【龔成問答信箱】（Q22261-22280）

Q22261：

老師，市場太多負面消息，有時好影響我的投資決定。

老師想問邊幾個指標數據分析股票平定貴？
重要指標

龔成老師：

你集中睇「長遠企業價值」就得，有好多市場因素，對該企業的業務發展，是完全無影響的！

要計企業的價值，過程比較複雜，好難三言兩語就講到，就算在我的股票班，都要講5小時，裡面會講3種估值方法，有難有易，但同學都用到的。

簡單來說，你要考慮企業的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。這都是計算的基礎。

例如，我地會考慮佢有多少生意，有多少盈利、現金流，有多少資產，從而計算該業務值多少錢，同時會推算將來的盈利情況，去推算這企業長遠的價值。

如果要深入計算，基本上要好仔細的研究企業，要分析好多財務數據用比率，先至有較完整的答案。

------------------------------------------------

Q22262：

龔老師：想請問下最近823領展可以派息，可以選股或息，但換股價有待公佈。

其實點樣計，揀息還是揀股好？因我聽人講揀股會有增長力，所以一向66地鐵我都揀股，但佢會寫換股價係幾多。但今次領展無寫換股價，其實係咪會遲些補寫返呢？

謝謝回答

其實最主要係想問點樣計揀股還是揀息好呢？

龔成老師︰

其實揀息還是揀股，你可以睇翻佢個換股價，到底合不合理。現價計，領展(0823)在合理區中上部。

若此股有投資價值，換股價又合理，我地就可以考慮收股代息。(但若你係退休人士，需要用股息去支援生活支出，就任何時候都應選收現金股息。)

你要記住，我地做財富增值，就係將一直貶值現金，換成優質資產的過程。如果資產有質素或價格合理，我地就應該放棄現金，投入資產。

------------------------------------------------

Q22263：

老師你好，關於收息股方面其實我有個問題想請教下，係咪我諗錯左。

假設HKD$100,000買收息股

港股中國移動：HKD$46.70 HKD$3.29買到4手合共2,000 每年派息合共就HKD$6,580

美股可口可樂：USD$54.46 USD$1.66 買到236股 再打個7折 年派息USD$274 乘10倍都係HKD$2,740

咁係咪即係買收息股應該買港股？

謝謝

龔成老師︰

其實你可以簡單咁，比較佢地個股息率。現價計，中國移動(0941)股息率有6.7%，而可口可樂只有3%，明顯係中國移動股息率較為吸引。

但這個只能判斷，2隻股票，邊隻收息較多，但不代表邊個市場，收息股較吸引。

另外，你要考慮埋企業質素，有些企業股息率高，是因為佢潛在風險較大。所以，一隻股票5%息，同一隻股票8%息，有機會係投資值博率相約。

最後，你買入收息股時，唔好只係集中一隻，要分散幾隻有質素，而行業不同的收息股，去平衡風險，才算係理想。

以下是一些較有質素的收息股，你可以參考下。但收息股較適合近/已退休人士，若你較年青，應集中在增長型股票，咁會較好。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。收息基金(3110)，都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

------------------------------------------------

Q22264：

龔成老師，本人算係一個全職媽媽,35歲，由於先生負責全屋企開支同小朋友學費，我就做part time 賺取自己洗費同小朋友日用品，

但想投資增加財富，令小朋友有更好環境成長，但我係新手，未買過股票。

我而加有儲蓄30萬，另外22年第4季一份儲蓄保險供滿，有多10萬，每月未能夠儲錢，最多只有$1000-1500

想了解下我可以點樣投資？有咩股票適合我呢類新手？另外想了解一下 3988是否適合供股，期待你回覆

龔成老師︰

以你35歲，可以選擇一些「平穩增值股」+「潛力股」作投資目標。中行(3988)係收息股，增長力欠奉，以你年紀，唔係太合適。

雖然每月可儲資金不多，但我都建議你照做月供，去養成一個定期儲資產習慣。你可以每月先用$1000儲蓄，餘下就先儲起架策略。

由於你投資知識不高，因此可較集中在平穩增長類股(甚至先集中在盈富基金)，至於潛力股，只宜小小注。此期間，你最好是努力提高投資知識，才慢慢增加翻潛力股比例。

大市現處於合理水平，那30萬資金和10萬保險，你可以先用10-15萬，以"分注"形式慢慢入貨。餘下資金，就等大跌市機會出現，才大力度掃貨，並長線投資。

如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q22265：

龔sir, 你好! 小弟今年四十四，未有家室， 近半年開始留意你專欄，覺得你的投資慨念好好，幾個月前開始接觸股票，年青時係月光族無咩儲蓄。

近幾年才積極儲錢，幾個月前開始月供小量股票和直接買入股票，組合有以下幾隻，希望龔sir可以給于一下意見，小弟萬分感激！

股票組合

月供 ：
0823($1000)
0939($1000)
0968($2000)

股票：1686、3067、0293、1310、3339

以上組合是否平均？

我希望幾年可以有比較明顯的財務增長，可以五十歲左右有些少資產，最後我想講我報讀左你的投資倍升股課程，到時可以和你見面!謝謝你!

龔成老師：

你現時的方向正確，利用投資優質股，長期月供，去達至財富增值效果，你現時月供的股票，都有質素，可長線。

建行（0939）本身質素不差，有一定的規模，在全球都有網絡，本身不會無質素的。

不過，這股增長力不算強，只是一隻收息股，現價投資可以，因為在合理價，但唔好對股價有太大期望。

前景不過不失，中短期會因中國經濟有影響，銀行業的賺錢能力不及從前，加上壞賬因素，都會令佢中短期弱。不過，初步已好轉，但不是高增長型。

而長遠，會慢慢穩定的，不過，增長力不強。你44歲，財富有基本增長力，因此收息股類別不用太多。

至於現時持股，除了國泰（0293）外，其他都可長線。國泰的質素只是一般。

其中一個風險，是油價，睇翻佢過往多年，油價對佢成本影響好大，令佢盈利十分波動，就算佢利用對沖，都唔係好成功，反而試過因對沖而蝕大錢。

另外，航空業對經濟週期較敏感，收入不穩，同時唔算係一個好賺錢的行業，因此這股的質素只是一般。

就算佢重組，得到新資金，只是比佢「捱過這一關」，並不是賺錢能力方面有改善。

另外，如果你想組合有較好的增長，可以減少投資收息股，如香港寬頻（1310），比例不宜太多。

具體的投資配置，你可以到上完堂先進行，股票班見！

------------------------------------------------

Q22266：

龔SIR，你好。學無先後，達者為先！同是80後，我40出頭，十幾年前股票損手15萬，被蛇咬之後就無接觸股票。但通脹既紅流，錢只係儲蓄，真係輸通脤。

我見股巿都漸穩。都開始睇藍籌，而唔再搏細價股，因為唔係日日睇！

我覺得1177中生物製藥有實力入了8手平均價7.1，之後就見到龔SIR你既POST，想你俾意見。另外，我會入10手1398招商，我見你亦推薦！

以下係我既背景：

月入4萬，月儲五千；

唔會郁動既現金有100百萬

20萬會投資，3萬iBond未沽走，股票現有8手1177；想入10手1398招商；我覺得自己都可承受風險，餘下想買一些有潛力炒得上既股票。

所以求教龔SIR。

龔成老師：

我地最重要是建立一個長期的「財富組合」，要優質，要平衡，要適合你的年齡與風險承受程度。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

中生製藥（1177）是潛力股，人口老化令佢長遠有唔錯的增長，無論是政府投入的行業資源，又或是人民生活質素令可控制資金上升，都令人們更在醫療方面投入更多。

佢已建立一套完整的商業系統，有多個已賺錢的藥品類別，同時毛利高，可以不斷將錢投資在新藥裡，這模式運作很好。

但這類藥物企業，難免有一點風險，因此要久不久檢視，中短問題不用理會，但如果有一些核心性的問題，就要再全面分析。

就這刻來說，這股可以一直持有，因為商業模式理想，高回報，不斷再投資令股東利益快速增長。加上睇翻佢的業績，保持增長，這令企業價值有實際的上升，令股價得以支持。

現價合理區中上部，有貨可持有，分注或月供可以，這股可以長線持有的。你可以買入，但唔好太急。

另一隻是招商銀行嗎？號碼是（3968）。這股有質素。

雖然佢在規模上，不及4大內銀，但過往的生意與盈利增長不差，以增長力來說，這股不差。

雖然佢股息率不算高，但以質素及增長力未說，這股在行業裡算不差。現價大約在合理區頂位，有長線投資價值。

你長遠要建立「組合」，並長線持有。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。

$20萬，暫時可動用$10萬。不要太急入貨，至於每月儲到$5000，可以進行月供股票。可考慮：

平穩增長股：潛力股
7：3
（如果你投資實力較強，可增加潛力股比例）

現時大市波動，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q22267：

龔成老師，家父退休後有400萬現金，想問問怎樣穩定每月平均有2萬息收用作生活費？謝謝你解答

龔成老師︰

你可以將這$400萬，分成5部分。

第一部分投資收息股，你可以建立一個收息股組合，你可考慮港燈（2638）、香港電訊（6823）、恆生（0011）、工行（1398）、置富（0778）、陽光（0435）、深高速（0548）等，大多有5%股息

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、富豪產業（1881）、互太紡織（1382）等（記住，股價略波動，不能太過大注）。

（你可睇下《50穩健收息股》當中仲有好多）。

你平衡的投資這些股，除了可以得到穩健的收息收，同時可有效的分散風險。

第二，投資債券，你可以選擇A評級的債券，年期較長都可以，但利息卻不高。你可以到銀行問問。

第三，投資年金，你可以睇睇，這是適合你們的產品，零風險，可以有穩定回報。

第四，你亦可投資銀行低風險類的產品，你可自行到銀行了解下，總之是「低風險，持續現金流」的。

第五，持有現金，以備不時之需。同時，若投資市場大跌，你也可以考慮買到更多的收息股，因股息率會進一步上升。

你可以將$500萬資金，平衡地分配在上述的項目上，對你來說是最好平衡風險，同時有穩定的現金流。

只要你拉平均，大約有6%左右，就可以達至每月2萬現金流。

------------------------------------------------

Q22268：

老師，你好﹗最近FOLLOW你的FB，有些問題想請教你。

我從去年開始月供股票，分別領展3000，2800/3000，建銀1000，交通1000，另外有些其他的，陽光房託15000股，阿里巴巴100股，中銀3000股，電訊盈科3000股，香港電訊1000股，

我需要重新整理自己現有的股票分佈嗎？

如果可以的話，我希望能在5至10年退休

非常感謝老師

龔成老師︰

能否5-10年後退休，其實你睇翻你退休後，每月開支大約多少，再比對你現時投資5-10年後回報，才可以得出一個明確答案。

例如你希望5-10年後每月有2萬蚊現金流，以股息率6%計，你需要本金400萬。若你投資可以累積到這400萬，你5-10年後退休，係無問題。

我假設投資回報有8%（連股息再投資），你每月投資$8000 + 19萬股票，5-10年後，分別會增值至大約85萬和170萬。你可以就著這個預計結果，去調整你投資方案。

你現時月供計劃和持股，都係可以。電訊盈科(0008)都有質素，但負債較大，不要持有太多。

若你覺得現時增值金額，未達到你退休要求。你可以加大月供金額，同時加入一些有增長力股票，去增升增長速度。

但當你接近退休之年，這些增長股，就要慢慢換成風險較低的收息股，去為你退休生活作準備。

平穏增長股︰指數基金、金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)

------------------------------------------------

Q22269：

龔成老師你好，我就快21歲，係親戚嘅教導下呢年接觸左股票，現時有買：

9988 @255
6690 @28.4
1810 @29.5

我想問現時這些投資可行或宜加注或作調整嗎？

以及想請教理財計劃，我宜家係全職大學生，有時1個月儲到大約$5000一個月，想知有冇建議嘅投資方向推廌，例如老師提到嘅盈富基金或者其他投資工具？

現時資產大約十萬，希望25歲至少有五十萬。好多謝老師花時間回答我嘅問題，唔該晒

龔成老師︰

你現時買的股票，都係有質素和適合你。但阿里(9988)和小米(1810)你買入價有點貴。

小米(1810)現時仲係略貴，回多1,2成才好考慮加注。而阿里(9988)現價在合理區中上部，若你現時持貨不多，現價可加一小注。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你21歲，應以增值為主，建議你用「平穏增長股」 + 「潛力股」作組合，去創造一個增值平台。

現在你每月先用5成儲蓄，即$2500做月供。其餘先儲起，用一邊月供一邊儲蓄的策略。

月供方面，你可以選擇投資在平穏增長股︰指數基金、金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)

或潛力股︰比亞迪(1211)、中生(1177)、福壽園(1448)、小米(1810)、安碩恒生科技(3067)、港交所(0388)、舜宇光學（2382）、阿里（9988）、騰訊（0700）、ＧＸ中國電車基金（2845）、三星FANG ETF（2814）。

但由於你資金不多，為免令個股月供成本過高，我建議你先集中供指數基金。到你踏出社會，有較多收入和投資經驗時，才加入其他股票。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

我假設投資回報有10%（連股息再投資），你每月投資$5000 + 10萬持股，5年後大約會增值至52萬，故這樣安排相信很大機會達至你的財務目標。

我建議你唔用這個做最終目標，由於你年輕，財政負擔較細。你應盡力儲蓄去投資，將來有工作時，最好用一半人工，去做投資增值，咁會較理想。

現時你要去多讀投資相關書本、年報，新聞和課程。

書本上，你可以睇我寫架"80後百萬富翁"、"財務自由行"和"股票勝經"，都適合初學者。

另外，本人的【投資倍升股課程】適合初學者的，每一課後都會有指引比你，要你在一星期內找那些資料，溫那些內容，只要你跟著去完成，到你讀完整個課程後，你已能自己選股、投資、評估平貴，在投資上已掌握了一定的知識。

------------------------------------------------

Q22270：

龔成，你好。我真心希望想你幫幫我，我煩左好耐，我岩岩做左一個錯既決定。

就係放棄左居屋，雖然只得381呎一房，但我都無要到，但係而家好後悔，因為抽居屋唔係咁容易抽中。

現況：

-我38歲
-我同我太太穩定收入
-兩個加埋$40,000
-現儲$900,000
-住公屋
-不懂投資
-想換大d單位

成哥，我而家應該點做，先可以儲多d錢上車，我怕我再儲都追唔到樓價。

但我再唔買樓就怕就之後更加唔洗買？

求龔成哥救我，謝謝你

成哥，請問買樓5部曲，有冇link，謝謝你

龔成老師︰

已經放棄左的居屋，就算了，唔好再諗。你現時要做，就係努力為資金增值，為將來置業做好準備。

以你情況，可以投資「平穏增長股」和「潛力股」，去累積置業資金（這刻，集中力量，做好「增值」先）。你每月5成儲蓄做月供。其餘先儲起，用一邊月供一邊儲蓄的策略。

由於你投資知識不高，因此可較集中在平穩增長類股，至於潛力股，只宜小小注(不多於3成)。最好是你先提高投資知識，等到你有一定知識和經驗，才慢慢增加潛力股比例(大約5成)。

現時大市只是合理區，你現有90萬資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

到你累積到一定資金，足夠你支付首期之餘，都可以保留若干優質股做增值，就可以實行置業大計。

以下是電子書連結

《5年買樓4部曲》
https://www.enrichculture.com/products/9789888599448

------------------------------------------------

Q22271：

你好，是禁的...我現在收入14500(未扣MPF)，保險卡數倉租大約7000元，食玩大約1500一個月，有30000元現金

我想學習投資，目標是創造被動收入，想請教你，我現在可以做什麼?

我最終目標是置業自住加收租，我知這想頭有點大....

龔成老師︰

你可以選擇一些「平穩增值股」+「潛力股」作投資目標，去累積你置業的資金。

由於你係初學者，對企業估值，點去定平貴未必太了解。我建議你先利用月供模式，去建立一個股票組合，以減低買貴貨風險。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄，另一半就先儲起架策略。

由於潛力股有一定風險，你現時投資知識不高，可較集中在平穩增長類股。此期間，你最好是努力提高投資知識，才慢慢加入其他股票。

餘下現金就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

假設投資回報有10%（連股息再投資），你每月投資$6000 + 3萬現金，5年後大約會增值至50萬。

你可以用此作參考，去調整你長線月供計劃。

------------------------------------------------

Q22272：

老師您好，追蹤了一段時間你的文章，有些問題想請教：

我的家庭就夫妻2人，40歲左右，沒有小孩，也沒打算生，已有物業，沒有負債。

月薪2人10萬左右。定存現金600萬，關於投資的想法都是保守的，所以都是定存，去年開始定存利率很低，才開始看其他投資方法，看了很多投資資料才驚覺定存其實是不行的。

除了600萬現金，之後將會繼承3棟物業，應該有2000萬市值。因為沒有經濟壓力，所以也沒有關注投資，但最近計畫2年左右半退休，收入應該會減半，大概5萬左右。

現在開始打算投資股票，希望被動收入有6萬，5%以上回報。

目前月供：
2800 10000/月
823 8000/月
2638 10000/月
778 10000/月
（剛開始一個月而已，建議怎麼調整嗎？）
除了月供外，持有一點點股票：
939 6000股
1398 10000股
9988 100股
剛開始入手，不敢買太多

請問有什麼配置建議呢？

其實是不是收息股已經足夠應付退休？

很想去香港報名上您的班,但是人在澳門,疫情關係沒辦法過去，希望之後能有機會。

現在比較不知道怎麼掌握股票應該入手的適當價格，所以目選擇了幾個股票做月供，但是600萬都分批放月供也有點難配置。

不喜歡每天盯著股票市場，所以你的中長期投資理念比較適合我。謝謝您。

龔成老師︰

由於你日後會承繼多個物業，因此在整個財富角度上，會集中在物業部分，因此，你應該將之後的財富配置，加強翻在股票類。

特別是現時澳門樓的租金回報率好低，如果從現金流的角度考慮，同一筆資金，投資收息股，得到的現金流會較好。

其實我地進行財富配置，「平衡」是很重要的，物業、股票、現金，以及其他收息工具。

而我地投資優質股，就係投資企業，只要係有質素，佢就會自然成長。由於我地唔係炒差價，而係想享受佢長線價值，因此係無必要成日睇個市。

如果你希望每月有6萬蚊現金流，以股息率5%計，你需要本金1440萬。

你現時現金和月供，相信到2年後退休時，也不會增值到1440萬。但由於你有一定物業係手，你將佢地放租，相信要做到每月6萬被動現金流，係唔難。

現時你應先著手創建一個股票組合，為退休作準備。

你持股和月供計劃都可以，到你退休一年前左右，慢慢將所有增長型股票，換成收息股，去支援你退休生活。

現時大市只在合理區，你每月資金唔好用晒，要留有部份，等大跌機會。另外，你600萬現金，可以先動用100-200萬，以分注模式，慢慢買入指數基金和收息股。

餘下資金，就等有明顯回調，才慢慢分段加注。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）或收息基金(3110)都可以。

如果你能承受到風險，有些更有超過8%、10%的高息股，但股價就略有風險，要自己衡量，佐丹奴國際（0709）、中石化（0386）、互太紡織（1382）等（記住，股價略波動，只能小注）。

(你可睇下我本《50穩健收息股》當中仲有好多)

現時盈富(2800)和上述收息股，已在合理區，可以開始分注入貨。分注模式，可以係將資金分成多注，每跌10%就加注。或者類似月供模式，每隔一段時間就入一次貨。

係你選股時，記得留意組合平衡性。個別企業和行業，不要佔組合15%和30%以上，銀行業更加不要高於組合20%，否則會有過度集中性風險。

現時疫情，所以暫時停左澳門班，等疫情穏定翻之後，我會再開翻的。

你或者可以預早留位，只要whatsapp 852-55457212我同事講，打「留位澳門班」就得。我地有具體資料就會 whatsapp你。

因為現時已有好多澳門人留左位。

------------------------------------------------

Q22273：

你好，龔Sir～本人38 以往都是月光族較遲起步理財，早兩三年開始留意你的fanpage，讀過80後百萬富翁及財務自由行二書並開始積極儲蓄理財。

未來兩年打算置業組織家庭，想問下現有投資組合有無需要調整以及往後投資方向～

現持有約30萬現金. 股票約25萬

月入4萬中，每月可儲16000其中 8000月供4隻股票各2000 (已供15期）

股票持貨如下：

1972 - 1000
1038 - 1000
1830 - 4000

月供
0003
0066
1928
1211
1177

謝謝你～！

補充一下，1830 同 1211(月供)，兩隻都上升超過一倍！(23x% & 12x%)

都是多得阿Sir先有此成績！～

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你現時38歲計，你現時月供和持股，都係可以。未來你5-10年，大約用這個比重配置(潛力股佔3-4成)，基本上就可以。但到你再年長些，就要開始慢慢下調潛力股比例，去平衡風險。

如果想組合再平穏D，可以加入指數基金，去提高組合平衡性。

但留意，現時比亞迪(1211)偏貴，暫時唔好月供住，等回到$180左右，才再開始。你可以考慮暫時用ＧＸ中國電車基金（2845）代替。

現時每月餘下儲蓄和30萬現金，可以等大市有明顯回調，才出手掃貨。

比亞迪(1211)和完美醫療（1830）現價都偏貴，但都係有質素，你照長線持有較好。但月供金額，少少好了，始終現價貴。

到你要組織家庭和置業，前半年左右，就要慢慢沽出需要套現的部份，唔好等到你動用時，才去一次過沽貨，以減少價值波動所造成的風險。

------------------------------------------------

Q22274：

我35歲，月入35K，有大概80萬現金，想買樓，但做壓力測試只可買450萬樓，想住近家人，想買自住，但可能三年後移民。

所以有機會三年後賣或租出去，我宜家買樓合適嗎？謝謝你

龔成老師：

坦白講，如果你打算幾年內移民，現時買香港樓未必適合你，始終買賣會鎖死資金，以及你日後在其他地方管理會較煩，同時你移民初期，都要多少少流動資金在手。

建議你現時持有現金，以及部分投資，投資流動性較高的投資類別，例如股票，最好是較穩健的類別，股價波動唔好太大的，令你在移民前後更易在資金上有彈性。

------------------------------------------------

Q22275：

你好，龔成，可否分析2866 中遠海運同1266? 西王特鋼？

2866 40000 股，$1 買入
持貨兩年，有息收，1266 55000 股，0.5 買入

是否要減持？
非常感謝你！

龔成老師：

中遠海發（2866）主要從事提供船舶租賃，集裝箱租賃和融資租賃服務；集裝箱供應服務；股權或債務投資和保險經紀服務，以及物流服務及其他雜項服務。

業務會較受經濟週期影響，同時賺錢能力唔算好強。經濟好轉後對o佢有正面作用，不過並不是高增長類。

投資價值都有，但就唔值得佔組合比例太多，現價合理，未算，只要你不是持有過多，可長線。

西王特鋼（1266）主要從事製造特鋼，產品包括主要用於建築及基建項目的普通鋼產品，以及特鋼產品，亦從事鐵礦粉、球團礦、鋼坯及焦炭等商品貿易，以及銷售鋼渣、蒸汽及電力等副產品。

業務有點波動，過往盈利的上落較大，有時會出現虧損，反映企業對成本較敏感，未能將成本有效轉嫁比買家。企業質素唔算高。建議你減持。

------------------------------------------------

Q22276：

1651 津上機床中國

想問問你意見, 難得有隻100分出現係老師你比的價值投資網

龔成老師：

津上機床中國（1651）這股不差的。

佢主要以ＴＳＵＧＡＭＩ品牌從事製造及銷售數控高精密機床，產品劃分為五大類別，包括精密自動車床、精密刀塔車床、精密加工中心、精密磨床及精密滾絲機。機床是指能利用切削、磨削或其他成型方法生產所需材料、形狀及尺寸的工件的機器。

佢的客戶包括ＩＴ及電子產品、汽車、醫療器材、氣動部件製造及工程機械行業的製造商，並於浙江省平湖市設有生產廠房。

其實網站的評分，我地不用追求100分，因為60分以上已是有質素，無論佢是80分定100分，我都認為可以值得延伸分析，但我不會一定認為100分最優質，因為這個評分分，只是基於財務數據，我地仍要睇佢的業務。

例如津上機床中國，雖然財務數據不差，股現價合理，但由於規模唔算好大，因此不宜投資大多。另外，你要深入少少分析行業結構，佢的競爭力，先決定是否投資。

------------------------------------------------

Q22277：

龔sir你好。本人現持有股票如下：

3800×[email protected]
0857×[email protected]
3303×[email protected]

我手頭現金有10萬，希望你可以俾d意見我。 我都係最近幾個月先開始接觸到你，跟住睇緊你嘅書覺得知識慢慢增長緊好開心，真係好後悔冇早啲認識到你。

到依家先開始慢慢知道咩叫真正嘅投資

我先前因為投資知識唔多係全無分析做功課既情況下走去跟買入3800..持有一個月左右就停牌見佢條數一路都出唔到連核數師都換埋到依家所以都幾擔心，

想問下覺得佢有無機會 復牌，而復牌之後我假設佢股價即時大跌咁我仲應唔應該持有？

另外想問一下覺得3303可唔可以長期持有等佢增長？ 因為我睇佢公司年報見到佢近幾年公司業務開始慢慢轉型後近兩年好似開始轉好，希望你可以幫我分析一下畀啲意見

另外再想問下3918金界同1448福壽園近期股價分別下跌不少至7.24同7.5附近水平， 你覺得現階段可以開始收集嗎？ 定抑或應該持有現金再等大跌市？

期待你嘅解答，多謝你老師

龔成老師︰

保利協鑫能源(3800)比較麻煩，現時暫時停緊牌，因為佢仍未出到業績，將公佈業績的日期延遲了幾次。

最近現任核數師更請辭，我對這類股票，會較有保留。但由於現時停緊牌，暫時乜都做唔到，只有等。

初步睇佢的財務數據，都幾弱，相信日後就算復牌，股價都會受壓，要有心理準備。

巨濤海洋石油服務（3303）主要從事向石油天然氣行業及其它能源和煉化行業提供裝備製造、工程及綜合服務，以及向造船行業提供技術支援服務。

規模細，每年的盈利十分少，投資價值唔高，但由於市場久不久有炒作，因此股價上落大，但從基本面分析，又唔算好有投資值博率。

中石油(0857)都算有質素，但這始終是商品企業，產品沒有差異性，只能賺取合理的利潤，不算是最高質的類別，投資價值中等，這類股不宜持有太多。

石油是商品，當中沒有差異性，佢地要將石油賣出，只能跟國際油價，這令佢處於被動狀態，沒有價格自主的能力，這令佢地的獨特性有限。這類商品企業，都可投資，但就要明白不是最高質的企業。

由價佢會比較受油價影響，自主能力不強，加上油價中短期可以好波動。長遠增長力只屬中等。這類股票，不宜持有太多。

金界(3918)有質素，現價算係合理區中間，可分注儲貨。你預這股股價較為波動，不過都有長線投資的價值，分注投資可以。另外由於市場新興，在注碼上不能投資得過多。

福壽園(1448)現價在合理區頂，無貨可以先小注。

現時大市只在合理區，你10萬資金最多可以用多少少，餘下應留待大跌市，才出手入平貨。

------------------------------------------------

Q22278：

龔sir,有人說股票係美國上市，再來香港上市的股票是不會大升，是否無稽之談
如百度

龔成老師：

應該咁講，如果新股上市，佢是無在其他地方上市，當在香港上市時，如果市場認為佢好有質素，就會有短期供求失衡，短期股價就可能大升（但之後有可能大跌）

但如果佢本身已在其他地方上市，供求就不會失衡，股價就較難有短期的大升

------------------------------------------------

Q22279：

老師，有時候覺得個市，真係好唔穩定

6618呢個可持有嗎？

之前係190買了9988，只買了一手

龔成老師：

唔好理股市短期走勢、穩唔穩定，無意思，最重要睇「企業長期業務、價值」

京東健康（6618）有質素，這股可長線。

其業務主要提供線上線下的醫藥出售和健康管理服務，業務布局包括醫藥電商、互聯網醫療、智慧醫療解決方案、健康服務等4個大板塊。

京東健康旗下京東大藥房，更是內地線上線下收入規模最大的零售藥房。其互聯網醫院，日接診量超過10萬次。

質素上，京東健康是有的。但由於估值難，不確定性大，暫時合理區頂至略貴，所以如投資，小注都可以。當然回翻1成更有值博率。

這股如本身有貨，可長線。

阿里（9988）有質素，中短期一般，但長遠仍有增長力，之前貴，現價去翻合理區。

係業務層面，擁有相當的優勢，不少業務處於壟斷狀態，同時增長理想。加上正不斷發展延伸業務，這都會成為企業增長的潛力，預期增長會持續，這是阿里最大的賣點。

以企業的長期發展計，這股的確優質，但股價都有一定的波動，現價算是合理翻D，但都不是大手時候。

始終將面對內地監管可能收緊，因此風險度增加左，不過，我相信佢的整體優質度仍在，內地不是不想佢賺錢，只是想規管佢。佢已建立好完善的業務，因此本身是無得輸，只是賺多賺少問題，現時監管多左，點都會影響賺錢能力。

對於這類優質、有發展，但現價未算特別平的股票，小注分注投資，或月供，是較好的方法，算是平衡了風險與增長的考慮。這股可以長線投資的。預佢現價約合理區中間。

------------------------------------------------

Q22280：

龔sir, 有一個居住問題想請教一下你。我自小已經跟家人居住在村屋(向地主租地，自行建成合法的住屋，要交牌費、差餉)。

最近業主加租，另外他又向我們提出賣地。

我們居住的地方XXX，鄰近古洞北。

居住在這裏幾十年已有感情，本應買地是最佳方法，但由於涉及資金大，我們租地面積大，屋外範圍大（可種花、種菜）但住屋面積只有約600尺左右，儲蓄不夠支付地價。

就以上情況，想請教一下龔sir應怎辦？

應該繼續以租地形式續租或是買地分期付款呢？以上問題跟股票沒有關係，麻煩到你不好意思啊！

龔成老師︰

本身購買村屋，係比買一般樓宇為複雜，當中有機會出現法律問題，故風險會較高。

而且，我都唔清楚，到底政府最尾會有什麼價錢，去收回這個村屋用地。若政府要收購，好大機會都係幾年內架事，即係你都係住多幾年，有無必要大費周章，去承受這風險。

這刻，我先建議你找更多資料，例如附近村的情況，無論是收地，成交價等，你要用「市場」的角度去分析，唔好比「業主開的價」影響。另外，建議你找一些地產經紀，取得更多資訊。

如果你預期這個地，長線都會被回收，而你又覺得租金不合理。我建議你把握這個機會，開始物悉其他更適合你"長線"生活的物業，會較有利。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q21441-Q21460）

Q21441：

老師你好，有d關於創業同投資嘅事情想請教你。

1. 當我已經諗到我嘅生意做咩之後，應該從咩各度思考？

2. 點先可以有效宣傳自己的企業？

3. 我好想行岀第一步，但我唔係好知應該做d 咩好。

4. 如果我有個idea 但就無實行idea嘅能力，身邊有無咩人有咁嘅能力，有d咩方法？

最後想多謝老師你，我上年先開始投資，好幸運一開始接觸到老師嘅fb page 同書，認識到價值投資法，令我覺得睇年報，了解一間公司營運模式非常有趣，

因此作為投資初哥，我完全無試過炒賣，雖然而家賺嘅錢唔多，但已經感覺交小唔小學費。我定左個目標，就係希望有1日可以去交港交所敲鑼

龔成老師︰

1) 開始寫一份給自己的商業計劃書，規劃出未來發展大方向。但唔需要太仔細，只要有個大方向即可。

因為商業社會，每日變化都好大，寫得太仔細，反而會限制左自己發展。

做生意，「執行力」是關鍵位，我成日都聽到有人話：「早知我就…」、「這生意我一早想到啦，只是佢快過我」等等，這類說話。

做生意，最重要是「做」，之後先慢慢再調整。

2) 要睇你業務性質，和對應什麼客戶群。例如你做補習，你就要去多學生和家長出現的地方去宣傳。

你要「找出市場」去宣傳，不要亂用力去宣傳。

3) 你要做，就係先行出第一步。好多人就係顧慮太多，唔敢行第一步，令到自己只停留空想狀態。

其實做生意，好多時都係摸石過河，邊行邊試，有時唔需要諗太多。只要有大方向，做就可以了。

4) 你就去睇下，市場上有無類似的成功人士，去模仿他，學習他。或者，你去做或學一些，可以幫到你實踐IDEA的工作和課程。

記住，你投資方面，現時只係起步。你要一直保持學習，投資回報才會好。

期待見到在港交所敲鑼的你！

------------------------------------------------

Q21442：

老師你好，本人現有200萬流動cash, 還有其他大保份cash放左保險公司saving plan, 回報大約3.2% 但一本lock死5 to 20年。

今年年頭ipo市況好，賺到75000已經非常開心，但3 to 5月連蝕番66000,主要因為本來10萬買左 AMC升(12.8 入但13.x走左)賺到d, 但佢升到30後我50萬元反手手沽空，

1.5分鐘蝕足50000，之前又500000萬買左9959,24.25炒賣左幾轉有得賺又賣左，跟住佢跌到又買番，以為自己好醒，點知隻野跌到18已cut loss,

本人炒買股票20年，都係得果吉，可否教教本人應該怎樣？因為已經信心儘失。感激謝謝

龔成老師︰

你有「賺錢」的思維，反映你與98%的散戶想法一樣，都係停留係短炒，賺差價架模式。

短炒我見好多人都係蝕錢收場，股價中短期一定會有波動。而波動架原因可以同企業本質無關，只有長線股價才會反映企業質素，所以優質股一定要長線持有。

你見全球最賺錢架投資人巴菲特，都唔會做短炒，只會係做長線投資。所以，你要改變你投資方法，唔好再做短炒，並以長線投資優質股為目標，會對你較好。

你現時先做，就係放棄以往一直用的短炒方法。之後，再用正確的理財策略，去累積財富。

我建議你睇我架《80後百萬富翁》、《財務自由行》和《股票勝經》，當中會有一些理財和選股概念。

到你明白當中理念，才開始再計劃你投資大計，會較好。

------------------------------------------------

Q21443：

龔sir，我今年28 上年開始接觸股票 但因為咩都唔識成日都高追 一跌就好驚 輸左好多錢 依家我轉左新的一組配合持有：

9988 $228 200股
3067 $17 2000股
175 $23 1000股
6618 $174 100股
1398 $5.4 5000股

想請問我這個新組合 適合嗎？
我打算長線 唔睇股價短期波動。因為成日睇股價影響心情。

另外3067 係睇到你話潛力股可長線 我洗唔洗巴巴升返少少之後每個月加倉到3067 （因為3067指數都包括埋9988）

謝謝你龔sir
知道你平時都好忙好勤力覆大家訊息。

龔成老師：

我地最重要是建立一個長期的「財富組合」，要優質，要平衡，要適合你的年齡與風險承受程度，各行業或粳類別都要有。

但同一行業又不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

你上述持有的，都是有質素的股票，因此可以長線進行。另外，工行（1398）是收息股類別，而你年齡應該著重增值，因此收息股未必最適合。

至於恆生科指ETF（3067），你可以久不久加注，原理同月供，長期儲貨一樣，但就唔需要改變阿里（9988）的持股情況。

但你要計算翻潛力類別比例會否過多，因為「平衡組合」是好重要的。

------------------------------------------------

Q21444：

龔sir 有d問題想請教你 我買入一隻股票後，係咪升2成就要止賺，否則跌翻會無得賺。我成日聽人講要鎖定利潤。

龔成老師：

這是坊間的做法，而你睇翻全球投資最賺錢的人，巴菲特，佢無這樣做。

我地只要買入優質股後，長線持有就得。我持有比亞迪（1211）13年，就是唔理佢，長線就得。

如果你成日望住個市，成日要「止賺」，你想想，騰訊（0700）、港交所（0388）這些升值100倍的股票，你根本就賺唔到！

------------------------------------------------

Q21445：

老師，我同我先生聯名買咗間688萬3房居屋，個名已經用咗，我打算再置業，但又要比15%稅

現在層樓買咗2年，
現在有100萬積蓄，
我個人計

我每月可以儲2萬，
請問點樣可以再置業，
用幾多年時間儲和投資？
做什麼投資比較岩？

龔成老師：

如果有需要，其實可以到律師樓搞拆名，這樣你地就可以一人一個單位。

不過，你現時的現金$100萬，再加上買了物業只是2年，其實唔需要太心急不斷投資物業。

我地理財，最重要就是建立平衡的財富組合，例如物業、優質股，同時持有。

所以，你這刻可以利用每月$2萬，儲蓄投資，並利用手上現金的部分，例如$30萬，去投資股票，先將財富增值，過幾年後先投資第2個物業，這樣會較好。

你可以定一個5年計劃，投資優質，平穩增長類股。

------------------------------------------------

Q21446：

老師，我之前買$255果時入咗美團，$46入左華虹半導體，而家咁嘅市況，你會由佢跌定止賺

龔成老師︰

首先，一定要了解股價下跌的原因，基本上，股價中短期上落好正常，但如果上落太大，就要了解翻當中的事情，有無一些影響企業核心的因素。

美團點評（3690）都有質素，佢業務巨大，同時增長快，是有危有機的股票。但近期反壟斷政策，相信會對佢有一定影響。但影響有幾大，暫時無人知。

但相信只係會加強規管，而唔會係出現大改革，整體質素預期唔會大變，但增長力難免會受影響。

集團過往一直處於燒銀紙階段，至2019年才開始有少量盈利。未來是否維持，暫時都好難講，若你持股佔組合不多，可以守。

華虹半導體（1347），佢而家係部分範疇擁有技術，但並不是整個產業鏈中最重要的技術部分，所以不能定為很高質素的企業。

不過，中國政府一定會加強開發半導體技術，所以，長線發展正面，可持有。

------------------------------------------------

Q21447：

老師你好， 我是一個媽媽，有四個仔女，三個出哂身，有個讀緊大學， 近年學識左點買賣股票， 呀女推介睇你的書‘50隻優質潛力股’， 現時手上的組合是以下：

（00005）9手61.37
（09988)3手223
（02628）5手16.5
（2383）3手166.7

（02318）2手90.04
（01810）10手25.5
（00659）10手6.11

（00788）25手1.1
（3309）6手5.46
（00823）10手59.43

1.想請教一下現時組合可以嗎？ 有冇一些可以從中剔除呢？

2. （02628）本人有意想賣走，應否溝一溝下貨？

3. 最後， 我成日有個心引，見到有啲賺少少就想放， 以前銀娛就係咁$59買左， 之後賺左$7000就走左， 呀女成日叫我唔好放要長揸， 話有潛力唔怕。

但我覺得如果長揸咁有咩用，啲錢袋左入袋先係自己， 而且有時會覺得見佢升幾轉， 如果自己買賣幾轉已經可以賺幾轉。

所以想問下老師你，其實而加我係咪應該長揸本身持有的股票， 等佢跌到本身持貨嘅價位/低過先再入， 慢慢草貨呢？

龔成老師︰

1)ＴＯＭ集團（2383）業務不太好。發展多年都無乜成績，近5年生意無增長，年年虧損，投資價值不高，可沽出。

希瑪眼科（3309）有質素，業務仍發展中，有一定不確定性。你可以考慮沽少少，去平衡個風險。

阿里巴巴(9988)和小米(1810)這類潛力股，雖然有潛力和質素，但同時間，個波動性都唔細。現貨可持有，但當年年紀越大，就要慢慢減少這類潛力股的比重，令個組合唔會太波動。

至於其他股，基本上都有質素的，問題唔大，但要留意，同一隻股票佔組合的比例，最好控制在15%以下。

2) 中國人壽(2628)質素較中等，近年賺錢能力係弱左，但未至於無質素。此股不建議太大注，你可以沽出部份，換至其他較股票。

3) 你有「賺錢」的思維，反映你與98%的散戶想法一樣。

你追求實在的現金，認為要賣出賺到現金，才是賺錢，但我地最重要是講求「財富最大化」。

當一隻股票上升，例如你買入價$10，現價$15，賣出可以賺$5。

但當你套現$15後，你怎樣將這個「$15」再次增值，令你的財富增長，比留在原有股，得到更大的回報？

如果原在的股票是優質股，即是我地持有優質企業，當你一直持有這股，企業長期價值向上，就會帶動我地的財富有最大增長。

簡單來說，我地是從「財富長遠最大化」的角度去想。

可能你會問，一直不賣，啲錢永遠入唔到自己袋，即係永遠無法取出財富。

我地累積財富，會用「先增值，後現金流」作策略，前者著重增值。之後就會改變策略，將已增值了的資產，轉為現金流類別，而我地就是不斷享受資產產生的現金流。

另外，你有一個想法，係想走幾轉，賺佢波幅，都係有問題。

因為我地投資，係唔應該去估走勢。你諗住而一刻已經好貴，先沽貨，但之後回調平價再入翻。但實際上，股價是否每次一定跟你預測一樣走?

若你沽貨後，佢反而不停升，你除左錯失個升市機會，而且要可能要用更高成本，才可以買回這隻好股票，成件事係得不償失。

你試想想，如果用你的方法，在過往，港交所（0388）、騰訊（0700）在這麼多年，股價上升100倍時，你的方法能賺到多少？可能連一倍都賺唔到。你怎樣能賺到100倍，就是「唔好賣」，一直持有這些優質股。

至於，是否跌至低位再入，我地唔會用你買入價，作為入貨標準。

我地係會睇翻企業本身估值，如果當時個價格水平合理，你持貨又唔多，又有充裕資金，可以加小注。到平宜區，才加大注。

記住，永遠都係睇企業本身價值，而唔係你個買入價，買入價其實意義不大。佢應該作為你買賣，或者是否持有一隻股票的指標。

------------------------------------------------

Q21448：

买左老师五年置业果本书 中间提到黄竹坑等地区系比较有潜力的。

想请问马鞍山和钻石山房产比较 是否钻石山升值潜力会相对较高？谢谢！

龔成老師︰

鑽石山優勢在於同時擁有2個鐵路線，加上較為接近香港第二個核心商業區「九龍東」。

沙田區是新界東與市區的連接位，在整個香港的地圖上，算是一個中心點，對於較常往返內地，而又想近市區的人來說，沙田區是不錯的選擇。

近年多年屯馬線，令馬鞍山交通便利度提升，都係有利發展的原因。

但從地理位置上，鑽石山都係較接近「九龍東」和港島，整體質素，會相對馬鞍山稍稍佔優。

------------------------------------------------

Q21449：

老師，想問一下小米連續幾日不斷回購股票，對於同股不同權架構，會令小股東對企業既控制權減弱嗎？同埋佢回購主要係邊類股份

龔成老師：

會有少少影響（其實好少影響）

佢現時的回購，是回購出面市場的股票（即是小股東的）。

即是小米這間公司回購，間接會令大股東佢地的控制權增加。

但說到尾，由一開始，佢同股不同權的模式，已是大股東佢地玩晒，因此分別唔太大（因為大股東在投票權方面，一向都過半）。

------------------------------------------------

Q21450：

龔sir, 我係90後27歲男仔，想請你幫下手 指點。
我本金60萬學人買股票，今年2月尾開始輸到變50萬 。心情好難受。

過往都係以短線炒股為主。 港股美股都有買，想搵你教我慢慢追返本金，以中期或長期目標為主。

目標係30歲 有100萬 每月存款有$4000 ，主要想重新整理個投資組合，唔想經想睇到心煩又失望。 麻煩龔sir有空指點下。

美股有ARKK 打算長期持有
港股 少量短炒

龔成老師：

我20年前，都是短炒者，短炒幾年，輸足幾年，之後長線投資，就開始不斷賺錢。

其實我當時，用左幾年時間去學短炒，我當時不斷睇書、上堂學短炒，但最後都是輸，可能是我能力不足吧。

但我之後做銀行同證券行，見大部分輸錢的客，都是偏向短炒的。

當然，你問我有無人贏錢，是有的。但就我觀察，長線投資贏錢的人，比短炒的較多。

另外，如果你分析全球真正賺錢的投資者、經金經理，佢地都無人短炒，都是長線投資的，巴菲特都是反對短炒的。

因此，我相信長線投資，是真正助我地贏錢的方法。

如果你發現自己行錯路，就唔好再向前行，行翻正確的方向。

你之後要投資優質股，長線，學「真正投資賺大錢的人」，如巴菲特學習。

我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

你投資ARKK，長線，可以。

另外，你可以考慮投資平穩增長股+潛力股。
你可以月供或自行分注。

上述是大方向，但我這刻唔建議你投資太多，例如只動用3成以下現金，餘下等機會，反而建議你先學好投資，例如可睇《股票勝經》，之後先正式投資。

------------------------------------------------

Q21451：

龔sir～
又有問題打搞你喇
我一路想入金沙同領展
金沙set左目標買入價係 35
領展係 70

但好耐都唔到呢個位
開始接近左陣又彈返上去
我係咪諗多左？應該調返高d？
定其實可以等？

麻煩曬你成日解答我地d問題～～
同埋想同你分享下
我剛剛join左za bank
佢地做緊頭 $20 萬savings 有年利率 1%！

我擺左d錢係入面賺息 好過擺銀行
想知點解呢類虛擬銀行會做呢類咁勁嘅優惠吸客？佢地背後係為乜？

龔成老師：

領展（0823）及金沙（1928）都是有質素的股票，面對這類股，只要不是貴，都可考慮，特別是當你完全無貨，而你現金又十分足夠的時候。

如果你買入一注後，仍有現金剩，這兩股你可以現價買入第一注先，等你有基本的貨，之後再跌先買入。策略上會較好。

另外，虛擬銀行為左吸引客戶，都會利用高息，去等客戶試佢地的產品，等多d人對佢地有認識。

------------------------------------------------

Q21452：

龔成老師
我疫情時初學投資股票
根據你經常說的理念 長期持有優質股 今日終見曙光
雖然我持有的股票是小量

財富增值都是很小量
但我都好想多謝你
初學見短期波動 都會好緊張
是你啟發我 我才有信心堅持長期持有

龔成老師：

太好了！

投資是一個長期戰，你要面對好心心理壓力，但要記住，你只要買入優質股，長線，就能有回報。你只要想想，全球投資最賺錢的人是誰？是巴菲特，只要我地用的方法同佢方向一樣，就有不差的回報。

------------------------------------------------

Q21453：

龔sir 你好,自從上年第一次向你請教, 我現在主力持續買入index tracker (除2800 仲有S&P 500/ MSCI World), 因為問心知道自己冇時間/ 知識去選股。

後面2者我買左外國買accumulative 個種, 唔駛自己人手將派息再投資,好啱我D 懶人。現時同長線我都會keep 住月供index tracker, 間中先會買下個別股。

1. 03067 - 我想買入長線, 見你近來的Q&A 都話現價唔平/ 在合理價較高水平所以應該小注/月供, 想請教在大概咩價錢左右應該開始平/ 多買入?

2. 我持既股同上年一樣(只係多左小小金沙同2800), 考慮緊好唔好遲點賣出大部分收息股(銀行+地產+港燈) 轉去index tracker (等平點入), 希望加強增長力, 你會建議嗎?

3. 如賣出左收息股, 但index tracker 現價又唔平, D 現金放在銀行唔知幾耐先會等到買入時機, 你會建議用這些現金暫時放落其他野嗎? (舊年收到的股息都係只係放在o係度等)

4. 如我aim index tracker 佔持股80%, 個別股20% 會太保守嗎?

感謝你的意見, Stay safe!

龔成老師：

你的方向正確，有選股能力，當然可以憑自己實力選出高回報的股，但如果高估自己能力，反而會輸錢，因此，明白自己的實力而願意付出的時間好重要。如果不想選股，就投資指數基金，你所選的都可以長線。

利用月供，或慢慢分注買入，長期累積，是最好的方法。

1）安碩恒生科技（3067），有長線投資價值。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂至略貴，因此，這刻不能大注投資。最好的策略，就是月供，或自行分注小注慢慢收貨（例如每月買一次、或2個月買一次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

2）要睇你投資目標及風險承受能力，最重要是長期方向，如果你仍想增長，就將收息股轉其他，現時合理價都可賣，然後可轉平穩增長股及潛力股，如果無心水，就盈富（2800）及恆生科指ETF（3067）。

3）其實現時舊經濟類是合理的，因此轉盈富或其他舊經濟類股是無問題的，至於新經濟則在合理區頂，因此轉3067時就會慢慢去分注買入，部分資金可能會等跌多少少先買入。

4）如果你真的無選股能力，或無時間選股，這樣是最好的，好多人高估自己選股能力，最後出現虧損。

------------------------------------------------

Q21454：

你好。我最近睇你解答網友留言提到GX 中國電車ETF 2845, 請問GX 系列其他etf , 2826中國雲算。2820中國生科。2809中國潔能。適合長線投資ma?

同埋呢隻基金之前未聽過。市值算大ma? 穩唔穩陣ga? Thx

如果我想未來用大約50萬資金。在5,6,7月分開17注分段入做中長缐投資。請問這些ETF 算優質ma? 這樣設計可以嗎？另外加三隻股。700，388，2269

麻煩有空給我少少意見,
thx so much

龔成老師：

你上述所講的幾隻ETF，都是潛力ETF，都有長線投資價值，上述的4個主題，都是一些未來發展大方向，長遠潛力度不差，但要留意，所有這些潛力行業，在發展過程中，一定會有變化，所以，你要明白風險，同時控制注碼。

幾隻基金都穩陣的，只是價格上落一定大，買入時要明白風險，或者用月供策略會較好。

以GX中國電車（2845）來說，這基金的目標是追蹤Solactive中國電動車指數NTR「相關指數」表現緊密相關的投資回報。

持股中最重就係比亞迪A股（002594），以及與中國電動車產業有關的股票，中國因為能源問題，長遠一定要發展電動車，這是大方向，故此股有一定投資價值。

由於近期不少車股被炒起，此股現價略貴（其實另外幾隻你上述所講的基金，都有這類情況）。無貨可以現時入少少，到有明顯回調才再慢慢加注。

潛力度是有的，但會比較波動，如投資宜慢慢分注，可長線。

因此，上述基金，可投資，但你要明白風險，同時，不能將所有資金都投資在潛力基金類別。你要建立一個平衡的財富組合。

你可以將$50萬，其中$20萬或以下，投資潛力基金/潛力股類別，要慢慢分注，可分1年時間去買入。

至於餘下的3隻股票，有質素，但都唔平，你可以月供，或慢慢分注買入。我會建議你同時留有一定的現金在手，當大市下跌時有資金去買入。

------------------------------------------------

Q21455：

龔sir你好啊！對上一次PM你已經兩年前，當時啱啱受你啟發開始投資股票，上年仲上埋你嘅堂

由0倉慢慢喺兩年時間建立咗一個六位數嘅組合，真係好多謝你！

其實除咗投資方面嘅知識，你經常分享嘅致富思維都影響咗我好多，自己呢兩年都睇左好多有關呢方面嘅書，一開始真係完全唔明點解[諗下]就會實現到

好懷疑，直至最近我有一個好想走出comfort zone，好想係為咗建立自己事業而做嘢，唔係為咗逗份人工，做幾多都係為公司、為老闆，我覺得自己可以走得更高更遠。

咁啱有個帶保險嘅團隊嘅朋友(亦都係我自己嘅財策師）approach我，邀請我加入，其實佢三年前都搵過我，但當時我未ready, 唔相信自己可以做sales嘅工作。

但三年過後，我嘅諗法唔同左好多，雖然都係唔認為自己係傳統觀念上做top sales果種人，但我真心覺得自己會成功，應該全力用3-5年去build up呢盤生意，建立自己嘅團隊

我亦相信我本身會計師嘅優勢可以比到客戶信心、在職媽媽呢個身份亦幫到我了解到大部分打工仔喺保障上嘅需要。

講咗咁多，都希望你能夠比小小意見：

1. 我感覺你本身都唔係果種好外向好多野講果種人（感覺錯請原諒）你一開始係點樣踏出第一步去開班教人同錄youtube?

2. 我一開始嘅計劃係part time做，始終小朋友仲細，有份正職收入會安全好多，但最近考晒牌開始training而自己都睇書睇YouTube學點樣做個好嘅銷售嘅時候發現原來真係要投入好多時間去做先會做得好

咁我本身都有儲蓄，先生亦有正職可以support，我是否應該去盡d全職去做？我好怕自己係一時衝動。

3. 仲有無d咩係我應該考慮嘅因素？(信心、家人支持、儲蓄)

真心好感激你改變左我人生、之前睇到你再分享<成功人士同普通人之間嘅差別>只係[做同唔做]，令我更加好似打咗支強心針

Thank you so much!

龔成老師：

太好了，我相信這兩年你都成長了不少，最重要是思維，相信你保持這樣「相信自己」，「大膽試」的思維，長遠會有一定的發展。

1）對，我本身是一個十分內向的人，根本不喜歡出聲，中學時老師話我是全班最不想最聲人的頭3位。

到我大個，我知道如果我要成功，要發展事業，就要改，所以我逼自己多同人講野，多做演說，現時無論拍片，上堂對過百人講野，我都無問題，所有野都是逼出來的。

你要想翻你的「大方向」，如果大方向要求你有某些技能能，你就要克服困難，做好這些事，為了完成你的大目標。

2）最好當然是全職，但就好睇你的決心，如果你決心不足，就暫時半職先。

3）如果你擔心，就留多一點儲蓄先，因為初期做，業績會有上落，這時是對你最大的心理考慮，如果你有較多的儲蓄，心理壓力會較少，較易克服不同的時期。

加油啦！我好相信好多事，我地都能做到的，只是有無勇氣去做，你現時已踏出決定性的一步，你要盡全力去做，堅持！

------------------------------------------------

Q21456：

龔成老師你好，差唔多一年前我講過想5年內(即2025年前)將手上資金提升到160萬作買樓首期之用。一年過去，我主力靠儲蓄的疊加效應，total asset 已經算有100萬！感覺2025年160萬目標好似可以超額完成！

1）現金:由$30萬升到大約$45萬 （小部分做了定期存款收息）

2）股票組合價值: 由$4萬升到$39萬（股票蝕錢中。。。）

3）另外儲蓄保險，2025年可以可以拎到20萬左右。

>> 所以total asset 已經算有100萬

本人月入$36,000，收入尚算穩定。要幫家人供樓及照顧已退休父母，現時每月可儲現金大約1萬，另外有月供股票$4500。

—$1,500煤氣 (0003)
—$3,000 盈富 (2800)

現有股票組合

—月供煤氣 (0003) @$13.7
—月供盈富 (2800) @$27
一 3738 @$29.5
- 1283 @$1.7
美股Tesla @$766

因為想買樓，所以希望可以中風險投資方法。上年經指導後加大了月供。而家想加多一隻月供股票，心水係恆基（0012）、中銀（2388）、港鐵（0066）、領展（0823）四選一，請問邊一個會比較平穩增長？

調整後的月供比較會為$2000 一隻，即total $6000 一個月，是否穩妥？

現時股票現金比例大約為50:50，此比例是否穩妥？

希望可以得到你意見，十分感激。

龔成老師：

太好了！恭喜你！
這是你努力的成果，我相信你一定能完成目標的！

現時離2025年有幾年時間，你可以利用這段時間合理將財富增值，到接近買樓時就適度賣出股票，加大現金比例，減少股票或風險類資產的比例。

現時這段時間，你的投資應該以「平穩增長」作核心，潛力股都可以但不能太多。另外，3738、1283不宜持有太多。

現時月供的可繼續，你可以加入港鐵（0066）去月供。

現時你現金比例50%，其實30%-50%都是適當範圍，只要你到按近買樓時增加翻現金比例就得。

另外，你這段時間可保持財富增值，但如果在當中，見到樓價下跌，其實都可以考慮買樓，因為你的最終目的買樓，如果樓價平左，出現機會，只要你供款方面無問題，都可以考慮買樓。

------------------------------------------------

Q21457：

老師，你對1696有何看法？

我從其2020中期報告見到，其毛利有55%，疫情下純利則只有8%，以往則有14%至16%，這表示其經營成本以外，還有很多成本開支，對嗎？

而其總債務佔其總現金及銀行結餘約60%，這是正常嗎?還是不健康呢？

還有1696現價合理嗎？
可長線？

龔成老師：

復銳醫療科技（1696）主要從事設計、開發及提供能量源醫療美容器械，如一些無創醫療美容器械、微創醫療美容治療系統等。

由於疫情是一個特殊的經營環境，所以我地在分析時，會有調整，而我地會以「正常經營環境」作核心分析。因為疫情可能會有一些額外的支出增加，又或由於外在環境影響了生意，當某些業務的生意減少，而固定成本無法立刻減少時，就會令純利率產生影響。

至於負債情況，暫時問題不大。

業務上，有佢吸引地方。但股價近年上升了不少，市場好集中「預期之後的業務情況」，因此，股價會較波動，只可以話現價唔算平。長線投資價值，都有的。

------------------------------------------------

Q21458：

龔Sir, 你好，想問下供股既配置問題，我29歲，一個月可以儲15k, 供股每月$8k如下（已維持約三年）：

煤氣：1000
長建：2000
盈富：3000
比亞迪: 2000

直到比亞迪升過$80我就停供左，轉左供銀娛，而長建亦已停供。

1. 如果呢家月供配置為以下，你認為合適嗎？
領展：1000
中生製藥：1000
小米：1000
盈富：3000
銀娛：2000

2. 煤氣因為已經供左三年，但無咩增長，如果係想追求增長既應否繼續供？還是轉領展比較好？

謝謝！

龔成老師：

1）領展：1000
中生製藥：1000
小米：1000
盈富：3000
銀娛：2000

這組合可以。你保持長期進行就得。

如果你日後有更多資金，可以考慮加入3067，每月供$2000。

2）其實煤氣（0003）仍是有質素的股票，但增長力弱左，而佢改為20送1，反映增長力可能減少左，但不算差。

香港業務不強，但中國部分不差，中短期雖然較一般，但見佢的長遠發展力仍在，但就要耐心點。

由於佢一向都穩定派「相同股息」，在這情況下，反映派息的增長會少左。但整體來說，這企業仍是有質素的。

我睇翻佢近年在中國的投資，仍是保持進行的，每年都有幾十億，這些投資不會好快就見到收成，但這企業就仍是發展中的。我對佢長遠發展仍是正面，只是增長力的問題。

你原有貨，持有。

但不要再月供了。轉其他更有增長力的股更好。

------------------------------------------------

Q21459：

老師，潛力股包括9618嗎？最近跌穿300，可以小注入嗎？90後如果9618,175,同914，邊個會較好？唔該老師

90後的我依嫁有4手823，同月供12同66，

甘823同12係地產股，66地鐵就公用股，

另外想加月供中銀香港，就銀行股，

同想加逐手買9618或175或914就新經濟股，甘樣組合正確嗎？唔該老師

龔成老師：

京東（9618）業務有質素，發展仍是正面，不過現價就唔算平。

佢係一間電子商業銷售平台，佢定位為「以供應鏈為基礎的技術與服務企業」，現時是中國第二大電商，有一定的品牌。同時，根據《財富》按收入統計的全球500強排行榜，集團是中國最大的零售集團。

佢目前業務已涉及零售、數位科技、物流、技術服務、健康、保險、物流地產、雲計算、AI和海外等領域，其中核心業務為：零售、數位科技、物流、技術服務四大板塊。

京東已建立自己營運覆蓋全中國的物流基礎設施，以支持電商業務，打造了線上購物體驗，係2017年、2018年、2019年，活躍用戶數達到了2.9億、3.0億、3.6億。可見已建立了一個巨大的網絡。

佢經營線上零售，以及電商平台業務，線上零售業務方面，從供應商購買產品，然後直接銷售給客戶，並從24,000多家供應商採購商品。

佢的物流基礎設施佈局覆蓋了中國幾乎所有的區縣，包括遍佈89個城市、累計總建築面積約1,690萬平方米的700多個倉庫，包括京東物流技術開放平台所管理的倉庫面積。

從質素上，這股不差的，現價算是合理區中上部至頂，如果買，都可以，但要控制注碼。這股可以長線投資的。

90後，財富仍有增長力，吉利（0175）及京東（9618）都可考慮，吉利會略好。

而你現時持有的，都是有質素的股票，屬平穩增長類，可長線，而中銀香港（2388）有質素，平穩增長類，長線可以，現價合理。

我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。所以，你慢慢加入吉利及京東，是可以的，最重要是注意整個財富組合的比例，以及要有現金剩剩。

------------------------------------------------

Q21460：

想問平安好醫生 同 2382 現價值買？

同3067

龔成老師：

平安好醫生（1833）長遠有發展力。

佢係中國領先的一站式醫療健康系統平台，透過「移動醫療+AI」，為每個家庭提供一位家庭醫生，為每個人提供一份電子健康檔案、一個健康管理計畫。

平安好醫生係中國互聯網醫療健康市場的先行者，以平均月活躍客戶，以及在線諮詢量計，是中國最大規模的互聯網醫療健康平台。

企業的業務有潛力，本身有優勢，大環境的配合，都成了這企業的機遇，前景正面，不過財務數據未算好理想。

雖然長遠的企業價值向上，但股價在中短期，可以十分波動，因為市場以「前景」作估值，故此變化必然很大。好難得出平貴的準確數，只能估估下，作參考。

因此，低風險者未必適合投資，若投資者考慮這股，亦不能大注投資，買入後就耐心長線持有，等待這企業改變整個行業的情況，現價算合理區頂，但好波動，月供就得，如直接買入只能小注。

舜宇光學科技（2382）有一定的質素，但現價合理區頂至略貴。

過往手機市場高增長，令佢鏡頭業務受惠不少，但近年手機增速開始減慢，你預佢增長力會變得較平穏。不過，手機市場又開始向好。

在長遠，無論是手機鏡頭，又或是各種鏡頭方面的應用，只會愈來愈廣泛，前景正面，不過，中短期可能會有少少波動。

這股可以長線投資，分注或月供較好。

安碩恒生科技（3067），有長線投資價值。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂至略貴，因此，這刻不能大注投資。最好的策略，就是月供，或自行分注小注慢慢收貨（例如每月買一次、或2個月買一次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q20481-Q20500）

Q20481：

老師，我整嘢食都有啲天份，自家製XXXX都人人皆讚。

我有一個想法，想開拓自己的另一事業，如網上賣以上的産品，我應該從邊方面入手呢？請老師指點迷津

龔成老師：

當然可以。

你最重要是找到自己產品的獨特性，因為市場上已經有你這些產品，你怎樣令人記得你，買你產品？

你不要同你比做到最好，而是要有「自己的特色」，這是最重要的。

建議你「集中開發」某些產品。不要雜，要專。

另外，你要想想怎樣將產品「市場化」，一個好食的產品，不等如好賣，想想麥當勞，當中的包要造其實無難度，但就無人有佢咁賺錢。

另一點，你要建立宣傳及銷售網絡，網上是一個方向，你可以開始自己的網上銷售，可利用不同的方法宣傳，例如教人整野食，怎樣用你的產品等。

你其實可以從身邊人著手，慢慢擴大銷售網絡。

「銷售網絡」是最難的一步，你未必會好快見到效果，但就要多想方法怎樣做好。加油！

------------------------------------------------

Q20482：

老師您好，今年30，工作穩定持有一個自住物業。本身唔太鐘意短炒所以比較少接觸股票，由上年開始留意你的fb才開始嘗試投資。

本身已穩定月供3000盈富同每月少量買入3067。

現預留20萬現金希望再投資增長比較高的潛力股，計劃10萬以月供股票形式每月供
阿里3000、港交所2000

另外10萬預留大跌市再入貨，請問方向同配置正確嗎？

另上年已經睇好比亞迪，但當時初試投資比較保守最後決定供盈富基金。想問如果以而家價位再係上面的組合分出位置月供比亞迪會唔會已經唔太適合 / 應該去到邊個價位先再入手會比較理想？

感謝，祝身體健康。

龔成老師：

你持有盈富（2800）及3067，方向正確，長線持有就得。

你月供阿里（9988）、港交所（0388），可以，這兩隻都是有增長力的股，適合你年齡。只要長期進行就得。

再預留$10萬等跌市入貨，可以。

至於比亞迪（1211），潛力股，但現價貴，擔心你買貴左，可以等回翻少少先小注，又或者考慮：GX中國電車（2845），這基金的目標是追蹤Solactive中國電動車指數NTR「相關指數」表現緊密相關的投資回報。

持股中最重就係比亞迪A股（002594），以及與中國電動車產業有關的股票，中國因為能源問題，長遠一定要發展電動車，這是大方向，故此股有一定投資價值。

由於近期不少車股被炒起，此股現價略貴。無貨可以現時入少少，到有明顯回調才再慢慢加注。

潛力度是有的，但會比較波動，如投資宜慢慢分注，可長線。

------------------------------------------------

Q20483：

龔成老師，你好。本身無乜股票同投資概念，最近先有緣睇到你既fb page，想問返你其下既書for我哩個情況應該睇邊本先？

同埋想問點睇個價值唔值得入？我見你話可買盈富個d,但其實而家3x 我係咪要等佢低返d先買定其實都可分批入手？謝謝

龔成老師：

你可首先睇：

《80後百萬富翁》
《股票勝經》
《財務自由行》

之後再睇其他。這幾本都是適合初學者的。

至於盈富（2800），現價未算貴，但當然比之前上左唔少，所以，可以用月供，或者分注投資的策略，只要同時留到現金就得。

或者你可以現價小注買入先，等跌先加注。

------------------------------------------------

Q20484：

龔Sir好，請問可以評價一下我現時持有的股票組合嗎？該止賺止蝕還是持有？謝謝您的幫忙

175、305、941、1810、2333、6666、6690

龔成老師：

上述的股票，基本上都有質素的，問題不大。

五菱汽車（0305）質素算中等，不建議持有太過多。

雖然潛力度有的，但同時都有風險。

近期款新能源車「五菱宏光MINIEV」已較平民價出售，令銷售打嬴TESLA之餘，增長也算理想。

但我地分析時，唔可以只用咁短時間，就去決定一間企業品牌。這個平價車模式，可否能為佢持續增長，依然係一個問號。

以佢過去幾年，最高單年純利都不足2億，但現時市值好高，已經係唔平。近期此股急升了不時，此刻投資有一定風險。

如果以長遠角度分析，佢主要業務為於中國從事汽車零部件、發動機及專用汽車之製造及銷售業務。為中國商用微車發動機及汽車零部件之領導製造商，製造設施設於柳州及青島。

最近有中國品牌電動車大賣，而五菱汽車有做供應所以在當中有利益，因此都有潛力度，但真實的市場情況仍要觀察。

另外一個問題，你持有多隻與車企，你要留意集中風險。

至於恒大物業（6666）其實都有質素，不建議持有太多，因為負債交。

佢係物業管理服務運營商，佢係中國物業服務百強企業中，以項目所覆蓋城市數目計，佢排名第二，如果以總收入、總毛利及總淨利潤計，排名第三。

類別為中高端住宅物業、寫字樓及商用物業，並已訂約管理其他物業類型如主題樂園、產業園、康養項目、特色小鎮及學校等。

佢絕大部分物業管理服務收入，來自集團控股股東恒大集（3333）所開發物業提供的服務。

但負債高始終有風險，同時令股價上落較大。

------------------------------------------------

Q20485：

老師你好..我認識你是透過FB, 看完你幾個post 同YouTube video 覺得你説話很像我爸爸，不知道為什麼他說話我就是不聴，外人說的就好像很有道理。廢話少講吧！

我有兩件事唔知點解決，若你有空，可以給我小小意見
。

背景：我是一個單親媽媽40 歲，在航空公司工作，疫情之前年薪over $100 萬，也算是中產，屋企及孩子所以支出也是我負責。

因為這個疫情，航空公司工作近乎停頓而我也差不多1年三個月沒有收入...這段時間也是靠積蓄過活，不過我相信疫情過後，旅行社必有光境。

在這段時間我付出25萬與朋友創業，這行業不是我專長，所以我唔知怎樣做...原因是舖頭，開張差不多三個月一單生意都冇

因為支金有限我們又不知怎樣做宣傳，怕浪費了而不見成效，舖頭每月開支大約$30000，老師你可以比點意見我怎樣走出這個困境？謝謝

龔成老師：

其實初次創業，應該做一些自己較認識，以及較了解市場的類別，要見到有市場先去開鋪，不能開左舖先知當地有無市場。

現時的情況，你怎樣找到市場，你要了解翻，現時你所賣的產品，有無市場？市場在那裡？你怎樣將客戶引到你的店裡。

首先，你盡快了解同行成功的例子，他們是怎樣運作的，他佢的地點怎樣引到客，還是他們有一批固定的客。

可能你店舖的地點，人流並不是你的客源，也有可能是你地店舖的吸引度不足，建議你找一個做過生意的朋友，上去你舖睇下，睇下有那些問題。我相信一定有些核心問題，你要盡快處理。

有時不一定是宣傳問題，你仔細了解市場先睇下點行下一步。

------------------------------------------------

Q20486：

龔老師你好，半年前開始追蹤你專頁，多謝你灌輸正確投資概念。半年來我跟隨你建議的方法開始建立自己的股票投資組合。

在最近開始在朋友身邊聽到有債券基金年息有6-10厘，並每月派息。最近更發現有朋友按樓400萬來購買這些基金。

本人一直心存疑問，這樣還需要上班嗎...所以我也不太相信也沒理會。但昨晚太太問我關於賣出ibond事情，一問之下發現她有購買這些債券基金之意。

所以今次突然請教龔Sir, 這些基金到底是什麼東東？為什麼會有那麼吸引的利息。謝謝！

龔成老師：

利用加按物業，得到資金，投資這些高息基金，的確能創造息差，因為現時按息低，大約是2%，加按得到資金，然後投資高息基金，例如高息基金有10%，就能創造8%的息差回報，提高了每月的現金流。

當然，所有事情都有風險的，而我地最重要是明白當中的利弊。

首先，「債券基金」跟「債券」有所不同，債券基金坊間分好多種，你要小心睇，因為有d風險低，無乜問題，有d則有潛在的風險，絕對不是保本的產品，有機會出現了「賺息蝕價」的情況。

第一，有些基券基金，會投資「高收益債券」，即是「垃圾債券」，你一定要睇睇佢所佔的比率。

債券是到期收翻本金的，債券基金則不是，價格可以上落的，即是有「賺息蝕價」的可能。所以，當息率去到10%，反映基金投資了不少垃圾債券，風險自然更高。

第二，債券基金往往不是單純地持有債券，而是可以作買賣，以及利用衍生工具作對沖等策略，即是可能有價格上的波動。

這點好睇基金經理及市況，如果市況不利，價格可大跌。

第三，加按物業，以槓杆去放大回報，以平息借貸去賺取息差。低息環境時間題不大，但如果日後進入加息週期，不止借貸成本增加，同時債券價格往往在加息期下跌，雙從打擊下，要小心。當然，若然加息步伐不快，息差利潤就可觀。

如你決定投資債券基金，必需理解當中風險和仔細分析。

我並不是說這些基金有問題，而是你要明白當中的風險，利弊。

------------------------------------------------

Q20487：

261gba集團可以买入吗?

龔成老師：

ＧＢＡ集團（0261）主要從事物業發展及金融業務，生意持續下跌，年年虧損，投資價值很低。

不要以為股價1仙可以無得跌，佢可以利用合股，將股價變大，到時可以再跌。

------------------------------------------------

Q20488：

龔sir, 我有朋友未買過股票， 佢對美股有少少研究， 想買啲優質美股e.g. 蘋果，迪士尼。

但問題係，美國無限qe, 而家美股日日升， 我朋友懷疑個市值遠超企業內在價值，因此現時不適合買入。

但佢又驚 唔知要等到幾時個市先會跌， 佢知道長渣現金 只會不們貶值。

龔sir覺得， 無限qe下 ，美股會形成泡沫嗎? 但又好似冇咩原因會令佢出現熊市，再者，龔sir認為現時美股仲可入市嗎? Thx！

龔成老師：

蘋果，迪士尼都是有質素的股票，當然現價唔算平，可以用分注投資的模式進行。

我唔建議100%現金等，最好是買入基本的貨後，再等跌先正式買入。

其實，我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

至於泡沫，現時新經濟股的確有少少熱，所以我地投資時要明白這風險，但無人知幾時升跌，佢可以再上的。我地最重要是睇「企業長遠發展」，中短期股價走勢，就不要太多分析。

------------------------------------------------

Q20489：

老師你好!我最近煩惱緊一件事，希望能聽聽你的寶貴意見。

我和老婆2人現住在一間未補地價的居屋，每月供款13000，樓齡22年，因未補地價所以有一些限制，例如不能二按、不能隨便轉名和再過幾年就好好好難賣出去(因銀行今年都只批17年按揭了

樓齡越大銀行就越少按揭的，因為政府吾做擔保人，白居二或綠表人士要拎四成首期先可以買即超過200萬，拎得出的都去買私樓吾會買咁高樓齡的居屋了)，所以我們現時有三個想法，但吾知個最可行:

現時層樓未補地價市值500萬，300萬時購入，月供13000，2人收入48000

1.賣出去扣除銀行按揭後有250萬現金流，拿200萬做首期再借銀行500萬買一間700萬左右的樓，月供大約21000左右。餘下50萬用在裝修、印花稅、律師費、經紀佣金等費用上

2.直接補回現住單位的地價，向銀行供多200萬，現時地價大約200-220萬(未核實但是這個範圍)，咁就省回時間、裝修、印花稅、律師費、經紀佣金等，現時欠銀行250萬再加200萬即欠450萬。

3.維持現狀，每月供款13000，儲備多些現金流投資股票，但層樓N年後就賣吾出去銀行都吾做二按，如果日後移民都吾可以變動為資產，因未補地價要暗盤先可以租，政府最新政策只可以租一半

即兩間房的未補地價居屋可以放租一間房出去，但實際無咩人咁做的。坊間都有財務公司會借錢俾未補地價的居屋但息好高而且還款期好短，所以吾會考慮。

我同老婆都33歳了，準備要小朋友，有穏定工作，疫情對我們無任何影響，現時就煩惱樓，如果揀1換樓，計過條數其實都無賺的

因都系要孭住咁多債，住的單位面積一樣無變到，仲要浪費時間重新裝修過，我現時間屋其實新裝修4年咋，投咗40萬落去，但換樓就可以多個選擇，揀吾同的私樓或已補地價居屋，我哋都偏向揀返同區。如果揀2，補地價200萬真系貴!

好多人話吾值，寧願額外儲200萬買其他單位收租，我計返我買入價加現加補地價即500萬買入這單位，自住的話又吾覺好貴，但都明白朋友的說話。如果揀3，維持現狀生活就會輕鬆好多，無咩負擔

但吾知道將來會發生咩事，吾補地價又有點擔心年紀大後想移民或搬去其他區都無能力，因為層樓賣吾出去。

我哋都吾知點好，好煩惱，12月上完你的投資股票班後，就很想問你的了，每次上堂時間都很緊湊，未能親自問你，落堂後已過10:30，我住得遠所以都無留低請教你，依家真的諗吾到邊個方案好，唯有打擾你的寶貴時間了。謝謝你!

龔成老師：

以你現時的情況，（3）是最好的。

因為你地打算自住，（1）的投資價值及財富增值雖然較高，但對你地較吃力，同時如果你地純自住，就不用行（1）一步，因為現時的物業都有相同作用。

至於（2），不是不可，但不用太急做，除非你認為這刻樓市好平，但我相位香港樓就算長遠向上，都不是過往倍升模式，所以不急於進行。

所以，暫時就以（3）為主軸。

因為你打算有小朋友，變數較多，這刻先以（3）是較好，同時你在這段時間努力儲蓄、財富增值，日後如果資金足夠，先再考慮是否行（2）。

我覺得你這刻先做好這刻的財富增值，準備好小朋友方面的支出等，之後再睇情況進行下一步。

------------------------------------------------

Q20490：

亞Sir，好高興認識你。喺理財同埋正能量方面跟你學嘢真係獲益良多。

今日唔問你關於股票嘅問題，因為遲d會上你既股票班。

反而我想問亞Sir你睇咁多書，你有冇一張「推介書單」，無論係正向思想或者你覺得好既書我都想知。

P.S. 你所有既書我已經買哂
而家睇咗大概一半

龔成老師：

以下是我認為適合初學者睇的書：

《我十一歲，就很有錢》
《經濟蕭條中，七年賺$1500萬》
《思考致富聖經》
《秘密》
《財富金鑰匙》
《有錢人想的和你不一樣》
《世界上最偉大的成功寶典》
《洛克菲勒寫給兒子的38封信》
《解讀巴菲特》
《巴菲特傳-永恆的價值》
《勝券在握》
《智慧型股票投資人》
《非常潛力股》
《彼得林區的選股戰略》
《誰搬走了我的乳酪？》
《人性的弱點》

（當然，仲有我的書，哈）

------------------------------------------------

Q20491：

你好龔sir，我今年28歲，無投資經驗，手頭有二十萬現金。想問若果以下投資方法好唔好？

銀娛 一手
盈富、領展及港鐵各月供兩千

龔成老師：

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。

你計劃持有的股，及月供的，可進行。

對於投資能力未強的投資者，盈富是很好的工具。

另外，你都可以小注投資安碩恆生科技ETF（3067），但就要明白波動性比上述會高左，同時風險大左，你要自己決定是否投資。你的年齡可以投資較有增長力的，但同時要明白有風險。

現時大市處合理區，可以一邊投資一邊留現金，建議你要留$10萬現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q20492：

龔成sir你好，上次詳細問你問題已經差唔多過左兩年，現時30歲，呢兩年我一直月供盈富$5000，累績14萬，成效覺得幾好，會繼續。

另外有留意最近你介紹的安碩3067，上個月都開始進行一手手咁買，儲股票。

現有手頭上既股票有：
領展
金沙
中生
盈富
安碩
阿里巴巴

睇到現時股價狂熱，唔敢亂入貨，之前領展同中生就係較高位入左，不過以上都係你介紹既優質股，所以會繼續持有。

請問龔成sir以上股票組合仲可以增加邊類股票？或者應該點樣再調整？除左盈富同安碩，其他股票需要等大跌市先再適合入貨嗎？

另外黎緊今年準備新上市既股票你認為邊隻會比較有質素可以少注抽？我比較關注滴滴出行上市，請問龔成sir點睇？

多謝你既分享，令我哋學識唔好亂炒股票，雖然我一開始資金有限，miss左你一直睇好既比亞迪，不過我相信繼續學習就會有能力做百萬富翁。再次感謝

龔成老師：

你現時持有的，都是有質素的股票，你保持持有就得。加上上述不少都是舊經濟類別，無過熱情況。

如果其他股票想入貨，領展（0823）、金沙（1928）仍合理，只要控制注碼可以，而阿里（9988）$250以下合理，你本身有貨，可以等這個位再落多少少加注。

其實你上述的方向正確，保持增加優質股就得，而新經濟類股，就要控制注碼去增持。

至於新股，你可以留意一些獨特性較強的，較難被取代，以及無乜對手的。滴滴出行我相信有投資價值，不過要到時分析先知。

------------------------------------------------

Q20493：

龔成老師, 之前問過你一些股票問題. 前陣子公司大裁員亦得到龔成老師一些提点.

今次有一些投資方向想請教老師. 因為前陣子大裁員關係, 想起自己供了 20 年的 pfund. 20年裡只看過它一次.

幸運的是原來一直揀了高風險投資. 現有大約85 萬. 但由於航空業仍然不景氣, 心怕再有另一次裁員, 又怕世界經濟不穩,

怕如果自己的 pfund 继續放在 high risk, 萬一跌價, 公司又裁員, 怕原有的 85 萬也沒有. (如果公司像以前的稳陣, 我不怕短期的跌價).

所以我正在考慮是否应該將大部分投資轉到中或低风險, 以確保可保本？

但又有朋友說投資市場仍然處於高回報位置. 所以不知怎樣選擇. 之前亦已向老師提及自己年記不輕, 再可以出外我闖的机會不下....

想老師給予一些意見. 謝謝你.

龔成老師：

其實，強積金的配置其實唔複雜，你只要按你的年齡階段，去進行分配就得，年輕時較進取，中年平穩，退休前就保守。基本上你按年齡，慢慢跟這樣比調整就得。

強積金是一個超長線投資，中短期當然會有上落，但就唔需要轉來轉去。

只要按你的年齡，長線配置就得。我自踏入社會工作後，一直都是100%恆指，無變過，根本唔需要理會。

你工作了20年，我相信你是時候，將資金轉到「中等風險」的類別，加上你強積金應該上升了一定數，這時候轉都是時機。

你可以將部分或全部，轉到「平穩型」的類別。但你又不用太保守，因為你未到退休時期。

------------------------------------------------

Q20494：

2018年年底上完老師的堂後開始月供股票如下：
#2800～$12000
#0066～$5000
#0003～$3000（供了兩年，剛停供）
#0002～$3000（供了兩年，剛停供）
#1211～$2000（供了兩年，剛停供）
（多謝阿Sir！！！）

#1398～$2000（供了1年，停供）
#0012～$2000（供了1年，停供）
另有幾手#2638

剛開始月供：
#3067～每月買2手
#9988～$3000
#1177～$3000

想問：

1、希望5年後能每月產生$20000現金流，配置合適嗎？欠收息股？#778什麼價位可入？

2、應如何理解#0003？因派股所以價位會低咗？要繼續月供嗎？

3、#0012、#1398 於2019年一直跌，有D失望，要止蝕？

4. 當年月供 #1211，都係當幫兒子儲蓄，結果⋯⋯他大賺，我則只賺5%。應如何有效投資優質潜力股？

謝謝老師用心分析、慷慨分享！

龔成老師︰

比亞迪（1211）你的持貨，可長線。另外，等佢落翻多D先啟動翻月供。

1） 如果你希望5年後每月有2萬蚊現金流，以股息率5%計，你需要本金480萬。

現時組合合適，由於你需要係增值，收息股的增值效果好一般，唔建議加入。

以恆指過去年平均回報10%計（連股息再投資），你每月投資$20000，5年後只會增值至約150萬。如果要達至你的財務目標，月供金額就需要增大或供更長時間。

現時大市只在合理區，資金唔好盡用。最好留有部份，等大跌市出現時，可以用來掃貨。

2） 煤氣（0003）是優質股，業務理想，可以保持月供。

以往10送1只是數字遊戲，你唔會有真實得益。因為送股後會除淨的，令股價向下調整，每股權益減少，因此前後根本是一樣。

我舉一個例，如果有隻股1送1，之前股價$100，除淨後會自然變成$50，你財富係唔會因為咁而增加左1倍。

3） 唔好因為中短期股價波動，就去沽貨。我地持有一隻股票與否，關鍵位是企業質素、前景，不要被股價變動所影響。

2隻股票都有質素，但工行（1398）收息為主，唔適合你。

4） 潜力股增長力係高，同時風險都係大。而且每隻去到真正爆發時間，都可以好唔同。

係做資產配置時，我地組合唔可以只顧長潛力，咁會太高風險。我地要加入一些"平穏增長股"，去平衡個組合。你按現時月供計劃去做，已經可以。

------------------------------------------------

Q20495：

龔sir，另外，我見你好推薦月供3067安碩恒生科技，我初接觸股票吾太清楚點樣月供，係應該每月投入固定金額還是每月買入固定股數？

而家開始做月供算吾算高位？
係每月隨機時間買入？謝謝回覆

龔成老師：

簡單來說，月供股票就是你每月將現金，買入某一隻或多隻股票，慢慢咁樣儲貨。坊間不少銀行都有提供月供股票服務，你先開證券戶口，然後登記做月供股票。

形式就是每月投入相同的金額，買入同一隻或多隻股票，並持續進行。

例如，每月以相同金額$10,000 買入安碩恒生科技（3067），假設第一個月股價為$25，就能買入400股；第二個月升至$35，就能買入286 股；第三個月跌回$30，就能買入333股。

總結這三個月，投入了的資金為$30,000，累積股票為1019股，平均買入價為$29.4。

由於月供股票每月投入的金額相同，因此當股價上升時，買入的股數自然減少，而當股價下跌時，就自然會買入較多股數，如同自行調節一樣。

要注意的是，由於每月持續投入資金，因此一定要選優質股，長線投資，同時要以儲股票的概念進行，最少持續供3 年以上，之後持有5年以上。

月供最重要的一點，是「選股」，如果你無選股能力，就投資ETF，如3067。

不過，我見好多銀行都無得供3067，或者你可以自行分注去買，例如每隔2個月，入1、2手。

3067現價略貴，但都可以小注，慢慢收貨。

------------------------------------------------

Q20496：

龔成老師，你好，有少少問題想請教一下你，謝謝！
我想問你平常提及需要長線投資優質股，咁幾時先可以走？

現在股票暢旺，可能一兩個月已急升30-40%咁唔走又驚佢跌返落去，走咗又驚買唔返，咁應該點作決策？謝謝指教

龔成老師：

如果股價去到貴的水平，你賣部分是可以的。

不過，建議點都有D貨是「長線持有」。

我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

你賣出優質後，持有「貶值的現金」，怎樣增值？

可能你會認為，賣出等跌再買，是最好的策略，但無人知會唔會跌。

如果你停留在「要賣出」的概念，你就捉不到騰訊（0700）、港交所（0388）升100倍的回報！

------------------------------------------------

Q20497：

你好龔成老師，現為全職媽媽，沒有積蓄，所以想學投資，準備儲蓄去投資，打算為快1歲囡囡的儲備，我都買了你的書學習中

但對投資完全沒有概念，請問如想佢長線穩定的投資應該買什麼呢？

現有幾萬，希望能買一些穩定派息或長遠能有一筆投資儲蓄留給囡囡，謝謝

龔成老師：

你可以考慮ETF，即是交易所買賣基金，由於當中已包了多隻質素不差的股票，因此，對投資新手來說，是一個很好的選擇。

如果你想平穩增長，可以考慮盈富（2800）。如果你想收息，可考慮高息基金（3110）。

你可以用月供股票的模式進行，原理就是儲股，每月投入，慢慢累積，我相信最適合你。

所謂的月供股票就是你每月將現金，買入某一隻或多隻股票，慢慢咁樣儲貨。坊間不少銀行都有提供月供股票服務，你先開證券戶口，然後登記做月供股票。

形式就是每月投入相同的金額，買入同一隻或多隻股票，並持續進行。

例如，每月以相同金額$10,000 買入盈富基金（2800），假設第一個月股價為$25，就能買入400股；第二個月升至$35，就能買入286 股；第三個月跌回$30，就能買入333股。

總結這三個月，投入了的資金為$30,000，累積股票為1019股，平均買入價為$29.4。

由於月供股票每月投入的金額相同，因此當股價上升時，買入的股數自然減少，而當股價下跌時，就自然會買入較多股數，如同自行調節一樣。

要注意的是，由於每月持續投入資金，因此一定要選優質股，長線投資，同時要以儲股票的概念進行，最少持續供3 年以上，之後持有5年以上。

月供最重要的一點，是「選股」，如果你無選股能力，就投資ETF，如盈富。

------------------------------------------------

Q20498：

你好，我囡囡依家20個月，本身冇買儲蓄保，佢加加埋埋有八萬，想運用呢八萬做投資增值，請問阿sir有咩建議？謝謝你！

龔成老師：

首先，你要留有一定的現金，有家庭負擔，要留有一定的防守性資金，我地理財，要「穩中求勝」。

餘下先考慮增值。

最簡單你可以考慮盈富（2800）。

另外再加1、2隻：港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：安碩恆生科技ETF（3067）。

如果不懂選股，投資盈富是最適合的。

------------------------------------------------

Q20499：

龔sir你好，想問如果我買中國移動 PCCW 港鐵呢3隻股票，呢個組合o唔ok？

龔成老師：

可以，中移動（0941）、港鐵（0066）有質素，可投資，現價合理。

至於電盈（0008），雖然業務算穩定，但由於負債較多，因為不是無風險。

這股作為收息股，可以，但增長力不強，同時負債多有風險，不建議大手投資。

------------------------------------------------

Q20500：

你好，龔sir。有問題想請教你。先前發現屋企欠人錢，拎左一部分去還，而家戶口得番10k左右。

因為咁，上年12月開始擺20K/年 係儲蓄保險到 (供5年)，我想開始買股票(唔買應該買唔到)！我應唔應該就咁買唔月供，你先前講既盈富？

另外我需要做其他部署嗎？例如搵多份part time?
目標: 今年想儲番20萬

龔成老師：

我地理財，要平衡，儲蓄保險是防守性工具，你可持有，但不用太多。

餘下的要進攻，你投資股票是可以的。

但由於你現時現金不多，建議你先有基本的現金，然後再開始月供股票。

月供盈富（2800）或其他優質股都得，如果想有較高增長力，就考慮3067（但佔比不宜太多）。

安碩恒生科技（3067），有長線投資價值。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂至略貴，因此，這刻不能大注投資。最好的策略，就是月供，或自行分注小注慢慢收貨（例如每月買一次、或2個月買一次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

#楊世光 #楊世光在金錢爆#隔夜逆回購

00:00《楊世光在金錢爆》每日更新，帶給您最及时的全球經濟分析和財經解讀！想看懂經濟，看懂國際趨勢，看懂財經新聞，看懂A股美股，學習財經金融投資知識，關注我們
01:30 美聯儲 弱就業 強通脹 的貨幣政策？
05:30 從美債 價格 殖利率 觀察大類資產
13:30 另外能推升物價的因子？
18:00 2021 H2物價往哪走？
23:00 2021 H2通脹最大因素？
25:00 美元震盪！
28:00 名目利率 通脹預期 實質利率 拆解
32:30 美股為何還能漲？


💡加世光為Line好友 ，隨時掌握最新訊息👉 http://nav.cx/2NuwkCF 或是ID搜尋 @islllight加入好友 (記得前面要加@)
💡成為金鐵桿，收看會員獨享“乾貨”👉https://www.youtube.com/channel/UCrm095p7ZHRS1njmQ1wkgCg/join
*注意只有金鐵桿及以上等級才能收看每日獨享專題
💡記得打開頻道鈴鐺 光速接收金錢爆資訊

收看全節目：

https://youtu.be/gsGsmilPMbQ

第一節：恆指走勢/氣氛短期轉差要忍下手？/要Bookmark定o既股？/個市調整要有心理準備/科技股、紙漿股/諾輝乾過阿婆？

https://youtu.be/x0_cSdcGo2I

第二節：東風跟規矩？/新股抽唔抽？/C大嬲嬲鬧邊個？/美股睇好睇淡邊隻？/資源股、能源股/跟契媽應該點跟？/個股點評/阿sin唱歌

https://youtu.be/NiHuIZzXYAY


成為 RF 鐵粉團的一分子！只需港幣 $40 一個月，即享獨家影片及專屬貼圖優惠！
https://www.youtube.com/channel/UCETuQf4lzTrfevoHdSGo8Ew/join

成為一名經人Patreon :
https://www.patreon.com/awesomomists

www.RagaFinance.com
RagaFinance Facebook:
https://www.facebook.com/ragafin/

?是日焚道 - Everyday's Vin! Patreon ?
http://patreon.com/calvinchoy

◎◎◎訂閱 ◎◎◎
▶
Ragazine : https://www.youtube.com/channel/UC5DWcqCjBne2-wRnrjxkuHQ?sub_confirmation=1

▶
Raga Finance: https://www.youtube.com/channel/UCETuQf4lzTrfevoHdSGo8Ew?sub_confirmation=1

#RagaFinance #股票梗係炒呢D #股票
------------------------------------------------------------------------------------------------------------------------------------------
免責聲明：《Raga Finance》竭力提供準確資訊，惟不保證絕對無誤，資訊如有錯漏而令閣下蒙受損失（不論公司是否與侵權行為、訂立契約或其他方面有關），本公司概不負責。

同時，《Raga Finance》所提供之投資分析技巧與建議，只可作為參考之用，並不構成要約、招攬、邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《Raga Finance》主持、嘉賓、編輯及記者無關。

同時，《Raga Finance》所有節目或資訊，相關內容屬作者個人意見，並不代表《Raga Finance》立場。
Raga Finance
網址: www.ragafinance.com

【Raga Finance：股票梗係炒呢D 20210218 - 係時候計下數】

主持：Casper、殺手、阿Sin

全節目：

https://youtu.be/gsGsmilPMbQ

第一節：恆指走勢/氣氛短期轉差要忍下手？/要Bookmark定o既股？/個市調整要有心理準備/科技股、紙漿股/諾輝乾過阿婆？

https://youtu.be/x0_cSdcGo2I

第二節：東風跟規矩？/新股抽唔抽？/C大嬲嬲鬧邊個？/美股睇好睇淡邊隻？/資源股、能源股/跟契媽應該點跟？/個股點評/阿sin唱歌

https://youtu.be/NiHuIZzXYAY


成為 RF 鐵粉團的一分子！只需港幣 $40 一個月，即享獨家影片及專屬貼圖優惠！
https://www.youtube.com/channel/UCETuQf4lzTrfevoHdSGo8Ew/join

www.RagaFinance.com

RagaFinance Facebook:

https://www.facebook.com/ragafin/

?是日焚道 - Everyday's Vin! 加入Patreon
http://patreon.com/calvinchoy

◎◎◎訂閱 ◎◎◎

▶
Ragazine : https://www.youtube.com/channel/UC5DWcqCjBne2-wRnrjxkuHQ?sub_confirmation=1

▶
Raga Finance: https://www.youtube.com/channel/UCETuQf4lzTrfevoHdSGo8Ew?sub_confirmation=1

#ragafinance #股票梗係炒呢D #股票
------------------------------------------------------------------------------------------------------------------------------------------
免責聲明：《Raga Finance》竭力提供準確資訊，惟不保證絕對無誤，資訊如有錯漏而令閣下蒙受損失（不論公司是否與侵權行為、訂立契約或其他方面有關），本公司概不負責。

同時，《Raga Finance》所提供之投資分析技巧與建議，只可作為參考之用，並不構成要約、招攬、邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《Raga Finance》主持、嘉賓、編輯及記者無關。

同時，《Raga Finance》所有節目或資訊，相關內容屬作者個人意見，並不代表《Raga Finance》立場。

Raga Finance

網址: www.ragafinance.com