一代球王、馬勒當拿、巨星殞落！不要為他哭泣丶阿根廷
RIP Maradonna

延伸閱讀：https://jamestrip.com/2013/09/15/布宜諾斯的小意大利/

【布宜諾斯的小意大利】

布宜諾斯的南部是老區， 最早的歐洲殖民者1536年在La Boca(保加，又名 “小意大利”)登陸，成為早期意大利擁入的貧民集居地，以Caminito(卡美尼托，彩色小路)和小保加球隊聞名於世。相鄰的San Telmo(聖特爾莫)是探戈的發源地，有歷史最悠久的星期天巿場、「春光乍瀉」老酒吧。

繽紛熱鬧，彩色小路
坐的士，前往保加區La Boca(意即河口)，以Caminito卡美尼托(我喚它作彩色小路)著名。40披索車費，10分鐘後停在保加港口。海風吹拂，陽光燦爛，將岸邊五顏六色的鐵皮屋，照得如同七彩鑽石一樣，令人眼花繚亂。這裡是百年前意大利移民的落腳點，當年他們向入港的輪船船員索取剩下的油漆，所以每一間鐵皮屋的顏色都不一樣，反而變成了這個貧民區的特色。
彩色小路Caminito的故事更有趣。這裡原本是英國人經營的鐵路，1954年廢棄後，成為垃圾場，1960年代阿根廷畫家家Benito Quinquela Martín開始為該區域廢棄的街道牆壁畫上粉紅粉藍的顏色，此區慢慢成為街頭藝術家的露天博物館。知名探戈歌曲Caminito，其創作靈感就是來自於此地。

彩色小路Caminito擠滿了遊客，街口有很多橙色背心的警察站崗，但保加其他馬路，空蕩無人，店舖都全部拉上鐵閘，滿街垃圾，不宜前往，治安惡劣。

彩色小路的入口，就是一間叫做Caminito的酒吧 ，得名於那首同名的探戈名曲。
門口是最多人拍攝的景點，前面有一男一女做出探戈的招牌動作，定鏡給遊客拍照，怎知當拍攝完畢，男士就除去帽子及外套，原來他是一個俄羅斯的遊客，付費索給女舞者合影。

觀察了一會兒，有兩對探戈舞者在這裡做生意，各有地盤，並準備了外套、帽子、頸巾，給我穿戴上後，就教我擺三個不同甫士拍照，盛惠50披。舞女叫我抱著她，放在我大腿上，好在她不太重，不然我會放手! 再叫我望著她，她上身壓著我，臉幾乎貼著臉，她的鼻孔在我的嘴角重重地呼吸，大庭廣眾之下，實在令人臉紅耳赤。

兩旁的彩色小屋地下都擠滿遊客的餐廳及店舖，二樓的露台，站滿了名人，包括貝隆夫人、哲古華拉、馬勒當拿，歡迎遊客。仔細一看，原來都是雕像。餐廳都有現場表演，將舞台設在門口，不需幫襯也可站在門外欣賞，一個不夠十歲的小女孩，表演唱歌及雜技，這算是童工嗎?

小保加足球場
無論阿根廷經濟如何不景，打仗又輸給英國。但無可否認，阿根廷足球，足以令國人重拾尊嚴和愛國熱情，因為曾兩奪世界盃，及十四次美洲盃冠軍。阿根廷足球員成名之後，大多都會賣去其他歐洲國家球隊，例如四奪世界足球先生的美斯。

走到街尾，已經在一堆彩色鐵皮屋的後面，看到一個高大的足球場，那就是世界聞名的小保加球場(Boca Juniors La Bombonera)，不看球賽的人都聽過馬勒當拿的大名，他就是令這個貧民區球隊小保加名揚海外的傳奇英雄。

行三個街口，就到了球場的正門。遊客都在隊徽下影相，這隊徽有個小故事。小保加成立之日，沒有Logo，球員商議，以下一首入港的輪船顏色為主色，結果見到瑞典船入港，就採用了瑞典國旗的顏色作為隊徽。意大利人果然天真隨性，令我想起布宜諾斯艾利斯的來源，也是發現此地的西班牙船員隨口一句:"Buenos Aires(意即Beautiful Air 美好空氣)而得名。他們毫不介意，公吿世界，我們就是這樣天真無邪!

官方紀念品店的前面，是有點殘破的星光大道，留有球星的手印或腳印，門口的中間是馬勒當拿的名字，不過仔細一看，沒有他的手印或腳印，有點兒欺騙遊客。其實馬先生只在小保加踢過一個球季。紀念品店中間，還有一個馬先生的銅像，原來他個子很矮小，目測只有一點六米。除了例牌的球衣、球巾等，小保加照顧球迷的全家十分週到，太太可以買鑲了小保加字眼的水晶T-back內褲，兒女由口水肩到BB衫，一應俱全。旁邊還有博物館收費60披索，展示球隊的威水歷史及獎盃。

由於保加是貧民窟，治安麻麻。除了彩色小路和球場，其它街道水靜河飛，一個路人都沒有，店舖都拉上了鐵閘，實在令人擔心。
(節錄自《十天敢動假期: 阿根廷、南極》)

【#Patreon突發時空🇦🇷】消息剛傳來，一代阿根廷球王馬勒當拿病逝，享年60歲。相信很多同代人，都對他有深刻印象。阿根廷球星美斯是當今球王，在該國內普遍被視為馬勒當拿接班人，就連馬勒當拿本人也這樣認為。但馬勒當拿在阿根廷之獨特地位，除了靠球技，還有種種天時地利人和配合，才令這位私生活一團糟的球王得以成為「半神」，乃至出現「馬勒當拿教會」，這些都不是生於這時代的美斯可得到......

⏺全文見Patreon
https://www.patreon.com/posts/44310361
▶️美國極左女神AOC：十年後，左翼特朗普君臨天下？
https://www.youtube.com/watch?v=zV_ZH22RwnI

［踢爆馬勒當拿］（＊）馬勒當拿同中央銀行有乜共通點？就係，fake下你你就自動跌低啦，本尊唔使扭左扭右。

TLDR：你估我射左射右，我就射中間。

1. 馬勒當拿有幾好波呢個不用講（我都係諗起錢鍾書講，文人最鍾意有人死，越大越得呢句嘢極到肉）。但，金融又關佢事？關！應該全香港冇人寫過？有嘅我刪走呢句嘢

2. 首先，介紹返。「嗰一球波」，1986年。為照顧太年青嘅讀者，畀條link你（https://ytube.io/3BfQ）。由鐵娘子福克蘭戰爭講起都仲得（＊＊）。但我年紀有幸電視睇過嘅，根本講馬勒當拿，「嗰一球波」，就係「嗰一球波」咯。

3. 然後就去到2005年。當其時嘅英倫銀行行長，係默文金Mervyn King．此人係超級球迷。阿士東維拉鐵粉，後來坐維拉董事會，亦都安排維拉啲名宿同英倫銀行職員踢下衞生波。

4. 仲有，當年維拉有個球員叫德國希斯佩加（Hitzlsperger，此人應該係最高調出櫃嘅足球員，但都係退役後）。此人對經濟金融十分有興趣，在英國直頭去讀，不過冇拎到學位。而佢就成日同Mervyn King見面傾計，學返兩招咁。「你想唔想像到港超啲外援搵任志剛飲茶？」

5. 講返Mervyn King，2005年佢就提出呢個「馬勒當拿利息理論」（是真的），大意如下：如果中央銀行完美咁利用加減息控制到通脹呢，你會見到乜？就係見到通脹穩定。但對於觀察者（例如記者）嚟睇，佢地會以為央行亂嚟，加減息嘅決定同通脹無關—但呢個諗法係錯！如果真係亂嚟，你就會見到通脹完全唔穩定。正係因為央行控制咗，先令到通脹穩定，然後反而令央行好似亂嚟。

6. 太深？就係一個字，期望管理。（原文冇，我加嘅）

7. Mervyn King然後就話，呢個就係「馬勒當拿利息理論」。作為英國人，佢不忘抽返馬勒當拿水，話佢好彩走甩咗「上帝之手」。但重點係第二個入球，對，「嗰一球波」

8. Mervyn King話：拿你睇，馬勒當拿帶波60碼，過咗5個英格蘭球員。但有乜特別？有冇留意，佢連波都冇扭咁滯？差不多係一條直線咁。有乜可能？點解直線帶波就過咗5個英格蘭球員？

9. 就係同頭先講央行加息一樣啦！期望管理，佢地以為馬勒當拿會扭左扭右，自然就標波，所以馬勒當拿就可以直線帶波—就正如央行一樣，市場預期央行會扭左扭右加息減息，自然就走去反應，變咗央行好似咩唔使做，就已經做到效果。

10. 講到尾，「唔好以為央行白出糧冇做嘢呀」「實則fake下你已經做到嘢，唔使用劍嘅」。好得閒睇全文，怕我解錯嘅，自己去睇（https://bityl.co/4bEH）

11. 實情，我係一個月唔夠之前再見到有人提呢樣嘢，剛好馬勒當拿60大壽前不久。話英倫央行不停出口術講負利率，結果最後就唔使用。原因同上。出口術兇你，市場情況自然會調節到唔需要用負利率嘅環境

————————————————————————————

12. 另外，講馬勒當拿，必定要講拿坡里（拿不勒斯），呢個意大利南部城市。有啲文化嘅波佬都會同你講意大利南北之爭，南部長期都窮，冇權力，你見你數得出嗰堆球會或大公司，差不多全部都係北邊。南部最出名就只有 Pizza，同埋黑手黨。但就係馬勒當拿幫拿坡里吐一口烏氣。埃汾都去過拿坡里，當地人真係 Literally 當佢神咁拜。我在碼頭買飛，入面掛住兩張畫，一張係聖母瑪利亞，一張就係佢。星期四晚拿坡里咁啱就主場，可惜冇觀眾。拿坡里一路申請將個球場改名做「馬勒當拿球場」，但意大利法律禁止用離世未夠十年嘅人去命名公眾建築物。

13. 當然另一重點係，嗰個年代足球仲係相對地比較「貼地」，比較「社區」，唔係啲亞洲人（你同我）走去買貴飛打卡。球員亦都冇咁離地，好多都係出身貧富，哪怕搵到錢都冇咁背離自己嘅階層，同而家有人脈嘅球二代又唔同了。況且嗰時球員人工同普通打工仔亦冇爭咁遠，「顧錦輝住我隔離單位咋」。

14. 不過多得舊年套「真球王馬勒當拿」（Diego Maradona），應該好多人知或者唔少人寫，所以我就唔寫了。

（＊）Maradona by Kusturica，戲嚟的，youtube有，自己搵吧，唔知有冇侵權。當年同完全唔睇波嘅女朋友在電影節睇。而「嗰一球波」，在套戲到，播咗有冇三十次？你可以數下。然後就知點解「嗰一球波」，係「嗰一球波」。

（＊＊）除咗踢波外，後來阿根廷只能夠在2012倫敦奧運拍條片自high下（https://bityl.co/4bDS）。偷偷地走咗去福克蘭群島拍片，'To compete on British soil, we train on Argentine soil'。就係咁飛咋架咋。冇錢講乜都假。

-------------------------------------------------------------
Ivan Patreon，港美市場評點，專題號外，每日一圖，好文推介。每星期6篇，月費100蚊唔使，3個月已700人訂！（https://bityl.co/4Y0h）