的ETF，作為投資目標。

如果係中小型個股，就一定要知道佢質素、行業前景、財務狀況等，才去投資。如果你連間公司點賺錢、行內有乜優勢、點解未來有發展和增長潛力，都答唔倒自已，咁就要停一停，唔好投資住。

------------------------------------------------

Q22742：

龔成老師你好, 請問8083中國有贊質素如何？現價合理嗎？謝謝你

龔成老師：

中國有贊（8083）集團主要於中國從事經營電商業務及支付服務業務，業務分類如下：

（１）電子商貿：透過電商品牌「有贊」提供各種有關虛擬批發及零售之線上及線下解決方案及服務，如「有
贊微商城」

以有「有贊零售」等ＳａａＳ軟體產品及人才服務、面向開發者的「有贊雲」ＰａａＳ雲服務、面向品牌商的「有贊推廣」與「有贊分銷」、以及面向消費者的「有贊精選」與「有贊微小店」。

（２）第三方支付服務。

（３）一鳴神州：提供第三方支付系統解決方案及銷售綜合智能銷售點裝置。

（４）一般貿易。

近年業務發展快速，生意增長力，不過，現時估值高，業務變化較，整體有好大的不確定性。加上佢過往在核數師報告出現過「保留意見」，盤數可能有古怪，雖然已是數年前的事，但都會扣分。

佢不是無潛力，但風險較高，這刻投資值博率不高。

------------------------------------------------

Q22743：

龔成老師，想請教你呀。我中女一名 未婚，我手持左幾隻科網股，仲要高位果時入，而家賬面 - 20幾萬，流動資金得番10萬。

我700同9988有月供，有聽你講佢地長線ok, 咁美團如何呀？ 應該等定放左佢趁700 9988低入手？

冇左20幾萬 係有啲擔心。希望你可以指點下我個pro folio可以點

700 ：649入 x240股=- $53700
3690: 399 入 x400 股=$-82500
9988: 238入x860股=-$69000

另外手持以下，
1137: 14入 x 7000 =-$32000
1211: 243入 x539 (月供）
1830: 7.2入 x2000

謝謝！

龔成老師︰

你唔好用買入價或帳面賺蝕，作為判斷一隻股票優劣的標準。你應著眼佢本身有無質素，如果有，中短期價格波動，令到出現帳面虧損，係無問題，照可以長線持有。

但如果係無質素，就算而一刻是賺定蝕，你都要將佢沽出。重點分析的地方，係企業質素，而非股價上。

睇翻你現有持股，從質素上睇，其實係無問題。但近期不少中央政策出台，都令都投資不確定性大左。但這些股票長線核心質素，暫時未見有明顯影響。

較大問題係，你這些股票買入價都偏貴，所以才出現較大虧損。而且你非常集中係新經濟股，特別係科技類。佢地雖然有增長潛力，同時風險都較高，你現時持有得太多。

以你年紀，潛力股(你持有的都是這類)可佔約4成，餘下應用以下平穏增長股。若你投資經驗較淺，潛力股比重，要再調至2成以下。到你學到一定投資知識，才慢慢調高。

建議你沽出部份，特別係美團(3690)和港視(1137)這類不確定性較高的潛力股，去換碼至平穏增長股，令組合更平衡。

另外，為了避免你再買貴貨，再有新資金的話，我建議你先利用月供模式，去做增值。透過平均價值買入法，去減低買貴貨風險，對你而言會較理想。

------------------------------------------------

Q22744：

老師，想問如果可買美股，買TCEHY 可以當月供分注嗎?

龔成老師︰

Tencent Holdings Ltd ADR (TCEHY)同買港股騰訊（0700）係無大分別，我地分析是否值得投資時，都係睇佢長線企業質素。

騰訊受政策因素影響，中短期弱，企業的賺錢能力會略減，以及企業估值都會略減，不過，政策影響未到核心性，無令到企業無法賺錢，只是賺錢減少。

這企業長遠仍有質素，有發展力的。佢最有價值的，就是「平台」，這亦是現世代好有發展的資產。

佢業務模式係提供平台，如通訊平台、交易平台、入門網站、遊戲平台等，而收入來源則是其廷伸的服務，如增值服務、網絡廣告、電子商務交易等。

過往的業績理想，又身處長遠有增長的行業，加上擁有重要的資產，即龐大的客戶群，將來發展各業務都有相當的優勢，這都是騰訊值錢的地方。不過，政策會令其賺錢能力減，不過，長遠騰訊仍找到賺錢方法，簡單來說，就是現時定了新的遊戲規則，而企業要時間去適應，中短期賺錢能力減，但長遠會慢慢好轉。

現價合理區中間，分注或月供，都係可以。

------------------------------------------------

Q22745：

請問老師，700 長遠點睇

龔成老師：

1）騰訊（0700）受政策因素影響，中短期弱，企業的賺錢能力會略減，以及企業估值都會略減，不過，政策影響未到核心性，無令到企業無法賺錢，只是賺錢減少。

這企業長遠仍有質素，有發展力的。佢最有價值的，就是「平台」，這亦是現世代好有發展的資產。

佢業務模式係提供平台，如通訊平台、交易平台、入門網站、遊戲平台等，而收入來源則是其廷伸的服務，如增值服務、網絡廣告、電子商務交易等。

過往的業績理想，又身處長遠有增長的行業，加上擁有重要的資產，即龐大的客戶群，將來發展各業務都有相當的優勢，這都是騰訊值錢的地方。不過，政策會令其賺錢能力減，不過，長遠騰訊仍找到賺錢方法，簡單來說，就是現時定了新的遊戲規則，而企業要時間去適應，中短期賺錢能力減，但長遠會慢慢好轉。

------------------------------------------------

Q22746：

你好 龔sir，因為近年市況都好差，之前d貨一直壓住，尤其藍月亮，抽新股中左，到溝貨溝到12.8蚊，而家跌到6蚊樓下，我應該繼續持有定可以再加注呢？

龔成老師：

藍月亮（6993）不是劣質，但最新業績令人失望，由於上市前的數據幾靚，因此，有可能佢上市前執靚盤數，這亦是我對新股/半新股有保留的原因。

佢最新的中期虧損約$4400萬元，去年同期純利約$3億元。虧損主因是市場上，其他平台出現過剩的較低價產品，導致佢定價策略及產品在市場上的價格體系受到干擾。

為統一產品在市場上的定價，佢向其客戶提供若干折扣以穩定產品的市場價格，此類折扣對其於上半年的毛利率產生約9%的負面影響。

相信中短期未必強，但長遠，其實又不算好差，佢成立於1992年，擁有衣物清潔護理、個人清潔護理和家居清潔護理三大系列共73個品種的產品。

佢係中國洗衣液有龍頭地位，加上毛利率高，賺錢能力強。睇翻佢之前的資料，以零售額計算，藍月亮在洗衣液市場、濃縮洗衣液市場及洗手液市場的市佔率均為第一。

整體有質素，不過之前貴，現價算是合理區中間，你有貨可持有，加注不是不可，但暫時小注。

------------------------------------------------

Q22747：

老師，1177 近期有能力上到$7.5 嗎？

龔成老師：

唔分析短期走勢，但長遠無問題的。

中生製藥（1177）是潛力股，人口老化令佢長遠有唔錯的增長，無論是政府投入的行業資源，又或是人民生活質素令可控制資金上升，都令人們更在醫療方面投入更多。

佢已建立一套完整的商業系統，有多個已賺錢的藥品類別，同時毛利高，可以不斷將錢投資在新藥裡，這模式運作很好。

但這類藥物企業，難免有一點風險，因此要久不久檢視，中短問題不用理會，但如果有一些核心性的問題，就要再全面分析。

就這刻來說，這股可以一直持有，因為商業模式理想，高回報，不斷再投資令股東利益快速增長。加上睇翻佢的業績，保持增長，這令企業價值有實際的上升，令股價得以支持。

現價合理區中上部，有貨可持有，分注或月供可以，這股可以長線持有的。

------------------------------------------------

Q22748：

龔sir，我喺9988股價185時入咗貨，應該止蝕還是相信公司繼續有持好？

我目的係持中長線

但見股票不斷落，驚股價如果不斷落，我是否應該止蝕？

龔成老師：

我持有比亞迪（1211）13年，先有較明顯的收成。

我地買股票就是買企業，要耐心等企業成長，而不是著重短期股價！

你應該減少睇股價，多睇企業年報。你耐心持有就得。

阿里（9988）有質素，中短期一般，但長遠仍有增長力，之前貴，現價去翻合理區。

係業務層面，擁有相當的優勢，不少業務處於壟斷狀態，同時增長理想。加上正不斷發展延伸業務，這都會成為企業增長的潛力，預期增長會持續，這是阿里最大的賣點。

以企業的長期發展計，這股的確優質，但股價都有一定的波動，現價算是合理翻D，但都不是大手時候。

始終將面對內地監管可能收緊，因此風險度增加左，不過，我相信佢的整體優質度仍在，內地不是不想佢賺錢，只是想規管佢。佢已建立好完善的業務，因此本身是無得輸，只是賺多賺少問題，現時監管多左，點都會影響賺錢能力。

對於這類優質、有發展，但現價未算特別平的股票，小注分注投資，或月供，是較好的方法，算是平衡了風險與增長的考慮。這股可以長線投資的。預佢現價約合理區中間。

------------------------------------------------

Q22749：

0305, 投資價值如何？

龔成老師：

無人能預測短期股價走勢，投資者只能從長遠角度分析。

五菱汽車（0305）質素算中等，業務都不算差，潛力度有的，但同時都有風險。

近期產品銷售不差，但我地分析時，唔可以只用咁短時間，就去決定一間企業品牌。這個平價車模式，可否能為佢持續增長，依然係一個問號。

以佢過去幾年，最高單年純利都不足2億，但現時市值好高，已經係唔平。近期此股急升了不時，此刻投資有一定風險。

如果以長遠角度分析，佢主要業務為於中國從事汽車零部件、發動機及專用汽車之製造及銷售業務。為中國商用微車發動機及汽車零部件之領導製造商，製造設施設於柳州及青島。

最近有中國品牌電動車大賣，而五菱汽車有做供應所以在當中有利益，因此都有潛力度。

不過，考慮到近期股價上升不少，這刻投資價值博率未算高。最好回翻先考慮。

------------------------------------------------

Q22750：

老師，3690 四百元及三百元有貨，美團是否有實力?是否可以等下？
thx

龔成老師：

美團點評（3690）有潛力的，但最大問題是估值難，之前貴。

佢過往一直虧損，到近一年，開始有正現金流，這是一個實質的利好因素，因為之前一直在燒銀紙，現時初步見到成效，不過，估值的方法好虛無，因為現時的市盈率仍過百倍。

如果有利好消息，佢可以上好多，但如果估值修正，股價可太跌。

只可以話，潛力是有的，現價唔算平，之前明顯貴，之後回翻好少少，大約合理中上部，不過，一定不能大注。小注持貨，是較好的做法。

如果你持貨佔組合比例%多，宜減。

如不多，可守。

------------------------------------------------

Q22751：

大師，富途跌咁多，係咪合理價啦？
謝謝

龔成老師：

富途（FUTU）有增長力的，但業務波動，有危有機類。

佢係一家在線經紀公司，提供一站式在線投資服務，騰訊（0700）為股東。該公司通過網上平台提供服務，其中包括香港、中國大陸，以及美國股市的市場數據、交易服務和新聞源。

佢以經紀佣金，以及手續費服務的形式產生收入。

這企業雖然有發展，但現時市盈率好高，股價變化大，要留意風險。好難話現時是否合理。

這股小注都可以，長線有增長力。

------------------------------------------------

Q22752：

龔 sir,近排股市有所調整，目前有什麼具潛質而又便宜的新潛力股可以買來長線持有？因為現時那些潛力股都偏貴。謝謝指點。

龔成老師：

安碩恒生科技（3067），終於去翻合理區，佢有長線投資價值。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

這基金上落較大，現價大約在合理區中間，因此，這刻不能大注投資。

最好的策略，就是月供，或自行分注小注慢慢收貨（例如每月買一次、或2個月買一次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

------------------------------------------------

Q22753：

老師 可吾可以問下你意見。419 華誼騰訊娛樂 應吾應該繼續持有

EPS 低到零，ROE/ROA 又持續負數，毛利率升但淨利率又持續下跌，總資產又係愈來愈少

仲有冇其他數據去分析公司個情況，麻煩老師了

龔成老師︰

華誼騰訊娛樂（0419）主要提供線上線下健康及養生服務，以及傳媒業務，質素不太好。

生意不佳，多年持續虧損，投資價值不高。

其實你見到佢，除左每年都蝕錢外。無論營業額、毛利都一直在倒退。基本上，你可以斷定這企業質素有限，不宜投資。

------------------------------------------------

Q22754：

成哥你好，我們情況是這樣的，我們夫婦二人加奶奶，家住屯門山景邨257尺單位多年，單位已以租者置其屋方式買入，一直想住得舒適點，唯資金追不上樓價。

前年大病一場（cancer)，痊愈了，決心找自己舒適生活，減輕生活煩惱，亦想趁奶奶身體健壯時搬開享受一下自由時光，但我們二人資金只有九十幾萬，二人月入共有$41000，

可負擔$13000-15000供款一個月。（但病過的我買樓後留番至少三十萬現金比較理想）我們的計劃是將來奶奶需要時可接她過來住。

所以都幾難搵，依個時侯我們竟然抽中了居屋，有機會選購山麗苑

現在問題是，想請教一下你的意見，山麗苑比較偏遠，無論照顧奶奶及返工都是，但兩頭家咁樣供山麗苑比較無痛，我們應選擇嗎？定還是市面上我們仍有私樓選擇嗎？

以我們資金是否太危險，如果買市面私樓，突然有需要（病）放樓回山景邨住，賣樓容易嗎？可否給沒有置業經驗的我們少少意見，謝謝你！

幾方面應該怎樣平衡？

龔成老師︰

坦白講，以你們現時預算和收入，市場上可選擇私樓唔多，而且呎寸都會好細。

其實山麗苑作為自住樓，以你們現時財務狀況，相信會係一個較好選擇。

但你們除了價錢，都要考慮多2點。首先，一定要確保自己長線"供得起"。

第二，你們要從生活角度(例如往返工作地點、家庭生活、照顧你奶奶等)，去考量這個地方是否適合。講緊唔係短期，而係長線10-20年。

如果這2點都係過關，其實你買入係可以。至於再有餘下資金，你先要保留部份，用作應急。再有餘力，才去投資優質股，進行增值。

------------------------------------------------

Q22755：

老師，其實點解要用月供方式，例如港鉄0066一首2萬蚊，假設月供5000蚊，要供4個月才買到一手，但如我用2萬蚊可直接入一手，

係咪只係因為平均成本法這個原因，只是平衡番個買入價？

而你建議用平穩增長股去增值，是否因為你分析港鉄係有增長力，長揸多年後，這隻股價會升，而令財富增值？因為如果keep住月供十年，會hold住好多貨，

要假設佢股價升，先可令財富增加。

我持有呢d貨︰

0005匯豐1600股，
1088中國神華500股，
1398工商銀行5000股，
2388中銀香港

是否應該放左佢，用黎投資其他股？

如月供股票，或開股票戶口，你建議用邊間銀行比較好？我儲蓄用hsbc,所以順便在hsbc買股票。

巴菲特同你嘅書，首選你建議睇邊本較適合。謝謝您！

龔成老師︰

無錯，月供目的係希望透過平均價值買入法，去減低你買貴貨風險。這個方法，比較適合不懂估值的初學者。若你對估值定平貴有足夠經驗，直接買係可以。

港鐵（0066）有質素，可長線投資。佢是全港唯一的鐵路營運商，加上政府會比佢地產方面的優勢。長遠正面。

佢2020年出現虧損，主要係由於物業重估所造成，這只是一個會計上數字。扣除這部份影響﹐其實佢今年都係有盈利。

雖然近年有不利因素，影響了中短期盈利，雖然會扣分，但最核心的本質不變。

睇翻資料，港鐵過往正常年份，一年可以賺$160億，就算扣除物業重估，都有過百億，當中包括了鐵路經營部分，以及物業的發展、物業的租金收入。基本上，每年都過百億的。

物業發展部分，長線正面，收租部分，無問題。

因此，長遠發展仍是正面的，會有一定增長力。這股可長線投資。現價大約在合理區中上部。

而你現時持有股票，都係有質素。我地唔好成個組合，只集中係3,4隻股票身上。

最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能高於組合30%，同一股不能高於組合15%。要平衡，建立後長期持有，不是買賣賺差價，而是成為你財富組合一部分。

你現時持股，最大問題係集中晒係銀行業。你可以沽少少，換至其他優質股。如果唔想沽，就用新資金去慢慢平衡翻個比重。

至於用邊間銀行，無特別建議。除了收費，你可以睇翻邊間較方便你，咁就可以。

------------------------------------------------

Q22756：

hello sir~想請教下你~我手上冇物業，想愛嚟自住，做9成按揭，你覺得wetland 300尺$5xx單位值得入手嗎？thx~

主打_WETLANDSEASONSBAY.pdf

本身返工/住都係葵涌

龔成老師︰

參考其他附近樓盤，其實個叫價都有少少貴，主要係新樓關係。這就是我經常叫大家，盡可能都唔買1手樓，因為當中溢價，會令大家比多左成本。

如果這個是你自住樓，只要滿足到你長線生活所需(未來10-20年)，而且又有信心長期供款都無問題，咁就可以。

但若你係諗住暫住，遲些有錢再換大屋，你就要留意。因為佢本身地理位置較偏，加上單位呎寸都較細，其實投資價值唔會好高。

而且，佢周邊生活配套一般，另外，你返工在葵涌。

若你真的打算購買，你最好到實地周圍走走，幻想下將來生活模式(例如買生活用品、食飯、娛樂等)，真的覺得無問題，才好考慮。

反而我建議你在葵涌區找物業，會較好。

------------------------------------------------

Q22757：

請問龔sir 9988 仲有冇前境，想係190蚊以下建倉

仲有1211 長遠發展真係非常好？好多專家都話好 想問埋龔sir先決定買唔買 想放佢3至5年到

龔成老師︰

阿里（9988）有質素，中短期一般，但長遠仍有增長力，之前貴，現價去翻合理區。

係業務層面，擁有相當的優勢，不少業務處於壟斷狀態，同時增長理想。加上正不斷發展延伸業務，這都會成為企業增長的潛力，預期增長會持續，這是阿里最大的賣點。

以企業的長期發展計，這股的確優質，但股價都有一定的波動，現價算是合理翻D，但都不是大手時候。

始終將面對內地監管可能收緊，因此風險度增加左，不過，我相信佢的整體優質度仍在，內地不是不想佢賺錢，只是想規管佢。佢已建立好完善的業務，因此本身是無得輸，只是賺多賺少問題，現時監管多左，點都會影響賺錢能力。但長遠仍是有發展的。

比亞迪（1211）係潛力股，業務發展理想，研發不斷進行，汽車賣得好好，電池技術發展得很好，行業前景良好，企業長遠發展正面。

但這股經常都處略貴水平，大約去翻$135先算合理。如果本身有貨，可長線，但預佢股價波動。

如果唔夠貨或無貨，而又想買入，只建議月供，在$180以下先月供較好，但如果真的好想儲貨，同時現金足，現價以小注模式去月供，都可以的。

又或者可考慮GX中國電車（2845），這基金的目標是追蹤Solactive中國電動車指數NTR「相關指數」表現緊密相關的投資回報。

持股中最重就係比亞迪A股（002594），以及與中國電動車產業有關的股票，中國因為能源問題，長遠一定要發展電動車，這是大方向，故此股有一定投資價值。

------------------------------------------------

Q22758：

龔老師午安，不好意思打擾了，你係否用緊富途？呢間如執笠，有沒保障？很安全嗎？

上星期去咗hsbc間問左，佢話沒“月供美股“功能，為什麼？請問富途有月供美股嗎？

龔成老師︰

我不是在用富途，但其實香港監管唔差，富途都算安全。

《證券及期貨條例》下的投資者賠償制度設有投資者賠償基金，會為因中介人違責而蒙受損失的投資者提供賠償，每人上限50萬賠償。

若合規銀行或證券行出現破產，你投資證券之損失，可以從<投資者賠償基金>中，獲得最高50萬保障。

當中賠償細節，你可以參考翻<投資者賠償有限公司>網站，會有較詳盡解釋。

其實在一般的情況，就算股票行倒閉，你的貨都無事，因為佢只是中間人，你的貨無影響，除非佢中間有造數，例如每次你買貨，都無同你買。

至於匯豐點解無月供美股，我都唔清楚。至於富途有無，你要自己去了解翻。

但美股其實可以1股股買，你自行每個月定時定額買貨，其實都做到月供的效果，不必一定要用月供服務。

------------------------------------------------

Q22759：

龔sir,你好！我今年26歲，想向你請教，我剛轉新工作，新工作月薪約4萬，每月供樓1萬元（目前出租給別人）。因為上班地點太遠，剛買了車，所以流動現金只有15萬。

目前持有以下股票：
1691 2000股 $22.5
3690 200股 $281.2
6969 1000股 $47.5
9666 500股 $79
6823 2000股 $10.76

6823打算長放當少少收息股，其他基本面我看都是有營利能力，請問可否繼續持有？

另外現在每個月可以再支出1萬元作投資，請問現時我的組合是否有任何股票需要賣出，或可以增加甚麼類型的股票？謝謝你！

龔成老師︰

你現時持有股票，都係有質素，適合長線持有。當中思摩爾國際(6969)和美團(3690)由於不確定性高，加上監管風險高左，長線不宜持有太多。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你26歲，應以增值為主，香港電訊(6823)只係收息股，增長力不高，不太適合你這個年紀。現貨照持有係可以，但不要再加注。

未來時間，建議你用「平穏增長股」 + 「潛力股」作組合，去創造一個增值平台。

現在你每月先用5成儲蓄做月供。其餘先儲起，用一邊月供一邊儲蓄的策略。

由於你投資知識不高，因此可較集中在平穩增長類股，至於潛力股，只宜小小注(不多於3成)。最好是你先提高投資知識，等到你有一定知識和經驗，才慢慢增加潛力股比例(大約5成)。

現時大市只是合理區，你現有15萬資金可以先投入多少少，用"分注"形式，慢慢買貨。餘下部份，就連同每月所儲倒的資金，就等大市出現一定程度的下跌，才大力度掃貨，然後長線投資。

------------------------------------------------

Q22760：

龔sir 你好，我都同意你用月股分階段入貨，但有時用月供的價唔好，我見中銀而家有個碎股易佣金0.25%，牛牛都有碎股單，但唔識加埋其他雜費，

用邊個買抵d，因為想分開買幾隻，手續費每個月加埋都唔平

龔成老師︰

其實你買碎股和月供，一般都係經紀佣金、印花稅、交易徵費等。因為每間銀行都唔同，你可以打去客服，查詢下邊個方法最抵。

但如果你係初學者，我比較建議你月供。因為月供就係透過"定期定額"供款，去平衡你買貴貨風險。

如果你唔識估值，去定平貴。自己去決定買貨價格，有機會令你買貴左，影響長線回報。

若用碎股方法較平，你就要幫自己每月定個日子，好似月供咁做。每月就在當天，不理股價，直接用同等金額去買碎股，咁都可以做到月供效果。

記住，係你未真正學懂估計前，唔好去自己定平貴，去經常調整每月儲股策略，好易出事。

當然，如果手續費佔比真的好高，你可以考慮用「自行分注」，例如每隔2、3個月買一手的方法進行。

又或者月供一些指數基金，就可以做到「平衡投資組合」這動作。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q12481-Q12500）

Q12481：

Halo龔成老師，係一個朋友介紹關注你Facebook page，我係投資新手，見你經常會解答大家疑難，我都想搵你俾下意見

Background: 我依家30歲，有大約1m比較長線投資股票 (恆生，滙豐，領展，中電，港燈，香港電訊，中華煤氣，港鐵)。現時每月大約儲蓄$30,000.

問題: 我自己做research見一般穩定收息股最多每年派息率約5%，如果我想達到每年回報有10%，係唔係就需要自己多做功課多下功夫去物色潛力股？

定係都會有其他比較穩定options去達到呢個回報？我目標係每月被動收入$50,000.

龔成老師：

首先，你現時持有的，都是有質素的股，可一直持有。

現時一般的收息股，股息率約5%、6%，這是一個合理的市場要求回報，如果你要去到10%，當中有幾個可能。

第一，你有能力選股，比市場早一步發現了這收息股，這要求你有一定的選股技巧，同時你要花時間不斷選股。

第二，你要等大市去到較平的時候才出手，暫時大市只是合理區，所以你仍要耐心等待。

第三，這收息股本身有風險，業務可以有點波動，所以市場對這股的要求回報都會較高，你都可以投資，但注碼要控制，例如佐丹奴國際（0709）、中石化（0386）、必瘦站（1830）、互太紡織（1382）等（記住，股價略波動，不能太過大注）。

------------------------------------------------

Q12482：

龔成老師 你好啊 我今年22歲 出黎返工幾個月 以前係d月光族所以無咩積蓄 依家先開始逼自己學識存錢

我學到你所講的財務自由，感受到財務自由的威力，同樣都明白左時間同埋自己儲蓄率既關係

有依家月入20000(未扣mpf),要比5000家用之後,我可以存到10000。由7月個陣我將呢10000分作2 parts,2000現金,8000月供，我有幾個問題想問一問

1.我係中銀開月供，5000 恆地(12)，3000 港鐵(66)，呢個比例合理嗎？

2.我7月買入恆地($43.8 ),港鐵($55.5), 我見依家12已經$40.x，66都已經51.x，有dd擔心，定係我唔應該成日睇住，繼續供？

3.以我得情況，有可能達至財務自由嗎？我怕我的方向一開始就錯了。

唔好意思，問得比較多，多謝你咁有心機睇，希望你可以比少少建議啦

龔成老師：

1）建議你減少少恆基（0012），減至$3500-$4000，因為你這刻月供的比例較多，我想你儲多少少現金，如果大市下跌，你的現金可以掃平貨。

2）你完全唔洗理短期的股價，建議你唔好睇股價，保持每個月月供就得。這兩股都是優質股，你只需要睇「企業」，而不是睇「股價」。

3）可以，但你仍要提升投資能力，因為你如果運用餘下的現金，將會是其中一個關鍵。

------------------------------------------------

Q12483：

老師你好！早兩星期買入IMAX China（1970），相信佢業績應該會有增長。今日公布2019上半年業績，大中華區總收入達5,930萬美元（約4.6億港元），較去年同期增長15.1%。

現想請教這股票過去兩年股價向下，老師點睇，是否業績末如理想？現有股票是否值得繼續持有或減持？

龔成老師：

MAX CHINA（1970）其實本質不錯的，中國的市場仍在增長中，不過由於過往市場認為佢的增長會好勁，但近年的增長已是平穩，相對令市場失望，所以股價受壓。

再睇翻佢的財務數據，算是不錯，預期這增長仍然可持續，至於股本回報率高，雖然是利好因素，但由於佢上市年期不算長，而上市前後的股構結構不同，因此未必能完全反映企業的賺錢能力。但都是不錯的。

但要留意，佢現時市盈率近20倍，已反映了利好的因素，因此估值算是合理。

------------------------------------------------

Q12484：

龔成老師您好，我今年41歲，已婚，月薪65K，每月大約可儲15k-18K ，手持現金40萬，無投資經驗，無股票在手，另每月供樓8K，五年後供完。

本人想問，如果想五年後買多層樓收租好嗎？十年後達到財務自由後想移民台灣生活退休，應該點開始？

如果月儲邊幾隻股票比較適合？感激！

龔成老師：

你可以用5年作為一個投資年期，目標是5年後買多一層樓，這段時間就利用股票，合理將財富滾大。

你可以投資「平穩增值股」。

現時的$40萬，暫時只能動用$20萬，因為大市唔算平，你要分注投資，同時留下一半資金。長線投資。

同時，你可以做月供股票，供「平穩增值股」，每月供$10000，盈富（2800）佔較多，其實則有：金沙（1928）、長建（1038）、中銀（2388）、港鐵（0066）、恆基（0012），你可以從中選2、3隻。

你5年內，利用這方法滾存財富，之後買收租樓，買樓後繼續以股票作累積財富的工具，但到時投資的風險會低少少，轉到收息股。

------------------------------------------------

Q12485：

老師你好，本人月入大約5萬，已婚，有3個孩子。兩夫婦月入大約10萬元。

因與先生剛置業半年，所以積蓄唔多。現時有40000股939， 2000股0012，8000股709。見銀行經常有寄信來，可以提供低息貸款。

想問如果借黎買股票收利息，然後每月還返條數，預計借10萬至20左右，一年還清，咁樣有無風險? 有什麼股票或投資可推介的?

龔成老師：

唔建議用這方法。

你現時買完樓，其實負債比率已上升左，另外，你現時應該現金不多，所以應該一步步，儲翻多D現金先，然後就慢慢增加翻股票，例如盈富（2800）、恆基（0012）、銀娛（0027）。

這類借貸投資，其實有利有弊，雖然現時低息，的確可以賺到息差，但有機會出現「賺息蝕價」的情況，同時會加大了你的負債比率，因此有利有弊。

唔係話這方法一定有問題，只是，建議在「有真正機會」時才出手，即是股價處平水平，見到一個真正的投資機會，同時減少你有可能出現「賺息蝕價」的風險。

------------------------------------------------

Q12486：

龔老師您好：小弟是投資新手，有事想請教龔老師您。

小弟現年34，已婚沒細路，亦不打算要。手頭上有200萬現金，以及一層現在價值約700萬的樓，已無按揭。

沒有任何股票和其它投資的經驗。現時每月收入約70000元。恆常開支每月約10000元。

太太現時每月收入約40000元，恆常開支約15000元，手頭有約60萬現金。 我們有意在十年內移居台灣，由於台灣我們預料也找不到工作，因此就當退休生活吧了。所以我們現在有以下目標：

除了樓之外，十年後手頭上的總資產達1000萬（包括現金，股票等），如何進行？？

龔成老師：

以你的年齡及投資目標，你可以集中投資平穩增值股，例如盈富（2800）、金沙（1928）、長建（1038）、中銀（2388）、港鐵（0066）、恆基（0012）、粵海（0270）等。

你現時的$200萬，可以動用$80萬，分注投資這些股，唔好一次過入，要分注慢慢入。

另外，你可以做月供股票，每月$4萬，同樣可以投資盈富，以及選上述部分股票，再加小小潛力股，例如比亞迪（1211）、中生製藥（1177）。

另外，以你的年齡，建議你多增加投資知識，在選股、企業估值、投資時機上落功夫，對你長遠財富有好大影響。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

只要你保持月供及分注投資，你地要在10年後有過千萬，再加上原有物業，絕對有可能的。

------------------------------------------------

Q12487：

本人今年為33歲, 於去年底結婚, 暫時未有兒女. 本人月薪合共約 $80000 左右. 於數月前花光了儲蓄買入了第一層物業

由於本人並沒任何股票, 日常只有靠工作收入儲錢, 因之前參考老師 "以資產追資產" 的概念後, 當購入第一層物業後, 現時該怎辦? 買股票還是繼續儲錢買第二層樓?

本人和太太扣除日常開支後, 大概每月能儲4萬左右, 現時也租了一單位暫住 (租約未完)
暫時未有孩子

本人希望每月能有穩定回報, 希望在有孩子前有充分準備，萬分感謝老師贈教。租左買果層樓出去, 係咪好選擇?

龔成老師：

如果你本身有租的地方住，而暫時唔租新買的物業，就要盡快將物業放租，以產生現金流。

另外，你應該加強翻股票方面的投資，利用股票去滾大財富，這就是「資產追資產」的模式，你先利用股票去滾大財富，然後到了有一定財富後，同時樓市在適當時機後，就再買另一物業，不過這一步不用急的。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股最多小注。

你可以用$2萬去做月供，同時儲現金。

------------------------------------------------

Q12488：

老師，楓葉教育弱左，質素如何？長遠如何？

龔成老師：

楓葉教育（1317）本質仍是不差的，但中國的策略，令增長力減弱左，同時令市場對佢的估值減少左。

規模、品牌、學校網絡、財務數據，本質都是不差的，而佢的定位亦是在教育版塊中較受惠的。當中國人可支付的收入不斷增加，這類價格較合理的國際學校，將會爭取到更大的市場，其實這點在近年的收入及毛利率數據可見，這反映佢定位成功，受益大環境的情況。

但政策風險令這股的估值略減，近年，中國政府推出了一些行業的指引：「實施集團化辦學的，不得通過兼併收購、加盟連鎖、協議控制等方式，控制非營利性民辦學校」條例。

這的確加強了對行業的監管，限制了對非營利性學校的併購，但具體條文仍存有未知數。

其實，中央對民辦教育的政策，仍是偏向正面，例如稅務上的優惠，只是想加強當中的監管。這必然會影響楓葉教育的發展，但又未至於核心性，因為楓葉教育仍可透過不同的模式去發展，同時海外市場亦是另一動力來源。

所以在估值上，我地不能太過進取，現時只可以話合理，最多是合理區的中下部，唔能夠話平宜區。

------------------------------------------------

Q12489：

阿Sir，公司有冇方法用財技去谷大ROE嘅呢？譬如借錢。

龔成老師：

公司利用借錢，的確會谷大ROE的，所以我在股票班教選股時，其中一個指標，就是選股時不能選負債太多的企業。

其實，我地可以再將R0E拆開去分析，但這已是較深的內容，相信會在我接下來的進階班講述。

------------------------------------------------

Q12490：

成哥， 兩兒去年開始每月合資$8000買股票，欲長期持有增值。

因想自定購入價故不供股，每月買入一手建行、理民造纸，現時計埋收息仍虧損中。 請問$8000內一手有何合適選擇？

龔成老師：

建行（0939）可投資，這是不錯的收息股，但增長力不強，如果年齡較少，其實投資可以集中在「增長」，唔需要太早收息。

至於理文造紙（2314）以質素本說，算是不過不失的，但又唔算高質之列

佢的生意其實有增長，但盈利就有點波動，由於紙價及成本等問題，令佢最終的盈利較波動。而佢亦未能將成本轉嫁到客戶上。

這反映佢不是無賺錢能力，但營運模式就比較被動，產品價格的自主力不算強，因此質素不算最高級別。

質素中等，都算有投資價值，但就未必值得好太注投資。

所以原有的貨，可持有，但之後未必值得買入太多。

另外，建議投資盈富（2800），不斷儲貨，這是較簡單及理想的投資模式。

------------------------------------------------

Q12491：

龔sir，小弟睇左你本股票勝經，諗住試下投資潛力股，有少少問題想請教下

1. 中生製藥，福壽園，比亞迪電子，比亞迪股份呢幾隻都成日聽你講，想問下比亞迪電子同股份係咪一個搞電子一個搞電動車? 有冇咩網站可以睇多啲佢地既資料? (至少佢地既業務範圍等基本資料)

2. 現時月供$4000 2800，2 66 823 2388各$2500，想投資潛力股，應該月供$1000定係儲現金等低位入定係一邊月供一邊儲現金?

3. 現時我未學識企業估值去睇股價平貴既情況下投資潛力股會唔會太大風險?

4. 我十分想上你既股票班去學多啲智識但奈何因工作時間未能抽空去上堂，有冇咩書推介可以用空餘學下企業估值?

龔成老師：

1）這些都是潛力股，你要留意，潛力企業有較大的不確定性，你要有一定的投資技巧，同時注碼比一般的優質股，會低少少。

比亞迪（1211）主力電動車，比亞迪電子（0285）主力在手機的代工及模組等，現價都可以小注投資，視乎你睇好邊個範疇。

2）你可以投資比亞迪$2000，保持月供。

3）只要是優質股，同時你以分注或月供的模式進行，咁就得。

如果你有企業估值的能力，就較易捉到平宜價，因此就算唔月供都無問題，可一手手咁樣入。

4）你可以睇《年報勝經》，以及有關巴菲特的書，例如《解讀巴菲特》、《巴菲特寫絡股東的信》。

------------------------------------------------

Q12492：

龔成你好，我於80蚊買入一手中移，最近股價跌到52週低，更創下5年低位，原因不明，不知是否有大戶沽貨

想問問中移前景仍樂觀嗎？
5G對佢來說，長遠正面嗎？

龔成老師：

所謂的大戶買賣貨，都只會對股價有中短期的影響，你唔需要理會。長遠來說，股價會回歸企業的價值，所以我地以分析企業價值為核心。

中移動（0941）的質素比過往年代減弱，不過現時仍可算是有質素。因為政府唔想行業的費用太高，因此行「提速降價」政策，會影響佢長遠的賺錢能力。

你預這股是收息，以及平穩增長的股，持有無問題，但就預增長力不強，暫時可持有先，你可到升多D，先轉去增長力較強的股票。

5G對佢都算有利好，但就唔好預有太大驚喜，因為政策唔想相關費用太貴，所以佢賺到的錢不會太多。

------------------------------------------------

Q12493：

龔sir點睇3692翰森制藥

龔成老師：

翰森製藥（3692）是上市不久的股票，這類股較難分析，風險較高，市場對其估值亦無統一的概念。

以規模及過往的賺錢能力來說，不錯的，但上市前的數據代表性較低，因此未能確定當中的優質度，初步分析現價不平，投資值博率只是一般，如投資，不宜大注。

------------------------------------------------

Q12494：

老師，我覺得0001長江，現屬於便宜區，因書中又說電能同長建都算不錯，我直接買入長和，可以嗎

我去過好多書局，都買吾到年報勝經，我見人地已買到。係吾係要書展先有，書局要遲下？

另外，我想問巴菲特說的證券分析，是否這本有上下冊的書？

龔成老師：

長和（0001）現價只是合理區，未到平宜區，唔好因為企業的一段時間的股價高低，就判斷平貴，我地要同時考慮企業的價值，以及長期的業務情況

你可以分注或月供，但你預這股的增長力弱左，只是平穩增長型。

《年報勝經》，因為唔少書度都斷左貨，賣晒，所以你見唔到，你要主動問職員，亦可以同書店話要訂貨，我相信過2星期會正常翻，有新貨到。

《證券分析》有不同的出版社出過，有分過上下冊的。

------------------------------------------------

Q12495：

不好意思，常常煩到您，但因為你的教學好好，我十分相信你，而且我十分好興趣這對些知識

但身邊沒有人對這知識有了解，他們也不明離開老鼠賽道的好處，他們也不明投資知識在自己身上也是一種投資，他們只想知答案，但不求為何。

如股票一樣，他們只想知，幾錢買，幾錢賣，郤不求它點解值得升，它是什麼公司。當解答他們不到，可以升到幾錢，他們還會笑我，學的東西根本沒有用

說我說咁多有咩用，其實不明的是他們，因為他們不知道，有實力的公司是什麼，有能力去賺錢的是什麼，更不知複利的威力是什麼。

雖然他們不明白我，但我知道跟你學習，看你的書，巴菲特的書，成功學的書，吸引力法則，2/8定論等，我知道，我會像你這樣成功的，我收入穩定了，我一定會來上你的課的。我知道我選擇這條路是沒有錯的。

如一直埋怨香港沒出路，這不如好好裝備自己，等時機一到，加上學識，為自己人生殺返出條光明路

龔成老師：

你唔需要說明不明白真正知識的人，你只要做好自己就得，每個人都有佢自己的觀念，有些人是好難講得明的。

所以，我好多時講完就算，然後我就會做好自己，只要以「自己」去證明方法成功，這就可以了，加油！

------------------------------------------------

Q12496：

你有開班關於如何製造穩定的被動收入嗎？

龔成老師：

我主力在股票的投資與分析，我地進行財富配置時，會用平衡組合的模式，股票是其中一部分。

而我地進行人生財富累積，會用「先增值，後現金流」的模式進行，即是當有一定的財富，就會集中現金流，當中的其中一個分配就是「高息股」。

課堂所教的，都適合運用在高息股，同時有部分內容是針對高息股的。

------------------------------------------------

Q12497：

老師，今朝又買左你本新書

以前我感覺得儲現金就得 唔需要投資 總覺得投資唔係我地呢D人玩 但睇左你書後心態唔同 宜家非常期待回報

龔成老師：

知識要慢慢學習，以及累積的，唔好打算一步登天，你要先做一些基本的理財，投資方法，先由較低風險的著手。

在這段時間，好好睇書、學知識，然後知識增加，再投資不同類別的股票，財富穩步增值。你的財富與你的知識成正比，加油！

------------------------------------------------

Q12498：

成兄。
你認為天立教育潛力會大嗎？

龔成老師：

天立教育（1733）主要係中國中西部，透過結構性合約經營幼兒園至高中學校，以及經營培訓中心及早教中心
（即遊戲學習中心）。

業務基本上不差的，增長力不錯，但中國的教育政策有可能對其成為風險，同時現時估值唔平，值博率中等。

暫時股價潛力未算好大，如你想投資，小注都可以。

------------------------------------------------

Q12499：

你好龔成Sir，最近一個月才經朋友介紹下始認識及拜讀老師的文章及信箱。

本人45歲，「遲做」好過「唔做」，現想學投資增值，希望可以（在10-15年)退休前為財富增值，建立被動收入；同時，現居住單位月租$20000，跟已退休父母同住，考慮應否計劃置業作自住或收租之用。

沒有直接投資經驗，過往只過買儲蓄投資相連的（基金）保險計劃，月供$3000，已供了差不多12年；理財顧問早年離職後，最近上網查詢，每年回報由最理想11%-12%，跌到現實中的1%。

現金：HKD1,100,000
3個月港幣定期：HKD100,000
6個月美元定期：USD50,000
12個月人民幣定期：RMB 500,000
另外，有買年金5年供20年繳，及退休儲蓄保險

銀行月供股票適合嗎？或是用收費較平的富途牛牛進行一次過買入股票？

明白與其他來問比較，未有確實具體數字目標，還望老師指教。

龔成老師：

首先，你要清楚分析翻，自己是否想買樓，因為買樓與唔買樓，你之後的理財會變得好唔同，如果買樓，例如在3年內買，你就要持有較多現金，投資長期性項目亦不能太多。

若果唔打算買樓，你可以將現時部分的現金與定期，投資股票，以你的情況，可以投資平穩增值股，令財富平穩增值，你離退休有15年，你可以利用10年時間去增值，然後就慢慢將財富，轉為收息類資產，以準備退休。

如果你現時無樓，同時在長期租樓，我會偏向你在適當時機買樓，例如在3年內。

因為香港樓市的供求失衡，現時政府施政更加困難，大嶼山項目可能推遲或停止，這一定會對長遠供應有較大影響，因此，如果樓價在這幾年，有少少調整，又或你認為合適的時機，其實可以買樓。

如果你想買樓，財富配置上就要留較多現金，最多只是計好數，餘下有資金可長線投資，才買入盈富（2800）等股票。

------------------------------------------------

Q12500：

龔成老師你好。自從一年前接觸到你書之後一直都好崇拜你， 視你為學習目標。我係投資新手， 有d關於月供基金同埋月供股票問題想請教你。

我宜家20出頭, 單身冇家庭負擔, 預計短期內大概五至八年都要會係咁。

宜家每個月扣除左生活費同埋家用之內可以用的錢有大概HK$30,000。

因為一直都有留意開你Facebook既post本身打算用一半來做月供股票～ 因為老師好似比較少提及去買月供基金。

但最近有個保險公司經紀同我講話做月供基金其實會更加好。不知道如何抉擇。

我主要有兩個目標：5-7年內希望儲到首期買樓可以買樓 大部份的錢 (7成）會用來買樓，其餘少部份會用黎創業（3成）做小生意。

保險公司比我嘅計劃係:

十年每個月月供$15,000但係要至少供到第七年先可以超過本金咁樣拎出來。回報率佢預測係6-9%（but not guaranteed) 於是佢幫我計左條數公道第十年的話，我會有$230-260萬左右。

但缺點就係頭2年半我唔可以停供之後就可以選擇減少供款金額。 同埋理論上時間越長回報率越高。（所以其實我十年供斷拎出來都係唔着數。）

同埋配合返我嘅計劃如果我第六年拎出黎其實我淨係會淨賺咗四萬幾蚊（total: $116萬即係我自己投入的有$112萬）回報率好似好低

我想問一問老師：

選擇月供股票 (即是老師平日所講的穩定潛力增值股票 例如：盈富基金、中銀、金沙娛樂 等等)會唔會回報率超過左我上述月供基金Plan 呢？

上網睇咗一d文章明白月供股票同基金的主要分別在於：

1.月供股票淨係可以投資香港股票但係基金可以投資外國股票；

2. 月供基金有專家去睇住所以風險比較低；

3. 月供基金比較缺乏彈性需要供款一定年期否則蝕。

請問老師我應該如何分配HK$25000?淨係買基金定係股票定係兩樣都買？比例又應該如何呢？(因為$30000入邊我諗住每個月$5000做儲備等待低價入股市）另一個因素唔知是否相關：大概兩年之後每個月減咗必要生活費同家用可以有$40000。

最後就係如果老師建議我月供基金的話建議我應該向保險公司OR 銀行 定係基金公司？

多謝老師！解答疑惑真係感激不盡

龔成老師：

保險公司的產品，有佢的作用，當中有利有弊，好處是回報較為確認，而股票的不確定性較大，從回報上，股票的回報會較好，但問題是風險會較大。

另外，股票的好處是流動性較強，你可以較易配置，但你上述的產品，流動性就較弱，所以，各項目都有當中的利弊。

而我地進行理財，其實是建立一個組合，當中有平衡的分配，以減少風險，你可以將部分資金，投資在上述保險公司的產品，作為理財中防守的部分，例如每月$5000-$8000，不用太多。

因為你現時的年齡，其實應著重「增值」的層面，因為當我地進行人生財富累積時，會運用「先增值，後現金流」，所以你這年齡，是財富增值的黃金時期，唔好太過保守，進取少少都可以。

同時，你亦要盡力量去學投資知識。

你可以將部分資金，做月供股票，盈富基金（2800）已是不錯的選擇，另外，你可以投資其他在交易所買賣的基金（ETF），例如領航標普五百（3140），這是追蹤美股指數的基金，你買這個基金，已是買外國股票的組合，而且管理費比傳統的基金低好多，盈富一年只是0.1%，3140只是0.4%。

只要長期供這些ETF，其實你已有不錯的回報。

另外，唔好用盡所有現金，要留有部分現金，等機會入貨，買股票，所以你要盡快在這段時期，好好儲現金，同時增加知識。

----------------------------------------------

多謝各位提問，若然你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網的，當然，會將發問者的身份，以及有關個人的部分刪去。

另外，由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

《2018-09-17 精華2》
儘管ROE比前年要好 仍無法誘發北水資金南下~


【從Libor看美元下半年趨勢】http://t.cn/Rddr7nK
【賺錢E起來 ETF＆外匯EA工作坊】http://t.cn/Rddr7nK
【如何追蹤巴菲特的持股? 】https://goo.gl/oo78Uf
【怎麼查詢數位貨幣的最新資訊?】 https://goo.gl/kzfxGX

【InvestU線上社大】+8862-272-60178
【InvestU線上社大 LINE@ ID】@msfg
【InvestU線上社大官網】http://investu.com.tw
【InvestU線上社大臉書】
https://www.facebook.com/InvestU.MSFG